ၽွင်းၶၢဝ်းလပ်းသိင်ႇယဝ်ႉၼႆၵေႃႈ ပီႈသၢင်ႇသႅင် ၽူဝ်ၼၢႆးမူၼ်းၶဝ် မႃးလႄႇသေ သူတ်ႉၼမ်ႉၼဵင်ႈဢုပ်ႇၵၼ်ယူႇ တႂ်ႈၵွၵ်းၾႆးထၢတ်ႈသီႇၼၼ်ႉယဝ်ႉ။
ၼၢင်းသိုဝ်ႉလူႇၶႃမႄႈလုၵ်ႈတႄႉၵွမ်ႇၵၼ်ၼွၼ်းလပ်းၵႂႃႇၼႂ်းႁိူၼ်းၼၼ်ႉယဝ်ႉ။
“ၶႅၵ်ႈၼႆႉ ၵူၼ်းပၢႆႈၼမ်ၵျႃႉ”
“ဢၼ်ၺွပ်းၵေႃႈၺွပ်းမႃးယူႇတိၵ်းတိၵ်းဢိူဝ်ႈၼၼ်ႉ ၶွၵ်ႈသမ်ႉပေႃးဢမ်ႇၶႂ်ႈမီးတီႈဝႆႉယဝ်ႉၼႆႉ ၵူၼ်းသမ်ႉမႃးၵွင်ၵၼ်ယူႇတီႈၶွၵ်ႈတိၵ်းတိၵ်းဢိူဝ်ႈ တႃႇႁႃၵိၼ်ႁႃယႅမ်ႉလဵင်ႉၵၼ်ၵေႃႈဢမ်ႇတေႃႇတေႃႇ”
“ၸႂ်ႈဢိူဝ်ႈ ၵူၼ်းႁဝ်းၵေႃႈ မၼ်းဢမ်ႇမိူၼ်ၵၼ်လႆႈလူး တင်းလုၵ်ႈတင်းလၢင်းသေ၊ မၢင်ၵေႃႉဢမ်ႇၸႂ်ႈဝႃႈၶႂ်ႈမႃးႁဵတ်းသိုၵ်းလူး ဢမ်ႇလိူဝ်လႆႈႁေပိူၼ်ႈၺွပ်းမႃးၵူၺ်းၵွၼ်ႇလႄႇ”
“ႁဝ်းတႄႉ ဢမ်ႇႁူႉတေၵႂႃႇတၢင်းလႂ်ယဝ်ႉ မီးၵေႃႈယူႇ ဢမ်ႇမီးၵေႃႈယူႇၸိူင်ႉၼႆၵူၺ်းယဝ်ႉၼႃႇ ဢိုပ်းလိူဝ်ၼႆႉၵေႃႈယၢမ်ႈမႃးယဝ်ႉ ႁဵတ်းႁဵတ်းႁႃႁႃၵေႃႈလႆႈၵိၼ်ယူႇၵႃႈ”
“ပေႃးၵႆႉယူႇတႄႉမၼ်းတိုၼ်းဢမ်ႇဢိုပ်းလႆႈ ယႃႇဝႃႈတေၶႂ်ႈပၢႆႈလႃႈ ပေႃးလႆႈငိၼ်းၶၢဝ်ႇ လွင်ႈသိုၵ်းမၢၼ်ႈ ဢႃးထမ်ႇမတဵၵ်းတဵင်ၵူၼ်းမိူင်းၼႆၵူၺ်းၵေႃႈ ၸႂ်ပေႃးႁၢဝ်ႈၼႃႇယဝ်ႉဢိူဝ်ႈ”
“ၼၼ်ႉယဝ်ႈ ပိူၼ်ႈပေႉၵိၼ်ႁဝ်းၼႆႉၵႃႈဝႃႈၵႃႈပဵၼ်လူး တေႃႈၼင်ႇပီႈၼၢင်းဢီႇသိုဝ်ႉလူႇၼၼ်ႉ တင်းလႆႈတၢႆပႃးၵႂႃႇဢိူဝ်ႈၼၼ်ႉ”
