တွၼ်ႈသိပ်းသၢမ်
ယႃႈမဝ်းၵမ်ၼၼ်ႉတေႁဵတ်းႁိုဝ်ႁၢႆလႆႈ ၵွပ်ႈၵူၼ်းဢၼ်ၽဵဝ်ႈမူၺ်ႉလႆႈၼၼ်ႉ သမ်ႉပဵၼ်ၵူၼ်းပၼ်ႁႂ်ႈႁႂ်ႈႁဵတ်းဢွၵ်ႇလူး၊ တွၼ်ႈတႃႇၸဝ်ႈၵဝ်ႇလႆႈယူႇလီၵိၼ်လီသေ တေႁဵတ်းႁႂ်ႈၵူၼ်းမိူင်း ဝၼ်ႈမိူင်းလူမ်ႉၸူမ်ၵႂႃႇၼၼ်ႉ လိုမ်းဝူၼ်ႉၵႂႃႇယဝ်ႉၼႃႇ၊ ၵူၼ်းၵိၼ်ယႃႈလိူင်ႇၼမ် ၵူၼ်းလၵ်ႉၵူၼ်းၸူၼ် ၽွၵ်ႈႁိူၼ်းၽွၵ်ႈယေးၵေႃႈၼမ်မႃး၊ လွင်ႈႁူမ်ႇလူမ်ႈၸွမ်းဝၢၼ်ႈၵေႃႈဢမ်ႇမီး၊ လွင်ႈၵႂႃႇတႃႈပႆတၢင်းၵေႃႈဢမ်ႇလွတ်ႈၽေး ၵွပ်ႈၵူၼ်းလၵ်ႉၵူၼ်းၸူၼ်လိူင်ႇၼမ်၊ ၵူၼ်းႁဵတ်းၵၢၼ်ၸိူဝ်ႉၸၢတ်ႈၶဝ်ၵေႃႈ တူင်ႉၼိုင်ယူႇ ၵူၺ်းသမ်ႉဢမ်ႇႁၼ်ၶၢႆႉတီႈ။ ၽဵဝ်ႈမူၺ်ႉယူႇယႃႈမဝ်းၵမ် ၵူၺ်းၵူၼ်းၵိၼ်တိုၵ်ႉၼမ်လႄႈ ၵူၼ်းၶၢႆၵေႃႈဢမ်ႇယွမ်း၊ ၵူၺ်းသမ်ႉမၢၵ်ႈမီးမႃးၵွပ်ႈမၼ်းၼမ်လၢႆ ငိုၼ်းၶီႈငိုၼ်းၶွၼ်ႇ ငိုၼ်းၶွင်လၢႆၵေႃႈလႆႈၵိၼ်ပႃး တေလီဢမ်ႇလီတႃႇပိူၼ်ႈတႄႉဢမ်ႇႁူႉ ပေႃးမၼ်းလီတေႃႇၸဝ်ႈၵဝ်ႇၵူၺ်းၵေႃႈလႆႈယဝ်ႉ။ ႁဵတ်းႁႂ်ႈဝၢၼ်ႈမိူင်း သမ်ႉပေႃးသုၵ်ႉယုင်ႈဢူၼ်ၵဝ်း ဢမ်ႇၼိမ်သဝ်းလႆႈ ယွၼ်ႉၽေးယႃႈမဝ်းၵမ်ၼၼ်ႉမႃးယူႇ။
