တွၼ်ႈသိပ်းႁူၵ်း
ဝၼ်းၸိုၼ်ႈဢၼ်လႆႈၶိုၼ်းထူပ်း မူၺ်ႁွမ်ၽွင်းၼၼ်ႉၵေႃႈ ဢမ်ႇၶႂ်ႈယုမ်ႇမိူၼ်ၵၼ်ဝႃႈ တေပဵၼ်ဢွင်ႈတီႈၸိူင်ႉၼႆ၊ မၼ်းယိုင်ႈၶႅၼ်းဝူၼ်ႉၽိတ်းတေႃႇမူၺ်ႁွမ်ၽွင်းမႃး ဢၼ်မၼ်းဢမ်ႇတၼ်းလႆႈၸွႆႈဝႆႉဝၼ်းၼၼ်ႉယူႇယဝ်ႉ။
ဝၢႆးသေ ဝၼ်းၸိုၼ်ႈၶဝ် ဢွၵ်ႇၵႂႃႇယဝ်ႉဢမ်ႇႁိုင် ယွၼ်ႉလွင်ႈဢၼ်မူၺ်ႁွမ်ၽွင်း ထုၵ်ႇလူလၢႆၼႂ်းၶမ်ႈၶိုၼ်းၼၼ်ႉ ႁဵတ်းႁႂ်ႈမၼ်းတိုၼ်ႇၵူဝ်မႃးတႃႇသေႇလႄႈ တေလႆႈယူႇၵႂႃႇၼင်ႇဢမ်ႇႁူႉဢမ်ႇႁၼ်ၼၼ်ႉ ပဵၼ်ဢၼ်ယူႇယၢပ်ႇၵိၼ်းၸႂ်ၼႃႇယဝ်ႉ။ မိူဝ်ႈႁၼ်သၢႆတႃပိူၼ်ႈယၵ်ႉတူၺ်း မိူဝ်ႈလႂ်ပိူၼ်ႈလၢတ်ႈၶိူဝ်း ၸဝ်ႈၶွၼ်မိူင်းၼႆၸိုင် ၼႂ်းၸႂ်မၼ်းၼၼ်ႉ တိုၼ်ႇၽၢၼ်ႈၵူဝ်မႃးယူႇတႃႇသေႇ၊ ဢမ်ႇႁတ်းဝႆႉၸႂ်ၽႂ်လႄႈ ဢမ်ႇႁတ်းလၢတ်ႈၼႄၽႂ်လႆႈ ႁဵတ်းႁႂ်ႈမၼ်းဢမ်ႇၶႂ်ႈယူႇၼႂ်းဝၢၼ်ႈၼၼ်ႉမႃးသေ ယွၼ်းၶႂၢင်ႉဢွၵ်ႇၵႂႃႇႁဵတ်းၵၢၼ်မိူင်းထႆးၼႆယူႇယဝ်ႉ။
ၽဝဢွၼ်ႇယိင်းတႆးၵေႃႉၼိုင်ႈ ဢၼ်လႆႈႁူပ်ႉထူပ်းၺႃးၸိူင်ႉၼၼ်ၼၼ်ႉ မၼ်းပဵၼ်လွင်ႈလီဢၢႆၼႃႇလႄႈ ဢမ်ႇႁတ်းလၢတ်ႈၼႄၽႂ်လႆႈသေ ၵဵပ်းသိမ်းဝႆႉယူႇၼႂ်းၸႂ်ႁင်းၵူၺ်းၸိူင်ႉၼၼ် ယိုင်ႈႁဵတ်းႁႂ်ႈတူဝ်ၵဝ်ႇ တုၵ်ႉယၢပ်ႇၶၢၼ်ၸႂ်မႃးထႅင်ႈသေတႃႉၵေႃႈ တွၼ်ႈတႃႇလွင်ႈယုမ်ႉၶူဝ်ၵူၼ်းၸမ်ၸႂ်ၼၼ်ႉ ၵႃႈလႆႈယဵၼ်ႉၵၼ်ႈသေ ႁဵတ်းမိူၼ်ၼင်ႇဢမ်ႇမီးသင်ပဵၼ်မႃးယူႇ။
