တွၼ်ႈသိပ်းႁႃႈ
ဝၢႆးသေလႆႈမႃးယူႇၼႂ်းဝၢၼ်ႈမူၺ်ႁွမ်ၽွင်းၶဝ်ဝၼ်းလဵဝ်ၵူၺ်း ၸဝ်ႈၶႂၢၼ်မိူင်းၼၼ်ႉၵေႃႈ လႆႈသင်ႇႁႂ်ႈလုၵ်ႈၼွင်ႉမၼ်း ဢွၼ်ၵၼ်ၵႂႃႇယူႇၼွၵ်ႈဝၢၼ်ႈဢဝ်ၼႆယူႇ၊ ၵူၺ်းၵႃႈ တူဝ်မၼ်းၼၼ်ႉတႄႉၵေႃႈ ပေႃးႁူဝ်ၶမ်ႈမႃးၼႆ ၵႆႉၵႆႉမႃးႁႃလႄႇၸွမ်းၼႂ်းဝၢၼ်ႈၸိူဝ်းၼႆႉယူႇယဝ်ႉ။ ဝၼ်းၼိုင်ႈ မႄႈလႄႈၼၢႆး မူၺ်ႁွမ်ၽွင်းၶဝ်သမ်ႉဢမ်ႇတၼ်း ၵႂႃႇမႃႇသႃႇတၢင်ႇဝၢၼ်ႈ ၵိုတ်းမၼ်းၵေႃႉလဵဝ်ၵူၺ်းလႄႈ မၼ်းၵေႃႈ လႆႈတႅမ်ႈလိၵ်ႈပၼ်တီႈၵူၼ်းသိုၵ်း ဢၼ်လူင်းမႃးလႄႇၼႂ်းဝၢၼ်ႈၼၼ်ႉ ႁႂ်ႈဝၼ်းၸိုၼ်ႈမႃးႁဵတ်းၵေႃႉမၼ်းၼႆယူႇ။ ၵူၺ်းၵႃႈ ၸဝ်ႉၶႂၢၼ်မိူင်းသမ်ႉ လႆႈႁၼ်မႅၼ်ႈယဝ်ႉ ဢမ်ႇလႆႈလၢတ်ႈဝၼ်းၸိုၼ်ႈသေ တူဝ်မၼ်းၵေႃႉမႃးတၢင်ဝၼ်းၸိုၼ်ႈၵႂႃႇ။ ၼႂ်းၶမ်ႈၶိုၼ်း သၢႆလႅင်းၾႆးတဵၼ်းႁိူဝ်ႈလႅင်းဝွႆးဝွႆး ဢၼ်မီးသဵင်ၽၵ်းတူ လႄႈ မူၺ်ႁွမ်ၽွင်းထၢင်ႇဝႃႈပဵၼ်ဝၼ်းၸိုၼ်ႈသေ လႆႈၽုၺ်ႇၽၵ်းတူပၼ်ၼၼ်ႉ ၵူၺ်းသမ်ႉပဵၼ်ၵူၼ်းဢၼ်မၼ်းၵူဝ်လႄႈ ၼႅတ်ႈႁပ်းၽၵ်းတူၵႂႃႇ ၵွပ်ႈႁႅင်းၵူၼ်းဢမ်ႇငၢမ်ႇၵၼ် ၸဝ်ႈၶႂၢၼ်မိူင်းၼၼ်ႉၵေႃႈ ပုင်ႈၶဝ်ႈႁၢဝ်ႉဢဝ်တူဝ် မူၺ်ႁွမ်ၽွင်းၶဝ်ႈမိူဝ်းၵႂႃႇၼႂ်းႁိူၼ်း တႂ်ႈငဝ်းၾႆးဝွႆးဝွႆး ဢၼ်လွႆႈမွတ်ႇလပ်းၵႂႃႇလွႆးလွႆးၼၼ်ႉယဝ်ႉ။
သဵင်ႁွင်ႉသႅၼ်ႇသဵင်ပွင်ႉၶၢင်း ႁႅင်းၽိုတ်ႉဢီးထုပ်ႉတွႆႇပၢၵ်ႈပႅတ်ႈတၢၼ်ႇႁိုဝ်ၵေႃႈ တေႃႇဢမ်ႇပေႉလႆႈႁႅင်းယွင်ႇမႃႈၵူၼ်း လိူင်းၵေႃႉၼၼ်ႉလႆႈ ၸၢတ်ႈပၢၼ်သၢဝ်မူၺ်ႁွမ်ၽွင်းၼၼ်ႉၵေႃႈ လႆႈသုတ်းသဵင်ႈၵႂႃႇ ၼႂ်းငဝ်းလပ်းသိင်ႇၼၼ်ႉယူႇယဝ်ႉ။
