ၼၢင်းသိုဝ်ႉလူႇၵေႃႈ ဝၢႆးသေၵိူတ်ႇလုၵ်ႈယဝ်ႉ လဵင်ႉလုၵ်ႈလုမ်းလႃးၵၼ်ၵႂႃႇ၊ ၵေႃႉယႂ်ႇပွႆႇယူႇႁူင်းႁဵၼ်းယဝ်ႉသမ်ႉ ၵိုတ်းၵေႃႉလဵၵ်ႉထႅင်ႈၼၼ်ႉယိုင်။ ၵေႃႉလဵၵ်ႉၼႆႉၵေႃႈ ၵိူတ်ႇမႃးပႃးတၢင်းပဵၼ်ၶူမ်း ထႅင်ႈသေဢမ်ႇၵႃး ဝၢႆးသေၵိူတ်ႇလုၵ်ႈၵေႃႉၼႆႉယဝ်ႉ ၼင်ႇႁၢင်ႈ လိူတ်ႈလူမ်းၵေႃႈ ပေႉမႃးဢမ်ႇမိူၼ်ၵဝ်ႇယဝ်ႉ ယိပ်းၼမ်ႉၾူၼ်ၵူၺ်းၵေႃႈ ပဵၼ်ၵူၼ်ႉပဵၼ်ၶိုၼ်ႈ ၵႆႉဢမ်ႇယူႇလီတႄႉတႄႉ။
ၸဝ်ႈပိုၼ်းႁၢၼ်ၼႆၵေႃႈ ဢမ်ႇပေႃးသူႈလႆႈယူႇႁိူၼ်း၊ ယူႇႁိူၼ်းၼိုင်ႈဝူင်ႈ ၵႂႃႇၶိုၼ်းသွင်ဝူင်ႈယဝ်ႉ။ ပီၼႆႉ မီးမၼ်းၵူၺ်းယဝ်ႉလႄႈ လုၵ်ႈၼွင်ႉမၼ်းဢၢႆႈလႅင်ၼႆၵေႃႈ ၶၢႆႉၵၢၼ်ၵႂႃႇပႅတ်ႈထႅင်ႈတၢင်ႇတီႈသေ ဢမ်ႇမီးၵူၼ်းၸွႆႈၵူၼ်းတူၺ်းသင်ယဝ်ႉၼႃႇ။
ႁဵတ်းႁႆႈၼႆၵေႃႈ သမ်ႉၵႆသေ လႆႈၵႂႃႇၼွၼ်းပႆႉဢဝ်ယဝ်ႉ၊ ပေႃးလူဝ်ႇႁုင်လဝ်ႈတင်ႈလဝ်ႈၼႆ ၸွင်ႇၵွႆႈမႃးတီႈႁိူၼ်း။ ပေႃးဝႃႈ မႃးႁိူၼ်းၼိုင်ႈပွၵ်ႈၼႆၵေႃႈ လုၵ်ႈယိင်းဢွၼ်ႇမၼ်းၼၼ်ႉတႄႉ ၸူမ်းၼႃႇ ၼွၼ်းၶူတ်းသႂ်ႇပေႃႈၶဝ်တိၵ်းတိၵ်းယဝ်ႉ။ ပေႃႈၶဝ်ၵႂႃႇလႂ်ၵေႃႈ ၵႆႉၼႃႇလႅၼ်ႈလမ်းၸွမ်းၵူၼ်းပေႃႈၶဝ်ယူႇတႃႇသေႇ။
ပေႃႈၶဝ်ၵႂႃႇတင်ႈလဝ်ႈၼႆၵေႃႈ လႅၼ်ႈလူင်လူင်းၵႂႃႇၸွမ်း ပေႃႈၶဝ်ၼၼ်ႉသမ်ႉ ၶႃယၢဝ်းပႆဝႆးၼႃႇလႄႈ ပေႃးမၼ်းဢမ်ႇၶိုတ်းသမ်ႉ ႁွင်ႉ
“ပေႃႈ! ပေႃႈ!!”
