တၢင်းၶၢႆမၼ်းၵေႃႈ ဢမ်ႇပေႃးသူႈႁဵတ်းသင်လႆႈတေႉတေႉလႄႈ တေၸႂ်ႉလုၵ်ႈၼွင်ႉတပေးၽူဝ်မၼ်းၵေႃႈ သမ်ႉဢမ်ႇၶႂ်ႈၸႂ်ႉႁဵတ်း ပေႃးလူဝ်ႇယုၵ်ႉလူဝ်ႇယွင်ႈ လူဝ်ႇႁဵတ်းၼၵ်းတႄႉၵေႃႈၸႂ်ႉယူႇ။
ၵၢၼ်ၵႃႉၵၢၼ်ၶၢႆၼႆႉ ႁဵတ်းမႃးႁိုင်ထိုင်ပီသွင်ပီယဝ်ႉလႄႈ ဢမ်ႇႁၼ်လႆႈၼမ်ႉမႅတ်ႈၼမ်ႉတွၼ်းသင်တိူဝ်းမႃးသေဢမ်ႇၵႃး ၼီႈၶွတ်ႇၵေႃႈၼမ်မႃး ၵူၼ်းလူဝ်ႇတႅၼ်းၵေႃႈဢမ်ႇတႅၼ်း ၵူၼ်းၸိုၵ်းၵိၼ်သေပၢႆႈပႅတ်ႈၵေႃႈၼမ်ၼႃႇယဝ်ႉ တႃႇသေသိုပ်ႇႁဵတ်းၶၢႆၵႂႃႇထႅင်ႈၼၼ်ႉ ပဵၼ်ဢၼ်ယၢပ်ႇဝႆႉယူႇ။
“တၢင်းၶၢႆႁႃးၵေႃႈ ဢမ်ႇလႆႈၼမ်ႉမျႅတ်ႈသင် ႁဝ်းႁုင်လဝ်ႈပႃးႁေလီႁိုဝ်ႉ သိုဝ်ႉပိူၼ်ႈမႃးၶၢႆၶိုၼ်းၵေႃႈဢမ်ႇငၢႆႈငၢႆႈလူင်”
“ႁဝ်းၵေႃႈဝူၼ်ႉဝႆႉယူႇဢိူဝ်ႈၼၼ်ႉ ၵႂႃႇႁဵတ်းၸွမ်းၼႃႉၸိင်ႇႁဝ်းၶဝ်ၼႆ ဢုပ်ႇၵၼ်တင်းၸႃႇလိင်ႇယဝ်ႉၵွၼ်ႇ”
ၼၢင်းသိုဝ်ႉလူႇၼၼ်ႉတႄႉ ဢဝ်လုၵ်ႈလဵင်ႉလုၵ်ႈႁေ ၶၢႆတၢင်းၶၢႆမၼ်းၵႂႃႇတီႈႁိူၼ်းၼၼ်ႉၵူႈဝၼ်းဝၼ်းၵူၺ်း။
“ဢေးၶမ်း..ၵူၼ်ၼွင်ႉမႂ်းႁႅင်ႈယဝ်ႉယူဝ်ႉ ၵႂႃႇဢဝ်မႃးလူး”
ၽႃႈဢွမ်ႈၽႅၼ်းၽိူၼ်ႉဢၼ်ဝႃႈၼၼ်ႉ တႃႇတေလႆႈသႂ်ႇၼႆႉဢမ်ႇငၢႆႈငၢႆႈ။ ၵူၼ်ယဵဝ်ႈၼႆၵေႃႈ ဢဝ်တၢၵ်ႇႁႅင်ႈၶိုၼ်းသေ ပေႃးႁႅင်ႈယဝ်ႉၵေႃႈဢဝ်မႃးသႂ်ႇပၼ်ၶိုၼ်း။ ပေႃးၵၢင်ၶိုၼ်းၼႆၵေႃႈ ဢဝ်ၽႃႈယၢင်သိူဝ်ႇပၼ်သေ ယူႇမႃးၸိူင်ႉၼၼ်ၵူၺ်း။
“ၼႃႉဢႃႈ..ၶႃႈၶႂ်ႈၵႂႃႇယူႇႁူင်းသဝ်းၸွမ်းဢေးၼူၼ်းၶဝ်ၵူၺ်းယဝ်ႉ” ၼၢင်းၶမ်းမၢႆလၢတ်ႈၸူးၼႃႉၶဝ်ၼၢင်းသိုဝ်ႉလူႇ။
“မႂ်းတမ်ႉပႆႇၵေႃႉယႂ်ႇ ထႅင်ႈပီသွင်ပီၵွၼ်ႇလႄႈ”
“ဢေးၼူၼ်းၵေႃႈပဵင်းၶႃႈၵူၺ်းလူး မႄႈၶဝ်သမ်ႉပေႃးပွႆႇမၼ်းၵႂႃႇယဝ်ႉ”
“ၶူဝ်းမႂ်းၵူၺ်းတင်းသၵ်ႉပႆႇမူတ်း”
“မူတ်းၼႃႇ ပႂ်ႉတူၺ်းလႄႈၶႃႈသၵ်ႉၼႄၼႃႉႁဝ်း”
“ပိူၼ်ႈလႆႈႁုင်ၶဝ်ႈႁဵတ်းၽၵ်းၵိၼ်ၵူၺ်းႁေဢိူဝ်ႈတီႈပုၼ်ႉ”
“ဢေးၼူၼ်းလၢတ်ႈဝႃႈမၼ်းဢမ်ႇလႆႈႁဵတ်းၼႆ ၵေႃႉလဵၵ်ႉၼႃႇပိူၼ်ႈဢမ်ႇပၼ်ႁဵတ်း”
ၼႃႈၸိုၼ်ႈတႃသႂ် ယၵ်ႉတူၺ်းၼႃႉမၼ်းသေ မုင်ႈမွင်းၶေႃႈတွပ်ႇဝႆႉယူႇ၊ ၼႃႉၶဝ်ယဵၼ်ၵႂႃႇၵႅပ်ႉၼိုင်ႈ
“လႆႈယူႇႁႃႉၼႃႉ”
“ဢိူဝ်ႈ..”
