သႅင်ႁွမ်ဢဝ်မိုဝ်းလုပ်ႈတွင်ႉမၼ်းၼင်ႇလၢတ်ႈဢွၵ်ႇသူပ်းယၢပ်ႇၼႃႇၼၼ်ႉယဝ်ႉ ၵူမ်ႈၼႃႈတူၺ်းတွင်ႉဢွၼ်ႇမၼ်းၼၼ်ႉသေ
“ဢေႃ..” ၼင်ႇဝႃႈႁူႉၶေႃႈတွပ်ႇယဝ်ႉၼၼ်ႉသေ သဵင်တီႈၼၼ်ႈၵေႃႈယဵၼ်လူင်ၵႂႃႇယဝ်ႉ။
“ပေႃးတီႈႁိူၼ်းႁူႉတႄႉ ၶဝ်တေဢဝ်ၶႃႈတၢႆတေႉဢိူဝ်ႈပီႈ ၶႃႈၵူဝ်တေႉယဝ်ႉ”
မိူဝ်ႈၵူၼ်းဢၼ်ထိုင်ၶိင်ႇထိုင်ၶၢဝ်း တေတေႇၼႃႈႁိူၼ်းယဝ်ႉၼၼ်ႉ သမ်ႉဝူၼ်ႉၼမ်ၶမ်ၸႂ်ယူႇ၊ ၵူၺ်းၵႃႈ လုၵ်ႈဢွၼ်ႇၽွင်းပၢၼ်ႁဵၼ်းယူႇၼၼ်ႉသမ်ႉ ၵိုင်ႉၵၢင်ႉမီးလုၵ်ႈ ဢမ်ႇဝူၼ်ႉသွၼ်ႇၼႃႈသွၼ်ႇလင်သင် ဢဝ်ဢေးၼုမ်ႇမိုင်ၵႂင်ယူႇၸိူင်ႉၼၼ်ၵူၺ်းယဝ်ႉ။
“သမ်ႉဝႃႈဢမ်ႇလၢတ်ႈၵေႃႈ ဝၼ်းၼိုင်ႈၶဝ်ၵေႃႈတေႁူႉယူႇဢမ်ႇၸႂ်ႈႁိုဝ်လႃႇ”
“ၼၼ်ႉယဝ်ႉၼေႃ…”
“ၶဝ်ဢမ်ႇဢဝ်ထိုင်တၢႆလေႃႇ သင်ဢမ်ႇသင်ၶဝ်ၵိူတ်ႇႁဝ်းမႃးပဵၼ်ၵူၼ်းယဝ်ႉလူး”
ဢေးၼုမ်ႇဝူၼ်ႉထိုင်မိူဝ်ႈမၼ်းလႆႈယူႇၸွမ်းမႄႈမၼ်း မိူဝ်ႈမၼ်းႁဵတ်းၽိတ်းမႃး မႄႈမၼ်းတေပွင်ႉထႃႉလႃႇဝႃႈ ပေႃႉပေႃႉႁႅမ်ႁႅမ်မၼ်းၸိူဝ်းလႄႈ တေၵႆႉဝႃႈ “တႃႉၵဝ်ယႃႇၵိူတ်ႇမႂ်းမႃးလႃႈ” မၼ်းၵေႃႈပဵၼ်တၢင်းၽိတ်းဢၼ်ၵိူတ်ႇမႃးၼၼ်ႉယဝ်ႉ။ မိူဝ်ႈလႂ်မၼ်းၶမ်ၸႂ် မိူဝ်ႈလႂ်မီးလွင်ႈတုၵ်ႉၸႂ် မၼ်းတေၵႂႃႇႁူင်းႁဵၼ်း ဢၼ်ပဵၼ်တီႈယူႇ ဢၼ်တဵတ်ႇယဵၼ်ပုၼ်ႈတႃႇမၼ်းၼၼ်ႉယဝ်ႉ။ မၢင်ပွၵ်ႈပၢႆၼွၼ်းတီႈႁူင်းႁဵၼ်းထႅင်ႈလူးၵွၼ်ႇ မႄႈၶဝ်ၵေႃႈဢမ်ႇၸွမ်းၶႆႈႁႃမၼ်းသေပွၵ်ႈ။
