တွၼ်ႈသိပ်းႁႃႈ
လုၵ်ႈႁဵၼ်းတေၵတ်ႉၶႅၼ်ႇႁိုဝ် တေပဵၼ်ၵူၼ်းၺၢမ်ႉဢၼ်ဝႃႈၼၼ်ႉ ၵူၼ်းၵမ်ႈၼမ် ၶဝ်တေတႅပ်းတတ်းၵၼ်လူၺ်ႈ မၢၵ်ႉလိၵ်ႈ လႄႈ မၢၵ်ႉလိၵ်ႈၼၼ်ႉ ပဵၼ်ၵူႈလွင်ႈတွၼ်ႈတႃႇလုၵ်ႈႁဵၼ်းတေလႆႈမီးယဝ်ႉ။ သင်ၶႂ်ႈပဵၼ်လုၵ်ႈႁဵၼ်းလီ လုၵ်ႈႁဵၼ်းၵတ်ႉၶႅၼ်ႇ ဢၼ်ၶူးၶဝ်ႁၵ်ႉႁွမ်ၼႆၵေႃႈ တေလႆႈမီးမၢၵ်ႉလိၵ်ႈဢၼ်ႁၢင်ႈလီ ပၼ်ၶူးၶဝ်လႆႈႁၢၼ်ႉၸႂ်ၼၼ်ႉ ၸင်ႇတေမၵ်းမၼ်ႈယဝ်ႉ။
ယွၼ်ႉမၢၵ်ႉလိၵ်ႈၼႆႉသေ ႁဵတ်းႁႂ်ႈတူၺ်းၶၢမ်ႈပူၼ်ႉ ၼမ်ႉၵတ်ႉလုၵ်ႈႁဵၼ်းဢၼ်မီးၼၼ်ႉၵႂႃႇပႅတ်ႈယူႇ၊ လုၵ်ႈႁဵၼ်းၵူႈၵေႃႉ တၢင်းသူၼ်ၸႂ်ၵေႃႉၼိုင်ႈလႄႈၵေႃႉၼိုင်ႈ တိုၼ်းမီးဢမ်ႇမိူၼ်ၵၼ်ယူႇယဝ်ႉ၊ တၢင်းယိူင်းဢၢၼ်းၵေႃႉၼိုင်ႈလႄႈၵေႃႉၼိုင်ႈ တိုၼ်းပႅၵ်ႇပိူင်ႈၵၼ်၊ ၼမ်ႉၵတ်ႉၽႂ်ၼမ်ႉၵတ်ႉမၼ်းၵေႃႈတိုၼ်းမီးဝႆႉယူႇယဝ်ႉ။ ၵူၺ်းၵႃႈ ၵမ်ႈၼမ် ဢမ်ႇယွမ်းႁပ်ႉလွင်ႈၼႆႉလႄႈ တွၼ်ႈတႃႇႁႂ်ႈမၼ်းလီမၼ်းၶႅမ်ႉၼႆၼၼ်ႉ ဢဝ်မၢၵ်ႉလိၵ်ႈပဵၼ်ၵႅၼ်ၵၢင်သေ မၵ်းတမ်းဝႃႈ ပေႃးလႆႈမၢၵ်ႉလိၵ်ႈတဵမ် ၸင်ႇတေပဵၼ်ၵူၼ်းမီးၼမ်ႉၵတ်ႉ ၼႆယဝ်ႉ။
မၼ်းဢမ်ႇပဵၼ်လႆႈယူႇယဝ်ႉ လုၵ်ႈႁဵၼ်းၵူႈၵေႃႉတေၶႅၼ်ႇမိူၼ်ၵၼ်မူတ်းလႄႈ တေမီးၼမ်ႉၵတ်ႉမိူၼ်ၵၼ်မူတ်း၊ ၼမ်ႉၵတ်ႉ၊ လွင်ႈႁဵၼ်းႁူႉ ၵေႃႉၼိုင်ႈလႄႈၵေႃႉၼိုင်ႈ တိုၼ်းပိူင်ႈၵၼ်။ မၢင်ၵေႃႉ ႁဵၼ်းႁူႉဝႆး လႄႈ မၢင်ၵေႃႉသမ်ႉႁဵၼ်းႁူႉထိူင်း၊ မၢင်ၵေႃႉ လူပွင်ႇၸႂ်ငၢႆႈ မၢင်ၵေႃႉလႆႈၸႂ်ထွမ်ႇၶဝ်ႈၸႂ်လိူဝ်၊ မၢင်ၵေႃႉၶႅၼ်ႇလိၵ်ႈ ၵူၺ်းဢမ်ႇမေႃႁဵတ်းၵၢၼ်၊ မၢင်ၵေႃႉႁဵတ်းၵၢၼ်ၶႅၼ်ႇ ၵူၺ်းဢမ်ႇၶႅၼ်ႇလိၵ်ႈ၊ ၼႂ်းႁူင်းႁဵၼ်းသွၼ်ပဵၼ်လၢႆၽႃႇသႃႇ မၢင်ၵေႃႉတေၶႅၼ်ႇၵူႈၽႃႇသႃႇ ၵူၺ်းၵႃႈ မၢင်ၵေႃႉ ဢမ်ႇၶႅၼ်ႇတင်းမူတ်းသေ သူၼ်ၸႂ်ဢၼ်လႂ်ဢၼ်ၼိုင်ႈၵူၺ်းၵေႃႈ မီးယဝ်ႉ မၼ်းပဵၼ်သၽႃႇဝၵူၺ်းဢမ်ႇၸႂ်ႈႁိုဝ်။
