ၸၢႆးသၢႆၶိူဝ်းတႄႉ ဢမ်ႇဝူၼ်ႉၶဝ်ႈၸႂ်ၸွမ်းလွင်ႈသင် ၵုမ်ႇၶတ်း ၸႂ်ၵူမ်ႈၼႃႈႁဵတ်းသူၼ်ၽၵ်းလႄႈ လုမ်းလႃးမူမၼ်းသေ ပဵၼ်သုၵ်ႉပဵၼ် သၵ်ႉယူႇႁင်းမၼ်း ပေႃးဢမ်ႇပဵၼ်ယူႇပဵၼ်သဝ်းယဝ်ႉ။ ၽွင်းၼႂ်းဝႃႇ ၸိူင်ႉၼႆ ပေႃးပႅတ်ႇၶမ်ႈလပ်းမူၼ်းမႃးၵေႃႈ ၵႂႃႇႁပ်ႉၵႂႃႇသူင်ႇပႃႈၶဝ်ၵႂႃႇ ၵမ်သိၼ်ၼွၼ်းၵျွင်း ၵူႈသိၼ်ၵူႈသိၼ်လႄႈသိၼ်ၼႃႈၼႆႉ တေပဵၼ် လိူၼ်သိပ်းဢဵတ်းမူၼ်း တေဢွၵ်ႇဝႃႇယဝ်ႉလႄႈ ၼႂ်ၼႆႉပႃႈသူၺ်ႇၼူႉ လုၵ်ႉမႃးတၢင်ႇသွမ်းၽြႃး မိူၼ်ၼင်ႇၵူႈၼႂ်ၼၼ်ႉသေ
“ၸေႃးယဵၼ်ႇဢိူၺ်ႉ”
ၼၢင်းၸေႃးယဵၼ်ႇၼႅတ်ႈၶဝ်ႈႁိူၼ်းမႃးသေ “ဝႃႈႁိုဝ်ၶႃႈပႃႈ..”
“ၵႂႃႇႁွင်ႉဢၢႆႈလုၵ်ႈမႃးၵမ်ႉၼိုင်ႈလူး”
“ဢေႃႈၶႃႈ” ၼၢင်းၸေႃးယဵၼ်ႇမႃးၸူး ၸၢႆးသၢႆၶိူဝ်းတီႈၶွၵ်ႈမူၼႆႉသေ “ပီႈသၢႆၶိူဝ်းၶႃႈ ပႃႈႁွင်ႉဢေႃႈ” မၼ်းၸၢႆးၼႅတ်ႈၶဝ်ႈႁိူၼ်းမႃးသေ “ဝႃႈ ႁိုဝ်ၶႃႈပႃႈ”
“ဢိူဝ်ႈ ၸေႃးယဵၼ်ႇၵေႃႈမႃးၵမ်ႉၼိုင်ႈလႄႈ” ၼၢင်းၸေႃးယဵၼ်ႇမႃး ၼင်ႈယဝ်ႉ ပႃႈသူၺ်ႇၼူႉယၵ်ႉတူၺ်းၶဝ်တင်းသွင်ၵေႃႉသေ
“ဢၼ်မႄႈႁွင်ႉၶိူဝ်မႃးၼႆႉ မႄႈဝႃႈ သိၼ်ဢွၵ်ႇဝႃႈတေမႃးၼႆႉ မႄႈၶႂ်ႈ ႁႅၼ်းလူႇ သတ်ႉထႃႇၵူၼ်းထဝ်ႈၼႆဢိူဝ်ႈ ၶိူဝ်သွင်ၵေႃႉတေဝႃႈႁိုဝ် ဝၢႆး ပေႃႈလုင်းသူတၢႆၼႆႉ မႄႈပႆႇလႆႈႁႅၼ်းလူႇ ႁႅၼ်းတၢၼ်းသေပွၵ်ႈၼႆဢိူဝ်ႈ ”
ၸၢႆးသၢႆၶိူဝ်းၵေႃႉၼိုင်ႈတႄႉ မိူဝ်ႈလႆႈႁူႉလွင်ႈတၢင်းမၼ်းယဝ်ႉၵေႃႈ သူႉ.. ထူၺ်ႈၸႂ်လူမ်သေယဝ်ႉ “ဢေႃႈလီၶႃႈဢေႃႈပႃႈ လႆႈဢေႃႈ”
ၼၢင်းၸေႃးယဵၼ်ႇၵေႃႈဝႃႈ “လီၶႃႈဢေႃႈ ႁဝ်းၶႃႈၶႅၼ်းၸူမ်းဢေႃႈ ပႃႈ ဢွၼ်ႁဝ်းႁႅၼ်းလူႇႁႅၼ်းတၢၼ်းၸိူင်ႉၼႆ”