မၼ်းလႆႈငိၼ်းသဵင်ၼႂ်းႁူ ၵူၼ်းၵေႃႉဢၼ်ပူၵ်းတိုၼ်ႇမၼ်းမႃး “လုၵ်ႈ..မႃးႁႆႈယူႇတီႈၼႆႈႁဵတ်းသင်လႃႇ..” ၼၼ်ႉဢမ်ႇၸႂ်ႈသဵင်မႄႈမၼ်း ၵူၺ်းၵႃႈပဵၼ်သဵင်ၶူးသွၼ်မူဝ်လႅင်း။
မၼ်းဝိၼ်ႇဝၢႆႇတူၺ်း တင်းႁူၺ်ႇတႃဢၼ်ၸိုမ်ႉယမ်းၼမ်ႉတႃဢမ်ႇႁႅင်ႈၼၼ်ႉသေ ၶူးၸင်ႇၸူဝ်းႁွင်ႉဢဝ်မၼ်းၶဝ်ႈမိူဝ်းၵႂႃႇၼႂ်းႁိူၼ်း၊ ၶူးလဵင်ႉၶဝ်ႈမၼ်းယဝ်ႉ၊ မိူဝ်ႈတိုၵ်ႉၼင်ႈၵိၼ်ၶဝ်ႈယူႇၼၼ်ႉ သဵင်ၵူၼ်းၵိၼ်လဝ်ႈမေႃးပၼ်းလူင်ၶဝ်ႈႁိူၼ်းမႃး လၢၵ်ႈၸၼ်ဢဝ်ၶူးၼၼ်ႉ မႃးပေႃႉပေႃႉႁႅမ်ႁႅမ်သေ ၵူၼ်းၸၢႆးၼုမ်ႇၵေႃႉၼိုင်ႈ မႃးၸၼ်ဢဝ်ၵူၼ်းမဝ်းလဝ်ႈၼၼ်ႉဢွၵ်ႇၵႂႃႇ
“ပေႃႈ!! ပေႃးလႆႈယဝ်ႉ” ယၵ်ႉတူၺ်း ဢေးၼုမ်ႇသေ “ဢေးၼွင်ႉ ၸွႆႈမႄႈႁဝ်းၽွင်ႈ” ဢေးၼုမ်ႇၵေႃႈ ၼႅတ်ႈၽႃႈၵမ်းၶဝ်ႈမၼ်းၼၼ်ႉ မႃးႁွင်းဢဝ်ၶူးလုၵ်ႉၶိုၼ်ႈမႃးယဝ်ႉ။
“ၶူးၸွင်ႇပဵၼ်သင်ၶႃႈ ၸဵပ်းတီႈလႂ်”
ဢမ်ႇထၢမ်ၵေႃႈ ၼႃႈၶူးၼၼ်ႉတႄႉ သမ်ႉပေႃးၵမ်ႇမၢၼ်ႉလူင်ဝႆႉယူႇယဝ်ႉ။
ယူႇဢမ်ႇႁိုင် လုၵ်ႈၸၢႆးၶူးၼၼ်ႉၵေႃႈ ဢဝ်ယႃမႃးသေ မႃးတႃးပၼ်မႄႈမၼ်းယဝ်ႉ
“လၢတ်ႈယူႇလၢႆပွၵ်ႈယဝ်ႉ ယႃႇပၼ်ႁႂ်ႈဢူႈႁဝ်းၵိၼ်လဝ်ႈၼႆ”
“ၸၢႆးဢမ်ႇႁဵတ်းၵၢၼ်ယဝ်ႉႁႃႉ!”
“ပေႃးဢူႈႁဝ်းတိုၵ်ႉပဵၼ်ၼႆယူႇတိၵ်းတိၵ်းတႄႉ မႄႈဢိူၺ်ႉ ႁဝ်းပၢႆႈပႅတ်ႈဢူႈႁဝ်းသေလႃႈ”
“ပေႃးမၼ်းပေႇယဝ်ႉ မၼ်းၵေႃႈလီယူႇၵူၺ်း..မႄႈတေလၢတ်ႈမၼ်းၵူၺ်း”
“မႄႈၵူၺ်းဢိူဝ်ႈတေလႆႈၶၢမ်ႇမၼ်းပေႃႉႁႅမ်ယူႇၸိူင်ႉၼၼ်”
“လၢတ်ႈလီလီလႄႈၸၢႆး မၼ်းပဵၼ်ဢူႈလုၵ်ႈဢိူဝ်ႈ”
ၸၢႆးလႅင်းၼၼ်ႉၵေႃႈ ထူၺ်ႈၸႂ်လူင်သေ မႄးသႂ်ႇယႃပၼ်မႄႈယဝ်ႉလီငၢမ်း ဢမ်ႇႁၼ်ဢေးၼုမ်ႇယဝ်ႉ “ဢေးဢွၼ်ႇၼၼ်ႉၵႂႃႇလႂ်ယဝ်ႉလႃႇ..ႁၢင်ႈၵႆႉႁၼ်မၼ်းမႃးၼွၼ်းတီႈႁူင်းႁဵၼ်းတႃႇသေႇႁိုဝ်လႃႇၼၼ်ႉ”
“ၸႂ်ႈဢိူဝ်ႈ..မႄႈယဵၼ်ႉၸႂ်တူၺ်းဢမ်ႇလႆႈလႄႈႁွင်ႉမၼ်းမႃးတီႈႁိူၼ်းဢိူဝ်ႈၼၼ်ႉ”
ၸၢႆးလႅင်းၵေႃႈ ဢွၵ်ႇႁိူၼ်းၵႂႃႇၸွမ်းႁႃဢေးၼုမ်ႇ ယူႇတီႈႁူင်းႁဵၼ်းၼၼ်ႉသေ လႆႈႁၼ်ဢေးၼုမ်ႇၼင်ႈငွမ်ယူႇတီႈၼႃႈႁွင်ႈႁဵၼ်းၼၼ်ႉလႄႈ
“ၵၢင်ၶမ်ႈၵၢင်ၶိုၼ်း ယူႇႁူင်းႁဵၼ်းႁင်းၵူၺ်းဢမ်ႇၵူဝ်ၽဵတ်ႇလွၵ်ႇၼႄႇ”
“ဢၼ်လီၵူဝ်လိူဝ်သေၽဵတ်ႇမီးတင်းၼမ်ၶႃႈယဝ်ႉ”
“ၸႂ်ႈတေႉဢိူဝ်ႈ”
“ဢမ်ႇဢဝ်ၶူဝ်းမႃးယူႇတီႈႁူင်းႁဵၼ်းသေယဝ်ႉလႃႇ..ၵႆႉမႃးယူႇပေႉတၢၼ်ႇၼႆႉ”
“ၶႃႈၵေႃႈယူႇၸိူင်ႉၼႆလႆႈၵၢင်ၶမ်ႈၵူၺ်းလူး”
“ႁၢႆၵၢင်ၶမ်ႈၵၢင်ၶိုၼ်းၸိူင်ႉၼႆ ဢူႈမႄႈဢမ်ႇဝႃႈသင်ႁႃႉ”
ဢေးၼုမ်ႇၼမ်ႉတႃၸိုမ်ႉမႃးဢိတ်ႉၼိုင်ႈလႄႈ သဵင်သၼ်ႇသၼ်ႇသေ “မီးၵေႃႈမိူၼ်ဢမ်ႇမီးၵူၺ်း ၶႃႈယူႇတီႈႁူင်းႁဵၼ်းတင်းလီယူႇလိူဝ်သေတီႈႁိူၼ်းၵွၼ်ႇယဝ်ႉ”
“ဢူႈမႄႈၵႆႉၽိတ်းၵၼ်ႁႃႉ!”
