တွၼ်ႈသိပ်းသွင်
ၵွပ်ႈပဵၼ်တၢင်းပဵင်းၵူၺ်းလႄႈ သဵၼ်ႈတၢင်းၵႅပ်ႈသေတႃႉ ဢမ်ႇၸႂ်ႈသဵၼ်ႈတၢင်းဢၼ်မီးၽေးသေၵႃႈႁိုဝ် ၵႃးဝၼ်းၸိုၼ်ႈၶဝ်ၼၼ်ႉတႄႉ တေႃႉတေႉၵႂႃႇၶိုတ်ႈသႂ်ႇတူၼ်ႈမႆႉဢိတ်းၼိုင်ႈၵူၺ်း၊ ၵူၺ်းၵႃႈ ၵႃးလမ်းၼၼ်ႉတႄႉၵေႃႈ ပိၼ်ႈလူင်ၵႂႃႇၼွၵ်ႈတၢင်းယဝ်ႉ ၵွပ်ႈပိူဝ်ႈတၢင်ႇၵုၼ်ႇၼမ်လႄႈ မိူၼ်တေထိင်းဢမ်ႇလႆႈ ၶူဝ်းၶွင်ၼႂ်းၵႃးၼၼ်ႉၵေႃႈ ႁေႈလူၼ်ႉဢွၵ်ႇၵႃးမႃးယဝ်ႉ၊ ၵူၼ်းၼႂ်းၵႃးသွင်ၵေႃႉၼၼ်ႉၵေႃႈ လႆႈတၢင်းမၢတ်ႇၸဵပ်းၵႂႃႇမိူၼ်ၵၼ်။
ဝၼ်းၸိုၼ်ႈၵေႃႈ ၼႅတ်ႈလၢတ်ႈႁႂ်ႈၵူၼ်းမႃးၸွႆႈယဝ်ႉ၊ တူၺ်းမိူၼ်ဝႃႈ ၶူဝ်းၶွင်ဢၼ်ယူႇတၢင်းလင်ၵႃးၶဝ်ၼၼ်ႉသမ်ႉ ၶႂ်ႈလၢၵ်ႇလၢႆးဝႆႉသေ ဝၼ်းၸိုၼ်ႈၵေႃႈ လႆႈလဵပ်ႈၵႂႃႇတူၺ်းယူႇ၊ ၵူၺ်းၵႃႈ ၵူၼ်းၼႂ်းၵႃးဢၼ်ႁၼ်ဝၼ်းၸိုၼ်ႈၵႂႃႇတၢင်းလင်ၵႃးၼၼ်ႉၵေႃႈ ၼႅတ်ႈၵိင်ႈလူင်းၵႃး ထူၵ်းၵွင်ႈငႃသႂ်ႇဝၼ်းၸိုၼ်ႈၵႂႃႇ သဵင်ၵွင်ႈတႅၵ်ႇလင် ၵူၼ်းၵေႃႉယိုဝ်းၼၼ်ႉတႄႉ လိူတ်ႈလႅင်ၽုတ်းဢွၵ်ႇတီႈၶႅၼ်မၼ်းမႃး ၵွင်ႈမၼ်းၵေႃႈလုတ်ႈတူၵ်းမိုဝ်းၵႂႃႇ၊ ၵွပ်ႈၸဝ်ႈလွၼ်ႉၶိူဝ်း တၼ်းယိုဝ်းဢွၼ်တၢင်း မၼ်းတေတဵၵ်းၼဵၼ်ၵွင်ႈသႂ်ႇဝၼ်းၸိုၼ်ႈ ၼၼ်ႉယဝ်ႉ။
“ဝၼ်းၸိုၼ်ႈ ၵႂႃႇတူၺ်းလူး..မၼ်းပဵၼ်သင်”
ဝၼ်းၸိုၼ်ႈဢၼ်လႆႈႁၼ်ၼင်ႇၼၼ်ၵေႃႈ ဢမ်ႇၶႆႈယုမ်ႇမႃးယဝ်ႉ ၵွပ်ႈပိူဝ်ႈမၼ်းပဵၼ်ယႃႈဢၢႆႉသ်လၢႆလၢႆ။
“မၼ်းပဵၼ်ယႃႈၶႃႈဢေႃႈ!!”
ၵူၼ်းၵေႃႉဢၼ်ထုၵ်ႇယိုဝ်းမိူဝ်ႈၵႆႈၼၼ်ႉ တိုၵ်ႉမီးႁႅင်းယူႇလႄႈ ၼႅတ်ႈဢႅၼ်ႇလႅၼ်ႈပၢႆႈၵမ်းလဵဝ် ၵူၺ်းၵႃႈ တၢင်းဝႆးမၼ်းၼၼ်ႉ ဢမ်ႇတၼ်းၶိုတ်းမၢၵ်ႇၵွင်ႈဝၼ်းၸိုၼ်ႈလႆႈ၊ မၢၵ်ႇၵွင်ႈတိူဝ်ႉၸပ်းၶႃၶႂႃမၼ်းသေ ဝၼ်းၸိုၼ်ႈၼၼ်ႉၵေႃႈ ဢဝ်သၢႆဢႅဝ်မၼ်း ၶွတ်ႇႁတ်ႉသႂ်ႇၶႅၼ်သွင်ၶွၼ်ၵူၼ်းၵေႃႉၼၼ်ႉ ပေႈပိၵ်ႇဝႆႉသေ “တၢင်ႇပွၵ်ႈမႃး ထၢင်ႇတႄႉတေလႆႈဢဝ်ၸိူၵ်ႈႁဵတ်းသၢႆဢႅဝ်ယဝ်ႉ”
ၸဝ်ႈလွၼ်ႉၶိူဝ်းၵေႃႈတေႃႈၼင်ႇၼၼ် ႁၼ်ၵူၼ်းႁေႃႈၵႃးဢၼ်မၢတ်ႇၸဵပ်းမဝ်းၵႂႃႇ တိုၼ်ႇမႃးၶိုၼ်းၼၼ်ႉ ဢၢၼ်းတေပၢႆႈၵႂႃႇလႄႈ လႆႈၵႂႃႇမတ်ႉမၼ်းဝႆႉမိူၼ်ၵၼ်ယူႇယဝ်ႉ။
မိူဝ်ႈၽွင်းဢၼ်ၶႃသွင်ၵေႃႉတိုၵ်ႉပႂ်ႉၵူၼ်းတေမႃးယူႇၼၼ်ႉ
“လွင်ႈၼႆႉတေလႆႈႁဵတ်းႁိုဝ်ၶႃႈ”
ယၢမ်းၼၼ်ႉၵႃးၸဝ်ႈမိူင်းၶမ်းၵေႃႈႁွတ်ႈမႃးထိုင်သေ ၼႅတ်ႈမႃးၸူးၸဝ်ႈလွၼ်ႉၶိူဝ်းၶႃသေ “လွင်ႈၼႆႉဝႆႉပၼ်ပုၼ်ႈၽွၼ်းၶႃႈၵေႃႉၸတ်းၵၢၼ်ၵႂႃႇၶႃႈလႄႈ”
“ဢိုမ်ႈ! ႁူႉယဝ်ႉ..”
