တၢင်းႁၵ်ႉပဵၼ်ၸိူင်ႉႁိုဝ်
တၢင်းႁၵ်ႉမိူၼ်ႁိုဝ်ဝႆႉ
တၢင်းႁၵ်ႉမၼ်းလီတေႉႁႃႉ
“တၢင်းႁၵ်ႉ” ၵွပ်ႈသင်လႄႈၽႂ်ၽႂ်ၵေႃႈလၢတ်ႈထိုင်မၼ်း ၵွပ်ႈသင်လႄႈလၢတ်ႈပႃးၵဝ်
“ဢေးၼုမ်ႇ…မႂ်းဢမ်ႇဢၢၼ်းဝႆႉၸူႉမီးၵေႃႉႁၵ်ႉၸိူင်ႉပိူၼ်ႈၽွင်ႈၼႄႇ”
“ၵဝ်ဢမ်ႇမေႃဝႆႉၼေႈမႂ်း…”
“တေႁႂ်ႈလႆႈသွၼ်ၵွၼ်ႇႁလွင်ႈၸိူင်ႉၼႆၵေႃႈ”
“ပိူၼ်ႈမီးတီႈႁဵၼ်းမၼ်းသေႁမႂ်းဝႃႈ ႁူင်းႁဵၼ်းသွၼ်တၢင်းႁၵ်ႉၼႆ”
ဢူၺ်းၵေႃႉမၼ်းဢေးသႅင်ပေႃးဢမ်ႇၶႂ်ႈမေႃလၢတ်ႈၸွမ်းယဝ်ႉ
“မႂ်းယၢမ်ႈႁၼ်ယူႇႁ”
“ဢမ်ႇယၢမ်ႈ…”
“ၽႂ်ဢမ်ႇယၢမ်ႈၶိုၼ်ႈလေႃႇ ၵူၺ်းၵႃႈပိူၼ်ႈၵေႃႈဢွၼ်ၵၼ်မီးမူတ်းဢိူဝ်ႈ ၵိုတ်းမႂ်းၵူၺ်းယဝ်ႉ”
“ယႃႇဝႃႈၼၼ်လေႃႇ ၵဝ်ဢမ်ႇလႆႈၸႂ်တႅၵ်ႈၼိူင်းတင်းပိူၼ်ႈဢႄႈ…”
“မႂ်းသမ်ႉတေႁဵတ်းႁိုဝ်လႃႇ ၵိုတ်းမႂ်းၵူၺ်းဢိူဝ်ႈမိူဝ်ႈလဵဝ်ၼႆႉ ဢူၺ်းၵေႃႉၵေႃႈတေဢမ်ႉမီးယဝ်ႉ တေယူႇၵေႃႉလဵဝ်ၵႂႃႇတေႃႇထဝ်ႈၵူၺ်းႁတေႃႈ”
“ၵဝ်တင်းဢမ်ႇႁူႉဝႃႈတေယူႇထိုင်ထဝ်ႈလႆႈလႃႈ ယူဝ်တေတၢႆဢွၼ်တၢင်းတမ်ႉႁူႉ ဝၢၼ်ႈမိူင်းလူင်သုၵ်ႉသၵ်ႉပေႃးတၢၼ်ႇၼႆႉ ၵမ်ႉၽေးသိုၵ်းၽေးသိူဝ် ၽေးသၽႃႇဝဝႃႇ”
“ၵဝ်ႁဵတ်းႁိုဝ်မႃးလဵၼ်ႈၵေႃႉမႂ်းၼႆႉ”
“ၵဝ်လဵၼ်ႈၵေႃႉမႂ်းၵေႃႈလႆႈယဝ်ႉ မႂ်းယႃႇဝူၼ်ႉၼမ်”
“ၸင်ႇဝႃႈၸင်ႇဝႃႈ လၢတ်ႈတေႃႇမႂ်းမိူဝ်ႈလႂ် ႁိူဝ်ႉၸႂ်သေႇသေႇၼႆ”
ဢေးသႅင်ၵေႃႈဢဝ်ၾူၼ်းမၼ်းယိုၼ်ႈပၼ်ဢေးၼုမ်ႇယဝ်ႉ။
“ၵေႃႉၼႆႉမၼ်းသူၼ်ၸႂ်မႂ်းဝႃႇ ၸၢမ်းတၵ်ႉၵႂႃႇႁႃမၼ်းလႄႈ ပေႃးမႂ်းသူၼ်ၸႂ်ၵေႃႈ မၼ်းပဵၼ်ဢူၺ်းၵေႃႉၽူဝ်ၵဝ်ဢိူဝ်ႈၼႆႉ”
“ဢမ်ႇသူၼ်..”
