တွၼ်ႈသီႇသိပ်းႁႃႈ
တီႈၼႂ်းႁူင်းယႃဢၼ်ၵႂၢင်ႈယႂ်ႇ သႅင်ၶမ်းမိုၼ်းတႃမႃး လႆႈႁၼ်ၼူၼ်းမူဝ်မီးယူႇႁိမ်းမၼ်းၼၼ်ႉသေ လၢတ်ႈၸူးၵႂႃႇ
“တိုၼ်ႇယဝ်ႉႁႃႉ.. ၸွင်ႇၸဵပ်းတီႈလႂ်ႁိုဝ်”
“ၼၢႆးႁဝ်းလူး..ၶဝ်ပဵၼ်ၸိူင်ႉႁိုဝ် ၶႅၼ်းမႃးယဝ်ႉႁႃႉ”
ၼူၼ်းမူဝ်တဵတ်ႇယဵၼ်လူင်ၵႂႃႇသေ ၼမ်ႉတႃမၼ်းၼၼ်ႉၵေႃႈ သမ်ႉပေႃးၸိုမ်ႉယမ်းဢွၵ်ႇမႃးၸွမ်းၵႅမ်ႈၵႂႃႇယူႇ။
“ၼၢႆး.. ၶဝ်သဵင်ႈၵႂႃႇၶမ်ႈဝႃးယဝ်ႉ..”
ၵႂၢမ်းၶေႃႈၼၼ်ႉမႃးဢိုၵ်ႉၼိုၵ်ႉၶမ်ဝႆႉယူႇၼႂ်းၸႂ်လႄႈ ၼမ်ႉတႃဢၼ်ထိင်းဢမ်ႇလႆႈၼၼ်ႉၵေႃႈ လႆဢွၵ်ႇမႃးသမ်ႉပေႃးဢမ်ႇထၢတ်ႇဢမ်ႇဝၢႆး၊ ၼူၼ်းမူဝ်ၵေႃႈ ၶဝ်ႈၵွတ်ႇမၼ်းသေ ပၼ်ႁႂ်ႈမၼ်းလႆႈႁႆႈဢွၵ်ႇမႃးတဵမ်ဢူၵ်းတဵမ်ၸႂ်ယူႇ ၼႂ်းဢူၵ်းမၼ်းၼၼ်ႉယဝ်ႉ။
သႅင်ၶမ်းၼၼ်ႉၵေႃႈ မိူဝ်ႈဢၼ်ယင်းတိုၵ်ႉၵႂႃႇလႆႈပႆလႆႈယူႇၼၼ်ႉ သမ်ႉဝႃႈၶႃတေၸဵပ်းႁိုဝ်၊ ၶႅၼ်တေၶတ်း၊ ႁူဝ်တေတႅၵ်ႇၵေႃႈ ဢမ်ႇသူၼ်ယဝ်ႉ ႁိပ်ႈၼႅတ်ႈဢွၵ်ႇႁူင်းယႃ တႃႇပွၵ်ႈမိူဝ်းႁိူၼ်းၵမ်းလဵဝ်ယူႇ။ မိူဝ်ႈမိူဝ်းႁွတ်ႈထိုင်တီႈႁိူၼ်းၵေႃႈ ႁၼ်ၼၢႆးမၼ်း ၼွၼ်းၼိမ်ၽႃႈၶၢဝ်ႁူမ်ႇတင်းတူဝ်ဝႆႉယူႇ ၼႂ်းၵၢင်ႁိူၼ်း တီႈဢၼ်ၼၢႆးမၼ်းၵႆႉ ၼင်ႈလဵၼ်ႈ၊ ၵႆႉၼွၼ်းလဵၼ်ႈ တႃႇသေႇၼၼ်ႉယဝ်ႉ။
မိူဝ်ႈႁၼ်ၸိူင်ႉၼၼ် ယိုင်ႈၶႅၼ်းႁဵတ်းႁႂ်ႈမၼ်းဢိုတ်ႇႁႆႈမႃးထႅင်ႈ သမ်ႉပေႃးလိုမ်းတၢင်းၸဵပ်းသႅပ်ႇတီႈတူဝ်မၼ်းၼၼ်ႉလူးၵွၼ်ႇ။ ဝၼ်းၼၼ်ႉတင်းဝၼ်း ၵုမ်ႇႁွင်ႉႁႆႈၵူၺ်း သမ်ႉပေႃးဢမ်ႇပဵၼ်တူဝ်ပဵၼ်တိၼ်ႇသင်သေဢိတ်း၊ ၼူၼ်းမူဝ်ၼၼ်ႉတႄႉၵေႃႈ ယူႇႁိမ်းၸမ်မၼ်းသေ ၸွႆႈလုမ်းလႃးတူၺ်းထိုင်မၼ်းၵႂႃႇယဝ်ႉ။
ၸွမ်ၶိူဝ်းၶႃၽိူဝ်ၶမ်းၵေႃႈ ဢွၼ်ၵၼ်ႁွတ်ႈမႃးၸွႆႈ ၸဵမ်မိူဝ်ႈၵၢင်ၼႂ်ၸဝ်ႉၼၼ်ႉယူႇ။
