တွၼ်ႈသီႇသိပ်းႁူၵ်း
ယၢမ်းႁူဝ်ၶမ်ႈမိူင်းၸမ်လပ်းသိင်ႇၼၼ်ႉ သႅင်ၶမ်းၵေႃႈ လႆႈၵႂႃႇတၢင်းလၢၼ်ႉပီႈႁွမ်လႅင်း ဢၼ်ၶၢႆတၢင်းၵိၼ်ၵူႈၸိူဝ်းၸိူဝ်း ၼၼ်ႉယဝ်ႉ။ သမ်ႉဝႃႈပူၼ်ႉၵႂႃႇလၢႆပီႊယဝ်ႉသေတႃႉ ပီႈႁွမ်လႅင်းမေးၶူးပိူင်းၾႃႉၼၼ်ႉၵေႃႈ ယင်းတိုၵ်ႉပိုတ်ႇလၢၼ်ႉၶၢႆၶူဝ်းၶၢႆၶွင်ယူႇတႃႇသေႇ ယိုင်ႈပီႊမၼ်းႁိုင်မႃးၵေႃႈ ၼင်ႇႁၢင်ႈလၢၼ်ႉၶဝ်ၼၼ်ႉ ယႂ်ႇၵႂၢင်ႈမႃးလႄႈၶႂၢၵ်ႈၼမ်မႃးတိၵ်းတိၵ်း၊ ၶၢႆၸေးမႃးတိၵ်းတိၵ်းယူႇယဝ်ႉ။ ဢၼ်သႅင်ၶမ်းၵႂႃႇၼၼ်ႉတႄႉၵေႃႈ ၵႂႃႇသိုဝ်ႉလဝ်ႈလႄႈၽၵ်းၵပ်းလဝ်ႈမၼ်းၼၼ်ႉၵူၺ်း သိုဝ်ႉယဝ်ႉၵေႃႈ ဢွၵ်ႇလၢၼ်ႉမႃးၵမ်းလဵဝ်ယူႇ။
ဢမ်ႇႁူႉဝႃႈၶူးၽိဝ်ၾႃႉၼၼ်ႉ လုၵ်ႉတၢင်းလႂ်မႃး လမ်းမႃးၸွမ်းပႃႈလင်မၼ်းသေ
“ဢေးၼွင်ႉ!.. ပႂ်ႉၵမ်ႉလႄႈ” သဵင်ၼၼ်ႉပဵၼ်သဵင်ဢၼ်ယၢမ်ႈငိၼ်းမႃး မိူဝ်ႈပူၼ်ႉမႃးႁိုင်ၼႃႇယဝ်ႉလႄႈ ပဵၼ်သဵင်ဢၼ်ၸပ်းႁူမၼ်းမႃးတႃႇသေႇ ထိုင်တီႈယၢမ်ႈၵႂႃႇယဝ်ႉ၊ ဢမ်ႇၸႂ်ႈသဵင်ဢၼ်တေႉၼႆသေ မၼ်းၵေႃႈဢမ်ႇလႆႈသူၼ်ၸႂ်သင်ယဝ်ႉ ပႆလူင်ၵႂႃႇတိၵ်းတိၵ်းၵူၺ်း။ မိူဝ်ႈၼၼ်ႉ မီးမိုဝ်းၶွၼ်ၼိုင်ႈ မႃးတွႆႇႁူဝ်မႃႇမၼ်းသေယဝ်ႉ မၼ်းၸင်ႇလႆႈ ၶုၼ်ႇၵိုတ်းဝိၼ်ႇဝၢႆႇတူၺ်းၵႂႃႇလႄႈ လၢတ်ႈၵႂႃႇလူၺ်ႈၸႂ်ၼိမ်ဝႃႈ
“ဢေႃႈ … ပဵၼ်ၶူးႁွင်ႉၶႃႈႁႃႉ ၶႃႈထၢင်ႇဝႃႈပဵၼ်သဵင်ပိူၼ်ႈတၢင်းလႂ်ႁွင်ႉၵၼ်ဢေႃႈ”
“ၸဵမ်မိူဝ်ႈႁွတ်ႈမႃးၵေႃႈ ဢမ်ႇလႆႈဢုပ်ႇၵုမ်ၵၼ်လီလီႁေပွၵ်ႈၼေႃ”
“ၼၼ်ႉယဝ်ႉၶႃႈ..ၶူးယူႇလီယူႇၶႃႈၼေႃႈ”
“ဢိုမ်ႈ!! ယူႇလီယူႇ..” ၶူးၽိဝ်ၾႃႉၼၼ်ႉၵေႃႈ ယဵၼ်ၵႂႃႇၵႅပ်ႉၼိုင်ႈသေယဝ်ႉ “ဢမ်ႇလႆႈထူပ်းၵၼ်ၼႆႉ ႁိုင်ၵႃႈႁိုဝ်ယဝ်ႉလႃႇၼႆႉႁဝ်း”
“ၸမ်ၸမ်သိပ်းပီႊယဝ်ႉၶႃႈယူဝ်ႉ.. ပီႊမႂ်ႇတႆးၵေႃႈ လႆႈသိပ်းပီႊယဝ်ႉ”
“ဢိူဝ်ႈၼေႃႈ..ႁိုင်ၼႃႇယဝ်ႉလူးၼႆ…”
