တွၼ်ႈသိပ်းၸဵတ်း
ယၢမ်းၵၢင်ၶိုၼ်းလိုၵ်းယဵၼ် ၸဝ်ႈလွၼ်ႉၶိူဝ်းဢၼ်ၼွၼ်းဢမ်ႇႁူႉႁူဝ်ႁူႉႁၢင်ယူႇၼၼ်ႉ၊ တီႈႁူင်းႁဵတ်းယႃႈ ဢၼ်ဝၼ်းၸိုၼ်ႈလႆႈၵႂႃႇသူင်ႇပွၵ်ႈပူၼ်ႉၼၼ်ႉၵေႃႈ ၾႆးမႆႈလုၵ်ႉႁုၼ်ႈႁုၼ်ႈလႅင်ၸၢင်းဢၢင်းလူင်ဝႆႉ ၵူၼ်းလမ်ၽိုတ်းလမ်ၽၢတ်း ဢႅၼ်ႇလႅၼ်ႈၵၢၼ်းဢွၵ်ႇမႃးၼႂ်းမုၵ်ႉၾႆးလူင်ၼၼ်ႉ လႄႈ ၽႂ်ၵေႃႈဢမ်ႇတၼ်းၶႄလႆႈယဝ်ႉ တေႃႈၼင်ႇသၢႆၸႂ်ၵူၼ်းၵမ်ႈၽွင်ႈ ယင်းလႅပ်ႈပႃးၵႂႃႇၸွမ်းမုၵ်ႉၾႆးၼၼ်ႉလူးၵွၼ်ႇ။
ဝၼ်းၸိုၼ်ႈဢၼ်ၼုင်ႈသႂ်ႇတင်းသိူဝ်ႈၶူဝ်းလမ်ၽိုတ်းၽိုတ်းၼၼ်ႉၵေႃႈ ၸုၵ်းယူႇၼိူဝ်ၵိင်ႇမႆႉ တီႈၵုင်းႁိမ်းၼၼ်ႉသေ မုင်ႈတူၺ်းၵႂႃႇယူႇ၊ ႁူမ်ႈပႃးတင်း သၢင်ႇမူၼ်း ၽူႈလၵ်ႉဢၼ်ဝၼ်းၸိုၼ်ႈၸွႆႈဝႆႉၼၼ်ႉ ၼင်ႈသေလုတ်ႇလႅၼ်းယႃႈမၼ်းယူႇႁိမ်းဝၼ်းၸိုၼ်ႈယဝ်ႉ။
“ႁဵတ်းၵၢၼ်ၸွမ်းမႂ်းၼႆႉ မိူၼ်ငၢႆႈယူႇ ၵူၺ်းၵႃႈဢမ်ႇငၢႆႈႁေမဵဝ်းၼၼ်ႉယဝ်ႉ”
“ဢမ်ႇမီးသင်ဢၼ်ငၢႆႈလႄႈ ဢၼ်ႁဵတ်းဢမ်ႇလႆႈဢမ်ႇၸႂ်ႈႁိုဝ်လႃႇ ၵႂႃႇၼႂ်းႁူင်းမၼ်းယဝ်ႉ လႆႈမႃးၵႃႈႁိုဝ်လႃႇဢၼ်ၸပ်းတိၼ်ၸပ်းမိုဝ်းမၼ်း”
“လႆႈမႃးၵႃႈႁိုဝ်ၵေႃႈ ဢမ်ႇပၼ်လေႃႇၼႃႈ!!”