ၵူၺ်းၵႃႈၵူၼ်းၵမ်ႈၼမ် ဢမ်ႇတွၼ်ႉႁွၼ်ႇၾၢင်ႉတူၺ်းလူၵွၼ်ႇဝႃႈ တူဝ်ၸဝ်ႈၵဝ်ႇၼၼ်ႉ မီးၼမ်ႉၵတ်ႉႁဵတ်းသင်လႆႈလႄႈ ၶႂ်ႈႁဵတ်းသင်၊ ၶႂ်ႈပဵၼ်သင်၊ ႁူႉၵုမ်ႇလႆၵႂႃႇၸွမ်းသဵၼ်ႈတၢင်း ဢၼ်ပိူၼ်ႈသိူဝ်ႇပၼ်၊ တၢင်းဢၼ်ပိူၼ်ႈဝႃႈမၼ်းၶိုၵ်ႉၶႅမ်ႉ လႄႈ ႁၢင်ႈလီၼၼ်ႉၵူၺ်း၊ သူၼ်ၸႂ်သၢႆတႃၵူၼ်းၼမ် လိူဝ်သေၵၢင်ၸႂ်တူဝ်ၸဝ်ႈၵဝ်ႇ ဢၼ်ၶႂ်ႈႁဵတ်းၶႂ်ႈသၢင်ႈၼၼ်ႉယဝ်ႉ။
ဢၼ်ဝႃႈၶတ်းၸႂ်ႁဵၼ်းၼၼ်ႉ ပဵၼ်ၸိူင်ႉႁိုဝ်လႃႇ တေလႆႈတေႇတီႈလႂ်လႃႇ ၶႃႈဢမ်ႇႁူႉသေဢိတ်း၊ တူၺ်းႁၼ်ၵွင်ပပ်ႉဢၼ်ၶူးၶဝ်သွၼ် ၵၢၼ်ႁိူၼ်းဢၼ်ပၼ်မႃး မၼ်းမီးၼမ်လႄႈယၢပ်ႇတေႉယဝ်ႉ ၶႃႈတေလႆႈႁဵတ်းႁိုဝ်၊ ၶႃႈဢမ်ႇမေႃႁဵတ်းလႄႈ ၶႂ်ႈႁႆႈတေႉယဝ်ႉ။ ပဵၼ်လုၵ်ႈႁဵၼ်းၼႆႉ တုၵ်ႉၶတေႉယဝ်ႉ မိူဝ်ႈဢၼ်ၶႃႈ ၼင်ႈဝူၼ်ႉယူႇၼၼ်ႉ ႁဵတ်းႁႂ်ႈၶႃႈဝူၼ်ႉထိုင်ၵူၼ်းၵေႃႉၼိုင်ႈ ၵေႃႉဢၼ်ၸုင်ၸၼ်ႁႂ်ႈၶႃႈပဵၼ်လုၵ်ႈႁဵၼ်းလီၼၼ်ႉ မၼ်းၵႆႉလၢတ်ႈတႃႇသေႇဝႃႈ−
“မၼ်းတေယၢပ်ႇႁိုဝ်တေငၢႆႈ ပေႃးဢမ်ႇပႆႇလႆႈႁဵတ်းတူၺ်းသူတေႁဵတ်းႁိုဝ်ႁူႉလႃႇ! ဢမ်ႇဝႃႈတေပဵၼ်ၸိူင်ႉႁိုဝ် မၼ်းၵေႃႈတိုၼ်းမီးလွၵ်းလၢႆးၵႄႈၶႆမၼ်းယူႇယဝ်ႉ ယုမ်ႇႁဝ်းလႄႈ!”
ပဵၼ်ၶေႃႈၵႂၢမ်းဢၼ်မၼ်းလၢတ်ႈယူႇတႃႇသေႇၼၼ်ႉလႄႈ မၼ်းၵေႃႈၸွႆႈသွၼ်ပၼ်ၶႃႈ မိူၼ်ဝႃႈၵူႈလွင်ႈၼၼ်ႉတေငၢႆႈမႃးတေႉၼင်ႇဝႃႈယဝ်ႉ။ ၵူၺ်းၵႃႈ ယၢမ်းၼႆႉ ဢမ်ႇမီးမၼ်းယဝ်ႉ ၶေႃႈၵႂၢမ်းဢၼ်မၼ်းလၢတ်ႈၼၼ်ႉၵေႃႈ မိူၼ်တေဢမ်ႇမီးတီႈပွင်ႇသင်တွၼ်ႈတႃႇၶႃႈယဝ်ႉ။ ပေႃးၶတ်းၸႂ်ႁဵၼ်းၵေႃႈ ႁဵတ်းႁႂ်ႈဝူၼ်ႉထိုင်မၼ်း ထိုင်တီႈဢမ်ႇၶႂ်ႈၶတ်းၸႂ်ယဝ်ႉ၊ ၶႃႈဢမ်ႇၶႂ်ႈႁဵတ်းယဝ်ႉ၊ ၶႃႈၸႂ်ထိုင်မၼ်းတေႉယဝ်ႉ။
ၶႃႈယဵၼ်ႉၸႂ်ဢမ်ႇလႆႈ ထိုင်တီႈသမ်ႉပေႃးႁွင်ႉႁႆႈဢွၵ်ႇမႃး ၼႂ်းၵၢင်ႁိူၼ်းၼၼ်ႉယူႇ။
“ဢေးယိင်း! မႂ်းပဵၼ်သင်လႃႇ!” ဢၢႆႈၸၢႆးႁဝ်းၼၼ်ႉ မိူၼ်တေတူၵ်းၸႂ်သေထၢမ်။
ၶႃႈၵေႃႈဢမ်ႇႁူႉဝႃႈတေလႆႈလၢတ်ႈသင်လႄႈ“လိၵ်ႈမၼ်းယၢပ်ႇၼႃႇ!”