ဢွၼ်ၵၼ်ႁၢင်ႈႁႅၼ်းႁဵတ်းပွႆးသတ်ႉထႃႇၼႆသေ ပဵၼ်ဢၼ်ၶႅမ်ႉလႅပ်ႈဝႆႉ တႄႉꧦယဝ်ႉ။
ထႅင်ႈၼင်ႇဝၼ်းၼိုင်ႈ ၸၢႆးသၢႆၶိူဝ်းလႄႈၼၢင်းၸေႃးယဵၼ်ႇၼင်ႈၵိၼ်ၶဝ်ႈႁူမ်ႈမူႇၵၼ်ယူႇလႄႈ
“မိူဝ်ႈဝၼ်းပႃႈႁွင်ႉႁဝ်းသွင်ၵေႃႉၼၼ်ႉ ပီႈသၢႆၶိူဝ်း ထူၺ်ႈၸႂ်လူင်ႁဵတ်း သင်ၶႃႈလႃႇၼၼ်ႉ ၼႃႈတႃၵေႃႈပေႃးဢမ်ႇလီသေဢိတ်း”
“ဢေႃ ဝၼ်းၼၼ်ႉႁႃႉ ၵိုတ်းထၢင်ႇဝႃႈပႃႈၵႂႃႇငိၼ်းၵႂၢမ်းဢမ်ႇလီၼွၵ်ႈ ႁိူၼ်းမႃးသေ ဢၢင်ႈမႃးၸႅတ်ႈထၢမ်ႁႃးသွင်ၵေႃႉၼႆၵႂႃႈ”
“ၶွင်သမ်ႉႁွင်ႉႁဝ်းတင်းသွင်ၵေႃႉလႄႇၼေႃႈ”
“ၼၼ်ႉယဝ်ႉဝႃႈ”
“သင်ပႃႈသမ်ႉဝႃႈမိူၼ်ပီႈသၢႆၶိူဝ်းဝႃႈၼၼ်ႉၶႃႈလူး ပီႈသၢႆၶိူဝ်းတေဝႃႈႁိုဝ် လႃႇ”
“ၶႃႈၵေႃႈတေဝႃႈ ဢမ်ႇၸႂ်ႈၶႃႈၼႆၵူၺ်းဢေႃႈ ၶွင်ႁဝ်းၵေႃႈယူႇၽႂ်ယူႇ မၼ်းၵူၺ်းလူး”
“ၼၼ်ႉယဝ်ႉဝႃႈ ၵူၺ်းၵႃႈ ပေႃးပႃႈသမ်ႉဢမ်ႇယုမ်ႇသေ ၼေးဝႃႈတိုၼ်း ၸႂ်ႈတေႉၼၼ်ႉယဝ်ႉ ပေႃးဢမ်ႇၸႂ်ႈတေႉပိူၼ်ႈဢမ်ႇလၢတ်ႈၼႆၶႃႈလူး”
“ၶႃႈတႄႉၵွပ်ႈဢမ်ႇၶႂ်ႈတွပ်ႇၶႂ်ႈထဵင်ပႃႈ ၵူဝ်ပႃႈပဵၼ်ၸႂ်ဢမ်ႇလီလႄႈ တေ လၢတ်ႈၶေႃႈလဵဝ်ၵူၺ်းသႃႈ ဢမ်ႇၸႂ်ႈၼႆသေ ပႂ်ႉထွမ်ႇၶေႃႈသင်ႇဢဝ် ၵူၺ်းယဝ်ႉဝႃႈ ပေႃးၼၼ်ၼၢင်းၸေႃးယဵၼ်ႇသမ်ႉဝူၼ်ႉဝႃႈၸိူင်ႉႁိုဝ်လႃႇ ၼႃႈပေႃးဢမ်ႇလီသေဢိတ်းၼင်ႇၵဝ်ႇလူး”
“ၶႃႈတႄႉၵူဝ်ပႃႈဝႃႈ ပေႃးဢွၵ်ႇဝႃႇယဝ်ႉၼႆ ပႃႈတေၸတ်းပၢင်ၶႅၵ်ႇၶိူဝ် ႁႂ်ႈလႆႈၵူပ်ႉၵူႈၵၼ်ၼႃႈ ၼႆၵူၺ်းၼေႈ ၶႃႈပေႃးသၼ်ႇၵႂႃႇသဵင်ႈယဝ်ႉဝႃႈ”
“သင်ပႃႈသမ်ႉဝႃႈၼၼ်ႉတေႉလူး ၼၢင်းၸေႃးယဵၼ်ႇတေဝႃႈႁိုဝ်ၼၼ်ႉ ”
“ဢူး..လူဝ်ႇၵိၼ်ငူၼ်ႉ(ယႃဝိူဝ်ႇ) တၢႆၵူၺ်းယဝ်ႉဝႃႈၶႃႈတႄႉ”
