တင်းမၼ်းသမ်ႉသိုဝ်ႈလႂ်သိုဝ်ႈၼၼ်ႉၵူၺ်း ဢူႈမႄႈၵေႃႈသမ်ႉဢမ်ႇမီးၽႂ်သေၵေႃႉယဝ်ႉလႄႈ ဝၢႆးသေမႄႈမၼ်းသဵင်ႈပႅတ်ႈပီၵၢႆ မၼ်းၵေႃႈယူႇၵူၺ်းမၼ်းသေ ၶႃႈၵေႃႈမိူဝ်းယူႇပဵၼ်ၵေႃႉမၼ်းယဝ်ႉ။
မိူဝ်ႈႁူဝ်ႁိုဝ်ႉၼႆႉ ၸုမ်းသိုၵ်းဢၼ်မီးပီႈဢွင်ႇၼၼ်ႉ မႃးထင်ပွတ်းႁဝ်းၼႆႉလႄႈ ၶဝ်ၵေႃႈ ၵႆႉၸူဝ်းၵၼ်မႃးလႄႇၼႂ်းဝဵင်းသေ ဢေးၸိင်ႇသမ်ႉႁဵတ်းၵၢၼ်ၸွမ်းသႅင်ႇပႃႈယုင်ႈၶဝ် မၼ်းၺႃးၵၼ်လီၼႃႇယဝ်ႉ ၽႂ်ႁၼ်ၵေႃႈၶႂ်ႈယွၵ်ႇၶႂ်ႈၵဝ်းယဝ်ႉၼႃႇ၊ ၵူၼ်းၵျိူၵ်ႈမၼ်းၵေႃႈၼမ်ယူႇၵဝ်ႇ ၶွင်သၢဝ်လိူင်ႇၵေႃႈ ဢမ်ႇပေႉၵူၼ်းၸၢႆးၼမ်လႆႈလူး ၽွင်းၼၼ်ႉ လုၵ်ႈဢွၼ်ႇၸင်ႇၸၶိုၼ်ႈပၢၼ်သိၵ်းႁိၵ်းၼႆႉၵေႃႈ လႆႈၽူဝ်ၵႂႃႇလၢႆၵေႃႉယဝ်ႉၵဝ်ႇ၊ လိူၵ်ႈလိူၵ်ႈမၼ်းၵေႃႈသမ်ႉမႃးလၢတ်ႈၶႃႈဝႃႈ ၵျိူၵ်ႈပီႈဢွင်ႇၼႆယဝ်ႉယိုင်၊ ႁိုင်ႁိုင်မႃး ၵႂႃႇလႂ်ၵေႃႈဢမ်ႇႁွင်ႉၶႃႈယဝ်ႉ မီးပီႈဢွင်ႇယူႇ ၼႆတိၵ်းတိၵ်းယဝ်ႉ။
တူၺ်းႁၼ်ၶႃတွႆးၵၼ်ၼႃႇလႄႈ ၵူၼ်းထဝ်ႈၵူၼ်းၵႄႇၼႂ်းဝၢၼ်ႈၵေႃႈၶတ်းႁူၶတ်းတႃဝႆႉႁိုဝ်ဢမ်ႇႁူႉ တင်းဢေးၸိင်ႇသမ်ႉ ဢမ်ႇမီးဢူႈမႄႈယဝ်ႉလႄႈ ႁွင်ႉၶႃဢုပ်ႇသေ ဢဝ်ႁဵတ်းၶႅၵ်ႇပၼ်ၵႂႃႇ ဢေးၸိင်ႇၵေႃႈလႆႈၽူဝ်ႁေယဝ်ႉ။
ၽွင်းၼၼ်ႉမႄႈထဝ်ႈႁဝ်းဢမ်ႇယူႇလီ ၶႃႈၵေႃႈလႆႈမိူဝ်းယူႇၸွမ်းမႄႈထဝ်ႈႁဝ်းတၢင်ႇဝဵင်း၊ ႁိုင်ယူႇသွင်လိူၼ် ၶႃႈမႃးၶိုၼ်းၵေႃႈၸုမ်းသိုၵ်းၶဝ်ၼၼ်ႉဢမ်ႇယူႇယဝ်ႉ၊ ၵူၺ်း လႆႈႁၼ်ႁိူၼ်းမႂ်ႇ လႄႈ ၵႃးမႂ်ႇဢၼ်ႁေႃႈၶဝ်ႈမႃးယူႇၼႂ်းဝၢင်းႁိူၼ်းႁဝ်းၼၼ်ႉသေ
“မႃးၶိုၼ်းယဝ်ႉႁဢေးၶွင်ႇ”
“ၵႃးၽႂ်လႃႇၼႆႉ..”