တီႈၼႂ်းဝၢၼ်ႈ ဢၼ်မီးသိုၵ်းဢုပ်ႉပိူင်ႇဝႆႉယူႇၼၼ်ႉ လိူၵ်ႈလိူၵ်ႈ ၸင်ႇသမ်ႉမီးၵူၼ်းပွင်ႇၶၢဝ်ႇမႃးဝႃႈ ႁိူၼ်းလုင်းၶိၼ်ႇၺုၼ်ႉၶဝ် ထုၵ်ႇၸူၼ်ၶဝ်ႈႁိူၼ်းၼႆလႄႈ လၵ်ႉဢဝ်ၶူဝ်းၶွင်ၵႂႃႇတၢင်းၼမ်ၼႆယူႇ။ ၶူဝ်းၶွင်ဢၼ်လၵ်ႉၵႂႃႇၼၼ်ႉပဵၼ်သင်ၼႆ သၢၵ်ႈသေႇလၵ်းထၢၼ်မၼ်းၵေႃႈ ႁၼ်လႆႈမိူဝ်ႈၵူၼ်းလၵ်ႉဢႅၼ်ႇလႅၼ်ႈပၢႆႈသေ ၶူဝ်းၶွင်ဢၼ်မၼ်းဢဝ်ၵႂႃႇၼၼ်ႉသမ်ႉ လူၼ်ႇတူၵ်းႁူင်ႈမၢၵ်ႇမိူဝ်ၸွမ်းတၢင်းလူင်ၵႂႃႇသဵင်ႈ ၼၼ်ႉတႄႉပဵၼ်ယႃႈမ ဢၼ်လုင်းၶိၼ်ႇၺုၼ်ႉလၵ်ႉၶၢႆပၼ်ၵူၼ်းၼႂ်းဝၢၼ်ႈၶဝ်ၼၼ်ႉယဝ်ႉ။ ၵူၼ်းသိုၵ်းၸိူဝ်းၼၼ်ႉၵေႃႈ မိူဝ်ႈႁၼ်ၼင်ႇၼၼ် ၵုမ်ႇမိုင်တူၺ်းၶူဝ်းၶွင်ၸိူဝ်းၼၼ်ႉၵူၺ်းလႄႈ ၸင်ႇပၼ်ႁႂ်ႈၽူႈလၵ်ႉလွတ်ႈၵႂႃႇလႆႈသေ မိူဝ်းတိၺွပ်း လုင်းၶိၼ်ႇၺုၼ်ႉၵႂႃႇတီႈ ၶွၵ်ႈၶင် ဢၼ်မီးတၢင်းၽိတ်းၵႃႉၶၢႆယႃႈမဝ်းၵမ်ၼႆယဝ်ႉ။
ၽႂ်ၽႂ်ၵေႃႈႁူႉတင်းဝၢၼ်ႈယဝ်ႉဝႃႈ လုင်းၶိၼ်ႇၺုၼ်ႉၼၼ်ႉၵႃႈၶၢႆယႃႈၼႆ မၼ်းၼၼ်ႉ လႆႈဝႃႈပဵၼ်ပေႃႈလဵင်ႉသထေးၼႂ်းဝၢၼ်ႈၵေႃႈပဵၼ်လႆႈ ၵူၼ်းသိုၵ်းၶဝ်မီးသင်ၵေႃႈလူဝ်ႇသင်ၵေႃႈ မၼ်းႁဵတ်းႁႃပၼ်မူတ်းယဝ်ႉ၊ ၵွပ်ႈမီးမၼ်းပၼ်ၸွႆႈထႅမ်လႄႈ ႁူႉယူႇၵေႃႈႁဵတ်းမိူၼ်ဢမ်ႇႁူႉဢမ်ႇႁၼ်ၵႂႃႇၵူၺ်း၊ ၵူၺ်းၵႃႈ မိူဝ်ႈထူပ်းႁၼ်သၢၵ်ႈသေႇမၼ်းၵႂႃႇၸိူင်ႉၼႆၵေႃႈ ၵႃႈတေလႆႈဢဝ်တၢင်းၽိတ်းၵႂႃႇ ၸွမ်းၼင်ႇပၵ်းပိူင်မီးဝႆႉယူႇ၊ မိူဝ်ႈၼၼ်ႉ သမ်ႉပဵၼ်ၽွင်းဢၼ်ၸဝ်ႈလွၼ်ႉၶိူဝ်း ယူႇဝႆႉၼၼ်ႉယဝ်ႉ။
