တွၼ်ႈၼိုင်ႈ
“ပီႈၼၢင်းၶႃႈ”
ယိင်းသၢဝ်ႁၢင်ႈလီဝိၼ်ႇဝႆၢႇၼႃႈယၵ်ႉၸူး သႆၢတႃၵူၼ်းႁွင်ႉမိုင်ၸိူဝ်ႈတူၺ်းယူႇ။
“ဢေႃႈၶႃႈ”
သဵင်ဢွၼ်ႇဝၢၼ်ႁူတုမ်ႉယွၼ်ႈၸႂ် မိုင်ၸုၵ်းၸိူဝ်ႈတူၺ်းယူႇပႆတွပ်ႇၸူး။
“မီးၸိူင်ႉႁိုဝ်ၶႃႈ”
“သူၸိုဝ်ႈသင်ၶႃႈ..” သဵင်ၼၼ်ႉလွႆးၼႃႇလႄႈ ဢမ်ႇလႆႈငိၼ်း။
“ႁင်ၶႃႈၵေႃ”
“ႁိူၼ်းလုင်းႁဵင်ၶဝ်မီးတီႈလႂ်ၶႃႈ”
“ဢေႃႈ..လုၵ်ႉတီႈၼႆႈၵႂႃႇသုတ်းၵိဝ်ႇယဝ်ႉ ၵႂႃႇၽႆၢႇၶႂႃ လုၵ်ႉတီႈၸဵင်ႇၼပ်ႉၵႂႃႇ လင်ထိသၢမ်ၽႆၢႇသႆၢႉၶႃႈ”
“ဢေႃႈ..တေၵႂႃႇတူၺ်း”
“ပေႃးဢမ်ႇတွင်းၵေႃႈ ၵႂႃႇသူင်ႇၵေႃႈလႆႈယူႇၶႃႈ ဢမ်ႇၵႆ”
“ၶႅၼ်းလီဢေႃႈ” ယၵ်ႉတူၺ်းယိင်းသၢဝ်သေယဝ်ႉ “ၶိုၼ်ႈမႃးၶႃႈလႄႈ” ႁႂ်ႈယိင်းသၢဝ်ၶိုၼ်ႈလူတ်ႉၶိူင်ႈမၼ်းၵႂႃႇယူႇ ၼႂ်းၸႂ်မ်ူဝ်ႈယၢမ်းၼၼ် ႁၢင်ႈၶႂ်ႈႁၢႆၵႂႃႇပဵၼ်ၵမ်းယဝ်ႉ။
“ပဵၼ်ၵူၼ်းဝၢၼ်ႈၼႆႉၶႃႈႁႃႉ”
“ၸႂ်ႈယဝ်ႉၶႃႈ”
“ၸိုဝ်ႈသင်ၶႃႈလႃႇ”
“ၼုမ်ႇႁွမ်ၶႃႈ သူၶႃႈလူး”
“သႆၢၶမ်း..”
“ယိၼ်းၸူမ်းလႆႈႁူႉၸၵ်းၶႃႈ”
“မိူၼ်ၵၼ်ၶႃႈ”
“ႁွတ်ႈယဝ်ႉၶႃႈ..”