တီႈပၢင်လဝ်ႈၵူၼ်းသိုၵ်းၶဝ်ၼၼ်ႉ ဝၼ်းၸိုၼ်ႈၵေႃႈ လႆႈၵႂႃႇၼင်ႈၵုမ်းၵၼ်သေ ၸင်ႇသမ်ႉမီးၵူၼ်းသိုၵ်းၵေႃႉဢၼ်ဢဝ်လိၵ်ႈမႃးၼၼ်ႉ ယူႇယူႇၵေႃႈလၢတ်ႈဝႃႈ “ၼွင်ႉယုမ်ႉသူင်ႇလိၵ်ႈမႃးပၼ်ဝၼ်းၸိုၼ်ႈဢိူဝ်ႈမိူဝ်ႈၵႆႈ ၵူၺ်းၵႃႈၸဝ်ႈႁၢၼ်ႁဝ်းသမ်ႉႁၼ်ၺႃးႁေ လၢတ်ႈဝႃႈ ဢမ်ႇပၼ်ႁႂ်ႈလၢတ်ႈဝၼ်းၸိုၼ်ႈၼႆဝႃႇ”
ၼွင်ႉယုမ်ႉပဵၼ်ၸိုဝ်ႈမူၺ်ႁွမ်ၽွင်းမိူဝ်ႈၼၼ်ႉၼၼ်ႉယဝ်ႉ။ ဝၼ်းၸိုၼ်ႈဢၼ်လႆႈငိၼ်းၼင်ႇၼၼ်ၵေႃႈ ၼႅတ်ႈဢႅၼ်ႇလႅၼ်ႈမိူဝ်းၵႂႃႇတၢင်းႁိူၼ်း မူၺ်ႁွမ်ၽွင်းၶဝ်ၼၼ်ႉၵမ်းလဵဝ် မုင်ႈႁၼ်ငဝ်းၵူၼ်းဢွၵ်ႇၽၵ်းတူၵိူၼ်ႇသေ မုင်ႈၼႃႈမႃးတၢင်းမၼ်းမႃးၼၼ်ႉ ယူႇယူႇၵေႃႈ ၶိုၼ်းဝိၼ်ႇၼႃႈၵႂႃႇထႅင်ႈတၢင်ႇသဵၼ်ႈယူႇယဝ်ႉ။ ဝၼ်းၸိုၼ်ႈၵေႃႈ ဢမ်ႇတၼ်းလႆႈသူၼ်ၸႂ် လိူဝ်သေမူၺ်ႁွမ်ၽွင်း ဢၼ်မီးယူႇႁင်းၵူၺ်းမၼ်းၼၼ်ႉ တေပဵၼ်ၸိူင်ႉႁိုဝ်ဝႆႉၼႆၼၼ်ႉၵူၺ်း။
ၼႂ်းႁိူၼ်းဢၼ်လပ်းသိင်ႇၽိုတ်းၽိုတ်းၼၼ်ႉ လႆႈငိၼ်းသဵင်ဢိုတ်ႇႁႆႈမေႃးယူႇဢိုဝ်းဢိုဝ်းၼႂ်းႁိူၼ်းလႄႈ ဝၼ်းၸိုၼ်ႈၵေႃႈ ၼႅတ်ႈပိူင်းၾႆးထၢတ်ႈမၼ်း ထွင်ႇၵႂႃႇၸူးတီႈသဵင်ႁွင်ႉႁႆႈ ဢၼ်မီးႁၢင်ႈၽၢင်ဢမ်ႇယၵ်ႉတူၺ်းလႆႈသေဢိတ်းၼၼ်ႉယဝ်ႉ။ ဝၼ်းၸိုၼ်ႈဢၼ်ႁၼ်ၼင်ႇၼၼ်ၵေႃႈ ၸဵပ်းၸႂ်ၸႂ်လမ်လေႃးၵၼ် မိူၼ်တေၵိၼ်ၼိူဝ်ႉ ၶိင်းၵူၼ်းမိူၵ်ႈၼၼ်ႉလႆႈယဝ်ႉ။ သမ်ႉဝႃႈၸဵပ်းၸႂ်ၼႃႇတၢၼ်ႇႁိုဝ်ၵေႃႈ ၶၢဝ်းယၢမ်းၼၼ်ႉ မၼ်းၵေႃႈဢမ်ႇၸၢင်ႈႁဵတ်းသင်လႆႈ ၶဝ်ႈမိူဝ်းၸပ်းတဵၼ်းပၼ်သေ ယူႇႁိမ်းၸမ်မၼ်းၵႂႃႇယဝ်ႉ ၼင်ႈထွမ်ႇသဵင်ႁႆႈမူၺ်ႁွမ်ၽွင်းယူႇၼၼ်ႉၵူၺ်း၊ မိူဝ်ႈဢၼ်သဵင်ႁႆႈတဵတ်ႇယဵၼ်ၵႂႃႇယဝ်ႉ။
“ပီႈၵေႃႈဢမ်ႇႁူႉတေႁဵတ်းသင်ပၼ်ၼွင်ႉလႆႈ ၵူၺ်းၵႃႈ ၵူၼ်းၵေႃႉဢၼ်ႁဵတ်းတီႈၼွင်ႉၸိူင်ႉၼႆ ပီႈဢမ်ႇပွႆႇဝႆႉႁႂ်ႈမၼ်းမီးသၢႆၸႂ်ၵႂႃႇလႆႈလေႃႇၼႃႈ”
“ၶႃႈလႆႈထုၵ်ႇပူၼ်ႉပႅၼ်လူလၢႆၵႂႃႇယဝ်ႉ ၸၢတ်ႈပၢၼ်ၶႃႈတေပဵၼ်ၸိူင်ႉႁိုဝ်ယဝ်ႉလႃႇ၊ ၶႃႈတေႁူပ်ႉတေႃႇၼႃႈပိူၼ်ႈၸိူင်ႉႁိုဝ်၊ မႄႈႁဝ်းၼၢႆးႁဝ်းလူး ပိူၼ်ႈတေတူၺ်းၶဝ်ၸိူင်ႉႁိုဝ်ယဝ်ႉလႃႇ ”
ဝၼ်းၸိုၼ်ႈၵေႃႈ ဢမ်ႇႁူႉတေလႆႈလၢတ်ႈသင်ထႅင်ႈလႄႈ ၼိမ်သေထွမ်ႇသဵင်မူၺ်ႁွမ်ၽွင်းၼၼ်ႉၵူၺ်း။
“ၵူၺ်းၵႃႈ မၼ်းဝႃႈ မၼ်းတေမႃးဢဝ်ၶႃႈၵႂႃႇႁဵတ်းမေးမၼ်းၼႆၶႃႈဢေႃႈ ၶႃႈဢမ်ႇၶႂ်ႈပဵၼ်မေးမၼ်းၼႃ!!” သဵင်လၢတ်ႈဢၼ်သၼ်ႇဝႆ ႁူမ်ႈလေႃးပႃးလွင်ႈၵူဝ်ၼႆၼၼ်ႉ ဝၼ်းၸိုၼ်ႈႁပ်ႉႁူႉထိုင်မၼ်းလႆႈလီယူႇယဝ်ႉ။
ယၢမ်းဢၼ်ဝၼ်းၸိုၼ်ႈ သုတ်ႉၵႂႃႇယူႇႁိမ်းမူၺ်ႁွမ်ၽွင်းၼၼ်ႉ ၸင်ႇသမ်ႉယဵပ်ႇမႅၼ်ႈၺႃးလဵၵ်းၶႅင်ၶႅင် ဢၼ်ၼိူဝ်ႉၼင်မၼ်းမၼ်းႁပ်ႉႁူႉထိုင်လႆႈဝႃႈ လႅပ်ႈတေပဵၼ်ၵွင်ႈၼႆၼၼ်ႉၵေႃႈ မၼ်းထွင်ႇၾႆးတူၺ်းသေ ပဵၼ်ၵွင်ႈပွတ်း ၸဝ်ႈၶႂၢၼ်မိူင်းၼၼ်ႉယဝ်ႉ။ မိူဝ်ႈႁၼ်ၼင်ႇၼၼ် ၼႂ်းႁူဝ်မၼ်းၵေႃႈ ဝူၼ်ႉထိုင်သေလွင်ႈလွင်ႈမႃးလႆႈသေ ယုမ်ႉဢွၵ်ႇမႃးပႃးတင်း သၢႆတႃဢၼ်လီၵူဝ်ၼၼ်ႉယဝ်ႉလၢတ်ႈဝႃႈ “မၼ်းဢမ်ႇလႆႈမီးသၢႆၸႂ်သိုပ်ႇယူႇၵႂႃႇ တေႃႇထိုင်ဝၼ်းၼၼ်ႉလႆႈလေႃႇ ၼွၼ်းလႄႈ ဢမ်ႇပဵၼ်သင်ယဝ်ႉၼႃ ဢမ်ႇမီးလွင်ႈသင်ၵိူတ်ႇပဵၼ်မႃး မၼ်းယင်းမီးဝၼ်းမိူဝ်ႈၽုၵ်ႈ ဢၼ်လူဝ်ႇလႆႈႁဵတ်း လႄႈ ဢဝ်တၢင်းယုမ်ႉဢၼ်ၵိုင်ႇတၢင်းၸိုဝ်ႈၼွင်ႉၼႆႉ ယိုၼ်ႈမွပ်ႈပႂ်ႉႁပ်ႉတွၼ်ႈ မႄႈလႄႈၼၢႆး ဢၼ်ၵႂႃႇႁိူဝ်ႉၵၼ်မႃးတၢင်းဝၼ်းယဝ်ႉၼၼ်ႉ မၼ်းတေမီးသင်ဢၼ်လီလိူဝ် ၶၢဝ်းယၢမ်းဢၼ်မီးမႄႈမီးၼၢႆးလႄႈၼွင်ႉ ယူႇၸွမ်းၵၼ်ၼၼ်ႉလႃႇ ၼွၼ်းလႆႈယဝ်ႉၼႃ”
ဝၼ်းၸိုၼ်ႈၵေႃႈ ၼွၼ်းလုပ်ႈလင်ပၼ် မူၺ်ႁွမ်ၽွင်း ၵႂႃႇလွႆးလွႆး ၼင်ႇလုၵ်ႈဢွၼ်ႇလဵၵ်ႉၼၼ်ႉၵႂႃႇယူႇယဝ်ႉ။
ၼႂ်းၶမ်ႈၶိုၼ်းလပ်းသိင်ႇၽိုတ်းၽိုတ်းၼၼ်ႉ ဝၼ်းၸိုၼ်ႈၵေႃႈ မိူဝ်းၵႂႃႇၶိုၼ်း တီႈဢၼ်ၶဝ်ယူႇၼၼ်ႉ ၼႂ်းႁူဝ်မၼ်းၼၼ်ႉၵေႃႈ ဝူၼ်ႉထိုင်ၶိုၼ်း လွင်ႈႁဵတ်းသၢင်ႈၸဝ်ႈၶႂၢၼ်မိူင်းၼၼ်ႉမႃး ယဵပ်ႈယၢင်ႈၵႂႃႇပႃးလွင်ႈပႅင်းၸင်း ဢၼ်ဢမ်ႇၶႂၢင်းပၼ်လႆႈ ႁၢင်ႈၽၢင်မူၺ်ႁွမ်ၽွင်းဢၼ်မၼ်းလႆႈႁၼ်ၼၼ်ႉ ပၼ်ႁႂ်ႈမၼ်းလႆႈႁၼ်ၶိုၼ်း ႁၢင်ႈဢၼ်သိုၵ်းမၢၼ်ႈမိူၵ်ႈလိူင်း လူလၢႆပီႈၼွင်ႉမၼ်းၼႂ်းဝၼ်းၼၼ်ႉလႄႈ ႁဵတ်းႁႂ်ႈမၼ်ထိင်းၸႂ်ဢမ်ႇလႆႈ တႃႇတေၶႃႈႁႅမ်ႁႂ်ႈမၼ်းတၢႆၵႂႃႇပႅတ်ႈႁေ။
ယိုင်ႈဝူၼ်ႉယိုင်ႈႁၼ်လွင်ႈမိူၵ်ႈၵူၼ်းၵေႃႉၼၼ်ႉမႃးထႅင်ႈ လုၵ်ႈမေးၵူၼ်းသိုၵ်း ဢၼ်မႃးယူႇၸွမ်းၼႂ်းတပ်ႉၼႂ်းၸုမ်းၵေႃႈ လႆႈထုၵ်ႇမၼ်းၸဝ်ႈ လူလၢႆၵႂႃႇ လၢႆၵေႃႉယဝ်ႉလႄႈ မိူဝ်ႈပဵၼ်ၼင်ႇၼၼ် ၽႂ်ၵေႃႈဢမ်ႇႁတ်းၶႂ်ႈဢဝ်လုၵ်ႈမေးၶဝ်မႃးယူႇၸွမ်း။ ပေႃးဝႃႈယွၼ်းမိူဝ်းၸႂ်းလုၵ်ႈမေးသမ်ႉ ဢမ်ႇလႆႈ၊ ပေႃးလၵ်ႉမိူဝ်းၵေႃႈသမ်ႉဝႃႈလၵ်ႉပၢႆႈသေ ႁႂ်ႈၵူၼ်းၵႂႃႇၸွမ်းၶႆႈယဝ်ႉ ပေႃးဢမ်ႇလႆႈတူဝ်လိပ်းၵေႃႈႁႂ်ႈလႆႈတူဝ်တၢႆၼႆယူႇ၊ ပွၵ်ႈၼိုင်ႈ ၵူၼ်းသိုၵ်းၵေႃႉၼိုင်ႈယွၼ်းမိူဝ်းႁိူၼ်း ယွၼ်ႉမေးမၼ်းတေၵိူတ်ႇလုၵ်ႈယဝ်ႉ ဢမ်ႇမီးၽႂ်လုမ်းလႃးၼႆသေ မိူဝ်းၵႂႃႇယဝ်ႉသမ်ႉပူၼ်ႉဝၼ်းၵႂႃႇပႅတ်ႈၼိုင်ႈဝၼ်းလႄႈ မၼ်းၵေႃႈႁႂ်ႈလုၵ်ႈၼွင်ႉ ၸွမ်းၶႆႈသေတိၺွပ်းမႃးတီႈတပ်ႉယဝ်ႉ ယိုဝ်းတၢႆပႅတ်ႈ တေႃႇၼႃႈၵူၼ်းၼႂ်းတပ်ႉၵႂႃႇတီႈၼၼ်ႈၵမ်းလဵဝ်။ ဝူၼ်ႉထိုင်ၶိုၼ်း ဝၼ်းၸိုၼ်ႈသမ်ႉပေႃးၵမ်တႃမိုဝ်းၵႅၼ်ႇၵႅၵ်းၵႅၵ်းယဝ်ႉ။
လိူဝ်သေၼၼ်ႉ ပဵၼ်ၵူၼ်းဢၼ်လႆႈၸႂ်ၸႂ်ႉလွင်ႈႁုၵ်ႉႁၢႆႉၼႃႇ ပေႃးသင်ဢမ်ႇမိူၼ်ၸႂ်ၼႆၵေႃႈ ပေႃႉပေႃႉႁႅမ်ႁႅမ်လုၵ်ႈၼွင်ႉမၼ်း၊ ၵူၼ်းၸမ်တူဝ်မၼ်းတႃႇသေႇ။ ၵူၼ်းၸမ်တူဝ်မၼ်းၵမ်ႈၼမ် ၸွမ်းတူဝ်ၸွမ်းၶိင်းၼႆႉပေႃးမၢၼ်ႉယူႇသဵင်ႈ။ ၵမ်ႈၽွင်ႈယဵၼ်ႉဢမ်ႇလႆႈၵေႃႈပၢႆႈ ပေႃးပၢႆႈသမ်ႉ ၸွမ်းၶႆႈထိုင်ႁိူၼ်းထိုင်ယေးလႄႈ ဢဝ်တၢႆတင်းႁိူၼ်းၸိူဝ်းၼႆႉသေ ၵမ်ႈၽွင်ႈၵေႃႈမႆႈၸႂ်တၢင်းႁိူၼ်းလႄႈ ဢမ်ႇႁတ်းပၢႆႈ ဢမ်ႇၶႂ်ႈယူႇၵေႃႈၵႃႈလႆႈယဵၼ်ႉၵႂႃႇယဝ်ႉ။
