ယၢမ်းၵၢင်ၶမ်ႈ သဵင်ယဵၼ်ယဵၼ် ယိင်းသႅင်ၵေႃႈဢဝ်တၢင်းၶူဝ်းမၼ်းမႃးႁႅၼ်းယဝ်ႉ။ ၶမ်းႁွမ်လႆႈႁၼ်သေ
“သူတေၵႂႃႇလႂ်လႃႇ…”
“ဢေႃ…မိူဝ်ႈၸဝ်ႉ…ႁူဝ်ၼႃႈမႃးလၢတ်ႈႁႂ်ႈႁဝ်းၵႂႃႇသိုပ်ႇႁဵၼ်းထႅင်ႈၼႆဝႃႇ…ႁဝ်းၵေႃႈသူၼ်ၸႂ်သေ…လႆႈတူၵ်းလူင်းၸွမ်းလႄႈ…မၼ်းၵေႃႈႁႂ်ႈႁဝ်းမႃးႁႅၼ်းၶူဝ်းပႂ်ႉထႃႈၼၼ်ႉယိုင်…”
“ၶဝ်မႃးတီႈၼႆႈသေႁႃႉ…ႁဝ်းဢမ်ႇလႆႈႁၼ်ၶဝ်လႃႇ”
ယိင်းသႅင်ယၵ်ႉတူၺ်းၶမ်းႁွမ်သေ “သူသွင်ၵေႃႉမီးလွင်ႈႁင်ၵၼ်လႃႇ”
“ၸၢင်ႈၵႂႃႇမီးလွင်ႈသင်…”
“ဢေႃႈၶႃႈ…လီယုမ်ႇၼႃႇၶႃႈ”
“ႁဝ်းပၼ်ႁႅင်းယူႇၼႃႈ…ၶတ်းၸႂ်လႄႈ…တႃႇတေမီးတိုဝ်ႉတၢင်းၸိူင်ႉၼႆၼႆႉဢမ်ႇငၢႆႈငၢႆႈ…”
“မႃးႁႃလၢႆႈၵႂၢမ်းယူႇ…ဢမ်ႇသေလၢႆၵၼ်သေဢိတ်းႁႃႉ…”
“ႁဝ်းတေသေလၢႆႁဵတ်းသင်…မၼ်းပဵၼ်တိုဝ်ႉတၢင်းလီတွၼ်ႈတႃႇသူၵမ်းလဵဝ်…ႁဝ်းယိုင်ႈၶႅၼ်းပၼ်ႁႅင်းၼမ်ၼမ်ၵမ်းလဵဝ်ၼၼ်ႉယဝ်ႉ…တႃႇတေမီးတိုဝ်ႉတၢင်းသေလႆႈၵႂႃႇႁဵၼ်းၸိူင်ႉၼႆ…ဢမ်ႇလႃႈလီႈမီးလူး…မိူဝ်ႈမီးတိုဝ်ႉတၢင်းၼၼ်ႉ…ၶတ်းၸႂ်ဝၵ်ႉတၢဝ်းဢဝ်လႄႈ…ယိုင်ႈလႆႈႁဵၼ်းႁူႉၼမ်ၵႃႈႁိုဝ်…ယိုင်ႈတူဝ်ထူပ်းၼမ်ၵႃႈႁိုဝ်…မၼ်းတေမႃးၽိူမ်ႉထႅမ်ပၼ်ၼမ်ႉၵတ်ႉႁဝ်းမွၵ်ႈၼၼ်ႉယဝ်ႉ…ႁဵၼ်းၵႂႃႇယဝ်ႉၵေႃႈ…ယႃလိုမ်းဢဝ်မႃးၸႂ်ႉတိုဝ်းႁႂ်ႈပဵၼ်ၽွၼ်းလီၶိုၼ်းၼင်ႇၵဝ်ႇၼႃႈ…”