“တေၸႂ်ႉငိုၼ်းၵေႃႈ တူၺ်းတီႈတူၺ်းတၢင်းၽွင်ႈလႄႈၼႃႈ ၵူဝ်ဢမ်ႇတၼ်းလႆႈၸႂ်ႉငိုၼ်းဢၼ်ႁႃမႃးၼၼ်ႉမူတ်း”
“ႁိုဝ်ႉ!! ၵဝ်ဢမ်ႇလူဝ်ႇႁဵတ်းၵၢၼ်ပၼ်မႂ်းၵေႃႈ ပေႃးလဵင်ႉလုၵ်ႈၶဝ်ႈလႆႈယူႇၵူၺ်း”
“မိူၼ်တေတူၵ်းလိုၼ်းယဝ်ႉယူဝ်ႉ လုၵ်ႈမႂ်းၵဝ်လႆႈသူင်ႇမၼ်းၵႂႃႇႁဵၼ်းၼွၵ်ႈမိူင်းယဝ်ႉ” ဝၼ်းၸိုၼ်ႈၵေႃႈ လူင်းတူၼ်ႈမႆႉၵႂႃႇသေ “ၸၢမ်းတူၺ်းလႄႈ ပေႃးမႂ်းလဵင်ႉလုၵ်ႈမႂ်းလႆႈယူႇၵေႃႈ ၵႂႃႇလႃႈ ၵဝ်ပၼ်မႂ်းလွတ်ႈလႅဝ်းယဝ်ႉ၊ ၵူၺ်းၵႃႈ မိူဝ်ႈလႂ်မႂ်းလူဝ်ႇတၢင်းၸွႆႈထႅမ်မႃး ၵဝ်ၵေႃႈၽွမ်ႉတႃႇၸွႆႈထႅမ်မႂ်းလႆႈတႃႇသေႇယူႇ” တင်းလၢတ်ႈတင်းႁႅၼ်ၸူး သၢင်ႇမူၼ်း ဢၼ်တိုၵ်ႉၼင်ႈတွင်ႇတွတ်ႈၶႃယူႇတီႈၵိင်ႇမႆႉၼၼ်ႉ “ႁူႉယူႇဢမ်ႇၸႂ်ႈႁႃႉ ၵူႈလွင်ႈဢမ်ႇလႆႈလၢႆမႃး တေလႆႈသၢႆႈတႅၼ်းပၼ်ႁႂ်ႈၵိုင်ႇၵႃႈမၼ်းဢိူဝ်ႈၼႃႈ”
ဝၼ်းၸိုၼ်ႈၵေႃႈ ႁၢႆၵႂႃႇၼႂ်းပႃႇလပ်းသိင်ႇ ဢၼ်မီးၾႆးမႅပ်ႈပိူင်းလုၵ်ႉႁုၼ်ႈႁုၼ်ႈယူႇၼၼ်ႉသေ ယၵ်ႉယဵမ်ႈတူၺ်းၵႂႃႇ တီႈၼႂ်းၵွင်ၾႆးၼၼ်ႉ သမ်ႉပေႃးႁၼ်ႁၢင်ႈဢၼ်ပိူၼ်ႈၽဝ်ပေႃႈမႄႈပီႈၼွင်ႉမၼ်းၼၼ်ႉ မႃးၵမ်းလဵဝ်ယဝ်ႉ။
“ယၢမ်းၼႆႉ ၽေးၶဵၼ်လူင်ၼၼ်ႉ ဢမ်ႇၸႂ်ႈၵူၼ်းမိူၵ်ႈလိူင်းၸိူဝ်းၼၼ်ႉၵူၺ်း ၵူၼ်းလမ်ႇမၢၵ်ႈလေႃးၽၶဝ်ၼၼ်ႉၵေႃႈပႃးၸွမ်းယဝ်ႉ” ဝၼ်းၸိုၼ်ႈၼၼ်ႉၵေႃႈ သိုပ်ႇၵပ်းၸၢၵ်ႈလၢတ်ႈၵႂႃႇတီႈ ၵူၼ်းမၼ်း ႁႂ်ႈမႃးၸတ်းၵၢၼ်ဢၼ်လိူဝ်ၵႂႃႇၼႆယူႇ။
