ပီ 2002
ယိုင်ႈႁိုင်ၼၢင်းသိုဝ်ႉလူႇၵေႃႈ တွင်ႉယႂ်ႇမႃးၵူႈမိုဝ်ႉၵူႈဝၼ်းယဝ်ႉလႄႈ ဝၼ်းၼိုင်ႈ မွၵ်ႈႁူဝ်ၶမ်ႈၼႆႉ သဵင်ၸၢၵ်ႈလၢတ်ႈႁွင်ႉမေႃးပၼ်း
“မႆႉယူမ်း ၵႂႃႇတီႈမႆႉယူမ်းၵမ်ႉလူး”
ဝၢႆးသေလၢတ်ႈၸၢၵ်ႈၵႂႃႇယဝ်ႉ “ၼၢႆးၼႆႉ..ႁႃးဢၢႆႈလႅင်တေၵႂႃႇၵၢၼ်ၵမ်ႉၼႃႉ”
“ဢိုမ်ႈ..”
သွင်ၵေႃႉလုၵ်ႈၼွင်ႉတပေးဢွၵ်ႇႁိူၼ်းၵႂႃႇယဝ်ႉ။ ၶမ်ႈၼၼ်ႉ ၵူၼ်းယၢမ်းၶဝ်ဢွၼ်ၵၼ်တွင်ႉၵႂႃႇတွင်ႉႁေႈလႄႈ လႆႈလူင်းၵႂႃႇတူၺ်းတီႈၶွၵ်ႈသေ မိူဝ်ႈယၢမ်းၼင်ႇၼၼ် ၸင်ႇသမ်ႉႁၼ်ၵူၼ်းသိုၵ်းလၵ်ႉပၢႆႈ ဢဝ်မႃးတူၵ်းၶွၵ်ႈၼၼ်ႉ ဢွၼ်ၵၼ်ႁၢင်ႈႁႅၼ်းတႃႇတေၽွၵ်ႈၶွၵ်ႈဢွၵ်ႇမႃးယူႇ။
လႆႈႁၼ်ၾႆးသၢႆ လႅင်းမႃးလႄႈ ၶဝ်ၵေႃႈႁဵတ်းၵႅင်ႈၼွၼ်းလပ်းၵႂႃႇ ၸဝ်ႈပိုၼ်းႁၢၼ် ဢၼ်ၶဝ်ႈၵႂႃႇထတ်းတူၺ်းၼၼ်ႉ လႆႈႁၼ်ၼႂ်းႁွင်ႈၶင် မီးႁွႆးၽွၵ်ႈၽၵ်းတူဝႆႉ ၸင်ႇမႄးၶဝ်ႇၶဝ်ႇတူၺ်းသေ
“ဢၢႆႈလႅင်..ဢဝ်ၶွၼ်ႉၸွၵ်းမႃးလူး”
မႃးတွၵ်ႇယူႇတူၵ်ႉတူၵ်ႉယဝ်ႉ။
ၶွၵ်ႈၼၼ်ႉသမ်ႉ ပဵၼ်ၶွၵ်ႈမႆႉပႅၼ်ႈ မုင်းၵင်ႈသုမ်ႇလူင်ဝႆႉ ႁူးၶဝ်ႈဢွၵ်ႇမၼ်းၵေႃႈ တၢၼ်ႇၽၵ်းတူမႃ ပေႃးတူဝ်ၵူၼ်းၶဝ်ႈမွၵ်ႈၼၼ်ႉၵူၺ်း။
ၵူၼ်းပႂ်ႉယၢမ်းၶဝ်ၶမ်ႈၼၼ်ႉ လႆႈႁၢမ်ၵႂႃႇႁူင်းယႃ ႁႃႈႁူၵ်းၵေႃႉၼႆႉ၊ ပၢၼ်ၼၼ်ႉလူတ်ႉၵႃးၵေႃႈဢမ်ႇလိူင်ႇ တေႃႉၵူၼ်းမၢတ်ႇၵူၼ်းၸဵပ်းၼႆၵေႃႈ လႆႈႁၢမ်ဢဝ်လၢႆလၢႆ။
လုၵ်ႉတီႈၶွၵ်ႈၶင်ၵႂႃႇႁူင်းယႃၼႆၼၼ်ႉ ၵႆၼႃႇဢမ်ႇတေႃႇတေႃႇ ဢမ်ႇၸၢင်ႈႁဵတ်းႁိုဝ် ၵႃႈတေလႆႈၵႂႃႇယဝ်ႉ။
