ယူႇယူႇႁူဝ်ၸႂ်ပိုတ်ႇၵီႈတွတ်ႇမႃး ၼႂ်းၽုင်မူႇပွႆးၵိုၼ်း တႃတူၺ်းဢမ်ႇၽၢတ်ႇလႆႈတီႈၵူၼ်းၵေႃႉၼိုင်ႈ၊ မိူဝ်ႈယၵ်ႉႁၼ်ၼင်ႇႁၢင်ႈပေႉမႃးၸၼ်ၸႂ် ယၢမ်ႈႁူႉၸၵ်းႁႃႉၼႆၵေႃႈ ဢမ်ႇၸႂ်ႈ ဢမ်ႇပႆႇယၢမ်ႈထူပ်းဢမ်ႇယၢမ်ႈႁၼ် ပဵၼ်ပွၵ်ႈဢွၼ်တၢင်းသုတ်း ၵူၺ်းၵႃႈႁၼ်ဝႆႉၸပ်းတႃယူႇဢိူဝ်ႈ။
ႁၼ်ၵၼ်ၸူဝ်ႈၵႅပ်ႉႁူပ်ႉၵၼ်ၸူဝ်ႈၵမ်း ၵူၺ်းၵေႃႈ ၸိုင်ပေႉမႃးတမ်းဝႆႉယူႇၼႂ်းၸႂ် မွင်းဝႆႉယူႇမိူဝ်ႈလႂ်တေလႆႈၶိုၼ်းႁၼ်ၼႆၵေႃႈ ပဵၼ်ၾၼ်ၵူၺ်းႁိုဝ်။
ဝၼ်းၶိုၼ်းဝူၼ်ႉႁၼ်ယူႇဢိူဝ်ႈ ၶူပ်ႇမိူဝ်ႈယၢမ်းၼင်ႈငဝ်
“မိူဝ်ႈၼႆႉ ပိူၼ်ႈႁဵတ်းပွႆးၶဝ်ႈဝႃႇ ဢမ်ႇၵႂႃႇၸွႆႈပိူၼ်ႈတီႈၵျွင်းႁ ဢေးဢိင်ႇ” ၼႃႉဢူင်း ယူႇၼွၵ်ႈၵိူၼ်ႇသေႁွင်ႉထၢမ်။
“ၵႂႃႇဢေႃႈ..”
သဵင်ၵွင်သဵင်မွင်း ပေႃးပၼ်းၼၼ်ႈဢူၼ်မေႃးယူႇတီႈၵျွင်း၊ သဵင်ၵူၼ်းဢုပ်ႇၵၼ်ပၼ်းလူင်ဝႆႉ ၼႂ်းသိုင်ႇမိုဝ်ႉလူင်ၼၼ်ႉထၢၼ်ႈၵိုၼ်းၶွၼ်ႈ။
ယူႇယူႇၾူၼ်တူၵ်းႁၢတ်ႇသႂ်ႇမႃးသေ တၢင်းၵူမ်ႇပိူဝ်ႉဢုင် ၶႅပ်းတိၼ်ၸပ်းလိၼ်ပဵၼ်ၶႅပ်းပဵၼ်ၶႅပ်း ယုၵ်ႉတမ်းသမ်ႉပေႃးယၢပ်ႇယဝ်ႉ။
ၶမ်ႈၶိုၼ်းၾူၼ်တူၵ်းၵေႃႈ ဢွၼ်ၵၼ်ႁႆႇၵွင်မွင်းဢူၼ်ၼၼ်ႈပၼ်းၸွင်ႇ သဵင်ႁုၼ်ႉပေႃးၵျွင်ႇ ၵူၼ်းၵႃႈလႆၢးမိုဝ်းၶႄႉၵၼ်တၢဝ်း “ဢဝ်တႅမ်ႇတႅမ်ႇ ဢဝ်တႅမ်ႇတႅမ်ႇ” ယူႇႁဵတ်းၼၼ် ၼူၵ်ႉတူဝ်းဝႅၼ်ၵႃႈယွပ်ႇၸွမ်း ၵူၼ်းၵိုၼ်းမူႇပၼ်ႇဝူင်းလွမ်ႉတူၺ်းယူႇၼႂ်းႁူမ်ႈတႂ်ႈၵျွင်း။
