တွၼ်ႈသီႇ
ၶႃႈၵေႃႈဢမ်ႇႁူႉဝႃႈ ၶႃႈတေတၼ်းလၢတ်ႈၶဝ်မိူဝ်ႈလႂ်ထႅင်ႈ၊ တေလႆႈႁူပ်ႉၶဝ်ၶိုၼ်းထႅင်ႈမိူဝ်ႈလႂ်လႄႈ ပေႃးဢမ်ႇလႆႈလၢတ်ႈ မၼ်းတေၸၢင်ႈပဵၼ်လွင်ႈဢၼ်ၶမ်ၸႂ်ၶႃႈဝႆႉယူႇၼႆသေ ၸင်ႇလႆႈယွၼ်းၶၢဝ်းယၢမ်းၶဝ် ၵႂႃႇဢုပ်ႇတၢင်းၼႃႈႁိူၼ်းၶဝ် ဢၼ်ၵႆတၢၼ်ႇတၢၼ်ႇ တီႈဢေးၼူၼ်းၶဝ်ဢမ်ႇဢၢပ်ႈငိၼ်းသဵင်လီၼၼ်ႉသေ လၢတ်ႈၶေႃႈၵႂၢမ်းၼႂ်းၸႂ် ဢၼ်ၶႃႈယဵၼ်ႉၵၼ်ႈမၼ်းမႃးသၢမ်ပီႊပၢႆၼၼ်ႉ ဢွၵ်ႇၵႂႃႇၼႄၶဝ်ယူႇ။
“တႄႇ..တႄႇၸဵမ်မိူဝ်ႈၶႃႈႁူပ်ႉႁၼ်ပီႈ ပွၵ်ႈဢွၼ်တၢင်းသုတ်းၼၼ်ႉ…” သဵင်ၶႃႈလႆႈယဵၼ်ၵႂႃႇ သဵင်ႁိမ်းႁွမ်းၼၼ်ႉၵေႃႈယဵၼ်ၸွမ်းယဝ်ႉ၊ ႁူဝ်ၸႂ်ၶႃႈၵေႃႈတဵၼ်ႈတွတ်ႇႁႅင်းမႃး၊ ၼႃႈၵေႃႈလႅင်မႃးယဝ်ႉ ၼင်ႇဝႃႈပဵၼ်ဝၼ်းဢွၼ်တၢင်းသုတ်း ဢၼ်ၶႃႈလႆႈႁူပ်ႉၶဝ်ၼၼ်ႉယူႇ။
“ပဵၼ်သင်လႃႇ..” ၶဝ်ၵေႃႈယၵ်ႉတူၺ်းၶႃႈသေယုမ်ႉၸူး မၼ်းယိုင်ႈၶႅၼ်းႁဵတ်းႁႂ်ႈၶႃႈ ၶုၵ်းၶူၼ်ႉၶိုၼ်း ဝၼ်းဢွၼ်တၢင်းသုတ်းၼၼ်ႉတိၵ်းတိၵ်းလႄႈ ၶႃႈၵေႃႈ လပ်းႁူလပ်းတႃသေ သမ်ႉပေႃးသၼ်ႇၵႂႃႇတင်းတူဝ် ၶႂ်ႈၶီႈၶႂ်ႈယဵဝ်ႈၵေႃႈဢမ်ႇႁူႉယဝ်ႈ၊ ၼင်ႇဝႃႈတၢင်းၵူဝ်ၼႂ်းမိူင်းၵူၼ်းၼႆႉ မႃးတူၵ်းယူႇတီႈၼႆႈမူတ်းမူတ်းယဝ်ႉ၊ တေလၢတ်ႈဢွၵ်ႇႁႃႉဢမ်ႇလၢတ်ႈ ယင်းတိုၵ်ႉယိုဝ်ႈယိုတ်းယူႇလႄႈ သဵင်သႅၼ်ႇႁွင်ႉ ဢေးၼွၼ်းမေႃးလင်မႃး
“ပႆႇဢုပ်ႇၵၼ်ယဝ်ႉႁႃႉ!”
