ၵူၼ်းႁၢမ်းႁူဝ်ၸႂ်

ၸၢတ်ႈပၢၼ်ဢွၼ်ႇဢေးမူၺ်….

ဢေးမူၺ် ပဵၼ်ၽူႈယိင်းဢၼ်ႁၵ်ႉလွင်ႈလွတ်ႈလႅဝ်းၼႃႇလႄႈ ဢမ်ႇသူၼ်ၸႂ်ဝႃႈ ၼႂ်းၸၢတ်ႈပၢၼ်မၼ်းၼၼ်ႉ တေမီးၽႂ်ယူႇၸွမ်းႁိုဝ်၊ သမ်ႉဝႃႈတေယူႇႁင်းၵူၺ်းၵေႃႉလဵဝ် ၵႂႃႇတေႃႈၸူဝ်ႈၵေႃႈတေႃႈဢမ်ႇပဵၼ်သင်။ ၸၢတ်ႈပၢၼ်ဢွၼ်ႇမၼ်းၼၼ်ႉ ႁိုဝ်တွၼ်ႉႁွင်ႉႁႃ ၶေႃႈၵႂၢမ်းဝႃႈ ၵေႃႉႁၵ်ႉဢူၺ်၊ ၽႂ်ၵေႃႈတေႃႈႁိုဝ်လႆႈႁၼ်ၸူႉမၼ်းႁေပွၵ်ႈ။

ဢူၺ်းၵေႃႉမၼ်းတႄႉၵေႃႈ မီးၸူႉတၼ်းပဵၼ်လၢႆၵေႃႉယဝ်ႉ၊ မၢင်ၵေႃႉၵေႃႈ သမ်ႉပေႃးတေႇၼႃႈႁိူၼ်းသေ မီးလုၵ်ႈၵၼ်ယဝ်ႉၼႃႇ ၵူၺ်းၵႃႈ မၼ်းတႄႉ ယင်းတိုၵ်ႉယူႇတူဝ်လွတ်ႈလႅဝ်းဝႆႉယူႇ၊ ယႃႇဝႃႈတေမီးၵေႃႉႁၵ်ႉလႃႈ ဢူၺ်းၵေႃႉဢၼ်ယၢမ်ႈယူႇၸွမ်းၵၼ်ၼၼ်ႉၵေႃႈ သမ်ႉပေႃးၽၢတ်ႇပေႃးၽေၵၼ် ၵႂႃႇတၢင်းလႂ်တၢင်းလီပႅတ်ႈမၼ်းမူတ်းယဝ်ႉဢမ်ႇႁူႉ၊ မၼ်းၼၼ်ႉၵေႃႈ ယင်းတိုၵ်ႉၸုၵ်းမၼ်ႈယူႇၵေႃႉလဵဝ်မႃးတႃႇသေႇ။

ယူႇၵေႃႉလဵဝ်ၼႆၵေႃႈ ၼင်ႇႁၢင်ႈဢၢပ်ႈၵျေႃႇယူႇႁင်းမၼ်းဝႆႉၼင်ႇၵဝ်ႇ ၶိင်ႇၶၢဝ်းႁဵတ်းၵၢၼ်ၵေႃႈႁဵတ်းႁေ၊ လူဝ်ႇၵိၼ်လူဝ်ႇလႄႇၼႆၵေႃႈ ႁဵတ်းယူႇႁင်းမၼ်း ၼင်ႇႁၢင်ႈၵတ်းၸိုၼ်ႈယဵၼ်ၸႂ်ဝႆႉယူႇ။