ၵၢင်ၶမ်ႈလပ်းသိင်ႇၽိုတ်းၽိုတ်း ပိူၼ်ႈဢွၼ်ၵၼ်ထွမ်ႇလိၵ်ႈထွမ်ႇထမ်းယူႇၼၼ်ႉ ၸင်ႇမီးၵႃးလမ်းၼိုင်ႈႁွတ်ႈထိုင်မႃး၊ ၼၼ်ႉတႄႉ ပဵၼ်မႄႈသႅင်ၶမ်းၶဝ်ယဝ်ႉ။ သႅင်ၶမ်းဢၼ်ႁူႉဝႃႈမႄႈမႃးၼႆၼၼ်ႉၵေႃႈ ၼႅတ်ႈၵႂႃႇၸူးၵမ်းလဵဝ်သေ မိူဝ်ႈလႆႈႁၼ်မႄႈၼၼ်ႉ လၢတ်ႈသင်ပေႃးဢမ်ႇၸၢင်ႈသေဢိတ်း လိူဝ်သေမိပ်ႇၼမ်ႉတႃၸူးၵူၺ်း။
မိူဝ်ႈဢၼ်မႄႈဢၢင်ႈၶဝ်ႈၸူးမၼ်းၼၼ်ႉ မၼ်းၵေႃႈသုတ်ႉႁူၼ်ၵႂႃႇပႅတ်ႈ ၼင်ႇဝႃႈပဵၼ်ၵူၼ်းဢမ်ႇယၢမ်ႈႁူႉၸၵ်းၵၼ်ႁေ မႃးႁၼ်ၵၼ်ၼၼ်ႉၵူၺ်းယူႇ။ ႁၼ်ၼႃႈၵၼ်ယူႇၵေႃႈ ဢမ်ႇၸၢင်ႈလၢတ်ႈၵႂၢမ်းသင်ဢွၵ်ႇၸူးၵၼ်လႆႈ ၼၼ်ႉယဝ်ႉ။
တႂ်ႈငဝ်းလပ်းသိင်ႇ သဵင်ႁေႃးလိၵ်ႈယဵၼ်ၵႂႃႇယဝ်ႉ ၵူၼ်းၵေႃႈဢွၼ်ၵၼ်ပွၵ်ႈမိူဝ်းၵႂႃႇၽႂ်ၵႂႃႇမၼ်းယူႇ၊ ဢမ်ႇပေႃးၵိုတ်းၽႂ်ယဝ်ႉ ၵူၺ်းၵိုတ်းဢူၺ်းၵေႃႉဢူၺ်းသႄႈၵၼ် ၵူၼ်းမိုတ်ႈၵၼ်ၼၼ်ႉၵူၺ်းယူႇ။ သႅင်ၶမ်းၼၼ်ႉၵေႃႈ ၼင်ႈဢိင်ၽႃ ပႂ်ႉယူႇႁိမ်းၵွမ်ႇၼၢႆးၶဝ်ၼၼ်ႉႁင်းၵူၺ်း ဢမ်ႇႁူႉဝႃႈပိူၼ်ႈဢွၼ်ၵၼ်ၵႂႃႇတၢင်းလႂ်ပႅတ်ႈမၼ်းမူတ်း။
မိူဝ်ႈပဵၼ်ၸိူင်ႉၼၼ် ၽိူဝ်ၶမ်းၵေႃႈ လႆႈဢဝ်ၽႃႈမႃးႁူမ်ႇပၼ်မၼ်းသေ ၼင်ႈဢိင်ၵႂႃႇၸွမ်းမၼ်း လူၺ်ႈဢမ်ႇလႆႈလၢတ်ႈၵႂၢမ်းသင်ဢွၵ်ႇမႃးသေၶေႃႈ၊ သဵင်တဵတ်ႇယဵၼ်လူင်ၼၼ်ႉ မိူၼ်မီးလွင်ႈဢုၼ်ႇၸႂ်မႃးဝႆႉယူႇ။ လိုၵ်းၵေႃႈလိုၵ်းၼႃႇယဝ်ႉ သမ်ႉဝႃႈဢမ်ႇၶႂ်ႈၼွၼ်းၵေႃႈ ႁိုဝ်ၵွၼ်းတူဝ်လႆႈ ၵွၵ်းႁူဝ်သႅင်ၶမ်းၼၼ်ႉၵိူင်းၵႂႃႇလွႆးလွႆးသေ မွႆႈလပ်းၵႂႃႇယဝ်ႉ၊ ၽိူဝ်ၶမ်းဢၼ်ၼင်ႈဝႆႉယူႇႁိမ်းမၼ်းၼၼ်ႉၵေႃႈ ႁွပ်ႇဢဝ်ႁူဝ်သႅင်ၶမ်းၼၼ်ႉ မႃးတၢင်ႇသႂ်ႇပၼ်တီႈမႃႇမၼ်းၼၼ်ႉလွႆးလွႆးၵႂႃႇ။ ၽွင်းၼၼ်ႉ မႅၼ်ႈမိူဝ်ႈဢၼ် ၸွမ်ၶိူဝ်းၶဝ်ႈႁိူၼ်းမႃးႁၼ်ဢဝ်လီလီ ထိုင်တီႈမၼ်းသမ်ႉပေႃးလႆႈၵိုတ်းႁူၼ်ၵႂႃႇၶိုၼ်းယဝ်ႉ။
