မိူဝ်ႈသိပ်းသွင်ပီႊပူၼ်ႉမႃး
သၢႆလႅင်းလိူၼ်ဝွႆး မွၵ်ႇၵုမ်ႈသုမ်ႇလပ်ႉလုၵ်ႈလၢဝ်ပေႃးဢမ်ႇႁၼ် သဵင်လူမ်းႁႅင်းႁႅင်း ထူဝ်းထွင်းပတ်ႉၶဝ်ႈႁူးၽႃ ၵတ်းလၢင်ႈငႅၼ်းငႅၼ်း မူၺ်မူၺ်ၵေႃႈမွင်းပႂ်ႉၸဝ်ႈၽူဝ်မၼ်း ယူႇတီႈမူႇၶဝ်ႈ ဢၼ်ၵတ်းသမ်ႉပေႃးယဵၼ်လူင်ဝႆႉၼၼ်ႉယဝ်ႉ။
ၵၢင်ၶိုၼ်းသမ်ႉပေႃးလပ်းသိင်ႇလိုၵ်းၼႃႇယဝ်ႉ ၸဝ်ႈၽူဝ်မၼ်းၸင်ႇပွၵ်ႈမႃး မၼ်းၵေႃႈ ၼႅတ်ႈပိုတ်ႇၽၵ်းတူ ပႂ်ႉႁပ်ႉတွၼ်ႈယူႇ။ သွင်ၶႃၼင်ႈၵုမ်းၵၼ်ယူႇတီႈမူႇၶဝ်ႈသေ
“ပိူၼ်ႈႁွင်ႉပီႈၵႂႃႇႁဵတ်းသင်လႃႇ”
“ပိူၼ်ႈသင်ႇႁႂ်ႈဢွၵ်ႇတၢင်းၼႆဝႃႇ”
“တေဢွၵ်ႇၵႂႃႇမိူဝ်ႈလႂ်”
“ၵၢင်ၼႂ်ၸဝ်ႉ မိူဝ်ႈၽုၵ်ႈၼႆႉယဝ်ႉ”
တႃႇၶဝ်ႈဢၼ်ၼင်ႈမွင်းမႃးႁိုင်ၼၼ်ႉ ၵိၼ်ၶဝ်ႈၵႂႃႇၵေႃႈ တေႃႈႁိုဝ်တေဝၢၼ် သမ်ႉပေႃးၵတ်းမူတ်းယဝ်ႉလူး မူၺ်မူၺ်ဝၢင်းၸေႃႉပႅတ်ႈသေ လုၵ်ႉဢွၵ်ႇၵႂႃႇပႅတ်ႈယူႇ ၶိူဝ်းလႅင်းၼၼ်ႉ တေၸၢင်ႈႁဵတ်းႁိုဝ်လႃႇ ၵႃႈလႆႈယဵၼ်ႉၸႂ်ၵိၼ်ၶဝ်ႈ ဢၼ်ၵတ်းလၢင်ႈလူင်ၼၼ်ႉ သမ်ႉပေႃးၵဵင်ႈမူတ်း။ ယွၼ်ႉမေးႁၵ်ႉၵေႃႉႁဵတ်းလူး ဢမ်ႇႁူႉဝႃႈမိူဝ်ႈလႂ်တေလႆႈမႃးၵိၼ်ၶိုၼ်း။
သမ်ႉဝႃႈမူၺ်မူၺ်တေၶႂ်ႈႁၢမ်ႈယူႇၵေႃႈ ႁိုဝ်တေႁၢမ်ႈလႆႈ ယွၼ်ႉပဵၼ်ပုၼ်ႈၽွၼ်းလႄႈၼႃႈၵၢၼ်ၸဝ်ႈၽူဝ်လူး တင်းႁႅၼ်းၶူဝ်းတင်းႁွင်ႉႁႆႈသေၸဵတ်ႉၼမ်ႉတႃမၼ်းၵႂႃႇၸွမ်းၵၼ်ယူႇ။ ဢၼ်လႆႈၽၢတ်ႇၵၼ်ၸိူင်ႉၼႆၼႆႉ ဢမ်ႇၸႂ်ႈပွၵ်ႈလဵဝ်ၵူၺ်း