တွၼ်ႈသီႇ
တီႈၼႂ်းပၢင်ပွႆးသၢင်ႇလွင်းၵူၼ်းၵိုၼ်းၶွၼ်ႈ ဢွမ်သႂ်ၶႃမႄႈလုၵ်ႈၵေႃႈ ဢွၼ်ၵၼ်ၵႂႃႇၵိၼ်တင်းၵိၼ်တီႈၼႂ်းသႅင်ႇသေ ဢမ်ႇထၢင်ႇတီႈၼၼ်ႈသမ်ႉတေမီး ၸွမ်ၾႃႉၶဝ်ပေႃႈမႄႈလုၵ်ႈၼင်ႈဝႆႉယူႇယဝ်ႉ။
သၢဝ်းပီပႆၢဝႄႈၵၼ်လႆႈတႃႇသေႇ ၵူၺ်းၵႃႈမိူဝ်ႈၼႆႉ သမ်ႉမႃးႁူပ်ႉၵၼ်တင်းၵူၼ်းၼႂ်းႁိူၼ်းမၼ်း ဢမ်ႇၸႂ်ႈမေးၵေႃႉၼၼ်ႉယဝ်ႉ လႅပ်ႈပဵၼ်မေးမႂ်ႇမၼ်းၵူၺ်းလႄႈ တူၺ်းတႄႉဢသၢၵ်ႈၶႂ်ႈယႂ်ႇလိူဝ်လုၵ်ႈယိင်းမၼ်းဢိတ်ႉၼိုင်ႈၵူၺ်း။
“ၼၼ်ႉမႄႈ..ၸွင်ႇၸႂ်ႈႁႃႉ”
“ၸႂ်ႈယဝ်ႉ..”
“ၸွင်ႇတေၶဝ်ႈၵႂႃႇႁိုဝ်”
“ၶဝ်ႈၵႂႃႇလႄႈ ယိင်းၶႂ်ႈၵိၼ်တီႈၼႆႈဢမ်ႇၸႂ်ႈၼႄႇ”
ဢမ်ႇထၢင်ႇဢွမ်သႂ်ၵေႃႈၶဝ်ႈၵႂႃႇတၵ်ႉ
“ဢမ်ႇႁၼ်ၵၼ်ႁိုင်ယဝ်ႉၼေႃ”
“ၸႂ်ႈယဝ်ႉ..သူလူးပဵၼ်ႁိုဝ်ၽွင်ႈယူႇလီၵိၼ်ဝၢၼ်ယူႇၼႄႇ”
“ယူႇလီၵိၼ်ဝၢၼ်ၼႃႇ..” ယိပ်းဢဝ်မိုဝ်းလုၵ်ႈယိင်းမၼ်းသေ “ၼႆႉပဵၼ်လုၵ်ႈယိင်းႁဝ်း”
“ဢေႃႈ..ၵေႃႉယႂ်ႇပဵၼ်သၢဝ်ႁၢင်ႈလီမိူၼ်မႄႈမၼ်းတေႉဢိူဝ်ႈ” သီၼႃႈမွင်မွင်ၸွမ်ၾႃႉယၵ်ႉတူၺ်းယိင်းယိင်းယူႇ။
“ၼင်ႈၸွမ်းၵၼ်ၶႃႈလႄႈပီႈလူဝ်း” မေးမၼ်းႁွင်ႉၼင်ႈၸွမ်းၵႂႃႇ။
ဢွမ်သႂ်ၵေႃႈဢမ်ႇဝႆႉၸႂ်ဢၢၼ်းၼႃႇသေ ဢွၼ်လုၵ်ႈယိင်းမၼ်းၼင်ႈၵႂႃႇယဝ်ႉ။ “ၼႆႉပဵၼ်လုၵ်ႈသူဢိူဝ်ႈၼႆႉၼေႃႈ”
“ၸႂ်ႈယဝ်ႉဝႃႈ..မီးသွင်ၵေႃႉၼႆႉယိုင်” မေးမၼ်းၵေႃႉတွပ်ႇ “ပီႈလူဝ်းၶဝ်ပဵၼ်ပီႈၼွင်ႉၵၼ်တင်းဢူႈဢႆၢႈၸႆၢးႁဝ်းၶႃႈၵႃႈ”
ဢွမ်သႂ်ယဵၼ်ၵႂႃႇသေ ယၵ်ႉတူၺ်းၼႃႈၸွမ်ၾႃႉယဝ်ႉ။
“ၸႂ်ႈယဝ်ႉ..” ယၵ်ႉတူၺ်းၼႃႈလုၵ်ႈဢွၼ်ႇသေ “ပီႈၼွင်ႉၽႆၢႇပေႃႈ”
“မႃးၵၼ်သွင်ၵေႃႉၵူၺ်းၼႄႇ”
“ၸႂ်ႈယဝ်ႉၶႃႈ..ၵိုတ်းႁႃးသွင်ၵေႃႉၵူၺ်း..ဢူႈၶဝ်တႆၢပႅတ်ႈၸဵမ်မိူဝ်ႈမၼ်းတိုၵ်ႉယူႇၼႂ်းတွင်ႉယဝ်ႉဝႃႈ”
ၸွမ်ၾႃႉသမ်ႉပေႃးဢမ်ႇၸၢင်ႈတၵ်းသဵင်လႆႈယဝ်ႉ။
“ပဵၼ်ၸႂ်ဢမ်ႇလီၸွမ်းတေႉၶႃႈ”
“ဢေႃႈၶႃႈ..”
