သႅင်လိုၼ်းၵေႃႈ မိူဝ်းမိူဝ်းမႃးမႃး လုမ်းလႃးၸိုၼ်ႈမိူင်းယူႇႁဵတ်းၼၼ် ဝၼ်းယဝ်ႉဝၼ်းလိူၼ်ယဝ်ႉလိူၼ်။
မိူဝ်ႈလုၵ်ႉႁိူၼ်းမၼ်း မိူဝ်းႁိူၼ်းၸိုၼ်ႈမိူင်း မႃးၸွမ်းတၢင်းၼၼ်ႉသမ်ႉ ၺႃးပႃႈသႅင်သေ
“မိူၼ်ႁိုဝ်လႃႇဢေႉလုၵ်ႈပႂ်ႉမႂ်ႇၶဝ်”
“မိူၼ်မီးႁိူၼ်းသွင်လင်ၼၼ်ႉၼႃႇပႃႈဝႃႈ ဢဝ်ၵူၼ်းဝၢၼ်ႈလဵဝ်ၵၼ်ၵေႃႈ”
“ၸိုၼ်ႈမိူင်းမိူၼ်ႁိုဝ်ၽွင်ႈ ၵဝ်မိူဝ်းၵဝ်ဢမ်ႇၵႆႉႁၼ်မၼ်းၼေႈ”
“ၶႅၼ်းမႃးၼမ်ယဝ်ႉၵဝ်ႇဝႃႈ ၶႅၼ်မၼ်းတႄႉႁၢႆယဝ်ႉ ၶႃမၼ်းတႄႉတိုၵ်ႉၶေႉယူႇဢိတ်းတိတ်းၼၼ်ႉယိုင် ပႆႇပႆလႆႈလီလီ”
“မိူဝ်ႈလႂ်လႃႇ”
“ၽႂ်တေႁူႉပႃႈၵေႃႈ”
“ၶိူဝ်တေႁဵတ်းၶႅၵ်ႇမိူဝ်ႈလႂ်ၼႆဢႄႈ”
“ဢမ်ႇတၼ်းႁဵတ်းယဝ်ႉယူဝ်ႉ..ၶႃမၼ်းၶႅၼ်းယဝ်ႉ သမ်ႉပေႃးလူဝ်ႇၵႂႃႇယဝ်ႉၼၼ်ႉ”
“ဢိူဝ်ႈၼေႃႈမႂ်းၵေႃႈ ပေႉပၼ်ၵႂႃႇလႆႈၼေႃ”
“ဢမ်ႇပၼ်ၵႂႃႇလႆႈယူႇၼႄႇ ၵၢၼ်ၶဝ်ယဝ်ႉလူးၸၢင်ႈႁဵတ်းႁိုဝ်လႃႇ ၸဵမ်မိူဝ်ႈပႆႇဢဝ်ၵေႃႈ ႁူႉယူႇလူးဝႃႈမၼ်းမိူၼ်ႁိုဝ်ၼႆ ပေႃးဢမ်ႇၵျိူၵ်ႈၵေႃႈ ၸၢင်ႈဢဝ်ၸဵမ်တေႇမၼ်းႁဵတ်းသင်၊ ယူႇၸိူင်ႉၼႆယဝ်ႉ ပိူၼ်ႈဝႃႈမီးၵေႃႈမိူၼ်ဢမ်ႇမီးၼႆၼႆႉ”
“မႅၼ်ႈမႂ်းယဝ်ႉပေႃးၼၼ်”
မိူဝ်ႈဢၼ်သႅင်လိုၼ်းမိူဝ်းထိုင်ႁိူၼ်း မီးၵူၼ်းမႃးႁႃၸိုၼ်ႈမိူင်းယဝ်ႉ ဢွၵ်ႇၵႂႃႇမိူဝ်ႈသႅင်လိုၼ်းၶဝ်ႈႁိူၼ်းမႃး။
“ၶဝ်မႃး..မီးလွင်ႈသင်လႃႇ မႃးလၢတ်ႈႁႂ်ႈသူမိူဝ်းႁႃႉ”
“ဢမ်ႇ..ၶဝ်မႃးလႄႇႁဝ်းၵူၺ်း”
“ၸႂ်ႈယူႇတေႉ..”