တႃႇတေၽၢၼ်ႇပူၼ်ႉၵႂႃႇ ဝၼ်းယဝ်ႉဝၼ်းၼၼ်ႉ တွၼ်ႈတႃႇသႅင်ၶမ်းၼၼ်ႉတႄႉ မၼ်းႁိုဝ်ငၢႆႈ၊ ယိုင်ႈဝူၼ်ႉယိုင်ႈၸႂ်ထိုင်၊ ယိုင်ႁၼ်ၵူၼ်းႁူႉၸၵ်းၼမ်ႉတႃယိုင်ႈယမ်းၸိုမ်ႉမႃး၊ တင်းတူဝ်ၵေႃႈဢမ်ႇလီ ၸႂ်ၵေႃႈသမ်ႉတုၵ်ႉထႅင်ႈႁေ ပဵၼ်တၢင်းၶၢၼ်ၸႂ်ဢၼ်ယၢပ်ႇယၢၵ်ႈႁႅင်းလိူဝ်၊ ယူႇၵႂႃႇၵေႃႈ သမ်ႉပေႃးဢမ်ႇၶႂ်ႈပဵၼ်တူဝ်လႆႈသေဢိတ်း ၼၼ်ႉယဝ်ႉ။ ၽွင်းဢၼ်တိုၵ်ႉၼင်ႈငဝ်ယူႇၼၼ်ႉၵေႃႈ ၸင်ႇသမ်ႉလႆႈႁၼ်ၵူၼ်းဢၼ်မၼ်း ႁူႉၸၵ်းမိုတ်ႈၵိုဝ်း ၵေႃႉဢၼ်မုင်ႈမွင်းၶႂ်ႈထူပ်းႁၼ်တႃႇသေႇၼၼ်ႉ မႃးတူင်ႉတၵ်ႉၸူးမၼ်းၵႂႃႇ လူၺ်ႈၶေႃႈၵႂၢမ်းဝႃႈ
“မွင်ၸႂ်ၸွမ်းၼႃႈ”
တေႁဵတ်းႁိုဝ်လႃႇ ႁၼ်ၼႃႈၵူၼ်းၵေႃႉၼၼ်ႉယဝ်ႉၵေႃႈ ဢမ်ႇမီးႁႅင်းတႃႇတွပ်ႇၶိုၼ်းလႆႈယဝ်ႉ၊ ၼမ်ႉတႃမၼ်းၼၼ်ႉၵေႃႈ လႆယွတ်ႇယွႆႉလူင်းမႃးဢမ်ႇထၢတ်ႇဢမ်ႇဝၢႆး၊ ၶူးၽိဝ်ၾႃႉၼၼ်ႉၵေႃႈ လႆႈဢဝ်ၼမ်ႉတႃမၼ်းၸုမ်ႉယမ်း လၢႆႇတႃမၼ်းမႃးမိူၼ်ၵၼ်၊ ၵၢၼ်ႁူပ်ႉထူပ်းၵၼ်ၶိုၼ်း ၼႂ်းၶၢဝ်းတၢင်းလၢႆပီႊၼၼ်ႉ ႁိုဝ်တေၸၢင်ႈဢဝ်တၢင်းယုမ်ႉ ယိုၼ်ႈပၼ်ၵၼ်လႆႈလႃႇ မိူဝ်ႈယူႇၼႂ်းယၢမ်းတၢင်းတုၵ်ႉၸႂ်ၸိူင်ႉၼႆ ၵႃႈတေလႆႈဢဝ်တၢင်းမွင်ၸႂ် တူင်ႉတၵ်ႉၵၼ်ၵႂႃႇၵူၺ်းယဝ်ႉ။
ၶၢဝ်းတၢင်းလၢႆဝၼ်း ၸဵမ်ပီႈဢိၵ်ႇၼွင်ႉ ဢၼ်ႁူႉၸၵ်းမိုတ်ႈၵိုဝ်းၵၼ် တီႈၸမ်တီႈၵႆ ဢွၼ်ၵၼ်မႃးၸွႆႈထႅမ် တေႃႇပၢင်မႃႇသႃႇပေႃးယဝ်ႉၵႂႃႇသေဢမ်ႇၵႃး ႁူမ်ႈၵၼ်ႁႅၼ်းလူႇႁႅၼ်းတၢၼ်း ႁႅၼ်းသွမ်းပၼ်ၵႂႃႇ၊ တေႃႇႁႂ်ႈမၼ်းပေႃးယဝ်ႉတူဝ်ႈလီငၢမ်းသေ ၸင်ႇတေဢွၼ်ၵၼ်ၶိုၼ်းသူႇတဝ်ႈ ဢွင်ႈၵဝ်ႇၽႂ်မၼ်းၵႂႃႇယူႇ။
