ယၢမ်းႁူဝ်ၶမ်ႈ ၶၢဝ်းၶိင်ႇၵိၼ်ၶဝ်ႈယဝ်ႉၼႆၵေႃႈ လူင်းၵၢၼ်မႃးယဝ်ႉ ႁဵတ်းၽၵ်းသေ ဢဝ်မိူဝ်းၵႂႃႇတၢင်းႁိူၼ်းဢေးသႅင်ၶဝ်ယူႇယဝ်ႉ။
“ၵဝ်ဝႃႈၵဝ်လူဝ်ႇဢဝ်ၶဝ်ႈၵဝ်မႃးပၼ်မႂ်းႁုင်လဵင်ႉဢဝ်ယူဝ်ႉၼႆႉ”
“ၵဝ်ၵေႃႈၶႂ်ႈဝႃႈၸဵမ်လႂ်ယဝ်ႉၵွၼ်ႇ လၢႆလၢႆၶဝ်ႈမႂ်းဢမ်ႇယွမ်းထူင်ႁေပွၵ်ႈၵွၼ်ႇယူဝ်ႉၼႆႉ”
“ၶႂ်ႈဝႃႈၵွၼ်ႇဢိူဝ်ႈ”
“ၸွင်ႇမႂ်းႁူႉႁႃႉ သႅင်ႁွမ်ၼွင်ႉဢၢႆႈၶိူဝ်းၼၼ်ႉ မၢၼ်းလုၵ်ႈလၢႆပိူၼ်ႈဝႃႇ”
“မၼ်းပႃးတွင်ႉဢိူဝ်ႈ ပဵၼ်ၽူႈယိင်းၼင်ႇၵၼ်ၵေႃႈ ဝႆႉၵႃႈၶၼ်ၽူႈယိင်းမိူၼ်ၵၼ်ဢိတ်ႉၼိုင်ႈလႄႈ မႂ်းၵေႃႈမီးလုၵ်ႈပဵၼ်ၵေႃႉယဝ်ႉ တေႁူႉယူႇဝႃႈပႃးတွင်ႉမၼ်းမိူၼ်ႁိုဝ်ၼႆ လိူဝ်သေပႃးတွင်ႉလႆႈလဵင်ႉလုၵ်ႈႁင်းၵူၺ်းယဝ်ႉ ၵူၼ်းႁိမ်းႁွမ်းၵေႃႈထၢင်ႇလဵၵ်ႉထႅင်ႈသေ တႃႇတေယူႇၵႂႃႇတၢင်းၼႃႈၼၼ်ႉ ဢမ်ႇၸႂ်ႈလွင်ႈငၢႆႈမိူၼ်ၵၼ်” ထူၺ်ႈၸႂ်လူင်ၼင်ႇဝႃႈ ႁၼ်သႅင်ႁွမ်မႃးယူႇၼႂ်းတႃမၼ်းၼၼ်ႉယဝ်ႉ။
“မိူဝ်ႈၼႆႉ မႂ်းႁမ်ႉပေႉမေႃဝူၼ်ႉဢၼ်မီးလွင်ႈမီးတၢင်းႁေၵဝ်ႇၼေႃ”
“တၢၼ်ႇဝႃႈၵဝ်ပဵၼ်ၵူၼ်းဢမ်ႇမီးလွင်ႈမီးတၢင်းမၼ်းၼၼ်ႉယဝ်ႉဝႃႈ”
ယူႇယူႇ ဢေးၶိၼ်ႇၵေႃႈၶဝ်ႈမႃး “ၵိၼ်ၶဝ်ႈၵၼ်ယူႇႁႃႉ!”
“ၵိၼ်ယဝ်ႉၼႄႇမႂ်း..”