“ယၢပ်ႇတီႈလႂ်လႃႇ ဢမ်ႇပွင်ႇၸႂ်ၵေႃႈထၢမ်လႄႈ သမ်ႉတေႁႆႈႁဵတ်းသင် ႁႆႈယဝ်ႉမၼ်းတေႁဵတ်းလႆႈလီမႃးၵေႃႈဢမ်ႇၸႂ်ႈ”
“မႂ်းတေႁိုတ်းမၼ်းႁဵတ်းသင်လႃႇ! ၵမ်ႉတေဢမ်ႇပဵၼ်ႁဵတ်းၵၢၼ်ႁိူၼ်းမၼ်းၵွၼ်ႇယဝ်ႉ” ၼၢႆးႁဝ်းလၢတ်ႈၸွမ်း။
“ယၢပ်ႇတီႈလႂ်လႃႇ! ထၢမ်မႃးလႄႈ”
ၶႃႈၵေႃႈ ဢဝ်ပပ်ႉပၢႆးၼပ်ႉဢၼ်ၶူးႁႂ်ႈတွၵ်ႈၼၼ်ႉ ယိုၼ်ႈပၼ်သေယဝ်ႉ
“တင်းမူတ်းယဝ်ႉ ၶႃႈဢမ်ႇမေႃႁဵတ်းသေဢိတ်း”
ဢၢႆႈၸၢႆးႁဝ်းၼၼ်ႉၵေႃႈ တင်ႈၸႂ်တင်ႈၶေႃးသေ သွၼ်ၼႄၶႃႈၵႂႃႇလီလီယူႇ ႁဵတ်းၵႂႃႇႁဵတ်းမႃး မိူၼ်ဝႃႈမၼ်းၵေႃႈ ဢမ်ႇပေႃးယုမ်ႇၸႂ်ၵႃႈႁိုဝ်၊ တေပဵၼ်ယွၼ်ႉႁဵၼ်းမႃးႁိုင်ယဝ်ႉလႄႈ ဢၼ်လႂ်ပဵၼ်ဢၼ်လႂ်ၵေႃႈ ဢမ်ႇၶႂ်ႈတွင်းၶိုၼ်းယဝ်ႉ၊ ပေႃးတူၺ်းလၢႆးတွၵ်ႈမၼ်းၼႆၵေႃႈတေႁူႉယူႇ ၵူၺ်းၼႂ်းပပ်ႉၶႃႈၼၼ်ႉသမ်ႉ ဢၼ်လႂ်ပဵၼ်ဢၼ်လႂ်ၵေႃႈဢမ်ႇႁူႉ ႁဵတ်းယဝ်ႉဢမ်ႇၶိုင်ႈဢမ်ႇၵၢင်လူင်ဝႆႉယူႇ။ ပၼ်ႇၵႂႃႇပၼ်ႇမႃး ယၢႆးႁူဝ်ၵႂႃႇၵႂႃႇၶိုၼ်းၶိုၼ်းသေ မိူၼ်မၼ်းၶႂ်ႈႁိုင်ၼႃႇလႄႈ ၸႂ်ၶႃႈဢမ်ႇယၢဝ်းလႆႈယဝ်ႉ။
“ႁဵတ်းလႆႈယူႇႁႃႉ!”
“ၶႂ်ႈလိုမ်းယဝ်ႉ ၸႂ်ႈဢမ်ႇၸႂ်ႈၵေႃႈဢမ်ႇၶႂ်ႈတွင်းယဝ်ႉၵဝ်ႇဢိူဝ်ႈ”
“ၼႆႉႁႃႉ ပိူၼ်ႈဝႃႈၼုမ်ႇလဝ်းၼႂ်းႁူင်းႁဵၼ်းႁဝ်း တင်းၶႅၼ်ႇလိၵ်ႈ တင်းလဝ်းၼႆ ၶႂ်ႈႁႂ်ႈပိူၼ်ႈမႃးႁၼ်တေႉယဝ်ႉဝႃႈ”
“ပဵၼ်ၽႂ်ၵေႃႈမေႃလိုမ်းယူႇၵူၺ်းလေႃႇ! သင်ဢမ်ႇသင် မၢႆဝႆႉလီလီမိူဝ်ႈပိူၼ်ႈသွၼ်ၼၼ်ႉၵႃႈ”
“ၶႃႈမၢႆဢမ်ႇတၼ်းၶိုတ်းလူႉ..”