“ၵႃးၵဝ်ဢိူဝ်ႈလေႃႇ..”
“ၽူဝ်မႂ်းသိုဝ်ႉပၼ်ၵႃႈ..”
“ၸႂ်ႈၽႅဝ်ဢိူဝ်ႈ မၼ်းတင်းႁဵတ်းပၼ်ႁိူၼ်းမႂ်ႇႁေဢိူဝ်ႈမႂ်းႁူႉ”
“ႁဵတ်းၼၼ်ႁႃႉ”
ၶႃႈၵေႃႈဢမ်ႇပေႃးၶႂ်ႈလၢတ်ႈသင်ၼမ်လႄႈ သၼ်လင်တႄႉၶိုၼ်ႈမႃးပဵၼ်ၵမ်းယဝ်ႉ။
တေဝႃႈႁိုဝ်ၵေႃႈ ၶႃႈၵေႃႈပဵၼ်လုၵ်ႈမႄႈၼွႆႉၵူၺ်းလူး ဢူႈတေႉတေႉၶႃႈ ပဵၼ်သိုၵ်းလႄႈ မႃးဢဝ်မႄႈႁဝ်းမိူဝ်ႈၶဝ်မႃးထင်တီႈဝၢၼ်ႈသေ ဢူႈထဝ်ႈႁဝ်းၵေႃႈသမ်ႉယွင်ႇသိုၵ်းဝႆႉႁိုဝ်ဢမ်ႇႁူႉ တင်းမႄႈ
ထဝ်ႈႁဝ်းပေႃးလႆႈပႅတ်ႈၵၼ် ၵွပ်ႈပၼ်ႁႂ်ႈမႄႈႁဝ်းဢဝ်ပေႃႈႁဝ်းၼႆၼၼ်ႉၼႃႇ။
ပေႃးၶႃႈမိူဝ်းတီႈႁိူၼ်းၼႆဝႃႈႁင်းၶႃႈ ယႃႇဢဝ်ၽူဝ်သိုၵ်းၼ ၶႆႈၶိူဝ်းမႄႈႁဝ်းတင်းဢူႈႁဝ်းသေႇသေႇ။
ဝၢႆးသေဢဝ်ၵၼ်ယဝ်ႉ မႄႈႁဝ်းၵေႃႈပႃးၶႃႈမႃးသေ ဢူႈႁဝ်းၼၼ်ႉၵေႃႈ ၶၢႆႉတီႈယူႇပႅတ်ႈ ပႅတ်ႈလုၵ်ႈပႅတ်ႈမေးၵႂႃႇ ဝၢႆးသေၵိူတ်ႇၶႃႈလႆႈ ႁူၵ်းလိူၼ်ၼႆႉ မႄႈႁဝ်းၵႂႃႇၸွမ်းၶႆႈသေ ၵႂႃႇႁၼ်လုၵ်ႈမေးလူင်မၼ်း ပေႃးၵေႃႉယႂ်ႇၼႃႇယဝ်ႉ၊ မႄႈႁဝ်းၵေႃႈၵႂႃႇယွၼ်းပႅတ်ႈမၼ်းဢိူဝ်ႈ မၼ်းသမ်ႉဢမ်ႇၶႂ်ႈပႅတ်ႈ၊ မႄႈႁဝ်းလႄႈတင်းမေးလူင်ၵေႃႈ လၢတ်ႈႁႂ်ႈမၼ်းလိူၵ်ႈဢိူဝ်ႈ မၼ်းၵေႃႈဢမ်ႇယွမ်းပႅတ်ႈၽႂ်သေၵေႃႉ မႄႈႁဝ်းၵေႃႈ တင်ႈၸႂ်ဢဝ်ၽူဝ်ထႅင်ႈ ၵေႃႉဢၼ်မႃးပဵၼ်ဢူႈသိုပ်ႇၶႃႈၼႆႉၼႃႇ။ ဢူႈတေႉၶႃႈၵေႃႈ ၵႃႈလႆႈပႅတ်ႈႁေယဝ်ႉ။
