ၶႃႈယူႇၸွမ်းမၼ်းမႃးႁိုင်ပီပၢႆ မၼ်းၵေႃႈဢမ်ႇတွၼ်ႉပၼ်ၶႃႈလႆႈဢိုပ်းသေပွၵ်ႈ ၶႃႈဢမ်ႇလႆႈႁဵတ်းၵၢၼ် ဢမ်ႇမီးငိုၼ်းၼႆၵေႃႈ ပေႃးငိုၼ်းလိူၼ်မၼ်းဢွၵ်ႇၼႆ တေဢဝ်မႃးပၼ်ၶႃႈတႃႇသေႇယဝ်ႉ၊ ငိုၼ်းလိူၼ်သိုၵ်းၼႆ လႆႈၼမ်ၼႃႇၵေႃႈဢမ်ႇၸႂ်ႈ တင်းၸၼ်ႉသိုၵ်းမၼ်းၼၼ်ႉသေ တေပေႃးသိုဝ်ႉသင်ၵူၺ်းၵူၺ်း၊ သမ်ႉဝႃႈၸိူင်ႉၼၼ် ပေႃးဝႃႈဢၼ်ၼၼ်ႉဢၼ်ၼႆႉမူတ်းၼႆၵေႃႈ ဢဝ်ငိုၼ်းတီႈလႂ်မႃးဢမ်ႇႁူႉပၼ်ၶႃႈထႅင်ႈ။
“သူပေႉဢဝ်ငိုၼ်းတီႈလႂ်မႃးလႃႇ”
“ၶႂ်ႈသိုဝ်ႉသင်ၵေႃႈသူသိုဝ်ႉလႆႈဢိူဝ်ႈၼႃႈ”
“သူႁဵတ်းၵၢၼ်သင်တေႉလႃႇ”
“ႁဝ်းယွၼ်းတၢင်းႁိူၼ်း”
“ၸႂ်ႈယူႇႁႃႉ..”
“ဢိုမ်ႈ..”
“ယွၼ်းငိုၼ်းမိူဝ်းတီႈႁိူၼ်းၸိူင်ႉၼႆတိၵ်းတိၵ်း ၶဝ်ဢမ်ႇဝႃႈႁင်သူၼႄႇ”
“ဢမ်ႇပဵၼ်သင်လေႃႇၼႃႈ သူယႃႇဝူၼ်ႉၼမ်ယူႇယဝ်ႉ”
“တေႉဢိူဝ်ႈ..ၸဵမ်ႈမိူဝ်ႈႁဝ်းဢဝ်ၵၼ်မႃး လွင်ႈဢူႈမႄႈသူႁဝ်းဢမ်ႇႁူႉသေပွၵ်ႈလူးၼႆႉ ႁဝ်းၵေႃႈဢမ်ႇႁတ်းထၢမ်”
“မႄႈႁဝ်းလူႉယဝ်ႉ..ဢူႈႁဝ်းၵေႃႈတႄႇၼႃႈႁိူၼ်းထႅင်ႈ ႁဝ်းဢမ်ႇၶႂ်ႈယူႇတီႈႁိူၼ်းသေ မႃးႁဵတ်းသိုၵ်းၼႆႉယဝ်ႉ”
ၸမ်ၸမ်သွင်ပီယဝ်ႉ မၼ်းၵေႃႈဢွၼ်ၶႃႈမိူဝ်းလႄႇဢူႈၶဝ်လႄႈမႄႈသိုပ်ႇမၼ်း၊ ၼႃႈႁိူၼ်းၶဝ်ၼၼ်ႉတႄႉၵေႃႈ လႆႈဝႃႈပဵၼ်လၢဝ်းပၢၼ်းဝႆႉယူႇၵေႃႈဝႃႈလႆႈယဝ်ႉ။ သိင်ႇၵႃးလူင်ၶဝ် ၶႂ်ႈၵႂၢင်ႈလိူဝ်ဝၢင်းသူၼ်လင်ႁိူၼ်းႁဝ်းယဝ်ႉၼႃႇ ပိုတ်ႇဝႆႉတီႈမႄးၵႃးပႃးယဝ်ႉ။
ၽွင်းၼၼ်ႉ ၶႃႈၵေႃႈႁမ်ႉပႃးတွင်ႉၸမ်ၵိူတ်ႇလုၵ်ႈယဝ်ႉလႄႈ ၸင်ႇႁႂ်ႈၶႃႈမိူဝ်းယူႇတီႈႁိူၼ်းယဝ်ႉ၊ ယွၼ်ႉပိူဝ်ႈမၼ်းတေလႆႈႁပ်ႉလွင်ႈလုမ်းလႃးလီလိူဝ်သေ တီႈဝၢၼ်ႈႁဝ်းၼၼ်ႉလႄႈ ၸင်ႇႁႂ်ႈၶႃႈမႃးယူႇၸွမ်း။