သႅင်ၶမ်းၼၼ်ႉၵေႃႈ မိူဝ်ႈလႆႈဢုပ်ႇတင်းၶူးၽိဝ်ၾႃႉၸိူင်ႉၼၼ် မိူၼ်မီးၶေႃႈၵႂၢမ်းတင်းၼမ်ၶႂ်ႈလၢတ်ႈၼႄၶဝ်ယူႇ၊ ၵူၺ်းၵႃႈ ၶၢဝ်းယၢမ်းဢၼ်လႅၵ်ႈလၢႆႈၵႂႃႇ ၵူႈလွင်ႈဢၼ်ဢမ်ႇမိူၼ်ၵဝ်ႇယဝ်ႉၼၼ်ႉ၊ မၼ်းၵေႃႈယဵၼ်သေ ယုမ်ႉၸူးၵႂႃႇႁဵတ်းၼၼ်ႉၵူၺ်း။
“ယၢမ်းလဵဝ်ႁဵတ်းၵၢၼ်သင်ဝႆႉလႃႇ” ၶူးၽိဝ်ၾႃႉထၢမ်။
“ပေႃးထၢမ်ၸိူင်ႉၼႆၵေႃႈ ၶႃႈၵေႃႈမီးလွင်ႈၶႂ်ႈလၢတ်ႈၶူးမိူၼ်ၵၼ်ယဝ်ႉ ၶႃႈဢမ်ႇလႆႈႁဵတ်းပဵၼ်ၽူႈတႅပ်းတတ်းတြႃးယဝ်ႉ… ၶႃႈဝႃႈ ၶႃႈဢမ်ႇၵိုင်ႇတၢၼ်ႇတင်းၵၢၼ်ၼၼ်ႉလႄႈ လႆႈလၢႆႈၵၢၼ်မႃးပဵၼ်ၽူႈတၢင်ၼႃႈ မိူၼ်ဝႃႈၵၢၼ်ၼႆႉၵေႃႈ ၵိုင်ႇလႅပ်ႈၵၼ်တင်းၶႃႈယူႇ”
“လီယဝ်ႉဝႃႈ လႆႈႁဵတ်းၵၢၼ်ဢၼ်ႁဝ်းႁူႉဝႃႈ..မၼ်းၵိုင်ႇၵၼ်တင်းႁဝ်းၵေႃႈ ပဵင်းပေႃးယဝ်ႉ”
“ၶူးၶႃႈလူး ယၢမ်းလဵဝ်ႁဵတ်းၵၢၼ်သင်ဝႆႉၶႃႈလႃႇ”
“ႁဵတ်းမေႃသွၼ်ၵဵဝ်ႇလူၺ်ႈလွင်ႈမၢႆမီႈၼႆႉယဝ်ႈ.. မၢင်ပွၵ်ႈၵေႃႈ လူင်းပိုၼ်ႉတီႈ ပၼ်တၢင်းႁူႉၵဵဝ်ႇလူၺ်ႈလွင်ႈမၢႆမီႈၸိူဝ်းၼႆႉၽွင်ႈ၊ မီးၵူၼ်းတင်းၼမ်ယဝ်ႉ ဢၼ်ဢမ်ႇႁူႉပၵ်းပိူင်မၢႆမီႈသင် ထုၵ်ႇပိူၼ်ႈတဵၵ်းတဵင်ပူၼ်ႉပႅၼ် ဢဝ်ပေႉပုၼ်ႈယူႇၵေႃႈ ဢမ်ႇႁတ်းႁဵတ်းသင်ၸိူဝ်းၼႆႉ ဝူၼ်ႉဝႃႈသူၵေႃႈတေလႆႈထူပ်းယူႇၵူၺ်း”
“ထူပ်းတင်းၼမ်ၼၼ်ႉၶႃႈယဝ်ႉ..”
သွင်ၶႃၵေႃႈဢုပ်ႇၶိူဝ်းၵၢၼ်ၶိူဝ်းငၢၼ်းၶဝ် တေႃႇပေႃးမိူဝ်းႁွတ်ႈႁိူၼ်းၽႂ်ႁိူၼ်းမၼ်းသေ ၶဝ်ႈႁိူၼ်းၵႂႃႇႁင်းၽႂ်ႁင်းမၼ်းယူႇ။ သႅင်ၶမ်းဢၼ်မိူဝ်းႁွတ်ႈႁိူၼ်းၼၼ်ႉၵေႃႈ လႆႈႁၼ်ၼူၼ်းမူဝ်မီးယူႇတီႈၸၢၼ်းၼၼ်ႉသေ ႁၢင်ႈႁႅၼ်းၵွၵ်းလဝ်ႈလႄႈ ၽၵ်းၵပ်းပႂ်ႉထႃႈမၼ်းယူႇၼၼ်ႉယဝ်ႉ။
“တၼ်းမႃးမိူဝ်ႈလႂ်လႃႇ!..သႅင်ၶိူဝ်းပၼ်သူမႃးႁေႁႃႉ”
“ဢိုမ်ႈ..ပၼ်မႃးယူႇၵူၺ်းလေႃႇ”
ၼူၼ်းမူဝ်ဢၼ်လႆႈႁၼ်သႅင်ၶမ်း ပႆမႃးၸွမ်းၶူးၽိဝ်ၾႃႉၼၼ်ႉၵေႃႈ ၸင်ႇထၢမ်ၸူးသႅင်ၶမ်းၵႂႃႇ