“ဢမ်ႇၸႂ်ႈၶႃႈ..ၶဝ်ဢမ်ႇလူဝ်ႇၶႃႈၵူၺ်းဢေႃႈ ၸင်ႇလႂ်ၶႃႈၶႂ်ႈႁဵတ်းသင် ၶႂ်ႈၵႂႃႇတၢင်းလႂ်ၵေႃႈ ၶဝ်ဢမ်ႇသူၼ်ၸႂ်”
“လုၵ်ႈဢွၼ်ႇမွၵ်ႈၼႆႉၵူၺ်း ဝူၼ်ႉၸိူင်ႉၼႆ တေတုၵ်ႉၸႂ်ၵႃႈႁိုဝ်လႃႇ..”
မိူဝ်ႈလၢတ်ႈၸိူင်ႉၼႆၵူၺ်း သဵင်ႁွင်ႉႁႆႈဢေးၼုမ်ႇၵေႃႈလင်ဢွၵ်ႇမႃး ႁႆႈၵႃႈဢိမ်ႇၵႃႈတိူၵ်ႈယူႇယဝ်ႉ။
“ဢမ်ႇပဵၼ်သင်လေႃႇၼႃႈ ၶဝ်ၵိူတ်ႇႁဝ်းမႃးယဝ်ႉသေတႃႉ ၶဝ်ၵေႃႈဢမ်ႇၸႂ်ႈၸဝ်ႈၶွင်ၸၢတ်ႈပၢၼ်ႁဝ်းလူး သမ်ႉဝႃႈၶဝ်ဢမ်ႇသူၼ်ၸႂ် ဢမ်ႇလူဝ်ႇႁဝ်းၵေႃႈ တႃႇႁဝ်းတေယူႇၵႂႃႇၼၼ်ႉ ၸႂ်ႉၸၢတ်ႈပၢၼ်ႁႂ်ႈမၼ်းလီလိူဝ်သေၶဝ်လႄႈ ႁဵတ်းၼႄဝႃႈ ဢမ်ႇမီးၶဝ်ၵေႃႈ ႁဝ်းပဵၼ်ၵူၼ်းလီလႆႈယူႇၵူၺ်း ”
“ၶႃႈတေလႆႈႁဵတ်းႁိုဝ်လႃႇ”
“ၶဝ်ဢမ်ႇသူၼ်ၸႂ်ႁဝ်း ႁဝ်းၵေႃႈၸၢင်ႈတေၵႂႃႇသူၼ်ၸႂ်ၶဝ်ႁဵတ်းသင် ႁဵတ်းဢၼ်ႁဝ်းလူဝ်ႇႁဵတ်း ႁဵတ်းဢၼ်ႁဝ်းၶႂ်ႈႁဵတ်း မိူၼ်ၸိူင်ႉၼင်ႇၼွင်ႉမႃးမီးယူႇတီႈႁူင်းႁဵၼ်းယၢမ်းလဵဝ်ၼႆႉၼၼ်ႉၼႃႇ ၵူၺ်းၵႃႈ ႁဵတ်းႁႂ်ႈမၼ်းလီလိူဝ်သေၼႆႉလႄႈ တႅၼ်းတီႈတေႁႃလႄႇလဵၼ်ႈယူႇၸိူင်ႉၼႆ ႁႃပပ်ႉလိၵ်ႈမႃးဢၢၼ်ႇဢမ်ႇလီႁိုဝ်”
ၸူဝ်းဢွၼ်ဢဝ်ဢေးၼုမ်ႇမိူဝ်းၵႂႃႇတီႈႁိူၼ်းၶိုၼ်းလႄႈ ႁၼ်ၽူဝ်ၶူးၼၼ်ႉ ၼင်ႈဢိင်သဝ်ၸိူၵ်ႈမတ်ႉမိုဝ်းပႄႈပိၵ်ႇယူႇတၢင်းလင်သေ မီးၽႃႈဝႆဢွၼ်ႇၽိုၼ်ႇၼိုင်ႈႁူမ်ႇဝႆႉပၼ်ယူႇယဝ်ႉ။
