ၶၢဝ်းၽူၼ်ၵေႃႈၸမ်ၸၢႆး ၼမ်ႉၼၢႆးဢွၼ်ႇၵေႃႈ ႁူင်ႈယွတ်ႇယွႆႉဢွႆမႃးလွႆးလွႆး တၢင်းၵတ်းလူင်မိူင်းၵူၼ်းၵေႃႈ ၵွႆႈယူႇၵွႆႈၸီႈၵတ်းမႃးတိၵ်းတိၵ်းယဝ်ႉ၊ တူၼ်ႈၶဝ်ႈလိူင်ၶွမ်ႈ မဵတ်ႉၶဝ်ႈဢွၼ်ႇၵေႃႈလိူင်ၸိူင်းငိူၼ်း ဢၢႆႁွမ်ၶဝ်ႈၼၼ်ႉၵေႃႈ ထၢၼ်ႈပေႃးႁွမ်ႁူၺ်းႁူၺ်း တူၺ်းၵႂႃႇတၢင်းလႂ်ၵေႃႈ ပေႉၵႅၼ်ႇမႃးၸိုၼ်ႈပၢင်ႇတႃ တၢင်းႁၢင်ႈလီဢွၼ်ႇထုင်ႉႁႆႈၶဝ်ႈႁဝ်း။
ယၵ်ႉယဵမ်ႈဢိမ်ႇယဝ်ႉ ၶဵဝ်းဢွၼ်ႇဢၼ်ၼဵပ်းယူႇၼႂ်းပႅမ်းၼၼ်ႉၵေႃႈ ပၢတ်ႇၵႂၢတ်ႇဢဝ်ၵေႃၶဝ်ႈ ၵမ်ယဝ်ႉၵမ်မတ်ႉတၢင်ႇသႂ်ႇတၢင်ႇသႂ်ႇၼိူဝ်တေႃၽိူင်း၊ တူၼ်ႈၶဝ်ႈၼႂ်းႁႆႈၼၼ်ႉၵေႃႈ ႁၢင်ႈပေႃးပၢတ်ႇၵဵင်ႈလိူမ်ႈလူင်ၵႂႃႇ ၵမ်းလွႆးလွႆးယဝ်ႉ၊ ၵေႃၶဝ်ႈတမ်းတၢင်ႇၼိူဝ်တေႃ ပဵၼ်တုမ်းပဵၼ်တၢမ်း ၶပ်ႉယႆၵၼ်တူဝ်ႈၸႅၼ်ႇႁႆႈယဝ်ႉ မဵတ်ႉၶဝ်ႈဢွၼ်ႇလိူင်လိူင်ၼၼ်ႉၵေႃႈ မၢၵ်ႇမိူဝ်ယူႇၼႂ်းသၢတ်ႇ ၽိူင်းလူင်ၼၼ်ႉၵေႃႈ ၵွင်သၢင်ႉၶိုၼ်ႈသၢင်ႉၶိုၼ်ႈ ၵွင်ၶဝ်ႈလူင်ၼၼ်ႉၵေႃႈ တိူဝ်းမႃးၼမ်မႃး သမ်ႉပေႃးတၼ်းၵႂႃႇမီးယူႇၼႂ်းထူင်ၸၢၼ်ႈယဝ်ႉၼႃႇ။ ဢဝ်ၶဝ်ႈသႂ်ႇထူင်တၢင်ႇၸႅၼ်ႇၶပ်ႉယႆသႂ်ႇၼိူဝ်ၵႃး တေႃႉတၢင်ႇမိူဝ်းၵႂႃႇတၢင်းႁိူၼ်းယဝ်ႉ။
ၵူၺ်းၵႃႈ ႁႆႈဢွၼ်ႇႁဝ်းတႄႉ ငဝ်ယဝ်ႉဢိူဝ်ႈ၊ ပိူၼ်ႈမိူဝ်းပႅတ်ႈမၼ်းၵႂႃႇ ၵိုတ်းၵႅၼ်ႇတေႃၽိူင်းဢွၼ်ႇ ပုတ်းပုတ်းပၢတ်းပၢတ်း ယူႇၸွမ်းပိုၼ်ႉလိၼ်မိူင်းၼၼ်ႉၵူၺ်းယဝ်ႉယိုင် မီးယူႇမၼ်းၵူၺ်း ဢမ်ႇမီးၵူၼ်းတူၺ်းၵူၼ်းလူယဝ်ႉ ငဝ်ယူႇႁိုဝ် ဢမ်ႇၼၼ်တေယဵၼ်ႁူယဵၼ်ၸႂ်ယူႇႁိုဝ် ဢမ်ႇမီးၽႂ်ႁူႉၸွမ်းယဝ်ႉ။
မၢႆတွင်း ၽွင်းၶၢဝ်းပၢတ်ႇၶဝ်ႈ
24/10/2023
တႅမ်ႈ − ငဝ်မွင်မိုတ်းမူဝ်း