“ဢေႃႈၶႃႈ…မေႃသွၼ်ႁဝ်း…တႃႉသေဝႃႈၵူၼ်းႁူႉၸႂ်ၵၼ်…ၸိုင်ပေႉမေႃလၢတ်ႈမိူၼ်ၵၼ်ၼေႃ…ႁဝ်းၵႂႃႇယဝ်ႉ…ပေႃးတေတေႇၼႃႈႁိူၼ်းၼႆၵေႃႈ…ယႃႇလိုမ်းတူၵ်ႇလၢတ်ႈမွၵ်ႇၼႄၵၼ်ၽွင်ႈၼႃႈ…”
“ယူဝ်ပဵၼ်သူၵူၺ်းယင်းဢမ်ႇႁူႉ…ၸူဝ်ႈၶၢဝ်းၶိဝ်းၼႆႉ…မိူၼ်ၵႆႉႁၼ်မေႃယႃၸၢႆးၶိူဝ်းၵႆႉမႃးႁဵတ်းၵၢၼ်ဝႆႉၼေႈ…”
“ယႃႇလႃႈလီႈလၢတ်ႈၼႃႇလႄႈ…ႁဝ်းၵေႃႈပေႃးတေၵႂႃႇယဝ်ႉ…ယူဝ်ၶဝ်တေဢဝ်မေးပႅတ်ႈႁဝ်းယင်းဢမ်ႇႁူႉ…”
“လၢတ်ႈမႃးၸိူင်ႉၼႆ…ၶႂ်ႈဝႃႈမီးၸႂ်ယူႇၽွင်ႈၸွင်ႇၸႂ်ႈႁိုဝ်…”
“ယူႇတီႈသူဝူၼ်ႉ…ႁဝ်းဢမ်ႇလၢတ်ႈတေႃႇသူယဝ်ႉ…”
ယၢမ်းၵၢင်ၼႂ်တႃဝၼ်းၵေႃႈဢွၵ်ႇ မွၵ်ႇၵုမ်ႈၵေႃႈပၢင်ႇ သဵင်ၼူၵ်ႉသဵင်ၼူဢူၼ်ၼၼ်ႈမေႃးပၼ်း သဵင်ၵႃးလင်မေႃးမႃးၵိုတ်းယူႇတီႈၼႃႈႁိူၼ်း။ ၸၢႆးၶိူဝ်းတင်းလႅင်းမိူင်းၵေႃႈ ဢွၼ်ၵၼ်ၶဝ်ႈႁိူၼ်းမိူဝ်းၵႂႃႇ။ သမ်ႉမႅၼ်ႈမိူဝ်ႈၶမ်းႁွမ်တေၵႂႃႇႁူင်းႁဵၼ်းလႄႈ
“မႃးႁွတ်ႈၸဵမ်ၸဝ်ႉၶႃႈလူး…” ပႃးဢဝ်ၶူဝ်းၶွင်မၼ်းသေ ဢွၵ်ႇၽၵ်းတူၵႂႃႇ။ ၵူၺ်းၵႃႈ မိူဝ်ႈလႆႈငိၼ်းဝႃႈ
“ႁႅၼ်းၶူဝ်းယဝ်ႉယဝ်ႉႁႃႉ…သူတေလႆႈဢွၵ်ႇၶၢဝ်းတၢင်းၵႂႃႇမိူဝ်ႈၼႆႉယဝ်ႉ…ၸၢႆးၶိူဝ်းတေမိူဝ်းသူင်ႇသူ…ႁႂ်ႈႁွတ်ႈၼႂ်းဝဵင်းၵူၺ်း…” ဢဝ်ၶမ်းႁွမ်သမ်ႉပေႃးၵိုတ်းလူင်ၵႂႃႇယူႇ။
“ပဵၼ်သင်ပေႉဝႆးၼႃႇလႃႇ!…” ၸင်ႇၵႂႃႇၵွတ်ႇဢဝ်ယိင်းသႅင်ယူႇ။
“ႁဝ်းတေလႆႈၵႂႃႇယဝ်ႉ…ၶမ်းႁွမ်…လုမ်းလႃးတူၺ်းထိုင်တူဝ်လႄႈႁူဝ်ၸႂ်လီလီၼႃႈ…ယႃႇပေႁဵတ်းၵၢၼ်ၼမ်ထိုင်တီႈပေႃးလိုမ်းၵိၼ်ၶဝ်ႈၼႃႈ…”