ဢူႈသိုပ်ႇၶႃႈၼႆႉသမ်ႉ ပဵၼ်ဢူၺ်းၵေႃႉမႄႈႁဝ်းၵူၺ်းၵွၼ်ႇ ၶႃႈတႄႉဝႃႈမၼ်းပဵၼ်ဢူႈတေႉၶႃႈၵွၼ်ႇယဝ်ႉ ၸဵမ်မိူဝ်ႈၶႃႈၵိူတ်ႇ မၼ်းၵေႃႉၵႂႃႇသူင်ႇမႄႈႁဝ်းတီႈႁူင်းယႃႁေ မိူဝ်ႈၶႃႈ
တိုၵ်ႉလႅင်ၼႃႇမၼ်းၵေႃႉလုမ်းလႃးၶႃႈၵူၺ်းၼႃႇ မႄႈႁဝ်းတင်းဢမ်ႇမေႃႁွပ်ႇၵွၼ်ႇလႃႈ၊ ၽဵဝ်ႈၶီႈၽဵဝ်ႈယဵဝ်ႈၵေႃႈပဵၼ်မၼ်းၵူၺ်း ။
ဝၢႆးသေၶႃႈလႆႈသွင်ၶူပ်ႇ မႄႈႁဝ်းၵေႃႈမီးၼွင်ႉသေ မႄႈထဝ်ႈႁဝ်းၸင်ႇလႆႈဢဝ်ၶႃႈမိူဝ်းလဵင်ႉယဝ်ႉ။
လၢတ်ႈၶိူဝ်းသိုၵ်းမိူဝ်ႈလႂ် ၶႃႈၸၢၼ်ႈတႃႇသေႇယဝ်ႉ မိူဝ်ႈလႂ်ၶဝ်မႃးတၵ်ႉ တင်းဢမ်ႇၶႂ်ႈယၵ်ႉတေႃႇၼႃႈၶဝ်ၵွၼ်ႇလႃႈ၊ ၵူၺ်းၵႃႈ ဢူၺ်းၵေႃႉၶႃႈၵမ်ႈၼမ်သမ်ႉ လႆႈၽူဝ်သိုၵ်းလၢႆလၢႆယဝ်ႉ။
တီႈႁဝ်းယူႇၼႆႉသမ်ႉ ပဵၼ်ၼႃႈတီႈသိုၵ်းၵုမ်းၵမ်ဝႆႉလႄႈ ပေႃးပဵၼ်မၢဝ်ႇၼုမ်ႇႁၢတ်ႈႁၢႆးၼႆ သမ်ႉပေႃးၵႂႃႇႁဵတ်းသိုၵ်းယဝ်ႉၼႃႇ၊ ဢူၺ်းၵေႃႉၶႃႈၸိူဝ်းၵႂႃႇႁဵတ်းသိုၵ်းၵေႃႈမီးၼမ်ၼႃႇ။
မၢင်ၵေႃႉပေႃးမီးမေးယဝ်ႉ ပေႃးၵႂႃႇႁဵတ်းသိုၵ်းသေ ၽၢတ်ႇႁိူၼ်းၽၢတ်ႇယေးၵႂႃႇယဝ်ႉၼႆတႄႉ ႁဵတ်းပေႃးတၢၼ်ႇမၢဝ်ႇဢွၼ်ႇယဝ်ႉ၊ ပေႃးဢမ်ႇမီးငိုၼ်းမီးတွင်းၵူၺ်းၼေႈ ၸင်ႇဢုပ်ႇလၢတ်ႈမႃးႁႃတၢင်းႁိူၼ်း။
ပဵၼ်သိုၵ်းၼႆႉပိူၼ်ႈႁဵတ်းၵၢၼ်မၢၵ်ႈမီးၸိူင်ႉႁိုဝ်ဢမ်ႇႁူႉ ၸႃႉမီးၵေႃႈမီးတေႉ ၸႃႉဢမ်ႇမီးၵေႃႈသမ်ႉပေႃးလႆႈယွၼ်းတီႈၼိုင်ႈတၢင်းၼိုင်ႈ ယွၼ်းပေႃႈမႄႈပီႈၼွင်ႉတၢင်းၼွင်ႈတၢင်းလင်၊ ပႃးလူၺ်ႈၸၼ်ႉထၢၼ်ႈ ဢွင်ႈတီႈမၼ်းႁိုဝ်တေႃႈ။