သမ်ႉဝႃႈၸဝ်ႈမိူင်းၶမ်းၵုမ်းၵမ်ၵူႈလွင်ႈၼႂ်းတပ်ႉၵွင်မၼ်းသေတႃႉ ဢမ်ႇလႆႈမီးၵူၼ်းၵူႈၵေႃႉ ဢၼ်ႁၼ်လီၵမ်ႉထႅမ်ၸွမ်းမၼ်းၵူႈလွင်ႈ၊ မၢင်ၵေႃႉၵေႃႈ ဢမ်ႇထုၵ်ႇမႅၼ်ႈၸွမ်းမၼ်းၵေႃႈမီးယူႇ ၵူၺ်းၵႃႈ ၵွပ်ႈၶေႃႈၵႂၢမ်းဝႃႈ ပဵၼ်ၽူႈဢွၼ်ႁူဝ် ဢၼ်ၵူၼ်းပႃႈၼိူဝ်တၢင်ႇၶိုၼ်ႈပၼ်လႄႈ ၵႃႈလႆႈႁဵတ်းၵႂႃႇၸွမ်းၶေႃႈၸီႉသင်ႇၼၼ်ႉၵူၺ်း။ ဝၼ်းၸိုၼ်ႈၵေႃႈ ႁူမ်ႈမိုဝ်းတင်းၵူၼ်းၸိူဝ်းၼႆႉ လူၺ်ႈမီးၸၢႆးလိူၼ်ပဵၼ်တူဝ်ၵၢင် ဢွၵ်ႇတူင်ႉၼိုင်ႁဵတ်းသၢင်ႈၵႂႃႇယဝ်ႉ။
တေႃႇထိုင်ၵၢင်ၼႂ်ၸဝ်ႉ ၵူၼ်းသိုၵ်းၶဝ်ၵေႃႈ မိူၼ်လႅပ်ႈတေဢမ်ႇလႆႈၼွၼ်း ၸွမ်းၶူၼ်ႉသွၵ်ႈႁႃ ၸွမ်းဢွင်ႈတီႈႁဵတ်းယႃႈၼၼ်ႉ မီးထႅင်ႈၶူဝ်းၶွင်တင်းၼမ် ဢၼ်ၽင်လိၼ်ဝႆႉလႄႈ ဢၼ်ၾႆးဢမ်ႇမႆႈၸွမ်း ၼင်ႇႁိုဝ်ၶွင်ၸိူဝ်းၼၼ်ႉ ပေႃးတေဢမ်ႇႁွတ်ႈထိုင်ၼႂ်းမိုဝ်း ၸဝ်ႈမိူင်းၶမ်းၼၼ်ႉ ၶဝ်ၵေႃႈ ဢွၼ်ၵၼ်ၶုတ်းၽဝ်ၵႂႃႇတီႈၼၼ်ႈပႅတ်ႈၵမ်းလဵဝ်ႁေ လၢႆးငၢၼ်းဝႃႈ ၾႆးမႆႈမူတ်းသဵင်ႈယဝ်ႉၼႆၵႂႃႇၵူၺ်း။
ၸဝ်ႈလွၼ်ႉၶိူဝ်း ဢၼ်တိုၼ်ႇမႃးႁၼ်မေးမၼ်း မေႃးတႂ်ႈမေႃးၼိူဝ်ယူႇတင်းၼႂ်ၼၼ်ႉၵေႃႈ သမ်ႉပေႃးၶႂ်ႈဢႅၼ်ႇလႅၼ်ႈပၢႆႈဢွၵ်ႇႁိူၼ်းၵႂႃႇၵမ်းလဵဝ်ယဝ်ႉ၊ မၢင်ၵမ်းမႃးၵေႃႈ ႁမ်ႉလႅပ်ႈလၵ်ႉၸႂ်လမ်ဝၼ်းၸိုၼ်ႈမႃးယူႇ၊ သမ်ႉဝႃႈႁွင်ႉႁႃဝၼ်းၸိုၼ်ႈသေတႃႉ ဝၼ်းၸိုၼ်ႈဢမ်ႇယူႇယဝ်ႉ၊ ယိုင်ႈႁွင်ႉ သဵင်ပွင်ႉယိုင်ႈလင်ၵူၺ်း၊ ဢမ်ႇၸၢင်ႈႁဵတ်းႁိုဝ် ၵႃႈလႆႈၼင်ႈႁေထွမ်ႇယူႇၵူၺ်းယဝ်ႉၼႃႇ။