“လဵင်ႉလုၵ်ႈၵေႃႉလဵဝ်တေႁိူဝ်ႉတေႉၶႃႈယဝ်ႉ ၶႃႈၼႆႉပေႃးဢမ်ႇမီးဢူႈၶဝ်တႄႉ တႆၢလီလီယဝ်ႉဢေႃႈၼႆႉ ႁိူဝ်ႉၼႃႇ”
“မၼ်းမေႃႁၵ်ႉလုၵ်ႈဢွၼ်ႇယူႇၶႃႈႁၼႆႉ”
“ဢမ်ႇမေႃၵေႃႈၵႃႈလႆႈဢဝ်ယဝ်ႉၶႃႈဢိူဝ်ႈ”
“မိူဝ်ႈဢွၼ်တၢင်းၼႆႉ မၼ်းဢမ်ႇၵျိူၵ်ႈလုၵ်ႈဢွၼ်ႇသေဢိတ်းၶႃႈၼၼ်ႉ”
“ယိင်းၸိုဝ်ႈသင်လႃႇ” ၸွမ်ၾႃႉထၢမ်ယိင်း
“ၸိုဝ်ႈယိင်းယိင်းဢေႃႈ”
“တႄႇၼႃႈႁိူၼ်းယဝ်ႉၼႄႇ”
“ပႆႇတႄႇၶႃႈ”
“ႁဵတ်းၵၢၼ်သင်ဝႆႉလႃႇမိူဝ်ႈလဵဝ်”
“ဢေႃႈ..လိုဝ်ႈၵၢၼ်ဝႆႉယူႇၶႃႈ”
“ၸိူင်ႉၼၼ်ႁႃႉ ပေႃးလူဝ်ႇတၢင်းၸွႆႈထႅမ်ၵေႃႈလၢတ်ႈလႆႈၼႃႈ”
“ဢမ်ႇပဵၼ်သင်ၶႃႈ..မိူဝ်ႈလဵဝ်ယိင်းၵေႃႈမီးၵၢၼ်ဝႆႉယူႇတီႈၵူဝ်းရီးယႃးၸၢၼ်း”
“ၵႂႃႇႁဵတ်းၵၢၼ်သင်လႃႇတီႈပုၼ်ႉ” မေးၸွမ်ၾႃႉထၢမ်ၼင်ႇသူၼ်ၸႂ်။
“ႁဵတ်းမေႃယႃၶႃႈ”
“ဢိူဝ်ႈ..ပီႈလူဝ်းႁဝ်းၼႆႉတႄႉၵၢမ်ႇလီၼႃႇၼႆႉ မီးလုၵ်ႈယိင်းႁၢင်ႈလီဢမ်ႇၵႃး သမ်ႉပႆၢၵတ်ႉၶႅၼ်ႇထႅင်ႈ ၵႂႃႇႁဵတ်းၵၢၼ်ႁွတ်ႈထိုင်ၼွၵ်ႈမိူင်းပုၼ်ႉ”
“ၵၢမ်ႇလီၸွမ်ၾႃႉၸွႆႈဝႆႉဢေႃႈ”
မေးမၼ်းယၵ်ႉတူၺ်းၼႃႈ လုၵ်ႈမၼ်းသွင်ၵေႃႉသေ “ၼေႈလုၵ်ႈ ပီႈပီႈၶဝ်ပဵၼ်မေႃယႃဝႃႇ မေႃယႃၼွၵ်ႈမိူင်းၵွၼ်ႇဢိူဝ်ႈၼႆႉ ၸွင်ႇၶွႆႁိုဝ်”
လုၵ်ႈမၼ်းၼၼ်ႉတႄႉဢမ်ႇပေႃးသူပ်းပေႃးသဵင်ၵႃႈႁိုဝ်။
ဝႆၢးၵိၼ်ယဝ်ႉၵေႃႈ သွင်ၵေႃႉမႄႈလုၵ်ႈ ၸႆၢႇၵႃႈတၢင်းၵိၼ်ပၼ်ၶဝ်ပႃးသေ ဢွၵ်ႇသႅင်ႇမႃးယဝ်ႉ။
