ယွၼ်ႉႁဝ်းပဵၼ်ၵူၼ်းသိုဝ်ႈၼႃႇလႄႈဢမ်ႇႁူႉႁိုဝ် ၵွပ်ႈဢမ်ႇယၢမ်ႈဝႆႉၸူႉလႄႈဢမ်ႇပွင်ႇၸႂ်ႁိုဝ်။
မိူဝ်ႈပွၵ်ႈၼိုင်ႈ ၶိင်ႇၶၢဝ်းႁႅင်ႈ မွၵ်ႇၵေႃႇသွႆႈၵီႈလိူင်ႁၢင်ႈလီလဝ်း ၼူၵ်ႉဢွၼ်ႇႁွင်ႉၸိပ်ႉၸွပ်ႉ ၸွမ်းၵိင်ႇပၢႆၾူၺ်း လီယၵ်ႉလီတူၺ်း လိူၵ်ႈလိူၵ်ႈ ဢူၺ်းၵေႃႉသမ်ႉၸူဝ်းႁွင်ႉၵႂႃႇလႄႇၸွမ်းမၼ်းၼႂ်းဝဵင်း တီႈဢၼ်မီး မွၵ်ႇၵေႃႇသွႆႈၵီႈတဵမ်တူၼ်ႈလမ်းလိူင် ၸူဝ်းၵၼ်ႁၢင်ႈၶိူင်ႈၼုင်ႈသႂ်ႇၶူဝ်းတႆး ႁင်းၽႂ်ႁင်းမၼ်း ၶီႇလူတ်ႉၶိူင်ႈၵႂႃႇႁွတ်ႈၽႅဝ်ယဝ်ႉၵေႃႈ မိူဝ်ႈတိုၵ်ႉဢၢင်ႈထႆႇၶႅပ်းႁၢင်ႈယူႇၼၼ်ႉ ၵေႃႉၶႅပ်ႇၶၢင်ႈၵေႃႉပႅင်းၸႂ်ဢူၺ်းၵေႃႉၼၼ်ႉ မႃးၸူးၸမ်မၼ်းသေ
“ပႂ်ႉႁဝ်းတီႈၼႆႈၵမ်ႉၼ..”
“ဢိူဝ်ႈ..”
ၶႃႈလႆႈဢိူဝ်ႈမၼ်းၵႂႃႇသေ လႄႇလဵပ်ႈထႆႇၶႅပ်းႁၢင်ႈႁင်းၵူၺ်းယူႇၸွမ်းတူၼ်ႈမွၵ်ႇၵေႃႇသွႆႈၼၼ်ႉယဝ်ႉ။ ယူႇၵႂႃႇၸူဝ်ႈလိုမ်းတူဝ် ၶိုၼ်းဝၢႆႇတူၺ်းတီႈႁႃးမႃးၵိုတ်းလူတ်ႉၼၼ်ႉ ဢမ်ႇလႆႈႁၼ်မၼ်းလႄႈ လူတ်ႉၵေႃႈဢမ်ႇႁၼ်ယဝ်ႉ။
သိုပ်ႇၾူင်းႁႃမၼ်းၵေႃႈဝႃႈ “ၵမ်ႉတေၵႂႃႇႁပ်ႉ” ၼႆဝႃႇ။
ၵမ်ႉမၼ်းၼၼ်ႉၵၢင်ဝၼ်းပေႃးတူၵ်း လုၵ်ႈလိူၼ်ပေႃးဢွၵ်ႇ လၢဝ်ပေႃးလႅင်း မွၵ်ႇၵေႃႇသွႆႈပေႃးလူၼ်ႇႁူင်ႈလူင်းၽိူဝ် မႂ်ႇၼုမ်ႇယွတ်ႈၽုတ်းဢွၵ်ႇၼေႃႇယဝ်ႉၵေႃႈ ဢမ်ႇပႆႇႁၼ်မႃး တေႃႇထိုင်မိူဝ်ႈလဵဝ် ယင်းပႆႇလႆႈၶိုၼ်းထူပ်းမၼ်းသေပွၵ်ႈ။ လိူဝ်ၼၼ်ႉ လၢတ်ႈတေႃႇၵေႃႈဢမ်ႇလႆႈထႅင်ႈ သိုပ်ႇၾူၼ်းၵေႃႈဢမ်ႇႁပ်ႉ သူင်ႇၶေႃႈၵႂၢမ်းၵေႃႈဢမ်ႇတူၺ်း သၢႆၵပ်းသိုပ်ႇႁႃးၶၢတ်ႇၵႂႃႇ။