ပဵၼ်သင်လႄႈဢမ်ႇယၢမ်ႈသေပွၵ်ႈ။ ၶိူဝ်းလႅင်းၸုၵ်းမိုင်တၺ်းမူၺ်မူၺ်ၵမ်းၼိုင်ႈသေ ပႆၶဝ်ႈၵႂႃႇၵွတ်ႇဢဝ်ယူႇၼႂ်းဢွင်ႈဢူၵ်းမၼ်းၼၼ်ႉယူႇ တေၸၢင်ႈလၢတ်ႈသင်လႆႈလႃႇမိူဝ်ႈဝႃႈတူဝ်ၸဝ်ႈၵဝ်ႇၵေႃႈဢမ်ႇၶႂ်ႈၽၢတ်ႇလူး လိူဝ်သေဝႃႈဢမ်ႇလႆႈႁႆႈၸွမ်းၵၼၼ်ႉၵူၺ်း။
ၵၢင်ၼႂ်ၸဵမ်ၸဝ်ႉ မူၺ်မူၺ်ႁႅၼ်းပၼ်ၶဝ်ႈၼမ်ႉတၢင်းၵိၼ် သႂ်ႇပၼ်ၼႂ်းထူင်ယဝ်ႉ။ ၶိူဝ်းလႅင်းၸင်ႇၵွတ်ႇဢဝ်မူၺ်မူၺ် ဝႆႉၼႂ်းဢွင်ႈဢူၵ်းမၼ်းသေ
“ပီႈတေၸဵဝ်းၵႂႃႇၸဵဝ်းပွၵ်ႈမႃးၵူၺ်း တေမႃးတူၺ်းၼႃႈယုမ်ႉဢွၼ်ႇသူ တေမႃးၵိၼ်ၶဝ်ႈၽၵ်းဢၼ်သူႁဵတ်း တေမႃးယူႇႁိမ်းၶၢင်ႈသူၶိုၼ်း ယႃႇပေၵုမ်ႇႁႆႈယူႇယဝ်ႉ ၼွင်ႉၵေႃႈ ယႃႇၵုမ်ႇမႆႈၸႂ်ပီႈယူႇၵူၺ်း လုမ်းလႃးပၢႆးယူႇလီၽွင်ႈလႄႈ ၽွင်းမိူဝ်ႈပီႈၽၢတ်ႇၵႂႃႇယဝ်ႉၼၼ်ႉ ပီႈၸင်ႇတမ်းၸႂ်လႆႈ ၼွင်ႉတေလႆႈမီးႁႅင်းႁဵတ်းၶဝ်ႈၽၵ်းလဵင်ႉပီႈၼၼ်ႉၼႃႇ”
ၶိူဝ်းလႅင်းဢဝ်မိုဝ်းၸဵတ်ႉပၼ်ၼမ်ႉတႃ မူၺ်မူၺ်သေ ပႃးတၢင်းၵွင်ႈလႄႈထူင်ၶူဝ်းၸေးလင် ဢွၵ်ႇယၢၼ်ၵႂႃႇလွႆးလွႆးယဝ်ႉ မူၺ်မူၺ်ၼၼ်ႉၵေႃႈတူၺ်းၸွမ်းတေႃႇပေႃးသုတ်းသၢႆတႃၵႂႃႇယူႇယဝ်ႉ။
ဝၼ်းမိူဝ်ႈၼႆႉၵေႃႈပူၼ်ႉၵႂႃႇ မိူင်ႈၽုၵ်ႈၵေႃႈထိုင်မႃး မိူဝ်ႈႁိုဝ်းၵေႃႈႁွတ်ႈထိုင် မိူဝ်ႈၼိုင်ႈမိူဝ်ႈသွင် ဝၼ်းယဝ်ႉဝၼ်းပူၼ်ႉၶၢမ်ႈၵႂႃႇ လိူၼ်ၼိုင်ႈ ပီၼိုင်ႈ သွင်ပီ သၢမ်ပီ တဵမ်တဵမ် ၶိူဝ်းလႅင်းၵၵေႃႈဢမ်ႇပွၵ်ႈမႃး