ၵိၼ်ၶဝ်ႈၵိၼ်သင်ယဝ်ႉၵေႃႈ ၵဵပ်းၽဵဝ်ႈၵဵပ်းသိမ်းဝႆႉသေ မၼ်းၵေႃႈၵဵပ်းၸွႆႈၶႃႈၵႂႃႇ။
“ႁဝ်းတေႁဵတ်းၵူၺ်း ဝႆႉလႄႈ”
“ဢမ်ႇပဵၼ်သင် ႁႂ်ႈႁဝ်းၸွႆႈလႄႈၼႃႈသူ”
“ႁဝ်းႁဵတ်းၵူၺ်းလႆႈယူႇၼႃႈ”
“ႁဝ်းၶႂ်ႈၸွႆႈလူး”
မၼ်းၵေႃႈဢဝ်ဝၢၼ်ႇဢၼ်ၶႃႈထူသပျႃႇၼၼ်ႉၸၢင်းၼမ်ႉသေ
“ႁဝ်းထၢမ်သူတေႉ သူပၢႆႈႁဝ်းႁဵတ်းသင်”
“ႁဝ်းဢမ်ႇလႆႈပၢႆႈ”
“ပေႃးဢမ်ႇပၢႆႈ သူသမ်ႉတေပႅပ်ႉႁဝ်းႁဵတ်းသင်လႃႇ တႃႇတေလႆႈထူပ်းသူၼႆႉမၼ်းယၢပ်ႇမွၵ်ႈႁိုဝ်ၼႆၸွင်ႇႁူႉႁႃႉ”
မိူဝ်ႈလႆႈဢုပ်ႇလၢတ်ႈႁိမ်းၸမ်ၸိူင်ႉၼႆ ၼင်ႇႁၢင်ႈၸႂ်ပေႃးဢူၼ်ႈလူင်ၵႂႃႇ သမ်ႉပေႃးလိုမ်းတႃႇၸႂ်လမ်မၼ်းယဝ်ႉဝႃႈ။
“သူသမ်ႉႁဵတ်းႁိုဝ်မႃးလႃႇၼႆႉ”
“သိုဝ်ႉမႃးဢဝ်ဢိူဝ်ႈ ၸွင်ႉႁူႉႁိုဝ် ၼွင်ႉယိင်းသူၼႆႉလၵ်းၵႃႈပဵၼ်”
“မၼ်းႁဵတ်းႁင်တီႈသူလႃႇဢေႉ”
“ၸွၵ်းၶူဝ်းသူၼၼ်ႉယဝ်ႉ ႁဝ်းလႆႈပၼ်မၼ်းပဵၼ်သၢမ်မိုၼ်ႇၼၼ်ႉ”
“သူတေပၼ်ႁဵတ်းသင်လႃႇ ၼမ်ပေႉတၢၼ်ႇၼၢၼ်ႉသူမီးငိုၼ်းယူႇႁႃႉ”
“တွၼ်ႈတႃႇသူ မၼ်းတင်းဢေႇၵွၼ်ႇယဝ်ႈ၊ သမ်ႉဝႃႈပဵၼ်သိုၵ်းၵေႃႈ ႁဝ်းႁႃလဵင်ႉသူလႆႈယူႇၼႃႈ”
“ႁဝ်းၵေႃႈဢမ်ႇပႂ်ႉၵိၼ်သူၼင်ႇၵွၼ်ႇဝႃႈ”
“ယႃႇဝႃႈပေႃးတၢၼ်ႇၼၼ်ႉလေႃႇ ႁဝ်းၵေႃႈဢမ်ႇၸႂ်ႈၵူၼ်းၽၢၼ်ပေႉတၢၼ်ႇၼၢၼ်ႉၵွၼ်ႇသႄႈ”
“သူတေမႃးထၢမ်ႁဝ်းယူႇတေႉႁႃႉ”
“ယူႇတီႈသူၵူၺ်းၼႃႇ ၶႂ်ႈႁႂ်ႈမႃးႁႃႉဢမ်ႇၶႂ်ႈႁႂ်ႈမႃး”
“ဢမ်ႇ..”