“ၶႃႈၵျိူၵ်ႈပီႈ!” တင်းသဵင်ဢေးၼူၼ်းလႄႈသဵင်ၶႃႈၼၼ်ႉၵေႃႈ မေႃးသွၼ်ႉၵၼ်မႃးယူႇ။
“ႁႃ!!..” ၶဝ်ၶိုၼ်းထၢမ်ထႅင်ႈ ၼင်ႇဝႃႈဢမ်ႇလႆႈငိၼ်းဢၼ်ၶႃႈလၢတ်ႈၼၼ်ႉယဝ်ႉ။
ၶႃႈၵေႃႈႁိုဝ်ႁတ်းလၢတ်ႈသင်ထႅင်ႈယဝ်ႉလႃႈ ၼႅတ်ႈဢၼ်ႇလႅၼ်ႈပၢႆႈၵႂႃႇၵမ်းလဵဝ်ၵူၺ်းယဝ်ႉလေႃႇ၊ ၵူၺ်းၵႃႈ ဢမ်ႇတၼ်းႁူႉတူဝ် ၼင်ႇဝႃႈၶႅၼ်သိူဝ်ႈၶႃႈၼၼ်ႉ မီးသင်သေလွင်ႈလွင်ႈၸၼ်ဝႆႉယူႇ ဢဝ်ၸႂ်သမ်ႉပေႃးၶုၼ်ႇၵီႈလူင်မႃး၊ ၽိူဝ်ႇၶႃႈဝၢႆႇတူၺ်း မၼ်းႁိုဝ်မိူၼ်ၼင်ႇဢၼ်ၶႃႈဝူၼ်ႉ ဝႃႈၶဝ်တေၸၼ်ဝႆႉၼႆၼၼ်ႉဢမ်ႇၸႂ်ႈ၊ ၵွပ်ႈၶႃႈဢၢႆၼႃႇထိုင်တီႈ ၽႃႇယုမ်းၵႂႃႇဢမ်ႇတၼ်းႁူႉတူဝ် ဢဝ်ၶႅၼ်သိူဝ်ႈၶႃႈၼၼ်ႉ ၵွင်ႉသႂ်ႇၼၢမ်တီႈယုမ်းမွၵ်ႇၼႃႈႁိူၼ်းၶဝ်ၼၼ်ႉၵူၺ်း။
“တေၼႅတ်ႈၵႂႃႇလႂ်လႃႇ ၸိုင်ဝႃႈမီးလွင်ႈတေလၢတ်ႈၼႄပီႈဢမ်ႇၸႂ်ႈႁႃႉ”
“ဢေႃႈ!! ဢမ်ႇမီးယဝ်ႉၶႃႈ ၶႃႈတေမိူဝ်းယဝ်ႉ”
“ပီႈ..လႆႈငိၼ်းယူႇၼႃ ငိၼ်းတဵမ်သွင်ႁူယဝ်ႉ”
ဢဝ်ၶႃႈသမ်ႉပေႃးၶုၼ်ႇၵိုတ်းလူင်ၵႂႃႇၵမ်းလဵဝ် ၶဝ်ၼၼ်ႉၵေႃႈ ပႆၶဝ်ႈမႃးၸူးၶႃႈသေယဝ်ႉ ယုမ်ႉၸူးၶႃႈယူႇ။ ဢမ်ႇဝႃႈမိူဝ်ႈလႂ် တၢင်းယုမ်ႉၶဝ်လႄႈ သၢႆတႃၶဝ်ဢၼ်ယၵ်ႉတူၺ်းၸူးၼၼ်ႉ ႁဵတ်းႁႂ်ႈၸႂ်တဵၼ်ႈတွတ်ႇႁႅင်းၵွပ်ႈမၼ်း ယူႇတႃႇသေႇယဝ်ႉ။ မိူဝ်ႈလဵဝ်ၼႆႉၶႅၼ်းၼႃႇယဝ်ႈ သၢႆတႃၶဝ်ၵူမ်ႈတူၺ်းၸမ် ၼႃႈသွင်ႁႃးႁၢင်ႇၵၼ်ဢဝ်မွၵ်ႈသွင်ၸွမ်းၼႆႉၵူၺ်း တူဝ်ၶႃႈၼိမ်ၸိုင်ႈၸိုင်ႈ ပေႃးဢမ်ႇႁတ်းတူင်ႉတူဝ်သေဢိတ်းလႄႈ ၶဝ်ၼၼ်ႉၵူၺ်း ပဵၼ်ၵေႃႉဢၼ်သုတ်ႉၶဝ်ႈမႃးၸမ်ၶႃႈသေယဝ်ႉလၢတ်ႈဝႃႈ
“ၵျိူၵ်ႈပီႈၼႆဢမ်ႇၸႂ်ႈႁႃႉ..” သဵင်ႁႅပ်ႇႁႅပ်ႇၼႂ်းၵူင်ၶေႃး ဢၼ်မႃးလၢတ်ႈယူႇႁိမ်းႁူၼၼ်ႉ ၶႃႈပေႃးဢမ်ႇႁူႉတေလႆႈႁဵတ်းၸိူင်ႉႁိုဝ်ယဝ်ႉဝႃႈ။ မိုဝ်းၶဝ်သွင်ၶွၼ်ၼၼ်ႉယိုၼ်းၶဝ်ႈမႃး ယိပ်းၶႅၼ်ၶႃႈတင်းသွင်ၽၢႆႇသေ ယၵ်ႉတူၺ်းၼႃႈၶႃႈၸမ်ၸမ်လႄႈ ၶႃႈၵေႃႈလႆႈယၵ်ႉတူၺ်းၼႃႈၶဝ်လီလီ ပဵၼ်ပွၵ်ႈဢွၼ်တၢင်းသုတ်း ဢၼ်သၢႆတႃႁႃးသွင် လႆႈတူၺ်းပွင်ႇႁၼ်ၵၼ်၊ သဵင်ဢေးၼူၼ်းၼၼ်ႉၵေႃႈ မေႃးမႃးထႅင်ႈ
“ပီႈၼုမ်ႇ…မႃးလႄႈ.. တေၵႂႃႇယဝ်ႉ!”
မၼ်းၵေႃႈယုမ်ႉၸူးၶႃႈသေယဝ်ႉ လၢတ်ႈၸူးၶိုၼ်း “ၸွင်ႇၵွႆႈထူပ်းၵၼ်ထႅင်ႈၼႃႈ” လၢတ်ႈၵႂၢမ်းၶေႃႈၼႆႉၸူးၶႃႈသေယဝ်ႉ ၽၢတ်ႇတူဝ်ႁၢင်ႇယၢၼ်ၶႃႈဢွၵ်ႇၵႂႃႇၶိုၼ်ႈၵႃးၶဝ်ယူႇ။
ဢေးၼူၼ်းၵေႃႈ ယူႇၼႂ်းလူတ်ႉၼၼ်ႉသေ ႁွင်ႉသူင်ႇသင်ႇလၢတ်ႈၶႃႈ
“ၸွင်ႇၵွႆႈထူပ်းၵၼ်ထႅင်ႈ” ပူၵ်းမိုဝ်းပၢႆးပၢႆၼႄၶႃႈလွႆးလွႆး ၵႃးၶဝ်ၼၼ်ႉၵေႃႈ ဢွၵ်ႇယၢၼ်ၶႃႈၵႂႃႇလွႆးလွႆး ၼင်ႇဝႃႈ ၶဝ်တေဢမ်ႇၶိုၼ်းပွၵ်ႈမႃးသေပွၵ်ႈၼၼ်ႉယဝ်ႉ။