“မႄႈၼႆႉၵေႃႈလၵ်ႉႁႆၢႉဝႆႉယူႇလူး ထၢင်ႇဝႃႈမႄႈတေဢမ်ႇမေႃသူႈၼႃႈၸိူင်ႉၼႆၼႃး”
“မီးလုၵ်ႈလႄႈ မႄႈႁတ်းၵူၺ်းဢိူဝ်ႈ”
“မိူဝ်ႈၼႆႉပေႉမႃးလူမ်ၸႂ်ဢမ်ႇႁူႉယဝ်ႉ”
“ပွႆးယဝ်ႉႁဝ်းၵႂႃႇလႄႇတၢတ်ႇႁႆၢးပႃၼႄႇ”
“ပဵၼ်တၢင်းလႂ်ပုၼ်ႉ ၵႆဝႃႈၵႆၵႆ”
“ၵႆၵေႃႈၸၢင်ႈပဵၼ်သင် ႁဝ်းမီးငိုၼ်းဢမ်ႇၸႂ်ႈႁႃႉ မႄႈၵေႃႈဢမ်ႇလူဝ်ႇလႆႈႁႃငိုၼ်းလဵင်ႉယိင်းယဝ်ႉ ယိင်းၵေႃႉတေလဵင်ႉမႄႈၵူၺ်း”
သွင်ၵေႃႉမႄႈလုၵ်ႈယူႇၸွမ်းၵၼ်ၼင်ႇပဵၼ်ဢူၺ်းၵေႃႉၵၼ်ဝႆႉယဝ်ႉ၊ ၵမ်ႉၸူဝ်းၵႂႃႇလႄႇတၢင်းၼၼ်ႉတၢင်းၼႆႉ သမ်ႉပေႃးၶႂ်ႈၸွတ်ႇမိူင်း။
ဝၼ်းၼိုင်ႈမိူဝ်ႈယိင်းယိင်းပွၵ်ႈၵႂႃႇ ဢွမ်သႂ်ၶိုၼ်းၽုၺ်ႇသႅင်ႇမၼ်းသေ ဢမ်ႇထၢင်ႇပႃႈၵေႃႉၼိုင်ႈ မႃးတီႈသႅင်ႇမၼ်းယဝ်ႉ။
“သူပဵၼ်ဢွမ်သႂ်ၵေႃႉၼၼ်ႉႁႃႉ”
“ၸႂ်ႈဢေႃႈ မီးၸိူင်ႉႁိုဝ်ၶႃႈ”
“သူယူႇလီတေႉတေႉလူး”
“ဢေႃႈ..တေၵိၼ်ၶဝ်ႈၽၵ်းသင်ၶႃႈ”
“ႁဝ်းပဵၼ်မေးၸွမ်ၾႃႉ”
သဵင်ၼၼ်ႉၵေႃႈၼင်ႇဝႃႈမိုတ်ႈႁူမႃးယဝ်ႉ မၼ်းၶိုၼ်းဝႆၢႇတူၺ်းၼႃႈၵႂႃႇၸူး။
“မိူဝ်ႈၼႆႉႁဝ်းတင်ႈၸႂ်မႃးႁႃသူ”
“ဢေႃႈ..မီးၸိူင်ႉႁိုဝ်ၶႃႈ..တေမႃးဝႃႈသင်ႁဝ်းၶႃႈလႃႇ”
“ႁဝ်းယွမ်းၼွမ်း”
“လွင်ႈသင်ၶႃႈ..ဢၼ်လႆႈလၢတ်ႈႁဵတ်းႁႆၢႉသူဝၼ်းၼၼ်ႉ”
“ဢမ်ႇၸႂ်ႈတၢင်းၽိတ်းသင်တီႈသူၶႃႈလူး”
