ၸွမ်းလူၺ်ႈလွင်ႈဢၼ်ဢမ်ႇလႅင်းၸႂ်ၼၼ်ႉသေ ဢေးၼုမ်ႇၸင်ႇသိုပ်ႇၾူင်းၸူးပီႈဢၢႆႈမၼ်း
“ဝႃႈႁိုဝ်ဢေးၼွင်ႉ ပၢၵ်ႇဝၼ်းႁဵင်ပီၸင်ႇသိုပ်ႇၾူင်းမႃး”
“ၶႃႈၶႂ်ႈႁူႉဝႃႈ ၵွပ်ႈသင်လႄႈပီႈႁွင်ႉၶႃႈမႃးယူႇၸွမ်းမႄႈႁဝ်းလႃႇ”
“ၼၼ်ႁႃႉ” သဵင်တဵတ်ႇယဵၼ်ၵႂႃႇသေ “ၸွင်ႇၼွင်ႉႁၼ်တူၼ်ႈမၢၵ်ႇမူင်ႈၼႃႈႁိူၼ်းၼၼ်ႉႁႃႉ”
“ဢိုမ်ႈ! ပီၼႆႉမၢၵ်ႇမၼ်းပူင်းဝႃႈပူင်းယဝ်ႉ”
“ၼၼ်ႉပီႈၵႂႃႇဢဝ်မႃးတီႈတၢင်းလင်ႁူင်းႁဵၼ်းၼၼ်ႉ မိူဝ်ႈၼၼ်ႉဝႂ်မၼ်းပေႃးဢမ်ႇၶႂ်ႈမီးႁင်ယဝ်ႉယူဝ်ႉ ၵိုတ်းၵၢၼ်ႈမၼ်းၵူၺ်း ပီႈၵေႃႈၵႂႃႇၶုတ်းဢဝ်မႃးၽုၵ်ႇတီႈၼႃႈႁိူၼ်းၼၼ်ႉသေ ႁူတ်းပၼ်ၼမ်ႉမၼ်း သႂ်ႇပၼ်ၾုၼ်ႇမၼ်း မၼ်းၵေႃႈယႂ်ႇမႃး ၼုမ်ႇမႃး ပၼ်ႁူမ်ႈပၼ်မွၵ်ႇပၼ်မၢၵ်ႇႁႂ်ႈႁဝ်းလႆႈၵိၼ်ၼၼ်ႉၼႃႇ”
“ပီႈဝူၼ်ႉဝႃႈမၢၵ်ႇမူင်ႈတူၼ်ႈၼၼ်ႉ မၼ်းဢမ်ႇလိူၵ်ႈလႆႈဝႃႈမၼ်းတေဢွၵ်ႇတီႈလႂ်လႆႈ ၵူၺ်းၵႃႈ သင်ပွႆႇဝႆႉၸိူင်ႉၼၼ်မၼ်းတေတၢႆ သင်ဝႃႈဢဝ်မိူဝ်းလုမ်းလႃးလီလီ မၼ်းၵေႃႈတေတူၼ်ႈယႂ်ႇလႄႈ ပၼ်မၢၵ်ႇပၼ်ႁူမ်ႈႁဝ်း ပၼ်တီႈပိုင်ႈႁူမ်ႈပိူၼ်ႈ ဢွၵ်ႇမၢၵ်ႇပၼ်ႁႂ်ႈပိူၼ်ႈလႆႈၵိၼ် မၼ်းႁဵတ်းပၼ်ၽွၼ်းလီၵူၼ်းတင်းၼမ် လႆႈၼမ်ၼၼ်ႉယဝ်ႉ”
“ဢေႃႈ..ၶႃႈပွင်ႇၸႂ်ယဝ်ႉ”
မိူဝ်ႈတိုၵ်ႉဢုပ်ႇၾူၼ်းယူႇၼၼ်ႉ
“ပီႈၼုမ်ႇၶႃႈ” သဵင်ဢွၼ်ႇယိင်းမွၵ်ႈဢႃႇယု 18 လၢတ်ႈၸူး
“ဝႃႈႁိုဝ်ၼွင်ႉ”
“မိူဝ်ႈႁိုဝ်းၼႆႉ ထူၺ်းလိုၼ်းၶဝ် တေႁဵတ်းၶႅၵ်ႇၵၼ်ၼႆဢေႃႈ ၽိတ်ႈမွၵ်ႇၶႃႈ”
“ဢေႃႈဢိူဝ်ႈ ၸူမ်းယဝ်ႉၼႃႈ” ဢွၼ်ႇယိင်းၵေႃႉၼၼ်ႉၵေႃႈၵႂႃႇယဝ်ႉ။