ဢမ်ႇမီးသင်မႃးပဵၼ်ၸႂ်လႆႈ ၵွပ်ႈမီးၼႃႈတႃႁၢင်ႈလီ ၵွပ်ႈႁၢင်ႈၽၢင်ၼၢင်းလဝ်းၼႃႇၼၼ်ႉ ထုၵ်ႇၸႂ်ပီႈၸဝ်ႈၵႃးသေ ၺႃးလူလၢႆမိူဝ်ႈၵႂႃႇၸွမ်းတၢင်းသေယဝ်ႉဢမ်ႇၵႃး သမ်ႉၺႃးၸဝ်ႈၵႃးၼၼ်ႉ မႃးၶၢႆၵိၼ်မၼ်းပၼ်တီႈ ပေႃႈလဵင်ႉသထေး လဵင်ႉၽူႈယိင်းၼမ် ဢၼ်ပိုတ်ႇၽုၺ်ႇလၢၼ်ႉမူၼ်ႈသိူဝ်း မီးၼၢင်းလဝ်းႁၢင်ႈလီ ပိုတ်ႇႁပ်ႉတွၼ်ႈ တႃႇၽူႈသူင်မိုတ်ႈမၵ်ႉတၢင်းၵျေႃႇ လေႃႇၵွၵ်းၵိၼ်မူၼ်ႈသိူဝ်းလူၼ်ႉပူၼ်ႉလိူဝ်ၶဝ် ၼၼ်ႉယဝ်ႉ။ မၼ်းၵေႃႈဢမ်ႇၸၢင်ႈဢွၵ်ႇၵႂႃႇတၢင်းလႂ်လႆႈ မိူဝ်ႈလႂ်ဢွၵ်ႇပၢႆႈဢမ်ႇၼၼ်ႁၢႆတူဝ်ၵႂႃႇၵူၺ်း ၶဝ်ၵေႃႈတေဢဝ်တၢႆပႅတ်ႈၵမ်းလဵဝ် ဢမ်ႇၼၼ် ၺွပ်းမႃးၶင်ပေႃႉႁႅမ်သေဢမ်ႇၵႃး ဢဝ်သိုပ်ႇသူင်ႇၵႂႃႇၶၢႆထႅင်ႈတၢင်ႇတီႈ ၼၼ်ႉယဝ်ႉ။
မႄႈလႄႈၼၢႆးၵေႃႈ ဢမ်ႇႁူႉဝႃႈ မူၺ်ႁွမ်ၽွင်းၼၼ်ႉႁဵတ်းၵၢၼ်ၸိူင်ႉႁိုဝ် ၶဝ်တႄႉဝူၼ်ႉဝႃႈ ႁဵတ်းၵၢၼ်ယူႇမိူင်းထႆးၵူၺ်း၊ ၵွပ်ႈပိူဝ်ႈ မၼ်းၵေႃႈ လႆႈသူင်ႇငိုၼ်းပၼ်တီႈႁိူၼ်းၼၼ်ႉယူႇၵူႈလိူၼ်လိူၼ်။ ဝၼ်းၸိုၼ်ႈ ဢၼ်လႆႈႁူႉယိၼ်းၼင်ႇၼၼ်ၵေႃႈ မီးၵၢင်ၸႂ်ၶႂ်ႈၸွႆႈထႅမ်မၼ်းမႃးသေ ၶတ်းၸႂ်ႁႃလၢႆးၸွႆႈထႅမ်မၼ်း ႁႂ်ႈဢွၵ်ႇပၢႆႈပူၼ်ႉလွတ်ႈတီႈၵပ်ႉၵႅပ်ႈလူင်ၼႆႉ တေဢၢၼ်းသိုဝ်ႉဢဝ်မၼ်းဢွၵ်ႇယူႇ ၵူၺ်းၵႃႈ မူၺ်ႁွမ်ၽွင်း ထဵင်ၶိုၼ်းယဝ်ႉ၊ သမ်ႉဝႃႈမၼ်းပၢႆႈၵႂႃႇလွတ်ႈသေတႃႉ မၼ်းၵေႃႈ ဢမ်ႇမီးၼႃႈတႃႇႁူပ်ႉမႄႈမၼ်းၼၢႆးမၼ်းလႆႈ။ ၼႂ်းၽဝမၼ်းတင်းၸူဝ်ႈပၢၼ်ၼၼ်ႉ လိူဝ်သေတီႈၼႆႈလႄႈ တီႈႁိူၼ်းမၼ်း မၼ်းၵေႃႈဢမ်ႇမီးတီႈၵႂႃႇထႅင်ႈယဝ်ႉ။ သင်ဢမ်ႇမီးမႄႈလႄႈတင်းၼၢႆးမၼ်း မၼ်းၵေႃႈလႅပ်ႈတေၶႃႈတူဝ်တၢႆၵႂႃႇယဝ်ႉလူးၵွၼ်ႇ။