ယၢမ်းၼၼ်ႉၶႃႈၸင်ႇၶုၵ်းၸႂ်လႆႈဝႃႈ ႁိမ်းႁိူၼ်းႁဝ်းၼၼ်ႉ ပဵၼ်ၶူးသွၼ်ပၢႆးၼပ်ႉလူး ပဵၼ်သင်လႄႈဢမ်ႇၵႂႃႇထၢမ်ၶဝ်လႃႇ၊ မိူဝ်ႈဝူၼ်ႉလႆႈၸိူင်ႉၼၼ်ၵေႃႈ ၽုၼ်ႇလုၵ်ႉၵႂႃႇၵမ်းလဵဝ်ယဝ်ႉ မိူဝ်းတွႆႇၽၵ်းတူႁိူၼ်းၶူးၶဝ်ယူႇ။
မေးၶူးပိူင်းၾႃႉ ပီႈႁွမ်လႅင်းၼၼ်ႉၵေႃႈ မႃးၽုၺ်ႇၽၵ်းတူသေ
“မီးလွင်ႈသင်လႃႇယိင်း!”
“ၶႃႈၶႂ်ႈမႃးထၢမ်လိၵ်ႈဢၼ်ဢမ်ႇပွင်ႇၸႂ်ၼၼ်ႉၶႃႈ”
“ၶဝ်ႈႁိူၼ်းမႃးၵွၼ်ႇလႄႈ” ႁွင်ႉၶႃႈၶဝ်ႈၵႂႃႇၼႂ်းႁိူၼ်းၼၼ်ႉသေယဝ်ႉ။
တီႈၼႂ်းႁိူၼ်းၶဝ်ၼၼ်ႉၵေႃႈ လႆႈႁၼ် ၶူးပိူင်းၾႃႉၼင်ႈႁေႁဵတ်းၵၢၼ်မၼ်းယူႇ၊ မေးၶူးၼၼ်ႉၵေႃႈ ၵႂႃႇႁဵတ်းၵၢၼ်ယူႇၼႂ်းႁွင်ႈမိုဝ်ႉၼၼ်ႉၶိုၼ်းယဝ်ႉ။ မိူၼ်ၶဝ်လႅပ်ႈတေပႆႇလႆႈၵိၼ်ၶဝ်ႈၶမ်ႈၵၼ်။ ၶူးၽိဝ်ၾႃႉၼၼ်ႉတႄႉ လႅပ်ႈတေယူႇၼႂ်းႁွင်ႈၼွၼ်းမၼ်းသေ ႁွင်ႉၵႂၢမ်းယူႇ လႆႈငိၼ်းသဵင်တႄႉ ပဵၼ်ၸိူင်ႉၼၼ်။
“မီးလွင်ႈလၢၵ်ႇလၢႆးသင်တေမႃးပွင်ႇလႅင်းၶႃႈလႃႇ!” ၶူးပိူင်းၾႃႉထၢမ်ၸူး။
ၶႃႈၵေႃႈ ဢမ်ႇႁူႉဝႃႈတေလႆႈလၢတ်ႈၸိူင်ႉႁိုဝ် ၶႃႈၼၼ်ႉပဵၼ်ၵူၼ်းႁူဝ်ၶႅင်လႄႈ ဢမ်ႇပေႃးမေႃဢွမ်ႈၼွမ်းၸူးပိူၼ်ႈၵႃႈႁိုဝ်၊ ယွၼ်ႉၼၼ် ဢၼ်လႆႈၶဝ်ႈႁႃၶူးသေ ယွၼ်းတၢင်းၸွႆႈထႅမ်ၸိူင်ႉၼႆၵေႃႈ ပဵၼ်ဢၼ်ယၢပ်ႇၸႂ်တွၼ်ႈတႃႇၶႃႈဝႆႉယူႇ။
“ၶႃႈ..ၵွပ်ႈဝႃႈ ဢၼ်ၶူးသွၼ်မႃးၼၼ်ႉ ၶႃႈဢမ်ႇပွင်ႇၸႂ်လႄႈ ၶႃႈၵေႃႈဢမ်ႇမေႃႁဵတ်း ၶႂ်ႈႁူႉဝႃႈပိူၼ်ႈႁဵတ်းၸိူင်ႉႁိုဝ်ၼႆဢေႃႈ”
မိူၼ်တေႁဵတ်းႁႂ်ႈၶူးပိူင်းၾႃႉတူၵ်းၸႂ်ယူႇဢိတ်းဢိတ်း။ ၵူၺ်းၵႃႈ ယုမ်ႉၸူးၶႃႈၼင်ႇပွင်ႇၸႂ်သေ
“လီယဝ်ႉပေႃးၼၼ် ဢမ်ႇပွင်ႇၸႂ်တီႈလႂ်ၼႆၵေႃႈ ၶူးတေႁႂ်ႈ ၽိဝ်ၾႃႉမႃးသပ်းလႅင်းၼႄပၼ်ၵႂႃႈပေႃးၼႆ”
ၶူးၵေႃႈ ၵႂႃႇႁွင်ႉၶူးၽိဝ်ၾႃႉ မႃးယူႇ၊ ၶူးၽိဝ်ၾႃႉၼၼ်ႉ ယိပ်းဢဝ်တိင်ႇမၼ်းၼၼ်ႉသေ ဢွၵ်ႇႁွင်ႈမႃးယဝ်ႉ။
“ဢေးၼွင်ႉ! တၼ်းမႃးမိူဝ်ႈလႂ်လႃႇ!”