“ၽႂ်မႃးလႃႇၼွင်ႉ”
“လုၵ်ႈဢွၼ်ႇၶဝ် မႃးမွၵ်ႇပၢင်ၶႅၵ်ႇဝႃႇ”
“ၼၼ်ႁႃႉ ပဵၼ်ၵႄႇပိူၼ်ႈယဝ်ႉၵႃႈပေႃးၼႆ ႁွင်ႉပိူၼ်ႈဝႃႈလုၵ်ႈဢွၼ်ႇၸိူင်ႉၼႆတႄႉ”
“ပေႃးဝႃႈၶႃႈဢမ်ႇတေႇၼႃႈႁိူၼ်းၸၢတ်ႈၼႆႉ ၸွင်ႇပီႈတေဝႃႈႁိုဝ်လႃႇ”
“ယူႇတီႈၼွင်ႉၵူၺ်းၼႃႇၼၼ်ႉတႄႉ”
“ဝႃႈၼၼ်သေႇသေႇ ႁဵတ်းႁႂ်ႈၶႃႈပေႃးဢမ်ႇဝူၼ်ႉတေတေႇလႆႈသေပွၵ်ႈၼၼ်ႉယဝ်ႉ”
“ဢွၵ်ႇၸႂ်ၶႂ်ႈမီးၼႃႈႁိူၼ်းမႃးယဝ်ႉႁႃႉ”
“ဢမ်ႇဝႃႈၼင်ႇၵွၼ်ႇ”
“ၶႂ်ႈမီးၵေႃႈမီးလႄႈ ပီႈယုမ်ႇၼွင်ႉယူႇၵူၺ်းဝႃႈၼွင်ႉတေမေႃတူၺ်းၵူၼ်းယူႇ”
“ပေႃးဝႃႈၶႃႈလႃႈလီဢဝ်လူး ပီႈတေဝႃႈႁိုဝ်”
“မၼ်းတိုၼ်းမီးလွင်ႈတၢင်းယူႇၵူၺ်း ႁူႉယူႇဝႃႈၼွင်ႉဢမ်ႇၸႂ်ႈၵူၼ်းၸိူင်ႉၼၼ်”
“ပီႈဝူၼ်ႉၽိတ်းၼႃႇယဝ်ႉ”
“မီးယဝ်ႉႁႃႉၵူၼ်းတေဢဝ်”
“ဢမ်ႇမီး! ပေႃးဝႃႈၶႃႈထူပ်းၺႃးၵူၼ်းၵေႃႉဢၼ်ထုၵ်ႇတႃၼႆတႄႉဢမ်ႇလိူၵ်ႈသေတေဢဝ်ၵမ်းလဵဝ်ယဝ်ႉဝႃႈ”
ႁႃး..ႁႃး..ႁႃး “တေႃႈၼင်ႇလိူၵ်ႈမႃးပေႃးပဵၼ်တၢၼ်ႇၼႆႉ မၼ်းတေလိူၵ်ႈငၢႆႈၸိူင်ႉၼႆလႆႈတေႉယူႇႁႃႉ”
“ဢမ်ႇႁူႉယဝ်ႉ ယွၼ်ႉမၼ်းငၢႆႈၼႃႇလႄႈ ဢဝ်ယၢပ်ႇပႅတ်ႈၼၼ်ႉၼႃႇ”
“ပေႃးဝႃႈႁဝ်းဝူၼ်ႉဝႃႈႁဝ်းတေမီး ႁဝ်းၵေႃႈမီးလႆႈယူႇၵူၺ်း ဢမ်ႇမီးသင်ဢၼ်ယူႇၼိူဝ်တၢင်းဝူၼ်ႉႁဝ်းလႆႈယူႇယဝ်ႉဢမ်ႇႁိုဝ်လႃႇ”
“ၶႃႈတေဝူၼ်ႉတူၺ်းၵွၼ်ႇ”
“လီယဝ်ႉ ဝူၼ်ႉလွႆးလွႆးၵေႃႈပႆႇတူၵ်းလိုၼ်းလေႃႇၼႃႈ”
ဢဝ်ဢေးၼုမ်ႇယုမ်ႉမႃး တၢၼ်ႇဝႃႈမီးႁႅင်းၸႂ်မႃးထႅင်ႈၼၼ်ႉၼႃႇ။