“ၵဝ်ၵိၼ်ဢမ်ႇလူင်း…ၶိင်းႁဝ်းၵႂႃႇတၢင်းလႂ်ၵေႃႈဢမ်ႇႁူႉယဝ်ႉ သိုပ်ႇၾူၼ်းၵေႃႈဢမ်ႇႁပ်ႉႁေပွၵ်ႈ”
“မၼ်းၵႂႃႇတၢင်းလႂ်ၵေႃႈၵႂႃႇယဝ်ႉဢိူဝ်ႈ ၸွင်ႇၶႅၼ်းမၼ်းဢမ်ႇႁၼ်တၢင်းမႃးႁိူၼ်းၵေႃႈဢမ်ႇၸႂ်ႈ”
“ဢေးၼုမ်ႇ မႂ်းၼႆႉၵေႃႈ ” ဢေးသႅင်ပၼ်ၾၢင်ႉမၼ်း ။
“မၼ်းၵႂႃႇလေႇတိၵ်းတိၵ်း ႁိူၼ်းၵေႃႈဢမ်ႇမႃးႁေပွၵ်ႈ ၵဝ်ထၢင်ႇမၼ်းၵႂႃႇမီးမေးၼွႆႉၵူၺ်းၵႃႈ ၸႂ်ၵဝ်ဢမ်ႇလီၼႆႉမႂ်းႁူႉ”
“မႂ်းတေဝူၼ်ႉၼမ်ႁဵတ်းသင် ၵူၼ်းလီၸိူင်ႉၼင်ႇမၼ်းၼၼ်ႉ ဢမ်ႇႁဵတ်းလေႃႇ”
“ၽႂ်တေႁဵတ်းႁိုဝ်ႁူႉမႂ်းၵေႃႈ ၽူဝ်မႂ်းလူးၵႂႃႇတၢင်းလႂ်ယဝ်ႉလႃႇ”
“ၵႂႃႇလႄႇဢူၺ်းၵေႃႉမၼ်းဝႃႇ”
“မီးလႂ် ၵပ်းသိုပ်ႇတူၺ်းလူး ၵဝ်ဝႃႈၶဝ်ၵႂႃႇယူႇၸွမ်းၵၼ်ယူဝ်ႉ”
“ဢိူဝ်ႈ ပေႃးၵႂႃႇယူႇၸွမ်းၵၼ်ၵေႃႈဢမ်ႇလီႁိုဝ်လႃႇ တေဢမ်ႇလႆႈထၢင်ႇဝႃႈမၼ်းၵႂႃႇမီးမေးၼွႆႉၼႆ” ဢေးၼုမ်ႇလၢတ်ႈ
“မႂ်းၼႆႉၵေႃႈ တႃႉသေဝႃႈဢမ်ႇမီးၸူႉလႆႈ မႂ်းဢမ်ႇပွင်ႇၸႂ်ႁဝ်းလေႃႇ” ဢေးၶိၼ်ႇတူၺ်းၼႃႈမၼ်းသေလၢတ်ႈၶိုၼ်း။
“ဢိူဝ်ႈၵဝ်ၵေႃႈဢမ်ႇပွင်ႇၸႂ်လေႃႇ တေၵႂႃႇသူၼ်ၸႂ်တၢင်းဝၼ်းတၢင်းၶိုၼ်းႁဵတ်းသင်လႃႇ မၼ်းၵေႃႈပဵၼ်ၽူဝ်မႂ်းယူႇယဝ်ႉ မႂ်းတေႁႂ်ႈမၼ်းၵႂႃႇႁဵတ်းႁင်ထႅင်ႈ၊ ပေႃးမၼ်းႁၵ်ႉမႂ်း မၼ်းၵေႃႈတေဢမ်ႇႁဵတ်းဢၼ်မႂ်းဢမ်ႇၵျိူၵ်ႈၼၼ်ႉလေႃႇ ပေႃးမၼ်းၶႂ်ႈႁဵတ်းမႂ်းၵႃႈၶႂ်ႈႁၢမ်ႈၵေႃႈမၼ်းတိုၼ်းတေႁဵတ်းယူႇၵူၺ်းဢိူဝ်ႈ ဢမ်ႇႁဵတ်းပႃႈၼႃႈၵေႃႈႁဵတ်းပႃႈလင်ယဝ်ႈ မႂ်းတေၵႂႃႇသုမ်းၶၢဝ်းယၢမ်း ဢမ်ႇပဵၼ်ၵိၼ်ပဵၼ်ယႅမ်ႉၸွမ်းမၼ်းႁဵတ်းႁင်တိၵ်းတိၵ်း ပေႃးမႂ်းႁၢင်ႈၸႃႉၵႂႃႇတိၵ်းတိၵ်း မၼ်းယိင်ႈၶႅၼ်းၶႂ်ႈပႅတ်ႈမႂ်းၵူၺ်းဢိူဝ်ႈလေႃႇ”
