ႁဝ်းဢမ်ႇလႆႈမုင်ႈမွင်းဝႃႈၸၢတ်ႈပၢၼ်ႁဝ်းၼၼ်ႉဢမ်ႇလူဝ်ႇလႆႈတဵမ်ထူၼ်ႈၵေႃႈလႆႈ၊ ဢမ်ႇၸႂ်ႈဝႃႈၵူႈဝၼ်းတေၵႂႃႇလႆႈလီတႃႇသေႇ။
လိူဝ်သေဝႃႈ ၸူဝ်ႈပၢၼ်ဢၼ်တိုၵ်ႉႁႅင်းဢူၼ်ႈယူႇၼၼ်ႉ ႁႂ်ႈမီးၵူၼ်းၸႂ်လီယူႇႁိမ်းၸမ်ၵူၺ်းၵေႃႈလီၼႃႇယဝ်ႉ။
တႃႇတေၵေႃႉယႂ်ႇမႃးထႅင်ႈၼၼ်ႉ မၼ်းတိုၼ်းႁိူဝ်ႉယူႇယဝ်ႉ တေလႆႈႁဵၼ်းႁူႉ တေလႆႈလႅၵ်ႈလၢႆႈ တေလႆႈႁပ်ႉမိုဝ်းၸွမ်းလွင်ႈလႅၵ်ႈလၢႆႈၵူႈၽၢႆႇၽၢႆႇယဝ်ႉ။
မၼ်းၵေႃႈတေလီယူႇ သင်ဝႃႈၽွင်းဢၼ်ႁဝ်းတိုၵ်ႉႁဵၼ်းႁူႉတေပဵၼ်ၵူၼ်းလူင်ယူႇၼၼ်ႉ မၼ်းတေမီးၵူၼ်းၸွမ်းလၢတ်ႈလီလီတေႃႇႁဝ်း ပွင်ႇၸႂ်ပၼ်ႁဝ်းလႄႈ ဢမ်ႇႁိပ်ႈႁႂ်ႈႁဝ်းၸဵဝ်းၵေႃႉယႂ်ႇၼႃႇ။
ယွၼ်းႁႂ်ႈမီးၽႂ်သေၵေႃႉၼိုင်ႈလၢတ်ႈဝႃႈ “ဢမ်ႇပဵၼ်သင်လေႃႇ ၽိတ်းလႆႈယူႇၵူၺ်း” “ႁိူဝ်ႉၵေႃႈလိုဝ်ႈသေ ၸွင်ႇၵွႆႈၵႂႃႇထႅင်ႈၵေႃႈလႆႈ” “သူႁဵတ်းၼင်ႇဢၼ်သူႁဵတ်းလႆႈၵူၺ်းၵေႃႈဢမ်ႇပဵၼ်သင်ၼႃ”
ၶေႃႈၵႂၢမ်းၸိူဝ်းၼႆႉ မၼ်းတေၸၢင်ႈပဵၼ်လွင်ႈလဵၵ်ႉလဵၵ်ႉဢွၼ်ႇၵူၺ်း ၵူၺ်းၵႃႈမၼ်းမီးႁႅင်းၼႃႇ တႃႇၸၼ်ႁႂ်ႈႁဝ်းၶိုၼ်ႈမႃးၶိုၼ်းၼႂ်းဝၼ်းဢၼ်ႁဝ်းဢမ်ႇႁၼ်ၵႃႈၶၼ်တူဝ်ၵဝ်ႇ။
ၸၢတ်ႈပၢၼ်ၵူၼ်းၼုမ်ႇတိုၵ်ႉၶိုၼ်ႈ ပၢၼ်ႁဵၼ်း ပၢၼ်ႁဵတ်းၵၢၼ် ပဵၼ်ၽွၼ်းဢၼ်ႁဝ်းဢမ်ႇမီးလွင်ႈယုမ်ႇယမ်တူဝ်ၵဝ်ႇလႄႈ ပဵၼ်ၽွင်းဢၼ်ႁဝ်းၶႂ်ႈလႆႈႁႅင်းၸႂ်လိူဝ်သေၶေႃႈသင်ႇ ႁဝ်းၶႂ်ႈလႆႈလွင်ႈပွင်ႇၸႂ်လိူဝ်သေလွင်ႈဢဝ်ၵႂႃႇတႅၵ်ႈၼိူင်းတင်းပိူၼ်ႈ။
လွင်ႈဢၼ်ႁဝ်းတေထူပ်းယူႇထႅင်ႈတင်းၼႃႈၼႆႉ ယႃႇႁႂ်ႈလႆႈၶတ်းႁႅင်းလူၼ်ႉလိူဝ်ၼႃႇ ဢမ်ႇလူဝ်ႇလႆႈႁဵတ်းၵႅင်ႈယူႇတႃႇသေႇ၊ ဢမ်ႇလူဝ်ႇလႆႈၵႅၼ်ႇၶႅင်ထိုင်တီႈလိုမ်းထၢမ်တူဝ်ၸဝ်ႈၵဝ်ႇဝႃႈ ၸွင်ႇတိုၵ်ႉႁဵတ်းလႆႈယူႇႁႃႉ။
လႄႈယွၼ်းႁႂ်ႈၶၢဝ်းတၢင်းဢၼ်ၵႂႃႇၼၼ်ႉမီးၽႂ်သေၵေႃႉၸႂ်လီ ၸွမ်းယူႇႁိမ်းၶၢင်ႈ ဢမ်ႇလူဝ်ႇလႆႈႁဵတ်းသင် ယူႇၸွမ်းၵၼ်ၵႂႃႇ ၼႂ်းဝၼ်းဢၼ်မၼ်းဢမ်ႇလီယူႇၼၼ်ႉၵေႃႈ ပဵင်းပေႃးယဝ်ႉ။
ပိၼ်ႇ – ငဝ်မွင်မိုတ်းမူဝ်း