“ပေႃးၸႂ်ဢမ်ႇသိူဝ်းၵေႃႈ မႃးတီႈႁိူၼ်းၼႆႉလႄႈ မႃးယိမ်ပပ်ႉတီႈႁိူၼ်းလူၵေႃႈလႆႈယူႇ ၼႂ်းႁွင်ႈပီႈမီးတင်းၼမ်ယဝ်ႉ ႁႂ်ႈမႄႈႁဝ်းဢဝ်ပၼ်လႄႈၼႃႈ ၼွင်ႉၵေႃႈတေလႆႈမႃးႁဵတ်းၵေႃႉမႄႈႁဝ်းၸွမ်း”
“ဢေႃႈ” ပဵၼ်ပွၵ်ႈဢွၼ်တၢင်းသုတ်းၼႂ်းၸၢတ်ႈပၢၼ် ဢၼ်မၼ်းလႆႈႁပ်ႉႁူႉထိုင်ဝႃႈ တီႈၼႆႈမီးဢွင်ႈတီႈပၼ်ပုၼ်ႈတႃႇမၼ်းယူႇၼႆၼၼ်ႉယဝ်ႉ။
“ၵူၺ်းၵႃႈ ပီႈတေယွၼ်းၼွင်ႉလွင်ႈၼိုင်ႈ ပေႃးလုင်းၼႆႉမႃးတီႈႁိူၼ်းၼႆ ၶႂ်ႈႁႂ်ႈၼွင်ႉသိုပ်ႇၾူင်းႁႃပီႈလႄႈ သင်ဢမ်ႇသိုပ်ႇလႆႈၵေႃႈ လၢတ်ႈႁႂ်ႈပိူၼ်ႈမႃးၸွႆႈ ၸွင်ႇတေလႆႈႁိုဝ်”
ဢေးၼုမ်ႇငွၵ်းႁူဝ်ၼႄမၼ်းၵႂႃႇ။
“ၵူၺ်းၵႃႈၶႃႈဢမ်ႇမီးၾူၼ်းၼႃ”
ၸၢႆးလႅင်းယၵ်ႉတူၺ်း ဢေးၼုမ်ႇသေ ၶဝ်ႈမိူဝ်းၵႂႃႇၼႂ်းႁိူၼ်း ဢဝ်ၾူၼ်းၵဝ်ႇမၼ်းဢၼ်ၼိုင်ႈ သမ်ႉဝႃႈပဵၼ်ၸႃႉၵဝ်ႇသေတႃႉ ၸဝ်ႈမၼ်းထိင်းသိမ်းလီၼႃႇလႄႈ ယင်းတိုၵ်ႉမႂ်ႇယူႇ ပဵၼ်ၾူင်းဢၼ်လႆႈတဵၵ်းဢဝ်ၼၼ်ႉၵူၺ်း မိူဝ်ႈၼၼ်ႉၵေႃႈ ၼပ်ႉႁူၼ်လင်ၵႂႃႇ 16 ပီႊ ၼႆႉယဝ်ႉ။ ၾူၼ်းလဵၼ်ႈၼႃႈ တေဢမ်ႇပေႃးလိူင်ႇ ၵူၼ်းၸိူင်ႉၼင်ႇဢေးၼုမ်ႇ ဢၼ်ပေႃႈမႄႈဢမ်ႇလႆႈသူၼ်ၸႂ်ၼၼ်ႉ မၼ်းၵေႃႈဢမ်ႇလၢၵ်ႇလၢႆးဢၼ်ဢမ်ႇမီးၾူၼ်းၸႂ်ႉ။
“ပေႃးၼၼ် ဢဝ်ၶွင်ပီႈၸႂ်ႉလႄႈၼႃႈ”
ယိပ်းသေသွၼ်ပၼ်ဢေးၼုမ်ႇလဵၼ်ႈ ဢေးၼုမ်ႇၵေႃႈငွၵ်ႈတူၺ်းၸွမ်း တူဝ်မၼ်းၼႃႈမၼ်း သမ်ႉပေႃးတေထိုဝ်ႉၶႅၼ်ၸၢႆးလႅင်းယူႇယဝ်ႉ။ ၸၢႆးလႅင်းၵေႃႈ သုတ်ႉၶႅၼ်မၼ်းဢွၵ်ႇ ဢေးၼုမ်ႇၵေႃႈ ဢဝ်ၼႃႈမၼ်းႁၢင်ႇသေ ၼင်ႇႁၢင်ႈၼႃႈမၼ်းၼၼ်ႉၵေႃႈလႅင်မႆႈမႃးယူႇယဝ်ႉ ယူႇယူႇၵေႃႈမိူၼ်ႁူဝ်ၸႂ်တွတ်ႇႁႅင်းမႃးယဝ်ႉ ဢဝ်မၼ်းတိပ်ႇဢူၵ်းၵပ်ႉၸႂ်ၵမ်းလဵဝ်ယူႇ။