ဝၼ်းၸိုၼ်ႈၵေႃႈ တင်းဝူၼ်ႉတင်းၼပ်ႉသၢင်ႈလူင်မိူဝ်းၵႂႃႇ၊ ထုၵ်ႇလီဢဝ်တၢႆပႅတ်ႈႁေႁႃႉ ဢမ်ႇၼၼ်ၵေႃႈ ႁဵတ်းႁႂ်ႈမၼ်းပဵၼ်တုၵ်ႉၶိတ်ႉတႃႉၵႂႃႇတေႃႇၸူဝ်ႈၼႆ။ ယွၼ်ႉပိူဝ်ႈ ဢႃႇၼႃႇဢဝ်ပေႉၵူႈလွင်ႈလႆႈလူး ဢမ်ႇဝႃႈၵူၼ်းၸိူင်ႉၼၼ် တေႁဵတ်းလွင်ႈဢမ်ႇလီတၢၼ်ႇႁိုဝ်ၵေႃႈ ဢမ်ႇမီးၽႂ်ဢဝ်တၢင်းၽိတ်းလႆႈ၊ ယွၼ်ႉမီးပိူင်တႅၵ်ႈမႃးပၼ် ပၢၼ်သိုပ်ႇပၢၼ်လႄႈ ပၢၼ်လႃႈပၢၼ်လိုၼ်းၵေႃႈ လႆႈယိူင်ႈၵၼ်မႃးတိၵ်းတိၵ်းၼၼ်ႉယဝ်ႉ။
ဝၼ်းၸိုၼ်ႈၵေႃႈတႅပ်းတတ်းသဵၼ်ႈၸႂ်လႆႈယဝ်ႉသေ လၵ်ႉငွႆးၵၢၼ်းၵႂႃႇတႂ်ႈႁၢၼ်ႉ သုမ်ႉၸဝ်ႈၶႂၢၼ်မိူင်းလွႆးလွႆး ဢၼ်ယင်းတိုၵ်ႉၼွၼ်းၶူၼ်ယူႇၶေႃႈၶေႃႈ ၽွင်းၶၢဝ်းယမ်းဢၼ်တိုၵ်ႉၼွၼ်းဝၢၼ်ယူႇၼၼ်ႉ ဢမ်ႇငိၼ်းသဵင်မၼ်းလႆႈ။ ၼင်ႇႁိုဝ်တေဢမ်ႇသုမ်းၶၢဝ်းယၢမ်း ဝၼ်းၸိုၼ်ႈၵေႃႈ ငႃၵွင်ႈသႂ်ႇတီႈၵွၵ်းႁူဝ်ၸဝ်ႈၶႂၢၼ်မိူင်းၼၼ်ႉယဝ်ႉ ယိုဝ်းၵွင်ႈသႂ်ႇၵမ်းလဵဝ်သေ ႁုၵ်ႉၸၼ်ဢဝ်မိုဝ်းၸဝ်ႈၶွၼ်မိုင်းၼၼ်ႉ ႁဵတ်းမိူၼ်ယိပ်းၵွင်ႈဝႆႉယဝ်ႉ။ ၼႅတ်ႈမူၼ်ႉၵၢၼ်းၵႂႃႇတႂ်ႈႁၢၼ်ႉလႄႈ လွမ်ငွႆးပွၵ်ႈၵႂႃႇၶိုၼ်းဝႆးဝႆး။ ၵူၼ်းပႂ်ႉယၢမ်း လႆႈငိၼ်းသဵင်ၵွင်ႈၼင်ႇၼၼ်ၵေႃႈ ၼႅတ်ႈဢွၼ်ၵၼ်မႃးတီႈၼႂ်းသုမ်ႉၸဝ်ႈၶႂၢၼ်မိူင်းသေ တီႈၼၼ်ႈ ပဵၼ်တီႈသူၼ်ၸႂ်ပိူၼ်ႈၵႂႃႇယဝ်ႉလႄႈ ၵူၼ်းပႂ်ႉယၢမ်းဢိၵ်ႇတင်း ၵူၼ်းၼႂ်းသုမ်ႉၵေႃႈ ဢွၼ်ၵၼ်ၵႂႃႇတီႈၼၼ်ႈမူတ်း၊ မၼ်းၵေႃႈလွတ်ႈဢွၵ်ႇမႃးလႆႈ တေႃႇထိုင်ပေႃးႁွတ်ႈႁိူၼ်းယူႇယဝ်ႉ။ မၼ်းတၼ်းမႃးတီႈႁိူၼ်းၶိုၼ်းဢမ်ႇႁိုင် သမ်ႉပေႃးမီးၵူၼ်းမႃးႁွင်ႉမၼ်းမိူဝ်းၵႂႃႇၶိုၼ်းၵမ်းလဵဝ်ယဝ်ႉ။