မိူဝ်ႈပဵၼ်ၸိူင်ႉၼၼ် ၸဝ်ႈမိူင်းၶမ်းၵေႃႈ သင်ႇႁႂ်ႈၵူၼ်းမၼ်း ၸွမ်းတိၺွပ်းၽူႈလၵ်ႉဢဝ်ယႃႈၼၼ်ႉမႃးႁႂ်ႈလႆႈၼႆယူႇ ပႃးတင်းလွင်ႈၸဵပ်းၸႂ် ဢၼ်ပဵၼ်ၵူၼ်းမႃးပိၵ်ႉဢိုတ်းသဵၼ်ႈတၢင်းတႃႇႁႃၵိၼ်လဵင်ႉတွင်ႉၶဝ်ၼၼ်ႉယဝ်ႉ၊ ၶဝ်ၵေႃႈထၢင်ႇဝႃႈ ၽူႈလၵ်ႉၼၼ်ႉ တေပဵၼ်ၵူၼ်းၵိၼ်ယႃႈမိူၼ်ၵၼ်လႄႈ ၸင်ႇလႆႈၸွမ်းသွၵ်ႈႁႃၵူႈၸွၵ်ႉၵူႈၸဵင်ႇယူႇ၊ ႁၼ်ၽႂ်ၵေႃႈ ဢဝ်မႃးၸႅတ်ႈၵႂႃႇၵူႈၵေႃႉလႄႈ မိူၼ်ဝႃႈထူပ်းႁၼ်ၵူၼ်းၵိၼ်ယႃႈတင်းၼမ်သေဢမ်ႇၵႃး ၵူၼ်းဢၼ်ႁူႉတူဝ်ဝႃႈၵိၼ်ယႃႈၼႆၼၼ်ႉၵေႃႈ ဢွၼ်ၵၼ်ႁႃတၢင်းပၢႆႈၵၼ်မူတ်းယူႇယဝ်ႉ။
သမ်ႉဝႃႈတိၺွပ်းၵႂႃႇၵူၼ်းၼမ်သေတႃႉ ၵူၺ်းၵႃႈ ယင်းတိုၵ်ႉမီးၽူႈလၵ်ႉ ဢၼ်လၵ်ႉၶဝ်ႈႁိူၼ်းၵူၼ်းၶၢႆယႃႈၸိူဝ်းၼၼ်ႉ ထႅင်ႈလၢႆလၢႆႁိူၼ်းယူႇယဝ်ႉ။ ၵူၺ်းၵႃႈ ၵူၼ်းၸိူဝ်းၼၼ်ႉၵေႃႈ ဢမ်ႇႁတ်းၵႂႃႇတိူင်ႇလၢတ်ႈသေတႃႉ ဢၼ်ၸိူဝ်းမီးသဵၼ်ႈမီးသၢႆတႄႉၵေႃႈ လၵ်ႉၵႂႃႇယွၼ်းတၢင်းၸွႆႈထႅမ် ႁႂ်ႈမႃးဢဝ်ႁူမ်ႇလူမ်ႈပၼ်ၶဝ်ယူႇၵူၺ်းၼင်ႇၵဝ်ႇ။
တီႈဝၢၼ်ႈၸိူဝ်းဢၼ်မီးၵူၼ်းၵႃႉၶၢႆယႃႈၼၼ်ႉၵေႃႈ ပေႃးဝႃႈႁိူၼ်းလႂ်ၶၢႆယႃႈၼႆ ၵႆႉၵႆႉၺႃးလၵ်ႉၼႃႇ ၵူၼ်းသိုၵ်းၶဝ်ၵေႃႈ ၺွပ်းဝႃႈၺွပ်းယဝ်ႉ မိူဝ်ႈၺွပ်းတႄႉမိူၼ်တေၸႂ်ႈယူႇ ၵူၺ်းၵႃႈၺွပ်းၵႂႃႇယဝ်ႉၵေႃႈသမ်ႉ ယင်းတိုၵ်ႉမီးယူႇလႄႈ ပေႃးဢမ်ႇႁူႉၽႂ်ပဵၼ်ၽႂ်ယဝ်ႉ၊ ၵူၼ်းၵႃႉၶၢႆယႃႈၸွမ်းၼႂ်းဝၢၼ်ႈၸိူဝ်းၼၼ်ႉၵေႃႈ မိူၼ်တေၶၢႆဢမ်ႇလႆႈယဝ်ႉ ယွၼ်ႉဢမ်ႇမီးၵူၼ်းၵိၼ်ၼမ်မိူၼ်မိူဝ်ႈဢွၼ်တၢင်းသေဢမ်ႇၵႃး သမ်ႉထုၵ်ႇၽူႈလၵ်ႉလၵ်ႉၵႂႃႇတိၵ်းတိၵ်းသေ ၵၢၼ်ပၢႆးမၢၵ်ႈမီးၵေႃႈဢမ်ႇလီ ၵူၼ်းႁူမ်ႇလူမ်ႈမၼ်းသမ်ႉၸႂ်ႉၼိုင်ႈပွၵ်ႈ လႆႈပၼ်ၵႃႈမၼ်းၸွမ်းၼိုင်ႈပွၵ်ႈ မိူၼ်တေႁဵတ်းႁႂ်ႈၶဝ်ၵေႃႈၵိၼ်းၸႂ်မႃးမိူၼ်ၵၼ်၊ ၵမ်ႈၽွင်ႈၵေႃႈ ဝၢင်းပႅတ်ႈၵၢၼ်ၼႆႉသေ ၵႂႃႇႁႃႁဵတ်းၵၢၼ်တၢင်ႇမဵဝ်းဢဝ်ယူႇ။ ၵမ်ႈၽွင်ႈၵေႃႈ ယင်းတိုၵ်ႉမီးလၢႆးတၢင်းယူႇလႄႈ ယင်းတိုၵ်ႉသိုပ်ႇႁဵတ်းၵႂႃႇလႆႈထႅင်ႈယူႇယဝ်ႉ။
သမ်ႉဝႃႈမၼ်းပဵၼ်ၵၢၼ်ၽိတ်းပၵ်းပိူင်သေတႃႉ ၵမ်ႈၽွင်ႈၵေႃႈ မၼ်းပဵၼ်တၢင်းငၢႆႈ ဢၼ်လႆႈငိုၼ်းဝႆးလႄႈ တွၼ်ႈတႃႇႁႃလဵင်ႉၼႃႈႁိူၼ်းၸဝ်ႈၵဝ်ႇ ႁႂ်ႈပေႃးယူႇလွတ်ႈလႆႈၼၼ်ႉယဝ်ႉ။ ၵွပ်ႈဢမ်ႇမီးၽႂ် ႁဵတ်းၼႄပၼ်ဝႃႈၵၢၼ်လီ ဢၼ်ႁဵတ်းႁႂ်ႈလႆႈငိုၼ်းလီၼၼ်ႉၵေႃႈ မီးယူႇၼႆ၊ ဢၼ်ႁၼ်ၵေႃႈ ၵွပ်ႈႁၼ်ၵေႃႉၼႆႉမၢၵ်ႈမီးဝႆး ၵဝ်ၵေႃႈၶႂ်ႈမီးလႄႈ လႆႈယိူင်းၸွမ်းသေ ပဵၼ်လွင်ႈၽႄႈလၢမ်းၵၢၼ်ပၢႆးမၢၵ်ႈမီးဢၼ်လပ်းသိင်ႇၵႂႃႇယဝ်ႉ။