ၼူၼ်းဢိင်ႇၸွႆႈလဵင်ႉၸွႆႈလူ ပီႈၼွင်ႉၶႅၵ်ႇၸိူဝ်းမႃးၶဝ်ႈပွႆး ဢမ်ႇတၼ်းၾၢင်ႉတူၺ်းသမ်ႉမႃးႁူပ်ႉတေႃႇၼႃႈ တမ်းၽိူၼ်ယူႇၼႂ်းၵျွင်း ဢဝ်ၸႂ်သမ်ႉပေႃးသၼ်ဝႆၸွမ်း ယူႇဢမ်ႇၼိမ်လႆႈ မိုဝ်းမႆႈမႆႈထိတိူဝ်ႉသႂ်ႇမိုဝ်းယဵၼ်ယူႇၵမ်းၼိုင်ႈ မိူဝ်ႈၽွင်းယိပ်းဝၢၼ်ႇၸွႆႈတမ်း။
“ၸူမ်းယဝ်ႉၶႃႈ”
“ၵိၼ်ယဝ်ႉႁႃႉ” ဢူၺ်းၵေႃႉမၼ်း သႃႇဢွင်ႇႁွင်ႉထၢမ်ၸူး။
“ပႆႇၼႃ”
“ၵိၼ်ၸွမ်းႁဝ်းလႄႈ”
“ၸွႆႈပိူၼ်ႈၵမ်ႉ ၵမ်ႉၸင်ႇမႃး”
သႆၢတႃၼၼ်ႉ ယၵ်ႉတူၺ်းၸူးလင် ၼူၼ်းဢိင်ႇ ယဝ်ႉထၢမ်ၸူး
“မိုတ်ႈၵၼ်ယူႇႁႃႉ” တိုၼ်းႁၢၼ် ယၵ်ႉတူၺ်းသႃႇဢွင်ႇသေထၢမ်။
“ဢူၺ်းၵေႃႉႁူမ်ႈႁဵၼ်းၵၼ်”
“မီးၼႃႈႁိူၼ်းယဝ်ႉၼႄႇ”
“ပႆႇမီး”
“ၸွင်ႇမီးၸူႉႁိုဝ်”
“ဢမ်ႇႁူႉၼၼ်ႉတႄႉ တေၶႂ်ႈၵဝ်းၼႆၵႃႈ”
ၼႃႈယုမ်ႉယုမ်ႉသေ ဢဝ်သႆၢတႃယၵ်ႉတူၺ်းၼူၼ်းဢိင်ႇၵႂႃႇၵူၺ်း။
“မႂ်းဢမ်ႇၸႂ်ႈဝႃႈမီးၸူႉဝႆႉယူႇႁႃႉ”
“ၶၢတ်ႇၵၼ်ယဝ်ႉ ၶၢတ်ႇသေမႃးလႄႇမႂ်းၼၼ်ႉၼႃႇ”
“ၶၢတ်ႇမိူဝ်ႈမႃးၼႆႉၵူၺ်းၵႃႈ ဢသၢၵ်ႈၵေႃႈဢမ်ႇလဵၵ်ႉယဝ်ႉ တေတေႇၵေႃႈတေႇလႆႈယဝ်ႉဝႃႈမႂ်း ၵုမ်ႇပႅတ်ႈပႅတ်ႈဢဝ်ဢဝ်ယူႇၸိူင်ႉၼၼ် ဢမ်ႇသၢင်ႈၼႃႈႁိူၼ်းလႆႈႁေပွၵ်ႈယဝ်ႈ”
“ပေႃးဢမ်ႇလီၵေႃႈၵႃႈလႆႈပႅတ်ႈယူႇၵူၺ်းဢိူဝ်ႈ”
“မႂ်းဢမ်ႇလီလႄႈပိူၼ်ႈပႅတ်ႈႁတေႃႈ ထဝ်ႈယဝ်ႉတၢင်းလဝ်းၵူၺ်း ဢဝ်ဢမ်ႇၶၢတ်ႇယဝ်ႉမႂ်းႁူႉ”
“ငိုၼ်းၵူၺ်းဢိူဝ်ႈၼႆ”