လႃႈယူႇတၢၼ်ႇတၢၼ်ႇ ဝၼ်းၸိုၼ်ႈၵေႃႈ ၶဝ်ႈႁိူၼ်းမႃးလၢႆးငၢၼ်းၸူးမၼ်း လွင်ႈဢၼ်ၾႆးမႆႈတီႈႁဵတ်းယႃႈၼၼ်ႉၼႆလႄႈ ၸဝ်ႈၶွင်ႁူင်းႁဵတ်းယႃႈၼၼ်ႉၵေႃႈ လႆႈမႃးႁူပ်ႉထူပ်းတင်းမၼ်းၸဝ်ႈယူႇ၊ ၼၼ်ႉတႄႉၵေႃႈ ပဵၼ်ၸၢင်းဝူၺ်ႇၵူၺ်းၼင်ႇၵဝ်ႇ မိူၼ်ဝႃႈ ပွၵ်ႈၼႆႉ မၼ်းတေလႆႈလူႉသုမ်းယႂ်ႇၼမ်တႄႉတႄႉလႄႈ မႆႈၸႂ်မႆႈၶေႃး လေႃးပႃးလွင်ႈဢမ်ႇႁၢၼ်ႉၸႂ်တေႉတေႉယူႇယဝ်ႉ ယွၼ်ႉပိူဝ်ႈ ၵူၼ်းသိုၵ်းၶဝ်ၵႂႃႇ ဢမ်ႇၵႂႃႇၸွႆႈသေဢမ်ႇၵႃး သမ်ႉပၢႆၽဝ်ပႅတ်ႈပႃး ၶိူင်ႈႁဵတ်းယႃႈဢၼ်ၵိုတ်းၸိူဝ်းၼၼ်ႉယဝ်ႉ။
ၸဝ်ႈလွၼ်ႉၶိူဝ်းဢၼ်ဢမ်ႇႁူႉသင်ၸွမ်းၼၼ်ႉၵေႃႈ ၼင်ႈသေထွမ်ႇၵႂႃႇလွင်ႈလဵဝ်ၵူၺ်း။ ၸၢင်းဝူၺ်ႇၼၼ်ႉ တင်းၶိုၼ်ႈသဵင်တင်းလၢတ်ႈၵႂႃႇ
“ၸွင်ႇႁူႉႁိုဝ်ပွၵ်ႈၼႆႉ ၵဝ်လႆႈသုမ်းၼမ်ၵႃႈႁိုဝ်ၼႆ သုမ်းႁူင်းယႃႈတင်းလင်ဢမ်ႇၵႃး ၵူၼ်းတၢႆၼပ်ႉႁူဝ်သိပ်းမၼ်း သူၸဝ်ႈတေဢဝ်ပုၼ်ႈၽွၼ်းလႆႈယူႇႁႃႉ၊ ပေႃးပဵၼ်သင်မႃး ဢၼ်ဝႃႈတေဢဝ်ပုၼ်ႈၽွၼ်းပၼ်ၼႆၼၼ်ႉ မီးလႂ်လႃႇ၊ မီးသူၵူၺ်းယဝ်ႉ ႁဵတ်းပၼ်ၼိုင်ႈသွၵ်ႇၵေႃႈ ၶႂ်ႈလႆႈၶိုၼ်းၼိုင်ႈဝႃး၊ တူၺ်းလႄႈၵမ်းၼႆႉ လိူဝ်သေတေၸွႆႈၵၼ် သမ်ႉပၢႆယဵပ်ႇၵၼ်ၸူမ်လိၼ်ထႅင်ႈ မီးလုၵ်ႈၼွင်ႉၵေႃႈ ယင်းၵုမ်းလုၵ်ႈၼွင်ႉဢမ်ႇလႆႈၸိူင်ႉၼႆ ၵဝ်ၵေႃႈဢမ်ႇၸၢင်ႈဝႆႉၸႂ်သူၸဝ်ႈလႆႈယဝ်ႉ တေဢမ်ႇသိုပ်ႇႁဵတ်းၵၢၼ်ၵႂႃႇၸွမ်းသူၸဝ်ႈထႅင်ႈယဝ်ႉ!.. ၵဝ်တေဢမ်ႇႁဵတ်းၵၢၼ်ၸွမ်းသူထႅင်ႈယဝ်ႉ!!”