“ဢုပ်ႇသင်ၵၼ်တင်းၶူးလႃႇ…လႅပ်ႈဢုပ်ႇမူၼ်ႈတေႉယဝ်ႈ”
“လွင်ႈၵၢၼ်လွင်ႈငၢၼ်းၵူၺ်း..ႁဵတ်းၵၢၼ်မဵဝ်းလဵဝ်ၵၼ်ၵေႃႈ ဢုပ်ႇၶဝ်ႈၵၼ်ဢိတ်ႉၼိုင်ႈ”
“ယူဝ်ဝႃႈဢုပ်ႇလွင်ႈႁူဝ်ၸႂ်သူၼႆၼႃး.. ဢမ်ႇလႆႈဢုပ်ႇတူၺ်းႁေဢိတ်းႁႃႉ”
“ႁဝ်းဝႃႈ..ဢမ်ႇၸမ်ပဵၼ်တေလႆႈဢုပ်ႇလွင်ႈၼႆႉၸူးၶဝ်ယဝ်ႉၼႃ မၼ်းပူၼ်ႉၵႂႃႇႁိုင်ၼႃႇယဝ်ႉလႄႈ ၵူႈလွင်ႈၵေႃႈ လႅၵ်ႈလၢႆႈၵႂႃႇမူတ်းယဝ်ႉ၊ ပႃးတင်းႁူဝ်ၸႂ်ႁဝ်းလႄႈတင်းသဵင်ႁူဝ်ၸႂ်ႁဝ်း.. မိူဝ်ႈႁဝ်းလႆႈဢုပ်ႇတင်းၶဝ်ယူႇၼၼ်ႉ လွင်ႈဢၼ်ႁဝ်းၶႂ်ႈလၢတ်ႈမႃးမိူဝ်ႈလၢႆသိပ်းပီႊၼၼ်ႉၵေႃႈ ႁဵတ်းႁႂ်ႈႁဝ်းဝူၼ်ႉလႆႈဝႃႈ ဢမ်ႇမီးၽွၼ်းလီသင်ယဝ်ႉယၢမ်းၼႆႉ”
“ပဵၼ်သင်လႃႇ သင်ဢမ်ႇသင်လၢတ်ႈပၼ်ႁႂ်ႈၶဝ်ႁူႉၼၼ်ႉ ယင်းလီဢမ်ႇၸႂ်ႈႁႃႉ”
“ႁူႉၵႂႃႇၵေႃႈမၼ်းႁဵတ်းသင်ဢမ်ႇလႆႈလႄႈ မၼ်းၵေႃႈတေဢမ်ႇမီးသင်လီမႃး ပႃးတင်းၶူးလႄႈတင်းႁဝ်း၊ ႁဝ်းဝူၼ်ႉဝႃႈ ႁႂ်ႈမၼ်းပဵၼ်မၢႆတွင်းဢၼ်လီလီ ၼႂ်းၸၢတ်ႈပၢၼ်ႁဝ်းဝႆႉၵူၺ်းၵေႃႈပေႃးယဝ်ႉ၊ လွင်ႈၼႂ်းဝၼ်းၼၼ်ႉ၊ ၶၢဝ်းယၢမ်းၼၼ်ႉ ႁႂ်ႈမၼ်းပဵၼ်မိူဝ်ႈၼၼ်ႉၵူၺ်းလႄႈ ႁဝ်းၵေႃႈတေလႆႈယူႇၵႂႃႇၼႂ်းဝၼ်းၼႆႉ ႁႂ်ႈၵတ်းယဵၼ်ၸႂ်၊ ယူႇၸွမ်းလွင်ႈဢၼ်ပဵၼ်ယူႇမိူဝ်ႈလဵဝ်ၼႆႉ ႁႂ်ႈလီလိူဝ်ပိူၼ်ႈၼၼ်ႉယဝ်ႉ”
“ၵေႃႈၼၼ်ႉယဝ်ႉ.. တွၼ်ႈတႃႇသူမၼ်းပဵၼ်ၵႂႃႇသိပ်းပီႊယဝ်ႉလူးၼေႃႈ.. ႁဝ်းသမ်ႉၸင်ႇႁႃႁူႉၵူၺ်းလႄႈ ဝူၼ်ႉဝႃႈမၼ်းတေပဵၼ်လွင်ႈမႂ်ႇမႂ်ႇ တွၼ်ႈတႃႇသူယူႇၼၼ်ႉၼႃႇ..ပေႃးဢမ်ႇၸႂ်ႈယွၼ်ႉၶဝ်၊ ပေႃးဢမ်ႇၸႂ်ႈယွၼ်ႉၽႂ် ပဵၼ်သင်လႄႈ သူသမ်ႉဢမ်ႇတွၼ်ႉပိုတ်ႇၸႂ်ပၼ်ၽႂ်သေပွၵ်ႈလႃႇ.. တေႃႈၼင်ႇၵေႃႉႁၵ်ႉၵေႃႉၼိုင်ႈၵူၺ်းၵေႃႈ ယင်းဢမ်ႇယၢမ်ႈမီး ပေႉၸႂ်ၸွမ်ၶိူဝ်း ဢၼ်ၵဝ်းယူႇသေႇသေႇၼၼ်ႉၵေႃႈ တမ်ႉဢမ်ႇလႆႈ”