ဢေးမူၺ်ၼႆႉ မိူဝ်ႈယူႇၸွမ်းဢူၺ်းၵေႃႉမၼ်းၼၼ်ႉ တေၵႆႉလႆႈႁၼ် ၸၢတ်ႈပၢၼ်တၢင်းႁၵ်ႉၶဝ်ၼၼ်ႉၼႃႇ ဢမ်ႇဝႃႈတေပဵၼ်မိူဝ်ႈၶဝ်ႁၵ်ႉၵၼ် ႁဵတ်းလီပၼ်ၵၼ် ႁၼ်ၼင်ႇၼၼ်ၵေႃႈႁမ်ႉတႃႉလီၶွႆယူႇ၊ ၵူၺ်းၵႃႈ မၼ်းၵေႃႈ လႆႈႁၼ်မိူဝ်ႈၶဝ်ၽိတ်းၵၼ်မႃးသေယဝ်ႉ ပေႃးတၢၼ်ႇဝႃႈမိူင်းၵူၼ်းလူင်ၼႆႉ တေႁူမ်ႈလူၵ်ႈၵၼ်ဢမ်ႇလႆႈလႄႈ ပေႃးတၢၼ်ႇဝႃႈ ဢၼ်ၶဝ်ယၢမ်ႈႁၵ်ႉၵၼ်မႃးၼၼ်ႉ ဢၢပ်ႈတေဢမ်ႇမီးၼႂ်းမၢႆတွင်းႁင်သေဢိတ်းယဝ်ႉ၊ မိူဝ်ႈဢူၵ်းႁၵ်းၼႆ ယိုင်ႈၶႅၼ်းၼႃႇ ႁႄႈဝႃႈၽႄတၢင်းၵၼ်ဝႃႇ မိူဝ်ႈယူႇတေႃႇၼႃႈၵၼ်ၼၼ်ႉတႄႉဝႃႈ ဢမ်ႇႁၵ်ႉယဝ်ႉ ဢမ်ႇဢဝ်ယဝ်ႉၼႆ ယူႇပႃႈလင်သမ်ႉမႃးဝႃႈၸႂ်ထိုင်ၶဝ်ၼႃႇ လၢတ်ႈၶိူဝ်းမၼ်းဢမ်ႇယဝ်ႉဢမ်ႇဝၢႆး၊ တိူဝ်ႉၸႂ်ၵွပ်ႈမၼ်း ဢူၵ်းပေႃးၶႂ်ႈတႅၵ်ႇတၢႆ၊ ႁွင်ႉႁႆႈယွၼ်ႉမၼ်း သင်ၼမ်ႉတႃၼၼ်ႉမေႃသဵင်ႈၵေႃႈဢၢပ်ႈတေသဵင်ႈယဝ်ႉၵဝ်ႇ၊ မၢင်ၵေႃႉႁမ်ႉၵိၼ်လဝ်ႈမဝ်းၵႅပ်ႇ ႁၢင်ႈၽၢင်ပေႃးဢမ်ႇလီလူလီတူၺ်း ၶႂ်ႈၼႃႇလိူဝ်မႃၵေႃႈမီးၼႃႇ၊ တၢၼ်ႇဝႃႈတၢင်းႁၵ်ႉတင်းလူင်ၼႆႉ ၼင်ႇဝႃႈမီးၵူၼ်းၵေႃႉၼၼ်ႉၵေႃႉလဵဝ်ၵူၺ်းယဝ်ႉ။ မၢင်ၵေႃႉၵေႃႈ ၼင်ႇဝႃႈ ၶၢဝ်းတၢင်းၼႃႈၼၼ်ႉ ဢၢပ်ႈတေပဵၼ်လႆႈၼႃႈႁိူၼ်းႁူမ်ႈလဵဝ်ၵၼ်ၼႃႇ ၸႂ်ႉၶၢဝ်းယၢမ်းႁူမ်ႈၵၼ်မႃး ပဵၼ်လၢႆပီႊ မိူဝ်ႈထိုင်ၶိင်ႇထိုင်ၶၢဝ်းၽွမ်ႉမႃးယဝ်ႉသမ်ႉ ၽႄတၢင်းၵၼ်ႁေၵေႃႈမီး။

မိူဝ်ႈတႄႇၵဝ်းၵၼ်တႄႉၵူႈလွင်ႈၼၼ်ႉလီမူတ်း၊ ပဵၼ်ၵေႃႉႁၵ်ႉၵၼ်မႃးဢမ်ႇႁိုင် ထိုင်ၵမ်းၸင်းယဝ်ႉတႄႉ ၵူႈလွင်ႈၼၼ်ႉယွၼ်ႉမႂ်းပဵၼ်ၼၼ်ပဵၼ်ၼႆ၊ ယူႇၸွမ်းၵၼ်ဢမ်ႇလႆႈ ၽႄတၢင်းၵၼ်ၵႂႃႇ၊ ႁႃၵေႃႉမႂ်ႇထႅင်ႈ ၸၢတ်ႈပၢၼ်တၢင်းႁၵ်ႉၶဝ်ၵေႃႈ ပၼ်ႇပုတ်ႈၵၼ်ၵႂႃႇၵႂႃႇမႃးမႃး၊ မၢင်ၵေႃႉၵေႃႈ ပဵၼ်ႁေႃပဵၼ်ႁိူၼ်းလီလီငၢမ်းငၢမ်းၵႂႃႇယူႇ၊ မၢင်ၵေႃႉၵေႃႈဢမ်ႇမႅၼ်ႈၵၼ် ယူႇၸွမ်းၵၼ်ဢမ်ႇလႆႈႁေ ပဵၼ်ႁၢင်ႉၵေႃႈမီးမႃး၊ မၢင်ၵေႃႉၵေႃႈ မီးလုၵ်ႈမီးလၢင်းမႃး တႃႇလုၵ်ႈတႃႇလၢင်း ပေႃးတေလႆႈၵိၼ်လီၼုင်ႈလိူင်ႇ ပိူင်ႇလူၺ်ႈတူဝ်ၸႂ်ဢၼ်သိူဝ်းမူၼ်ႈၼၼ်ႉၵေႃႈ တေလႆႈဝူၼ်ႉၵူႈပႃႈၵူႈၽၢႆႇ လဵၵ်ႉတေႃႇပေႉတူဝ် တေလႆႈလုမ်းလႃးပၼ် ၸဵမ်ၵၢၼ်ယူႇၵၢၼ်သဝ်း လွင်ႈပၺ်ႇၺႃႇတၢင်းမေႃၵေႃႈ တေလႆႈဝူၼ်ႉပႃး၊ လဵင်ႉယႂ်ႇႁႂ်ႈပေႉတူဝ်လႆႈ ၶဝ်ၵေႃႈပေႃးမိၼ်ၽၢတ်ႇပၢႆႈၵႂႃႇယဝ်ႉၼႃႇ။