“တေႉဢေႃႈ..”
“မႃးဢဝ်ၵမ်ႉၵူၺ်းဢေႉ တမ်ႉဢမ်ႇတၼ်းလႆႈလဵင်ႉၼမ်ႉၵတ်းၶဝ်ၵွၼ်ႇ ပေႃးမိူဝ်းယဝ်ႉလႃႇ”
“ၶဝ်မႃးတူၺ်းၵူၺ်း”
သႅင်လိုၼ်းယုမ်ႉႁဵတ်းၼၼ်သေ
“ၸၢင်ႈတေပဵၼ်သင်ပုၼ်ႈၽွၼ်းသူယူႇယဝ်ႉလူး”
ၸိုၼ်ႈမိူင်း မႃးယိပ်းဢဝ်မိုဝ်းသႅင်လိုၼ်းသေယဝ်ႉ
“သူ..လိူၼ်ႁႃႈမႂ်ႇၼႆႉ ႁဝ်းႁဵတ်းၶႅၵ်ႇၵၼ်လီႁိုဝ်ႉ”
သႅင်လိုၼ်းၼိမ်ၵႂႃႇသေ ယၵ်ႉတူၺ်းၸိုၼ်ႈမိူင်းယူႇတင်းႁိုင် ဢမ်ႇတၵ်းသဵင်သင်။
“ပဵၼ်သင်လႃႇသူ ဢမ်ႇၶႂ်ႈတေႇႁႃႉ”
ၵူမ်ႈၼႃႈမၼ်းလူင်းယဝ်ႉ ဢမ်ႇပႆႇတၵ်းသဵင်လႆႈ။
“ပဵၼ်သင်တေႉလႃႇ ႁဝ်းၸႂ်ဢမ်ႇလီယဝ်ႉဢိူဝ်ႈၼႃႈ”
“ႁဝ်းဝူၼ်ႉဝႃႈၸၢတ်ႈၼႆႉ တေဢမ်ႇလႆႈငိၼ်းၵႂၢမ်းၶေႃႈၼႆႉလႆႈယဝ်ႉ”
“မၼ်းလီတိူဝ်ႉၸႂ်တၢၼ်ႇၼၼ်ႉႁႃႉ”
“ဢမ်ႇႁူႉယဝ်ႉ မၼ်းဢိုၵ်ႉၼိုၵ်ႉယူႇၼႂ်းၸႂ်ၼႆႉဢိူဝ်ႈ ၸွင်ႇတေမီးၽႂ်တေၶႂ်ႈႁဵတ်းၶႅၵ်ႇၸွမ်းၵူၼ်းၸိူင်ႉႁဝ်းလႆႈႁိုဝ်၊ ၸွင်ႇတေယွမ်းႁပ်ႉႁဝ်းလႆႈႁိုဝ်၊ ၵူၼ်းၵေႃႉဢၼ်ႁဝ်းလိူၵ်ႈၼၼ်ႉသမ်ႉ ပဵၼ်ၵူၼ်းၵေႃႉဢၼ်ႁဝ်းဢမ်ႇႁူႉဝႃႈ ၸွင်ႇႁဝ်းတေလႆႈယူႇၸွမ်းၶဝ်တေႉယူႇႁႃႉ ႁဝ်းဢမ်ႇဝူၼ်ႉဝႃႈတေလႆႈငိၼ်းၵႂၢမ်းၶေႃႈၼႆႉလႆႈ တေလႆႈငိၼ်း
တီႈသူၵေႃႉလၢတ်ႈ”
ၸိုၼ်ႈမိူင်းၵေႃႈ ဢဝ်တူဝ်သႅင်လိုၼ်းမႃးၵွတ်ႇဝႆႉၼႂ်းဢွင်ႈဢူၵ်းမၼ်းသေ
“သူတေလႆႈယဵၼ်ႉမႃးတၢၼ်ႇႁိုဝ် ႁၼ်ႁဝ်းပဵၼ်သင်လႃႇ ၵူႈပွၵ်ႈၵေႃႈထဵင်ဢဝ်ထဵင်ဢဝ် ပေႃးလွင်ႈလူဝ်ႇလၢတ်ႈသမ်ႉယဵၼ်ဝႆႉ ပေႃးသူၶႂ်ႈႁဵတ်းသူၵေႃႈလၢတ်ႈလႆႈယူႇလူး ၸၢင်ႈတေပဵၼ်ႁင် တၢၼ်ႇဝႃႈႁဝ်းတေဢမ်ႇဢဝ်သူယဝ်ႈ”