ဝၢႆးသေၶဝ်ပွၵ်ႈမိူဝ်းၵႂႃႇၸိူင်ႉၼၼ် ၼင်ႇႁၢင်ႈၼႂ်းၸႂ်ၼႂ်းၶေႃးၵေႃႈ ပေႉၵႅၼ်ႇမႃးငႅဝ်လႄႈ ၸႂ်ၵေႃႈဢမ်ႇပေႃးလီသေၵႃႈႁိုဝ်၊ ၵူၺ်းၵႃႈ မိူဝ်ႈဝူၼ်ႉႁၼ်လွင်ႈႁဵတ်းသၢင်ႈၶဝ်ၼၼ်ႉ ႁဵတ်းႁႂ်ႈၶႃႈသမ်ႉပေႃးယုမ်ႉယူႇႁင်းၵူၺ်း၊ ဝူၼ်ႉယူႇႁင်းၵူၺ်း၊ ယွင်ႇယူႇႁင်းၵူၺ်းဝႃႈ ၶဝ်ၼၼ်ႉၵေႃႈ တေမီးၸႂ်တေႃႇၶႃႈမိူၼ်ၵၼ်။ ၼင်ႇဢၼ်လွင်ႈႁဵတ်းသၢင်ႈၶဝ်၊ တၢင်းယုမ်ႉၶဝ်၊ သၢႆတႃၶဝ် ပေႃးၶဝ်ဢမ်ႇမီးၸႂ်ၶဝ်တေႁဵတ်းၸိူင်ႉၼၼ်ၵွပ်ႈသင် ၶဝ်ထုၵ်ႇလီထဵင်ၶိုၼ်းယဝ်ႉဢမ်ႇၸႂ်ႈႁိုဝ် ၶေႃႈၵႂၢမ်းသူင်ႇသင်ႇၶဝ် ႁဵတ်းႁႂ်ႈၶႃႈမီးတၢင်းမုင်ႈမွင်းမႃးထႅင်ႈ ယူႇယဝ်ႉ။
ယၢမ်းၵၢင်ၼႂ်ၸဝ်ႉမိူင်းပၢင်ႇလႅင်းမႃး ၼင်ႇႁၢင်ႈမိူင်းလူင်ၼႆႉပေႉမႃးမိုတ်းမူဝ်းမွင် ၸႂ်ၶႃႈဢၼ်မိူၼ်တေသိူဝ်းၼၼ်ႉၵေႃႈ ႁၼ်ၼႃႈၾႃႉၼႃႈမိူင်းပဵၼ်ၼၼ်ယဝ်ႉ သမ်ႉၵႂႃႇမွင်ၸွမ်းၼႃႈမိူင်းႁေယဝ်ႉႁိုဝ်ဢမ်ႇႁူႉ၊ မွင်ၵွပ်ႈၶဝ်ၽၢတ်ႇယၢၼ်ၵႂႃႇ ဢမ်ႇလႆႈႁၼ်ၼႃႈၶဝ်ၼၼ်ႉႁိုဝ်ၵေႃႈတေၸႂ်ႈယူႇ။
“ဢၢႆႈလႅင်..ၵဝ်ၵဝ်..ၵဝ်.. မီးလွင်ႈတေလၢတ်ႈမႂ်းဢိူဝ်ႈ!” ပီႈသၢမ်ႁဝ်းလၢတ်ႈၸူး ၼင်ႇဢမ်ႇပေႃးၶႂ်ႈလၢတ်ႈသေၵႃႈႁိုဝ် တင်းသီၼႃႈသဝ်ႈမွင်လူင်ဝႆႉယူႇယဝ်ႉ။
“လွင်ႈဢမ်ႇလီၸွင်ႇၸႂ်ႈ!!”