မိူဝ်ႈဢၼ်မၼ်းလႆႈႁၼ် ၽဝၸၢတ်ႈပၢၼ်ဢူၺ်းၵေႃႉမၼ်းမႃး ပၢၼ်ယဝ်ႉပၢၼ်၊ ဢၼ်လႆႈမႃးပွင်ႉမႃးၶၢင်းၼႄမၼ်းၼၼ်ႉၵေႃႈ ႁၢင်ႈပေႉလႅပ်ႈလီၸၢၼ်ႈၼႃႇၼႆသေ၊ မႃးဝၢႆႇတူၺ်းၶိုၼ်းၸၢတ်ႈပၢၼ်မၼ်းၼၼ်ႉ ပဵၼ်ဢၼ်သိူဝ်းၸႂ်ယူႇလႄႈ ၸင်ႇဝႄႈတၢင်းၵေႃႉဢၢၼ်းၶဝ်ႈႁႃမႃးတႃႇသေႇ၊ မၢင်ပွၵ်ႈပိူၼ်ႈပေႃးလႄႇဝႃႈသၢဝ်ၵေႇၵေႃႈ ၶွင်တေႃႈၸႂ်ႈတႄႉလႄႈ ႁၢင်ႈဢမ်ႇမေႃၽိတ်းၸႂ်၊ ပၢၼ်လႂ်ၵေႃႈ ႁၼ်မၼ်းယူႇႁင်းၵူၺ်းမႃးသေႇသေႇ ဢႃႇယုၵေႃႈဢမ်ႇဢေႇယဝ်ႉ ဢူႈမႄႈၵေႃႈမွင်းႁၼ်ၼႃႈလၢၼ် တဵၵ်းၸႂ်ႉဢဝ်ၵေႃႈ တေႃႈဝႃႈပႆႇၶႂ်ႈလႆႈ၊ ဢူႈမႄႈသမ်ႉပေႃးလႆႈႁႃပၼ် ႁၼ်ၵေႃႉလႂ်ၵေႃႉလႂ်ၵေႃႈ ၼင်ႇႁၢင်ႈဢမ်ႇၵျိူၵ်ႈၸႂ်လႃးလႃး  ဢႃႇယုယႂ်ႇၵေႃႈဝႃႈထဝ်ႈၼႃႇယဝ်ႉ၊ ဢႃႇယုလဵၵ်ႉသမ်ႉဝႃႈၵေႃႉလဵၵ်ႉၼႃႇ၊ ဢႃႇယုတၢၼ်ႇၵၼ်သမ်ႉဝႃႈ ႁူဝ်မႃႇပဵင်းၵၼ် ယူႇၸွမ်းၵၼ်ဢမ်ႇလႆႈ ဢမ်ႇၶႂ်ႈလႆႈလႄႈၸင်ႇဝႃႈၵူၺ်းၵႃႈ ၸိူင်ႉၼၼ် ပေႃးဝႃႈႁၵ်ႉၼႆတႄႉဢမ်ႇလိူၵ်ႈသႅၼ်းလိူၵ်ႈပၢၼ်သႄႈ။