ၵူၺ်းၵႃႈဝၼ်းၸိုၼ်ႈၵေႃႈ ဢမ်ႇၵိုတ်းလိုဝ်ႈတႃႇတေၸွႆႈထႅမ်မၼ်းလႄႈ လႆႈသိုဝ်ႉတူဝ်မၼ်းဢွၵ်ႇမႃးသေ ပၼ်လွင်ႈလွတ်ႈလႅဝ်းတီႈမၼ်းၵႂႃႇယူႇ။ ၵူၺ်းၵႃႈ မူၺ်ႁွမ်ၽွင်းၵေႃႈ ယင်းလိူၵ်ႈႁဵတ်းၵၢၼ်ၸိူင်ႉၼႆယူႇ ၵွပ်ႈႁဵတ်းမႃးႁိုင်ယဝ်ႉလႄႈ လိူဝ်သေၵၢၼ်ၸိူင်ႉၼႆ မၼ်းၵေႃႈဢမ်ႇမေႃႁဵတ်းၵၢၼ်သင်ထႅင်ႈယဝ်ႉ။ ၵၢၼ်တၢင်ႇလွင်ႈၵေႃႈ မိူၼ်ဝႃႈဢမ်ႇၶႂ်ႈႁဵတ်းၵႂႃႇယဝ်ႉသေ တႅပ်းတတ်းႁဵတ်းၵၢၼ်ၸွမ်းဝၼ်းၸိုၼ်ႈ တီႈလၢၼ်ႉမူၼ်ႈသိူဝ်း KTV ဢၼ်ၽူႈလူင်းတိုၼ်းလူင် ပဵၼ်ၸဝ်ႈၸိင်ႇ ႁဵတ်းဝႆႉၼၼ်ႉလႄႈ လႆႈၸႂ်ႉၸိုဝ်ႈဝၼ်းၸိုၼ်ႈ လူင်းတိုၼ်းၵႂႃႇၼၼ်ႉ ယုၵ်ႉႁႂ်ႈဝၼ်းၸိုၼ်ႈပဵၼ်ၸဝ်ႈၶွင်လၢၼ်ႉသေ ၸတ်းၵၢၼ်ပၼ်ၶဝ်ၵႂႃႇၵူႈလွင်ႈလွင်ႈယဝ်ႉ။
မူၺ်ႁွမ်ၽွင်း ဢၼ်ယူႇတီႈၼႂ်းလၢၼ်ႉၼႆႉတႄႉၵေႃႈ လႆႈဝႃႈပဵၼ်ယႂ်ႇလိူဝ်ပိူၼ်ႈဝႆႉယူႇ ၵွပ်ႈမီးသဵၼ်ႈသၢႆပဵၼ်ဝၼ်းၸိုၼ်ႈ။ မၼ်းၵေႃႈ ယင်းလႆႈဢဝ်ပုၼ်ႈၽွၼ်း ပဵၼ်ၽူႈၸတ်းၵၢၼ်ၼႂ်းလၢၼ်ႉလႄႈ ပဵၼ်ပႃးႁူတႃတႃႇဝၼ်းၸိုၼ်ႈထႅင်ႈယဝ်ႉ။
တူၺ်းမိူၼ်ဝႃႈၸဝ်ႈၸိင်ႇၼၼ်ႉ ဢဝ်ၽူႈယိင်းၶဝ်ႈၼႂ်းလၢၼ်ႉမႃး ဢမ်ႇလႆႈလၢတ်ႈတီႈမူၺ်ႁွမ်ၽွင်းလႄႈ မူၺ်ႁွမ်ၽွင်းၵေႃႈ ဢမ်ႇလႆႈၵႂႃႇသုၵ်ႉယုင်ႈသင်ၸွမ်း ၵွပ်ႈပိူဝ်ႈပဵၼ်လွင်ႈၸဝ်ႈလွၼ်ႉၶိူဝ်းၶဝ်၊ လိူဝ်သေဝၼ်းၸိုၼ်ႈယဝ်ႉ ဢမ်ႇမီးၽႂ်ႁတ်းလၢတ်ႈၸွမ်း။