ဢူၺ်းၵေႃႉၼၼ်ႉ တိုၼ်းလိူၵ်ႈၵေႃႉႁၵ်ႉၶဝ် ၸူႉၶဝ် ပဵၼ်ၵေႃႉဢွၼ်တၢင်းသုတ်းယူႇယဝ်ႉ သမ်ႉဝႃႈမီးဢူၺ်းၵေႃႉယူႇၵေႃႈ ၶဝ်တိုၼ်းလိုမ်းမၼ်းလႆႈၼႆ မၼ်းပွင်ႇၸႂ်ၸီႉၸမ်ႈထိုင်ၼိူဝ်ႉထိုင်တႂ်လီၼႃႇၼႃႇ။ ၵွပ်ႈၼၼ် ပေႃးၸူဝ်းၵၼ်လႄႈ ၶႃႈတေၵႆႉလၢတ်ႈၶဝ်ဝႃႈ
“ပေႃးလႄႇ ပႃးၸူႉၵႂႃႇတႄႉ ဢမ်ႇလူဝ်ႇႁွင်ႉႁႃးၼႃႉ လၢတ်ႈဝႆႉထႃႈဢွၼ်တၢင်း”
ၵွပ်ႈၼၼ်လႄႈ ဢူၺ်းၵေႃႉလႄႇပေႃးဢမ်ႇၵိုတ်းတေႉလူး။
မၢင်ပွၵ်ႈ ၶႂ်ႈထၢမ်မၼ်းယူႇဝႃႈ မႂ်းတင်ႈၸႂ်ပွႆႇၵဝ်ပႅတ်ႈႁႃႉ မႂ်းလိုမ်းၵဝ်တေႉႁႃႉ မႂ်းၸႂ်ၸဵပ်းၸႂ်သင်ၵဝ်ယူႇလႃႇ ႁူႉယူႇၵဝ်ၵႂင်တၢင်း မႂ်းယင်းတမ်းၸႂ်သေပၢႆႈဢွၵ်ႇၵႂႃႇ၊ ႁူႉယူႇၵဝ်ဢမ်ႇမေႃၵႂႃႇ မႂ်းယင်းပၼ်ႁႂ်ႈၵဝ်ပႂ်ႉသေဢမ်ႇပွၵ်ႈၶိုၼ်း၊ မႂ်းၸၢၼ်ႈၸင်းၵဝ်ယူႇႁႃႉ မႂ်းၵူဝ်ၵဝ်ပွင်ႉထမႂ်းႁႃႉ ပဵၼ်သင်မႂ်းပေႃးဢမ်ႇတၵ်ႉဢမ်ႇထၢမ်ၶိုၼ်းမႃး မႂ်းၵႂႃႇပဵၼ်သေၸိူဝ်ႉသေလွင်ႈယူႇႁိုဝ် ၵဝ်မႆႈၸႂ်မႂ်းယူႇဢိူဝ်ႈ ပေႃးမႂ်းဢမ်ႇႁူႉၵေႃႈ။
ဝၼ်းၼိုင်ႈၵေႃႈလႆႈႁူႉဝႃႈ
“ၶႃႈထုၵ်ႇလီယူႇၵေႃႉလဵဝ်ၵူၺ်း”
မွၵ်ႇၵေႃႇသွႆႈၵီႈမႃးလၢႆၸုပ်ႈ တုပ်ႇႁဵဝ်ႇၵႂႃႇလၢႆပၢၼ် ဢမ်ႇႁတ်းၸူဝ်းႁွင်ႉၽႂ်ၵႂႃႇယဝ်ႉ။
တႅမ်ႈ-သႅၼ်ငဝ်း
08/07/2025