“ဢိုမ်ႈ!…သူၵေႃႈလုမ်းလႃးတူဝ်လီလီၼႃႈ…”
“ဢိုမ်ႈ!…ႁူဝ်ၼႃႈ…ၶႃႈၽၢၵ်ႇၶမ်းႁွမ်…ၸွႆႈတူၺ်းထိုင်ပၼ်ၶဝ်ၽွင်ႈ…ယႃႇပေပၼ်ႁႂ်ႈၶဝ်ငဝ်လႄႈယူႇၵေႃႉလဵဝ်ၼႃႈ…”
“ဢိုမ်ႈ…တမ်းၸႂ်လႆႈယူႇ…”
ယိင်းသႅင်ၵေႃႈ ဢဝ်တင်းၶူဝ်းယဝ်ႉ ၶီႇလူတ်ႉယုၵ်ႉမိုဝ်းသူင်ႇသင်ႇမွၼ်းမွၼ်းၵႂႃႇလွႆလွႆးယဝ်ႉ။
ဝၢႆးသေယိင်းသႅင်ပွၵ်ႈမိူဝ်းၵႂႃႇ ၵိုတ်းၶမ်းႁွမ်လႄႈလႅင်းမိူင်းသွင်ၵေႃႉၵူၺ်း ယၵ်ႉတူၺ်းၼႃႈ ၵၼ်ယူႇၵႅပ်ႈၼိုင်ႈသေ
“လႃႈယဝ်ႉ…ပေႃးသူဢမ်ႇမီးလွင်ႈသင်ၵေႃႈ…ႁဝ်းၵႂႃႇၵွၼ်ႇၼႃႈ…”
“ႁဝ်း…လင်ႁဝ်းၸဵပ်းတေႉယဝ်ႉ…ဢမ်ႇမီးၵူၼ်းမႃးလၢင်ႉၸဵပ်းပၼ်…”
“ပႂ်ႉႁဝ်းဝႆႉလႄႈ…လႃႈႁႅင်းၼႃႇယဝ်ႉႁဝ်းတေဢမ်ႇတၼ်းယဝ်ႉမိူဝ်ႈလဵဝ်…ၵမ်ႉႁဝ်းၸင်ႇမႃးၶိုၼ်း…”
ၶမ်းႁွမ်ၵေႃႈႁိပ်ႈၼႅတ်ႈလူင်ၵႂႃႇႁူင်းႁဵၼ်းယူႇ မိူဝ်ႈၼႆႉတူၵ်းလိုၼ်းလႄႈ ဢမ်ႇတၼ်းၶိုတ်းလုၵ်ႈႁဵၼ်းၶဝ်ႈထႅဝ် တၼ်းလႆႈၶဝ်ႈႁွင်ႈႁဵၼ်းၵူၺ်း။ ၶမ်းႁွမ်ၵေႃႈ သွၼ်လိၵ်ႈႁေတူၺ်းလုၵ်ႈႁဵၼ်းႁေ သမ်ႉပေႃးတၼ်းမီးၵႂႃႇ ၶၢဝ်းလိုဝ်ႈၵိၼ်ၶဝ်ႈယဝ်ႉ မၼ်းၵေႃႈလိုဝ်ႈသေ တင်းၼေႃႇမိူင်းဢွၼ်ၵၼ်မႃးတီႈႁိူၼ်းၶိုၼ်းယဝ်ႉ။
ၵူၺ်းၵႃႈ တိုၵ်ႉႁၼ်လႅင်းမိူင်းၼင်ႈပႂ်ႉယူႇလႄႈ
“သူ…ယင်းတိုၵ်ႉပႂ်ႉယူႇႁႃႉ…”
“တေၸၢင်ႈႁဵတ်းႁိုဝ်…ၵူၼ်းမၢတ်ႇၸဵပ်းလူး…” ၶမ်းႁွမ်ၵေႃႈႁိုဝ်ၸၢင်ႈတၵ်းသဵင်သင်ၸွမ်းယဝ်ႉ။