ဢေးသႅင်ထွမ်ႇဢေးၼုမ်ႇလၢတ်ႈၸူးဢေးၶိၼ်ႇ ဢဝ်ၵမ်းၶဝ်ႈပေႃးလိုမ်းၵဵဝ်ႉယဝ်ႉ။
“သမ်ႉဝႃႈမၼ်းၵႃႈၶႂ်ႈမီးမေးၼွႆႉပဵၼ်သွင်သၢမ်ၵေႃႉၵေႃႈ ပေႃးမႂ်းတိုၵ်ႉၶႂ်ႈလႆႈမၼ်းယူႇ မႂ်းၵေႃႈဢမ်ႇပႅတ်ႈမၼ်းလႆႈၵွၼ်ႇ လိူဝ်သေပွင်ႉထႃႉလႃႇဝႃႈမၼ်းသေ ၸႂ်လမ်မၼ်းၵႂႃႇလွၵ်ႇလွၵ်ႇလၢႆလၢႆၵူၺ်း ယိင်ႈမႂ်းပွင်ႉမၼ်းမၼ်းယိင်ႈၶႅၼ်းဢိမ်ႇမႂ်းၵူၺ်းဢိူဝ်ႈ ၵဝ်ပဵၼ်ၵူၼ်းၼွၵ်ႈသေတူၺ်းၵူၺ်းၵေႃႈ ၵဝ်ပေႃးဢိမ်ႇယဝ်ႈ”
ၼႃႈဢေးၶိၼ်ႇၼၼ်ႉတႄႉ ဢမ်ႇလီသေဢိတ်းယဝ်ႉ “ဢေးၼႆႉၵေႃႈ ဝႃႈႁင်းၵဝ်ပဵၼ်ႉတၢၼ်ႇၼႆႉဝႃႇ လီၸႂ်မႂ်းယဝ်ႉဝႃႈ ဢၼ်ဢမ်ႇမီးၸူႉႁေပွၵ်ႈ ”
“ဢိူဝ်ႈ!! သုတ်းတွင်းပၼ်ၵဝ်ယႃႇႁႂ်ႈလႆႈၽူဝ်ၵေႃႈ ၵဝ်ၶႅၼ်းၸူမ်းၵွၼ်ႇဢိူဝ်ႈ”
လုၵ်ႈဢေးသႅင်ႁွင်ႉႁႆႈမႃးသေ ဢဝ်ငဝ်းလၢႆးတီႈၼၼ်ႈလႅၵ်ႈလၢႆႈမႃး
“ၵဝ်မိူဝ်းယဝ်ႉဝႃႈ ၶၢၼ်ႉႁၼ်ဢေးၼုမ်ႇ”
ႁူႇၼႃႈႁူႇတႃၸင်းမၼ်းသေ တိပ်ႈတိၼ်မၼ်းဢွၵ်ႇႁိူၼ်းမိူဝ်းၼင်ႇၸႂ်လမ်ၼႃႇၼႃႇၼၼ်ႉယဝ်ႉ။
ဢေးသႅင်ႁွပ်ႇလုၵ်ႈဢွၼ်ႇမၼ်းဢၼ်တိုၵ်ႉၸုပ်ႇၼူမ်းယူႇၼၼ်ႉ မႃးသိုပ်ႇၼင်ႈၵိၼ်ၶဝ်ႈၸွမ်းဢေးၼုမ်ႇၶိုၼ်း
“မႂ်းၼႆႉၵေႃႈ ပေႃးလႆႈဝႃႈသင်ပိူၼ်ႈၵေႃႈ ဢမ်ႇဝူၼ်ႉထိုင်ၵၢင်ၸႂ်ပိူၼ်ႈသေဢိတ်းလူင် မႂ်းဢမ်ႇႁူႉၵေႃႈဢမ်ႇၸႂ်ႈ မၼ်းပဵၼ်ၵူၼ်းၸိူင်ႉၼၼ်ၼႆ”
“မၼ်းၶတ်းႁူၶတ်းတႃၼႃႇလႄႈဢိူဝ်ႈ”
“ထႅင်ႈဢိၼ်ႉမႃး ဢူၺ်းၵေႃႉၵေႃႈမႂ်းတေဢမ်ႇမီးယဝ်ႉ”
“မႂ်းၵေႃႈတေလိုပ်ႈၵဝ်ထႅင်ႈၵေႃႉၵႃႈ”
“ၶႂ်ႈလိုပ်ႈၵေႃႈၸၢင်ႈလိုပ်ႈယူႇၵူၺ်းၵဝ်ႇ..”