“မၼ်းမႃးထၢမ်လိၵ်ႈဝႃႇ ၸွႆႈလၢတ်ႈၼႄမၼ်းၽွင်ႈလႄႈ မိူၼ်တေမီးတီႈဢၼ်ဢမ်ႇပွင်ႇၸႂ်ၼမ်တေႉၼၼ်ႉယဝ်ႉ” ၶူးပိူင်းၾႃႉလၢတ်ႈၸူး ၶူးၽိဝ်ၾႃႉယူႇ။
ၶူးၽိဝ်ၾႃႉၼၼ်ႉၵေႃႈ မႃးတူၺ်းပပ်ႉၶႃႈသေယဝ်ႉ ယုမ်ႉဢွၵ်ႇမႃး ၼင်ႇၶဝ်ႈၸႂ်ၶႃႈဝႃႈ ၶႃႈၼၼ်ႉ ဢမ်ႇပွင်ႇၸႂ်သေဢိတ်းၼၼ်ႉၼႆလႄႈ လႆႈတႄႇသပ်းလႅင်းၼႄ ငဝ်ႈတေႃႇပၢႆ ၸႅင်ႈၸႅင်ႈလႅင်းလႅင်း ႁႂ်ႈၶႃႈပွင်ႇၸႂ်ယဝ်ႉ ပၼ်ႁႂ်ႈၶႃႈႁဵတ်းၵႂႃႇႁင်းၵူၺ်းယူႇ။ မိူၼ်ဝႃႈ ဢၼ်ၶူးသပ်းလႅင်းၼၼ်ႉ ၶႃႈတေပွင်ႇၸႂ်လီႁိုဝ်..ဢမ်ႇႁူႉ ႁဵတ်းၵႂႃႇၸွမ်းလွၵ်းလၢႆး ဢၼ်မၼ်းပၼ်ဝႆႉမီးဝႆႉၼၼ်ႉ၊ ပုၵ်ႈၼိုင်ႈယဝ်ႉပုၵ်ႈၼိုင်ႈ၊ ၵမ်ႉၵေႃႈ သမ်ႉပေႃးႁဵတ်းၵႂႃႇယဝ်ႉယဝ်ႉယူႇ။
“ယဝ်ႉယဝ်ႉၶႃႈၶူး!”
“ပေႃးယဝ်ႉၵေႃႈ မိူဝ်ႈၽုၵ်ႈၵေႃႈဢဝ်ပပ်ႉၵႂႃႇထၢပ်ႈၸွမ်းပိူၼ်ႈလႄႈၼႃႈ”
“ဢေႃႈၶႃႈ! ၸူမ်းယဝ်ႉဢေႃႈ ယွၼ်းမိူဝ်းၵွၼ်ႇယဝ်ႉၶႃႈ!”
ၶႃႈၵေႃႈပဵၼ်ဢၼ်ၸူမ်းၸူမ်းသိူဝ်းသိူဝ်းသေ ဢွၵ်ႇႁိူၼ်းၶဝ်မႃး ၼင်ႇဝႃႈၵျေႃႇၸႂ်တေႉၼၼ်ႉယဝ်ႉ။ ဢၼ်ပိူၼ်ႈလႆႈလိၵ်ႈၼၼ်ႉ ၸွင်ႇပိူၼ်ႈပဵၼ်တႄႉဢမ်ႇႁူႉ ၶႃႈတႄႉပဵၼ်ၵႂႃႇယဝ်ႉ၊ ၸူမ်းလူၼ်ႉၸူမ်းလိူဝ် ထိုင်တီႈၶီႈလိုတ်းၶူဝ်လႆပေႃးလူမ်ႉထူလူင်ၵႂႃႇ၊ ဢဝ်ၵၢင်းၶႃႈလေႃႇၽတ်ႉသႂ်ႇတီႈလႂ်ၵေႃႈဢမ်ႇႁူႉ၊ သမ်ႉပေႃးလွၵ်ႈလူင်ဝႆႉ ၶႅၼ်ၵေႃႈၶတ်း ၶႃၵေႃႈၶိုၼ်ႈ။ ဢႅဝ်ၵေႃႈၸဵပ်း ထိုင်တီႈဢမ်ႇၵိုင်ႉၵၢင်ႉလုၵ်ႉလႆႈၵမ်းလဵဝ်ယဝ်ႉ၊ ၼၢႆးႁဝ်းၶႃ ဢၼ်လႆႈငိၼ်းသဵင်ၶၢင်းၼၼ်ႉၵေႃႈ
“မႂ်းၵႂႃႇၼွၼ်းႁဵတ်းသင်တၢင်းတႂ်ႈၼၼ်ႉလႃႇဢေးယိင်း!”