“ႁိူဝ်!!” မီးယူႇၵႆၵႆပုၼ်ႉႁွင်ႉၸူးၶိုၼ်း။
“ပႂ်ႉလုၵ်ႈဢႄႈ”
“မႃးလူၺ်ႈ!!”
ၵမ်ႉၵေႃႈသဵင်ႁႆႈမၼ်းဢွၵ်ႇယဝ်ႉ ပေႃႈၶဝ် မႃးၸူးမၼ်းသေ ႁၼ်ၼႃႈပေႃႈၶဝ်ယဝ်ႉၵေႃႈ ၵိုတ်းၵႂႃႇ။
“မႃးလႄႈ..” ၼႆၵေႃႈပႆႇလူင်း ပေႃးပေႃႈၶဝ်ၵႂႃႇပႅတ်ႈသမ်ႉ ႁႆႈၸွမ်းလင် ႁဵတ်းၼၼ်တိၵ်းတိၵ်း သမ်ႉပေႃးလႆႈဢဝ်မၼ်းၶီႇလင်သေ လူင်းၵႂႃႇယဝ်ႉၼႃႇ။
ႁဵတ်းၵၢၼ်ပဵၼ်လုၵ်ႈၼွင်ႉပိူၼ်ႈၼႆႉ ပိူၼ်ႈသင်ႇၸိူင်ႉႁိုဝ်ၵေႃႈ ၵႃႈလႆႈႁဵတ်းၸိူင်ႉၼၼ်ၵူၺ်းယဝ်ႉ။ ပိူၼ်ႈသင်ႇႁႂ်ႈၵႂႃႇၵေႃႈ ၵႃႈလႆႈၵႂႃႇဢိူဝ်ႈ။ ဢမ်ႇလိူဝ်လႆႈၶေႃႈၸိသင်ႇသေလႄႈ ၵွပ်ႈပိူဝ်ႈ တေႁဵတ်းတပ်ႉမႂ်ႇသေ လူဝ်ႇၵူၼ်းၵုမ်းႁဵတ်းၼႆၵေႃႈ မၼ်းၵေႃႈ လႆႈၽၢတ်ႇယၢၼ်ႁိူၼ်းသေ ၵႂႃႇယဝ်ႉ။
သမ်ႉဝႃႈ ပဵၼ်ၵူၼ်းလူင်ၼႆသေတႃႉ ဢမ်ႇမီးလူတ်ႉမီးၵႃး ၵႂႃႇတၢင်းလႂ်ၵေႃႈ ပႆလိၼ်ဢဝ်လၢႆလၢႆယဝ်ႉ။ မိူဝ်ႈပုၼ်ႈၽွၼ်းတူၵ်းထိုင်မႃး မၼ်းၵေႃႈယၢၼ်ႁိူၼ်းယၢၼ်ယေး ယၢၼ်လုၵ်ႈယၢၼ်မေးသေ ဢွၼ်ဢဝ်ႁႅင်းၵူၼ်း မွၵ်ႈသၢမ်သိပ်းၼႆႉ လတ်းထိူၼ်ႇလတ်းပႃႇလတ်းႁူၺ်ႈလတ်းလွႆ ၶိုၼ်ႈလွႆလူင်းႁူၺ်ႈၵႂႃႇ လႄႇယဵမ်ႈတူၺ်းၸွမ်းပၢၼ်းတၢပ်ႈလွႆ ႁိူဝ်ႇလႆၶႆးယွႆႉဝၼ်းမိူဝ်ႈၼႆႉၼၼ်ႉ ယင်းဢမ်ႇပႆႇတၢၼ်ႇ ၶၢဝ်းတၢင်းဢၼ်လတ်းၶၢမ်ႈၶူင်းမႃး ဝၼ်းပုၼ်ႉလႄႈ မၼ်းၵေႃႈၸဵၼ်ႇႁႅင်းသေ ႁွတ်ႈထိုင်ၵႂႃႇ ဢွင်ႈတီႈၶဝ်တေႁဵတ်းတပ်ႉၼၼ်ႉယဝ်ႉ။