ၼုမ်ႇႁွမ်လူင်းလူတ်ႉသေယဝ်ႉ
“လုင်း..မီးၵူၼ်းမႃးႁႃ”
“ၽႂ်လႃႇမႃႈ..” လုင်းႁဵင်ဢွၵ်ႇမႃးတူၺ်း”မၢဝ်ႇမႂ်းႁႃႉ”
“ဢမ်ႇၸႂ်ႈလေႃႇ..ဝႃႈဝီႈလူင်ၵႂႃႇ”
သႆၢၶမ်းၵေႃႈမိူဝ်းလၢတ်ႈတေႃႇလုင်းသေ “ၶႃႈပဵၼ်ၶူးသွၼ်ဢေႃႈ ၶႂ်ႈမႃးဢုပ်ႇတင်းလုင်းႁဵင်ႁဝ်းဢိတ်ႉၼိုင်ႈၶႃႈ”
“ဢေႃႈ..ၶဝ်မႃးၼင်ႈတၢင်းၼႂ်းၵွၼ်ႇလႄႈမေႃသွၼ်”
“ပေႃးၼၼ်ၶႃႈမိူဝ်းၵွၼ်ႇယဝ်ႉ”
“ၸူမ်းယဝ်ႉၶႃႈ” သႆၢတႃယၵ်ႉတူၺ်းၸူး သူင်ႇသင်ႇၵႂႃႇၸွမ်းယဝ်ႉ။
သိုပ်ႇမႃးထႅင်ႈဝၼ်းၼိုင်ႈ ၼုမ်ႇႁွမ် ၼင်ႈငဝ်ယူႇတီႈတူၼ်ႈမႆႉႁိမ်းႁိူၼ်း ဢူၺ်းၵေႃႉမၼ်းသီလိူၼ်ဢဝ်တင်းၶဝ်ႈမဵတ်ႉၵႆၢႇမႃးၸူးမၼ်း။
“မႂ်းမႃးၼင်ႈႁဵတ်းသင်လႃႇတီႈၼႆႈ”
“ၸႂ်ထိုင်မၢဝ်ႇဢိူဝ်ႈ..”
“မႂ်းတၼ်းမီးမၢဝ််ႇမိူဝ်ႈလႂ်ဢေႉ”
“ႁၼ်မိူဝ်ႈဝႃး”
“တီႈလႂ်..”
“တီႈၵဝ်ၼင်ႈၼႆႉယဝ်ႉ”
“ႁႆး..ယူႇလႆၢလႆၢမီးမၢဝ်ႇမႃးႁႃႁေ ဢမ်ႇငႆၢႈငႆၢႈလူးၼႆႉ”
“မၼ်းမႃးထၢမ်တၢင်းၵူၺ်းၵွၼ်ႇ” ထူၺ်ႈၸႂ်လူင်မႃးၵမ်ႉၼိုင်ႈ ႁိူဝ်ႉ…”ၵူၺ်းၵႃႈ ပဵၼ်သင်ၵေႃႈဢမ်ႇႁူႉ ၸႂ်ၵဝ်ၼႆႉဝူၼ်ႉၸွမ်းယူႇတိၵ်းတိၵ်းဢိူဝ်ႈၼႆႉ”
“လဝ်းဝႆႉႁႃႉ”
“တၢၼ်ႇတၢၼ်ႇၵွၼ်ႇဢိူဝ်ႈ ၼႃႈသဵမ်ႈသဵမ်ႈဢွၼ်ႇႁေ တူဝ်သေးသေးဝႆႉၼေႈ ဢမ်ႇၸႂ်ႈဝႃႈယွမ်ၵွၼ်ႇ မီးၼူတ်ႇဢွၼ်ႇဢိတ်ႉၼိုင်ႈ ၶူၼ်တႃမွင်ႉမွင်ႉဝႆႉသမ်ႉပေႃးလမ်ၽိတ်းၽိတ်း ၼႃႈယုမ်ႉယုမ်ႉဝႆႉၼေႈမႂ်း”
“မႂ်းၵျိူၵ်ႈမၼ်းယဝ်ႉၵဝ်ဝႃႈ”