ဢၢႆႈၸၢႆးႁဝ်းၼၼ်ႉတႄႉ ၼႅတ်ႈမႃးဢဝ်ၶႃႈလုၵ်ႉၵမ်းလဵဝ်။
ပေႃးဝႃႈတေႉပဵၼ်တိုဝ်ႉတၢင်းလီယဝ်ႉ ၶႃႈတေဢမ်ႇလႆႈၵႂႃႇႁူင်းႁဵၼ်း၊ ဢမ်ႇလႆႈဢၢၼ်ႇလိၵ်ႈဢူမ်သူပ်းသေ ၵႂႃႇလၢတ်ႈၼႄၶူး၊ တေဢမ်ႇလႆႈ ဢၢၼ်ႇဢိင်းၵလဵတ်ႈ ဢၼ်သဵင်မၼ်းဝႃႈႁိုဝ်ၵေႃႈဢမ်ႇႁူႉ ၼၼ်ႉယဝ်ႉ။ ဝူၼ်ႉယၢပ်ႇတေႉယဝ်ႉ ၶႃႈတေၵႂႃႇႁူင်းႁဵၼ်းႁႃႉဢမ်ႇၵႂႃႇၼႆ မၼ်းႁဵတ်းႁႂ်ႈၶႃႈဝူၼ်ႉၶႂ်ႈႁူၼ်လင်ၶိုၼ်း ၸဵမ်မိူဝ်ႈပၢႆးၼပ်ႉၼၼ်ႉယဝ်ႉ။ ထၢင်ႇတႄႉ မၼ်းတေဢမ်ႇၶႂ်ႈႁႂ်ႈၶႃႈၵႂႃႇႁူင်းႁဵၼ်းယဝ်ႉယူဝ်ႉ။
ယၢမ်းၼၼ်ႉ ၼၢႆးႁဝ်းၵေႃႈ ယိပ်းတင်းပပ်ႉဢၼ်ၶႃႈဢဝ်လူၼ်ႇမိုဝ်းမိူဝ်ႈၵႆႈၼၼ်ႉ မႃးပၼ်ယဝ်ႉ။
“ၼႆႉပပ်ႉမႂ်း!” မႃးဝၢင်းပၼ်ၶႃႈ ၶႃႈလႆႈႁၼ်ဢၼ်ၶႃႈတႂၢၵ်ႈမိူဝ်ႈၵႆႈၼၼ်ႉသေ မိူၼ်တေႁၢၼ်ႉၸႂ်တေႉယဝ်ႉ။ ၸဵမ်မိူဝ်ႈၶိုၼ်ႈႁူင်းႁဵၼ်းမႃး ပဵၼ်ၽႃႇသႃႇဢၼ်ၶႃႈ သႂ်ႇၸႂ်လိူဝ်ပိူၼ်ႈ ဝၢႆးသေဢၢၼ်းၶတ်းၸႂ်ႁဵၼ်းၼၼ်ႉ မိူဝ်ႈၽုၵ်ႈၵေႃႈ တေလႆႈၵႂႃႇထၢပ်ႈမိူၼ်ပိူၼ်ႈသေ။ ပေႃးဝႃႈတေႉ ဢၼ်ၶႃႈပွင်ႉဝႃႈမၼ်းယၢပ်ႇမိူဝ်ႈၵႆႈၼၼ်ႉ ၶႃႈၵေႃႈႁဵတ်းၵႂႃႇလႆႈယဝ်ႉၼင်ႇၵဝ်ႇလူး။
မိူဝ်ႈလႂ်မိူဝ်ႈပၼ်ၵႂၢမ်းမၼ်ႈဝႆႉယဝ်ႉၵေႃႈ ၶတ်းၸႂ်ႁဵၼ်းသေ တင်ႈၸႂ်ၵႂႃႇႁူင်းႁဵၼ်းၵေႃႈ ဢမ်ႇလူႉသုမ်းသင်လူး။ တိုၼ်းႁဵတ်းလႆႈယူႇယဝ်ႉ ဢၼ်ၶူးၸႂ်ႉဢၢၼ်ႇဢူမ်သူပ်းၼၼ်ႉၵေႃႈ ၶႃႈၵေႃႈၶတ်းၸႂ်ဢၢၼ်ႇၵႂႃႇဢၢၼ်ႇမႃး ၵမ်းၼိုင်ႈယဝ်ႉၵမ်းၼိုင်ႈ တေႃႇမၼ်းပေႃးလႆႈတေႉၼင်ႇၵဝ်ႇ၊ ဢိင်းၵလဵတ်ႈဢၼ်ၶူး သွၼ်ၼၼ်ႉၵေႃႈ မၢင်တူဝ်ဢၼ်ၶႃႈဢၢၼ်ႇဢမ်ႇဢွၵ်ႇၼႆၵေႃႈ ထၢမ်ဢၢႆႈၸၢႆးႁဝ်းႁေ ဢၢၼ်ႇၵႂႃႇဢၢၼ်ႇၶိုၼ်း မၼ်းၵေႃႈသမ်ႉတွင်းမႃးယူႇၵူၺ်း။ ၵူၺ်းၵႃႈ ဢမ်ႇႁူႉဝႃႈလၢႆမူင်းယဝ်ႉ မိူၼ်ဝႃႈမၼ်းတေလိုၵ်းၼႃႇတႄႉယဝ်ႉ။ ၶႃႈၵေႃႈ သိမ်းပပ်ႉသေ ၶဝ်ႈမိူဝ်းၼွၼ်းၵႂႃႇယူႇ၊ ပဵၼ်ဝၼ်းဢွၼ်တၢင်းသုတ်း ၸူဝ်ႈၶိုၼ်ႈႁူင်းႁဵၼ်းမႃးၼႆႉ ၶႃႈၶတ်းၸႂ်တူၺ်းလိၵ်ႈ၊ ဢမ်ႇႁူႉဝႃႈမိူဝ်ႈၽုၵ်ႈတေပဵၼ်ႁိုဝ်မႃး ၵူၺ်းၵႃႈ ဝၼ်းမိူဝ်ႈၼႆႉ ၶႃႈၵေႃႈၶတ်းၸႂ်ႁဵတ်းၼင်ႇၵႃႈႁဵတ်းလႆႈယဝ်ႉ။
မိူၼ်ၶႃႈတေၼွၼ်းလိုၵ်းၼႃႇလႄႈ ၵၢင်ၼႂ်တိုၼ်ႇမႃးၵေႃႈ သမ်ႉပေႃးဢမ်ႇၸိုၼ်ႈဢမ်ႇပၢင်ႇသေဢိတ်းယဝ်ႉ၊ လိူဝ်ၼၼ်ႉသမ်ႉ ပေႃးလႃႈၼႃႇယဝ်ႉ ၶႃႈၵေႃႈယင်းတိုၵ်ႉလုၵ်ႉၵူၺ်း တေၸၢင်ႈႁဵတ်းႁိုဝ် သုၵ်ႈၼႃႈလၢင်ႉတႃႁေယဝ်ႉ လၢႆႈၶူဝ်းယဝ်ႉၵေႃႈ လၢၵ်ႈဢဝ်ထူင်တင်းလူတ်ႉထိပ်ႉၼၼ်ႉ ၵႂႃႇဝႆးဝႆးၵူၺ်း။ မိူၼ်တေပၼ်ႇဝႆးၼႃႇလႄႈ ယူႇယူႇမႃသမ်ႉ ၽႅတ်ႈၼႃႈၶႃႈသေ ဢဝ်ၶႃႈထိင်းဢမ်ႇလႆႈ သမ်ႉပေႃးလူမ်ႉၵႂႃႇယဝ်ႉ။ ပဵၼ်သင်ၵၢင်ၼႂ်ၸဵမ်ၸဝ်ႉတေၵၢမ်ႇႁၢႆႉၸိူင်ႉၼႆလႃႇ ယိုင်ႈၶတ်းၸႂ် ယိုင်ႈၼႃႇၸႂ်တေႉလူင်။ မိူဝ်ႈပဵၼ်ၸိူင်ႉၼၼ် ပၢႆးဝူၼ်ႉဢၼ်ဝႃႈ ပွၵ်ႈမိူဝ်းႁိူၼ်းၶိုၼ်းတေလီယူဝ်ႉ ၼႆၼၼ်ႉၵေႃႈ ၽုတ်းဢွၵ်ႇမႃးၵမ်းလဵဝ် ၶႃႈယဵၼ်ႉၸႂ်ဢမ်ႇလႆႈယဝ်ႉဝႃႈ ၶႃႈတေမိူဝ်းၶိုၼ်းယဝ်ႉ။
ၽွင်းၼၼ်ႉ ၶူးၽိဝ်ၾႃႉၵေႃႈ သမ်ႉလတ်းမႃးတၢင်းၼၼ်ႉ တေႁၼ်ၶႃႈသေ ၵိုတ်းယဝ်ႉ။
“လႃႈၼႃႇယဝ်ႉ! ၵႂႃႇၸွမ်းၶူးလႄႈ..”