တေလႆႈယူႇႁိုင်လႄႈ ဢွၼ်ၸတ်းၵူၼ်းႁဵတ်းသုမ်ႉႁဵတ်းသွင်း ႁဵတ်းတီႈယူႇတီႈသဝ်းလီလီသေ ပဵၼ်မႃးသုမ်ႉမုင်းၶႃး တမ်းယႆၸႅၼ်ႇယူႇၼိူဝ်ၵွင်းလွႆၼၼ်ႉယဝ်ႉ။ ၵွပ်ႈပဵၼ်ၼႂ်းထိူၼ်ႇၼႂ်းပႃႇလႄႈ မႆႉလိူင်ႇၶႃးၼမ် ဢမ်ႇလႆႈႁႃယၢပ်ႇႁႃၵႆ ၵူၼ်းၼမ်ၸွႆႈၵၼ်ၵေႃႈ ၸဵဝ်းယဝ်ႉၸဵဝ်းတူဝ်ႈလီယဝ်ႉ။
ပေႃးဝႃႈႁဵတ်းသုမ်ႉယဝ်ႉ သိုပ်ႇႁဵတ်းၸွမ်းၽႅၼ်ၵၢၼ်ၶဝ်ၵႂႃႇ မၢင်ၸိူဝ်းတီႇၽဵဝ်ႈ မၢင်ၸိူဝ်းၶုတ်းလိၼ် မၢင်ၸိူဝ်းႁႃမႆႉလိူဝ်ႈမႆႉ၊ တီႈလႂ်လူဝ်ႇၵူၼ်းၼမ် တီႈလႂ်ၸမ်ပဵၼ် ၼႆၵေႃႈ ၸတ်းၵၢၼ်ၵႂႃႇ။ ပေႃးဝႃႈလိူဝ်ႈမႆႉလႆႈယဝ်ႉၼႆ တႃႇတေတေႃႉမႃးၼၼ်ႉၵေႃႈ ႁႅင်းၵူၼ်းတင်းမူတ်းၼၼ်ႉ ဝၢင်းဝႆႉသေ ၸွႆႈၵၼ်တေႃႉမႅၵ်ႇႁၢမ် ၶိုၼ်ႈလွႆလူင်းႁူၺ်ႈၵႂႃႇယဝ်ႉ။
“ၵဝ်ဝႃႈ ၵူၼ်းလိူဝ်ႈမႆႉၼႆႉယႃႇၵႂႃႇႁႃၵႆလူးဢေႉ မၼ်းလႆႈႁၢမ်ၵႆၼႃႇဢိူဝ်ႈ”
“ၸဝ်ႈႁဝ်းၵႂႃႇလိူၵ်ႈပၼ်ဢိူဝ်ႈၼၼ်ႉ ၸူးၸႂ်ႁဝ်းတႄႉႁိုဝ်ၶႆႈၵႂႃႇၵႆၼႄႇ”
ႁၢမ်မႆႉတင်းဝၼ်း ယဝ်ႉတုမ်လဵဝ် သမ်ႉပေႃးႁိူဝ်ႉၼႃႇယဝ်ႉလႄႈ ၸဝ်ႈပိုၼ်းႁၢၼ် ႁၼ်လုၵ်ႈၼွင်ႉမၼ်းပွင်ႉယူႇၸိူင်ႉၼၼ်ၵေႃႈ ဢမ်ႇၸၢင်ႈႁဵတ်းႁိုဝ် ၵႃႈတေလႆႈႁႃလၢႆးတၢင်းမၼ်းထႅင်ႈၵူၺ်းယဝ်ႉ။
ၽွင်းၼႆႉသမ်ႉ ပဵၼ်ၽွင်းႁူင်းၽိုၵ်းသွၼ်ၶဝ် ၽွၼ်ႉသွၼ်ၵၢၼ်လႄႈ ၵႆႉလႆႈလႄႇႁႃမႅၵ်ႇမႆႉမႅၵ်ႇတုမ်ၸိူဝ်းၼႆႉသေ ပေႃးဝႃႈလိူဝ်ႈယဝ်ႉမူတ်းၼႆၵေႃႈ ၸင်ႇယွၼ်းႁႅင်းၵူၼ်းႁႂ်ႈပိူၼ်ႈမႃးၸွႆႈၶဝ်ၵႂႃႇယူႇ။