“ႁႂ်း.. ၵူဝ်လႆႈႁဵတ်းပၢင်ၶႅၵ်ႇၸွမ်းၵၼ်ၼႆသေ တေၶၢမ်ႇၵိၼ်ငူၼ်ႉတၢႆ ၵွၼ်ႇႁႃႉ ဢႃႉၼေႃၼေႃ” ငွၵ်းႁူဝ်မၼ်းယူႇငိုၵ်းငိုၵ်းယဝ်ႉ ယုမ်ႉဢမ်ႇ ပႃးၼႃႈသေ ဢွၵ်ႇၵႂႃႇလၢင်ႉဝၢၼ်ႇၶဝ်ႈမၼ်းယူႇ။
ၼၢင်းၸေႃးယဵၼ်ႇထၢင်ႇဝႃႈ ၸၢႆးၶိူဝ်းတိူဝ်ႉၸႂ်ၵႂႃႇယဝ်ႉၼႆသေ
“ဢမ်ႇၸႂ်ႈၸိူင်ႉၼၼ်ၶႃႈၼႃ ပီႈသၢႆၶိူဝ်းယႃႇၽူမ်ႈ ၶဝ်ႈၸႂ်ၽိတ်းၸိူင်ႉ ၼၼ် မႃးၶႃႈသပ်းလႅင်းၼေပီႈသၢႆၶိူဝ်း”
“လႆႈယဝ်ႉသႃႈ ဢမ်ႇသပ်းလႅင်းၵေႃႈ ၶႃႈပွင်ႇၸႂ်လီယူႇ” ၼႆသေယုမ်ႉ လူင်ဢွၵ်ႇၵႂႃႇယဝ်ႉ။
“ၵမ်ႉမႃးၶႃႈတေႁွင်ႉႁႆႈႁႅင်းႁႅင်းႁေယဝ်ႉဝႃႈ” ၶဝ်ႈမၼ်းၵေႃႈဢမ်ႇသိုပ်ႇၵိၼ်လႆႈထႅင်ႈယဝ်ႉ တီႈတေႉမၼ်းတႄႉၵေႃႉ ဢၼ်ပဵၼ်ၸႂ်ဢမ်ႇလီ ဢၼ်တိူဝ်ႉၸႂ်ၼၼ်ႉ ပဵၼ်မၼ်းၼၢင်းၼၼ်ႉ ယဝ်ႉ။
တီႈႁိူၼ်းၸၢမ်ၶမ်းၶဝ်ၼႆႉသမ်ႉ “ပီႈၶမ်းလိုၼ်း ၼွင်ႉၵေႃႈၶႂ်ႈ မေႃတတ်းၶူဝ်းဢေႃႈ သွၼ်ပၼ်ၼွင်ႉၽွင်ႈလေႃႇ”
“ပေႃးၶႂ်ႈမေႃတႄႉလႆႈၼႃႇ ၶွင်ဝၼ်းၼၼ်ႉၼွင်ႉဝႃႈၼွင်ႉၶၢၼ်ႉ ၼွင်ႉ ဢမ်ႇၸႂ်ယၢဝ်းလႆႈၼႆလူး မိူဝ်ႈလဵဝ်သမ်ႉ ဢၼ်လႂ်ၵေႃႈၶႂ်ႈမေႃ ႁၢင်ႈႁႅၼ်း ဝႆႉတႃႇပဵၼ်မႄႈၸဝ်ႈႁိူၼ်းယဝ်ႉႁႃႉတေႃႈ”
“ပီႈၶမ်းလိုၼ်းၼႆႉၵေႃႈ ဢမ်ႇဝႃႈၸိူင်ႉၼၼ်ၼင်ႇၵဝ်ႇၶႃႈလေႃႇ ပဵၼ် ၼၢင်းယိင်းလႄႈ ဢမ်ႇမေႃၵၢၼ်ၼၢင်းယိင်းၼႆႉ ပိူၼ်ႈထၢင်ႇလဵၵ်ႉၼႃႇ ၼႆၼၼ်ႉ”
“ၽႂ်ပဵၼ်ၵေႃႉလၢတ်ႈၼေၼွင်ႉလႃႇ ၵႂၢမ်းၸိူင်ႉၼႆ”
“ပီႈ.. ပိူၼ်ႈလၢတ်ႈၼေၼွင်ႉဢေႃႈ”
ၼၢင်းၶမ်းလိုၼ်းႁူႉတၼ်းသေယုမ်ႉယူႇ “ဢိူဝ်ႈၸၢမ်ၶမ်း ပီႈသၢႆၶိူဝ်းၼႆႉ ၵွပ်ႈသင်လႄႈ ထိုင်မိူဝ်ႈလဵဝ် ယင်းပႆႇတေႇၼႃႈႁိူၼ်းလႃႇၼေႃ”