မိူဝ်ႈၼၼ်ႉ ၶႃႈၵေႃႈဢမ်ႇႁူႉဝႃႈတေၵႂႃႇတၢင်းလႂ်တေႉတေႉလႄႈ ၸုၵ်းၸိူဝ်ႈမိုင်လူင်ၵႂႃႇသေ ၶူးၵေႃႈ လူင်းလူတ်ႉယွင်ႈလူတ်ႉထိပ်ႇၶႃႈ မတ်ႉသႂ်ႇၸွမ်းၵႃးမၼ်းၼၼ်ႉသေ ၶႃႈၵေႃႈၵႃႈလႆႈၶိုၼ်ႈလူတ်ႉၵႂႃႇၸွမ်း မိူၼ်တေဢမ်ႇပေႃးတဵမ်ၸႂ်ၵႃႈႁိုဝ်ၼၼ်ႉယဝ်ႉ။ တေလႆႈငိၼ်းၸူမ်းႁႃႉ တေလႆႈတိူဝ်ႉၸႂ်ဢၼ်ဢမ်ႇလႆႈမိူဝ်းၼွၼ်းၼၼ်ႉႁိုဝ် ၽွင်းၼႆႉ ၶႃႈဝူၼ်ႉသင်ပေႃးဢမ်ႇဢွၵ်ႇယဝ်ႉ။
ယွၼ်ႉၶူးၸွႆႈၶႃႈဝႆႉလႄႈ ၶႃႈၵေႃႈဢမ်ႇလႆႈတူၵ်းလိုၼ်းႁူင်းႁဵၼ်း၊ ၵူၺ်းၵႃႈ ဢမ်ႇလႆႈၵိၼ်ၶဝ်ႈၼႂ်မႃးၼၼ်ႉယဝ်ႉ။ ၶူးၵေႃႈ မိူၼ်တေၸႂ်လီသေ ဢဝ်ၶဝ်ႈမုၼ်းဢၼ်မီးၼႂ်းလူတ်ႉၼၼ်ႉ ပၼ်ၶႃႈမႃးယူႇ။
လုၵ်ႈႁဵၼ်းၶဝ်ၶဝ်ႈထႅဝ်ယဝ်ႉၵေႃႈ ၸႅၵ်ႇၵၼ်ၵႂႃႇႁဵၼ်းႁင်းၽႂ်ႁင်းမၼ်း၊ ၽွင်းဢၼ်ၶႃႈတိုၵ်ႉတေဢၢင်ႈၶဝ်ႈႁွင်ႈၵႂႃႇၼၼ်ႉ မီးၵူၼ်းမႃးႁွင်ႉၶႃႈ ႁႂ်ႈၵႂႃႇထူပ်းၶူးလူင်ၼႆယဝ်ႉ။ တေပဵၼ်လွင်ႈသင်လႃႇ လိူဝ်သေ လွင်ႈၶူးၸၢမ်ႁွမ် ၶႃႈႁဵတ်းႁႂ်ႈမၼ်းပေႃးႁွင်ႉႁႆႈလူး ဢမ်ႇၸၢင်ႈႁဵတ်းႁိုဝ် ၶႃႈလႄႈတင်းၶူးၼၼ်ႉ ႁူႉၵႃႈတေလႆႈႁူပ်ႉတေႃႇၼႃႈၵၼ်ယူႇဢမ်ႇႁၢင်ႉ။
မိူဝ်ႈလႂ်မိူဝ်ႈဢၢၼ်းၶတ်းၸႂ်ႁဵၼ်းယဝ်ႉ ၶႃႈၵေႃႈတေလႆႈလႅၵ်ႈလၢႆႈဢၵျၢင်ႉၶႃႈ ပႃးၸွင်ႇၸႂ်ႈႁိုဝ်၊ လွင်ႈၼႆႉ ယၢပ်ႇတေႉတေႉယဝ်ႉ။ ၶႃႈတေဢမ်ႇလႆႈၵႂႃႇထဵင်ၶဝ် မိူၼ်မိူဝ်ႈဢွၼ်တၢင်းယဝ်ႉ။ သမ်ႉဝႃႈၶတ်းၸႂ်ႁဵၼ်းသေတႃႉၵေႃႈ ဢမ်ႇၸႂ်ႈဝႃႈ ၶႃႈၼၼ်ႉတေပဵၼ်ၵူၼ်းလီလူး၊ ၵူၺ်းၵႃႈ ပေႃးၶႃႈထဵင်ၵေႃႈ ဢမ်ႇႁပ်ႉႁွင်းဝႃႈ မၢၵ်ႉလိၵ်ႈၶႃႈၼၼ်ႉတေပဵၼ်ႁိုဝ်မႃး။ ပဵၼ်သင်လႄႈ တေႃႇၼႃႈၵူၼ်းဢၼ် ႁၼ်သုၼ်ႇတူဝ်၊ ဢမ်ႇႁၼ်ထိုင်ၵၢင်ၸႂ်ပိူၼ်ႈၼၼ်ႉ တွၼ်ႈတႃႇယူႇလွတ်ႈၵေႃႈ တေလႆႈၵူမ်ႈၵွမ်းၼွမ်းၸူးၵူၼ်းၸိူင်ႉၼၼ်ႁႃႉ၊ တူင်ႇဝူင်းၸိူင်ႉၼႆ ပဵၼ်သင်လႄႈမၼ်းဢမ်ႇႁၢႆၵႂႃႇလႃႇ။ ဝူၼ်ႉၸိူင်ႉၼႆမႃးၵေႃႈ ၶႃႈၶႂ်ႈပဵၼ်ၵူၼ်းမီးဢႃႇၼႃႇ ၸိူင်ႉၼင်ႇၶူးၽိဝ်ၾႃႉဝႃႈၼၼ်ႉမႃးၵမ်းလဵဝ်ယဝ်ႉ။ သမ်ႉဝႃႈဢမ်ႇတဵမ်ၸႂ်ႁဵတ်းၵေႃႈ ႁဵတ်းၵႅင်ႈႁဵတ်းဢဝ်ၵေႃႈလႆႈ၊ ၶႃႈၵေႃႈ လႆႈၶဝ်ႈၵႂႃႇၼႂ်းႁွင်ႈၶူးလူင်ၼၼ်ႉ ယူႇယဝ်ႉ။
တွၼ်ႈသိပ်းႁႃႈသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းႁူၵ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