“ဢိုမ်ႈ!..ဢေးၼူၼ်းၶဝ် ၶဝ်တင်းႁိူၼ်းၼၼ်ႉ ၺႃးၵႃးၽႃႇသေ လူႉသဵင်ႈၵႂႃႇယဝ်ႉ”
ဢဝ်ၶႃႈသမ်ႉပေႃးလပ်းသိင်ႇမိင်းမဝ်းလူင်ၵႂႃႇမူတ်းယဝ်ႉ၊ ၶႃႈဢမ်ႇႁူႉဝႃႈ ၶႃႈတၼ်းလိုမ်းတူဝ်ၵႂႃႇမိူဝ်ႈလႂ် ၵူၺ်းၵႃႈ ၽိူဝ်ႇႁူႉတူဝ်မႃးၵေႃႈ ၶႃႈသမ်ႉပေႃးမီးယူႇၼႂ်းႁွင်ႈၼွၼ်းယဝ်ႉလႄႈ မီးဢေးၼူၼ်းမႃးယူႇႁိမ်းၶၢင်ႈၶႃႈသေ မႃးၶႆႈၼႄၶႃႈ ၽွင်းမၼ်းမိူဝ်းလႄႇၼၢႆးၶဝ်းၼၼ်ႉသေ မၼ်းၼင်ႈဢုပ်ႇပၼ်ႁိုင်ဝႃႈႁိုင်ယဝ်ႉ ၵမ်ႉၶႆႈလွင်ႈၼိုင်ႈ ၵမ်ႉၶႆႈထႅင်ႈလွင်ႈၼိုင်ႈ ၶႃႈထွမ်ႇမၼ်း သမ်ႉပေႃးၶႂ်ႈၶၢၼ်ႉထွမ်ႇယဝ်ႉ။ ယၢမ်းၼၼ်ႉ ၶႃႈၵေႃႈလႆႈႁၼ်ပီႈၼုမ်ႇၶဝ်ႈမႃး ၼႂ်းႁွင်ႈၶႃႈသေယဝ်ႉ လၢတ်ႈၸူးၶႃႈ
“လႅင်!! လုၵ်ႉလႄႈဢူႈ လုၵ်ႉမႃးၵိၼ်ၶဝ်ႈႁေဢိၼ်ႉလႄႈ မႂ်းဢမ်ႇၵိၼ်ၶဝ်ႈၵိၼ်ၼမ်ႉမႃး လၢႆဝၼ်းယဝ်ႉၼႆႉ”
ၶႃႈၸင်ႇႁူႉဝႃႈ ၼၼ်ႉမၼ်းပဵၼ်ဢူႈႁဝ်း၊ လွင်ႈဢၼ်ၶႃႈႁၼ်ၼၼ်ႉ မၼ်းပဵၼ်လွင်ႈၼွၼ်းၾၼ်ၵူၺ်း၊ ၵွပ်ႈလွင်ႈၼွၼ်းၾၼ်ၼၼ်ႉ မၼ်းႁဵတ်းႁႂ်ႈၶႃႈလႆႈႁၼ် ဢေးၼူၼ်းၶဝ်လႄႈ ၶႃႈဢမ်ႇၶႂ်ႈတိုၼ်ႇ ဢမ်ႇၶႂ်ႈလုၵ်ႉၵႂႃႇတၢင်းလႂ် ၶႂ်ႈၼွၼ်းသေၾၼ်ႁၼ်ၶဝ်ၵႂႃႇယၢဝ်းယၢဝ်းၼၼ်ႉယဝ်ႉ။