ဝၼ်းၸိုၼ်ႈဢၼ်ဢမ်ႇလႆႈႁၼ်ၸဝ်ႈလွၼ်ႉၶိူဝ်းထဵင်သင်ၶိုၼ်းၼၼ်ႉၵေႃႈ မၼ်းၸင်ႇလၢတ်ႈၸူးၵႂႃႇၶိုၼ်း “မိူဝ်ႈလႂ်မိူဝ်ႈပဵၼ်ၸိူင်ႉၼႆယဝ်ႉ ၶႃႈတေသိုပ်ႇဢဝ်ပုၼ်ႈၽွၼ်းၵႂႃႇၵူၺ်း”
“လူဝ်ႇႁဵတ်းသင်ၵေႃႈဢုပ်ႇၵၼ်တင်းဝၼ်းၸိုၼ်ႈၵႂႃႇလႄႈၼႃႈ” ၸဝ်ႈလွၼ်ႉၶိူဝ်းၵေႃႈ ႁေႃႈၵႃးမၼ်းဢွၵ်ႇမိူဝ်းၵႂႃႇပႅတ်ႈယူႇယဝ်ႉ။
ၸဝ်ႈမိူင်းၶမ်းၼၼ်ႉတႄႉၵေႃႈ မၢၵ်ႇတႃမၼ်းသမ်ႉပေႃးႁိူဝ်ႈသၢင်းဝၢင်း ယုမ်ႉယူႇၸုတ်းၵုတ်းယဝ်ႉ။ ဝၼ်းၸိုၼ်ႈဢၼ်လႆႈႁၼ်ၼင်ႇၼၼ် ႁူႉၵမ်းလဵဝ်ယဝ်ႉဝႃႈတေလႆႈႁဵတ်းၸိူင်ႉႁိုဝ်ၼႆ။
ယႃႈဢၢႆႉသ် ဢၼ်တိၺွပ်းလႆႈၵႃးတင်းလမ်း လူၺ်ႈမီးၸဝ်သိုၵ်းၵေႃႉႁူႉႁၼ်ၸွမ်း ၵူၺ်းၵႃႈ ဢမ်ႇမီးၶၢဝ်ႇငၢဝ်းသင်ဢွၵ်ႇမႃးလႄႈ ဢမ်ႇမီးၽႂ်လၢတ်ႈထိုင်လွင်ႈၼႆႉသေၵေႃႉ၊ ယႃႈဢၼ်တိၺွပ်းလႆႈၼၼ်ႉ ဢဝ်ၵႂႃႇဝႆႉတီႈလႂ်ယဝ်ႉၼႆၵေႃႈ ၽႂ်ဢမ်ႇႁူႉ။ ဝၼ်းၸိုၼ်ႈတႄႉ ႁူႉႁၼ်ၸွမ်းၵူႈၶၵ်ႉၵူႈတွၼ်ႈယဝ်ႉ ယွၼ်ႉမၼ်းၵေႃႉပဵၼ်ၵူၼ်းတေႃႉသူင်ႇပၼ် တေႃႇပေႃးသုတ်းသၢႆတၢင်း တေႃႇထိုင် ဢွင်ႈတီႈႁူင်းႁဵတ်းယႃႈ ဢၼ်မီးလွင်ႈၵပ်းသိုပ်ႇၵၼ်ယူႇတႃႇသေႇလႄႈ မၼ်းၵေႃႈ လႆႈဢဝ်ၵႂႃႇလႅၵ်ႈငိုၼ်းလႆႈတင်းၼမ်။ ငိုၼ်းၼၼ်ႉတႄႉ ပဵၼ်တွၼ်ႈတႃႇ ၵူၼ်းမီးဢႃႇၼႃႇၶဝ် ဢဝ်ၵႂႃႇၸႂ်ႉတိုဝ်းလွင်ႈမူၼ်ႈသိူဝ်းၸဝ်ႈၵဝ်ႇ တႃႇလဝ်ႇမူၼ်ႈ ၸႂ်ႁႂ်ႈသိူဝ်း၊ ဢႅဝ်ႇလႄႇလဵၼ်ႈၸွမ်းသၢဝ်လဝ်း၊ ငိုၼ်းတူပ်ႉၼႅပ်ႇ ယဵတ်ႈၼႅပ်းဢႅင်ႈၼဵပ်းဢႅဝ်ၼဵပ်းသိူဝ်ႈသၢဝ်ၵႂႃႇငၢႆႈငၢႆႈ၊ သိုဝ်ႉလူတ်ႉသိုဝ်ႉၵႃး၊ သိုဝ်ႉႁိူၼ်းၶိုၵ်ႉႁိူၼ်းၶႅမ်ႉ ပဵၼ်ၽူႈမၢၵ်ႈမီးၵၼ်ၵႂႃႇဝႆးၽႂ်းယူႇယဝ်ႉ။
ပေႃးမီးငိုၼ်းၵေႃႈ ပိူၼ်ႈထၢင်ႇယႂ်ႇထၢင်ႇၶိုၵ်ႉ ၽႂ်ႁၼ်ၵေႃႈၶႂ်ႈၶဝ်ႈႁႃ ၸူမ်းဢုပ်ႇၸူမ်းတွၼ်ႈ တုမ်ႉယွၼ်ႈမႅၼ်ႈၸႂ် ပိူၼ်ႈမႃးယဝ်ႉ။ ပေႃးမီးငိုၼ်းပဵၼ်ၸဝ်ႈ ဢၼ်ဝႃႈၼၼ်ႉ လႄႈ ၶဝ်ၵေႃႈၸင်ႇၶႂ်ႈဢွၼ်ၵၼ်မီးငိုၼ်းဝႆး ႁင်းၽႂ်ႁင်းမၼ်းယူႇ။
ၶဝ်လႆႈငိုၼ်းၵႃႈတေႃႉသူင်ႇယႃႈပွၵ်ႈၼႆႉ ၶႅမ်ႉလႅပ်ႈလီလႄႈ ဢွၼ်ၵၼ်မႃးၵိၼ်ၵျေႃႇၵိၼ်မူၼ်ႈယူႇတီႈၼႂ်း လၢၼ်ႉမူၼ်ႈသိူဝ်း ဢၼ်ၶဝ်ပဵၼ်ၵူၼ်းႁူမ်ႈၵၼ်သေႁဵတ်းဝႆႉၼၼ်ႉယူႇယဝ်ႉ။ ၵူၼ်းၼႂ်းၼၼ်ႉတႄႉ ဢမ်ႇလွတ်ႈပဵၼ် ၸဝ်ႈပၢင်ႇ၊ ၸဝ်ႈပၼ်ႇ၊ ၸဝ်ႈမိူင်းၶမ်း၊ ၸဝ်ႈၸိင်ႇ လႄႈ ၸဝ်ႈလွၼ်ႉၶိူဝ်း ႁူမ်ႈပႃး ဝၼ်းၸိုၼ်ႈၵူၼ်းၽၢႆႇလင်ႁဵတ်းၵၢၼ်ၵူႈလွင်ႈလွင်ႈ ပၼ်ပုၼ်ႈတႃႇၸုမ်းၶဝ်။
ၼႃႈၵၢၼ်ပွၵ်ႈၼႆႉ ဝၼ်းၸိုၼ်ႈၵေႃႈ တႃႇမၼ်းၼၼ်ႉ လႆႈငိုၼ်းမႃးဢမ်ႇဢေႇမိူၼ်ၵၼ်၊ ၵွပ်ႈပိူဝ်ႈယူႇၸွမ်းၵူၼ်းၸိူဝ်းၼႆႉလႄႈ ၵႃႈတေလႆႈယူႇမိူၼ်ၼင်ႇၶဝ်ၼၼ်ႉယဝ်ႉ မၼ်းၸင်ႇၸၢင်ႈတေယူႇလွတ်ႈလႆႈ။ ငိုၼ်းၸိူဝ်းၼၼ်ႉ မၼ်းလႆႈဢဝ်ၵႂႃႇၸႂ်ႉၸၢႆႇ ပုၼ်ႈတႃႇၽႅၼ်ၵၢၼ်မၼ်းမိူၼ်ၵၼ်ယူႇယဝ်ႉ။