ဢမ်ႇၸႂ်ႈဝႃႈမႄႈသိုပ်ႇၶဝ်ဢမ်ႇလီ တူဝ်မၼ်းၵူၺ်း ဢမ်ႇပေႃးမႅၼ်ႈၵၼ်တင်းဢူႈၶဝ်သေၵႃႈႁိုဝ် ဢမ်ႇၸႂ်ႈဝႃႈၽိတ်းၵၼ် လွင်ႈၸမ်ၸႂ်ၶဝ်ႁၢင်ႇၵၼ်ၸိူင်ႉၼၼ်ၵူၺ်း။ မႄႈသိုပ်ႇၶဝ်ၵေႃႈလႆႈဝႃႈလုမ်းလႃးတူၺ်းထိုင်လီၼႃႇတေႉယဝ်ႉ။
ဝၢႆးသေမႃးသူင်ႇၶႃႈယဝ်ႉၵေႃႈ ၼွၼ်းၶိုၼ်းသေဢွၵ်ႇၵႂႃႇၶိုၼ်းယဝ်ႉ၊ မိူဝ်ႈလဵဝ်ၼႆႉတႄႉၼင်ႇဝႃႈၶႃႈလႆႈမႃးၶိုၼ်ႈပႂ်ႉၼႆၵေႃႈဝႃႈယူႇ၊ တသေဝႃႈႁိူၼ်းသထေးလႃႈ ၵူၼ်းၼႂ်းႁိူၼ်းၵေႃႈယူႇၽႂ်ယူႇမၼ်းႁဵတ်းၼၼ် ပိုၼ်းၶိူဝ်းၼၼ်ႉၵေႃႈ မီးၼွင်ႉၸၢႆးၵေႃႉၼိုင်ႈ ႁူမ်ႈဢူႈဢမ်ႇႁူမ်ႈမႄႈ လုၵ်ႈမႄႈသိုပ်ႇၶဝ်ၼၼ်ႉယဝ်ႉ၊ မႄႈသိုပ်ႇၶဝ်ၼၼ်ႉၵေႃႈ ယူႇႁိူၼ်းဢမ်ႇလႆႈႁဵတ်းၵၢၼ်သင် ယူႇႁိူၼ်းတူၺ်းထိုင်ႁိူၼ်းၵႂႃႇၸိူင်ႉၼၼ်ၵူၺ်း ပေႃးလူဝ်ႇႁဵတ်းၵၢၼ်မႃးၵေႃႈ ႁႂ်ႈလုၵ်ႈလဵင်ႉႁဵတ်းၵူၺ်းလႄႈ ဢူႈၶဝ်ၼၼ်ႉတႄႉၵေႃႈဢမ်ႇသူႈယူႇႁိူၼ်းမိူၼ်ၵၼ်။ ၶႃႈမႃးယူႇၸွမ်းၵေႃႈၼင်ႇဝႃႈ မႃးႁဵတ်းၵေႃႉမၼ်းယဝ်ႉ။
ဢမ်ႇယၢမ်ႈႁိုဝ်ဢမ်ႇႁူႉ ယူႇႁိူၼ်းသထေးၼႆႉ ဢမ်ႇမိူၼ်ယူႇႁိူၼ်းႁဝ်း၊ ယူႇႁိုင်မႃးၵေႃႈ ၸႂ်ထိုင်ဢူႈတင်းမႄႈမႃးယဝ်ႉ၊ မိူဝ်ႈယူႇၼႂ်းထိူၼ်ႇၸွမ်းမၼ်း ၸွမ်းၵူၼ်းသိုၵ်းၶဝ်တင်းဝႃႈလီၵျေႃႇယူႇ၊ ၽိူဝ်ႇမႃးယူႇတီႈႁိူၼ်းၼႆႉယဝ်ႉၵေႃႈ ယဵၼ်သီႇသီႇ ဢမ်ႇႁူႉတေလႆႈႁဵတ်းသင်။
ႁိုင်ႁိုင်ၼၢၼ်းၼၢၼ်း ၸင်ႇၵပ်းသိုပ်ႇၵၼ်လႆႈတင်းပီႈပိုၼ်းၶိူဝ်း ပေႃးမၼ်းတၼ်းၵေႃႈၵပ်းသိုပ်ႇမႃး ပေႃးဢမ်ႇတၼ်းၵေႃႈ ႁၢႆၵႂႃႇပဵၼ်ဝူင်ႈပဵၼ်လိူၼ်ယဝ်ႉ။ တီႈႁိူၼ်းၵေႃႈမိူၼ်ၼၼ် ၶၢဝ်းႁဵတ်းၵၢၼ်ယဝ်ႉလႄႈ ႁိုင်ႁိုင်ၼၢၼ်းၼၢၼ်းၸင်ႇၶိုၼ်ႈလႅင်းၵူၺ်း။
