မိူဝ်ႈလႂ်ၸႂ်လမ်ယူႇ ႁႂ်ႈၼင်ႈၼိမ်ၼိမ်သေ ဝူၼ်ႉတူၺ်းၶိုၼ်းဝႃႈ ၶၢဝ်းယၢမ်းဢၼ်ၵိုတ်းလိူဝ်ယူႇၼႆႉ မီးထႅင်ႈလၢႆဝၼ်းၵူၺ်းလႄႈ ၵွပ်ႈသင်ႁဝ်းသမ်ႉတေလႆႈၵႂႃႇသုမ်းၶၢဝ်းယၢမ်းၸွမ်းလွင်ႈဢမ်ႇပဵၼ်လွင်ႈၸိူင်ႉၼႆ ယႃႇဢဝ်ဝၼ်းမႂ်ႇတိုၵ်ႉတႄႇၵူၺ်းၼၼ်ႉ ႁႂ်ႈပဵၼ်ဢၼ်ၸႂ်ဢမ်ႇလီလႄႈ။
ဢမ်ႇမီးၽႂ်ထုၵ်ႇၽႂ်ၽိတ်း ၵူႈလွင်ႈပဵၼ်မႃးလႆႈသင်ဝူၼ်ႉတူၺ်းလီလီၸိုင် တေထူပ်းဝႃႈ မီးထုၵ်ႇၸႂ်လႄႈဢမ်ႇထုၵ်ႇၸႂ် သင်ထုၵ်ႇၸႂ် ၶဝ်တူၺ်းၸိူင်ႉႁိုဝ်ၵေႃႈတိုၼ်းဝႃႈဢမ်ႇၽိတ်း၊ သင်ဢမ်ႇထုၵ်ႇၸႂ် သမ်ႉဝႃႈႁဵတ်းထုၵ်ႇမႅၼ်ႈတၢၼ်ႇႁိုဝ်ၵေႃႈ တိုၼ်းဝႃႈမၼ်းၽိတ်း ၵွပ်ႈၼၼ် ယႃႇၵႂႃႇၵဵပ်းဢဝ်မႃးဝူၼ်ႉ ယွၼ်ႉဢမ်ႇမီးၽႂ်ဢဝ်ၸႂ်ၽႂ်လႆႈၵူႈၵေႃႉ။
မိူဝ်ႈလႂ်သုၵ်ႉၸႂ်မႃး သုတ်ႇလူမ်းၵတ်းလူမ်းယဵၼ်သေ ဝူၼ်ႉတူၺ်းဝႃႈ ၶၢဝ်းယၢမ်းဢၼ်ပူၼ်ႉၵႂႃႇတိၵ်းတိၵ်းၼၼ်ႉ မၼ်းႁဵတ်းႁႂ်ႈၶၢဝ်းယၢမ်းဢၼ်ႁဝ်းတိုၵ်ႉမီးယူႇ ယွမ်းလူင်းၵႂႃႇတိၵ်းတိၵ်းယဝ်ႉ။
ဢၼ်လႆႈႁူပ်ႉၼႃႈၵၼ်ယူႇမိူဝ်ႈၼႆႉၼၼ်ႉ ၶႂ်ႈဝႃႈ ႁဝ်းဢမ်ႇမီးတိုဝ်ႉတၢင်းတေလႆႈထူပ်းၵၼ်ထႅင်ႈပွၵ်ႈၼိုင်ႈယဝ်ႉ ႁဝ်းတေၵုမ်ႇထဵင်ၵၼ်လွင်ႈဢမ်ႇၸႂ်ႈလွင်ႈယူႇၼၼ်ႉႁဵတ်းသင်။
မိူဝ်ႈလႂ်ထုၵ်ႇပိူၼ်ႈပေႉပုၼ်ႈယူႇၼၼ်ႉ ၸၢမ်းပွႆႇဝၢင်းတူၺ်းၽွင်ႈ လၢတ်ႈၼမ်ၵေႃႈသုမ်းဢူၺ်းၵေႃႉ ဝူၼ်ႉလဵၵ်ႉဝူၼ်ႉဢေႇၼႃႇၵေႃႈသုမ်းၶၢဝ်းယၢမ်း ယိုဝ်ႈယူဝ်းဝႆႉလႄႈ မိူဝ်ႈႁဝ်းၵႂႃႇလႂ်ၼၼ်ႉ တေဢမ်ႇလႆႈမီးၽႂ်လၢတ်ႈလွင်ႈဢမ်ႇလီၽၢႆႇလင် မွၵ်ႈၼႆႉၵူၺ်းၵေႃႈပဵင်းပေႃး ႁႂ်ႈၵတ်းယဵၼ်ၸႂ်လႆႈယဝ်ႉ။