မိူၼ်ၸိူင်ႉၼင်ႇလုင်းၶိၼ်ႇၺုၼ်ႉၼၼ်ႉ ပဵၼ်ၵူၼ်းမၢၵ်ႈမီးငိုၼ်းယူႇယဝ်ႉ တွၼ်ႈတႃႇတူဝ်မၼ်းလွတ်ႈၼၼ်ႉ မၼ်းၵေႃႈယွမ်းၸၢႆႇငိုၼ်းပၼ်တင်းၼမ်ယူႇ၊ ၵူၼ်းၼႆႉ ၼႆႉမၼ်းတေမီးၽႂ်ဢၼ်ႁၼ်ငိုၼ်းယဝ်ႉ တေထဵင်လႆႈ ၼႂ်းၼၼ်ႉၵေႃႈယင်းပႃးၵူၼ်းၸိူင်ႉၼင်ႇၸဝ်ႈမိူင်းၶမ်းယူႇလူး၊ လုင်းၶိၼ်ႇၺုၼ်ႉ ဢၼ်လႆႈယူႇၼႂ်းၶွၵ်ႈၶင်မႃးၶၢဝ်းတၢင်းၼိုင်ႈဝူင်ႈၵေႃႈ လႆႈဢွၵ်ႇၶွၵ်ႈမႃးၶိုၼ်းသေ ၶိုၼ်းမႄးသိုပ်ႇႁဵတ်းၼႃႈၵၢၼ်မၼ်းၵႂႃႇထႅင်ႈ ယိုင်ႈၶႅၼ်းတိူဝ်းႁဵတ်းၼမ်မႃးထႅင်ႈသေဢမ်ႇၵႃး ၸၢင်ႈၵူၼ်းမႃးႁူမ်ႇလူမ်ႈပၼ်တင်းၼမ် ယူႇယဝ်ႉ။
သမ်ႉဝႃႈမၼ်းယင်းသိုပ်ႇႁဵတ်းၸိူင်ႉၼၼ်ယူႇၵေႃႈ ၽႂ်ၵေႃႈဢမ်ႇႁဵတ်းသင်မၼ်းလႄႈ ၼႂ်းတူင်ႇဝူင်းၸိူဝ်းၼၼ်ႉ ပေႃးဢၼ်လႆႈၵိၼ်ၸွမ်းၵေႃႈ ႁၼ်လီၵမ်ႉထႅမ်မၼ်းသေ ပေႃးဢမ်ႇထုၵ်ႇမႅၼ်ႈမၼ်းၵေႃႈ ႁႂ်ႈၵူၼ်းမီးဢႃႇၼႃႇၸိူဝ်းၼၼ်ႉၸတ်းၵၢၼ်ပၼ်၊ တေႃႈၼင်ႇၵူၼ်းၵႃႉယွႆႈ ဢၼ်ဢမ်ႇႁၼ်လီမၼ်းၼၼ်ႉၵေႃႈ ႁႂ်ႈပိူၼ်ႈတိၺွပ်းၵူၼ်းၸိူဝ်းၼၼ်ႉၵႂႃႇပႅတ်ႈသေ ၼႂ်းပိုၼ်ႉတီႈၼၼ်ႈၵေႃႈ လႆႈဝႃႈမၼ်းၼၼ်ႉပဵၼ်ယႂ်ႇလိူဝ်ပိူၼ်ႈဝႆႉယဝ်ႉ။ ငိုၼ်းၼႆႉမၼ်းယိုင်ႈယႂ်ႇၼႃႇ တေႃႈၼင်ႇၵူၼ်းမီးဢႃႇၼႃႇယင်းၸွမ်းဢေႃႈၶႃႈ ဢၼ်ဝႃႈၼၼ်ႉယဝ်ႉ။
မိူဝ်ႈလုင်းၶိၼ်ႇၺုၼ်ႉဢွၵ်ႇမႃး မၼ်းၵေႃႈ ၸွမ်းႁႃတူဝ်ၽူႈလၵ်ႉၼၼ်ႉတေႉတေႉဝႃႈဝႃႈယူႇ၊ ဢၼ်ပဵၼ်ၽူႈလၵ်ႉၼၼ်ႉၵေႃႈ လႆႈႁၢႆလၢႆၵႂႃႇပႅတ်ႈဢမ်ႇဢွၵ်ႇမႃးၶိုၼ်းသေပွၵ်ႈယဝ်ႉ။