မိူဝ်ႈလႂ်ၶႃႈႁူႉဝႃႈ ၶဝ်ဢမ်ႇမီးဝၼ်းပွၵ်ႈမႃးယဝ်ႉၼႆ မၼ်းႁဵတ်းႁႂ်ႈၶႃႈၶိုၼ်းၶုၵ်းၸႂ်လႆႈ ၶေႃႈၵႂၢမ်းဢၼ်ၶဝ်သူင်ႇသင်ႇၶႃႈဝႃႈ “ၸွင်ႇၵွႆႈထူပ်းၵၼ်ထႅင်ႈ” ၼႆၼၼ်ႉ၊ မၼ်းပဵၼ်ၶေႃႈၵႂၢမ်းဢၼ်ၶႃႈဢမ်ႇတွၼ်ႉလိုမ်းလႄႈ မိူၼ်ဝႃႈၶဝ်တေၶိုၼ်းပွၵ်ႈမႃးယူႇ ၼၼ်ႉယဝ်ႉ။ သမ်ႉဝႃႈၶၢဝ်းယၢမ်းမၼ်းတေပူၼ်ႉမႃး ႁႃႈပီႊယဝ်ႉသေတႃႉ ဝၼ်းဢၼ်ၶဝ်ၽၢတ်ႇယၢၼ်ၵႂႃႇၼၼ်ႉ ယင်းတိုၵ်ႉမိူၼ်မိူဝ်ႈဝႃးယူႇၵူၺ်း ၶေႃႈၵႂၢမ်းသူင်ႇသင်ႇလၢတ်ႈၶဝ်၊ သဵင်ႁွင်ႉသင်ႇဢေးၼူၼ်း မိုဝ်းဢၼ်ပူၵ်းၼႄဝႃႈပၢႆးပၢႆၼၼ်ႉ တိုၵ်ႉႁၼ်ၸႅင်ႈလႅင်းလီယူႇၼႂ်းတႃၼႆႉ။
ၵူၼ်းၵူႈၵေႃႉ ဢၼ်ၶဝ်ႈမႃးၼႂ်းၸၢတ်ႈပၢၼ်ၼၼ်ႉ မၼ်းတေမွတ်ႇႁၢႆၵႂႃႇဢမ်ႇလႆႈ၊ ယိုင်ႈပဵၼ်ၵူၼ်းဢၼ်မႃးယူႇၼႂ်းလွင်ႈမၢႆတွင်း မႃးတူင်ႉၼိုင်ယူႇၼႂ်းႁူဝ်ၸႂ်ၼၼ်ႉ မၼ်းယိုင်ႈၶႅၼ်းလိုမ်းဢမ်ႇလႆႈ၊ သမ်ႉဝႃႈၶႃႈတေၸႂ်လမ်တေပွင်ႉဝႃႈ ၶဝ်ၼၼ်ႉၸႂ်ႁၢႆႉၼႃႇ လၢတ်ႈယဝ်ႉဢမ်ႇႁဵတ်းၸွမ်းၵႂၢမ်း၊ တင်းပွင်ႉတင်းႁႆႈသေၵေႃႈယႃႇ ၶႃႈဢမ်ႇႁဵတ်းသင်လႆႈသေလွင်ႈ ယိုင်ႈၶႅၼ်းႁဵတ်းႁႂ်ႈၶႃႈၸဵပ်းမႃးထႅင်ႈၵူၺ်း။
ၶႃႈဢမ်ႇယူႇလႆႈလူၺ်ႈဢမ်ႇမီးၶဝ် မၼ်းႁဵတ်းႁႂ်ႈၶႃႈဢမ်ႇႁဵတ်းသင်လႆႈ၊ ၶႃႈၸင်ႇလႆႈသၢင်ႈလွင်ႈၽၢမ်းတႃမႃး ယွၵ်ႇလႅၼ်တူဝ်ၵဝ်ႇမႃးဝႃႈ ၶဝ်ၼၼ်ႉတိုၵ်ႉမီးယူႇ၊ မီးယူႇသေတီႈတီႈ လႄႈတေပွၵ်ႈမႃးၶိုၼ်းယူႇ၊ မၼ်းႁဵတ်းႁႂ်ႈၶႃႈမီးတၢင်းမုင်ႈမွင်းလႄႈ ႁဵတ်းႁႂ်ႈလွင်ႈပဵၼ်တေႉၼၼ်ႉ ႁၢႆလၢႆၵႂႃႇပႅတ်ႈယူႇ။ သမ်ႉဝႃႈႁဵတ်းၸိူင်ႉၼႆၵေႃႈ မၼ်းဢမ်ႇႁဵတ်းႁႂ်ႈၶႃႈၵတ်းယဵၼ်ၸႂ်လႆႈ လႄႈ ယိုင်ႈႁူႉလွင်ႈတေႉမၼ်းပဵၼ်ၸိူင်ႉႁိုဝ်ၼႆ မၼ်းယိုင်ႈၶႅၼ်းၸဵပ်းၵႅၼ်းမႃးထႅင်ႈၵူၺ်း။
မိူဝ်ႈၶၢဝ်းယၢမ်းႁိုင်မႃး လွင်ႈဢၼ်ၶဝ်ႈမႃးၼႂ်းၸၢတ်ႈပၢၼ်၊ ၵူၼ်းၵေႃႉဢၼ်ၶႃႈႁူပ်ႉၼၼ်ႉ မၼ်းၵေႃႈလႆႈၽၢတ်ႇယၢၼ်ၶႃႈၵႂႃႇ ၵမ်းဢိတ်းၵမ်းဢိတ်း ၵမ်ႈၽွင်ႈၵေႃႈၽၢတ်ႇၵႂႃႇယဝ်ႉဢမ်ႇၶိုၼ်းပွၵ်ႈ၊ ၵမ်ႈၽွင်ႈၵေႃႈတၢႆၽၢတ်ႇၵႂႃႇ ဢမ်ႇၸၢင်ႈၶိုၼ်းမႃး၊ မၼ်းသွၼ်ႁႂ်ႈၶႃႈ ပွင်ႇၸႂ်လွင်ႈၽၢတ်ႇယၢၼ်မႃးယဝ်ႉ၊ ဢမ်ႇဝႃႈတေၽၢတ်ႇလိပ်းႁိုဝ်ၽၢတ်ႇတၢႆ မိူဝ်ႈဝႃႈၵူၼ်းႁဝ်းလႆႈႁူပ်ႉၵၼ်ၼၼ်ႉ ႁူႉၵႃႈတိုၼ်းတေလႆႈၽၢတ်ႇယၢၼ်ၵၼ်ၵႂႃႇလႄႈ လွင်ႈဢၼ်ၶဝ်လႆႈၽၢတ်ႇယၢၼ်ၵႂႃႇၼၼ်ႉၵေႃႈ မၼ်းပဵၼ်သၽႃႇဝမၼ်းၵူၺ်း ၶႃႈၵေႃႈယွမ်းႁပ်ႉလွင်ႈၼႆႉၵႂႃႇလႆႈမႃးၵမ်းဢိတ်းၵမ်းဢိတ်းယူႇ။
သမ်ႉဝႃႈၶဝ်တေၽၢတ်ႇၵႂႃႇသေတႃႉ ၸၢတ်ႈပၢၼ်ၶႃႈဢၼ်ဝႃႈလႆႈႁူပ်ႉထူပ်းၶဝ်လႄႈ လႆႈၸႂ်ႉၸၢတ်ႈပၢၼ်ႁူမ်ႈၵၼ်၊ လႆႈမီးမၢႆတွင်းလီလီႁူမ်ႈၵၼ်ၸိူဝ်းၼၼ်ႉ မိူဝ်ႈၶႃႈယင်းပႆႇတၢႆၽၢတ်ႇသေ မၼ်းၵေႃႈယင်းတိုၵ်ႉၵိုတ်းဝႆႉယူႇလႄႈ ၶႃႈတေဢမ်ႇမီးဝၼ်းလိုမ်းလႆႈ၊ မိူဝ်ႈၶုၵ်းၸႂ်လႆႈၵေႃႈ ဝူၼ်ႉထိုင်မၼ်းသေ မိူဝ်ႈဝူၼ်ႉထိုင်ၶဝ်ဢိမ်ႇယဝ်ႉၵေႃႈ သိုပ်ႇယူႇၵႂႃႇၸွမ်းၸၢတ်ႈပၢၼ်ဢၼ်ၶႃႈပဵၼ်ယူႇၼႆႉလႄႈ ႁဵတ်းၵႂႃႇၸွမ်းၼႂ်းၶၢဝ်းယၢမ်းဢၼ်ၶႃႈမီးဝႆႉယူႇယၢမ်းလဵဝ်ၼႆႉယဝ်ႉ။
