သဵၼ်ႈတၢင်းၶူးသွၼ်

ၼႂ်းတူင်ႇဝူင်းဢၼ်ၶႃႈယူႇၼႆႉ ပေႃးမႃးတူၺ်းၼႆ ၼႃႈၵၢၼ်ဢၼ်လႆႈငိုၼ်းလိူၼ်ၼမ်လိူဝ်ပိူၼ်ႈၵေႃႈ ပဵၼ် “ၶူးသွၼ်”ယဝ်ႉ။

ၵူၼ်းႁိမ်းႁွမ်း ဢူႈမႄႈ ၵမ်ႉထႅမ်ႁႂ်ႈႁဵတ်းၶူးယူႇသေတႃႉၵေႃႈ ၵူဝ်ၺႃးလုၵ်ႈႁဵၼ်းဢၼ်မိူၼ်တူဝ်ၵဝ်ႇၼႆႉသေ ၸင်ႇဝႄႈလိူၵ်ႈသဵၼ်ႈတၢင်း ဢၼ်ႁၢင်ႇၵႆၵၼ်တင်းၶူးသွၼ်ၼၼ်ႉယူႇ။

ၵူၺ်းၵႃႈ ဝၼ်းၼိုင်ႈ လႆႈငိၼ်းသဵင်လုၵ်ႈဢွၼ်ႇ ဢၢၼ်ႇလိၵ်ႈယူႇၼႂ်းသုမ်ႉႁိူၼ်းဢွၼ်ႇ ဢၼ်ႁွင်ႉဝႃႈႁူင်းႁဵၼ်းၼၼ်ႉ မၼ်းတုမ်ႉယွၼ်ႈၸႂ်မႃးယဝ်ႉ။

ပဵၼ်လုၵ်ႈႁဵၼ်း ဢမ်ႇလႆႈယူႇႁူင်းႁဵၼ်းတႆး ၵူၺ်းၵႃႈ ႁဵၼ်းလိၵ်ႈတႆးယူႇၼၼ်ႉယဝ်ႉ။

ၶႃႈဢမ်ႇလႆႈၵတ်ႉၶႅၼ်ႇ ဢမ်ႇလႆႈလူင်ႉလႅၼ်ႇၽႃႇသႃႇတၢင်ႇမဵဝ်း ၵူၺ်းၵႃႈလိၵ်ႈတႆးၼၼ်ႉ ပဵၼ်ၽႃႇသႃႇဢၼ်ၶႃႈႁူႉမေႃလူဢၢၼ်ႇတႅမ်ႈလႆႈယဝ်ႉ၊ တွၼ်ႈတႃႇတေသွၼ်ပၼ်ၼၼ်ႉ ၶႃႈမီးၼမ်ႉၵတ်ႉယူႇၼႆသေ ၸင်ႇၶဝ်ႈႁူမ်ႈပဵၼ်သုၼ်ႇၼိုင်ႈ ၼႂ်းၵၢၼ်ပဵၼ်ၶူးသွၼ်မႃးယဝ်ႉ။

လုၵ်ႈႁဵၼ်းဢၼ်ၶႃႈလႆႈသွၼ်ၼၼ်ႉတႄႉ ဢသၢၵ်ႈႁူၵ်းၶူပ်ႇၶိုၼ်ႈၼိူဝ်ၼႆႉၵူၺ်း၊ ၵမ်ႈၼမ်ၵေႃႈတေသွၼ်ၵၢင်ၶမ်ႈ ၸူဝ်ႈမူင်းသွင်ၸူဝ်ႈမူင်းၼႆႉ ၼိုင်ႈဝူင်ႈ သွင်ဝၼ်း မၢင်ဝူင်ႈၵေႃႈၼိုင်ႈဝၼ်း။

မိူဝ်ႈတႄႇတႄႉၵေႃႈ သွၼ်လိၵ်ႈၵေႃႈ သွၼ်လိၵ်ႈ သွၼ်တႅမ်ႈသွၼ်ဢၢၼ်ႇ ပေႃးယဝ်ႉၵေႃႈယဝ်ႉသေ ပွႆႇမိူဝ်းယဝ်ႉ၊ ၵူၺ်းၵႃႈ ႁိုင်မႃး ဢၼ်သွၼ်မႃးတၢင်းလင်ၼၼ်ႉၵေႃႈဢမ်ႇတွင်း တေသွၼ်ၵႂႃႇတၢင်းၼႃႈၵေႃႈယၢပ်ႇထႅင်ႈ၊ လႆႈၶိုၼ်းတႄႇမႂ်ႇၵႂႃႇ။

ပေႃးပဵၼ်လုၵ်ႈဢွၼ်ႇၼႆ ၶဝ်တေဢမ်ႇမေႃယူႇၼိမ် တေလဵၼ်ႈတၢင်း လႅၼ်ႈတၢင်း မိူဝ်းတၢင်း၊ ယူႇယူႇၵေႃႈယဝ်ႉယွၵ်ႇၵၼ်ႁေ ပေႃးထိုင်ၶၢဝ်းမိူဝ်းၵေႃႈၶႂ်ႈမိူဝ်းယဝ်ႉသေ မၢင်ဝၼ်းၵေႃႈလႆႈတဵၵ်းႁဵၼ်း၊ မၢင်ဝၼ်းၵေႃႈပွႆႇႁႂ်ႈလူမ်သေ ပၼ်ၶဝ်လိုဝ်ႈ ။