“ဢမ်ႇသူၼ်ၵေႃႈဢဝ်လႄႈ ၸၢမ်းတူၺ်းဢိူဝ်ႈမႂ်းၵေႃႈ”
“မၼ်းဢမ်ႇလီလေႃႇ မဵဝ်းၸိူင်ႉၼႆၸွင်ႇၸႂ်ႈမဵဝ်းပိူၼ်ႈၸၢမ်းၵေႃႈဢမ်ႇၸႂ်ႈ ၵဝ်းလဵၼ်ႈၸဵပ်းတေႉဢိူဝ်ႈ ၵဝ်ၵူဝ်မၼ်းတိူဝ်ႉၸႂ်ၵူၺ်းၵွၼ်ႇ”
“မေႃႁူႉႁေႁ ပေႃးၵူဝ်မၼ်းတိူဝ်ႉၸႂ်ၵေႃႈ မႂ်းယႃႇပႅတ်ႈမၼ်းႁေယဝ်ႉလေႃႇ”
“ၵဝ်တမ်ႉဢမ်ႇဢဝ်မၼ်း တေႁဵတ်းႁိုဝ်ပႅတ်ႈဢႄႈ”
“ဢေးၼႆႉတႄႉ ၵဝ်ၶၢၼ်ႉလၢတ်ႈမႂ်းၼႃႇယဝ်ႉ”
ယူႇယူႇၾူၼ်းဢေးၼုမ်ႇၼၼ်ႉၵေႃႈ မီးၶေႃႈၵႂၢမ်းတၵ်ႉၸူးမႃး “မႂ်ႇသုင်ၶႃႈ”
“ၼေႈမႃးယဝ်ႉ ဢူၺ်းၵေႃႉၽူဝ်မႂ်း”
“တွပ်ႇပၼ်ၸွမ်းလွင်ႈယဵၼ်ႇငႄႈႁေဢိတ်ႉလႄႈ”
ဢေးၼုမ်ႇၵေႃႈ တွပ်ႇပၼ်ၸွမ်းလွင်ႈယဵၼ်ႇငႄႈၵႂႃႇၶိုၼ်း လၢတ်ႈၵႂႃႇလၢတ်ႈမႃးဢဝ်တွႆးယၢဝ်းႁေယဝ်ႉ ႁၢႆလူင်ၵႂႃႇပဵၼ်သွင်ဝၼ်း ၸင်ႇၶိုၼ်းမႃးၸူးဢေးသႅင်။
“ယူဝ်ဝႃႈလႆႈၸူႉယဝ်ႉလိုမ်းၵၼ်ၼႆၵႃႈ”
“ၵဝ်ဢမ်ႇလၢတ်ႈတေႃႇယဝ်ႉ”
“ႁဵတ်းႁင်ဢႃႇ…”
“မၼ်းလၢတ်ႈၼမ်ၼႃႇၵဝ်ၶၢၼ်ႉယဝ်ႉ ၵုမ်ႇလၢတ်ႈတေႃႇမၼ်းယူႇၵူၺ်း ပေႃးလိုမ်းၵိၼ်ၶဝ်ႈတေႉဢိူဝ်ႈ”
“လီယူႇၼႃႇ လႆႈဝႃႈၵႂၢမ်းၶဝ်ႈၵၼ်ယူႇလူးၼၼ်ႉ”
“လီတီႈလႂ် ႁဵတ်းႁႂ်ႈၵဝ်ၶၢၼ်ႉႁဵတ်းၵၢၼ်ၵူၺ်းဢိူဝ်ႈ မိူဝ်ႈဝႃးၵႂႃႇႁဵတ်းၵၢၼ် ၵုမ်ႇတူၺ်းၾူင်းၵူၺ်း ၺႃးႁူဝ်ၼႃႈလႃႇဢိူတ်းပၼ်ၵဝ်ၼၼ်ႉၼႃႇ ၽႂ်ႁိုဝ်ၶႂ်ႈၶၢမ်ႇ ဢမ်ႇလၢတ်ႈတေႃႇႁေယဝ်ႉၵူၺ်းဢိူဝ်ႈ ဢမ်ႇပဵၼ်ၵၢၼ်ပဵၼ်ငၢၼ်းႁင်မေႃႉ”
“မၼ်းၵေႃႈဢမ်ႇလၢတ်ႈတေႃႇမႂ်းႁေယဝ်ႉ”
“ၶွင်ၵဝ်ၵေႃႈဢမ်ႇတူၺ်းဢၼ်မၼ်းသူင်ႇမႃးယဝ်ႉလႄႇ…”
“ဢၼေႃ…မႂ်းႁမ်ႉပေႉႁဵတ်းလႆႈလႃႇႁမ်ႉ”