တေႃႇထိုင်ၶႃႈပေႃးၵိူတ်ႇလုၵ်ႈ မၼ်းၸင်ႇတေလႆႈမႃးယူႇၸွမ်း၊ မွၵ်ႈသေၼိုင်ႈလိူၼ်ၵေႃႈ ၶိုၼ်းၵႂႃႇယဝ်ႉ။
ၵွပ်ႈပဵၼ်သိုၵ်းလႄႈ ယူႇၸွမ်းၵၼ်မႃး ၶႃႈၵေႃႈပွင်ႇၸႂ်မၼ်းလီယူႇ။ ၶႃႈၵေႃႈၵၢမ်ႇလီမိူၼ်ၵၼ် ဢၼ်လႆႈမၼ်းမႃးပဵၼ်ၽူဝ် ဢမ်ႇလႆႈမႆႈၸႂ်လွင်ႈငိုၼ်းလွင်ႈတွင်းၸိူင်ႉၼင်ႇပိူၼ်ႈ။
ဢေးဢွင်ႇတႄႉၵေႃႈၵိူတ်ႇလုၵ်ႈယဝ်ႉသေ ပီႈသူၺ်ႇဢွင်ႇၵေႃႈ ၶၢႆႉၵႂႃႇယဝ်ႉလႄႈ တွၼ်းလႆႈႁူႉဝႃႈ ဢူႈလုၵ်ႈဢွၼ်ႇၼၼ်ႉပဵၼ်ပီႈသူၺ်ႇဢွင်ႇၼႆၵူၺ်း။ လႆႈလဵင်ႉလုၵ်ႈဢွၼ်ႇႁင်းမၼ်းသေဢမ်ႇၵႃး ယႃႇဝႃႈပီႈသူၺ်ႇဢွင်ႇတေၸွႆႈလႃႈ မၢင်ပွၵ်ႈပေႃးဢမ်ႇမီးငိုၼ်းၼႆၵေႃႈ လႆႈသူင်ႇပၼ်ယူႇ။ မၼ်းၼၼ်ႉၵေႃႈ ၼင်ႇဝႃႈၽူႈၸၢႆးၼႆႉမီးမၼ်းၵူၺ်းယဝ်ႉ ပႅတ်ႈၵေႃႈႁမ်ႉဢမ်ႇပႅတ်ႈလႆႈၼင်ႇၵွၼ်ႇ။
ဢေးလၢဝ်တႄႉၵေႃႈၽုၺ်ႇသႅင်ႇယူႇႁဵတ်းၼၼ်ႁေ ၽူဝ်မၼ်းၵေႃႈႁိုင်ႁိုင်ၼၢၼ်းၼၢၼ်းသူင်ႇငိုၼ်းပၼ်ယူႇ။ ၽူဝ်မၼ်းၵေႃႈပဵၼ်ၵူၼ်းၸႂ်ၼမ်မိူၼ်ၵၼ်လႄႈ မီးမေးၼႆႉဢမ်ႇႁူႉပဵၼ်လၢႆၵေႃႉယဝ်ႉ။ ၵႆၵႆၵႂႃႇၼိုင်ႈတီႈၵေႃႈဝႆႉၼိုင်ႈၵေႃႉႁဵတ်းၼၼ်၊ ဢေးလၢဝ်ၵေႃႈ ပေႃးမၼ်းသူင်ႇငိုၼ်းပၼ်ယူႇၵေႃႈ ယဝ်ႉမၼ်းသေၼႆၵူၺ်းၼႃႇ မၼ်းၵေႃႈ ပဵၼ်ၼွႆႉပိူၼ်ႈမိူၼ်ၵၼ်ၵူၺ်းလူး။
ဢေးမူၺ်းၵေႃႈ ဝၢႆးၶႃႈဢဝ်ၵူၺ်းမၼ်းၵေႃႈဢဝ်ၽူဝ်ယဝ်ႉမိူၼ်ၵၼ် ၽူဝ်မၼ်းတႄႉၵေႃႈပဵၼ်သိုၵ်းပေႃးသေ မိူဝ်းၶိုၼ်ႈပႂ်ႉပိူၼ်ႈတီႈၽူဝ်မၼ်းယူႇၼၼ်ႉယဝ်ႉ။
ၶႃႈၵေႃႈဢမ်ႇႁူႉမိူၼ်ၵၼ်ဝႃႈတၢင်းၼႃႈမႃး တေမိူၼ်ႁိုဝ် ၶႃႈတေဝႆႉၸႂ်ပီႈပိုၼ်းမိူင်းလႆႈတေႉယူႇႁိုဝ်၊ ၶႃႈသမ်ႉတေႁဵတ်းႁိုဝ် ပေႃးဝႃႈမၼ်းပဵၼ်ၵႂႃႇယဝ်ႉ။