“ၼၼ်ႉယဝ်ႈ ပေႃးမီးမၼ်းတႄႉၵႃႈၶႂ်ႈထဝ်ႈယဝ်ႉမႂ်းဝႃႈ”
“ၽူႈယိင်းဢမ်ႇတူၺ်းၼႃႈငိုၼ်းၼႆႉ ႁႃယၢပ်ႇၼႃႇမႂ်း”
“တေႉဢိူဝ်ႈၼႆ မီးၼႃႈႁိူၼ်းႁေဢမ်ႇမီးငိုၼ်းၵေႃႈႁိူဝ်ႉၼႃႇမႂ်းႁူႉ ပေႃးႁၼ်မေးႁႃးႁဵတ်းၵၢၼ်ႁိူဝ်ႉ ၵဝ်ၵေႃႈလၵ်ႉဝူၼ်ႉယူႇ သင်မၼ်းဢဝ်ၶိင်းလၢဝ်းပၢၼ်းၶႄႇႁိမ်းႁိူၼ်းၶဝ်တႄႉမၼ်းဢမ်ႇလႆႈမႃးတုၵ်ႉၶၸွမ်းၵဝ်ယဝ်ႉလေႃႇၼႆႉၼႆဢိူဝ်ႈ”
“ႁေမေႃဝႃႈၼႆႁေၵွၼ်ႇ ပေႃးပိူၼ်ႈဢဝ်ၵေႃႈပဵၼ်ၼမ်ႉႁူၼမ်ႉတႃယူႇဢမ်ႇႁိုဝ်”
“မိူဝ်ႈၼၼ်ႉတႄႉၸႂ်ႈၵႃႈ မိူဝ်ႈလဵဝ်ၼႆႉဢမ်ႇပဵၼ်ၼၼ်ယဝ်ႉလႄႇဢ”
ယၢမ်းၶမ်ႈလပ်းသိင်ႇပွႆးၸမ်ဝႆၢး ၼူၼ်းဢိင်ႇၸွႆႈပိူၼ်ႈၵဵပ်းသိမ်းသေယဝ်ႉ ပွၵ်ႈမိူဝ်းၵႂႃႇ။ မၼ်းၼၼ်ႉတႄႉၵေႃႈဢဝ်လူတ်ႉၶိူင်ႈမႃးလႄႈ မိူဝ်ႈၵႂႃႇၸူးလူတ်ႉၼၼ်ႉ ၸင်ႇသမ်ႉႁူပ်ႉၺႃး သႃႇဢွင်ႇတၢင်ႇမေးမၼ်းမိူဝ်းၵႂႃႇယူႇ။
မိူဝ်ႈမႃးတႄႉသႃႇဢွင်ႇတၢင်ႇတိုၼ်းႁၢၼ်မႃး၊ ၽိူဝ်ႇမိူဝ်းသမ်ႉလူဝ်ႇတၢင်ႇမေးမၼ်းမိူဝ်းလႄႈ တိုၼ်းႁၢၼ်သမ်ႉဢမ်ႇၸၢင်ႈမိူဝ်းၸွမ်းၽႂ်ႁေယဝ်ႉ၊ သႃႇဢွင်ႇႁႂ်ႈမၼ်းပႂ်ႉဝႆႉသေ မၼ်းၵေႃႈၼင်ႈပႂ်ႉယူႇၸွမ်းၼၼ်ႉယဝ်ႉ။
ၼူၼ်းဢိင်ႇၵေႃႈလႆႈႁၼ်မၼ်းယဝ်ႉ ၵူၼ်းၼႆႉပေႃးဝႃႈထုၵ်ႇတႃယဝ်ႉၼႆ တူၺ်းၼႂ်းလပ်းသိင်ႇၵေႃႈတိုၵ်ႉတွင်းဝႃႈပဵၼ်မၼ်းယူႇတေႉ။
“သႃႇဢွင်ႇၶဝ်မိူဝ်းယဝ်ႉ ပႆႇမိူဝ်းၵွၼ်ႇၶႃႈႁႃႉ”
“ၵမ်ႉမၼ်းတေမႃးႁပ်ႉၼႆဝႃႇ”
“မိူဝ်းၸွမ်းၶႃႈလႄႈပေႃးၼၼ်”
“လႆႈယူႇႁႃႉ”
“လႆႈဢေႃႈ..”