ၵွပ်ႈပဵၼ်ၵူၼ်းႁဵတ်းႁႆႈႁဵတ်းသူၼ်ၵူၺ်းလႄႈ ယူႇတီႈလႂ်ၵေႃႈ ၽုၵ်ႇၽၵ်းၽုၵ်ႇယိူဝ်ႈ ႁဵတ်းသူၼ်ၵႂႃႇတီႈၼၼ်ႈယဝ်ႉ။
ၵူၼ်းသိုၵ်းၶဝ်ၵေႃႈ ပေႃးဝႃႈထိုင်ၶၢဝ်းယၢမ်းလိုဝ်ႈၵၢၼ်ယဝ်ႉ ဢွၼ်ၵၼ်ၵႂႃႇႁႃလႄႇထိူၼ်ႇလႄႇၶိူဝ်း ယိုဝ်းၵႂၢင်ယိုဝ်းၽၢၼ်း ယိုဝ်းၼူၵ်ႉယိုဝ်းၼႆႇယိုဝ်းၸွၼ်ႈ။ မၢင်ၸိူဝ်းၵေႃႈ ၵႂႃႇႁႃပူႁႃပႃၸွမ်းႁွင်ႈၼမ်ႉၸိူဝ်းၼႆႉယူႇ။ ပေႃးလႆႈမႃးၼႆၵေႃႈ ဢွၼ်ၵၼ်မႃးႁဵတ်းၵိၼ်ႁုင်ၵိၼ်လဵင်ႉၵၼ်။ လႆႈဢၼ်လီဢၼ်ဝၢၼ်မၼ်းၵေႃႈ ဢမ်ႇလိုမ်းလဵင်ႉႁူဝ်ၼႃႈၶဝ် တင်ႈၸႂ်သေၽႄမႃးပၼ်ယူႇ။
“ႁဝ်းလႆႈယိူင်းမႃး ဢဝ်မႃးပၼ်ၸဝ်ႈႁဝ်းဢိူဝ်ႈ”
“ၵိၼ်ႁင်းသူလႄႈ”
“မီးၼမ်ၼႃႇၶႃႈၸဝ်ႈႁဝ်း” ဢဝ်ဝႆႉပၼ်တီႈၼိူဝ်ႁၢၼ်ႉၼၼ်ႉသေ “ၸွင်ႇၸဝ်ႈႁဝ်းမီးမၢၵ်ႇၽိတ်ႉၶႃႈႁိုဝ်”
“မီးၼႂ်းသူၼ်ၼၼ်ႉ ၵႂႃႇတူၺ်းဢဝ်လႄႈ”
မၢၵ်ႇၽိတ်ႉဢွၼ်ႇၼႂ်းသူၼ်ၼၼ်ႉ မီးယူႇသီႇႁႃႈတူၼ်ႈ မၢၵ်ႇမၼ်းပူင်းယူႇၵေႃႈ ၵူၼ်းၵိၼ်မၼ်းၼမ်ပူၼ်ႉယဝ်ႉလႄႈ သမ်ႉပေႃးဢမ်ႇၶႂ်ႈၶိုတ်းၵၼ်ယဝ်ႉ။
ယွၼ်ႉပိူဝ်ႈမၼ်းလပ်းသိင်ႇၼႃႇယဝ်ႉ ဢၢႆႈၸိင်ႇတႃႇၼၼ်ႉၵေႃႈ ဢဝ်တင်းၾႆးထၢတ်ႈ ထွင်ႇလႅမ်းၸွမ်းတူၼ်ႈမၢၵ်ႇၽိတ်ႉၼၼ်ႉသေ ပိတ်းယူႇႁင်းမၼ်း။ ၵမ်ႉၵေႃႈ ၾႆးလႅင်းလူင်မိူဝ်းၵႂႃႇ တၢင်းသွင်ႇၾႆးၶဝ်ၼၼ်ႉယဝ်ႉၼႃႇ။
