တွၼ်ႈသွင်
ယၢမ်းၼၼ်ႉ သဵင်လူတ်ႉၶိူင်ႈၽႅတ်ႈၼႃႈႁိူၼ်း ႁၼ်ပဵၼ်ၵူၼ်းၵေႃႉၼၼ်ႉၼႆၵေႃႈ
“ၼၼ်ႉမႃးယဝ်ႉဢေး”
ၼုမ်ႇႁွမ်ယုမ်ႉယုမ်ႉသေ “မွၵ်ႈၼႆႉၵေႃႈပေႃးယဝ်ႉ”
သီလိူၼ်ယၵ်ႉတူၺ်းၵေႃႉမၼ်းၼၼ်ႉသေ “တေႁႂ်ႈၵဝ်ၵႂႃႇထၢမ်ပၼ်ၼႄႇ”
“ထၢမ်ဢီႈႁင်ထႅင်ႈ”
“ၸွင်ႇမၼ်းပႃႈမီးမေးၼႆဢိူဝ်ႈ”
“ဢမ်ႇလူဝ်ႇထၢမ်”
“ႁႅင်ႉလႃႇ ၸိုင်ဝႃႈမႂ်းၵျိူၵ်ႈ”
“ၵျိူၵ်ႈယူႇႁဵတ်းၼႆၵေႃႈပေႃးယဝ်ႉ ႁူႉၸၵ်းမွၵ်ႈၼႆႉၵေႃႈလႆႈယဝ်ႉ ပၼ်လွင်ႈသိူဝ်းၸႂ်မိူဝ်ႈလႆႈႁၼ် ပၼ်တၢင်းယုမ်ႉမိူဝ်ႈႁူပ်ႉၸူး”
ယူႇယူႇ သႆၢၶမ်းၵေႃႈ ဝိၼ်ႇၼႃႈမႃးၸူးတီႈၶႃယူႇၼၼ်ႉသေ။
“ဢမ်ႇၵႂႃႇတၢင်းလႂ်ၶႃႈႁႃႉ”
“ဢေႃႈ..တိုၵ်ႉၵႂႃႇသူၼ်မႃးၶႃႈ”
“တီႈၼႆႈၸွင်ႇမီးလႅင်းၾူၼ်းၶႃႈၼေႃ”
“ဢမ်ႇမီးၶႃႈ”
“ပေႃးလူဝ်ႇၸႂ်ႉလႅင်းသမ်ႉႁဵတ်းႁိုဝ်ၶႃႈ”
“ၵႂႃႇလဵၼ်ႈဝၢၼ်ႈႁွင်ႇၼၼ်ႉဢေႃႈ”
“ပေႃးၶႂ်ႈလႆႈတီႈၵပ်းသိုပ်ႇသူၶႃႈလူးၸွင်ႇလႆႈၶႃႈ”
“လႆႈဢေႃႈ” သီလိူၼ်တွပ်ႇ ဢဝ်သႆၢတႃယၵ်ႉတူၺ်းၼုမ်ႇႁွမ်ယူႇ။
ၼုမ်ႇႁွမ်ယၵ်ႉတူၺ်းၸူးသႆၢၶမ်းယဝ်ႉ “ၾူၼ်းႁဝ်းၵွႆဝႆႉလႄႈ တေဢဝ်မိူဝ်းမႄးတူၺ်းတီႈဝဵင်းၵွၼ်ႇဢေႃႈ”
“ၼၼ်ၶႃႈႁႃႉ..”
“တေၵႂႃႇလႂ်ၶၼႆႉ” သီလိူၼ်ထၢမ်သႆၢၶမ်း။
“မိူဝ်းႁိူၼ်းလုင်းႁဵင်ၶဝ်ၶႃႈ မၼ်းဢမ်ႇယူႇႁိူၼ်းလႄႈတေမိူဝ်းၶိုၼ်း”
“ဢေႃႈ မိူဝ်းလွႆးလွႆးၶႃႈ”
ဝႆၢးသေသႆၢၶမ်းပူၼ်ႉၵႂႃႇ “ၾူၼ်းမႂ်းၵွႆတေႉၵႃႈ”
“ဢမ်ႇ..”