“မီးလႂ်လႃႇႁႂ်ႈႁဝ်းလၢင်ႉပၼ်ၸဵပ်းၼႆ…”
“ၵိၼ်ၶဝ်ႈၵွၼ်ႇလႄႈ…ႁဝ်းလၢင်ႉၶႅမ်ႉလႅပ်ႈယဝ်ႉ…”
“ႁဵတ်းၸိူင်ႉႁိုဝ်လႃႇ…လၢင်ႉႁင်းၵူၺ်းတႄႉဢမ်ႇလႆႈၼင်ႇၵဝ်ႇယူဝ်ႉ…”
“ၸၢႆးၶိူဝ်းလၢင်ႉပၼ်သေမႃး…ႁဝ်းႁူႉဝႃႈမိူဝ်ႈၼႆႉသူဢမ်ႇတၼ်းၼႆ…ဢမ်ႇႁတ်းယႃႉၶၢဝ်းယၢမ်းမေႃသွၼ်ၵႃႈႁိုဝ်ၼင်ႇၵဝ်ႇ…”
“ဢမ်ႇလႆႈယႃႉၶၢဝ်းယၢမ်းတေႉဢိူဝ်ႈၼေႃႈ…” ၶမ်းႁွမ်ဝႆႉၼႃႈတူႇသႂ်ႇမၼ်းၵႂႃႇ။
“ႁဝ်းဢမ်ႇတင်ႈၸႂ်…ႁဝ်းၼွမ်းၽိတ်းတေႉယဝ်ႉ…ႁဝ်းတေဢမ်ႇႁဵတ်းၸိူင်ႉၼႆထႅင်ႈယဝ်ႉၶႃႈ…ဢၼ်ႁဝ်းလႆႈမႃးသွၵ်ႈသွင်ႇၾႆးသူၸိူင်ႉၼႆ…”
ၵႂႃႇၽုၺ်ႇတူၺ်းမေႃႈၽၵ်းဢၼ်တိုၵ်ႉတင်ႈဝႆႉယူႇတီႈသွင်ႇၾႆးၼၼ်ႉသေ
“ႁိုမ်!..ႁဵတ်းၶဝ်ႈၽၵ်းလႆႈယူႇႁႃႉ”
“ဢမ်ႇလႆႈယဝ်ႉမိူဝ်ႈလဵဝ်တႄႉ…ၸဵပ်းတေႉဢိူဝ်ႈ”
“ၵႂႃႇၼင်ႈပႂ်ႉၶႃႈလႄႈ…ႁဝ်းတေၵွၼ်ႉလႂ်..”ႁူႉယူႇလႅင်းမိူင်းဝႃႈဢဝ်ၵူၺ်း ၵူၺ်းၵႃႈၶမ်းႁွမ်ၵေႃႈ တင်ႈၸႂ်သူၼ်ၸႂ်ၸွမ်းၵႂၢမ်းမၼ်းၼၼ်ႉသေ ယိပ်းဢဝ်ဝၢၼ်ႇယဝ်ႉ ဝၢႆႇယၵ်ႉတူၺ်းၼေႃႇမိူင်း “ၼေႃႇမိူင်းမႃးတေႃႉၸွႆႈလႄႈလုၵ်ႈ” ၼေႃႇမိူင်းၵေႃႈမႃးယိပ်းဢဝ်ဝၢၼ်ႇသေတေႃႉၸွႆႈၶမ်းႁွမ်ၵႂႃႇ လႅင်းမိူင်းတႄႉၵေႃႈ ၼင်ႈတူၺ်းသေယုမ်ႉယူႇ။
ၶဝ်သၢမ်ၵေႃႉၵေႃႈ လႆႈၵိၼ်ၶဝ်ႈၵုမ်းၵၼ်ၵႂႃႇ ၼင်ႇပဵၼ်ၼႃႈႁိူၼ်းမူၼ်းဢၼ်ၼိုင်ႈၼၼ်ႉယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