ဢမ်ႇဝႃႈမိူဝ်ႈလႂ် မိူဝ်ႈၶႃႈတေၽၢတ်ႇယၢၼ်ၽႂ်ၵေႃႈယဝ်ႉ ၶေႃႈၵႂၢမ်းဢၼ်ဝႃႈ “ၸွင်ႇၵွႆႈထူပ်းၵၼ်ထႅင်ႈ” ၼၼ်ႉ ၶႃႈတေငိူင်ႉဝႄႈယႃႇႁႂ်ႈလႆႈလၢတ်ႈဢွၵ်ႇမႃးယဝ်ႉ၊ ယွၼ်ႉဝၼ်းမိူဝ်းၼႃႈၼၼ်ႉ ႁဝ်းဢမ်ႇႁူႉဝႃႈတေပဵၼ်သင်မႃးလႄႈ တေလႆႈထူပ်းၵၼ်ထႅင်ႈတေႉယူႇႁိုဝ် မၼ်းတေပဵၼ်ၵႂၢမ်းသူင်ႇသင်ႇဢၼ် မီးတၢင်းမုင်ႈမွင်းဝႆႉယူႇၼၼ်ႉယဝ်ႉ။
မိူဝ်ႈၽၢတ်ႇယၢၼ်ၵႂႃႇၵေႃႈ ယၢၼ်ၵႂႃႇၵူၺ်းယဝ်ႉလႃႈ ထူပ်းၵၼ်ထႅင်ႈမိူဝ်ႈလႂ်ၵေႃႈ ၸင်ႇၵွႆႈၶိုၼ်းဝႃႈၵၼ်မိူဝ်ႈၼၼ်ႉယဝ်ႉ “မွၼ်းမွၼ်း”။
သုတ်းယဝ်ႉ။
ၸိူင်းႁူဝ်ၼႆႉၵေႃႈ ပဵၼ်ၸိူင်းဢၼ်ဝူၼ်ႉၶႆႈမႃးဢဝ်ၵူၺ်း ပိူင်ပဵၼ်ငဝ်းလၢႆး ဢမ်ႇၸႂ်ႈလွင်ႈတေႉ၊ ႁႂ်ႈလူပဵၼ်တၢင်းမူၼ်ႈၸႂ် ယႃႇႁႂ်ႈလႆႈပဵၼ်တၢင်းၶမ်ၸႂ်ၸွမ်းၸိူင်း ၼင်ႇၵဝ်ႇၶႃႈ၊ လူၸိူင်းၼႆႉသုတ်းႁေ ဢဝ်ဢမ်ႇႁတ်းသူင်ႇသင်ႇပိူၼ်ႈဝႃႈ “ၸွင်ႇၵွႆႈထူပ်းၵၼ်ထႅင်ႈ” ၼႆတႄႉၵေႃႈ တေဢမ်ႇမီးၽႂ်ပဵၼ်ၼႆၼင်ၵဝ်ႇၶႃႈလႂ်၊ ယူႇတီႈၽူႈတႅမ်ႈလိၵ်ႈသေ သင်မီးတီႈၽိတ်းတီႈပိူင်ႈ တီႈႁိူင်ႈတီႈၵိူင်းၼႆၵေႃႈ ယွမ်းၼွမ်းယႂ်ႇၼမ်ယူႇဢေႃႈ။
ပၢႆၵမ်−သႅၼ်ငဝ်း
30/08/2023-01/09/2023