ၵူၼ်းၵေႃႉၼၼ်ႉတႄႉ ပဵၼ်ၽူႈလၵ်ႉဢၼ်ဝၼ်းၸိုၼ်ႈထၢမ်တႅပ်းမိုဝ်းၼၼ်ႉယဝ်ႉ၊ သမ်ႉဝႃႈ ဢမ်ႇပဵၼ်မႃးၸွမ်းၽႅၼ်ဢၼ်ဝၢင်းဝႆႉၵေႃႈယဝ်ႉ မၼ်းၵေႃႈယင်းလႆႈမႃးယူႇၽွင်ႈ ဢၼ်ႁဵတ်းႁႂ်ႈပိူၼ်ႈတိၺွပ်းလႆႈ ၵူၼ်းၵိၼ်ယႃႈတင်းၼမ် ဢိၵ်ႇတင်း ၵူၼ်းၵႃႉယႃႈၵမ်ႈၽွင်ႈ၊ ၵူၺ်းၵႃႈ ပေႃးတေသိုပ်ႇႁဵတ်းၵႂႃႇ ယိုင်ႈၶႅၼ်းတေႁဵတ်းႁႂ်ႈၵူၼ်းမၼ်း မၢတ်ႇၸဵပ်းလၢႆလၢႆၵူၺ်းၼႆသေ မၼ်းၵေႃႈသင်ႇႁႂ်ႈၵိုတ်းယင်ႉဝႆႉယူႇယဝ်ႉ။ သမ်ႉဝႃႈလွင်ႈလၵ်ႉၽွၵ်ႈဢဝ်ယႃႈႁိူၼ်းပိူၼ်ႈၼၼ်ႉ တေယင်ႉၵႂႃႇသေတႃႉ၊ ၵူၺ်းၵႃႈ ၼႃႈၵၢၼ်တွၼ်ႈတႃႇၽူႈလၵ်ႉၼၼ်ႉတႄႉ ယင်းမီးပုၼ်ႈၽွၼ်းပၼ်ႁႂ်ႈမၼ်းႁဵတ်းၵႂႃႇထႅင်ႈယူႇ ႁႂ်ႈၵႂႃႇပဵၼ်ႁူမ်ႇလူမ်ႈပၼ် လုင်းၶိၼ်ႇၺုၼ်ႉၼၼ်ႉ ၼႆယူႇယဝ်ႉ။
ႁိုင်ၵႂႃႇပဵၼ်လိူၼ်ယဝ်ႉ ၸဝ်ႈလွၼ်ႉၶိူဝ်းၵေႃႈ ယင်းပႆႇၵိုတ်းလိုဝ်ႈလွင်ႈၸွမ်းႁႃၶမ်းလိုၼ်းၶႃ၊ သမ်ႉဝႃႈၸၢင်ႈၵူၼ်းၸွမ်းႁႃ ပိုၼ်ၽၢဝ်ႇႁႃၵေႃႈယဝ်ႉ ဢမ်ႇမီးၽႂ်ႁူပ်ႉႁၼ်လႄႈ လၢတ်ႈထိုင်လွင်ႈၶႃသေဢိတ်း၊ ဝၼ်းၸိုၼ်ႈဢၼ်ႁူႉယူႇၵေႃႈ ႁဵတ်းမိူၼ်ဢမ်ႇႁူႉၵႂႃႇၵူၺ်း။