တီႈႁူင်းယႃၶဝ်ၵေႃႈ တီႈယူႇတီႈၼွၼ်းဢမ်ႇၵုမ်ႇထူၼ်ႈ ၵမ်ႈၽွင်ႈလႆႈၼွၼ်းယူႇၸွမ်းတင်ႇၼင်ႈၸိူဝ်းၼႆႉ။ ယၢမ်းၵၢင်ၶိုၼ်း တီႈႁူင်းယႃၵေႃႈ မီးမေႃယႃပႂ်ႉမွၵ်ႈ သွင်ၵေႃႉၼႆႉၵူၺ်း ဢွၼ်ၵၼ်သုၵ်ႉသၵ်ႉဝႆႉယူႇတၢင်းၶိုၼ်းယဝ်ႉဢိူဝ်ႈလေႃႇ။
ၸဝ်ႈပိုၼ်းႁၢၼ်ၼၼ်ႉ ဢဝ်ၵူၼ်းမၼ်းၵႂႃႇႁူင်းယႃၼမ်ၼႃႇယဝ်ႉလႄႈ တၢင်တူဝ်မၼ်းသမ်ႉပေႃးလႆႈမႃးပႂ်ႉၸွႆႈယဝ်ႉၼႃႇ။
ၶမ်ႈၼၼ်ႉ ၼၢင်းယုင်ႈၵေႃႈႁႆႈလူင်မႃးႁႃၼၢင်းသိုဝ်ႉလူႇ ယွၼ်ႉပိူဝ်ႈ ၽူဝ်မၼ်းၵိၼ်လဝ်ႈမဝ်းသေ ပေႃႉႁႅမ်မၼ်းၼႆယဝ်ႉ။ ၼၢင်းသိုဝ်ႉလူႇၵေႃႈ ႁႂ်ႈၼၢင်းယုင်ႈၼွၼ်းႁဵတ်းၵေႃႉမၼ်းၵႂႃႇသေလႄႈ ယူႇၸူဝ်ႈၼိုင်ႈ ၽူဝ်မၼ်း သၢင်ႇတႃႇၼၼ်ႉၵေႃႈ ပႃးတင်းၶွၼ်ႉႁေမႃးၸွမ်းၶႆႈယဝ်ႉ ၼၢင်းသိုဝ်ႉလူႇၵေႃႈ သိူင်ႇၼၢင်းယုင်ႈဝႆႉၼႂ်းႁိူၼ်းသေ ဢွၵ်ႇမႃးၸူးမၼ်း။
“မႂ်းမႃးႁဵတ်းႁင်ဢၢႆႈတႃႇ”
“ၵဝ်မႃးႁႃဢီႇယုင်ႈဢိူဝ်ႈ မိူဝ်ႈၵႆႈႁၼ်မၼ်းမႃးၼႂ်းႁိူၼ်းဢႃႁဝ်းၼႆႉ”
ဢီးၼၢင်းသိုဝ်ႉလူႇပႅတ်ႈသေယဝ်ႉ ပႆၶဝ်ႈၵႂႃႇၼႂ်းႁိူၼ်း ၶျွင်းတူၺ်းတၢင်းၼိုင်ႈယဝ်ႉတၢင်းၼိုင်ႈဢမ်ႇႁၼ်လႄႈ ၸႂ်လမ်မႃးႁႅင်းၼႃႇသေ ယိပ်းၶွၼ်ႉငႃသႂ်ႇ ၼၢင်းသိုဝ်ႉလူႇယဝ်ႉ။
“ဢႃလူႇ!! ဢီႇယုင်ႈမီးလႂ်” သဵင်ၶဵင်သဵင်လင်ႁိုတ်းသႂ်ႇ ၼၢင်းသိုဝ်ႉလူႇ သမ်ႉပေႃးလႆႈလႅၼ်ႈပၢႆႈၸွမ်းၼႂ်းၵိဝ်ႇၵၢင်ဝၢၼ်ႈၼၼ်ႉၼႃႇ။
“ၽႂ်ၵေႃႈလႆႈယဝ်ႉ မႃးဢဝ်ဢၢႆႈတႃႇၼႆႉလူး” တင်းတွင်ႉယႂ်ႇႁေ လႅၼ်ႈပၢႆႈသၢင်ႇတႃႇသမ်ႉပေႃးႁိူဝ်ႉၼႃႇတေႉယဝ်ႉ။