ယူႇၵေႃႉလဵဝ်မႃးလၢႆပၢၼ်ၵေႃႈ မၼ်းၵေႃႈယင်းတိုၵ်ႉလွတ်ႈလႅဝ်းယူႇၼႃႇ ၶႂ်ႈၵႂႃႇလႂ်ၵႂႃႇ၊ ၶႂ်ႈႁဵတ်းသင်ႁဵတ်း ဢမ်ႇမီးၵေႃႉၶႅၼ်ႁႄႉၸွမ်းဝႃႈ ပိုင်ႈဢိင်တူဝ်ၸဝ်ႈၵဝ်ႇၼၼ်ႉလီလိူဝ်ပိူၼ်ႈလႄႈ ႁဵတ်းၵႂႃႇႁဵတ်းမႃး သမ်ႉပေႃးတၼ်းပဵၼ်မႄႈပႃႈမူၺ်ယဝ်ႉယိုင်၊ ထိုင်ၶိင်ႇၶၢဝ်းၼၼ်ႉၵေႃႈ ၽႂ်ၵေႃႈဢၢပ်ႈဢမ်ႇၶႂ်ႈလႆႈယဝ်ႉၼႆလႄႈ မၼ်းၵေႃႈႁူႉတူဝ်ယူႇ ၸင်ႇဢမ်ႇမီးၸႂ်ၶႂ်ႈႁႃၵေႃႉႁႃၵူႈသင်ယဝ်ႉ၊ ယူႇၵေႃႉလဵဝ်ႁိုင်တၢၼ်ႇႁိုဝ်ၵေႃႈ ပိူၼ်ႈသမ်ႉပေႃးႁွင်ႉဝႃႈမႄႈထဝ်ႈမူၺ်ယဝ်ႉၼႃႇ၊ ႁၼ်မၼ်းယူႇၵေႃႉလဵဝ်ၸိူင်ႉၼႆ ၽႂ်ၽႂ်ၵေႃႈလႄႇဝႃႈမၼ်းၼၼ်ႉ ပဵၼ်ၵူၼ်းႁၢမ်းႁူဝ်ၸႂ် ဢမ်ႇမေႃႁၵ်ႉၽႂ်ၼႆဝႃႇ။

ယူႇၵေႃႉလဵဝ်မႃးႁိုင်တၢၼ်ႇႁိုဝ်ၵေႃႈ လႆႈမိူဝ်းၶဝ်ႈပၢင်ၶႅၵ်ႇလုၵ်ႈဢူၺ်းၵေႃႉယဝ်ႉဢမ်ႇၵႃး သမ်ႉမႃးၶဝ်ႈ ပၢင်ၶႅၵ်ႇလၢၼ်ဢူၺ်းၵေႃႉထႅင်ႈ ၵူၼ်းယူႇၵေႃႉလဵဝ်ၼႆႉဢႃႇယုၶႂ်ႈယၢဝ်းဝႆႉ၊ ယွၼ်ႉဢမ်ႇလႆႈသုၵ်ႉသၵ်ႉၸႂ်ၸွမ်းလုၵ်ႈၸွမ်းလၢၼ်၊ ၸွမ်းၵၢၼ်ၼႃႈႁိူၼ်းတႃယေးသင်လူး။

တီႈပၢင်ၶႅၵ်ႇၼၼ်ႉ လၢၼ်ဢူၺ်းၵေႃႉမၼ်း ဢၼ်လႆႈမႃးၶဝ်ႈႁူမ်ႈၼၼ်ႉၵေႃႈ လႆႈထၢမ်ထိုင်ၼႂ်းၵၢင်ၸႂ်မႄႈထဝ်ႈမူၺ် လွင်ႈဢၼ်လႆႈယူႇႁင်းၵူၺ်းမႃးတႃႇသေႇၼၼ်ႉလႄႈ မႄႈထဝ်ႈမူၺ်ၵေႃႈ တွပ်ႇၼႄလၢၼ်မၼ်းၵႂႃႇ

“ၵွပ်ႈလၵ်ႉႁၵ်ႉၵူၼ်းၵေႃႉၼိုင်ႈႁေ ဢမ်ႇႁတ်းလၢတ်ႈလႄႈ ၸင်ႇလႆႈပဵၼ်ၼႆယဝ်ႉလၢၼ်ၶဝ်ဝႃႈ ”

တွၼ်ႈတႃႇမႄႈထဝ်ႈမူၺ်တႄႉ ယွၼ်ႉႁူဝ်ၸႂ်တၢင်းႁၵ်ႉဢၼ်ဢမ်ႇႁတ်းလၢတ်ႈၼၼ်ႉသေ လႆႈပဵၼ်ၵူၼ်းႁၢမ်းႁူဝ်ၸႂ်ၼႂ်းသၢႆတႃပိူၼ်ႈၵႂႃႇယဝ်ႉ။

ၼႆႉတႄႉပဵၼ်ၸိူင်းၵူၺ်းလႄႈ ၽူႈတႅမ်ႈလိၵ်ႈၵေႃႈယုမ်ႇယူႇဝႃႈ တေဢမ်ႇမီးၽႂ်မႃးမိူၼ်မႄႈထဝ်ႈမူၺ်ၼႆႉၼင်ႇၵဝ်ႇလႂ်၊ ပေႃးမီးၵေႃႈ ဢၢပ်ႈတေဢမ်ႇၶႂ်ႈယူႇမိူၼ်ၼင်ႇမႄႈထဝ်ႈမူၺ်ၼင်ႇၵဝ်ႇၶႃႈၼေႃႈ။

ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈယူႇၶႃႈဢေႃႈ။

ပၢႆၵမ်−သႅၼ်ငဝ်း

29/07/2023