ၸဝ်ႈလွၼ်ႉၶိူဝ်းၵေႃႈ ဝၢႆးသေၶမ်းလိုၼ်းၶႃပၢႆႈပႅတ်ႈမၼ်းၼၼ်ႉ ဢမ်ႇပဵၼ်ယူႇပဵၼ်သဝ်းလႆႈ ၵုမ်ႇမဝ်းမိင်းယူႇၸွမ်းၽူႈယိင်း ၸွမ်းၼႂ်း လၢၼ်ႉမူၼ်ႈသိူဝ်း ယူႇၼၼ်ႉၵူၺ်း၊ ဢၼ်ပဵၼ်ၸဝ်ႈၸိင်ႇၼၼ်ႉၵေႃႈ ၼင်ႇႁၢင်ႈတေႁူႉၸႂ်ၼႃႇ ဢၼ်မၼ်းႁွင်ႉမႃးပၼ်ၼၼ်ႉ ၼုမ်ႇၶၢဝ်ႁၢင်ႈလဝ်းတူဝ်ၵူမ်ၼူမ်းယႂ်ႇၵုမ်ႇလူင်ဢႅဝ်ႁီး ဢမ်ႇပီးဢမ်ႇယွမ် တိုၵ်ႉၼုမ်ႇၼႃႇ ဢႃႇယုဢမ်ႇပူၼ်ႉသၢဝ်း ၽွင်းႁၢင်ႈလီႁၢင်ႈလဝ်းလၢႆလၢႆယဝ်ႉ။
ဝၼ်းၸိုၼ်ႈၵေႃႈ မိူဝ်ႈပဵၼ်ၸိူင်ႉၼၼ် ဢမ်ႇလႆႈလိုဝ်ႈမိူၼ်ၵၼ် ၵွပ်ႈပိူဝ်ႈ ၽူႈၼမ်းဢမ်ႇပဵၼ်ၵၢၼ် ၽူႈမၢႆသမ်ႉလႆႈႁဵတ်းၵၢၼ်ၼမ်မႃးသေဢမ်ႇၵႃး သမ်ႉလႆႈတူၺ်းထိုင်လုမ်းလႃးပႃးယူႇယဝ်ႉ။ ၸဝ်ႈၸိင်ႇၵေႃႈ ႁွင်ႉဢဝ်သၢဝ်ဢွၼ်ႇႁၢင်ႈလီႁၢင်ႈလဝ်း ၶဝ်ႈလၢၼ်ႉမႃးပၼ်သမ်ႉပေႃးဢမ်ႇလိူၵ်ႈၼႃႈ၊ မီးယူႇဝၼ်းၼိုင်ႈ ဝၼ်းၸိုၼ်ႈ ဢၼ်ပဵၼ်ၵူၼ်းၵႆႉၶဝ်ႈဢွၵ်ႇလၢၼ်ႉၼႆႉတႃႇသေႇၼၼ်ႉ လႆႈႁၼ်ၸဝ်ႈၸိင်ႇႁွင်ႉဢဝ်လုၵ်ႈဢွၼ်ႇယိင်း ဢႃႇယုယင်းပႆႇတဵမ်သိပ်းပႅတ်ႇမႃးလႄႈ မၼ်းၸင်ႇလႆႈလၢတ်ႈၸူးၵႂႃႇတီႈမူၺ်ႁွမ်ၽွင်း ဢၼ်ပဵၼ်ၵူၼ်းၸမ်ၸႂ်ၵၼ်တင်းဝၼ်းၸိုၼ်ႈဝႆႉတၢၼ်ႇတၢၼ်ႇ ပဵၼ်သၢဝ်လဝ်းဢၼ်ၵုမ်းဝႆႉၼႂ်းလၢၼ်ႉၼၼ်ႉယဝ်ႉ။
“လုၵ်ႈဢွၼ်ႇၼၼ်ႉ ၵႆႉမႃးယူႇႁႃႉ ဢမ်ႇႁၼ်မႅၼ်ႈၺႃးလႃႇ”
“တိုၵ်ႉၸင်ႇႁႃမႃးသွင်သၢမ်ဝၼ်းၼႆႉၼေႈ မိူၼ်ဝႃႈ ၸဝ်ႈလွၼ်ႉၶိူဝ်းၵေႃႈ တေၵျိူၵ်ႈမၼ်းဝႆႉၼႃ ၵႆႉႁွင်ႉၸိုဝ်ႈမၼ်းၼႃႇ”
“မၼ်းၸိုဝ်ႈဝႃႈႁိုဝ်လႃႇ!!”