“ၸွင်ႇၶႅၼ်းႁဝ်းမႃးႁႃငိုၼ်းၵေႃႈဢမ်ႇၸႂ်ႈၼႆ ႁဝ်းမႃးႁဵတ်းသိုၵ်းၵူၺ်းလူင် ပေႃးထၢၼ်ႈဝႃႈႁဝ်းၶႂ်ႈႁႃငိုၼ်း ႁဝ်းၵႂႃႇမိူင်းထႆးႁေယဝ်ႉၵူၺ်းဢိူဝ်ႈ”
ၶဝ်ၵေႃႈဢုပ်ႇၵၼ်လွင်ႈၼိုင်ႈယဝ်ႉလွင်ႈၼိုင်ႈသေ လိုၵ်းမႃးတၢၼ်ႇတၢၼ်ႇ ၶၢဝ်းပိူၼ်ႈၸမ်တိုင်ႈၼူၵ်ႉပိတ်ႇယဝ်ႉလႄႈ လုင်းသႅင်ၵေႃႈ ပွၵ်ႈမိူဝ်းၵႂႃႇယဝ်ႉ။
ပေႃးဝႃႈတိုင်ႈၼူၵ်ႉပိတ်ႇယဝ်ႉ ၾႆးၼႂ်းႁိူၼ်းၵေႃႈမွတ်ႇမူတ်းလႄႈ သဵင်ၵူၼ်းၵေႃႈယဵၼ်ၸိပ်း လႆႈငိၼ်းသဵင်ၸၵ်းၶႆႇၼႃးၵူၺ်းယဝ်ႉ။ မီးႁူမ်ႇလူမ်ႈၶဝ်ၵူၺ်း ထိုင်ၶၢဝ်းၼွၼ်းၵေႃႈဢမ်ႇလႆႈလပ်းလႆႈၼွၼ်းသေ ပႂ်ႉယၢမ်းယူႇ။
—————————————————-
“မိူဝ်ႈၵူႈပွၵ်ႈပွၵ်ႈၼႆႉ ပိူၼ်ႈႁဵတ်းသိုၵ်းၼႆၼၼ်ႉ ဢမ်ႇတေႃႇတေႃႇတေႉလူင် ၼမ်ႉၸႂ်ပိူၼ်ႈၼႆႉတႄႉ”
“မိူဝ်ႈလဵဝ်ၵေႃႈ ဢမ်ႇတေႃႇတေႃႇတေႉဢိူဝ်ႈ”
“မိူဝ်ႈလဵဝ်ၼႆႉ ငၢႆႈလိူဝ်မိူဝ်ႈပၢၼ်ၼၼ်ႉတေႉတေႉယဝ်ႉၵွၼ်ႇ။ ငိုၼ်းလိူၼ်ၼၢၼ်းဢွၵ်ႇၵူၺ်း တင်းဢမ်ႇၶႂ်ႈၶၢမ်ႇလႆႈ ပွင်ႉတႂ်ႈပွင်ႉၼိူဝ် မွင်းၶမ်ႈမွင်းၼႂ်ယူႇယဝ်ႉ”
“ပဵၼ်တူဝ်သူၵမ်းလဵဝ်ယဝ်ႉယူဝ်ႉၼႆႉ”
“ၶွင်ႁဵတ်းၵၢၼ်ၵိၼ်ငိုၼ်းလိူၼ်ၵူၺ်းလႄႇ”
“သူသမ်ႉပေႃးၵိၼ်ယူႇႁႃႉ”
“ၵုမ်ႇၵႂႃႇလိူၼ်လႂ်လိူၼ်ၼၼ်ႉၼင်ႇၵွၼ်ႇဢိူဝ်ႈ ဢမ်ႇမီးၵေႃႈယိမ်ၼၼ်ႉၼႃႇ”
“လိူဝ်သေငိုၼ်းလိူၼ်ယဝ်ႉ ဢမ်ႇႁဵတ်းၵၢၼ်တၢင်ႇမဵဝ်းလႆႈထႅင်ႈၵွၼ်ႇႁႃႉ”