တီႈၼႂ်းလင်ႁိူၼ်းလူင် ဢၼ်ယၢမ်ႈမီးသဵင်ၼၢႆးပွင်ႉၶၢင်း၊ သဵင်ဢုပ်ႇလၢတ်ႈႁုၼ်ႉၶူဝ် ဢွင်ႈၵဝ်ႇတီႈဢၼ်လႆႈႁၼ်ၼၢႆး တူင်ႉတူင်ႉၼိုင်ၼိုင်ယူႇတႃႇသေႇၼၼ်ႉ ဢမ်ႇလႆႈႁၼ်မီးယဝ်ႉၵေႃႈ ၼင်ႇႁၢင်ႈပေႃးငဝ်မႃးယူႇယဝ်ႉ၊ မၢင်ပွၵ်ႈမိူဝ်ႈဢမ်ႇတၼ်းဝူၼ်ႉႁိုဝ် လူဝ်ႇၶဝ်ၼႆၵေႃႈ သမ်ႉပေႃးႁွင်ႉမႅၼ်ႈၺႃးယူႇ။ မိူၼ်ၽႂ်ၵေႃႈ တေဢမ်ႇပႆႇယၢမ်ႈလႄႈ မိူဝ်ႈဢၼ်ၼင်ႈၵိၼ်ၶဝ်ႈႁူမ်ႈမူႇၵၼ်ယူႇၼၼ်ႉ ဢွၼ်ၵၼ်ၼင်ႈႁေငဝ်ၸူးၵၼ်ၵႂႃႇၵူၺ်း ၵိၼ်ၶဝ်ႈသမ်ႉပေႃးဢမ်ႇလူင်းၵၼ်ယဝ်ႉ။
ၼုမ်ႇႁိူင်း ဢၼ်ပဵၼ်ႁူဝ်ႁိူၼ်းၶဝ်ၼၼ်ႉၵေႃႈ မိူဝ်ႈႁၼ်ၵူၼ်းၼႂ်းႁိူၼ်းမၼ်း ပဵၼ်ၸိူင်ႉၼၼ် ၸင်ႇလၢတ်ႈၸူးၶဝ်ၵႂႃႇ။
“ႁူႉယူႇဝႃႈ သူၵိၼ်ၶဝ်ႈဢမ်ႇလူင်း.. ၵဝ်ၵေႃႈၵိၼ်ၶဝ်ႈဢမ်ႇလူင်းမိူၼ်ၵၼ် ၵေႃႉဢၼ်သဵင်ႈၵႂႃႇယဝ်ႉ မၼ်းၵေႃႈဢမ်ႇၶိုၼ်းပွၵ်ႈမႃးလႆႈယဝ်ႉလူး ယွမ်းႁပ်ႉမၼ်းသေလႄႈ ၵေႃႉဢၼ်မီးသၢႆၸႂ်ယူႇၼၼ်ႉၵေႃႈ တေလႆႈသိုပ်ႇမီးသၢႆၸႂ်ၵႂႃႇထႅင်ႈဢိူဝ်ႈ၊ ၵိၼ်ၵႂႃႇလႄႈ ဢမ်ႇတွင်ႉမႆႈၵေႃႈ ၵိၼ်သေဢိတ်ႉၼိုင်ႈၵေႃႈယင်းလီ ”
ၶဝ်ၵေႃႈ ဢွၼ်ၵၼ်ၼင်ႈၵိၼ်ၵႂႃႇႁင်းၽႂ်ႁင်းမၼ်းယူႇ ႁူမ်ႈပႃးမႄႈၶဝ်ၼၼ်ႉယဝ်ႉ။
ယၢမ်းၵၢင်ၶိုၼ်းလိုၵ်းယဵၼ် သႅင်ၶမ်းၼၼ်ႉ ၼွၼ်းဢမ်ႇလပ်းလႆႈလႄႈ တင်းၶူတ်ႇလဝ်ႈမၼ်းၼၼ်ႉသေ ဢွၵ်ႇမႃးၼင်ႈယူႇတီႈၸၢၼ်းႁိူၼ်းၼၼ်ႉယဝ်ႉ တူၺ်းၽူၼ်လူင်တူၵ်းယွတ်ႇယွႆႉယူႇၼၼ်ႉလႄႈ ဢိုၵ်ႉၵိၼ်လဝ်ႈမၼ်း ၵွၵ်းယဝ်ႉၵွၵ်းယူႇ။ မိူဝ်ႈယၢမ်းၼင်ႇၼၼ် ၵေႃႉပဵၼ်မႄႈၶဝ်ၼၼ်ႉၵေႃႈ မႃးၼင်ႈႁိမ်းမၼ်းသေ
“ပဵၼ်သင်လႄႈၶၢဝ်းၼႆႉယဝ်ႉပႆႇၼွၼ်းလႃႇ”
“သူၵေႃႈယင်းဢမ်ႇပႆႇၼွၼ်းမိူၼ်ၵၼ်ၶႃႈလူး..”