“ဢမ်ႇႁဵတ်းၵေႃႈဢမ်ႇႁဵတ်းၵူၺ်းလႄႈ မႂ်းၵေႃႈပေႃးဢမ်ႇမီးႁဝ်း မႂ်းတေႁဵတ်းႁိုဝ်ယူႇတီႈၼႆႈလႆႈလႃႇ ဢၼ်မႂ်းမၢၵ်ႈမီးလီပဵၼ်ယူႇၼႆႉၵေႃႈ ပဵၼ်ၵွပ်ႈႁဝ်းၸွႆႈမႂ်းၵူၺ်းဢမ်ႇၸႂ်ႈႁႃႉ”
“ႁိုဝ်ႉ! ၸွႆႈၼႆႁႃႉ ဢၼ်သူၸွႆႈၼၼ်ႉ ပေႃးမႃးၼပ်ႉသွၼ်ႇတူၺ်း ဢမ်ႇတၢၼ်ႇဢၼ်ၵဝ်ၸွႆႈသူၵွၼ်ႇယဝ်ႉ လူဝ်ႇသင်ၵေႃႈၵဝ်ႁႃမႃးပၼ် ၶဝ်ႈၼမ်ႉတၢင်းၵိၼ်ဢမ်ႇပၼ်ဢိုပ်း၊ မီးငိုၼ်းမီးတွင်းၸႂ်ႉၸၢႆႇလိူင်ႇ၊ မၢၵ်ႈၵွင်ႈၸိုၼ်းယၢမ်းႁႃမႃးပၼ် သူလူးႁဵတ်းသင်ပၼ်ၵဝ်လႆႈလႃႇ တေႃႉသူင်ႇဢဝ်ႁူမ်ႇလူမ်ႈ ပေႃးၵႂႃႇၼိုင်ႈပွၵ်ႈၵေႃႈ သမ်ႉပေႃးလႆႈပၼ်ၵႃႈပၼ်ၶၼ်မၼ်း လူၼ်ႉလိူဝ်မႃႇလိူဝ်ႁႅင်းၵေႃႈၵဝ်ယင်းဢမ်ႇထဵင်၊ ၵူၺ်းၵႃႈ သူၼႆႉလႆႈၵိၼ်ဢမ်ႇယဝ်ႉ လၢတ်ႈယဝ်ႉဢမ်ႇယဵၼ် ပေႃးပဵၼ်သင်မႃးၵေႃႈဢဝ်တူဝ်လွတ်ႈၵူၺ်း၊ မီးသူၵူၺ်းႁႃႉမီးၵူၼ်း ၵဝ်ၵေႃႈမီးဢိူဝ်ႈၵူၼ်း!!”