မိူဝ်ႈၵႂႃႇႁွတ်ႈတီႈတပ်ႉၼၼ်ႉ ႁၼ်ၵူၼ်းၼူၼ်းႁွမ်ႇၽႃႈၶၢဝ်ဝႆႉယူႇၼႂ်းၵၢင်တပ်ႉၶဝ်ၼၼ်ႉယဝ်ႉ။ ဝၼ်းၸိုၼ်ႈၵေႃႈ ႁဵတ်းၼင်ႇဢမ်ႇႁူႉသင်သေ “မၼ်းၸဝ်ႈပဵၼ်သင်လႄႈလႆႈပဵၼ်ၵႂႃႇၸိူင်ႉၼႆလႃႇၼႆႉ”
ၽူႈမၢႆၸဝ်ႈၶႂၢၼ်မိူင်းၼၼ်ႉၵေႃႈ မႃးယူႇႁိမ်းမၼ်းသေ “ႁိူၺ်ႉ…. ၽႂ်ၵေႃႈဢမ်ႇထၢင်ႇဢမ်ႇထိူမ်ၵဝ်ႇမေႃႉ ဝႃႈမၼ်းၸဝ်ႈတေယိုဝ်းတူဝ်တၢႆၵႂႃႇၸိူင်ႉၼႆ”
“တေႁဵတ်းႁိုဝ်လႃႇႁဝ်းပေႃးၼႆၵမ်းၼႆႉ ၽူႈဢွၼ်ႁူဝ်သမ်ႉမႃးႁႅမ်တူဝ်တၢႆပႅတ်ႈႁေ”
“ၸၢင်ႈတေႁဵတ်းႁိုဝ် ၵႃႈတေလႆႈဢဝ်ၵူၼ်းလူင်ၶဝ် လၢတ်ႈမႃးထႅင်ႈၵူၺ်းလေႃႇ ႁဝ်းၸၢင်ႈၵႂႃႇမီးသင်တႅပ်းတတ်းလႆႈ”
ၽွင်းၼၼ်ႉၸဝ်ႈလွၼ်ႉၶိူဝ်းၼၼ်ႉတႄႉၵေႃႈ ပဵၼ်ဝႆႉၵႅမ်ၸဝ်ႈၶႂၢၼ်မိူင်းယူႇသေတႃႉ တႃႇတေၶိုၼ်ႈပုတ်ႈတႅၼ်းတီႈၼၼ်ႉတႄႉၵေႃႈ ယူႇတီႈၶေႃႈသင်ႇၵူၺ်း၊ ၵူၺ်းၵႃႈ မိူဝ်ႈဢမ်ႇမီးၽႂ်ၼၼ်ႉ မၼ်းလႆႈၸတ်းၵၢၼ်ၵူႈလွင်ႈလွင်ႈပႂ်ႉထႃႈယူႇယဝ်ႉ။ မိူဝ်ႈၼၼ်ႉ ဝၼ်းၸိုၼ်ႈတႄႉၵေႃႈ ယင်းတိုၵ်ႉပဵၼ်ၽူႈၸွႆႈၽူႈမၢႆၵူၺ်း ဢမ်ႇပႆႇၸႂ်ႈၽူႈမၢႆတဵမ်တူဝ်။ မိူဝ်ႈၵူၼ်းၵေႃႉၼိုင်ႈတၢႆၵႂႃႇ မၼ်းဢမ်ႇပႃးသင်ၵႂႃႇၸွမ်းလႄႈ တေဢဝ်ဝႆႉပၼ်ၵူၼ်းပႃႈလင် သိုပ်ႇႁဵတ်းၵႂႃႇ မိူၼ်ၼင်ႇ ၸဝ်ႈၶႂၢၼ်မိူင်း ၼၼ်ႉ တၢႆၵႂႃႇယဝ်ႉၵေႃႈ ပိူၼ်ႈၵေႃႈ ဢဝ်ၵၢၼ်ၼၼ်ႉ မွပ်ႈဢၢပ်ႈပၼ်ၵူၼ်းတၢင်ႇၵေႃႉပုတ်ႈတႅၼ်းတီႈမၼ်းၵႂႃႇၵူၺ်း။
ဝၢႆးသေၼၼ်ႉ ဝၼ်းၸိုၼ်ႈၶဝ် ဢမ်ႇလႆႈယူႇတီႈၼၼ်ႈယဝ်ႉလႄႈ ဢွၼ်ၵၼ်ဢွၵ်ႇၵႂႃႇယူႇထႅင်ႈတၢင်ႇတီႈသေ ဢမ်ႇလႆႈၶိုၼ်းႁူပ်ႉၵၼ်တင်း မူၺ်ႁွမ်ၽွင်းထႅင်ႈသေပွၵ်ႈ။