သွင်ၶႃၵေႃႈယဵၼ်ၵႂႃႇသေ သႅင်ၶမ်းၼၼ်ႉ ၸင်ႇလႆႈပိုတ်ႇလၢတ်ႈၶေႃႈၵႂၢမ်းၼႂ်းၸႂ်မၼ်းဢွၵ်ႇမႃးၼႄယူႇ။
“ဝၢႆးသေမႄႈၶႃႈဢမ်ႇယူႇၼၼ်ႉ ၼၢႆးႁဝ်းၵေႃႈ လုမ်းလႃးတူၺ်းထိုင်ၶႃႈ မိူၼ်ၼင်ႇမႄႈၵေႃႉၼိုင်ႈယဝ်ႉ၊ မိူဝ်ႈၶႃႈၸႂ်ထိုင်မႄႈ ၶဝ်ၵေႃႈၶဝ်ႈမႃးၵွတ်ႇ ပၼ်တၢင်းဢုၼ်ႇၸႂ်ၶႃႈ၊ မိူဝ်ႈၶႃႈဢမ်ႇယူႇလီ ၶဝ်ၵေႃႈလုမ်းလႃးတူၺ်းထိုင်ၶႃႈ၊ မိူဝ်ႈၶႃႈၶၢၼ်ႉ ၶဝ်ၵေႃႈၸွမ်းၸႂ်ႉႁႂ်ႈၶႃႈႁဵတ်း၊ မိူဝ်ႈၶႃႈမီးတၢင်းသိူဝ်း ၶဝ်ၵေႃႈယုမ်ႉၶူဝ်ၸွမ်း၊ မိူဝ်ႈၶႃႈၶီငဝ်ၶဝ်ၵေႃႈပၼ်ႁႅင်းၸႂ်၊ ၵူၺ်းၵႃႈ မိူဝ်ႈၶႃႈႁွင်ႉႁႆႈယူႇၼၼ်ႉ ၶဝ်ၵေႃႈဢမ်ႇသူၼ်ၸႂ်ၶႃႈသေ ႁႂ်ႈၶႃႈတဵတ်ႇႁင်းၵူၺ်းယူႇ၊ ၼၢႆး ပဵၼ်ၵူၼ်းၵေႃႉဢၼ်ႁူႉၸၵ်းၶႃႈလီလိူဝ်ပိူၼ်ႈလႄႈ လုမ်းလႃးတူၺ်းထိုင်ၶႃႈ မႃးၸဵမ်မိူဝ်ႈၶႃႈယင်းလႅင်ဢွၼ်ႇယူႇဢမ်ႇၸႂ်ႈႁိုဝ်၊ သမ်ႉဝႃႈၶႃႈတေၵေႃႉယႂ်ႇတၢၼ်ႇလႂ်ၵေႃႈ ယင်းတိုၵ်ႉႁၼ်ၶႃႈပဵၼ်လုၵ်ႈဢွၼ်ႇယူႇတႃႇသေႇ၊ မိူဝ်ႈႁၼ်ၶႃႈႁဵတ်းဢမ်ႇထုၵ်ႇ ယင်းတိုၵ်ႉၸွမ်းပွင်ႉ ႁွင်ႉလၢတ်ႈပူၼ်ႉႁိူၼ်းပူၼ်ႉယေးယူႇလူး၊ ဢမ်ႇလႆႈႁၼ်ၶဝ် ဢမ်ႇလႆႈငိၼ်းသဵင်ၶဝ်ယဝ်ႉ ၶႃႈဢမ်ႇယၢမ်ႈသေဢိတ်း”
ဢိုၵ်ႉၵိၼ်လဝ်ႈမၼ်းၵႂႃႇၵမ်ႉၼိုင်ႈသေ သိုပ်ႇလၢတ်ႈထႅင်ႈ
“ၶႃႈဢမ်ႇတွၼ်ႉဝူၼ်ႉထိုင် ဝၼ်းလႂ် ၼႂ်းၸၢတ်ႈပၢၼ်ၶႃႈ ဢၼ်ဢမ်ႇမီးၼၢႆးၼၼ်ႉသေပွၵ်ႈ၊ ၵူၺ်းၵႃႈ ၶႃႈၵေႃႈတေလႆႈယွမ်းႁပ်ႉမၼ်းၵႂႃႇဢမ်ႇၸႂ်ႈႁိုဝ်။ မိူဝ်ႈႁၼ်သူၼႆ ႁဵတ်းႁႂ်ႈၶႃႈဝူၼ်ႉလႆႈဝႃႈ ၵူၼ်းႁဝ်းၼၼ်ႉ ဝၼ်းလႂ်ဝၼ်းၼိုင်ႈၵေႃႈ ႁူႉတေၽၢတ်ႇယၢၼ်ၵၼ်ၵႂႃႇလႄႈ ဢမ်ႇၽၢတ်ႇလိပ်းၵေႃႈၽၢတ်ႇတၢႆယူႇၵူၺ်း၊ ဢမ်ႇဝႃႈၽႂ်တေၽၢတ်ႇယၢၼ်ၶႃႈၵႂႃႇ ၶႃႈၵေႃႈတေလႆႈယွမ်းႁပ်ႉလွင်ႈဢၼ်ပဵၼ်ယူႇ၊ သမ်ႉဝႃႈဢမ်ႇယၢမ်ႈၵေႃႈ တေမေႃယူႇၸွမ်းမၼ်းၵႂႃႇႁႂ်ႈလႆႈၼၼ်ႉယဝ်ႉ၊ ဝၢႆးသေဝၼ်းၼႆႉၵႂႃႇ ၶႃႈဝႃႈၶႃႈတေယူႇၸွမ်းလွင်ႈဢၼ်ပဵၼ်ယူႇၼၼ်ႉ ၵႂႃႇႁႂ်ႈလႆႈယဝ်ႉ”
“ၵေႃႉယႂ်ႇမႃးလီတေႉယဝ်ႈ..”