ဝၼ်းၸိုၼ်ႈၸင်ႇလၢတ်ႈၸိမ်ၵႂႃႇ “ၸႂ်ယဵၼ်ယဵၼ်ၵွၼ်ႇၶႃႈလႄႈ ၸဝ်ႈသိုၵ်း.. လၢဝ်းပၢၼ်းႁဝ်းၵေႃႈၸႂ်ယဵၼ်ၵွၼ်ႇၶႃႈလႄႈ မီးလွင်ႈသင်ၵေႃႈဢုပ်ႇၵၼ်လီလီၶႃႈလေႃႇ”
“ႁိုဝ်ႉ!! ၽႂ်တေၸႂ်ယဵၼ်လႆႈၸိူင်ႉၼႆမေႃႉ”
ဝၼ်းၸိုၼ်ႈလၢတ်ႈၸူးလူၺ်ႈသဵင်ၼိမ်ယဵၼ် “ဢမ်ႇၸႂ်ႈဝႃႈလၢဝ်းပၢၼ်းမႃးႁွတ်ႈထိုင်ႁိူၼ်းၼႆႉ မီးမွၵ်ႈၼႆႉသေမိူဝ်းၵူၺ်းၶႃႈယူဝ်ႉ ပေႃးၶႂ်ႈၵိုတ်းလိုဝ်ႈလွင်ႈႁဵတ်းၵၢၼ်ႁူမ်ႈၵၼ်ၵေႃႈ လၢတ်ႈၵၼ်လီလီၵေႃႈလႆႈယူႇၶႃႈ ပေႃးတေဢဝ်လူမ်းၸႂ်လမ်ၶဝ်ႈႁႃၵၼ်ႁဵတ်းၼႆ လွင်ႈမၼ်းယိုင်ႈၶႅၼ်းတေဢမ်ႇယဝ်ႉလႆႈႁေပွၵ်ႈၵူၺ်းၶႃႈဢေႃႈ”
လၢဝ်းပၢၼ်းၵေႃႈ ယိပ်းဢဝ်ၼမ်ႉၼႂ်းၵွၵ်းဢၼ်ဝၼ်းၸိုၼ်ႈတမ်းပၼ်သေ “မိူဝ်ႈၼႆႉၵဝ်မႃး ဢၢၼ်းမႃးၵိုတ်းလိုဝ်ႈႁဵတ်းၵၢၼ်ႁူမ်ႈၵၼ်ၸွမ်းၸိူဝ်းသူၼၼ်ႉယဝ်ႉ ႁဝ်းဢမ်ႇလူဝ်ႇယဝ်ႉၵူၼ်းဢဝ်ႁူမ်ႇလူမ်ႈ ႁဝ်းတေႁဵတ်းၵၢၼ်ႁင်းႁဝ်းၵူၺ်း သူဢမ်ႇလူဝ်ႇမႃးသုၵ်ႉယုင်ႈသင်ၸွမ်းၼႃႈၵၢၼ်တႃငၢၼ်းႁဝ်းထႅင်ႈ”
“ႁဵတ်းၸိူင်ႉၼၼ်ၵေႃႈလႆႈဢိူဝ်ႈ ၵဝ်ၵေႃႈတေဢမ်ႇလႆႈဝူၼ်ႉဝႃႈ ၵၢၼ်ၽိတ်းမၢႆမီႈၼၼ်ႉ မၼ်းပဵၼ်ၶွင်ၽႂ်ၼႆၼၼ်ႉၼႃႇ” ၸဝ်ႈလွၼ်ႉၶိူဝ်း ဢမ်ႇၶၢမ်ႇၵႂၢမ်းၸၢင်းဝူၺ်ႇလႆႈသေ တုမ်ႉလၢတ်ႈၵႂႃႇၶိုၼ်း။
“ၵၢၼ်ၵႃႉၶၢႆၸွမ်းၸုမ်းသူၵေႃႈ ၵဝ်တေၵိုတ်းလိုဝ်ႈသဵင်ႈသဵင်ႈ”