“ပဵၼ်ယွၼ်ႉႁဝ်းဢမ်ႇယၢမ်ႈဝူၼ်ႉထိုင်မၼ်းၵူၺ်း… ၵူႈဝၼ်းၵူႈဝၼ်း ႁဝ်းၵုမ်ႇသုၵ်ႉလွင်ႈၵၢၼ်၊ ၶၢဝ်းယၢမ်းတႃႇသုၼ်ႇတူဝ်ၵူၺ်းပေႃးဢမ်ႇၶႂ်ႈမီးယဝ်ႉ ႁဝ်းဝူၼ်ႉဝႃႈ ပေႃးဝႃႈႁဝ်းမီး..ႁဝ်းၵေႃႈတေဢမ်ႇမီးၶၢဝ်းယၢမ်းပၼ်ၶဝ်လႄႈ လိုၼ်းသုတ်းမႃးၵေႃႈ ၶဝ်ၵေႃႈတေဢွၵ်ႇၵႂႃႇပႅတ်ႈၵူၺ်း၊ တႅၼ်းတီႈတေၶဝ်ႈမႃးယဝ်ႉဢွၵ်ႇၵႂႃႇပႅတ်ႈ ႁဝ်းၵေႃႈ လႆႈၵႅတ်ႇၼႃႈဝႆႉထႃႈဢွၼ်တၢင်းၼၼ်ႉယိုင်ၼႃႇ”
“သူတေယူႇႁဵတ်းၼႆၵႂႃႇတေႃႇထဝ်ႈတေႃႇတၢႆႁႃႉ”
“ၶႂ်ႈႁႂ်ႈႁဝ်းႁဵတ်းၸိူင်ႉၼႆၵေႃႈလႆႈယူႇၵူၺ်း.. ႁဝ်းဝူၼ်ႉဝႃႈယူႇၵေႃႉလဵဝ်ၼႆႉ မၼ်းဢမ်ႇငဝ်တၢၼ်ႇ၊ မိူဝ်ႈမီးၵူၼ်းႁဵတ်းႁႂ်ႈၸႂ်ထိုင်ၼၼ်ႉလႃႈ”
ၼူၼ်းမူဝ်ၼၼ်ႉၵေႃႈ ယၵ်ႉတူၺ်းမၼ်းသေယုမ်ႉၸူး
“ၶႂ်ႈဝႃႈ..မီးၵူၼ်းႁဵတ်းႁႂ်ႈသူၸႂ်ထိုင်ဝႆႉယူႇႁႃႉ”
“မီးဢိူဝ်ႈ!! သူၼၼ်ႉၼႃႇ ၶဝ်ႈမႃးၼႂ်းၸၢတ်ႈပၢၼ်ႁဝ်းယဝ်ႉ.. ၽၢတ်ႇယၢၼ်ႁဝ်းၵႂႃႇတေႇၼႃႈႁိူၼ်းပႅတ်ႈႁေ မၢင်ပွၵ်ႈၵေႃႈၸႂ်ထိုင်ယူႇၵူၺ်းဢိူဝ်ႈ၊ ၶႂ်ႈဢုပ်ႇၶႂ်ႈလၢတ်ႈႁႂ်ႈမိူၼ်မိူဝ်ႈဢွၼ်တၢင်းၵေႃႈ ၵူဝ်သုၵ်ႉယုင်ႈၶၢဝ်းယၢမ်းသူၼၼ်ႉယိုင်”
“ယႃႇမႃးႁႃလၢႆႈၵႂၢမ်းယူႇ.. တူၺ်းသီၼႃႈသူၵေႃႈ ၼႄဢွၵ်ႇလႆႈယဝ်ႉ.. ပေႃးဝႃႈသူထူပ်းၵူၼ်းၵေႃႉဢၼ်သူၸႂ်ထိုင်ၼႆ ၸၢမ်းပိုတ်ႇၸႂ်ပၼ်ၶဝ်တူၺ်းသေဢိတ်ႉၼိုင်ႈလႄႈ ႁဝ်းဝႃႈတႃႇတေမီးၵေႃႉႁၵ်ႉႁိုဝ်၊ မီးၵူၼ်းသေၵေႃႉၵေႃႉဢၼ်ယူႇႁိမ်းၶၢင်ႈႁဝ်း ၸွႆႈထႅမ်မိူဝ်ႈႁဝ်းယၢပ်ႇ၊ ပၼ်ႁႅင်းမိူဝ်ႈႁဝ်းတုၵ်ႉ၊ ၸူမ်းသိူဝ်းမိူဝ်ႈႁဝ်းၵတ်းယဵၼ်ၼၼ်ႉ မၼ်းပဵၼ်လွင်ႈလီဢိူဝ်ႈ.. မိူဝ်ႈၸႂ်သူၶႂ်ႈႁႂ်ႈမၼ်းပဵၼ်ၼၼ်ႉ ယႃႇၵူဝ်ဝႃႈတၢင်းၼႃႈပဵၼ်ၸိူင်ႉႁိုဝ်မႃး ပွႆႇႁႂ်ႈပၢႆးဝူၼ်ႉသူ ႁူဝ်ၸႂ်သူ ၵႂႃႇၸွမ်းမၼ်းၽွင်ႈလႄႈ သင်သူထိူင်းၼႃႇ ၵူဝ်ဝႃႈမၼ်းတေတူၵ်းလိုၼ်းၵႂႃႇပႅတ်ႈ မိူၼ်ၼင်ႇသူလႄႈတင်းၶူးၼၼ်ႉၼႃႇ တွၼ်ႈသွၼ်မၼ်းၵေႃႈပေႃးလႆႈမႃးယဝ်ႉလူး..”