ၵူၼ်းၼႂ်းဝၢၼ်ႈၶဝ်သမ်ႉပေႃးလႆႈမႃးဢဝ်ၸွႆႈယဝ်ႉ မတ်ႉမၼ်းဝႆႉၵိုၵ်းသဝ်ႁိူၼ်းယူႇ။
လိုဝ်ႈႁိူဝ်ႉဢမ်ႇတၼ်းႁိုင် တွင်ႉၵေႃႈၵႅၼ်းမႃးလႄႈ ၼမ်ႉၶမ်ႉမၼ်းတႅၵ်ႇယဝ်ႉၼႃႇၵမ်းၼၼ်ႉ
“ၵဝ်တေၵိူတ်ႇယဝ်ႉဢီႇယုင်ႈ မိူဝ်းႁွင်ႉသြႃႇမၶဝ်မႃးလူး”
ၼၢင်းယုင်ႈၵေႃႈ ၼႅတ်ႈဢႅၼ်ႇလႅၼ်ႈမိူဝ်းၵႂႃႇတၢင်းႁိူၼ်းသြႃႇမယဵၼ်ႇၶဝ်ၵမ်းလဵဝ်။
“သြႃႇမယဵၼ်ႇ ဢႃလူႇႁဝ်းတေၵိူတ်ႇယဝ်ႉဝႃႈ”
“ၼၼ်ႁႃႉ..မိူဝ်းႁွင်ႉသြႃႇမဢွင်ႇလႄႈမႂ်းပေႃးၼၼ်”
မေႃယႃၼၢင်းယဵၼ်ႇၵေႃႈ ၼႅတ်ႈဢဝ်တင်းၶိူင်ႈယႃႈယႃ မိူဝ်းၵႂႃႇတၢင်းႁိူၼ်းၼၢင်းသိုဝ်ႉလူႇၶဝ်ၼၼ်ႉဝႆးဝႆးယဝ်ႉ။ ယူႇၸူဝ်ႈၼိုင်ႈ ဢီႇယုင်ႈလႄႈတင်းသြႃႇမဢွင်ႇၵေႃႈ ႁွတ်ႈမႃးၸွႆႈၵၼ်ၵိူတ်ႇပၼ် ၼၢင်းသိုဝ်ႉလူႇတီႈၼႂ်းႁိူၼ်းၼၼ်ႉလႄႈ လုၵ်ႈဢွၼ်ႇၵေႃႈ ၵိူတ်ႇဢွၵ်ႇမႃးလွတ်ႈၽေးယဝ်ႉသေ ၼၢင်းသိုဝ်ႉလူႇၼၼ်ႉ ႁႅင်းသမ်ႉပေႃးမူတ်းၵႂႃႇယဝ်ႉ။
ၶဝ်ၵေႃႈမႄးလုမ်းလႃးႁွပ်ႇလုၵ်ႈဢွၼ်ႇမႃးပၼ်မၼ်းယဝ်ႉ တူဝ်ဢွၼ်ႇ မီးဢိတ်ႉလဵဝ်ၵူၺ်း ၵွပ်ႈသႂ်ႇၶၢင်ႈႁိမ်းမႄႈၶဝ်သေ တၢင်းႁိူဝ်ႉတၢင်းၸဵပ်းၵႅၼ်းလူင်ၼၼ်ႉ ႁၼ်ယဝ်ႉ ၸႂ်သမ်ႉပေႃးလီမႃးယူႇဢိူဝ်ႈ။
ယၢမ်းၵၢင်ၼႂ်မိူင်းလႅင်းမႃး ၸဝ်ႈပိုၼ်းႁၢၼ်ၵေႃႈ မႃးလိုဝ်ႈႁိူဝ်ႉလိုဝ်ႈၸႂ်တီႈႁိူၼ်းသေ မိူဝ်ႈတိုၵ်ႉၸင်ႇႁႃလပ်းမွႆႈၵႂႃႇၼၼ်ႉ သဵင်လုၵ်ႈဢွၼ်ႇမေႃးမႃးလႄႈ ၶုၼ်ႇတူၵ်းၸႂ်သေ
“လုၵ်ႈဢွၼ်ႇၽႂ်ၼႆႉ!!”
