ဝူၼ်ႉႁၼ်ထိုင်လွင်ႈလီ

ၶၢဝ်းၶိင်ႇပိူၼ်ႈလပ်းယဵၼ် ၵုမ်ႇပဵၼ်ၵၢၼ်လဵပ်ႈႁဵၼ်း ဢဵၼ်းဢၢၼ်းတႃႇၶိုၼ်ႈယႂ်ႇ တူၵ်းသႂ်ႇပုၼ်ႈၽွၼ်းသွၼ် တႃႇဢွၼ်သိမ်းလိၵ်ႈလၢႆး ၵူႈဝၼ်းငၢႆးၶတ်းၸႂ် ၶၢဝ်းၶိင်ႇလႂ်ဢမ်ႇလိုဝ်ႈ ၶဝ်ႈၸိုဝ်ႈပဵၼ်မေႃသွၼ် ၵေႃႉဢွၼ်ၼေႃႇတႅၼ်းၶိူဝ်း ၶိုၼ်ႈယႂ်ႇၵႂႃႇမိူဝ်းၼႃႈ ဢမ်ႇပႂ်ႉထႃႈၶၢဝ်းယၢမ်း ဢမ်ႇပၼ်ႁၢမ်းၼႃႈၵၢၼ် ပၢၼ်ပဵၼ်ၵေႃႉၼႄတၢင်းလုၵ်ႈႁဵၼ်း။ ပၢႆၵမ် - သႅင်ၸိုၼ်ႈ

တၢင်းႁူႉလၢႆဢၼ် ထႅမ်သႂ်ႇပၼ် ႁႂ်ႈႁၼ်ၵူႈလွၵ်းလၢႆး။ မိူဝ်ႈဢၼ်ႁဝ်းႁႃး ၽွမ်ႉၵၼ်မႃး ယၢၼ်ပႃးႁိူၼ်းၽၢတ်ႇဢွၵ်ႇ။ မႃးယူႇတီႈၼႆႈ ဢမ်ႇလႆႈမႆႈ ႁိုဝ်ၶႆႈၽၢတ်ႇယၢၼ်မိူဝ်း။ တၢင်းႁူႉၵူႈဢၼ် မီးၵႃႈၶၼ် ဢွၼ်ၵၼ်လဵပ်ႈႁဵၼ်းမႃး။ ႁဝ်းႁႃးၵူႈၵေႃႉ ဢမ်ႇယွမ်းၶျေႃႉ တႃႇတေႃႉတၢင်းႁူႉႁၼ်။ တႃႇပိုၼ်ၽႄပၼ် လွင်ႈႁူႉႁၼ် ၸိူဝ်းဢၼ်ဢမ်ႇပႆႇႁူႉ။ ပၢႆၵမ် - သႅင်ၸိုၼ်ႈ

ႁူၵ်းလိူၼ်ၶၢဝ်းယၢမ်းတိုဝ်ႉတၢင်းလီ ဢမ်ႇမီးလွင်ႈၶီသၢင်ႈတၢင်းႁူႉ ႁုပ်ႈၸူႉသွၼ်ဢဝ်ၼႂ်းႁူၵ်းလိူၼ် ဢမ်ႇၶၢၼ်ႉဢိူၼ်ႁဝ်းလဵပ်ႈႁဵၼ်းမႃး ႁဝ်းႁႃးၽွမ်ႉၵၼ်ဢမ်ႇယွၼ်ႇၸႂ် လွင်ႈၶဵင်ႇတႃႉၸိူဝ်းလႂ်ဢမ်ႇဝႃႈ ၸုမ်းႁဝ်းၶႃႈလႆႈတေႃႇသူႈမႃး ထူပ်းၺႃးလွင်ႈလီႁူမ်ႈၵၼ်ၸၢမ်ႇ ႁူမ်ႈၶၢမ်ႇၸွမ်းၵၼ်မိူဝ်ႈတူၵ်းၵိၼ်း ငိၼ်းၸူမ်းၶွပ်ႈၸႂ်ထိုင်ၶူးသွၼ် တီႈဢွၼ်သၢင်ႈႁူင်းႁဵၼ်းၼႆႉမႃး တႃႇႁဝ်းႁႃးလႆႈသၢင်ႈၼမ်ႉၵတ်ႉယူႇဢေႃႈ။ ပၢႆၵမ် - သႅင်ၸိုၼ်ႈ