မူၺ်မူၺ်တႄႉ မွင်းၼပ်ႉပႂ်ႉဝၼ်းတေပွၵ်ႈမႃးၶိုၼ်းယူႇၵူႈဝၼ်းယဝ်ႉ ၵူၺ်းၵႃႈဢမ်ႇႁွတ်ႈမႃးသေပွၵ်ႈ။ မူၺ်မူၺ်ဢမ်ႇႁူႉဝႃႈတေပွၵ်ႈမႃးမိူဝ်ႈလႂ် ႁႅၼ်းမူႇၶဝ်ႈပႂ်ႉယူႇၵူႈဝၼ်း မီးယူႇၶမ်ႈၼိူင်ႈလႆႈငိၼ်းသဵင်ႁွင်ႉလႄႈ မူၺ်မူၺ်ၵေႃႈဢွၵ်ႇဢွၵ်ႇမႃးတူၺ်း ႁၼ်ပဵၼ်ၶိူဝ်းလႅင်းသေ လႅၼ်ႈၵွတ်ႇၵမ်းလဵဝ်။
သွင်ၶႃၵေႃႈၸူမ်းၸူမ်းသိူဝ်းႁပ်ႉတွၼ်ႈဢုပ်ႇၵၼ် ၵိၼ်ၶဝ်ႈၵုမ်းၵၼ်ပဵၼ်ဢၼ်ဝၢၼ်တေႉၼၼ်ႉယဝ်ႉ မိူၼ်ဝႃႈၶမ်ႈၶိုၼ်းၼႆႉပဵၼ်ၶမ်ႈၶိုၼ်းဢၼ်တဵမ်ထူၼ်ႈၵူႈလွင်ႈတွၼ်ႈတႃႇသွင်ၶႃၼၼ်ႉယူႇ။
ထိုင်ၼင်ႇၵၢင်ၼႂ်ၸဝ်ႉ မူၺ်မူၺ်တိုၼ်ႇမႃးဢမ်ႇႁၼ်ၽႂ်လႄႈ လႆႈႁူႉဝႃႈဢၼ်ပဵၼ်ယူႇၶမ်ႈဝႃးၼၼ်ႉ ပဵၼ်လွင်ႈၼွၼ်းၾၼ်ၵူၺ်း။ ယၢမ်းၼၼ်ႉၸင်ႇမီးၵူၼ်းသိုၵ်းၵေႃႉၼိုင်ႈ ဢဝ်ၶူင်းၶွင်ၶိူဝ်းလႅင်းၸိူဝ်းၼၼ်ႉမႃးပၼ်ယဝ်ႉ။ မူၺ်မူၺ်ႁူႉၵမ်းလဵဝ် ဝႃႈပဵၼ်ၶူဝ်းၶိူဝ်းလႅင်းၼႆ
“ပီႈၶိူဝ်းလႅင်းလူး”
“ၶိူဝ်းလႅင်းၶဝ်လူႉတၢႆၵႂႃႇၼႂ်းပၢင်တိုၵ်းယဝ်ႉ”
မူၺ်မူၺ်ၵေႃႈသမ်ႉပေႃႈႁိူဝ်ႉဢူၼ်ႈၵႂႃႇတၢင်းတူဝ် ႁူဝ်ၸႂ်လိူတ်ႇမႆႈ ၼမ်ႉတႃယွႆႉလႆဢွၵ်ႇမႃး ဢမ်ႇထၢတ်ႇဢမ်ႇဝၢႆး ႁွင်ႉႁႆႈမိူၼ်ဢူၵ်းႁူဝ်ၸႂ်သမ်ႉပေႃးၶႂ်ႈတႅၵ်ႇလႅဝ်ၵႂႃႇယဝ်ႉ။
“သမ်ႉဝႃႈတူဝ်သူဢမ်ႇယူႇႁိမ်းၸမ်ၵေႃႈ ၼႂ်းႁူဝ်ၸႂ်ႁဝ်းၼၼ်ႉ တိုၼ်းမီးသူယူႇႁိမ်းၸမ်တႃႇသေႇ”
တႅမ်ႈ-ငဝ်မွင်မိုတ်းမူဝ်း
တႅမ်ႈမိူဝ်ႈပီႊ 2020