“ၼွင်ႉၵေႃႈဢမ်ႇႁူႉၼင်ႇၵဝ်ႇၼႃ ၼွင်ႉလႆႈငိၼ်း မၼ်းလၢတ်ႈၼႄ ၼူၼ်းႁွမ်တႄႉဝႃႈ ပေႃးမႃးဝူၼ်ႉၶွပ်ႈသႂ်ႇၸၢတ်ႈပၢၼ်ပီႈၼႆႉတႄႉ တႃႇ တေယုမ်ႉ ႁၢင်ႈလီလီဢွၼ်ႇၵူၺ်းၵေႃႈ ပေႃးဢမ်ႇၶႂ်ႈႁတ်းယုမ်ႉၵွၼ်ႇ ဢိူဝ်ႈၼႆဝႃႇ”
“ၼူၼ်းႁွမ်သမ်ႉဝႃႈႁိုဝ်လႃႇ”
“မိူဝ်ႈတေႇၸႃႉႁၼ် ပီႈသၢႆၶိူဝ်းတႄႉဝႃႈ ပေႃးဢမ်ႇၸႂ်ႈမၢဝ်ႇသူၵေႃႈ သိုပ်ႇမိုတ်ႈပၼ်ႁဝ်းႁႂ်ႈလႆႈႁူႉၸၵ်းၽွင်ႈလေႃႇ ၼႆဝႃႇ ၽိူဝ်ႇပီႈသၢႆၶိူဝ်းဝႃႈ ၸိူင်ႉၼၼ်ယဝ်ႉ ဝၢႆးၼၼ်ႉတႄႉဢမ်ႇငိၼ်းမၼ်းဝႃႈႁိုဝ်ထႅင်ႈ”
“ပေႃးမိူၼ်ပီႈသၢႆၶိူဝ်းၼႆႉတႄႉ ဢမ်ႇမီးသင်ၵေႃႈမေႃႁႃလွင်ႈၶိုၼ်ႈယႂ်ႇ ယူႇလူးၼၼ်ႉ ၵၢၼ်ၵေႃႈမေႃၵူႈမဵဝ်း”
“ဢူး..ပီႈသၢႆၶိူဝ်းဢမ်ႇမီးသင်ၼႆ ယႃႇပေဝႃႈႁေၵမ်းလႃႈ ငိုၼ်းၶမ်းမၼ်း မီးၼမ်ၼႃႇၵူၺ်ႉ။ ငိုၼ်းထႆးၵေႃႈ ၼႅပ်ႇမၼ်းမွၵ်ႈၼႆႉၼေႈ မၼ်းမႃႇၸႂ်ႈ ၵူၼ်းၽၢၼ်သေဢိတ်းလႃႈ။ ၼွင်ႉႁၼ်ယဝ်ႉဝႃႈ မၼ်းလၢတ်ႈဢဝ်လၢႆꧦ ၵူၺ်းဢေႃႈဝႃႈဢမ်ႇမီးသင်။ ဢမ်ႇမီးသင်ၼႆ ၵႃးၼၼ်ႉၵေႃႈမၼ်းဢဝ် ငိုၼ်းမၼ်းသိုဝ်ႉႁင်းၵူၺ်းလူးၼၼ်ႉ ယဝ်ႉၵေႃႈလိူၼ်တေမႃးၼႆႉ တေ ၵႂႃႇႁဵတ်းၶွၵ်ႈမူတီႈလွႆၼွႆႉ ႁႂ်ႈမၼ်းလဵင်ႉလႆႈ မွၵ်ႈပၢၵ်ႇပၢႆသွင်ပၢၵ်ႇၼႆႉၼႆ မၼ်းၸူဝ်းၼွင်ႉ ႁဵတ်းၸွမ်းမၼ်းယူႇဢေႃႈ။ ၼွင်ႉဝႃႈၼွင်ႉတေထၢမ် တူၺ်းပေႃႈၵွၼ်ႇၼွင်ႉဝႃႈၼႆ”
“ႁိုဝ်ႉႉႉႉ ဢႃသၢင်ႇဝႃႈ တေႁႂ်ႈၼွင်ႉၵႂႃႇႁဵၼ်း တတ်းယဵပ်ႉသိူဝ်ႈၶူဝ်းတီႈ တူၼ်ႈတီးၼႆလူး”
“ဢူး ၼွင်ႉဢမ်ႇၵႂႃႇလေႃႇပီႈၶမ်းလိုၼ်း ႁဵၼ်းတီႈပီႈၶမ်းလိုၼ်းၼႆႉၵေႃႈ လႆႈယူႇၶႃႈလူး”
သိုပ်ႇလူထႅင်ႈတွၼ်ႈတေမႃးၶႃႈ