သႅင်ၶမ်း သမ်ႉပေႃးဢမ်ႇၸၢင်ႈတွပ်ႇသင်ၶိုၼ်းလႆႈသေဢိတ်း ၼၼ်ႉယဝ်ႉ။ ၼင်ႈၼိမ်ယဵၼ်သေ ဢိုၵ်ႉလဝ်ႈသႂ်ႇသူပ်းၵႂႃႇၵူၺ်းယူႇ။
သႅင်ၶမ်းၵေႃႈလႆႈပႅတ်ႈၵၢၼ်ပႅတ်ႈငၢၼ်းမႃးႁိုင်ၼႃႇယဝ်ႉလႄႈ ယၢမ်းၵၢင်ၼႂ် ႁႅၼ်းၶူဝ်းႁႅၼ်းလဵင်းမၼ်းသေယဝ်ႉ ဢၢၼ်းပွၵ်ႈၶိုၼ်းၵႂႃႇလႄႈ လႆႈသူင်ႇသင်ႇၵူၼ်းတီႈႁိူၼ်းၵၼ်သေယဝ်ႉ ၶဝ်ႈမိူဝ်းၼႂ်းႁိူၼ်းၶူးပိူင်းၾႃႉၼၼ်ႉသေ သင်ႇလၢတ်ႈၵႂႃႇ၊ ႁူမ်ႈပႃးၶူးၽိဝ်ၾႃႉ ဢၼ်မီးယူႇၼႂ်းႁိူၼ်းၼၼ်ႉလႄႈ လႆႈဢွၵ်ႇမႃးသူင်ႇမၼ်းထိုင်ၽၵ်းတူဝၢင်းယဝ်ႉ။
“ၸွင်ႇၵွႆႈထူပ်းၵၼ်ထႅင်ႈပေႃးၼၼ်.. မီးတီႈၵပ်းသိုပ်ႇၵၼ်ယဝ်ႉလူး မီးၸိူင်ႉႁိုဝ်ပဵၼ်ၸိူင်ႉႁိုဝ်ၵေႃႈ ဢုပ်ႇၵၼ်လႆႈယူႇၼႃႈ.. ပေႃးဝႃႈမီးတၢင်းလူဝ်ႇၸွႆႈထႅမ်ၼႆၵေႃႈ လၢတ်ႈလႆႈယူႇ”
“ပေႃးၵပ်းသိုပ်ႇၵႂႃႇယဝ်ႉ ၶူးသမ်ႉတေဢမ်ႇတၼ်းႁေၶႃႈယူဝ်ႉ”
“တၼ်းယူႇၵူၺ်း.. ဢၢၼ်းဝႃႈမႃးပွၵ်ႈၼႆႉ တေမႃးတူၺ်းတီႈယူႇတီႈသဝ်းႁေ မႃးယူႇတၢင်းၼႆႉယဝ်ႉ”
“လီၶႃႈဢေႃႈ ၶႃႈၵေႃႈဝႃႈ ပေႃးၸတ်းၵၢၼ်ငၢၼ်းတီႈပုၼ်ႉယဝ်ႉယဝ်ႉၵေႃႈ ပီႊၼႃႈၼႆႉ ဢၢၼ်းမႃးႁဵတ်းၵၢၼ်တၢင်းၼႆႉၼႆဢေႃႈ၊ ဝၢၼ်ႈၵိူတ်ႇမိူင်းၼွၼ်းႁဝ်း ပေႃးၵူၼ်းၼုမ်ႇၸိူင်ႉၼင်ႇႁဝ်း ဢမ်ႇၶိုၼ်းမႃးပူၵ်းပွင်ၶိုၼ်းၵေႃႈ မၼ်းၵေႃႈတေဢမ်ႇၸၢင်ႈၶိုၼ်ႈယႂ်ႇလႆႈၼၼ်ႉၶႃႈၼႃႇ”
“ဝူၼ်ႉလႆႈၸိူင်ႉၼႆၵေႃႈလီယဝ်ႉ..ၶၢဝ်းတၢင်းသိပ်းပီႊ ပေႃးမႃးတူၺ်းၶိုၼ်း မၼ်းၵေႃႈဢမ်ႇပေႃးမီးလွင်ႈလႅၵ်ႈလၢႆႈသင်တေႉတေႉ၊ မီးၵူၼ်းၵူၺ်းယဝ်ႉထဝ်ႈမႃးတိၵ်းတိၵ်း ၵူၼ်းၼုမ်ႇၵူၼ်းၵမ် ဢၼ်ယူႇသၢင်ႈၵိၼ်သဝ်းၵေႃႈ ဢေႇလူင်းႁႅင်းၼႃႇယဝ်ႈ”
“ၼၼ်ႉယဝ်ႉၶႃႈ.. ၵမ်ႈၽွင်ႈၵေႃႈ တေဝႃႈ ယွၼ်ႉဝၢၼ်ႈမိူင်းဢမ်ႇၶိုၼ်ႈယႂ်ႇလႄႈဢမ်ႇၶႂ်ႈယူႇ၊ ၵူၺ်းၵႃႈ ပေႃးႁဝ်းဢမ်ႇယူႇပူၵ်းပွင်ႁႂ်ႈၶိုၼ်ႈယႂ်ႇသမ်ႉ တေၶိုၼ်ႈယႂ်ႇလႆႈၸိူင်ႉႁိုဝ်”
ယၢမ်းၼၼ်ႉၵႃးၼူၼ်းမူဝ် ဢၼ်ဢၢၼ်းမိူဝ်းသူင်ႇသႅင်ၶမ်းၼၼ်ႉၵေႃႈ ႁွတ်ႈမႃးၵိုတ်းႁပ်ႉမၼ်းယူႇတီႈၼႃႈႁိူၼ်းၼၼ်ႉယဝ်ႉ၊ ၶူးၽိဝ်ၾႃႉၵေႃႈ ၸွႆႈတေႃႉၶူဝ်းၶိုၼ်ႈလူတ်ႉပၼ်ၵႂႃႇသေ သႅင်ၶမ်းၵေႃႈ ဝၢႆႇႁူၼ်ပွၵ်ႈၶိုၼ်းၵႂႃႇလွႆးလွႆး။
သႅင်ၶမ်းၼၼ်ႉၵေႃႈ လႆႈၶိုၼ်းၵႂႃႇႁဵတ်းၵၢၼ်မိူၼ်ၵဝ်ႇယူႇ ၵူၺ်းၵႃႈ ၸႂ်မၼ်းတႄႉဢမ်ႇမိူၼ်ၵဝ်ႇလႆႈယဝ်ႉ၊ ၵူႈပွၵ်ႈ ပဵၼ်ၵူၼ်းဢမ်ႇပေႃးလႆႈၸႂ်တူၺ်းၽူင်းၵႃႈႁိုဝ်လႄႈ ယၢမ်းၼႆႉတႄႉ ပေႃးဝႃႈတၼ်းတၼ်းၼႆ တေၵႆႉၵႆႉတူၺ်းၽူင်းတိၵ်းတိၵ်း၊ မိူၼ်မွင်းၽႂ်သေၵေႃႉၼိုင်ႈဝႆႉယူႇ ၼၼ်ႉယဝ်ႉ။
မိူဝ်ႈႁွတ်ႈထိုင်ၼႃႈဝၢင်းႁူဝ်ႉ ဢၼ်ယၢမ်ႈမီးၵူၼ်းမႃးပႂ်ႉယူႇၼၼ်ႉၵေႃႈ လွမ်မွင်းႁႂ်ႈမီးမႃးထႅင်ႈယူႇ၊ မိူဝ်ႈၼင်ႈၵိၼ်ၶဝ်ႈယူႇၼၼ်ႉၵေႃႈ ၼင်ႇႁၢင်ႈၽၵ်းဢၼ်ၵိၼ်ယူႇၼၼ်ႉ ဢမ်ႇဝၢၼ်တၢၼ်ႇၶဝ်ႈတူမ်ႈ ဢၼ်ၶဝ်ႁုင်မႃးလဵင်ႉၼၼ်ႉလႃႈ၊ မိူဝ်ႈယိပ်းၽူင်းယူႇ ဢမ်ႇငိၼ်းသဵင်ၶေႃႈၵႂၢမ်းၶဝ်ႈမႃးၼၼ်ႉ ပေႉမႃးၵႅၼ်ႇလီမိူဝ်ႇ၊ သဵင်ၶေႃႈၵႂၢမ်းဢၼ်ၶဝ်ႈမႃး၊ သၢႆၾူင်းဢၼ်မေႃးလင် ၼႂ်းၸႂ်ၼၼ်ႉ မုင်ႈမွင်းႁႂ်ႈပဵၼ်ၶဝ်ယူႇတႃႇသေႇယဝ်ႉ။ သမ်ႉဝႃႈၸႂ်ထိုင်ၼႃႇသေတႃႉ ၶႂ်ႈလၢတ်ႈတေႃႇယူႇၵေႃႈ ၼင်ႇႁၢင်ႈဢမ်ႇယုမ်ႇၸႂ်လႆႈဝႃႈ ၶဝ်ၼၼ်ႉ ၸွင်ႇယင်းတိုၵ်ႉပႂ်ႉဝႆႉယူႇႁိုဝ် ၶဝ်တေတတ်းၸႂ်သေ ၵႂႃႇႁႃၵူၼ်းလီလီယဝ်ႉၵေႃႈပဵၼ်လႆႈၼႆလႄႈ ဝႆႉၸႂ်ၸိူင်ႉၼႆသေ ဢမ်ႇပဵၼ်လၢတ်ႈတေႃႇၵႂႃႇ။
ၽိူဝ်ၶမ်းၵေႃႈတေႃႈၼင်ႇၼၼ် ဝၼ်းယဝ်ႉဝၼ်း လွမ်မုင်ႈတူၺ်းၽူင်း၊ လူတူၺ်းၶေႃႈၵႂၢမ်းဢၼ်ၶဝ်လႆႈလၢတ်ႈဢုပ်ႇၵၼ်ၼၼ်ႉ ပဵၼ်လၢႆႁွပ်ႈၵေႃႈ ဢမ်ႇႁၼ်မီးၶေႃႈၵႂၢမ်းသင်သူင်ႇမႃး၊ ပေႃးတေလၢတ်ႈၵႂႃႇသမ်ႉ ၵူဝ်ၶဝ်တေၸၢၼ်ႈၸင်းသေ ပိၵ်ႉဢိုတ်းလွင်ႈပဵၼ်ဢူၺ်းၵေႃႉၵၼ်ၵႂႃႇထႅင်ႈ၊ မၼ်းၵေႃႈ ႁိုဝ်တေႁတ်းတွပ်ႇလၢတ်ႈသင်ၸူးၶိုၼ်းသေဢိတ်းယဝ်ႉ။