ပၢင်ၶႅၵ်ႇၵူပ်ႉၵူႈပဵၼ်ႁိူၼ်း ၼွင်ႉထူၺ်းလိုၼ်း ၵူၼ်းၵိုၼ်းၶွၼ်ႈၼမ် ၸဵမ်လုၵ်ႈဢွၼ်ႇၵူၼ်းလူင် သၢဝ်လူင်ၸိူင်ႉၼင်ႇဢေးၼုမ်ႇၵေႃႈ ၼုင်ႈသုပ်းသႂ်ႇၶူဝ်းတႆးတဵမ်ၸုမ်ႇသေမႃးၶဝ်ႈႁူမ်ႈယဝ်ႉ။ ၵူၼ်းၼမ်ၵူၼ်းလၢႆ ၽႂ်ပဵၼ်ၽႂ်ၵေႃႈဢမ်ႇၶႂ်ႈတွင်းယဝ်ႉၼႃႇ။
ပၢင်ၶႅၵ်ႇၶဝ်ၼၼ်ႉၵေႃႈ ႁၢင်ႈၶႂ်ႈႁဵတ်းၶႅမ်ႉဝႆႉလႄႈ ၸၢင်ႈၵူၼ်းထႆႇၶႅပ်းႁၢင်ႈၸိူဝ်းၼႆႉမႃးယူႇယဝ်ႉ။
ဢေးၼုမ်ႇၵေႃႈ ၵႂႃႇၸုၵ်းၸွမ်းၸဝ်ႈမၢဝ်ႇၸဝ်ႈသၢဝ်ၼၼ်ႉသေၸုၵ်းထႆႇၶႅပ်းႁၢင်ႈယူႇ မၼ်းသမ်ႉယူႇၵႆဝႆႉလႄႈ
“ပီႈၼၢင်း! သုတ်ႉၶဝ်ႈၸမ်ဢိတ်ႉၼိုင်ႈၶႃႈ” ၵူၼ်းထႆႇၶႅပ်းႁၢင်ႈလၢတ်ႈၸူးမၼ်း။
မၼ်းယၵ်ႉတူၺ်းသေယဝ်ႉ တေဝႃႈမၼ်းထဝ်ႈၵေႃႈ ၵူၼ်းၵေႃႉၼၼ်ႉသမ်ႉဢမ်ႇပိူင်ႈသင်ၵၼ်ၼင်ႇၵဝ်ႇၶႂ်ႈပဵၼ်ပၢၼ်လဵဝ်ၵၼ်ယဝ်ႉ၊ ယၵ်ႉတူၺ်းၸူးၵူၼ်းထႆႇၶႅပ်းႁၢင်ႈၼၼ်ႉလီလီငၢမ်းငၢမ်း သၢႆတႃမၼ်းလႅမ်ၶူမ်းတူၺ်းၽႂ်ၵေႃႈ သမ်ႉပေႃးမၢတ်ႇတႃမၢတ်ႇၸႂ်ပိူၼ်ႈၵႂႃႇၼၼ်ႉယိုင်။ ဢဝ်ၵူၼ်းထႆႇၶႅပ်းႁၢင်ႈၼၼ်ႉၵူမ်ႈၼႃႈဢမ်ႇႁတ်းယၵ်ႉတူၺ်းမၼ်းၵႂႃႇယဝ်ႉ။
“ဢႃႇယုၵႃႈႁိုဝ်ၶႃႈ!” ထၢမ်ၵႂႃႇ ဢမ်ႇသူၼ်ၽႂ် ဢမ်ႇသူၼ်လွင်ႈယဵၼ်ႇငႄႈသင်ယဝ်ႉ။
ၵူၼ်းၵေႃႉၼၼ်ႉၵေႃႈ ဢမ်ႇတွပ်ႇၵေႃႈၵဵင်ၸႂ်ၸဝ်ႈပွႆး “သၢမ်သိပ်းဢဵတ်းၶႃႈ”
“ယႂ်ႇလိူဝ်ႁဝ်းဢေႃႈ”
ၼႃႈၵူၼ်းၵေႃႉၼၼ်ႉမႆႈမႃးသေ ဢေးၼုမ်ႇသိုပ်ႇထၢမ်ထႅင်ႈ “မီးၼႃႈႁိူၼ်းယဝ်ႉႁႃႉ”
“ဢမ်ႇမီးၶႃႈ” ၵူၼ်းၵေႃႉၼၼ်ႉတွပ်ႇၵႂႃႇဢမ်ႇသူၼ်ၸႂ်သင်။
“တေႇၼႃႈႁိူၼ်းၸွမ်းႁဝ်းၼႄႇ”
