သဵင်ၾူၼ်းမေႃးမႃး မိူဝ်ႈၸမ်တေၼွၼ်း ဢမ်ႇၸႂ်ႈၽႂ်ၼင်ႇၵွၼ်ႇ ၽူဝ်ႁၵ်ႉဢွၼ်ႇဢေးၸိင်ႇ
“ႁလူဝ်သူ…”
“သူ..ၼွၼ်းယဝ်ႉႁႃႉ”
“ဢိုမ်ႈ..သူလူး”
“ၼွၼ်းဢမ်ႇလပ်း..ပေႃးဢမ်ႇလႆႈလၢတ်ႈတေႃႇသူ”
ဢေးၸိင်ႇတႄႉယုမ်ႉပၼ်ၶဵဝ်ႈပေႃးဢမ်ႇတုပ်ႇလႆႈယဝ်ႉ။ ၽူဝ်မၼ်းပီႈဢွင်ႇၼၼ်ႉၵေႃႈ လၢတ်ႈထႅင်ႈ
“ႁဝ်းၸႂ်ထိုင်သူ..”
“ႁဝ်းၵေႃႈမိူၼ်ၵၼ်…ၸဵဝ်းမႃးၼႃႈ”
“ၶႂ်ႈမိူဝ်းၼႃႇယဝ်ႉ..တေမိူဝ်းမိူဝ်ႈလဵဝ်ၼႆႉယဝ်ႉဝႃႈ”
“မႃးလႆႈတေႉႁႃႉ..”
“တေႁဵတ်းႁိုဝ်လႆႈလႃႇသူၵေႃႈ ၵၢၼ်ႁဝ်းတင်းပႆႇယဝ်ႉလူး…”
ယၵ်ႉတူၺ်းၼႃႈၾူၼ်းႁင်းၽႂ်မၼ်းသေ ပီႈဢွင်ႇၵေႃႈဝႃႈ “ႁၵ်ႉၼႃႈ”
“ႁၵ်ႉဢေႃႈ”
“ႁၵ်ႉတေႉႁႃႉ”
“တေႉတေႉဢေႃႈ”
“ႁွမ်ဢိတ်ႉလူး”
ဢေးၸိင်ႇၼၼ်ႉတႄႉသဵင်ၸုပ်ႇၾူၼ်းပေႃးမေႃးၸွတ်ႉၸွတ်ႉယဝ်ႉၼႃႇ သဵင်ၶႃဢုပ်ႇၵၼ်ၼၼ်ႉ ပေႃးတၢၼ်ႇဢမ်ႇမီးၵူၼ်းယဝ်ႉ၊ ၽူဝ်မၼ်းဢမ်ႇယူႇ ႁွင်ႉၶႃႈမႃးၼွၼ်းႁဵတ်းၵေႃႉမၼ်းသေ ဢုပ်ႇၵၼ်ပေႃးဢမ်ႇဢၢၼ်းၼႃႇၵၼ်သေဢိတ်းတေႉႁေႉ။
ၽူဝ်ဢေးၸိင်ႇပဵၼ်ၵူၼ်းသိုၵ်း ႁိုင်ႁိုင်ၼိုင်ႈပွၵ်ႈၸင်ႇလႆႈမႃးယူႇႁိူၼ်း၊ ၶႃႈသမ်ႉပဵၼ်ဢူၺ်းၵေႃႉမၼ်း ဢေးၶွင်ႇ မႄးႁဝ်းတႄႉတၢင်ႇပၼ်ၶႃႈဝႃႈ ၶမ်းၶွင်ႇၼႆဝႃႇ၊ ပဵၼ်ၵူၼ်းၶႂ်ႈယွင်ႇယႅင်ႇဝႆႉလႄႈ ၼၢၼ်းလႆႈၽူဝ်ဢိတ်ႉၼိုင်ႈ၊ ဢူၺ်းၵေႃႉၶႃႈတႄႉတႄႇၼႃႈႁိူၼ်းပႅတ်ႈမူတ်းယဝ်ႉ။
ဢေးၸိင်ႇၵေႃႈ လႆႈၽူဝ်ၵူၼ်းသိုၵ်းၼႆ သမ်ႉၶႂ်ႈပဵၼ်ၵူၼ်းမီးၸၼ်ႉဝႆႉလႄႈ တိုၵ်ႉၸင်ႇႁႃဢဝ်ၵၼ်ၵူၺ်း သမ်ႉပေႃးႁဵတ်းပၼ်ႁိူၼ်းသေ ပၼ်ၵႃးသေလမ်းၼိုင်ႈ တေႉဢမ်ႇတေႉ ၶႃႈၶီႈၵေႉတႄႉဢမ်ႇၸႂ်ႈ ၵူဝ်မၼ်းၵႂႃႇပဵၼ်ၵေႃႉၼွႆႉပၢႆလိုၼ်းပိူၼ်ႈၼၼ်ႉၼေႈ ၶႃႈလွမ်မႆႈၸႂ်ဝႆႉယူႇ။