ႁူဝ်ၼႃႈလႄႈလုၵ်ႈၼွင်ႉၼၼ်ႉ ပေႃးႁူဝ်ၼႃႈလီတေႃႇၶဝ် ပဵၼ်တီႈပိုင်ႈဢိင်ၶဝ် ပဵၼ်တီႈၸႂ်ယႂ်ႇလႄႈၸွႆႈထႅမ်ၶဝ်လႆႈၵေႃႈ ၶဝ်ၵေႃႈ မေႃႁူမ်ၸူမ်းႁၵ်ႉႁူဝ်ၼႃႈၶဝ်ၶိုၼ်း၊ ၶဝ်မီးသင်ၵေႃႈၶႂ်ႈယိုၼ်ႈၶႂ်ႈမႅင်ႇယဝ်ႉ ပေႃးဝႃႈၶဝ်ဢမ်ႇမီးသင်ၼႆၵေႃႈ တေမႃးပိုင်ႈဢိင်ႁူဝ်ၼႃႈၶဝ် ၼၼ်ႉပဵၼ်သၽႃႇဝ ႁူဝ်ၼႃႈလႄႈလုၵ်ႈၼွင်ႉ ဢၼ်ၸဝ်ႈပိုၼ်းႁၢၼ် ပဵၼ်ယူႇၼၼ်ႉယဝ်ႉ။
မၢင်ပွၵ်ႈပေႃးမိူဝ်းလႄႇၼႆၵေႃႈ ၶွင်သိုဝ်ႉၶွင်ၶၢႆ ယွၼ်းၵိၼ်လဝ်ႈႁေ လႆႈလဵင်ႉလၢႆၵေႃႈမီးယဝ်ႉ။ မၢင်ပွၵ်ႈၵေႃႈ တီႈႁိူၼ်းၼၼ်ႉ ပဵၼ်တီႈၵိၼ်ၶဝ်ႈၶဝ်ၵေႃႈဝႃႈ မိူဝ်းႁဵတ်းၵိၼ်ႁဵတ်းယႅမ်ႉႁေ။ မၢင်ၵေႃႉၵေႃႈ တၢင်းယၢမ်ႈသမ်ႉၸပ်းၶၢၼ်ႉဝႆႉ ပေႃးၵိၼ်ယဝ်ႉဢမ်ႇၵဵပ်းဢမ်ႇၽဵဝ်ႈဢမ်ႇသိမ်း ပွႆႇဝႆႉပၼ်ပိူၼ်ႈၵဵပ်းလၢင်ႉႁဵတ်းၼၼ် ၼၢင်းသိုဝ်ႉလူႇတႄႉ ၵႆႉၵႆႉပွင်ႇယူႇတႃႇသေႇယဝ်ႉ။
ၵူၼ်းၼႆႉပေႃးဝႃႈမိုတ်ႈၵၼ်ၼႆ မီးႁူဝ်ၼႃႈၶဝ်ႁိုဝ်ဢမ်ႇမီးႁိုဝ်ၵေႃႈ တိုၼ်းမိူဝ်းယဝ်ႉ၊ ပေႃးၺႃးၸဝ်ႈပိုၼ်းႁၢၼ်တႄႉၵေႃႈ တေၸႂ်ႉၶဝ်ႁဵတ်းၵမ်းလဵဝ် ပေႃးၺႃးၼၢင်းသိုဝ်ႉလူႇၵေႃႈပွင်ႉၶဝ်ယဝ်ႉ။ မၢင်ပွၵ်ႈသမ်ႉ ၵႆႉမိူဝ်းၺႃးလုၵ်ႈဢွၼ်ႇယူႇႁိူၼ်းၵူၺ်းလႄႈ မႃးၵိၼ်ယဝ်ႉသေ မေႃႈဝၢၼ်ႇၵေႃႈဢမ်ႇလၢင်ႉ လုၵ်ႈဢွၼ်ႇသမ်ႉ ၺႃးၵႂၢမ်းလႃႇတၢင်းလင်မၼ်းၵေႃႈမီးၼၼ်ႉၼႃႇ။