ၼိူဝ်သဵၼ်ႈတၢင်းမိုၵ်းယမ်း တိုၼ်းႁၢၼ်ၵေႃႉႁေႃႈမိူဝ်းၵႂႃႇလွႆးလွႆး ၾႆးလူတ်ႉထွင်ႇဝွႆးဝွႆး ၽူၼ်ႁိူတ်ႇၸူဝ်ႈၵႅပ်ႉလႄႈ ၸင်ႇလွတ်ႈၾူၼ်မိူဝ်းၵႂႃႇ။
သဵၼ်ႈတၢင်းၼႆႉ ၸိုင်ပေႉၸဵဝ်းထိုင်ၼႃႇ ဢုပ်ႇၵၼ်ပႆႇႁူႉၶေႃႈ သမ်ႉပေႃးလေႃႈႁွတ်ႈထိုင်ၽၵ်းတူႁိူၼ်းသႃႇဢွင်ႇၶဝ်ယဝ်ႉၼႃႇ။
“ၸူမ်းၼမ်ၼမ်ၶႃႈ”
“မိူၼ်ၵၼ်ၶႃႈ”
ၼူၼ်းဢိင်ႇသိုပ်ႇပုတ်ႈႁေႃႈလူတ်ႉမၼ်းမိူဝ်းၵႂႃႇတၢင်းႁိူၼ်းၶဝ်ၼၼ်ႉယူႇယဝ်ႉ။
ၼႂ်းၸႂ်တႄႉလၵ်ႉယုမ်ႉၸူမ်းသိူဝ်းဝႆႉယူႇဢိူဝ်ႈ၊ သဵင်ဢွၼ်ႇဝၢၼ်ဝၢၼ် ၵႂၢမ်းၶၢၼ်လၢတ်ႈဢုၼ်ႇၸႂ် ယၢမ်းလႂ်တေလႆႈထူပ်းၵၼ်ထႅင်ႈ လွမ်ငွၵ်ႈလွမ်မွင်းဝႆႉယူႇ။
တိုၼ်းႁၢၼ်ၵေႃႈဢမ်ႇပိူင်ႈသင်ၵၼ် ယၢမ်းဢၼ်လႆႈႁူပ်ႉလႆႈလၢတ်ႈတေႃႇ တၢင်းၵူဝ်တၢင်းဢႆၢႁႆၢလႆၢၵႂႃႇမူတ်း၊ ၼင်ႇႁၢင်ႈမႃးယူတ်းယႃၸႂ်သမ်ႉပေႃးၸိုၼ်ႈၶႅၼ်းမႃးယဝ်ႉ။
ၶိုၼ်းၼႆႉၶႂ်ႈၼွၼ်းလပ်းဝၢၼ် ၾၼ်ထိုင်မၼ်းၼႆသေတႃႉၵေႃႈ ၵုမ်ႇမိုင်ႉဝူၼ်ႉထိုင်ဢမ်ႇပဵၼ်လပ်းလႆႈ ၸႂ်ၶႂ်ႈၸပ်းပႅၼ်းဝႆႉယူႇႁဵတ်းၼၼ်ၵူၺ်းယဝ်ႉၼႃႇ။
ၶဝ်ႈဝႃႇယဝ်ႉၵေႃႈ တေႃႈႁိုဝ်လႆႈၶိုၼ်းႁူပ်ႉၵၼ် ဢမ်ႇႁူႉပဵၼ်သင် ၸိုင်ဢမ်ႇလႆႈႁူပ်ႉၺႃး ပႃးလူၺ်ႈၼႃႈၵၢၼ်တႃငၢၼ်းၽႂ်မၼ်းသေ တိုၼ်းႁၢၼ် ၶိုၼ်းလႆႈမိူဝ်းသိုပ်ႇႁဵတ်းၵၢၼ်မၼ်းယဝ်ႉ၊ ၼူၼ်းဢိင်ႇၵေႃႈ ၵၢၼ်သုၵ်ႉၵၢၼ်ၼမ်ထႅင်ႈလႄႈ ဢမ်ႇသူႈလႆႈလႄႇလႂ်။