“ၵဝ်ၶၢၼ်ႉမီးလွင်ႈယဵၼ်ႇငႄႈယဝ်ႉဝႃႈ”
“ဢိူဝ်ႈ! ၵဝ်ၵေႃႈတိူၵ်ႈယဝ်ႉဝႃႈ”
“မႂ်းႁမ်ႉတေၶႂ်ႈႁႂ်ႈၵဝ်မီးၸူႉႁဵတ်းႁင်လူင်လၢင်လႃႇ ၵဝ်ယူႇႁင်းၵဝ်ၵဝ်ၵေႃႈၵျေႃႇယူႇလူး ၵဝ်တင်းၵျေႃႇလိူဝ်မႂ်းၵွၼ်ႇတမ်ႉဢမ်ႇႁူႉ”
“မႂ်းႁမ်ႉမႃးႁဵတ်းႁင်ႇလႃႇႁိူၼ်းၵဝ်ၼႆႉႁမ်ႉ”
“မႃးဢဵၼ်ႈၵေႃႉလၢၼ်…”
“ၼၼ်ႉၵူၺ်း ဢမ်ႇၶႂ်ႈမီးႁမႂ်း”
“ဢမ်ႇၶႂ်ႈမီး..ၵဝ်ၶႂ်ႈဢဵၼ်ႈၵေႃႉၵူၺ်း ၵဝ်ဢမ်ႇၶႂ်ႈလဵင်ႉ တူၺ်းမႂ်းယဝ်ႉ ၵဝ်ႁိူဝ်ႉၼႃႇ”
“မၼ်းၵေႃႈၸႂ်ႈၵွၼ်ႇဢိူဝ်ႈ ၵူၺ်းၵႃႈမၼ်းဢမ်ႇၸႂ်ႈတင်းမူတ်းလေႃႇၼႃႈ ၵဝ်တိုၵ်ႉႁူႉၵူၺ်းဝႃႈ တၢင်းႁၵ်ႉဢၼ်ယိုင်ႈယႂ်ႇၼၼ်ႉမီးတေႉဢိူဝ်ႈၼႆ တၢင်းသိူဝ်းဢၼ်တဵမ်ဢိမ်ႇလူၼ်ႉၸႂ်ၼၼ်ႉမၼ်းမိူၼ်ႁိုဝ်ၼႆ”
ဢေးသႅင်တူၺ်းၼႃႈလုၵ်ႈမၼ်းသေ ယၵ်ႉတူၺ်း ဢေးၼုမ်ႇယဝ်ႉၵေႃႈ
“ဢႃႇယုၽူႈယိင်းထုၵ်ႇလီဝႆႉလုၵ်ႈၼႆႉ မၼ်းဢမ်ႇမီးၼမ်လေႃႇ မွၵ်ႈ 20-35 ၼႆႉၵူၺ်း၊ ပေႃးႁႂ်ႈလီတႄႉ ဢမ်ႇလီပၼ်ႁႂ်ႈပူၼ်ႉ 27 ၵွၼ်ႇယဝ်ႉ ပီၼႆႉမႂ်းၵေႃႈပေႃးမီး 25 ယဝ်ႉဢမ်ႇႁိုဝ်လႃႇ ပေႃးၼၢၼ်းမီးမၼ်းဢမ်ႇလီတေႃႇလုၵ်ႈမႂ်းဢမ်ႇၵႃး တႃႇတူဝ်မႂ်းၵေႃႈဢမ်ႇလီပႃးယဝ်ႉ”
“ႁူႉ!!…ထႅင်ႈသွင်ပီၵမ်းလဵဝ်..သင်ဢမ်ႇသင်ၵေႃႈထႅင်ႈယူႇသိပ်းပီႁိုဝ်လႃႇၼၼ်ႉ”
“ပေႃးသၢမ်သိပ်းၶိုၼ်ႈၼိူဝ်ယဝ်ႉတႄႉ တေမီးၵေႃႈတေဢမ်ႇပေႃးလီတၢၼ်ႇၼႂ်းဢႃႇယုသၢဝ်းၼၼ်ႉၵႃႈႁိုဝ်ယဝ်ႉ”
“ဢမ်ႇမီးႁေယဝ်ႉၼႃႇပေႃးထၢၼ်ႈဝႃႈၼၼ်”