“ဢိုမ်ႈ..ဢမ်ႇဢဝ်ၵေႃႈၸၢင်ႈတေပဵၼ်သင် ႁဝ်းၵေႃႈဢမ်ႇႁူႉမိူၼ်ၵၼ်ဝႃႈ သူတေၵႂႃႇထႅင်ႈမိူဝ်ႈလႂ်လူး ပေႃးႁဝ်းႁဵတ်းယဝ်ႉ ႁဝ်းၵေႃႈသမ်ႉလႆႈႁဵတ်းၶႅၵ်ႇယူႇႁင်းၵူၺ်းတေႁဵတ်းႁိုဝ်လႃႇ လူဝ်ႇၵႂႃႇႁႃတၢင်ႇၵေႃႉမႃးတႅၼ်းၵူၺ်းဢိူဝ်ႈ”
“ၼၼ်ႉ..ၽၢႆႇလၢတ်ႈၶတ်းပိူၼ်ႈၼႆႉမေႃၼႃႇ လၢတ်ႈလီလီတေႃႇၵၼ်ၼႆႉၸွင်ႇပဵၼ်လႆႈႁိုဝ်”
“ယွမ်းႁပ်ႉဢမ်ႇလႆႈၵေႃႈယႃႇမႃးဢဝ်ႁဝ်းလႄႈ”
“ၸဵမ်မိူဝ်ႈႁၼ်သူ သူၵေႃႈပဵၼ်ၵူၼ်းသူပ်းၽၢႆထဵင်ၸႃးယူႇယဝ်ႉၼႃႇ ပဵၼ်ၵူၼ်းဢဝ်တၢင်းယုမ်ႉႁႄႉပႅတ်ႈလွင်ႈတုၵ်ႉၸႂ် ဢမ်ႇၶႂ်ႈႁႂ်ႈပိူၼ်ႈႁူႉဝႃႈဢူၼ်ႈဢွၼ်ႇ ဢဝ်သိူင်ႇသိမ်းဝႆႉသေ ၵႂၢမ်းယဝ်ႉၵႂၢမ်းယွၵ်ႇၵႂႃႇၵူႈဝၼ်းဝၼ်းၼၼ်ႉ ႁၼ်သူမီးတၢင်းသိူဝ်းဢိူဝ်ႈ ၵူၺ်းၵႃႈသၢႆတႃသူၼၼ်ႉ မီးလွင်ႈမွင်ဝႆႉယူႇ ၶႂၢင်းပၼ်ႁဝ်းၼႃႈ ဢၼ်ႁဝ်းပဵၼ်တီႈပိုင်ႈပၼ်သူဢမ်ႇလႆႈ”
“မၼ်းယၢမ်ႈၵႂႃႇယဝ်ႉ မၢင်ပွၵ်ႈၵေႃႈဢမ်ႇႁူႉဝႃႈ ႁဝ်းတေလႆႈလၢတ်ႈၸိူင်ႉႁိုဝ် ဢမ်ႇပဵၼ်သင်လေႃႇ မၼ်းတေပူၼ်ႉၵႂႃႇၵူၺ်း ယၢမ်ႈယဝ်ႉၼႆသေ ႁိုင်မႃးၵေႃႈလိုမ်းယဝ်ႉ”
“ႁူႉဝႆႉလႄႈၼႃႈ မိူဝ်ႈလဵဝ်ဢမ်ႇလႆႈမီးသူၵေႃႉလဵဝ်ၵူၺ်းယဝ်ႉ မီးသင်ပဵၼ်သင်ၵေႃႈလၢတ်ႈၼႄၵၼ်လႄႈ ႁဵတ်းၵူၺ်းလႆႈႁိုဝ်ဢမ်ႇလႆႈၵေႃႈလၢတ်ႈၼႄၵၼ်ဢိူဝ်ႈ ယႃႇပေဝူၼ်ႉႁင်းၵူၺ်းဝႃႈႁဝ်းဢမ်ႇတၼ်း၊ ႁဝ်းႁဵတ်းၵၢၼ်ယူဝ်ႉၼႆ ႁဝ်းယွၼ်းႁႂ်ႈသူသုၵ်ႉသၵ်ႉၶၢဝ်းယၢမ်းႁဝ်းၽွင်ႈၵေႃႈၸၢင်ႈတေပဵၼ်သင်..ႁိုမ်?”