ၵွပ်ႈပိူဝ်ႈၵၢၼ်သုၵ်ႉပႅတ်ႈလႄႈ ၸဝ်ႈလွၼ်ႉၶိူဝ်းၵေႃႈ ဢမ်ႇလႆႈၶိုၼ်းပွၵ်ႈမိူဝ်းႁႃတီႈၶမ်းလိုၼ်း သမ်ႉပေႃးတၼ်းႁိုင်ၵႂႃႇပဵၼ်ဝူင်ႈယဝ်ႉ၊ မိူဝ်ႈဢၼ်ၶုၵ်းၸႂ်လႆႈမႃးၶိုၼ်းၵေႃႈ ၼႅတ်ႈၸူဝ်းႁွင်ႉဢဝ် ဝၼ်းၸိုၼ်ႈမိူဝ်းၵႂႃႇၶိုၼ်းယူႇ ၵူၺ်းၵႃႈ ဢမ်ႇလႆႈႁၼ်ၽႂ်တီႈႁိူၼ်းယဝ်ႉလႄႈ ၸင်ႇတေငိၼ်းၵူၼ်းႁိမ်းႁိူၼ်းၼၼ်ႉဝႃႈ ၶႃသွင်ၵေႃႉမႄႈလုၵ်ႈ လႆႈပၢႆႈၵႂႃႇပႅတ်ႈ ၸဵမ်မိူဝ်ႈၶမ်ႈဢၼ်ၸဝ်ႈလွၼ်ႉၶိူဝ်းၶဝ် မိူဝ်းၵႂႃႇၼၼ်ႉယဝ်ႉၼႆယူႇ။
ၸဝ်ႈလွၼ်ႉၶိူဝ်း ဢၼ်လႆႈငိၼ်းၼင်ႇၼၼ်ၵေႃႈ ပဵၼ်ဢၼ်ဢမ်ႇႁၢၼ်ႉၸႂ်တေႉတေႉလႄႈ သမ်ႉပေႃးၸႂ်လမ်ဢွၵ်ႇမႃးသေ ၼႅတ်ႈသင်ႇႁႂ်ႈဝၼ်းၸိုၼ်ႈ ၵႂႃႇၸွမ်းၶႆႈၶႃမႄႈလုၵ်ႈမႃးႁႂ်ႈလႆႈၵမ်းလဵဝ်ၼႆယူႇ။ ဝၼ်းၸိုၼ်ႈၵေႃႈ ႁူႉယူႇတီႈၸႂ်ဝႃႈ ၶႃမႄႈလုၵ်ႈၼၼ်ႉ လႅပ်ႈတေၵႂႃႇတၢင်းလႂ်လႆႈ ၵွပ်ႈပိူဝ်ႈပဵၼ်ၽႅၼ်ၵၢၼ်မၼ်း တႃႇႁႂ်ႈၶႃသွင်ၵေႃႉ ပၢႆႈဢွၵ်ႇလွတ်ႈလႆႈ တႂ်ႈဢႃႇၼႃႇၸဝ်ႈလွၼ်ႉၶိူဝ်းၼၼ်ႉယဝ်ႉ။
ၶမ်းလိုၼ်းၼၼ်ႉ ပဵၼ်မေးၼွႆႉၸဝ်ႈလွၼ်ႉၶိူဝ်း ဢၼ်ႁၵ်ႉလႄႈ ၸင်ႇယွမ်းပၼ်လႆႈၵူႈလွင်ႈယဝ်ႉ၊ ၵူၺ်းၵႃႈ ၵူၼ်းၵေႃႉၼိုင်ႈသမ်ႉ ႁၵ်ႉလႄႈၶႂ်ႈၵုမ်းၵမ်ၵူႈလွင်ႈလွင်ႈသေ ႁဵတ်းႁႂ်ႈၶမ်းလိုၼ်းပဵၼ်ၵူၼ်းဢၼ် တေလႆႈလႆႈယူႇၼႂ်းသၢႆတႃမၼ်းတႃႇသေႇယဝ်ႉ လႆႈသူင်ႇၶမ်းလိုၼ်းယူႇၼႂ်းပိုၼ်ႉတီႈ ဢၼ်မၼ်းတေႁပ်ႉႁူႉၶၢဝ်ႇၶႃမႄႈလုၵ်ႈလႆႈၼၼ်ႉမႃးတႃႇသေႇ၊ လူၺ်ႈမီးဝၼ်းၸိုၼ်ႈပဵၼ်ၵူၼ်းဢဝ်ပုၼ်ႈၽွၼ်း သူင်ႇပၼ်ၶၢဝ်ႇလွင်ႈၶႃတင်းသဵင်ႈယူႇ။
ဝၼ်းၸိုၼ်ႈၵေႃႈ ပဵၼ်ဢၼ်ႁၼ်ထိုင်ၵၢင်ၸႂ်လႄႈ ဝူၼ်ႉၽိတ်းတေႃႇၶႃမႄႈလုၵ်ႈမႃးတႃႇသေႇသေ ၶတ်းၸႂ်ၸွႆႈထႅမ်ၵူႈလွင်ႈ ၼင်ႇၵႃႈပွင်ပဵၼ်လႆႈယူႇ၊ သမ်ႉဝႃႈၶတ်းၸႂ်ႁႂ်ႈသွင်ၵေႃႉမႄႈလုၵ်ႈ ဢွၵ်ႇပၢႆႈတႂ်ႈဢႃႇၼႃႇဢၼ်ဢမ်ႇမီးလွင်ႈၽဵင်ႇပဵင်းတွၼ်ႈတႃႇၶႃၼႆႉ ၼႆသေတႃႉ ၶမ်းလိုၼ်းၵေႃႈဢမ်ႇယွမ်းၵႂႃႇသေပွၵ်ႈ။ ၵူၺ်းၵႃႈ ပွၵ်ႈလိုၼ်းသုတ်း ဢၼ်မၼ်းလႆႈႁူပ်ႉတင်းၸဝ်ႈလွၼ်ႉၶိူဝ်းၼၼ်ႉၵေႃႈ ႁဵတ်းႁႂ်ႈမၼ်းတႅပ်းတတ်း ၽႃႈဝၢင်းၵူႈလွင်ႈသေ လၢတ်ႈႁႂ်ႈဝၼ်းၸိုၼ်ႈ ဢွၼ်ၶႃမႄႈလုၵ်ႈပၢႆႈဢွၵ်ႇၵႂႃႇယူႇယဝ်ႉ။
ဝၼ်းၸိုၼ်ႈၵေႃႈ ဢဝ်တိုဝ်ႉတၢင်း ၵႂႃႇသူင်ႇၶူဝ်းၶွင်ၼၼ်ႉသေ မၼ်းၵေႃႈလႆႈဢွၼ်ဢဝ်သွင်ၵေႃႉမႄႈလုၵ်ႈ ဢွၵ်ႇပၢႆႈၵႂႃႇၸွမ်းယူႇယဝ်ႉ၊ ၼႂ်းဝၼ်းၼၼ်ႉ မၼ်းလႆႈယွၼ်းတၢင်းၸွႆႈထႅမ်တီႈၸၢႆးလိူၼ်ဝႆႉ ႁႂ်ႈဢွၼ်ၶႃမႄႈလုၵ်ႈ ဢွၵ်ႇတီႈဝၢၼ်ႈၵႂႃႇၼႆလႄႈ ႁဵတ်းႁႂ်ႈသဵၼ်ႈတၢင်းဢွၵ်ႇပၢႆႈသွင်ၶႃၼၼ်ႉ ငၢႆႈလူမ်သေဢမ်ႇၵႃး ဝၼ်းၸိုၼ်ႈၵေႃႈ တေဢမ်ႇလႆႈထုၵ်ႇထၢင်ႇထိူမ် ၵွပ်ႈဢမ်ႇလႆႈၶဝ်ႈၼႂ်းတပ်ႉမႃးၼၼ်ႉယဝ်ႉ။