“တေပဵၼ်ယွၼ်ႉဢမ်ႇမီးမႄႈၵေႃႈပဵၼ်လႆႈ.. မၼ်းႁဵတ်းႁႂ်ႈႁဝ်းမေႃယူႇမႃးလႆႈ မိူဝ်ႈၵူၼ်းၵေႃႉဢၼ်ႁဝ်းႁၵ်ႉ ၽၢတ်ႇယၢၼ်ႁဝ်းၵႂႃႇၼၼ်ႉၼႃႇ၊ ႁဝ်းတေလႆႈၵႅၼ်ႇၶႅင်လိူဝ်သေၽႂ် ယွၼ်ႉႁဝ်းဢမ်ႇမီးမႄႈ ၸွမ်းႁဵတ်းပၼ်ႁဝ်းမိူၼ်ၼင်ႇပိူၼ်ႈ၊ ႁဝ်းတေလႆႈမေႃပိုင်ႈဢိင်တူဝ်ၸဝ်ႈၵဝ်ႇႁင်းၵူၺ်း မၼ်းႁဵတ်းႁႂ်ႈႁဝ်းၸဵဝ်းပေႉတူဝ်ၼၼ်ႉယဝ်ႉ ယိၼ်းၸူမ်းယဝ်ႉၶႃႈ ဢၼ်ပွႆႇၽႃႈႁဝ်းၵႂႃႇ”
မႄႈၶဝ်ၼၼ်ႉၵေႃႈ ႁိုဝ်ႈလဝ်ႈသႂ်ႇၵွၵ်းသႅင်ၶမ်းၼၼ်ႉသေဢိုၵ်ႉၵိၼ်ယူႇယဝ်ႉ။
“လွင်ႈမၢႆတွင်းၶႃႈဢၼ်မီးၸွမ်းသူၼၼ်ႉ မၼ်းမီးဢေႇႁႅင်းၼႃႇ သမ်ႉဝႃႈတေၶႆႈၶိုၼ်းၵေႃႈၶႃႈဢမ်ႇတွင်းယဝ်ႉ၊ ဢၼ်တွင်းလႆႈလီလိူဝ်ပိူၼ်ႈၵေႃႈ ပဵၼ်ဝၼ်းဢၼ်သူၽၢတ်ႇယၢၼ်ႁဝ်းၵႂႃႇလႄႈ ဝၼ်းဢၼ်သူတတ်းၶၢတ်ႇ လွင်ႈၵပ်းသိုပ်ႇတင်းႁဝ်းၼၼ်ႉၵူၺ်း၊ ၶႃႈယၢမ်ႈၸႂ်လမ် ယၢမ်ႈၸၢၼ်ႈၸင်း၊ ၸဵပ်းၸႂ်လွင်ႈဢၼ်သူႁဵတ်းတေႃႇႁဝ်း၊ လွင်ႈဢၼ်သူပွႆႇၽႃႈႁဝ်းၵႂႃႇသေ တႄႇၼႃႈႁိူၼ်းမႂ်ႇပႅတ်ႈၼၼ်ႉ မၼ်းမိူၼ်ဝႃႈ သူဢမ်ႇႁၼ်ႁဝ်းပီႈၼွင်ႉ ပဵၼ်လုၵ်ႈသူၼၼ်ႉယဝ်ႉ၊ ယွၼ်ႉမီးဝၼ်းၼၼ်ႉလႄႈ ၸင်ႇလႆႈမီးဝၼ်းမိူဝ်ႈၼႆႉယဝ်ႉ ၶႃႈဝူၼ်ႉဝႃႈဢၼ်ႁဝ်းပဵၼ်ယူႇမိူဝ်ႈလဵဝ်ၼႆႉၵေႃႈ လီယဝ်ႉ၊ သမ်ႉဝႃႈ သူၼၼ်ႉတေမီးၼႂ်းၸၢတ်ႈပၢၼ်ႁဝ်းႁိုဝ် ဢမ်ႇမီးၵေႃႈယဝ်ႉ မၼ်းဢမ်ႇလႆႈလမ်ႇလွင်ႈသင်လႄႈ လွင်ႈဢၼ်ၸၢၼ်ႈၸင်းၼိူဝ်သူၼၼ်ႉၵေႃႈ လႆႈႁၢႆၵႂႃႇယဝ်ႉ၊ ယဝ်ႉၵေႃႈယိၼ်းၸူမ်းၵူႈလွင်ႈဢၼ်သူႁဵတ်းပၼ်ႁဝ်းမႃးၶႃႈၼႃ”
သႅင်ၶမ်းၵေႃႈ မႄးႁိုဝ်ႈလဝ်ႈသႂ်ႇၵွၵ်းၼၼ်ႉထႅင်ႈလႄႈ ဢိုၵ်ႉၵိၼ်ၵႂႃႇထႅင်ႈယဝ်ႉ သိုပ်ႇလၢတ်ႈၵႂႃႇ