“ၽွင်းၼႆႉ မိူၼ်ဝႃႈႁဝ်းႁဵတ်းၵၢၼ်ယူပ်ႈယွမ်းတေႉၼၼ်ႉယဝ်ႉ” ဝၼ်းၸိုၼ်ႈထူၺ်ႈၸႂ်လူင် တေႃႇၼႃႈမူၺ်ႁွမ်ၽွင်းၵႂႃႇ။
မူၺ်ႁွမ်ၽွင်းၵေႃႈ မိူၼ်တေဝူၼ်ႉၽိတ်းတေႃႇဝၼ်းၸိုၼ်ႈမႃးယဝ်ႉ ဢၼ်ဢမ်ႇလႆႈလၢတ်ႈၼႄမၼ်းၸိူင်ႉၼၼ်ၵေႃႈ ၼႅတ်ႈလၢတ်ႈ “ပဵၼ်ႁဝ်းၵူၺ်း ဢၼ်ႁဵတ်းၵၢၼ်ယူပ်ႈယွမ်း ဢမ်ႇၸႂ်ႈသူၼႃ”
“မၼ်းတူၵ်းလိုၼ်းၵႂႃႇယဝ်ႉ တႃႇတေၸွႆႈလုၵ်ႈဢွၼ်ႇၵေႃႉၼၼ်ႉဢွၵ်ႇမႃး ၸွင်ႇၸႂ်ႈႁိုဝ်”
“ႁဝ်းလႆႈႁူႉမႃးဝႃႈ ၼွင်ႉၶဝ်ၼၼ်ႉ တင်ႈၸႂ်မႃးႁင်းၵူၺ်း တူၺ်းမိူၼ်ဝႃႈ ဢႃႇယုတႄႉ တေမီးမွၵ်ႈ 16 ပီ ၼႆႉၵူၺ်း၊ ၼႃႈႁိူၼ်းၶဝ်တေလူဝ်ႇငိုၼ်းႁိုဝ်ဢမ်ႇႁူႉ ဢူႈၶဝ်ၼၼ်ႉႁူႉၸၵ်းတင်းၸဝ်ႈၸိင်ႇၵေႃႈလူဝ်လူဝ် ဝၼ်းဢၼ်မၼ်းမႃးပွၵ်ႈဢွၼ်တၢင်းသုတ်း မီးဢူႈၶဝ်မႃးသူင်ႇႁေဢိူဝ်ႈ”
ဝၼ်းၸိုၼ်ႈၵမ်တႃမိုဝ်းသမ်ႉပေႃးၵႅၼ်ႇၵႅၵ်းၵႅၵ်းသေ “ဢူႈၸိူင်ႉႁိုဝ်လႃႇ မႃးၶၢႆၵိၼ်လုၵ်ႈယိင်းၸိူင်ႉၼႆ”
“တူၺ်းမိူၼ်မႄႈၶဝ်ဢမ်ႇယူႇလီလႄႈ လူဝ်ႇၵႃႈယူတ်းယႃၼႃႇယဝ်ႉၼၼ်ႉၼႃႇ”
“ပဵၼ်ႁိုဝ်ၵေႃႈ မႄႈၶဝ် ဢၼ်ၸိုၼ်ႈၶႅၼ်းလီမႃးယဝ်ႉ ယင်းတေၸူမ်းသိူဝ်းၸွမ်းလႆႈယူႇႁႃႉ ဢၼ်ဢဝ်လုၵ်ႈၵႂႃႇလႅၵ်ႈဢဝ်သၢႆၸႂ်ၸဝ်ႈၵဝ်ႇၸိူင်ႉၼႆ”