“ၶႃႈတေႁႅၼ်းၶူဝ်းဝႆႉပေႃးၼႆ”
ယၢမ်းၵၢင်ၼႂ်မႃးၵေႃႈ ၼၢင်းသိုဝ်ႉလူႇ ၸေးတင်းလုၵ်ႈမၼ်းသေ ဢွၼ်ၵၼ်ပႆလူင်ၵႂႃႇတၢင်းႁူင်းႁဵၼ်းပုၼ်ႉယဝ်ႉ။ ၵႂႃႇဢၢပ်ႈ ၼၢင်းၶမ်းမၢႆယဝ်ႉၵေႃႈ ၶိုၼ်းပွၵ်ႈမႃး။
“ၵႂႃႇလႂ်မႃးလႃႇ ၼၢႆးလူႇ”
“ၵႂႃႇသူင်ႇဢေးလၢၼ်တီႈႁူင်းႁဵၼ်းဝႃႇ ၼၢႆးမွၼ်းဢမ်ႇၵႂႃႇလႂ်ႁႃႉမိူဝ်ႈၼႆႉ”
“ဢမ်ႇၵႂႃႇလႂ် မႃးလႄႇႁဝ်းၵွၼ်ႇလႄႈ” ယၵ်ႉတူၺ်းၼႃႈ ၼၢင်းၽွင်းသႅင် ဢၼ်ၼုမ်ႇၶၢဝ်ၸွတ်း “ၸိုဝ်ႈဝႃႈႁိုဝ်လႃႇၼႆႉ”
“ၼၢင်းၽွင်းသႅင်ၶႃႈ” ၼၢင်းသိုဝ်ႉလူႇလၢတ်ႈ။
ၼၢႆးမွၼ်းၵေႃႈ မႃးယိပ်းဢဝ်မိုဝ်းၼုမ်ႇၼုမ်ႇၼၼ်ႉသေ သဵင်ႁွင်ႉသႅၼ်ႇႁႆႈမၼ်းပၼ်းယူႇယဝ်ႉၼႃႇ။
“ဢေးၼႆႉတႄႉ ပိူၼ်ႈယိပ်းၵေႃႈဢမ်ႇလႆႈ”
“မိူဝ်းၵွၼ်ႇယဝ်ႉဝႃႈ ၼၢႆးမွၼ်းဢိူဝ်ႉ မၼ်းဢမ်ႇပေႃးၶႂ်ႈယူႇလီဢေႃႈၼႆႉ တိုၵ်ႉၸင်ႇႁႃသမ်းၶဵမ်မႃးၵူၺ်း”
“ဢိူဝ်ႈဢိူဝ်ႈ လွႆးလွႆးၼႃႈ”
ၼၢင်းၵူႇၶႃၽူဝ်မေး လၵ်ႉပၢႆႈသေၺႃးတူၵ်းၶွၵ်ႈလႄႈ ဢွၵ်ႇၶွၵ်ႈမႃးယဝ်ႉ ႁိူၼ်းၵဝ်ႇၶႃၼၼ်ႉၵေႃႈ ပိူၼ်ႈသမ်ႉယူႇဝႆႉ ဢမ်ႇမီးတီႈယူႇၼႆလႄႈ လႆႈမိူဝ်းပိုင်ႈဢိင်ယူႇတီႈႁိူၼ်းၸဝ်ႈပိုၼ်းႁၢၼ်ၶဝ်ၵႂႃႇယဝ်ႉ။
ပေႃးဝႃႈ မႃးပိုင်ႈဢိင်ၼႆၵေႃႈ လွင်ႈယူႇလွင်ႈၵိၼ် ၼင်ႇၶႅၵ်ႇၵေႃႉၼိုင်ႈၼၼ်ႉ ၸဝ်ႈႁိူၼ်း ၵိၼ်ၸိူင်ႉႁိုဝ်ၵေႃႈ ၶဝ်ၵိၼ်ၸိူင်ႉၼၼ်ယဝ်ႉ။ ယူႇဢမ်ႇႁိုင် ႁိမ်းႁိူၼ်းၼၼ်ႉ မီးႁိူၼ်းပဝ်ႇဝႆႉသေ ၸင်ႇႁႂ်ႈၶႃမိူဝ်းယူႇတီႈၼၼ်ႈယဝ်ႉ။