“ၶႃႈၵေႃႈဢမ်ႇႁူႉဝႃႈ ၶႃႈတေလႆႈႁွင်ႉသူၸိူင်ႉႁိုဝ်လႃႈ သူယင်းတိုၵ်ႉဝူၼ်ႉၼိူဝ်ႁဝ်းၼၼ်ႉ ပဵၼ်လုၵ်ႈယူႇႁႃႉ၊ ယင်းတိုၵ်ႉဝူၼ်ႉဝႃႈ တူဝ်ၸဝ်ႈၵဝ်ႇၼၼ်ႉ ပဵၼ်မႄႈႁဝ်းယူႇႁိုဝ်၊ ၶႃႈယင်းတိုၵ်ႉမီးသုၼ်ႇ ႁွင်ႉသူဝႃႈမႄႈယူႇႁႃႉ ၶႃႈၵေႃႈဢမ်ႇယုမ်ႇၸႂ်လႆႈ”
ၵႂၢမ်းၶေႃႈၼႆႉၵေႃႈ ႁဵတ်းႁႂ်ႈဢိုၵ်ႉၼိုၵ်ႉထိုင်ၼႂ်းႁူဝ်ၸႂ်ၵေႃႉပဵၼ်မႄႈၶဝ် လၢတ်ႈသင်ပေႃးဢမ်ႇဢွၵ်ႇယဝ်ႉ။ ၼႂ်းၶမ်ႈၶိုၼ်းၼႆႉၵေႃႈ လႆႈသုတ်းသဵင်ႈၵႂႃႇၸွမ်းၼမ်ႉလဝ်ႈၶၢဝ် လႄႈ သဵင်ၽူၼ်ဢၼ်တူၵ်းလူင်း ဢမ်ႇထၢတ်ႇဢမ်ႇဝၢႆးၼၼ်ႉၵႂႃႇယူႇ။
ၵၢင်ၶိုၼ်းလပ်းသိင်ႇသုတ်းမူတ်းသဵင်ႈၵႂႃႇ ၵၢင်ဝၼ်းလုၵ်ႈသႅင်လႅင်းပိူင်းထွင်ႇႁႅင်း လုၵ်ႈလႅတ်ႇဢုၼ်ႇဢုၼ်ႇၵေႃႈ မုၼ်းဢွၵ်ႇၶိုၼ်ႈမႃး ပႃးတင်းဢၢႆၼမ်ႉဝၢႆးၽူၼ်ၼၼ်ႉ ႁၢင်ႈပေႃးၵတ်းၸိုၼ်ႈယဵၼ်ၸႂ်လူင်ဝႆႉယူႇ။ မႄႈသႅင်ၶမ်းၼၼ်ႉၵေႃႈ သူင်ႇသင်ႇၶဝ်ပီႈၼွင်ႉသေ ၽၢတ်ႇယၢၼ်ပွၵ်ႈၵႂႃႇၶိုၼ်းယူႇယဝ်ႉ။ မိူဝ်ႈတေၶိုၼ်ႈၵႃးၵႂႃႇၼၼ်ႉ သႅင်ၶမ်းၵေႃႈသႅၼ်ႇႁွင်ႉၸူးၶဝ်ၵႂႃႇ
“မႄႈ!!..” ဢဝ်မႄႈၶဝ်ၼၼ်ႉသမ်ႉပေႃးဝိၼ်ႇဝၢႆႇတူၺ်းၸူးသေ မၼ်းၵေႃႈလႅၼ်ႈၵွတ်ႇၶဝ်ၵႂႃႇ။
“ၶႃႈယၢမ်ႈဝူၼ်ႉဝႃႈ ပေႃးမႄႈပွၵ်ႈမႃး တေလႆႈၵွတ်ႇမႄႈဝႆႉ ႁႂ်ႈပေႃးယႃႇၸၢင်ႈၵႂႃႇၶိုၼ်းႁႂ်ႈလႆႈၼၼ်ႉယဝ်ႉ သမ်ႉဝႃႈတေလႆႈၵွတ်ႇမိူဝ်ႈၽၢတ်ႇယၢၼ်ၵႂႃႇၵေႃႈ ယွၼ်းၵွတ်ႇႁိုင်ႁိုင်ၸွင်ႇတေလႆႈႁိုဝ်”
မိုဝ်းမႄႈၶဝ်ၼၼ်ႉၵေႃႈ လုပ်ႈပၼ်လင်မၼ်းၵႂႃႇလွႆးလွႆးယဝ်ႉ၊ “လႆႈဢိူဝ်ႈ ၵွတ်ႇႁိုင်ႁိုင်ၼင်ႇၵႃႈၵွတ်ႇလႆႈလႄႈ”
