သမ်ႉဝႃႈမီးၶေႃႈထၢမ်တင်းၼမ် မီးလွင်ႈၶႂ်ႈလၢတ်ႈတင်းၼမ် ၵူၺ်းၵႃႈဢမ်ႇႁူႉတေလႆႈတႄႇၸိူင်ႉႁိုဝ် ဢမ်ႇႁူႉတေလႆႈလၢတ်ႈၼႄၽႂ် ၸၢမ်းလၢတ်ႈၼႄတူဝ်ၵဝ်ႇတူၺ်းၶႃႈလႄႈ ၶေႃႈတွပ်ႇၼၼ်ႉတေဢွၵ်ႇမႃးယူႇ။
ႁဵတ်းႁိုဝ်လႄႈဝႃႈလၢတ်ႈၼႄတူဝ်ၵဝ်ႇလႃႇ ပေႃးၼင်ႈယၵ်ႉမၢၼ်ႇၸမ်ႈသေဢုပ်ႇႁင်းၵူၺ်းၵေႃႈ ပိူၼ်ႈႁၼ်တႄႉတေဝႃႈၵူၼ်းယွင်ႇယူႇ၊ ၼင်ႈယၵ်ႉတူၺ်းၾူၼ်းသေလၢတ်ႈၵေႃႈ ၸႂ်ႉလႆႈယူႇ ပေႃးၵျိူၵ်ႈမၼ်းတႄႉ၊ တွၼ်ႈတႃႇၶႃႈတႄႉ ၶႃႈတေတႅမ်ႈဢဝ်ယဝ်ႉ ၵၢၼ်တႅမ်ႈလိၵ်ႈမၼ်းၸွႆႈၶႃႈလႆႈတင်းၼမ်ယဝ်ႉ။
ဢမ်ႇဝႃႈမီးလွင်ႈၶမ်ၸႂ်၊ မီးလွင်ႈၼၵ်းၸႂ်၊ မီးလွင်ႈဢၼ်တိပ်ႇတၼ်သေလၢတ်ႈဢမ်ႇလႆႈၶႆႈဢမ်ႇၸၢင်ႈ ဢၼ်မီးယူႇၼႂ်းတၢင်းဝူၼ်ႉႁဝ်း ၼႂ်းဢွၵ်းဢေႃႁဝ်းၼၼ်ႉ တႅမ်ႈဢွၵ်ႇမႃးသေ တႅမ်ႈသင်ၵေႃႈလႆႈ ဢၼ်ၶႂ်ႈလၢတ်ႈ။
မၼ်းဢမ်ႇၵႂႃႇႁဵတ်းႁႆၢႉၽႂ် ၊ ဢမ်ႇၵႂႃႇယႃႉပႆၢးၸႂ်ၽႂ်၊ မၼ်းဢမ်ႇၵႂႃႇၽိတ်းၽႂ် မၼ်းဢမ်ႇလႆႈသုၵ်ႉသၵ်ႉၽႂ်၊ ၽႂ်ၵေႃႈဢမ်ႇမႃးႁပ်ႉႁူႉၸွမ်း၊ ၽႂ်ၵေႃႈဢမ်ႇမႃးသူၼ်ၸႂ်ၸွမ်း ပေႃးဢမ်ႇဢဝ်ၵႂႃႇၼႄပိူၼ်ႈတႄႉ၊ ပေႃးဢမ်ႇၶႂ်ႈၼႄၽႂ်ၵေႃႈ တႅမ်ႈယဝ်ႉမွတ်ႇပႅတ်ႈသေ၊ သိၵ်ႇပႅတ်ႈသေ၊ ၽဝ်ၾႆးပႅတ်ႈသေၵေႃႈယဝ်ႉယဝ်ႉ။
တွၼ်ႈတႃႇၶႃႈတႄႉ ၵၢၼ်တႅမ်ႈလိၵ်ႈၼၼ်ႉ မိူၼ်ၵၢၼ်လႆႈပူတ်းပွႆႇဢွၵ်ႇမႃးဢၼ်ၼိုင်ႈယဝ်ႉ၊ ပေႃးဝႃႈတႅမ်ႈၵႂႃႇယဝ်ႉ ဢၢၼ်ႇသေဢမ်ႇဢၢၼ်ႇၶိုၼ်းသေ မၼ်းၵေႃႈလူမ်ၸႂ်မႃးတႄႉတႄႉမိူဝ်ႈလႆႈတႅမ်ႈမၼ်း။