ၵူၼ်းသိုၵ်းၼႆႉ ပေႃးႁူဝ်ၼႃႈၶဝ်ၸႂ်လီတေႃႇၶဝ်ၼႆ ၶဝ်ၸူမ်းမိူဝ်းလႄႇမိူဝ်းၸႂ်းၼႃႇ ၸွႆႈၵေႃႈၶဝ်ၵႆႉၸွႆႈၼႃႇ။ ပေႃးဢမ်ႇမီးႁင်ၵိၼ်ၵေႃႈ မိူဝ်းႁႃမိူဝ်းၵိၼ်သေ ပေႃးလူဝ်ႇၸႂ်ႉၵၢၼ်ၸႂ်ႉငၢၼ်းၵေႃႈ ႁဵတ်းၸွႆႈၵၼ်သေ ပဵၼ်တူင်ႇဝူင်းဢၼ်ဢဝ်လွင်ႈၸွႆႈထႅမ်ပိုင်ႈဢိင်ၵၼ် ယူႇၵႂႃႇယဝ်ႉ။
တႃႇဝႃႈပႂ်ႉၵိၼ်ငိုၼ်းလိူၼ်ၼႆၵေႃႈ တင်းဢမ်ႇပေႃးသိုဝ်ႉသင်တေႉတေႉလူး၊ သိုဝ်ႉၵိရိယႃႇၶဝ်ႈၽၵ်းၵူၺ်းၵေႃႈ သမ်ႉပေႃးသဵင်ႈယဝ်ႉ။ ငိုၼ်းလိူၼ်ၼႆၵေႃႈ ႁႂ်ႈဝႃႈဢွၵ်ႇပၼ်မၢၼ်ႇမၢၼ်ႇၼႆ တင်းဢမ်ႇမီး မၢင်ပွၵ်ႈၵေႃႈဢွၵ်ႇ မၢင်ပွၵ်ႈၵေႃႈဢမ်ႇဢွၵ်ႇႁေ။ ၵူၺ်းၵႃႈ ငိုၼ်းလိူၼ်ဢၼ်ဝႃႈၼၼ်ႉ ၶႂ်ႈႁၼ်ၶႂ်ႈယိပ်းတူၺ်းလႄႈ မီးဢေႇယူႇသေတႃႉၵေႃႈ မွင်းဝႆႉယူႇ။
ပေႃးဝႃႈငိုၼ်းဢွၵ်ႇမႃးယဝ်ႉ မႃးတႅၼ်းၼီႈဢၼ်ထုၵ်ႇဝႆႉလိူၼ်ပူၼ်ႉသေ တႅၼ်းယဝ်ႉပႆႇမူတ်း သမ်ႉပေႃးၸိုၵ်းၵႂႃႇထႅင်ႈယဝ်ႉဝႃႈ။
သႂ်ႇၵႂႃႇသႂ်ႇမႃးၵေႃႈ ၼိုင်ႈလိူၼ်သွင်လိူၼ် သၢမ်လိူၼ်သီႇလိူၼ် ပီၼိုင်ႈယဝ်ႉပီသွင်ႁဵတ်းၼၼ် ဢမ်ႇထုၵ်ႇငိုၼ်းလိူၼ်သေတႃႉ ၶဝ်ႈလႄႈတင်းၵိရိယႃႇၶဝ်ႈၽၵ်းၵိူဝ်ၽွင်ဝၢၼ်ၼမ်ႉမၼ်းၸိူဝ်းၼႆႉတႄႉ တေႃႉတႄႉပေႃးယူႇၵႂႃႇလိူၼ်လႂ်လိူၼ်ၼၼ်ႉ။ ဢၼ်ဢမ်ႇမီးငိုၼ်းၵေႃႈ ဢမ်ႇၵိၼ်ႁေ၊ မၢင်ၸိူဝ်းၶႂ်ႈၵိၼ်ၵေႃႈ ၵူႈၵိၼ်ယိမ်ၵိၼ်ၵႂႃႇ ၵူၼ်းၵႃႉၵူၼ်းၶၢႆၵေႃႈ ဢမ်ႇမီးၼမ်ႉမႅတ်ႈၼမ်ႉတွၼ်းသင်သေဢမ်ႇၵႃး ဢလၢင်းမၼ်းၵူၺ်း တင်းဢမ်ႇၶႂ်ႈတူၵ်းၶိုၼ်းယဝ်ႉၵွၼ်ႇ။
ၼိူဝ်ႉၼိူဝ်ႉပႃပႃၼႆႉ ပေႃးၶႂ်ႈၵိၼ်ၵေႃႈ ႁႃၼႂ်းထိူၼ်ႇၼႂ်းၶိူဝ်း ၸွမ်းႁူၺ်ႈၸွမ်းႁွင်ႈႁေၸိူင်ႉၼၼ်ၵူၺ်း။