လႆႈႁၼ်ႁိမ်းတီႈၼွၼ်းမၼ်းၼၼ်ႉ မီးမေးမၼ်းလႄႈလုၵ်ႈဢွၼ်ႇၼွၼ်းၵွင်ၵၼ်ယူႇ။
“ဢေႃႈ..လုၵ်ႈပေႃႈဢိူဝ်ႈၼႆ တၼ်းၵိူတ်ႇယဝ်ႉၼႆႉၼေႃႈ”
ပေႃးဝႃႈၼၢင်းသိုဝ်ႉလူႇၵိူတ်ႇယဝ်ႉၼႆၵေႃႈ ၸဵမ်လဵၵ်ႉယႂ်ႇၼုမ်ႇထဝ်ႈ ဢွၼ်ၵၼ်မႃးလႄႇမႃးၸႂ်း ၵဝ်ၶဝ်ႈမႂ်းဢွၵ်ႇယဝ်ႉၼႃႇ။
ၸဝ်ႈပိုၼ်းႁၢၼ်တႄႉၵေႃႈ လုၵ်ႈမၼ်းၵိူတ်ႇမႃး တၼ်းလႆႈႁူႉဝႃႈ မေးမၼ်းၵိူတ်ႇလုၵ်ႈယဝ်ႉၼႆၵူၺ်း သမ်ႉပေႃးတၼ်းၵႂႃႇၶိုၼ်းယဝ်ႉ။ ယွၼ်ႉပိူဝ်ႈတီႈၶွၵ်ႈၼၼ်ႉ ဢမ်ႇယဝ်ႉဢမ်ႇတူဝ်ႈသင် တိုၵ်ႉၸွမ်းႁႃတူၺ်း ၵူၼ်းမႃးလဵင်ႉၶဝ်ႈၽၵ်းၶဝ် လႄႈ လႆႈႁွင်ႉၸႅတ်ႈထၢမ်တူၺ်း ၵမ်းၵေႃႉၵမ်းၵေႃႉယူႇ။ မိူၼ်တေၵူၼ်းပဵၼ်တၢင်းၼႂ်းၼႆသေ ယၢမ်းမိူဝ်ႈႁွင်ႉၸႅတ်ႈၵၼ်ယူႇၼၼ်ႉ ၵူၼ်းယၢမ်း ၶိင်းဢွင်ႇပ ႁၢႆၵႂႃႇယဝ်ႉ၊ ၵႂႃႇတူၺ်းတီႈယူႇမၼ်းၵေႃႈဢမ်ႇႁၼ်ၶူဝ်းသင် ၸွမ်းၶႆႈပေႃးၸွတ်ႇၵေႃႈဢမ်ႇၺႃး။ ယူႇၸူဝ်ႈၼိုင်ႈ တပ်ႉႁူမ်ႇလူမ်ႈၶဝ်ႈၵေႃႈပွင်ႇၸၢၵ်ႈမႃးသေ
“မႆႉယူမ်း မႆႉယူမ်း”
“ငိၼ်းယဝ်ႉငိၼ်းယဝ်ႉ မၢႆလႂ်ႁွင်ႉမႆႉယူမ်း”
“မၢၵ်ႇမူၼ်ႇဢိူဝ်ႈ ၵႂႃႇတၢင်းလင်သွင်ယၢင်ႈလူး”
ဝၢႆးသေၸဝ်ႈပိုၼ်းႁၢၼ်လႆႈႁပ်ႉၶၢဝ်ႇ လွင်ႈၶိင်းဢွင်ႇပ ပႃးၵွင်ႈသေ ထုၵ်ႇႁူမ်ႇလူမ်ႈၺွပ်းလႆႈယဝ်ႉ မၼ်းဢၢင်ႈၶိုၼ်းယိုဝ်းၶိုၼ်းလႄႈ လုၵ်ႈသိုၵ်းလၢႆလၢႆၵေႃႉ ဢၼ်ယူႇတပ်ႉႁူမ်ႇလူမ်ႈ ဝႅတ်ႉလွမ်ႉမၼ်းသေလႄႈ ဢမ်ႇလႆႈတူဝ်လိပ်းၵေႃႈႁႂ်ႈလႆႈတူဝ်တၢႆၼႆၵေႃႈ မိူဝ်ႈၽွင်းဢၼ်မၼ်းတေယိုဝ်းသႂ်ႇ လုၵ်ႈသိုၵ်းၵေႃႉၼိုင်ႈၼၼ်ႉ မၢၵ်ႇၵွင်ႈႁူၺ်ႇၼိုင်ႈ တိူဝ်ႉၺႃးၶႅၼ်မၼ်းဝႆႉသေ ၶဝ်ၵေႃႈၼႅတ်ႈဢွၼ်ၵၼ်ပုင်ႈသႂ်ႇၸူးမၼ်းယဝ်ႉ ၸင်ႇတေတိဝႆႉလႆႈယူႇ။