ပၼ်ႁႃလၢႆလွင်ႈဢၼ်လႆၶဝ်ႈမႃး မၼ်းမႃးတုမ်ႉတွပ်ႇႁဝ်းလႆႈၸူဝ်ႈၵႅပ်ႉၵမ်းၵူၺ်း ၵမ်ႉၵေႃႈတေပူၼ်ႉၵႂႃႇသေ တုၵ်ႉၶဝ်ႈမႃးၵမ်ႉၼိုင်ႈယဝ်ႉပူၼ်ႉၵႂႃႇ သိူဝ်းၶဝ်ႈမႃးၵႅပ်ႉၼိုင်ႈယဝ်ႉပူၼ်ႉသေ မၼ်းတေပူၼ်ႉၵႂႃႇၵူၺ်း။
မိူဝ်ႈမီးၵူၼ်းၵေႃႉဢၼ်ႁဵတ်းႁႂ်ႈႁဝ်းတိူဝ်ႉၸႂ် ပွႆႇႁႂ်ႈမၼ်းပဵၼ်ၵႂႃႇၸွမ်းၼင်ႇဢၼ်ထုၵ်ႇလီပဵၼ်ၼၼ်ႉလႄႈ ဝူၼ်ႉတူၺ်းၶိုၼ်းဝႃႈ ၸၢတ်ႈပၢၼ်ၼႆႉ ဢမ်ႇမီးၽႂ်ယူႇထိုင်ႁဵင်ပီႊလႆႈ ၵူၼ်းဢၼ်မီးၸိုဝ်ႈသဵင်၊ ၵူၼ်းမၢၵ်ႈမီးလီပဵၼ်၊ ၵူၼ်းႁၵ်ႉၵၼ်ၼႃႇၼႃႇ လိုၼ်းသုတ်းမႃးၵေႃႈ ပဵၼ်ၶႅၵ်ႇဢၼ်မႃးယူႇၼႂ်းၶူင်းၵၢင်ၼႆႉသေ ၽၢတ်ႇၵႂႃႇပႅတ်ႈၵူၺ်း။
မိူဝ်ႈလႂ်ႁဝ်းႁူႉဝႃႈ ပိူၼ်ႈမႃးဢဝ်ၶွင်ႁဝ်းၵႂႃႇ ႁႂ်ႈဝူၼ်ႉတူၺ်းလီလီဝႃႈ ဢမ်ႇမီးၽႂ် ၵုမ်းၵမ်လွင်ႈဢၼ်မီးယူႇၼႂ်းၶူင်းၵၢင်ၼႆႉ လႆႈတႃႇသေႇလႄႈ ဢမ်ႇမီးၽႂ်ပဵၼ်ၸဝ်ႈၶွင်သင်လႆႈတေႉတေႉ တေႃႈၼင်ႇတူဝ်ၶိင်းႁဝ်းၵူၺ်းၵေႃႈ တင်းလႆႈဢၢပ်ႈပၼ်ၶိုၼ်းသၽႃႇဝၵႂႃႇ။
ႁဝ်းဢမ်ႇၸၢင်ႈမၢၵ်ႈမီးမိူၼ်ၼင်ႇသထေးလူင်မီးငိုၼ်းၼမ်လႆႈ ၵူၺ်းၵႃႈ ႁဝ်းမီးတၢင်းသိူဝ်းယူႇငၢႆႈလူမ်ၸႂ် ဢၼ်သထေးလူင်ၶဝ်ၶႂ်ႈလႆႈၼၼ်ႉၵေႃႈပဵၼ်လႆႈယူႇ မီးပၢႆးယူႇလီၵႅၼ်ႇၶႅင် လိူဝ်သေၵူၼ်းဢၼ်လႆႈၼွၼ်းယူႇၼႂ်းႁူင်းယႃၵူၺ်းၵေႃႈ လႆႈဝႃႈၵၢမ်ႇလီၼႃႇယဝ်ႉ။
တၢင်းသိူဝ်းလဵၵ်ႉလဵၵ်ႉဢွၼ်ႇ ဢၼ်ႁဝ်းတူၺ်းပူၼ်ႉၵႂႃႇပႅတ်ႈ မိူဝ်ႈႁဝ်းယင်းတိုၵ်ႉၵိၼ်ၶဝ်ႈလႆႈ၊ ယင်းတိုၵ်ႉၼွၼ်းလပ်းလီ၊ ယင်းမီးႁိူၼ်းႁႂ်ႈသေႃႉႁူမ်ႈ၊ ယင်းမီးသိူဝ်ႈၶူဝ်းၼုင်ႈသႂ်ႇ၊ ယင်းတိုၵ်ႉလႄႇလႆႈ၊ မီးၵေႃႉႁၵ်ႉယူႇႁိမ်းၸမ်၊ ယင်းတိုၵ်ႉဢၢၼ်ႇၶေႃႈၵႂၢမ်းပိူၼ်ႈသူင်ႇမႃးပၼ်လႆႈ၊ ယင်းတိုၵ်ႉလူလိၵ်ႈႁူဝ်ၼႆႉလႆႈယူႇၼႆ လႆႈဝႃႈၵၢမ်ႇလီလိူဝ်သေၵူၼ်းလၢႆလၢႆၵေႃႉတႄႉတႄႉယဝ်ႉ။
ပိၼ်ႇ-ငဝ်မွင်မိုတ်းမူဝ်း