“လႆႈၵႃႈ ၵူၺ်းၵႃႈ ႁႂ်ႈႁဵတ်းလႆႈလွတ်ႈလွတ်ႈလႅဝ်းလႅဝ်းတႄႉဢမ်ႇပဵၼ်ၼင်ႇၵွၼ်ႇ လႆႈႁိမ်သေႁဵတ်းဢဝ်ၵူၺ်းဢိူဝ်ႈ”
“ႁၼ်မၢင်ၵေႃႉသမ်ႉပေႉမီးဝႃႈမီးၼေႃ”
“ဢိင်ၼိူဝ်တိုဝ်ႉတၢင်း လႄႈလွင်ႈတူင်ႉၼိုင်ၸိူဝ်းၼႆႉၽွင်ႈၼင်ႇၵွၼ်ႇ ပေႃးမိူၼ်ၸိူင်ႉၼင်ႇပေႃႈႁဝ်းၼၼ်ႉတႄႉ ၵႂႃႇၵေႃႈဢမ်ႇၵႂႃႇတၢင်းလႂ်ႁေ ႁဵတ်းၵၢၼ်ႁႆႈၵၢၼ်သူၼ်ၸိူင်ႉၼၼ်ႁေ ၼႆၵေႃႈ ပေႃးယူႇၵႂႃႇ မိူၼ်ၸိူင်ႉသူမိူဝ်းႁၼ်ၼၼ်ႉၼႃႇ”
“ႁဝ်းတေမိူဝ်းႁဵတ်းၸွႆႈၵႂႃႈ”
“သူဢမ်ႇၶၢမ်ႇၵၢၼ်လႆႈလေႃႇၼႃႈ တေႃႈၼင်ႇဢဝ်ၵူၼ်းယူႇၸွမ်းၵူၺ်း ပိူၼ်ႈတင်းဢမ်ႇၶၢမ်ႇလႆႈလႃႈၼၼ်ႉ”
“ႁဵတ်းလုၵ်ႈၶူၺ်ၶဝ်တႄႉလႆႈယူႇယူဝ်ႉပေႃးၼၼ်”
“ယႃႇမႃးႁႃၶႂ်ႈၵဝ်းယူႇၼႆႉ”
“ဢမ်ႇၶႂ်ႈၵဝ်း ႁဝ်းၵဝ်းတေႉဢိူဝ်ႈၼႆႉ”
“ပေႃးဢမ်ႇၶႂ်ႈႁၼ်ၼႃႈၵၼ်ထႅင်ႈၵေႃႈ ၵဝ်းတိၵ်းတိၵ်းလႄႈ”
“ဢမ်ႇၶႂ်ႈႁၼ် ၼႃႈသူၼႂ်းၾူင်းၼႆႉ၊ ၶႂ်ႈႁၼ်ၸမ်ၸမ်ဢၼ်တေႉမၼ်းၵူၺ်း”
“ပိၵ်ႉယဝ်ႉပေႃးၼၼ်”
“ထၢမ်တေႉ သူဢမ်ႇၶႂ်ႈလႆႈႁဝ်းႁႃႉ ဢမ်ႇၶႂ်ႈလႆႈၽူဝ်”
“ဢမ်ႇၶႂ်ႈလႆႈသူ..ၸွင်ႇမၼ်းၸႅင်ႈလႅင်းႁိုဝ်”
“ၸဵပ်းထိုင်ႁူဝ်ၸႂ်ၼႆႉယဝ်ႉဝႃႈ ပဵၼ်ဢူၺ်းၵေႃႉၵၼ်ၼႆႉလီယဝ်ႉၼႆ လႆႈႁၼ်ၵၼ်လႆႈလၢတ်ႈတေႃႇၵၼ်တႃႇသေႇ ဢမ်ႇမိူၼ်ပဵၼ်ၸူႉၵၼ် ပေႃးၽိတ်းၵၼ်မႃးသမ်ႉပေႃးဢမ်ႇၶႂ်ႈႁၼ်ၼႃႈၵၼ်ယဝ်ႉၼေႃႈ”
“ပေႃးဢမ်ႇမီးၵၢၼ်သင်ၵေႃႈ သိုပ်ႇတႅမ်ႈလိၵ်ႈသူလႄႈ”
“ဢေႃႈၶႃႈ သူ”