ၵူၼ်းၵေႃႉၼၼ်ႉဝၢင်းၵွင်ႈထႆႇမၼ်းလူင်းသေယဝ်ႉ ယၵ်ႉတူၺ်းၼႃႈဢေးၼုမ်ႇဢၼ်ဢမ်ႇမီးတၢင်းဢၢႆၼၼ်ႉယူႇ လိူဝ်သေၼၼ်ႉၵူၼ်းၼႂ်းပွႆးၵေႃႈဢွၼ်ၵၼ်ယၵ်ႉတူၺ်းမၼ်းၵေႃႉလဵဝ်ၵူၺ်းယဝ်ႉ။ ၵမ်ႈၽွင်ႈတႄႉၵူင်သူပ်းပေႃးဢမ်ႇၸၢင်ႈတုပ်ႇလႆႈယဝ်ႉ ဢေးသႅင်ၼၼ်ႉတႄႉၵၢင်းပေႃးၶႂ်ႈလၼ်ႇလုတ်ႈၵွၼ်ႇ။
“မၼ်းယွင်ႇၵႂႃႇတေႉႁႃႉဢေးၼႆႉ” ဢေးသႅင်တူၺ်းမၼ်းသေလၢတ်ႈ။
ဢေးၼုမ်ႇယုမ်ႉယုမ်ႉသေ “ဢမ်ႇပဵၼ်သင်ၼႃ ထၢမ်လၢႆလၢႆၵူၺ်း”
“ဢေႃႈ..” မိူၼ်တေတူၵ်းၸႂ်သေလၢတ်ႈဢွၵ်ႇတုမ်ႉတွပ်ႇၶိုၼ်းၼၼ်ႉယဝ်ႉ။
ဢေးၼုမ်ႇထႆႇၶႅပ်းႁၢင်ႈယဝ်ႉၵေႃႈ ဢွၵ်ႇၵႂႃႇပႅတ်ႈလူၺ်ႈဢမ်ႇလႆႈသိုပ်ႇသူၼ်ၸႂ်တီႈၵူၼ်းၵေႃႉၼၼ်ႉသေ ၵူၺ်းၵႃႈၵူၼ်းတင်းၼမ်တႄႉ သူၼ်ၸႂ်တီႈမၼ်းၵႂႃႇမူတ်းယဝ်ႉ။
“မႂ်းႁူႉၸၵ်းမၼ်းယူႇႁႃႉၼၼ်ႉ” ဢေးသႅင်လၢတ်ႈၸူးမၼ်း
“ဢမ်ႇႁူႉၸၵ်း”
“ဢမ်ႇႁူႉၸၵ်း မႂ်းႁတ်းလၢတ်ႈၸိူင်ႉၼၼ်လႆႈၸိူင်ႉႁိုဝ်လႃႇ ဢမ်ႇႁူႉႁႃႉပိူၼ်ႈတေတူၺ်းမႂ်းၸိူင်ႉႁိုဝ်”
“ၵဝ်ဢမ်ႇသူၼ်ၸႂ်ပိူၼ်ႈမႃးႁိုင်ၼႃႇယဝ်ႉ”
“မႂ်းၵျိူၵ်ႈမၼ်းႁႃႉ!”
“ဢမ်ႇႁူႉၼႃ ထုၵ်ႇတႃ ႁၼ်ယဝ်ႉၵေႃႉ မိူၼ်ၼင်ႇဝႃႈ ၵူၼ်းၵေႃႉၼႆႉၵဝ်ၶႂ်ႈႁူႉၸၵ်းဢိူဝ်ႈ”
“ဢမ်ႇႁူႉၸၵ်း၊ ဢမ်ႇယၢမ်ႈႁၼ် သမ်ႉဝႃႈယွၼ်းပိူၼ်ႈတေႇၼႃႈႁိူၼ်း ပေႃးဢမ်ႇၸႂ်ႈမႂ်းဢမ်ႇမီးၽႂ်ႁဵတ်းၼင်ႇၵဝ်ႇလႂ် မႂ်းၼႆႉဢဝ်ၼႄႉဢဝ်ၼွၼ်းဢမ်ႇလႆႈတေႉလူင်”
“ၵဝ်လၢတ်ႈယူႇယဝ်ႉ ၵျိူၵ်ႈၵေႃႈၵျိူၵ်ႈ ဢမ်ႇၵျိူၵ်ႈၵေႃႈဢမ်ႇၵျိူၵ်ႈၵူၺ်း ၵဝ်ဢမ်ႇၶႂ်ႈဝူၼ်ႉၼမ်”
“ၶႂ်ႈဝႃႈမႂ်းၵျိူၵ်ႈမၼ်းႁႃႉ”
“ဢိုမ်ႈ! ၸႂ်ၵဝ်မၼ်းဝႃႈၵျိူၵ်ႈယဝ်ႉၼႆဢိူဝ်ႈ”