“ၶမ်းလိုၼ်း ၼႆဝႃႇ”
………
“ဢၼေႃ! ၵူၼ်းၸိူဝ်းၼႆႉ ယိုင်ႈလူၵႂႃႇယဝ်ႉ ၵဝ်ဢမ်ႇႁၼ်ဝႃႈ ႁဵတ်းပၼ်ၽွၼ်းလီၽႂ်ႁေမဵဝ်း လိူဝ်သေႁႃလွင်ႈလီသႂ်ႇတူဝ်၊ လိူဝ်ၼၼ်ႉသမ်ႉပၢႆႁဵတ်းႁႂ်ႈပိူၼ်ႈလႆႈယၢပ်ႇၸႂ်ၵွပ်ႈၶဝ်ထႅင်ႈၵွၼ်ႇ” ၶိင်းသၢၼ်းတင်းလူတင်းပွင်ႉဢွၵ်ႇမႃးယူႇ။
“ၵဝ်ဢိမ်ႇၼႃႇယဝ်ႉၵဝ် ပေႃးပဵၼ်ၸိူင်ႉၼႆတႄႉ သိုၵ်းဢၼ်ဝႃႈၼၼ်ႉ ၵဝ်ဢမ်ႇၶႂ်ႈႁဵတ်းႁေဢိတ်းယဝ်ႉဝႃႈ ၸၢၼ်ႈတေႉဢိူဝ်ႈမေႃႉ”
“ၼၼ်ႉယဝ်ႉၼႆ ယႃႇဝႃႈတေမေႃမီးၸႂ်ၶႂ်ႈပူၵ်းပွင်ပၼ်ႁႂ်ႈၶိုၼ်ႈယႂ်ႇ ၼႆႉႁမ်ႉၵွႆႈယူႇၵွႆႈဢွၼ်ၵၼ်တူၵ်းတႅမ်ႇၵႂႃႇတိၵ်းတိၵ်းလူင် ပေႃးမီးၵူၼ်းၸိူင်ႉၼႆယူႇ မၼ်းဢမ်ႇမီးသင်လီမႃးလႆႈလေႃႇၵဝ်ဝႃႈ ႁႃးလူဝ်ႇဢွၼ်မေးႁႃးပၢႆႈၵူၺ်းယဝ်ႉယူဝ်ႉ ၵေႃႉႁႃးဝႃႈ”
“ပေႃးဝႃႈပၢႆႈၼႆၵေႃႈ ၵဝ်ႁမ်ႉပေႃးၶုၵ်းၸႂ်လႆႈ ဢၢႆႈၶမ်းလုၵ်ႈလဵင်ႉၶိင်းၶိၼ်ႇၶဝ်ၼၼ်ႉ ၵႂႃႇၸွမ်းပိူၼ်ႈမိူင်းထႆးၼႆဝႃႇ လႆႈပၼ်ငိုၼ်းပိူၼ်ႈဢမ်ႇယွမ်းႁူဝ်သိပ်းသႅၼ်မၼ်းၼႆႉယဝ်ႉ သမ်ႉၵႂႃႇၺႃးပိူၼ်ႈၺွပ်းၼႆႁိုဝ်လႃႇ ၶိင်းဝၼ်းၶဝ်လၢတ်ႈၼႄၵဝ်တႄႉ”
“ဢႃႉ! ႁဝ်းၼႆႉပဵၼ်မဵဝ်းၼၢမ်ႇတုၵ်ႉၶဢၼ်ဝႃႈၼၼ်ႉၵူၺ်းယဝ်ႉယူဝ်ႉ ယူႇတီႈလႂ်ၵေႃႈၵႅၼ်း ပေႃးဢမ်ႇမေႃယူႇပိူၼ်ႈသမ်ႉမႃးငႅၼ်းထႅင်ႈႁေ တေႁဵတ်းႁိုဝ် ၵဝ်ပေႃးဢမ်ႇပွင်ႇၸွမ်းယဝ်ႉမႂ်း”