“ဢၼ်..တေၵႂႃႇတၢင်းလႂ်ၵေႃႈဢမ်ႇလၢတ်ႈ ပဵၼ်လူႉၵေႃႈဢမ်ႇႁူႉ ယူႇလႂ်ၵေႃႈဢမ်ႇႁၼ် တီႈၵပ်းသိုပ်ႇၵေႃႈဢမ်ႇမီးၼႆႉ တေလႆႈႁဵတ်းႁိုဝ်လႃႇၸိူင်ႉၼၼ် ႁၼ်ၵၼ်ၵူႈဝၼ်းသေ ထၢင်ႇဝႃႈတေမိူၼ်ၼႆတႃႇသေႇႁိုဝ် ဢမ်ႇမီးတီႈၵပ်းသိုပ်ႇသင်ၵၼ်ဝႆႉ ပေႃးၶုၵ်းၸႂ်လႆႈၵေႃႈဢမ်ႇယူႇယဝ်ႉ”
“ၸိုင်ပဵၼ်ၽူႈၸွပ်ႇ ယူဝ်ဝႃႈတေႁၼ်ယူႇၼႆၵႃႈ”
“ပေႃးၸဝ်ႈမၼ်းဢမ်ႇပၼ်ႁင်းၵူၺ်းတႄႉ ဢမ်ႇၶႂ်ႈလႆႈၵွၼ်ႇ”
“ပေႃးပဵၼ်ပိူၼ်ႈတႄႉယွၼ်းဢဝ်ယွၼ်းဢဝ်”
“ၸွင်ႇသူႁမ်ႉၸႂ်ႈပိူၼ်ႈႁိုဝ်လႃႇ”
“ၼၼ်ႉယဝ်ႉၼႆ မီးလႂ်ၾူၼ်းသူ”
သႅင်လိုၼ်းၵေႃႈဢဝ်ယိုၼ်ႈပၼ်ယဝ်ႉ၊ ၸိုၼ်ႈမိူင်းၵေႃႈသႂ်ႇပၼ်ၵႂႃႇလႄႈ သမ်ႉယၢမ်ႈပဵၼ်ၵူၼ်းၵေႃႉဢၼ်ၵႆႉမႃးၵဝ်းမၼ်းၼႃႇၼၼ်ႉသေ။
“သူၼႆႉလၢႆးလိင်ႉမၼ်းၼမ်ၼႃႇၼေႃ”
ယုမ်ႉယုမ်ႉသေ “သင်သူလႃႇ”
“ၶႂ်ႈလၢတ်ႈၵၼ်ၵေႃႈဢမ်ႇလၢတ်ႈလီလီ”
“ႁဝ်းႁဵတ်းႁင်”
“ပဵၼ်သူဢိူဝ်ႈၼႆႉၼေႃႈ ဢၼ်မႃးၵဝ်းႁဝ်းၼႆႉ”
“ၶွင်သူပလွၵ်ႉပႅတ်ႈႁဝ်းယဝ်ႉလႄႇ ႁိုဝ်ၸၢင်ႈလၢတ်ႈတေႃႇသူလႆႈ ၶႂ်ႈလၢတ်ႈတေႃႇ ၸႂ်ထိုင်ယူႇၵေႃႈ ဢမ်ႇၸၢင်ႈႁဵတ်းႁိုဝ်လူႉ ၶွင်ပိူၼ်ႈဢမ်ႇႁၵ်ႉႁဝ်းလႆႈလူး”
“သူၼႆႉတႄႉ မီးထႅင်ႈယူႇႁႃႉ ဢၼ်သူႁဵတ်းတေႃႇႁဝ်းဝႆႉၼႆႉ”
“ဢမ်ႇမီးယဝ်ႉ”
“ဢမ်ႇယုမ်ႇလႆႈတေႉဢိူဝ်ႈ”
“ပေႃးသူဢမ်ႇယုမ်ႇႁဝ်းသူတေယုမ်ႇၽႂ်”
သႅင်လိုၼ်းၵေႃႈမႄးၼင်ႈလီလီသေ ယၵ်ႉတူၺ်းၼႃႈၸိုၼ်ႈမိူင်းယဝ်ႉ
“မိူဝ်ႈဢွၼ်တၢင်းၵႆႉႁၼ်သူၼႃႈတူႇတႃႇသေႇ ယွၼ်ႉသင်လႄႈႁဵတ်းႁႂ်ႈသူပဵၼ်ၸိူင်ႉၼၼ်လႃႇ”
“ပိူၼ်ႈၵႆႉတၵ်ႉႁဝ်းဝႃႈႁဝ်းယုမ်ႉႁၢင်ႈလီၼႃႇၼႆဝႃႇ..ႁဝ်းဢမ်ႇပေႃးၵျိူၵ်ႈယုမ်ႉ ၵူဝ်ဝႃႈတေမီးၵူၼ်းမႃးၵျိူၵ်ႈႁဝ်းလႄႈ ၵူဝ်လႆႈၺႃးၵူၼ်းမိူၼ်ၼင်ႇ ၵေႃႉဢၼ်ပႅတ်ႈႁဝ်းၵႂႃႇၼၼ်ႉဢိူဝ်ႈ”
“ၶႂ်ႈဝႃႈ ၵူဝ်ႁဝ်းၵျိူၵ်ႈသူႁေလႄႈၼႃႈတူႇသႂ်ႇႁဝ်းၼႆၵႃႈၼၼ်ႉ”
“ဢိုမ်ႈ..”
“ပဵၼ်ႁိုဝ်လႃႇၵမ်းၼႆႉ”
“ဢမ်ႇႁဵတ်းထႅင်ႈယဝ်ႉၶႃႈ”
“ႁဵတ်းလႄႈၸၢင်ႈပဵၼ်သင်..ၵူၺ်းၵႃႈၵႂႃႇႁဵတ်းတေႃႇတၢင်ႇၵေႃႉၼၼ်ႉၼႃႇ”
“သူၼႆႉတႄႉ..”
ဝၼ်းပၢင်ၶႅၵ်ႇၵေႃႈမႃးထိုင် ပီႈၼွင်ႉၼႂ်းဝၢၼ်ႈဢွၼ်ၵၼ်မႃးႁူမ်ၸူမ်းၸွမ်း၊ ပေႃႈမႄႈၶဝ်တႄႉၸူမ်းသိူဝ်းယုမ်ႉယၢႆႈႁပ်ႉတွၼ်ႈၶႅၵ်ႇမႃးပွႆး၊ ၸဝ်ႈမၢဝ်ႇသၢဝ်မၼ်းၵေႃႈ ၸုၵ်းပႂ်ႉၼင်ႈပႂ်ႉထႆႇၶႅပ်းႁၢင်ႈၵႅမ်ႈပေႃးၵူၼ်ႉ၊ ၶႃပေႃးဢူၼ်ႈယဝ်ႉ။
ပီႈၸွမ်ၵေႃႈတင်းလုၵ်ႈတင်းမေးဢွၼ်ၵၼ်မႃး ယိၼ်းၸူမ်းၸွမ်းၼွင်ႉယိင်းမၼ်းလႆႈၽူဝ်ယဝ်ႉ။
“ဢၢႆႈၸၢႆး..မႂ်းဢမ်ႇလႆႈမႃးႁိူၼ်းႁ မေးမႂ်းမီးယူႇၼႂ်းႁွင်ႈၵိူတ်ႇလုၵ်ႈယဝ်ႉဢိူဝ်ႈမိူဝ်ႈလဵဝ်”
မႄႈၸိုၼ်ႈမိူင်းသူင်ႇၶေႃႈၵႂၢမ်းၽၢၵ်ႇပၼ်လုၵ်ႈၸၢႆးမၼ်း ၵူၺ်းၵႃႈ ၵေႃႉပဵၼ်လုၵ်ႈၸၢႆးၼၼ်ႉတႄႉ ဢမ်ႇပႆႇတူၺ်းလႄႈပႆႇတွပ်ႇသင်မႃး။