“ႁႃႈ! ယွင်ႇလိူဝ်သေမႂ်းၼႆႉဢမ်ႇမီးၽႂ်ထႅင်ႈယဝ်ႉ”
“လႅပ်ႈတေဢမ်ႇမီးယဝ်ႉၼင်ႇၵဝ်ႇလႂ်”
လႄႈ ဢေးၼုမ်ႇၼၼ်ႉၵေႃႈ လႆႈၽူဝ်ၵႂႃႇပဵၼ်ၵူၼ်းထႆႇၶႅပ်းႁၢင်ႈၵေႃႉၼၼ်ႉသေ ဢမ်ႇႁဵတ်းပၢင်ၶႅၵ်ႇသေယူႇၵႂႃႇၸွမ်းၵၼ်ၸိူင်ႉၼၼ်ၵူၺ်း ၵမ်ႈၽွင်ႈၵေႃႈသေႉၼႄးမၼ်းယူႇၵူၺ်းၼင်ႇၵဝ်ႇ။ ၵူၺ်းၵႃႈ ယိူင်းမၢႆမၼ်းၼၼ်ႉတႄႉ ဢမ်ႇၸႂ်ႈတေႇၼႃႈႁိူၼ်းႁိုဝ်ဢဝ်ၽူဝ် ၵူၺ်းၵႃႈ တႃႇမီးလုၵ်ႈဢွၼ်ႇၼႆၼၼ်ႉယဝ်ႉ။ ၼႂ်းၵႄႈၵၢင်သွင်ၶႃၼၼ်ႉ လုၵ်ႉတီႈၵူၼ်းဢမ်ႇယၢမ်ႈႁူႉၸၵ်းၵၼ်သေ ႁဵတ်းၶေႃႈတူၵ်းလူင်းၵၼ်ၵႂႃႇလႄႈယူႇၸွမ်းၵၼ် ၵေႃႉၼိုင်ႈၵေႃႈ ၶႂ်ႈမီးလုၵ်ႈ ထႅင်ႈၵေႃႉၼိုင်ႈၵေႃႈ သမ်ႉပၢႆႈၵၢၼ်ဢဝ်မေးၼႆလႄႈ မႃးၺႃးၵၼ်ပႅတ်ႈၼၼ်ႉၼႃႇ။
သွင်ၶႃယူႇၸွမ်းၵၼ်ဢမ်ႇလႆႈလုၵ်ႉမႃးတီႈတၢင်းႁၵ်ႉ လုၵ်ႉမႃးတီႈၶေႃႈတူၵ်းလူင်းၽိူမ်ႉထႅမ်ပၼ်ၵၼ်လႄႈ ဢမ်ႇလူဝ်ႇႁၵ်ႉၵၼ်သေ ယူႇၸွမ်းၵၼ်ၵႂႃႇၸိူင်ႉၼၼ်ၵူၺ်း၊ ၵူၺ်းၵႃႈ လွင်ႈၸမ်ၸႂ်ဢၼ်ယူႇၸွမ်းၵၼ်ၵူႈဝၼ်းၼၼ်ႉ မၼ်းတိူဝ်းၽိူမ်ႉမႃးလႄႈ ၵိူတ်ႇဢွၵ်ႇမႃးပဵၼ်တၢင်းႁၵ်ႉယဝ်ႉႁိုဝ်ဢမ်ႇႁူႉ ဢေးၼုမ်ႇၵေႃႈၵိူတ်ႇလုၵ်ႈမႃးသေလႄႈ ၽူဝ်မၼ်းၵေႃႈ ပဵၼ်ပေႃႈလုၵ်ႈဢွၼ်ႇ ဢၼ်ႁၵ်ႉလုၵ်ႈႁၵ်ႉမေးသေ သႂ်ႇၸႂ်လုမ်းလႃးတူၺ်းထိုင်ၵၼ်ၵႂႃႇ ပဵၼ်ၼႃႈႁိူၼ်းဢၼ်ဢုၼ်ႇၸႂ် ဢၼ်မၼ်းယၢမ်ႈၾၼ်ဝႆႉသေ ၶေႃႈတူၵ်းလူင်းၼၼ်ႉၵေႃႈ ထုၵ်ႇတၢင်းႁၵ်ႉၽဝ်မွတ်ႇပႅတ်ႈယဝ်ႉ။
သုတ်းယဝ်ႉ
တႅမ်ႈ – သႅၼ်ငဝ်း
တႄႇတႅမ်ႈ – 3/8/2025
တႅမ်ႈယဝ်ႉ – 15/8/2025