ၵၢၼ်ၵႃႉၶၢႆ ဢမ်ႇဝႃႈၵၢၼ်တီႈၸႅင်ႈႁိုဝ်တီႈလပ်ႉ ၵမ်ႈၼမ်ၵေႃႈ လႆႈပိုင်ႈဢိင်ၸၢင်းဝူၺ်ႇလၢႆလၢႆလႄႈ ၵွပ်ႈမီးၸၢင်းဝူၺ်ႇ ၵူၼ်းမိူင်းၼႂ်းပွတ်းတွၼ်ႈၼၼ်ႉ ႁဵတ်းၵၢၼ်ၽုၵ်ႇသွမ်ႈသူင်ႇဢွၵ်ႇၵႃႉၶၢႆလႆႈလီ၊ မီးငိုၼ်းၸႂ်ႉငိုၼ်းၸၢႆႇၵၼ် မီးငိုၼ်းၸွႆႈထႅမ်ၵူၼ်းသိုၵ်း ဢမ်ႇပၼ်ႁႂ်ႈၵၼ်လႆႈဢိုပ်းယၢၵ်ႈ၊ ပေႃးဝႃႈ မီးပၼ်ႁႃတင်းၸၢင်းဝူၺ်ႇ မိူၼ်ဝႃႈ မၼ်းၵေႃႈ တေဢမ်ႇယူႇၼႂ်းၼႃႈတီႈၼႆႉလႆႈလႄႈ တေၵႂႃႇႁႃထႅင်ႈတၢင်ႇၸုမ်း မႃးဢဝ်ႁူမ်ႇလူမ်ႈပၼ်မၼ်းသေဢမ်ႇၵႃး သင်ၺႃးၸုမ်းဢၼ်ႁဵတ်းၶဵၼ်တေႃႇၼႂ်းၸုမ်းၶိုၼ်းၼႆ ယိုင်ႈၶႅၼ်းတေမီးပၼ်ႁႃယႂ်ႇမႃးထႅင်ႈလႄႈ ပေႃးဝႃႈတတ်းၶၢတ်ႇလွင်ႈၵပ်းသိုပ်ႇတင်းၸၢင်းဝူၺ်ႇၵႂႃႇ ၵၢၼ်ပၢႆးမၢၵ်ႈမီးၵူႈလွင်ႈၵေႃႈ တေလူႉသုမ်းၵႂႃႇမူတ်းၼၼ်ႉယဝ်ႉ၊ ယွၼ်ႉပိူဝ်ႈဝႃႈ ပၢႆးမၢၵ်ႈမီးၵမ်ႈၼမ် ဢမ်ႇမီးၽႂ်ႁဵတ်းႁႂ်ႈမၼ်းႁူမ်ႇငမ်းၵႂၢင်ႈၶႂၢင်တူၺ်းထိုင်ၵူၼ်းမိူင်း လဵင်ႉလူၵူၼ်းသိုၵ်း ၶဝ်ႈထိုင်ၵူၼ်းၼမ် မိူၼ်ၼင်ႇၸၢင်းဝူၺ်ႇလႆႈ။ ယဝ်ႉၵေႃႈသမ်ႉပိုင်ႈဢိင်မၼ်းမႃးၼမ်ၼႃႇသေ ပေႃးၵိုင်ႉၵၢင်ႉပဵၼ်ၵႂႃႇၸိူင်ႉၼႆ တေႁပ်ႉမိုဝ်းၸွမ်းဢမ်ႇလႆႈၼၼ်ႉယဝ်ႉ။ မၢင်လွင်ႈ ဢၼ်မၼ်းႁဵတ်း ၵႃႈလႆႈၼပ်ႉၸင်ႈတူၺ်းၼမ်ႉၼၵ်းမၼ်းသေ ႁဵတ်းၵႅင်ႈလပ်းတႃၽၢႆႇၼိုင်ႈ မိုၼ်းတႃၽၢႆႇၼိုင်ႈၵႂႃႇယူႇယဝ်ႉ။