ၵူၼ်းၶဝ်သီႇႁႃႈၵေႃႉ မတ်ႉၸိူၵ်ႈသေႁိဝ်ႈလူင်မႃးၼႂ်းၵၢင်တၢင်း ၽႂ်ႁၼ်ၵေႃႈ သမ်ႉပေႃးလႅၼ်ႈၶဝ်ႈႁိူၼ်းၵႂႃႇႁင်းၽႂ်ႁင်းမၼ်း။ မႃးထိုင်တီႈၶွၵ်ႈၶင် ၵူၼ်းယၢမ်းၶဝ်ၼၼ်ႉၵေႃႈ ဢဝ်ၸိူၵ်ႈသူဝ်ႉႁွႆႈသႂ်ႇၶႃသွင်ၶၢင်ႈသေ လွၵ်ႉသေႃးသႂ်ႇဝႆႉယဝ်ႉ။
ၵူၼ်းၸိူဝ်းဢၼ်မႃးယူႇၼႂ်းၶွၵ်ႈၼႆႉၵေႃႈ ပဵၼ်ၵူၼ်းၼူၵ်ႇၵူၼ်းတိုဝ် ၵူၼ်းႁၢႆႉၵူၼ်းလိူင်းၸိူဝ်းၼႆႉ ၼမ်ဝႆႉတေႉၼင်ႇဝႃႈ၊ မၢင်ပွၵ်ႈ ပေႃးၶႂ်ႈထၢမ်ၽိတ်းၵူၼ်းယၢမ်းၸိူဝ်းၼႆႉပႃးယဝ်ႉ။ သင်ၵူၼ်းယၢမ်း ဢမ်ႇမီးၵွင်ႈတႄႉ ၶေးၶဝ်တင်းတေဢမ်ႇၵူဝ်ၵိၼ်ယဝ်ႉလူးၵွၼ်ႇ။
ၵူၼ်းဢၼ်မီးတၢင်းၽိတ်း ဢမ်ႇယႂ်ႇၸိူဝ်းၼႆႉၵေႃႈမီးယူႇ၊ မၢင်ၵေႃႉလၵ်ႉပၢႆႈၵႂႃႇသေၶိုၼ်းမႃး ပေႃးမႃးၶိုၼ်းၵေႃႈ ပိူၼ်ႈသမ်ႉဢဝ်သႂ်ႇၶွၵ်ႈတိၵ်းတိၵ်းလႄႈ ၵူၼ်းၼႂ်းၶွၵ်ႈၼႆႉ သမ်ႉပေႃးတဵမ်ဢိပ်ႉၵၼ်ဝႆႉယဝ်ႉ။
တီႈၶွၵ်ႈၶင်ၼႆၵေႃႈ သုၵ်ႉသၵ်ႉယူႇၵူႈဝၼ်းဝၼ်း၊ ၼၢင်းသိုဝ်ႉလူႇၵေႃႈ တႄႇၸႃႉမီးလုၵ်ႈၵေႃႉဢွၼ်တၢင်းၵူၺ်းသေတႃႉ မၼ်းယၢမ်ႈလဵင်ႉလၢၼ်မႃးယူႇလၢႆၵေႃႉ ၵၢၼ်လဵင်ႉလုၵ်ႈၼႆႉၵေႃႈ လႆႈဝႃႈမေႃယူႇတၢၼ်ႇတၢၼ်ႇ၊ လဵင်ႉႁင်းၵူၺ်းမၼ်းႁေ ႁဵတ်းၵၢၼ်ၶၢႆသႅင်ႇမၼ်းၵႂႃႇၵူၺ်းယဝ်ႉ။
သိုပ်ႇလူဢၢၼ်ႇတွၼ်ႈၵဝ်ႈၶႃႈ