“မၼ်းမီးယူႇၼႃ ပေႃႈမႄႈမၢင်ၵေႃႉ ဢၼ်သူၼ်ၸႂ်ငိုၼ်းလိူဝ်သေလုၵ်ႈၸဝ်ႈၵဝ်ႇ ဢၼ်ႁၼ်ငိုၼ်းလိူဝ်သေၵူႈလွင်ႈ၊ လုၵ်ႈဢွၼ်ႇၼႂ်းလၢၼ်ႉမၢင်ၵေႃႉ ဢူႈမႄႈၶဝ်ဢမ်ႇတွၼ်ႉဝူၼ်ႉဝႃႈလုၵ်ႈလၢင်းၶဝ်ႁဵတ်းၵၢၼ်ၸိူင်ႉႁိုဝ် ၵူႈလိူၼ်လိူၼ် ပေႃးဝႃႈလႆႈငိုၼ်းသူင်ႇပၼ်ၶဝ်ၵူၺ်းၵေႃႈလႆႈယဝ်ႉ ပေႃးဢမ်ႇသူင်ႇပၼ် ယင်းပၢႆပွင်ႉလႃႇသမ်ႉဝႃႈ ဢမ်ႇႁူႉၵုင်ႇမုၼ်ပေႃႈမႄႈၼႆထႅင်ႈ”
“ၶဝ်ၵိူတ်ႇလုၵ်ႈမႃး တွၼ်ႈတႃႇပဵၼ်ၶိူင်ႈႁဵတ်းငိုၼ်းပၼ်ၶဝ်ႁိုဝ် ပဵၼ်ၶိူင်ႈၸၢၵ်ႈပၼ်လွင်ႈမူၼ်ႈသိူဝ်းၶဝ်ႁႃႉ၊ ႁဝ်းဢမ်ႇႁူႉၼႃဝႃႈ ၵုင်ႇမုၼ်ပေႃႈမႄႈမၼ်းပဵၼ်ၸိူင်ႉႁိုဝ် ၵူၺ်းၵႃႈ ဢၼ်ႁဝ်းႁူႉတႄႉ ပေႃႈမႄႈၼၼ်ႉ မၼ်းၵႅတ်ႇၶႄႁူမ်ႇငမ်းပၼ်လုၵ်ႈလၢင်း ႁႂ်ႈလွတ်ႈၽေးၶဵၼ်ဢိူဝ်ႈ ဢၼ်တူဝ်ၸဝ်ႈၵဝ်ႇ ႁဵတ်းတေႃႇလုၵ်ႈၸိူင်ႉၼႆ ယင်းမီးသုၼ်ႇမႃးႁႂ်ႈလုၵ်ႈတွပ်ႇတႅၼ်းၵုင်ႇမုၼ်ထႅင်ႈႁေ မၼ်းဢမ်ႇပႅတ်ႈလၢႆၼႃႇလိူဝ်သေၽႂ်ႁႃႉ”
“ၸႂ်ယဵၼ်ယဵၼ်ဢိတ်ႉၼိုင်ႈလႄႈ ၵႂႃႇလႃႇၶဝ်ၸိူင်ႉၼၼ်ၵေႃႈဢမ်ႇလီၼင်ႇၵဝ်ႇ မၢင်ၵေႃႉပေႃႈမႄႈၶဝ်ၵေႃႈဢမ်ႇႁူႉၼႃႇ ဝႃႈၶဝ်ႁဵတ်းၵၢၼ်ၸိူင်ႉၼႆ၊ မၢင်ၵေႃႉၵေႃႈၶဝ်ႈမႃး ႁၼ်ဝႃႈ ႁဵတ်းၵၢၼ်ၸိူင်ႉၼႆလႆႈငိုၼ်းလီလိူဝ်သေ ႁဵတ်းၵၢၼ်တၢင်ႇမဵဝ်းလႄႈ လႆႈလိူၵ်ႈမႃးႁဵတ်းၵၢၼ်ၸိူင်ႉၼႆၼၼ်ႉၼႃႇ ၶဝ်ၵေႃႈလိူၵ်ႈႁင်းၵူၺ်းၶဝ်ၵူၺ်းၵဝ်ႇဢိူဝ်ႈ၊ ပေႃးလၢတ်ႈတီႈတိူၵ်ႈမၼ်းၵေႃႈ ဢမ်ႇလႆႈႁိူဝ်ႉလႆႈယၢပ်ႇသင်သေဢမ်ႇၵႃး လႆႈၵျေႃႇပႃးႁေလႄႈ သမ်ႉလႆႈငိုၼ်းၼႆၼႃႇ ၵၢၼ်ၸိူင်ႉၼႆ မီးလႃႇၽႂ်ဢမ်ႇၶႂ်ႈႁဵတ်း”