ယွၼ်ႉလွင်ႈၵူဝ်၊ လွင်ႈဢမ်ႇႁတ်းၼၼ်ႉသေ ဢဝ်ဝၼ်းၼိုင်ႈယဝ်ႉဝၼ်းၼိုင်ႈ သုတ်းသဵင်ႈၵႂႃႇပႅတ်ႈတိၵ်းတိၵ်း။ ၵူၺ်းၵႃႈ မိူၼ်ဝႃႈၼႂ်းႁူဝ်ၸႂ်ၼၼ်ႉ ႁႄႉသီးလွင်ႈၸႂ်ထိုင်ဢမ်ႇလႆႈလႄႈ တၢမ်းၶမ်ႈမိူင်းၸမ်လပ်းသိင်ႇ သႅင်ၶမ်းဢၼ်ပွၵ်ႈမိူဝ်းႁိူၼ်းမၼ်းၼၼ်ႉ လႆႈလတ်းၽၢၼ်ႇသဵၼ်ႈတၢင်း တီႈၽိူဝ်ၶမ်းႁဵတ်းၵၢၼ်ၼၼ်ႉယူႇ။ ၵူၺ်းၵႃႈ တီႈၼၼ်ႈၵေႃႈလႆႈပိၵ်ႉဢိုတ်းဝႆႉလႄႈ ဢမ်ႇၸၢင်ႈႁဵတ်းႁိုဝ် မၼ်းၵေႃႈၵႃႈလႆႈသိုပ်ႇမိူဝ်းၵႂႃႇတၢင်းႁိူၼ်းမၼ်းၼၼ်ႉၵူၺ်း။ မိူဝ်ႈႁွတ်ႈၵႂႃႇတီႈၼႃႈႁိူၼ်းၼၼ်ႉ လႆႈႁၼ်ၵႃးၽိူဝ်ၶမ်းၵိုတ်းၸွတ်ႇဝႆႉယူႇသေ သမ်ႉပေႃးဢဝ်မၼ်းယုမ်ႉဢွၵ်ႇမႃးယူႇယဝ်ႉ။
မိူၼ်မီးၶေႃႈၵႂၢမ်း ဢၼ်ၶႂ်ႈထၢမ် ဢၼ်ၶႂ်ႈလၢတ်ႈၼႄၵၼ် တင်းၼမ်သေတႃႉ မိူဝ်ႈတၢင်းယုမ်ႉဢွၼ်ႇသွင်ၶႃ ယုမ်ႉၸူးၵၼ်ယူႇၼၼ်ႉ ၼင်ႇႁၢင်ႈၵႂၢမ်းၵူႈၶေႃႈဢၼ်မီးယူႇၼႂ်းၸႂ်ၼႆႉ လႆႈလၢတ်ႈမွၵ်ႇဢွၵ်ႇမႃးၼႄမူတ်း ယဝ်ႉ။
သႅင်ၶမ်းဢၼ်ႁၼ် ၽိူဝ်ၶမ်းယုမ်ႉသေ ၸုၵ်းဝႆႉယူႇပႃႈၼႃႈမၼ်းၼၼ်ႉၵေႃႈ တင်းပႆတင်းဝူၼ်ႉလူင်ၵႂႃႇ
“ဢမ်ႇဝႃႈမိူဝ်ႈၽုၵ်ႈၼၼ်ႉတေပဵၼ်သင်မႃး ၵူၺ်းၵႃႈ ဝၼ်းမိူဝ်ႈၼႆႉ ဢၼ်ပဵၼ်ယူႇၼၼ်ႉ ႁဵတ်းႁႂ်ႈလီလိူဝ်ပိူၼ်ႈသုတ်းလႄႈ၊ ၶၢဝ်းယၢမ်းဢၼ်ပူၼ်ႉမႃးၼၼ်ႉၵေႃႈ ဢမ်ႇၸၢင်ႈဢဝ်ၶိုၼ်းလႆႈယဝ်ႉ လိူဝ်သေတေပဵၼ်ၵႂႃႇလွင်ႈမၢႆတွင်းၵူၺ်း၊ လွင်ႈပူၼ်ႉမႃးၼၼ်ႉ မၼ်းၵႄႈၶႆၵႂႃႇဢမ်ႇလႆႈၵေႃႈ မိူဝ်ႈလဵဝ်ဢၼ်ပဵၼ်ယူႇၼၼ်ႉ ၸၢင်ႈၵႄႈၶႆလႆႈယူႇလူး လွင်ႈမိူဝ်းၼႃႈၵေႃႈဝႆႉပဵၼ်မိူဝ်းၼႃႈၵူၺ်းလႃႈ”
ယဵပ်ႈယၢင်ႈတမ်းတိၼ်သုတ်ႉၶဝ်ႈၸမ်ၵႂႃႇ ႁိမ်းၽိူဝ်ၶမ်းၼၼ်ႉလွႆးလွႆးယဝ်ႉ။
“ၸိုင်လၢတ်ႈဝႃႈလႆႈၸႂ်ႁဝ်းၼႆ.. ၶတ်းၸႂ်ၶဝ်ႈႁႃထႅင်ႈဢိတ်ႉၼိုင်ႈၵေႃႈဢမ်ႇလႆႈႁႃႉ ပႆႇလႆႈၶေႃႈတွပ်ႇသင်ယဝ်ႉ ႁၢႆၵႂႃႇပႅတ်ႈၸိူင်ႉၼႆ ဢမ်ႇႁဵတ်းလႆႈတီႈၵၼ်ၼႃႇၼႄႇ၊ ႁဝ်းဢမ်ႇၵိုင်ႇထိူၵ်ႈ တႃႇႁႂ်ႈသူတေမႃးၶတ်းၸႂ်ယွၼ်ႉမၼ်းလႆႈႁႃႉတေႃႈ… ၸွင်ႇယၢမ်ႈၸႂ်ထိုင်ၵၼ်ယူႇႁိုဝ်”