သမ်ႉဝႃႈၵႃႈၶႂ်ႈၸွမ်းႁႃသေတႃႉ ပူၼ်ႉမႃးပဵၼ်ဝူင်ႈယဝ်ႉ ႁူႉၵႃႈတိုၼ်းႁႃဢမ်ႇထူပ်းလႆႈ၊ ၸဝ်ႈလွၼ်ႉၶိူဝ်းၵေႃႈ မိူၼ်တေၸႂ်လမ်ႁႅင်းၼႃႇသေ တူပ်းၼႃႈဝၼ်းၸိုၼ်ႈၵႂႃႇ ၽၢႆႇၼႃႈ လုၵ်ႉၼွင်ႉမၼ်းၸိူဝ်းၼၼ်ႉ လူၺ်ႈတီႈဢမ်ႇတၼ်းတူၺ်းၽႂ်ယဝ်ႉ။
“ၶဝ်ႁၢႆၵႂႃႇပဵၼ်ဝူင်ႈယဝ်ႉ ပဵၼ်သင်လႄႈဢမ်ႇလၢတ်ႈသင်တီႈၵဝ်လႃႇ”
“ၶႃႈၵေႃႈဢမ်ႇႁူႉမိူၼ်ၵၼ်ၶႃႈ!! ၼႂ်းဝူင်ႈၼၼ်ႉ ၶႃႈၵေႃႈဢမ်ႇလႆႈႁပ်ႉလၢႆးငၢၼ်းသင်”
ၸဝ်ႈမိူင်းၶမ်း ဢၼ်ပဵၼ်ၵူၼ်းၵေႃႉလၢႆးငၢၼ်းလွင်ႈၼႆႉၵမ်းသိုဝ်ႈၼၼ်ႉ မၼ်းၵေႃႈလႆႈလၢတ်ႈၵႂႃႇ“ၶႃႈၵေႃႈဝႃႈမိူၼ်ၶႃႈလႆႈလၢတ်ႈၵႂႃႇယဝ်ႉ”
“ဝၼ်းလႂ်ၶႃႈလႃႇ” ဝၼ်းၸိုၼ်ႈႁူႉလီယူႇဝႃႈ ၸဝ်ႈၶမ်းမိူင်းၼၼ်ႉလၢတ်ႈယူႇ ၵူၺ်းၵႃႈ လၢတ်ႈမိူဝ်ႈမၼ်းမဝ်းလဝ်ႈလႄႈ ဝၼ်းၸိုၼ်ႈၸင်ႇလႆႈထၢမ်ၵႂႃႇၶိုၼ်း ႁႂ်ႈမၼ်းယိုၼ်ယၼ်လႆႈ၊ ၵွပ်ႈပိူဝ်ႈ ပေႃးမၼ်းမဝ်းလဝ်ႈ မၼ်းပဵၼ်ၵူၼ်းဢၼ် ဢမ်ႇတွၼ်ႉတွင်းၶိုၼ်း လွင်ႈႁဵတ်းသၢင်ႈမၼ်းသေပွၵ်ႈ ဝၼ်းၸိုၼ်ႈႁူႉလီလႄႈ ၸင်ႇၶိုၼ်းထၢမ်ၼၼ်ႉယဝ်ႉ။
“ၶႃႈလၢတ်ႈတေႉဢေႃႈ လုၵ်ႈဢွၼ်ႇလၢတ်ႈၶႃႈမႃးယဝ်ႉ ၶႃႈၵေႃႈ လၢတ်ႈၶိုၼ်းၵမ်းလဵဝ်ၼႃႇ တေပဵၼ်ၶမ်ႈဝၼ်းဢၼ်မၼ်းပၢႆႈၵႂႃႇၼၼ်ႉၶႃႈယူဝ်ႉ”