“ပေႃးဢမ်ႇမီးလုၵ်ႈၵေႃႈ ၸၢင်ႈပဵၼ်ၼိူဝ်ႉငွၵ်ႈၼႂ်းမူၼ်ႉလုၵ်ႈဢမ်ႇၼၼ်တေဝႃႈသိတ်ႉၼႂ်းႁူင်းၶႆႇ ၼႆၼၼ်ႉဝႃႇ ၵဝ်ယၢမ်ႈႁၼ်မႃးယဝ်ႉဢိူဝ်ႈၼႆႉတႄႉ ယဝ်ႉၵေႃႈယင်းၸၢင်ႈပဵၼ်ၵႅၼ်ႇသႃႇၼူမ်း ၵႅၼ်ႇသႃႇမူၼ်ႉလုၵ်ႈၸိူဝ်းၼႆႉထႅင်ႈၵွၼ်ႇၼႆမႂ်း”
“ၵဝ်ယၢမ်ႈဢၢၼ်ႇၺႃးတႄႉ ပေႃးဝႃႈလုမ်းလႃးပၢႆးယူႇလီတူဝ်ၶိင်းႁဝ်းတႃႇသေႇ တႃႇဝႃႈတေပဵၼ်တၢင်းပဵၼ်ဢၼ်မႂ်းဝႃႈမႃးၼၼ်ႉၵေႃႈ ဢမ်ႇတေႃႈၼင်ႇၵဝ်ႇသႄႈ ပေႃးဢမ်ႇလုမ်းလႃးပၢႆးယူႇလီတႄႉ ၵႅၼ်ႇသႃႇၼၼ်ႉဝႆႉၵွၼ်ႇ ၵူၺ်းၵႃႈ တၢင်းပဵၼ်ပီး၊ ပဵၼ်ယဵဝ်ႈဝၢၼ်၊ ပဵၼ်လိူတ်ႈသုင်ၸိူဝ်းၼႆႉ ၶႂ်ႈၼႃႇလိူဝ်ၵႅၼ်ႇသႃႇၵွၼ်ႇႁိုဝ်”
ဢေးသႅင်ယၵ်ႉတူၺ်းႁၢင်ႈၾၢင်တူဝ်ၵဝ်ႇ ဢၼ်တုၺ်ႉဢုၺ်ႉၼုၺ်ႉလူင်ၼၼ်ႉသေ
“ၶႂ်ႈဝႃႈ မႂ်းတေဢမ်ႇဢၢၼ်းဢဝ်ၽူဝ် ဢမ်ႇမီးလုၵ်ႈ ဢမ်ႇတေႇၼႃႁိူၼ်းၼႆဢိူဝ်ႈၼႆႉၼေႃႈ”
“လႆႈယူႇဢမ်ႇၸႂ်ႈႁိုဝ်လႃႇ..ၽႂ်ၵေႃႈဢမ်ႇမီးပိူင်မႃးဝႃႈၽူႈယိင်းၵူႈၵေႃႉတေလႆႈတႄႇၼႃႈႁိူၼ်းမူတ်းၼႆလူး”
ဢေးသႅင်ၼၼ်ႉၵေႃႈၼႃႈႁူႇတႃႁမ်းသႂ်ႇမၼ်းၵႂႃႇ လူၺ်ႈဢမ်ႇလၢတ်ႈသင်။
“လၢတ်ႈဢမ်ႇလၢတ်ႈမႂ်းၵေႃႈဢမ်ႇပွင်ႇၸႂ်လႆႈၼင်ႇၵဝ်ႇ ၵဝ်တိူၵ်ႈယဝ်ႉဝႃႈ”
“ၵဝ်ႁၼ်မႂ်းလၢတ်ႈၸိူင်ႉၼႆသေႇသေႇ မိူဝ်ႈၽုၵ်ႈပေႃးမႃးထႅင်ႈၵေႃႈ တေလၢတ်ႈမိူၼ်ၵဝ်ႇၵူၺ်း..”
“မိူဝ်ႈႁိုဝ်းၼႆႉ ဢေးလိုၼ်းတေႁဵတ်းဝၼ်းၵိူတ်ႇလုၵ်ႈမၼ်းၼႆဝႃႇ လၢတ်ႈမႂ်းယူႇႁႃႉ”
“လၢတ်ႈဢိူဝ်ႈ!..ႁႂ်ႈၵဝ်ႁၢင်ႈၶိူင်ႈႁၢင်ႈလီလီသေမိူဝ်းၼႆဝႃႇ”
ဢေးသႅင်ယုမ်ႉယူႇၸုတ်းၵုတ်း ဢေးၼုမ်ႇတႄႉၼႃႈႁူႇၼင်ႇဢမ်ႇႁၢၼ်ႉၸႂ်သေၵႃႈႁိုဝ်။
သိုပ်ႇလူတွၼ်ႈတေမႃးၶႃႈ