“ၵဝ်ၵေႃႈဝူၼ်ႉယူႇဢိူဝ်ႈ မၼ်းတေပဵၼ်လႆႈယူႇႁ ဢမ်ႇႁူႉၸၵ်းဢမ်ႇယၢမ်ႈႁၼ် ၸႂ်ၵေႃႈဢမ်ႇတဵၼ်ႈတွတ်ႇၵွၼ်ႇ ၵူၺ်းၵႃႈသမ်ႉဝူၼ်ႉထိုင်မၼ်းလႆႈယူႇတိၵ်းတိၵ်းၼႆႉ”
“မၼ်းမႃးႁဵတ်းသင်လႃႇ ဢမ်ႇလႆႈထၢမ်ႁႃႉ”
“မၼ်းမႃးႁႃလုင်းႁဵင်ဝႃႇ”
“ၵေႃႉၼၼ်ႉႁႃႉ ႁၢင်ႈလဝ်းဝႆႉၵွၼ်ႇဢိူဝ်ႈမေႃးၵေႃႈ မႂ်းၵျိူၵ်ႈမၼ်းတေႉႁႃႉ”
“ဢမ်ႇႁူႉယဝ်ႉ”
“ႁႂ်ႈၵဝ်ထၢမ်ပၼ်ၼႄႇ”
“ဢမ်ႇလႆႈလေႃႇ”
“ႁႅင်ႉလႃႇ”
“ၵဝ်ဝႃႈတႄႉ..ၶဝ်လႅပ်ႈမီးမေးယဝ်ႉ”
“မႂ်းႁဵတ်းႁိုဝ်ႁူႉ”
“တူၺ်းယၢပ်ႇတီႈလႂ် မၼ်းၵေႃႈဢမ်ႇၸႂ်ႈၵူၼ်းဢသၢၵ်ႈလဵၵ်ႉယဝ်ႉလူး ၵူၼ်းၸိူင်ႉၼၼ်ၽႂ်ႁၼ်ဝႃႈၽႂ်ဢမ်ႇႁၵ်ႉ သမ်ႉပႆၢမေႃလၢတ်ႈမေႃယုမ်ႉထႅင်ႈသေ မၼ်းဢမ်ႇဢဝ်ပိူၼ်ႈၵေႃႈပိူၼ်ႈတိုၼ်းဢဝ်မၼ်းယဝ်ႉလႃႈ ပေႃးဢမ်ႇၸႂ်ႈၵူၼ်းမီးၼႃႈႁိူၼ်းၵေႃႈ ပဵၼ်ၵူၼ်းၸႂ်ၼမ်ဢမ်ႇၶႂ်ႈႁႂ်ႈၽႂ်မတ်ႉဝႆႉလႄႈ ၶႂ်ႈယူႇလွတ်ႈလႅဝ်းသေ ႁၼ်ၽႂ်ၵေႃႈၵဝ်းၵႂႃႇၸိူင်ႉၼၼ််ၵူၺ်း”
“မႂ်းၵေႃႈယႃႇၼႅတ်ႈတႅပ်းတတ်းၵွၼ်ႇလေႃႇမေႃႉ”
“ၵဝ်ႁၼ်မႃးၼမ်ယဝ်ႉ ၽူႈၸႆၢးမေႃဢုပ်ႇမေႃလၢတ်ႈ၊ မေႃယဝ်ႉမေႃယွၵ်ႇ၊ မေႃသႂ်ႇၸႂ်တူၺ်းထိုင် ပဵၼ်ၽူႈၸႆၢးဢုၼ်ႇၸႂ် ၵူၺ်းၵႃႈ ၵႆႉပဵၼ်ၵူၼ်းဢၼ်မႃးယွၵ်ႇၸႂ်ၸူဝ်ႈၵႅပ်ႉၵမ်းၵူၺ်း”
“ၸႂ်ႈတေႉႁိုဝ်ဢမ်ႇၸႂ်ႈၼၼ်ႉ တေလႆႈတူၺ်းၵႂႃႇႁႂ်ႈယၢဝ်းယၢဝ်းဢိူဝ်ႈမႂ်းၵေႃႈ”
“ဢိူဝ်ႈ..ၵဝ်ၵေႃႈၸႂ်ထိုင်မၼ်းယူႇဢိူဝ်ႈၼႆႉ”
“ဢၼေႃ..ၵဝ်ၶၢၼ်ႉႁၼ်ၼႃႈမႂ်း မၼ်းတေမႃးထႅင်ႈယူႇယူဝ်ႉထၢင်ႇ”