“ဢမ်ႇႁၵ်ႉႁဝ်းယဝ်ႉၵႃႈ”
“ဢိုဝ်ႈ..”
“ၵူၼ်းၶီႈပႅတ်ႉ..”
ၸဵတ်ႉပၼ်မိုဝ်းဢိၼ်ႉလူး၊ ၶႃႈၵေႃႈဢဝ်ၽႅၼ်ႇၸဵတ်ႉမႃးသေ ယိပ်းဢဝ်မိုဝ်းဢၼ်မၼ်းယိုၼ်ႈမႃးပၼ်ၼၼ်ႉၸဵတ်ႉယူႇ၊ ၸဵတ်ႉပၼ်ယဝ်ႉၵေႃႈ ဢဝ်တူဝ်မၼ်းသုတ်ႉၸမ်သေ မႃးသုတ်ႇၼူမ်သႂ်ႇၼႃႈၽၢၵ်ႇၶႃႈဢမ်ႇတၼ်းႁူႉတူဝ်ယဝ်ႉ ဢွၵ်ႇၵႂႃႇပႅတ်ႈ ပၼ်ၶႃႈၸုၵ်းၸိူဝ်ႈယူႇတင်းႁိုင် ၸင်ႇတေတူင်ႉတူဝ်မႃးလႆႈ။
ယၢမ်းၵၢင်ၶမ်ႈလပ်းသိင်ႇၸွမ်ႉႁွမ်ႉ ၼႂ်းဝၢင်းႁိူၼ်းႁဝ်းၼၼ်ႉၵေႃႈ ၵူၼ်းသမ်ႉပေႃးၵိုၼ်းလူင်ဝႆႉ၊ ၸဵမ်လုၵ်ႈဢွၼ်ႇၵူၼ်းထဝ်ႈ ၵဝ်ၶဝ်ႈမႂ်းဢွၵ်ႇၶိုၼ်ႈၶိုၼ်ႈလူင်းလူင်း ၶႃႈတႄႉၵေႃႈ ဢေးမူၺ်းမႃးႁၢင်ႈၶိူင်ႈပၼ်သေ ၼႃႈပေႃးၼႃတိုပ်ႇၵိုပ်ႇလူင်ဝႆႉယဝ်ႉၼႃႇ။
တင်းထၢမ်တင်းၵၼ်ႇတေႃးလေႃးၵၼ်ၵႂႃႇသေၶမ်ႈၼၼ်ႉယဝ်ႉ။
ၵွပ်ႈပဵၼ်ၵူၼ်းသိုၵ်းၵူၺ်းလႄႈ ဢူႈႁဝ်းၵေႃႈဢမ်ႇပေႃးယွၼ်းၼမ် ၼင်ႇၵႃႈၶဝ်ပွင်လႆႈ ယႃႇႁႂ်ႈမၼ်းႁၢင်ႈၸႃႉၼႃႇၵူၺ်းၵေႃႈလႆႈယဝ်ႉၼႆသေ၊ ၶဝ်ၵေႃႈဢဝ်မႃး ၶမ်းသွင်ဝၢတ်ႇ ငိုၼ်း100သႅၼ် ၶႃႈတင်းဢမ်ႇဝူၼ်ႉဝႃႈ မၼ်းတေမႃးယွၼ်းၼမ်တၢၼ်ႇၼႆႉၵွၼ်ႇ၊ ဢူႈႁဝ်းၵေႃႈတေႃႈၼင်ႇၼၼ် လိူဝ်သေၼၼ်ႉ ဢၼ်လဵင်ႉၶမ်ႈၼႆႉၵေႃႈၽၢႆႇၶဝ်ၵေႃႉဢွၵ်ႇတင်းသဵင်ႈယဝ်ႉ။
ၶႃႈၸင်ႇတေဝူၼ်ႉလႆႈဝႃႈ ၶႃႈတေတေႇၼႃႈႁိူၼ်းၸွမ်းၶဝ်ယူႇယဝ်ႉ ၶႃႈႁူႉၸၵ်းၶဝ်ယူႇႁႃႉၼႆႉ။