တႄႇဢဝ်ဝၼ်းၼၼ်ႉမႃး ဢေးၼုမ်ႇၵေႃႈ မႃးတီႈႁိူၼ်းၶူးၶဝ်ၵူႈဝၼ်းလႄႈ မိူဝ်ႈတႄႇတႄႉမိူဝ်းမိူဝ်းမႃးမႃး ၵွႆႈယူႇၵွႆႈတေႃႉၶူဝ်းတေႃႉလဵင်းၵမ်းဢိတ်းၵမ်းဢွတ်းသေ ထိုင်တီႈၼႂ်းႁိူၼ်းလင်ၼၼ်ႉ မီးဝႆႉပၼ်တီႈၼင်ႈတူၺ်းလိၵ်ႈ တီႈၼွၼ်းပုၼ်ႈတႃႇမၼ်းမႃးယဝ်ႉ။
ၵွပ်ႈဢွင်ႈတီႈၼၼ်ႈ မၼ်းပၼ်လွင်ႈဢုၼ်ႇၸႂ်လႆႈလႄႈ ၸင်ႇတေယူႇလႆႈၼင်ႇလူမ်ၸႂ်ယဝ်ႉ။
ပေႃးၸၢႆးလႅင်းမႃးႁိူၼ်းၼႆတႄႉ ၵႆႉၵႆႉလၵ်ႉၸူမ်းယူႇတႃႇသေႇ သွင်ၶႃၵေႃႈ ဝႆႉလွင်ႈမိုတ်ႈၵိုဝ်းၵၼ်ၼင်ႇပီႈၼွင်ႉသေ ၸွႆႈထႅမ် တူၺ်းထိုင်ၵၼ်ၵႂႃႇယဝ်ႉ။
ဢေးၼုမ်ႇၵေႃႈၵွႆႈႁိုင်မႃး တီႈႁိူၼ်းမၼ်းၵေႃႈဢမ်ႇမိူဝ်းယဝ်ႉလႄႈ မႄႈမၼ်းၼၼ်ႉတႄႉ ပၢႆတေႃႉၶူဝ်းတေႃႉလဵင်းမႃးပၼ်တီႈႁိူၼ်းၶူးၼၼ်ႉယူႇယဝ်ႉ။
ၵူၺ်းၵႃႈ ဢမ်ႇႁိုင်မႄႈၶူးလႄႈတင်းၸၢႆးလႅင်းၶဝ်ၵေႃႈ ၶၢႆႉဢွၵ်ႇၵႂႃႇပႅတ်ႈသေ ႁိူၼ်းလင်ၼၼ်ႉၵေႃႈ ပၼ်ဢေးၼုမ်ႇယူႇတေႃႇထိုင်ဝၼ်းမိူဝ်ႈၼႆႉယူႇယဝ်ႉ။ သမ်ႉဝႃႈ ဢမ်ႇယူႇၸွမ်းၵၼ်ယဝ်ႉသေတႃႉ ၵၢၼ်ၵပ်းသိုပ်ႇၶဝ်တႄႉဢမ်ႇၶၢတ်ႇသေပွၵ်ႈၼင်ႇၵဝ်ႇ။
ၵူၺ်းၵႃႈ ဢူႈတင်းမႄႈမၼ်းၼၼ်ႉတႄႉ ပဵၼ်ၵူၼ်းဢမ်ႇႁူႉၸၵ်းၵၼ်ၵႂႃႇယဝ်ႉ၊ ယူႇဝၢၼ်ႈလဵဝ်ၵၼ်ၵေႃႈဢမ်ႇမိူဝ်းၵၢႆမိူဝ်းၸႂ်းသေပွၵ်ႈ။
သိုပ်ႇလူတွၼ်ႈတေမႃးၶႃႈ