“ၽူႈယိင်းဢၼ်မၼ်းၶဝ်ႈႁႃသေ ဢၼ်ဢမ်ႇယွမ်းႁပ်ႉပဵၼ်မေးမၼ်းၼၼ်ႉမီးသူၵူၺ်း မိူဝ်ႈႁဝ်းလႆႈသုမ်းၵူႈၸိူဝ်ႉၵူႈလွင်ႈၵႂႃႇတီႈၽူႈယိင်းၵေႃႉၼၼ်ႉ ႁဝ်းၵေႃႈဝူၼ်ႉထိုင်သူၵမ်းလဵဝ်ယဝ်ႉ ယွၼ်ႉသင်လႄႈ သူထဵင်ၶိုၼ်း ယွၼ်ႉသင်လႄႈသူဢမ်ႇၶႂ်ႈလႆႈမၼ်း ယွၼ်ႉသင်လႄႈသူပွႆႇမၼ်းၵႂႃႇ ယွၼ်ႉသင်လႄႈသူဢမ်ႇဝူၼ်ႉတေၸွမ်းမၼ်း တိူၵ်ႈတီႈသူၵေႃႈမီးလုၵ်ႈၸွမ်းမၼ်းယူႇ ႁဝ်းလႆႈၸွမ်းတူၺ်းသူမႃးတႃႇသေႇ လႆႈႁၼ်သူၵေႃႈၸႂ်ႉၸၢတ်ႈပၢၼ်သူၵႂႃႇ ဢမ်ႇႁၼ်ဝႃႈသူတေၶိုၼ်းႁႃမၼ်း ယွၼ်ႉသင်”
“လွင်ႈမၼ်းၵေႃႈပူၼ်ႉမႃးႁိုင်ယဝ်ႉ လုၵ်ႈလၢင်းႁဝ်းၵေႃႈၵေႃႉယႂ်ႇၵၼ်ယဝ်ႉ တေဢဝ်မႃးဝူၼ်ႉၶိုၼ်းႁႂ်ႈၸႂ်ဢမ်ႇလီႁဵတ်းသင်”
“သူဢမ်ႇၼႅင်ၸႂ်ႁႃႉ”
“ဢမ်ႇလႆႈၼႅင်ၸႂ် မၼ်းၵေႃႈႁဵတ်းႁႂ်ႈႁဝ်းမီးလုၵ်ႈယိင်းၵေႃႉၼိုင်ႈမႃး သင်ႁူၼ်ၶၢဝ်းယၢမ်းၶိုၼ်းလႆႈၵေႃႈ ႁဝ်းတေလိူၵ်ႈမိူၼ်ၵဝ်ႇၵူၺ်း”
ဢွမ်သႂ်ယၵ်ႉတူၺ်းၼႃႈပႃႈၼၼ်ႉသေ
“တွၼ်ႈတႃႇႁဝ်း ဢၼ်ၵႂႃႇယႃႉမႅၼ်ႈၼႃႈႁိူၼ်းပိူၼ်ႈၼၼ်ႉ ပဵၼ်တၢင်းၽိတ်းၸဝ်ႈၵဝ်ႇဢၼ်ဢမ်ႇမီးဝၼ်းၶႂၢင်းပၼ်လႆႈယူႇယဝ်ႉ၊ ႁဝ်းပွင်ႇၸႂ်လီ ၵူၼ်းၵေႃႉဢၼ်လႆႈၶၢမ်ႇႁိမ်ၵႂႃႇၼၼ်ႉ မၼ်းမိူၼ်ႁိုဝ်ၼႆ ဢမ်ႇႁူႉလႄႈလႆႈႁဵတ်းၽိတ်းၵႂႃႇ မိူဝ်ႈႁူႉယဝ်ႉတေပွႆႇမၼ်းၵႂႃႇၸိူင်ႉၼၼ်ၵေႃႈ တေပဵၼ်လွင်ႈဢမ်ႇၵတ်းၸႂ်လႆႈတႃႇႁဝ်းၵူၺ်း”
ပႃႈၼၼ်ႉၵေႃႈၵူမ်ႈၼႃႈသေထွမ်ႇယူႇ