ဝၼ်းၸိုၼ်ႈ ဢၼ်ယၵ်ႉတူၺ်းလုၵ်ႈဢွၼ်ႇဢၼ်ၶဝ်ႈၵႂႃႇ တၢင်းၼႂ်းၸွမ်း ၸဝ်ႈၸိင်ႇၼၼ်ႉၵေႃႈ ႁဵတ်းႁႂ်ႈမၼ်းႁၼ် မူၺ်ႁွမ်ၽွင်းၶိုၼ်း ဝၼ်းဢွၼ်တၢင်းသုတ်း တီႈလၢၼ်ႉမူၼ်ႈသိူဝ်း KTV ၼႆႉ မိူဝ်ႈ 4 ပီႊ ပူၼ်ႉမႃးၼၼ်ႉ မီးတင်း ၼႃႈတႃႁၢင်ႈလီ ဢၼ်ယၢမ်ႈႁွင်ႉဝႃႈၼွင်ႉယုမ်ႉ ၼၼ်ႉ လႆႈလႅၵ်ႈပဵၼ်ၸိုဝ်ႈမူၺ်ႁွမ်ၽွင်းၵႂႃႇသေယဝ်ႉ ၶဝ်ႈၵႂႃႇဢိင်ဢွႆႇဢွတ်ႇ ပၼ်ပိူၼ်ႈၵွတ်ႇဢႅင်ႈၵဵဝ်ႈဢႅဝ် တိူဝ်ႉၼိူဝ်ႉထိုဝ်ႉတူဝ် ဢမ်ႇမီးတၢင်းၵူဝ် ဢမ်ႇမီးတၢင်းဢၢႆ မိူၼ်ပဵၼ်ၽူႈလူင်ႉလႅၼ်ႇၵတ်ႉၶႅၼ်ႇလွင်ႈမူၼ်ႈသိူဝ်း ၸိူင်ႉၼႆၵႂႃႇယဝ်ႉ။
……….
“ၵဝ်တႃႉၶႂ်ႈႁၼ်ယဝ်ႉၵဝ် မူၺ်ႁွမ်ၽွင်းၼႆႉႁၢင်ႈမၼ်းပေႉၶႂ်ႈမႃးမိူၼ်ႁိုဝ်ဝႆႉဝႃႈ”
“ၶိင်းပီး! တူၺ်းၼႃႈမေးမႂ်းၼၼ်ႉလူး” မေးၶိင်းပီးဢၼ်ငိၼ်းၼင်ႇၼၼ်ၵေႃႈ သၢႆတႃတူၺ်းၸူးၼၼ်ႉပေႃးတၢၼ်ႇတေၵိၼ်ၼိူဝ်ႉမၼ်းပႅတ်ႈယဝ်ႉ။
“ပေႃးႁူႉတေမႃးႁဵတ်းၵၢၼ်ၸိူင်ႉၼႆယူႇ ဢၼ်ဝၼ်းၸိုၼ်ႈၸွႆႈမႃးၼၼ်ႉၵေႃႈ တေပွင်ႇလွင်ႈသင်လႃႇၼၼ်ႉ ပေႃးၼႆ”
“ပေႃးဝႃႈတေႉ ဝၼ်းၸိုၼ်ႈဢမ်ႇတၼ်းလႆႈၸွႆႈမၼ်းဢမ်ႇၸႂ်ႈႁႃႉ မၼ်းၵေႃႈလႆႈတွပ်ႇတႅၼ်းပၼ်ၵႂႃႇၵူၺ်းဢမ်ႇႁိုဝ်”
တႃႇတွင်း။ ။ ၸိူင်းႁူဝ်ၼႆႉ ပိူင်ပဵၼ်ငဝ်းလၢႆးဢမ်ႇၸႂ်ႈလွင်ႈတေႉ ဝူၼ်ႉသၢင်ႈမႃးဢဝ်ၵူၺ်း။
တွၼ်ႈသိပ်းႁႃႈသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈသိပ်းႁူၵ်းၶႃႈ။