“ႁႅင်ႉမႂ်းဢမ်ႇပၼ်လႃႇ”
“ဢမ်ႇၶႂ်ႈႁႂ်ႈမၼ်းပူၼ်ႉလိူဝ်ၼႃႇ မွၵ်ႈၼႆႉၵေႃႈပေႃးယဝ်ႉ”
“ၸိုင်မႂ်းဝႃႈၵျိူၵ်ႈမၼ်း”
“ဢိူဝ်ႈ ၵျိူၵ်ႈယူႇႁင်းၵဝ်ၵေႃႈပေႃးယဝ်ႉ ၵျိူၵ်ႈတၢၼ်ႇႁႂ်ႈသိူဝ်းၸႂ်ၵေႃႈလႆႈယဝ်ႉၵႃႈ ၸၢင်ႈလူဝ်ႇပေႉႁဵတ်းႁင်ၼမ် ၵမ်ႉမႃးႁူဝ်ၸႂ်ၵူၺ်းဢိူဝ်ႈတေလႆႈၸဵပ်း”
“ၶႂ်ႈဝႃႈမႂ်းတေဢမ်ႇၵဝ်း”
“ဢိုမ်ႈ..”
“ၵူၺ်းသမ်ႉၵျိူၵ်ႈမၼ်းယူႇ”
“ဢိုမ်ႈ..”
“ၵဝ်ပေႃးဢမ်ႇပွင်ႇၸွမ်းမႂ်းယဝ်ႉ တေဝႃႈမၼ်းၵေႃႈသမ်ႉသူၼ်ၸႂ်မႂ်းယူႇလူးၼၼ်ႉ”
“ၸိူင်ႉႁိုဝ်ၵေႃႈမၼ်းပဵၼ်ၵႂႃႇဢမ်ႇလႆႈယူႇယဝ်ႉ ၸုၵ်းယူႇတီႈၼႆႈသေပႂ်ႉတူၺ်းတၢင်းႁၢင်ႈလီမၼ်းၵူၺ်းၵေႃႈပဵင်းၸႂ်ယဝ်ႉ”
“ႁိူဝ်ႉတၢင်မႂ်းၼႃႇ”
“တေမႃးႁိူဝ်ႉတၢင်ၵဝ်ႁဵတ်းသင် မႂ်းမီးၽူဝ်ၼႆႉၸွင်ႇမႂ်းၶႅၼ်းႁိူဝ်ႉလိူဝ်ၵဝ်ႁိုဝ်”
“ၵဝ်တမ်ႉဢမ်ႇလႆႈႁဵတ်းသင် ၸၢင်ႈၵႂႃႇႁိူဝ်ႉတီႈလႂ်”
“ၵဝ်ႁၼ်မၼ်းတွႆးသၢဝ်ႁေဢိူဝ်ႈ မိူဝ်ႈပွႆးသၢင်ႇလွင်းၵျွင်းႁူဝ်ဝဵင်းပုၼ်ႉ ၵဝ်ဢမ်ႇလၢတ်ႈမႂ်းၵူၺ်းၼႃႇ”
“ၸႂ်ႈတေႉယူႇႁ မႂ်းႁၼ်ၵေႃႉမၼ်းယူႇၼႄႇ ၶိင်းၼႆႉပေႃးဢမ်ႇၵႂႃႇၸွမ်းၵေႃႈ ႁၢင်ႈလိူဝ်ၸႂ်ၼႃႇတေႉဢေႉ ၵဝ်မိူဝ်းထၢမ်လီလီၵွၼ်ႇၵႂႃႈ”
ၼႅတ်ႈလုၵ်ႉၵႂႃႇယူႇ။