“ယဝ်ႉၵေႃႈ တၢင်းယၢမ်ႈၶဝ်ၼၼ်ႉ ႁဝ်းတေဢမ်ႇမီးဝၼ်းလႅၵ်ႈလႆၢႈလႆႈ ဢမ်ႇဝႃႈပဵၼ်ႁဝ်းႁိုဝ် ၽႂ်ၵေႃႈယဝ်ႉ သင်ပဵၼ်ၼႃႈႁိူၼ်းႁူမ်ႈၵၼ်တင်းၶဝ် မၼ်းတေဢမ်ႇပၼ်ႁႂ်ႈႁဝ်းလႆႈၸဵပ်းယူႇပွၵ်ႈၼၼ်ႉၵူၺ်း မၼ်းတေမီးထႅင်ႈပွၵ်ႈၼိုင်ႈပွၵ်ႈသွင် ႁဝ်းဢမ်ႇမီးဝၼ်းယွမ်းႁႂ်ႈပဵၼ်ၸိူင်ႉၼၼ်လႆႈ” ထူၺ်ႈၸႂ်လူင်မႃႈၵမ်ႉၼိုင်ႈယဝ်ႉ။
“ၶဝ်ၵေႃႈပၼ်တၢင်းလိူၵ်ႈႁဝ်းသွင်တၢင်းၵူၺ်း တေလိူၵ်ႈၶဝ်ႁႃႉ တေလိူၵ်ႈလုၵ်ႈဢၼ်မီးယူႇၼႂ်းတွင်ႉၼႆ သမ်ႉၺႃးမႅၼ်ႈမိူဝ်ႈသူလၢတ်ႈမႃးလီလီ ပဵၼ်ၵၢၼ်တႅပ်းတတ်းဢၼ်ႁဝ်းဢမ်ႇသေလႆၢသေဢိတ်းၼၼ်ႉယဝ်ႉ..”
“ႁဝ်းၼပ်ႉထိုဝ်သူတေႉဢိူဝ်ႈ ဢမ်ႇဝူၼ်ႉဝႃႈသူတေတႅပ်းတတ်းၸိူင်ႉၼႆ သင်ႁဝ်းဝူၼ်ႉလႆႈၸဵမ်လႂ်ႁဝ်းၵေႃႈၶေးတေဢမ်ႇပဵၼ်ၼႆ ၵွပ်ႈႁဝ်းပိုင်ႈဢိင်ၶဝ်ၼႃႇပူၼ်ႉတီႈ”
“ၸႂ်ႈယူႇၵူၺ်း..သင်ႁဝ်းပေႉတူဝ်လႆႈႁင်းၵူၺ်း ႁဝ်းၵေႃႈတေဢမ်ႇမုင်ႈမွင်းသင်တီႈၶဝ်လႆႈ”
“ၸူမ်းယဝ်ႉၼႃႈ” လုၵ်ႉဢွၵ်ႇမိူဝ်းၵႂႃႇပႅတ်ႈယဝ်ႉ။
“မီးၶၢဝ်းယၢမ်းၵေႃႈၵႆႉမႃးလႄႇၶႃႈလႄႈ”
ဢွမ်သႂ်ဝႆၢႇယၵ်ႉတူၺ်းၵႂႃႇၽႆၢႇလင်သေ ၼင်ႇဝႃႈမီးလွင်ႈလူမ်ၸႂ်ၼႃႇၼၼ်ႉယဝ်ႉ။
လွင်ႈမၼ်းပူၼ်ႉမႃးႁိုင်ယဝ်ႉသေတႃႉ တွၼ်ႈသွၼ်
ဢၼ်ထူပ်းမႃးၼၼ်ႉတႄႉ ယူႇၸိုမ်းလိုၵ်ႉဝႆႉယူႇၼႂ်းၸႂ်ယဝ်ႉ။
သုတ်း။
တႅမ်ႈ- သႅၼ်ငဝ်း
4-6/5/2026