“ၵေႃႈယဝ်ႉလႄႈ”
မႄးသိုပ်ႇၵိၼ်ၶဝ်ႈမၼ်းသေ ဢေးသႅင်တူၺ်းမၼ်းယဝ်ႉယုမ်ႉယူႇ
“ပေႃးဢမ်ႇၸႂ်ႈမႂ်း ဢမ်ႇမီးၽႂ်ႁတ်းဝႃႈမၼ်းၵဝ်ႇလႂ် ၸၢတ်ႈၼႆႉတႄႉဢမ်ႇဢၢၼ်းဢဝ်ၽူဝ်တေႉၵႃႈၼေႃႈ”
“ၵူၼ်းၸိူင်ႉၼႆတေမီးၽႂ်ၶႂ်ႈလႆႈ”
“မီးဢိူဝ်ႈ ၵူၺ်းၵႃႈမႂ်းဢမ်ႇၶႂ်ႈလႆႈပိူၼ်ႈၵူၺ်းလႄႇ ဢၢႆႈၶိူဝ်းၼၼ်ႉၵေႃႈ လႅပ်ႈသူၼ်ၸႂ်မႂ်းယူႇဢိူဝ်ႈၼၼ်ႉ”
“ၼၼ်ႁႃႉ ၵဝ်တႄႉဝႆႉမိူၼ်ၼင်ႇဢူၺ်းၵေႃႉၵူၺ်းဢိူဝ်ႈ”
“ဢၢႆႈလိူၼ်ၵေႃႈႁမ်ႉႁၢင်ႈလႅပ်ႈၶႂ်ႈၵဝ်းမႂ်းၵဝ်ႇလူးၼၼ်ႉ မႂ်းဢမ်ႇသူၼ်ၸႂ်ႁႃႉ မၼ်းၵေႃႈပဵၼ်ၵူၼ်းလီၵူၺ်းၼင်ႇၵဝ်ႇလူး”
“ဢိုမ်ႈ! ၵဝ်ဢမ်ႇသူၼ်ၸႂ်ၼႃႇ ၸၢင်ႈႁဵတ်းႁိုဝ်”
“ဢမ်ႇသူၼ်ၸႂ်ၼႆၵေႃႈ ဢမ်ႇၶႂ်ႈဢုပ်ႇၶႂ်ႈၸၢမ်းတူၺ်းသေဢိတ်းၼိုင်ႈႁႃႉ”
“ဢမ်ႇ! သုမ်းၶၢဝ်းယၢမ်းၵူၺ်းဢိူဝ်ႈ ၵဝ်ႁူႉတူဝ်ယူႇယဝ်ႉလူးဝႃႈဢမ်ႇသူၼ်ၸႂ် ၵဝ်သမ်ႉတေသုမ်းၶၢဝ်းယၢမ်းၸွမ်းမၼ်းႁဵတ်းသင်လႃႇ ဢဝ်ၶၢဝ်းယၢမ်းၵႂႃႇႁဵတ်းတၢင်ႇလွင်ႈၵူၺ်းပေႃးလႆႈယဝ်ႉ”
“ပေႃးမႂ်းဢမ်ႇၸၢမ်းဢုပ်ႇၸၢမ်းလၢတ်ႈတေႃႇတူၺ်း မႂ်းတေႁဵတ်းႁိုဝ်ႁူႉ ၸၢမ်းဢုပ်ႇၸၢမ်းလၢတ်ႈတေႃႇတူၺ်းလႄႈ မႂ်းၸၢင်ႈတေလႅၵ်ႈလၢႆႈၸႂ်ၵေႃႈပဵၼ်လႆႈဢိူဝ်ႈ”
“ၵဝ်ယၢမ်ႈဝူၼ်ႉယူႇၼႃႈ ၵူၺ်းၵႃႈၵဝ်ၵေႃႈႁဵတ်းဢမ်ႇလႆႈ မိူဝ်ႈတႅပ်းတတ်းဝႃႈဢမ်ႇယဝ်ႉ တႃႇလႅၵ်ႈလၢႆႈၸႂ်ၼၼ်ႉ မၼ်းလႆႈၶဵင်ႇတႃႉၼမ်ၼႃႇမႂ်းႁူႉ ၵဝ်ၶၢၼ်ႉသုၵ်ႉသၵ်ႉၸွမ်းတေႉဢိူဝ်ႈ”
သိုပ်ႇလူတွၼ်ႈတေမႃးၶႃႈ