ဝၼ်းၸိုၼ်ႈသိုပ်ႇလၢတ်ႈၸူးၵႂႃႇ “ၸႂ်ႈယူႇ ဢၼ်ႁဵတ်းႁႂ်ႈလၢဝ်းပၢၼ်းႁဝ်း လႆႈလူႉသုမ်းၼမ်ၸိူင်ႉၼႆ ႁဝ်းၵေႃႈပဵၼ်ဢၼ်ၸႂ်ဢမ်ႇလီတေႉတေႉ ၸွမ်းၼင်ႇဢၼ်ႁူႉမႃး ၵူၼ်းသိုၵ်းႁဝ်းႁၼ်ၾႆးမႆႈလႄႈလႆႈၵႂႃႇတူၺ်း ဢၢၼ်းၵႂႃႇၸွႆႈၶႄၼႆၶႃႈလႄႈ သမ်ႉဢမ်ႇထၢင်ႇဝႃႈပဵၼ်ႁူင်းယႃႈၼၼ်ႉၶႃႈၼႃႇ ၽိူဝ်ႇဢၢၼ်းတေႁၢမ်ႈ ၶဝ်ၵေႃႈသမ်ႉပေႃးၽဝ်ၵႂႃႇမူတ်းယဝ်ႉၶႃႈလူး”
သမ်ႉဝႃႈလၢတ်ႈၸိူင်ႉႁိုဝ်ၵေႃႈယဝ်ႉ ၸၢင်းဝူၺ်ႇၵေႃႈ ၸုၵ်းမၼ်ႈၼိူဝ်ၶေႃႈၵႂၢမ်းမၼ်းဢၼ်ဝႃႈ
“ၶေႃႈတူၵ်းလူင်းႁဝ်း သုတ်းၵႂႃႇတီႈၼႆႈၵူၺ်းယဝ်ႉ ၸိူဝ်းပူၼ်ႉမႃးၵေႃႈ ၵဝ်တေပွႆႇႁႂ်ႈမၼ်းပူၼ်ႉၵႂႃႇႁေ ဢၼ်တေမႃးထႅင်ႈတႄႉ ဢမ်ႇမီးပၼ်သူယဝ်ႉ၊ ၵဝ်ၵေႃႈတေဢမ်ႇႁဵတ်းယဝ်ႉ ၵၢၼ်ၼႂ်းၸုမ်းသူၼၼ်ႉ!!” လၢတ်ႈယဝ်ႉၵေႃႈ ဢွၵ်ႇၵႂႃႇပႅတ်ႈယူႇယဝ်ႉ။
ႁၼ်ယူႇဝႃႈ ၸၢင်းဝူၺ်ႇၼၼ်ႉ မီးၽႅၼ်ၵၢၼ်တႃႇတေၶၢႆႉၼႃႈၵၢၼ်မၼ်းၵႂႃႇထႅင်ႈ တၢင်ႇတီႈလႄႈ ၶဝ်ႈႁႃတၢင်ႇၸုမ်း ဢၼ်တေႁဵတ်းပၼ်ၽွၼ်းလီမၼ်းလိူဝ်သေ ၸုမ်းၸဝ်ႈလွၼ်ႉၶိူဝ်းၶဝ်ၼၼ်ႉယဝ်ႉ။ တႄႇဢဝ်ၼၼ်ႉမႃး ၸၢင်းဝူၺ်ႇလႄႈ ၼႂ်းၸုမ်းၸဝ်ႈလွၼ်ႉၶိူဝ်းၶဝ်ၵေႃႈ ဢမ်ႇလႆႈၵပ်းသိုပ်ႇသင်ၵၼ်ထႅင်ႈသေပွၵ်ႈ ၵွပ်ႈပိူဝ်ႈ မၼ်းၶၢႆႉပၢႆးမၢၵ်ႈမီးမၼ်းဢွၵ်ႇၼွၵ်ႈပိုၼ်ႉတီႈၼၼ်ႈမူတ်း ၼၼ်ႉယဝ်ႉ။
တႃႇတွင်း။ ။ ၸိူင်းႁူဝ်ၼႆႉဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။
တွၼ်ႈသိပ်းၸဵတ်းသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈသိပ်းပႅတ်ႇၶႃႈ။