“သူဝႃႈၵေႃႈထုၵ်ႇယူႇ” ယၵ်ႉတူၺ်းၵႂႃႇတီႈၽူႈယိင်းၶဝ် ၵႃႈတႅၼ်ႈယူႇၸိူဝ်းၼၼ်ႉလႄႈ “ၵူၺ်းၵႃႈ ၶဝ်ၵေႃႈထုၵ်ႇလီမီးၸၢတ်ႈပၢၼ် ဢၼ်လီလိူဝ်လိူဝ်သေၼႆႉဢမ်ႇၸႂ်ႈႁိုဝ်လႃႇ၊ မၼ်းပၼ်လွင်ႈမူၼ်ႈသိူဝ်းတေႉတေႉယူႇႁႃႉ သူၵေႃႈတေႁူႉလီလိူဝ်သေၽႂ်၊ မၢင်လွင်ႈလီယွမ်းၵေႃႈယွမ်းၽွင်ႈၼႃႈ ပေႃးႁဵတ်းၵၢၼ်ၼမ်ပူၼ်ႉၼႃႇၵေႃႈ ၸၢင်ႈထိုင်တၢႆလႆႈဢိူဝ်ႈ ပၢတ်ႈပူၼ်ႉၵေႃႈ ၸမ်တၢႆၵႂႃႇယဝ်ႉ ၵေႃႉၼိုင်ႈ”
“ဢေႃႈၶႃႈ”
“ၸၢတ်ႈပၢၼ်ၶဝ် ၶဝ်ပဵၼ်ၵူၼ်းၵေႃႉလိူၵ်ႈၵူၺ်း ႁဝ်းဢမ်ႇမီးသုၼ်ႇတႅပ်းတတ်းပၼ်လႆႈ၊ ႁဵတ်းသင်ၵေႃႈ ယႃႇပေပွႆႇႁႂ်ႈမၼ်းပူၼ်ႉၶွပ်ႇပူၼ်ႉလႅၼ်ၼႃႇၽႅဝ် ၵူၼ်းၵူႈၵေႃႉ ဢၼ်တိုၵ်ႉမီးသၢႆၸႂ်ယူႇၼၼ်ႉ ၵွပ်ႈၶဝ်တိုၵ်ႉမီးၵႃႈၶၼ်ယူႇၼၼ်ႉၼႃႇ တွၼ်ႈတႃႇၽႂ်သေၵႃႉၼိုင်ႈ၊ သမ်ႉဝႃႈႁဝ်းဢမ်ႇမီးသုၼ်ႇတႃႇတေလၢတ်ႈၵႂၢမ်းၶေႃႈၼႆႉသေတႃႉ ၵူၺ်းၵႃႈ တွၼ်ႈတႃႇသူဢမ်ႇၸႂ်ႈၼႃ”
“ႁဝ်းပွင်ႇၸႂ်ယဝ်ႉ ၸူမ်းယဝ်ႉၼႃႈ ဢၼ်ပၼ်ၾၢင်ႉ”
ဝၼ်းၸိုၼ်ႈၵေႃႈ ဢမ်ႇသိုပ်ႇၵႂၢမ်းထႅင်ႈသေ ပႆၶဝ်ႈၵႂႃႇၼႂ်းႁွင်ႈ ဢၼ်ၸဝ်ႈလွၼ်ႉၶိူဝ်းယူႇၼၼ်ႉယဝ်ႉ ႁၼ်ႁၢင်ႈၽၢင်ၵူၼ်းလူင်ပေႃးဢမ်ႇမီးတီႈၼပ်ႉယမ်လႆႈသေဢိတ်းၼၼ်ႉလႄႈ