ၶဝ်ႈဝႃႇယဝ်ႉဢွၵ်ႇဝႃႇ ဝၼ်းဝၼ်းပူၼ်ႉၵႂႃႇ ဢၼ်လႆႈထူပ်းၶဝ်ၼၼ်ႉ ပဵၼ်ၾၼ်ၸူဝ်ႈၵႅပ်ႉ ပဵၼ်ဢႆၢမွၵ်ႇထွင်းၸွမ်းလူမ်းမႃးၸူဝ်ႈၵမ်းၵူၺ်းလႄႈ ပဵၼ်မုၼ်ႈဢၼ်ၽူင်ႉပိဝ်မႃးႁႂ်ႈၶီႈၸၢမ်ယူႇမၢင်ပွၵ်ႈမၢင်ၵမ်း တေဢမ်ႇၸၢင်ႈတမ်းပဵၼ်ၵေႃႉမိုတ်ႈၵိုဝ်းၵၼ်လႆႈၵွၼ်ႇ ပွႆႇယွၼ်ႇဝႆႉသေ ဢမ်ႇသိုဝ်ႇၸွမ်းႁူႉ ဢမ်ႇဝႆႉၸွမ်းႁႃမၼ်း လႄႈ ဢမ်ႇမီးတီႈၵပ်းသိုပ်ႇၵၼ် ဢမ်ႇလႆႈႁူပ်ႉၵၼ်ထႅင်ႈ မီးပဵၼ်သွင်ပီယဝ်ႉၼႃႇ။
တီႈၼႂ်းဝဵင်းလူင်ၵူၼ်းၵိုၼ်း တီႈပိူၼ်ႈၵႆႉလႄႇဢွၼ်ၵၼ်ၵႂႃႇႁႃငိုၼ်း၊ တီႈပိူၼ်ႈၵႆႉလႄႇႁႃၸႆၢႇငိုၼ်းၼမ်၊ ၼူၼ်းဢိင်ႇၵႂႃႇလႄႇၸႂ်းပီႈဢႆၢႈ ဢမ်ႇထၢင်ႇသမ်ႉ တီႈၼႂ်းႁၢၼ်ႉလူင်သႅင်ႇယႂ်ႇတီႈၼိုင်ႈၼၼ်ႉ
“ၼူၼ်း..” သဵင်ဢမ်ႇမိုတ်ႈႁူလႄႈဢမ်ႇဝႆၢႇတူၺ်း။
“ၼူၼ်းဢိင်ႇ..” မိူဝ်ႈႁူႉဝႃႈပဵၼ်ၸိုဝ်ႈၸဝ်ႈၵဝ်ႇယဝ်ႉၵေႃႈ ၼူၼ်းဢိင်ႇဝိၼ်ႇၼႃႈဝႆၢႇတူၺ်း သႆၢတႃမိုင်ၸိူဝ်ႈယၵ်ႉတူၺ်းၼႃႈၵူၼ်းၵေႃႉၼၼ်ႉယူႇတင်းႁိုင်။
ဢမ်ႇထၢင်ႇသေလႆႈၶိုၼ်းႁူပ်ႉၵၼ် ပဵၼ်ၾၼ်ယူႇႁႃႉမၼ်းၵေႃႈဢမ်ႇၶႂ်ႈယုမ်ႇ။
“ယူႇလီယူႇႁႃႉ”
“ဢိုမ်ႈ..သူလူး”
“ဢိုမ်ႉ..” သႆၢတႃယၵ်ႉတူၺ်းၸူးၼူၼ်းဢိင်ႇ ၼင်ႇမီးလွင်ႈၶမ်ၸႂ်ၼႃႇၼၼ်ႉသေ ၶႂ်ႈလၢတ်ႈဢမ်ႇၶႂ်ႈလၢတ်ႈဝႆႉ။
“မီးၼႃႈႁိူၼ်းယဝ်ႉႁႃႉ”
“ပႆႇ..” ၼင်ႇႁၢင်ႈပေႃးလူမ်ၸႂ်မႃးၵမ်းလဵဝ်ယူႇ။
“သူလူး”
သႆၢတႃတိုၼ်းႁၢၼ်မိုၼ်ႇယၵ်ႉတူၺ်းၼူၼ်းဢိင်ႇယဝ်ႉ ၼိမ်ယဵၼ်ၵႂႃႇတင်းႁိုင် ထိုင်တီႈ ဢမ်ႇလႅပ်ႈတေလႆႈငိၼ်းၶေႃႈတွပ်ႇမၼ်းယဝ်ႉ
“ၶႂ်ႈဝႃႈ..မီးယဝ်ႉဢိူဝ်ႈၼေႃႈ ႁဝ်းၵေႃႈဢမ်ႇလီထၢမ်”
တိုၼ်းႁၢၼ်ယၵ်ႉတူၺ်းၼႃႈ ၼူၼ်းဢိင်ႇသေ ယုမ်ႉဢိတ်ႉၼိုင်ႈယဝ်ႉ “ပႂ်ႉၶေႃႈတွပ်ႇတီႈသူယူႇ”
ပႆၢၵမ် – သႅၼ်ငဝ်း
1-3/6/2026