ယူႇၸွမ်းၵၼ်တင်းဢမ်ႇမီးလိူၼ် မၼ်းၵေႃႈလႆႈၶၢႆႉၵၢၼ်ၵႂႃႇထႅင်ႈယဝ်ႉ၊ ပၢၼ်ပဵၼ်မေးသိုၵ်းၼႆႉ ဢမ်ႇၸႂ်ႈငၢႆႈတေႉလူး ႁူႉယူႇႁၼ်ယူႇဝႃႈတုၵ်ႉၶ ၵွပ်ႈတၢင်းႁၵ်ႉဢၼ်ဝႃႈၼၼ်ႉသေ မၼ်းၵေႃႈၸူဝ်းၶႃႈၵႂႃႇယူႇၸွမ်းယဝ်ႉ။
ၵွပ်ႈပဵၼ်ၽူဝ်မေးယဝ်ႉလႄႈ ဢူႈမႄႈၵေႃႈဢမ်ႇၶႂ်ႈပွႆႇႁႂ်ႈၽၢတ်ႇၽႄၵၼ် ယၢမ်းမိူဝ်ႈတုၵ်ႉၵေႃႈတုၵ်ႉၸွမ်းၵၼ် ယၢမ်းမိူဝ်ႈသိူဝ်းၵေႃႈသိူဝ်းၸွမ်းၵၼ် ၼၼ်ႉပဵၼ်ၶေႃႈသင်ႇသွၼ်ၶေႃႈလိုၼ်းဢၼ်ဢူႈၶႃႈသင်ႇလၢတ်ႈမႃး။
သမ်ႉဝႃႈၶဝ်လုမ်းလႃးတူၺ်းထိုင်ႁဝ်းလီယူႇၵေႃႈ ၵူႈတီႈဢၼ်ၶဝ်ယူႇၼၼ်ႉတႄႉ ဢမ်ႇၸႂ်ႈၼႂ်းဝၢၼ်ႈႁိူၼ်းၵူၼ်း ၵူၺ်းပဵၼ်ၼႂ်းထိူၼ်ႇလၢႆလၢႆယဝ်ႉ၊ မၢင်တီႈပေႃးဢမ်ႇယူႇႁိုင်ၵေႃႈ လႆႈယူႇသုမ်ႉၽႃႈယၢင်၊ မၢင်တီႈပေႃးထင်ႁိုင်ၵေႃႈသုမ်ႉမုင်းၶႃး၊ ဢမ်ႇလႆႈႁဵတ်းၵၢၼ်သူၼ်ၵၢၼ်ၼႃး ႁၢင်ႈၶႂ်ႈၶၢၼ်ႉမႃးယူႇ၊ ပေႃးယူႇႁိုင်ၵေႃႈ ၶႃႈၵႆႉႁႃၸိူဝ်ႉၽၵ်းၽုၵ်ႇၸွမ်းႁိမ်းႁွမ်းတီႈႁဝ်းယူႇ၊ ပေႃးတူၼ်ႈယႂ်ႇထိုင်ၶိင်ႇၶၢဝ်းလႆႈၵဵပ်းယွတ်ႈၵဵပ်းႁုင်ယဝ်ႉသမ်ႉ လႆႈၵႂႃႇထႅင်ႈယဝ်ႉ။
ၶဝ်ႈၽၵ်းၵေႃႈ ၵမ်းသၢင်ႇတေႃႇယဝ်ႉ မၢင်တႃႇၵေႃႈၵိၼ်ၼိူဝ်ႉၵိၼ်ပႃ မၢင်ပွၵ်ႈၵေႃႈလႆႈႁႃပီၵူၺ်ႈၽၵ်းၵုတ်ႇၽၵ်းၼၢမ် ၸိူဝ်းၼႆႉ။
ဢၼ်ၶႃႈၶၢၼ်ႉလိူဝ်ပိူၼ်ႈတႄႉ လွင်ႉၶၢႆႉတီႈၼႆႉၼေႈ ၸဵမ်ၶူဝ်းၸဵမ်လဵင်းလႆႈသိမ်းလႆႈပႅတ်ႈ ၶႂ်ႈလႆႈၶူဝ်းမႂ်ႇၼႆၵေႃႈ ၶီၸႂ်မိူဝ်ႈတေႃႉမၼ်းၼၼ်ႉယဝ်ႉ။