ၽိူဝ်ၶမ်းၵေႃႈ မိုင်ယဵၼ်ထွမ်ႇသေ ဢဝ်တွမ်ႇၼမ်ႉတႃပေႃးၸိုမ်ႉမႃး ပႃးတင်းတၢင်းယုမ်ႉယဝ်ႉ၊ သုတ်ႉၶဝ်ႈႁႃသႅင်ၶမ်းမိူၼ်ၵၼ်လႄႈ
“ဢိုမ်ႈ!! ၸႂ်ထိုင်ဢိူဝ်ႈ ၸႂ်ထိုင်တေႉယဝ်ႉ.. ၸႂ်ထိုင်သူမွၵ်ႈႁိုဝ်ၼႆ မၼ်းဢဝ်ပေႉလႆႈတၢင်းၵူဝ်ႁဝ်း ထိုင်တီႈမႃးမီးယူႇတီႈၼႆႈၼႆႉယဝ်ႉၼႃႇ”
“ႁဝ်းၵေႃႈ..ၸႂ်ထိုင်သူဢေႃႈ ၸႂ်ထိုင်သူတေႉယဝ်ႉ…”
တွၼ်ႈတႃႇသႅင်ၶမ်းၼၼ်ႉ ပဵၼ်ၵၢၼ်တႄႇယၢင်ႈၶဝ်ႈႁဵတ်းသၢင်ႈလွင်ႈဢၼ် ပႆႇယၢမ်ႈဝူၼ်ႉထိုင်သေပွၵ်ႈၼၼ်ႉလႄႈ မိူဝ်ႈလႆႈယဵပ်ႇယၢင်ႈၶဝ်ႈၵႂႃႇယဝ်ႉၼၼ်ႉ ႁူႉတေလႆႈသိုပ်ႇၵႂႃႇၼႃႈတိၵ်းတိၵ်းၵူၺ်း၊ ဢမ်ႇမီးတႃႇႁူၼ်လင် ဢမ်ႇဝႃႈထူပ်းလွင်ႈၸႃႉႁိုဝ်ၶီ၊ လွင်ႈလီႁိုဝ်သိူဝ်းၵေႃႈ တေႃႈတေလႆႈႁပ်ႉၶၢမ်ႇသေ ယူႇၸွမ်းမၼ်းၵႂႃႇယူႇယဝ်ႉ။
သုတ်းယဝ်ႉ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
ယူႇတီႈၽူႈတႅမ်ႈလိၵ်ႈသေ ပေႃးဝႃႈမီးတီႈၽိတ်းတီႈပိူင်ႈ တီႈဢမ်ႇထုၵ်ႇမႅၼ်ႈၸိုဝ်ႈၸႂ်ႈၼႆၵေႃႈ ယွမ်းၼွမ်းယူႇၶႃႈ။ ယွၼ်ႉတၢင်းႁူႉၵေႃႈတိုၵ်ႉဢေႇ တၢင်းႁၼ်ၵေႃႈပႆႇၼမ် တူဝ်ထူပ်းတိုၵ်ႉမၢင်ဝႆႉယူႇလႄႈ ယုမ်ႇဝႃႈ တိုၼ်းတေမီးတီႈယူပ်ႈတီႈယွမ်းဝႆႉယူႇၶႃႈယဝ်ႉ။
ၼင်ႇႁိုဝ်လိၵ်ႈမၼ်းတေၽဵၼ်ႈ၊ ၶေႃႈၵႂၢမ်းမၼ်းတေထုၵ်ႇ၊ တူဝ်လိၵ်ႈတီႈၽိတ်းတီႈပိူင်ႈ ပေႃးတေယွမ်းလူင်းၵႂႃႇၼၼ်ႉၵေႃႈ ယိၼ်းၸူမ်းၶွပ်ႈၸႂ်ထိုင် ၽူႈထတ်းလိၵ်ႈႁဝ်း ၸၢႆးဢႅၼ် ယႂ်ႇၼမ်ယူႇၶႃႈ။
ယိၼ်းၸူမ်းၶွပ်ႈၸႂ် ၽူႈသူင်လူလိၵ်ႈလၢႆးတႆး၊ ၸိူင်းတႆးႁဝ်းၶဝ် ဢၼ်ၸႂ်ယႂ်ႇၸႂ်ယၢဝ်းသေ လူမႃးပၼ်တေႃႇပေႃးသုတ်းၶႃႈ။
ပၢႆၵမ်−သႅၼ်ငဝ်း
16 January 2023 – 24 June 2023
ၼပ်ႉယမ်ထိုင်ၽူႈလူလိၵ်ႈႁဝ်းၶဝ်တင်းသဵင်ႈယူႇဢေႃႈ။