“ၶႃႈၶႂ်ႈႁွင်ႉသူဝႃႈမႄႈဢေႃႈ ၸွႆႈၵပ်းသိုပ်ႇႁဝ်းမႃးၽွင်ႈၸွင်ႇတေလႆႈႁိုဝ်၊ ၸွႆႈၸႂ်ထိုင်ႁဝ်းၽွင်ႈၸွင်ႇလႆႈ၊ ႁဝ်းယူႇလူၺ်ႈဢမ်ႇမီးမႄႈလႆႈသေတႃႉ ႁဝ်းၵေႃႈၸႂ်ထိုင်မႄႈယူႇဢေႃႈ”
မႄႈၼၼ်ႉၵေႃႈ လုပ်ႈႁူဝ်မၼ်းလွႆးလွႆးယဝ်ႉ “လႆႈဢေႃႈ..မႄႈတေၵပ်းသိုပ်ႇမႃး၊ ပေႃးဝႃႈၸႂ်ထိုင်ၵေႃႈ လၢတ်ႈတေႃႇမႄႈလႆႈတႃႇသေႇယူႇၵူၺ်း”
မႄႈၶဝ်ၼၼ်ႉၵေႃႈ လႆႈၽၢတ်ႇယၢၼ်ႁၢင်ႇၶဝ်ၵႂႃႇပႅတ်ႈလွႆးလွႆးယူႇ။ သႅင်ၶမ်းၶႃပီႈၼွင်ႉၼၼ်ႉတႄႉ ယင်းတိုၵ်ႉၸုၵ်းတူၺ်းၸွမ်းလင်ၵႃးၼၼ်ႉ ယင်းပႆႇၶၢႆႉတီႈလႄႈ မၼ်းၵေႃႈၸုၵ်းႁေလၢတ်ႈယူႇႁိမ်း ပီႈဢၢႆႈမၼ်းၵႂႃႇ
“သမ်ႉဝႃႈမိူဝ်ႈပူၼ်ႉမႃးၼၼ်ႉ တေႁူၼ်ၶိုၼ်းဢမ်ႇလႆႈလႄႈ ၵူႈလွင်ႈတေတူၵ်းလိုၼ်းယဝ်ႉသေတႃႉ၊ မိူဝ်ႈႁဝ်းယင်းတိုၵ်ႉမီးတိုဝ်ႉတၢင်း ႁူပ်ႉထူပ်းၵၼ်ယူႇၼၼ်ႉ ႁဝ်းၵေႃႈတႄႇသၢင်ႈလွင်ႈၸမ်ၸႂ်ႁဝ်းၵႂႃႇၶိုၼ်းလႆႈယူႇ၊ မႄႈၵေႃႈယင်းတိုၵ်ႉမီးတိုဝ်ႉတၢင်း ႁဵတ်းပၼ်ပုၼ်ႈၽွၼ်းမႄႈလႆႈယူႇ၊ တွၼ်ႈတႃႇၶႃႈ သမ်ႉဝႃႈမႄႈတေတႄႇႁဵတ်းၵႂႃႇ ယၢမ်းၼႆႉၵေႃႈ ဢမ်ႇပႆႇတူၵ်းလိုၼ်းၼႃ”
“ဝူၼ်ႉလႆႈၸိူင်ႉၼႆၵေႃႈလီယဝ်ႉ သမ်ႉဝႃႈၶဝ်တေပဵၼ်မႄႈႁဝ်းၵေႃႈ မႂ်းၵေႃႈလူဝ်ႇလႆႈႁူႉပွင်ႇၸႂ်ၽွင်ႈဢိူဝ်ႈ၊ ဝႃႈတူဝ်ၸဝ်ႈၵဝ်ႇၼၼ်ႉၵေႃႉယႂ်ႇယဝ်ႉ တေႁႂ်ႈမႄႈႁဵတ်းတေႃႇမႂ်း ႁႂ်ႈမိူၼ်လုၵ်ႈဢွၼ်ႇၼၼ်ႉဢမ်ႇလႆႈယဝ်ႉ”
“ၶႂ်ႈဝႃႈၵဝ်ၼၼ်ႉ တိုၵ်ႉပဵၼ်လုၵ်ႈဢွၼ်ႇယူႇၼႆၵႃႈ”
သွင်ၵေႃႉပီႈၼွင်ႉၵေႃႈ ထဵင်ၵၼ်လူင်ၶဝ်ႈမိူဝ်းၼႂ်းႁိူၼ်းၵႂႃႇယူႇယဝ်ႉ။
တွၼ်ႈသီႇသိပ်းႁႃႈသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇသိပ်းႁူၵ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