“ဢမ်ႇၸႂ်ႈဝူၼ်ႉဝႃႈလၢတ်ႈယဝ်ႉၼႆသေ လိုမ်းလၢတ်ႈပႅတ်ႈၶႃႈႁႃႉ ထဝ်ႈမႃးယဝ်ႉၵေႃႈ ၵႆႉၵႆႉလိုမ်းငၢႆႈၼႃႇၶႃႈလူး”
“ပဵၼ်ႁိုဝ်ၵေႃႈယဝ်ႉ! ႁႃမႃးႁႂ်ႈမၼ်းလႆႈလႄႈ…” သင်ႇၼၵ်းသင်ႇၼႃၵႂႃႇယူႇယဝ်ႉ။
ၸဝ်ႈမိူင်းၶမ်းၵေႃႈ ပဵၼ်ၽူႈႁူႉႁၼ်ၸွမ်းၵေႃႉၼိုင်ႈလႄႈ မိူဝ်ႈၼၼ်ႉတီႈၼႂ်းတပ်ႉ မၼ်းလႆႈပဵၼ်ဝႆႉပႃးၵႅမ်ၸဝ်ႈလွၼ်ႉၶိူဝ်းသေဢမ်ႇၵႃး ၶႃၼၼ်ႉပဵၼ်ဢူၺ်းလီၵၼ်ၵေႃႈဝႃႈလႆႈယဝ်ႉ၊ ၶဝ်ႈႁဵတ်းသိုၵ်းၸွမ်းၵၼ် ဢွၵ်ႇၼႃႈသိုၵ်းၸွမ်းၵၼ်မႃးသေ ပဵၼ်ၵူၼ်းႁူႉလွင်ႈ ၸဝ်ႈလွၼ်ႉၶိူဝ်းလီလိူဝ်သေပိူၼ်ႈၵေႃႉၼိုင်ႈၵေႃႈဝႃႈလႆႈယူႇ။ ယွၼ်ႉၼၼ် ၸင်ႇလႆႈဢဝ်ၶမ်းလိုၼ်း မႃးၽၢၵ်ႇပၼ်ႁႂ်ႈမၼ်းလႆႈၸွႆႈတူၺ်းပႃး။ ၵွပ်ႈၼၼ် လွင်ႈၶမ်းလိုၼ်းၼၼ်ႉ မၼ်းၵေႃႈပဵၼ်ၽူႈၵဵဝ်ႇၶွင်ႈပႃးလႄႈ ၸင်ႇလႆႈပဵၼ်ၵူၼ်းၵေႃႉဢၼ်ႁပ်ႉလၢႆးငၢၼ်းလွင်ႈၶမ်းလိုၼ်းၼၼ်ႉယဝ်ႉ။
ယွၼ်ႉမိုတ်ႈၵၼ် ယွၼ်ႉႁူႉလွင်ႈၵၼ်ၼႃႇပူၼ်ႉတီႈလႄႈ ဢမ်ႇဝႃႈၸဝ်ႈၶမ်းမိူင်းတေႁဵတ်းသင် ႁဵတ်းလွင်ႈဢမ်ႇထုၵ်ႇမႅၼ်ႈသေတႃႉ ၸဝ်ႈလွၼ်ႉၶိူဝ်းၵေႃႈဢမ်ႇပေႃးႁတ်းႁဵတ်းသင်တီႈမၼ်းတေႉတေႉ။
တႃႇတွင်း။ ။ ၸိူင်းႁူဝ်ၼႆႉဢမ်ႇၸႂ်ႈလွင်ႈတေႉ ပဵၼ်လွင်ႈဝူၼ်ႉသၢင်ႈမႃးဢဝ်ၵူၺ်း။
တွၼ်ႈသိပ်းသွင်သုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈသိပ်းသၢမ်ၶႃႈ။
