ၸွင်ႇယၢမ်ႈပဵၼ်ႁိုဝ် ယူႇႁင်းၵူၺ်းမိူဝ်ႈလႂ် ၵႆႉၵႆႉဝူၼ်ႉသင်တိၵ်းတိၵ်းၵေႃႈဢမ်ႇႁူႉ ဝူၼ်ႉလူင်ၵႂႃႇၵူႈမဵဝ်းယဝ်ႉ။ ပႃးၸဵမ်လွင်ႈၸိူဝ်းပူၼ်ႉမႃး၊ လွင်ႈဢၼ်လႆႈႁဵတ်းၽိတ်းၵႂႃႇ၊ လွင်ႈဢမ်ႇယုမ်ႇယမ်တူဝ်ၵဝ်ႇ၊ လွင်ႈဢၼ်မႃးပႆႇထိုင်၊ ၸႂ်ၼၼ်ႉၵေႃႈပေႃးဢမ်ႇမေႃလိုဝ်ႈလႆႈသေပွၵ်ႈ။
ဢၼ်ဝူၼ်ႉၼမ်ယူႇၼၼ်ႉ ဢမ်ႇၸႂ်ႈဝႃႈဢူၼ်ႈဢွၼ်ႇၼႃႇ မၼ်းပဵၼ်လွၵ်းလႆၢးဢွၵ်းဢေႃ ဢၼ်ၶတ်းၸႂ်ၵႅတ်ႇၶႄပၼ်ႁဝ်း ယႃႇႁႂ်ႈႁဝ်းလႆႈႁဵတ်းၽိတ်းထႅင်ႈ၊ ၵူၺ်းၵႃႈမၼ်းၵေႃႈဢမ်ႇႁူႉဝႃႈ ယိင်ႈႁဝ်းဝူၼ်ႉၼမ် ႁဝ်းၶႅၼ်းႁိူဝ်ႉ မႆႈၸႂ်ႁႅင်း သမ်ႉပႆၢဢမ်ႇမီးတၢင်းသိူဝ်းၸွမ်းၶၢဝ်းယၢမ်းဢၼ်ပဵၼ်ယူႇၼၼ်ႉထႅင်ႈၵွၼ်ႇ။
ၵွပ်ႈၼၼ်ပွၵ်ႈမႃးသႂ်ႇၸႂ်လွင်ႈလဵၵ်ႉလဵၵ်ႉဢွၼ်ႇ ဢမ်ႇဝႃႈတေလူလိၵ်ႈ၊ ပႆတၢင်းလဵၼ်ႈ၊ ထွမ်းၽဵင်းၵႂၢမ်းဢၼ်ႁဝ်းၵျိူၵ်ႈ ဢွၵ်းဢေႃႁဝ်းၵေႃႈ တေဢွၵ်ႇပႅတ်ႈတၢင်းဝူၼ်ႉဢၼ်ပၼ်ႇၵႂႃႇပၼ်ႇမႃးၼၼ်ႉယူႇ။
လၢတ်ႈပၼ်ႁႅင်းတူဝ်ၵဝ်ႇ မိူဝ်ႈဝူၼ်ႉလွင်ႈဢမ်ႇလီမႃးၵေႃႈ ႁႂ်ႈလၢတ်ႈဝႃႈ “ပေႃးသေၵွၼ်ႇလႄႈ ၵမ်ႉၸင်ႇဝူၼ်ႉထႅင်ႈ” ဢမ်ႇၼၼ် “မိူဝ်ႈလဵဝ်ပႆႇၸႂ်ႈလွင်ႈဢၼ်တေလႆႈဝူၼ်ႉလွင်ႈၼႆႉ” ဢွၵ်းၼၼ်ႉတေယုမ်ႇလွင်ႈဢၼ်ႁဝ်းလၢတ်ႈတိၵ်းတိၵ်း။
ယူႇၸွမ်းၶၢဝ်းယၢမ်းမိူဝ်ႈလဵဝ်သေ လပ်းတႃယဝ်ႉထူၺ်ႈၸႂ်ၶဝ်ႈလိုၵ်ႉလိုၵ်ႉ လၢတ်ႈတီႈတူဝ်ၵဝ်ႇဝႃႈ “မိူဝ်ႈလဵဝ်ႁဝ်းယင်းတိုၵ်ႉထူၺ်ႈၸႂ်ယူႇ တိုၵ်ႉမီးႁႅင်းယူႇ” ဢဝ်ၸႂ်ပၵ်းၸွမ်းၶၢဝ်းယၢမ်းဢၼ်ပဵၼ်ယူႇၼႆႉၵေႃႈ ၸွႆႈလႆႈလွင်ႈဝူၼ်ႉၼမ်ယူႇ။
တႅမ်ႈသႂ်ႇၼႂ်းၽိုၼ်ၸေႈ တေၸွႆႈၸတ်းၵၢၼ်ပႆၢးဝူၼ်ႉႁဝ်းႁႂ်ႈလီမႃး မိူၼ်လႆႈဢဝ်ဢၼ်ၼၵ်းယူႇၼႂ်းၸႂ်ၼၼ်ႉပွႆႇသႂ်ႇၼႂ်းၽိုၼ်ၸေႈဝႆႉ။
မၢင်ပွၵ်ႈႁဝ်းၵေႃႈလူဝ်ႇႁႂ်ႈဢွၵ်းဢေႃလိုဝ်ႈၽွင်ႈ ထွမ်ႇသဵင်ႁူဝ်ၸႂ်ၽွင်ႈ ၸၢတ်ႈပၢၼ်ၼႆႉဢမ်ႇလူဝ်ႇလႆႈဝူၼ်ႉၵူႈလွင်ႈႁႂ်ႈမၼ်းယဝ်ႉၵူၺ်း ပွႆႇမၢင်လွင်ႈႁႂ်ႈမၼ်းပူၼ်ႉၵႂႃႇႁဵတ်းၼၼ်ၵူၺ်းၵေႃႈဢမ်ႇပဵၼ်သင်။
ပိၼ်ႇ-ငဝ်မွင်မိုတ်းမူဝ်း