ဢူၺ်းၵေႃႉၶႃႈဢၼ်ဢုပ်ႇၵုမ်လႆႈၵူႈလွင်ႈၼၼ်ႉ ၵမ်ပဵၼ်ၽူႈႁပ်ႉႁူႉသေ သိုပ်ႇသူင်ႇၸူးတီႈပပ်ႉလိၵ်ႈၼၼ်ႉယဝ်ႉ၊ သမ်ႉဝႃႈၵၢပ်ႈပၢၼ်မၼ်းလႅၵ်ႈလႆၢႈမႃးၵေႃႈယဝ်ႉ ၶႃႈယင်းတိုၵ်ႉသူင်တိုဝ်း ပပ်ႉမႆၢတွင်းယူႇ။
မၢင်ပွၵ်ႈလၢတ်ႈၼႄဢူၺ်းၵေႃႉ ၵူၺ်းၵႃႈ ၵမ်ႈၼမ်ၶဝ်သမ်ႉပဵၼ်ၽႆၢႇလၢတ်ႈၼႄႁဝ်းၶိုၼ်း ဢဝ်ပၼ်ႁႃႁဝ်းၼၼ်ႉသမ်ႉပေႃးလဵၵ်ႉလူင်ၵႂႃႇယဝ်ႉ။
လွင်ႈသုၵ်ႉၸႂ် လွင်ႈၶမ်ၸႂ် လွင်ႈတုၵ်ႉၸႂ်ၼၼ်ႉ ဢမ်ႇလီၵဵပ်းဝႆႉႁင်းၵူၺ်းၼႃ၊ မၼ်းၵေႃႈမိူၼ်ၼင်ႇတၢင်းပဵၼ်ဢၼ်ၼိုင်ႈလႄႈ ႁႆၢႉႁႅင်းလိူဝ်သေတၢင်းပဵၼ်ၸဵပ်းၶႆႈၼၼ်ႉၵွၼ်ႇယဝ်ႉ၊ ပေႃးဝၼ်းႁိုင်မႃး မၼ်းတေႁဵတ်းႁႆၢႉႁဝ်းၶိုၼ်း မိူဝ်ႈႁဝ်းဢမ်ႇႁူႉတူဝ်လႆႈၼၼ်ႉယဝ်ႉ။
တၢင်းပဵၼ်ပႆၢးၸႂ်ၼႆႉ လီၵူဝ်လိူဝ်သေ တၢင်းပဵၼ်ပႆၢးတူဝ်ၵွၼ်ႇဢေႃႈ၊ ဢမ်ႇပဵၼ်သင်လေႃႇ မၼ်းဢမ်ႇပဵၼ်သင် ၼႆၼၼ်ႉ ႁဝ်းၶတ်းၸႂ်ထဵင်တူဝ်ၵဝ်ႇဝႆႉယူႇၵူၺ်း တိူၵ်ႈတီႈၼႂ်းၸႂ်ပေႃးႁပ်ႉဢမ်ႇလႆႈယဝ်ႉ ပူတ်းပွႆႇဢွၵ်ႇမႃးၽွင်ႈၶႃႈလႄႈ။
ၵၢၼ်တႅမ်ႈလိၵ်ႈ ဢမ်ႇၸႂ်ႈတၢင်းဢွၵ်ႇၵူႈလွင်ႈသေတႃႉ မၼ်းၵေႃႈၸွႆႈလႆႈဢေႃႈ၊ မၼ်းၸွႆႈၸတ်းၵၢၼ်တၢင်းဝူၼ်ႉႁဝ်းလႆႈဢေႃႈ။ ဢမ်ႇမီးၽႂ်ႁပ်ႉထွမ်ႇႁဝ်းလႆႈလီလိူဝ်သေပပ်ႉလႄႈၵမ်ၼၼ်ႉယဝ်ႉ။
ၽူႈဢၼ်လႆႈမႃးလူလိၵ်ႈႁူဝ်ၼႆႉသေတိပ်ႇတၼ်ယူႇၼၼ်ႉ ယုမ်ႇယမ်ဝႃႈတေဢဝ်ၶၢမ်ႈပူၼ်ႉမၼ်းလႆႈယူႇၶႃႈၼႃ။
သႅၼ်ငဝ်း
19/12/2025
လွင်ႈတုၵ်ႉၸႂ်ဢမ်ႇၸၢင်ႈလၢတ်ႈၼႄၽႂ်