“မၼ်းတေလီၵႃႈႁိုဝ် သင်ၵူၼ်းၸိူဝ်းၼႆႉ ၸႂ်ႉၶၢဝ်းယၢမ်းၸိူင်ႉၼႆ ၵႂႃႇႁဵတ်းၵၢၼ်ဢၼ်ပၼ်ၽွၼ်းလီပုၼ်ႈတႃႇပိူၼ်ႈ၊ လဵပ်ႈႁဵၼ်းၽိုၵ်းၽွၼ်ႉၼမ်ႉၵတ်ႉပၼ်ပုၼ်ႈတူဝ်ၵဝ်ႇၼႆ တေပဵၼ်ၽူႈဢွၼ်ႁူဝ်လီၵႃႈႁိုဝ်၊ ၵူၺ်းၵႃႈ ပဵၼ်ၵူၼ်းလူင်ယဝ်ႉ သမ်ႉမႃးထူၵ်းထူယူႇၸွမ်းလွင်ႈၵျေႃႇမဝ်းမိင်းၸိူင်ႉၼႆ ယူႇဝၼ်းဝၼ်းၶိုၼ်းၶိုၼ်း ၵွႆႈတူၺ်းၵွႆႈဢမ်ႇမိူၼ်ၵူၼ်းမႃးလွႆးလွႆးယဝ်ႉ” ဝၼ်းၸိုၼ်ႈၵေႃႈ ပွင်ႉယူႇၼႂ်းၸႂ်မၼ်း။
“ဢူႈ! ယူႇတီႈၼႆႈမႃးပဵၼ်လိူၼ်ယဝ်ႉ မိူဝ်းႁိူၼ်းလႆႈယဝ်ႉၼႃႈ”
ၵူၺ်းၵႃႈ ၸဝ်ႈလွၼ်ႉၶိူဝ်းၼၼ်ႉ ဢမ်ႇလႆႈသူၼ်ၸႂ်ဝၼ်းၸိုၼ်ႈသင်လႄႈ ၵုမ်ႇၼင်ႈႁေႁိုဝ်ႈဢိုၵ်ႉၵိၼ်လဝ်ႈ ဢၼ်သၢဝ်လဝ်းဢွၼ်ႇႁိုဝ်ႈပၼ်ၼၼ်ႉၵူၺ်း။ ဝၼ်းၸိုၼ်ႈၵေႃႈ ဢမ်ႇၸၢင်ႈႁဵတ်းႁိုဝ် “ၶမ်းလိုၼ်းၶဝ်မႃးပႂ်ႉဝႆႉယူႇတီႈႁိူၼ်းယဝ်ႉ!!”
ၸဝ်ႈလွၼ်ႉၶိူဝ်းၼၼ်ႉၵေႃႈ ၼႅတ်ႈလုၵ်ႉမႃးၸူးဝၼ်းၸိုၼ်ႈၼင်ႇၸူမ်းသိူဝ်းသေ “တေႉႁႃႉ!! ၵႂႃႇလႄႈႁႃးမိူဝ်း”
ဝၼ်းၸိုၼ်ႈၵေႃႈ လႆႈဢဝ်ၸဝ်ႈလွၼ်ႉၶိူဝ်းမိူဝ်းသူင်ႇၵႂႃႇတီႈႁိူၼ်းၶဝ်ၼၼ်ႉယူႇယဝ်ႉ။ မိူဝ်းၵႂႃႇၸွမ်းတၢင်းၵူၺ်း ၸဝ်ႈလွၼ်ႉၶိူဝ်း သမ်ႉပေႃးၼွၼ်းလပ်းၵႂႃႇပႅတ်ႈယူႇ၊ ႁွတ်ႈထိုင်ၵႂႃႇတီႈႁိူၼ်း မီးလုၵ်ႈၼွင်ႉမၼ်းမႃး ၸွႆႈဢဝ်လူင်းလူတ်ႉလႄႈ မေးမၼ်းပႃႈသႅင်သႃႇမႃးပႂ်ႉႁပ်ႉဢဝ်ၵႂႃႇ။
တႃႇတွင်း။ ။ ၸိူင်းႁူဝ်ၼႆႉဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။
တွၼ်ႈသိပ်းႁူၵ်းသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈသိပ်းၸဵတ်းၶႃႈ။