တႃႇႁႂ်ႈၶဝ်လႆႈလိၵ်ႈၼၼ်ႉ မၢင်ပွၵ်ႈၵေႃႈလႆႈလႅၵ်ႈလႆၢးသွၼ်မၼ်းမႃးယဝ်ႉ၊ တႅၼ်းတီႈတေသွၼ်လိၵ်ႈၵႂႃႇႁဵတ်းၼၼ် ဢဝ်လိၵ်ႈႁဵတ်းၵဵမ်းသေ ပၼ်ၶဝ်လဵၼ်ႈလႄႈႁဵၼ်းၵႂႃႇၸိူင်ႉၼၼ်ၵေႃႈမီး။

လုၵ်ႈႁဵၼ်းၵေႃႉၼိုင်ႈလႄႈၵေႃႉၼိုင်ႈၵေႃႈ ၵၢၼ်ႁဵၼ်းႁူႉဢမ်ႇမိူၼ်ၵၼ် မၢင်ၵေႃႉႁဵၼ်းလႆႈဝႆး မၢင်ၵေႃႉႁဵၼ်းလႆႈထိူင်း၊ လုၵ်ႈႁဵၼ်းႁဝ်းၼၼ်ႉၵေႃႈ တေလႆႈႁူႉၸၵ်းလွင်ႈၶဝ်ပႃးၽွင်ႈယူႇယဝ်ႉ။

လိူဝ်သေၵၢၼ်ႁဵၼ်းတီႈႁူင်းႁဵၼ်းယဝ်ႉ ပေႃႈမႄႈၵူၼ်းၼႂ်းႁိူၼ်းၼၼ်ႉၵေႃႈ ပဵၼ်ႁႅင်းၵမ်ႉၸွႆႈလႆႈလီလိူဝ်ပိူၼ်ႈယဝ်ႉ။ ပေႃးဝႃႈမီးပေႃႈမႄႈၸွမ်းတူၺ်း ၸွမ်းလၢတ်ႈ ပၼ်ၼႆၵေႃႈ လုၵ်ႈဢွၼ်ႇၵေႃႈမီးၸႂ်ၶႂ်ႈႁဵၼ်း ၼမ်လိူဝ်ဢၼ်ပေႃႈမႄႈ ဢမ်ႇသူၼ်ၸႂ်ၵၢၼ်ႁဵၼ်းလုၵ်ႈဢွၼ်ႇၼၼ်ႉယူႇ။

ပေႃးလုၵ်ႈႁဵၼ်းႁႆၢႉမႃးၵေႃႈ ဝူၼ်ႉၶိုၼ်းမိူဝ်ႈပဵၼ်လုၵ်ႈဢွၼ်ႇ ဢၼ်ႁႆၢႉတေႃႇၶူးသွၼ်ၼၼ်ႉမႃးယဝ်ႉ။

ယၢမ်ႈငိၼ်းပိူၼ်ႈလၢတ်ႈဝႃႈ မိူဝ်ႈႁဝ်းပဵၼ်လုၵ်ႈႁဵၼ်း ႁဝ်းၶႂ်ႈလႆႈၶူးသွၼ်ၸိူင်ႉႁိုဝ်ၵေႃႈ ႁဝ်းပဵၼ်ၶူးသွၼ်ၸိူင်ႉၼၼ်လႄႈ ၼႆဝႃႇ။

ၶူဝ်းတွၼ်ႈဢၼ်မီးၵႃႈၶၼ်လိူဝ်ပိူၼ်ႈ ၵၢၼ်ပဵၼ်မေႃသွၼ်ၼၼ်ႉ ဢမ်ႇၸႂ်ႈငိုၼ်း ၵူၺ်းပဵၼ်သဵင်ၵႂၢမ်းတူင်ႉတၵ်ႉလၢတ်ႈတေႃႇၵၼ်၊ ၵူၺ်းပဵၼ်ၽၼ်းဢၼ်ႁဝ်းဝၢၼ်ႇမႃးၸဵမ်မိူဝ်ႈၽုၵ်ႇမဵတ်ႉၼၼ်ႉ လႆႈႁၼ်တူၼ်ႈႁုၼ်ႈၼုမ်ႇၵီႈမႃး လႆႈဝႃႈပဵၼ်ၶူဝ်းတွၼ်ႈဢၼ်မီးၵႃႈၶၼ်ဝႆႉဢၼ်ၼိုင်ႈယဝ်ႉ။

ဢိင်ၼိူဝ်ၼႃႈၵၢၼ်လႄႈ ၶၢဝ်းတၢင်းသေ ဢမ်ႇၸၢင်ႈလႆႈၶိုၼ်းသိုပ်ႇသွၼ်ၵႂႃႇၵေႃႈ၊ မဵတ်ႉၽၼ်းဢွၼ်ႇမဵတ်ႉၼၼ်ႉတႄႉ ပဵၼ်ႁႅင်းဢီးတႃႇၵၢၼ်ပဵၼ်ၶူးသွၼ်မႃးယူႇယဝ်ႉ။

ၸၢမ်သႅင်
28 April 2026