ႁဝ်းယၢမ်ႈၸုင်ယိပ်းမိုဝ်းပႆၸွမ်းၵၼ်
ႁဝ်းယၢမ်ႈယုမ်ႉၸူးၵၼ်ၶွႆႈၼႂ်းၾၼ်
ႁဝ်းယၢမ်ႈဢုပ်ႇလၢတ်ႈယဝ်ႉၵဝ်းၵၼ်
ႁဝ်းယၢမ်ႈယူႇႁူမ်ႈၸမ်ဢိူမ်ႈၶၢင်း
ၵူၺ်းၵႃႈ ဝၼ်းၼႆႉပဵၼ်ၾၼ်ၵူၺ်း
သဵင်တဵတ်ႇယဵၼ် ၶၢဝ်းပိူၼ်ႈလပ်းမွႆႈၼွၼ်းဝၢၼ် ယုမ်ႉသႂ်တိုၵ်ႉႁဵတ်းၵၢၼ်ပွၵ်ႈထိုင်ႁွင်ႈ။ ၵူၺ်းၵႃႈ တီႈၼႂ်းႁွင်ႈၼၼ်ႉၵေႃႈ ပေႃးလပ်းသိင်ႇၽိတ်းၽိတ်း ဢမ်ႇမီးၾႆးထွင်ႇလႅင်း ဢမ်ႇမီးၵေႃႉတၵ်ႉထၢမ်လၢတ်ႈတေႃႇ ဢမ်ႇမီးၵေႃႉပၼ်ႁႅင်းဢုၼ်ႇၸႂ် ဢမ်ႇမီးၽႂ်သေၵေႃႈ ၸူးဢဝ်ၾႆးၾူင်းထွင်ႇပိူင်းႁိူဝ်ႈ တဵၵ်းပိုတ်ႇၽုၺ်ႇၾႆးၸင်ႇလႅင်းတူဝ်ႈတဵမ်ႁွင်ႈ။
ႁဵတ်းၵၢၼ်ႁိူဝ်ႉမႃး ဢမ်ႇမီးၵေႃႉႁုင်ၶဝ်ႈၽၵ်းပႂ်ႉထႃႈ ဢမ်ႇမီးၵူၼ်းပႂ်ႉဝႃႈမွင်းၼၢင်း ဢမ်ႇမီးၵေႃႉႁူမ်ႈၼွၼ်းၶႅပ်ႇၶၢင်ႈ ယူႇထၢင်ႇႁၢင်ႈႁင်းၵူၺ်းၵူၼ်းလဵဝ် မီးၾႆးၶဵဝ်ၵေႃႈဢမ်ႇမီးၵေႃႉတၵ်ႉၸူး တူၺ်းယူႇၼႃႈၾူင်းၵေႃႈ ၵူၺ်းလႆႈတၢင်းႁိူဝ်ႉၸႂ်ယူႇၵူၺ်းမၼ်း။
ယူႇယူႇမီးၶေႃႈၵႂၢမ်းတၵ်ႉၸူးႁႃ
“ၽိတ်ႈမွၵ်ႇမႂ်းၼႃႈယုမ်ႉသႂ်” တင်းၽိုၼ်လိၵ်ႈပၢင်ၶႅၵ်ႇ ဢၼ်မီးၸိုဝ်ႈ ၸဝ်ႈသၢဝ် သွႆႈၶမ်း ၼႆၼၼ်ႉ။
ယုမ်ႉသႂ်တူၺ်းၶႅပ်းႁၢင်ႈၼၼ်ႉသေ ဢမ်ႇတွပ်ႇသင်ၶိုၼ်း
ၵူၺ်းၵႃႈ ၼႂ်းၸႂ်မၼ်းၼၼ်ႉတႄႉမွင်ဝႆႉယူႇဢိူဝ်ႈ ပေႉမႃးငိၼ်းၶုၵ်းၸႂ်လႆႈထိုင် ၵူၼ်းၵေႃႉဢၼ်ယၢမ်ႈလၢတ်ႈဝႃႈ ၶႂ်ႈတေႇၼႃႈႁိူၼ်းဢိူဝ်ႈ ၵူၺ်းၵႃႈ မိူဝ်ႈဝႃႈမၼ်းၽွမ်ႉၸွမ်း ၵူၺ်းသမ်ႉလႆႈၶေႃႈတွပ်ႇၶဝ်ဢၼ်ဝႃႈ “ႁဝ်းပႆႇၽွမ်ႉၼႃႈ” ၸိုင်ၸၢင်ႈမႃးႁဵတ်းႁႂ်ႈဢိုၵ်ႉၼိုၵ်ႉထိုင်ၸႂ်၊ ၵေႃႉထွမ်ႇတႄႉ တႅပ်းတတ်းၵႂႃႇယဝ်ႉဝႃႈ ဢမ်ႇၸႂ်ႈၵေႃႉမၼ်းလႄႈဢိူဝ်ႈ။
ဝၼ်းပၢင်ၶႅၵ်ႇသွႆႈၶမ်း ယၢင်ႈတမ်းႁူမ်ႈႁွမ်းပႆၸွမ်းၸဝ်ႈမၢဝ်ႇ ဢူၺ်းၵေႃႉၵဝ်ႇမႂ်ႇမႃးၶဝ်ႈႁူမ်ႈၸူမ်းသိူဝ်း မၢင်ၸိူဝ်းပႃးလုၵ်ႈတင်းၽူဝ် မၢင်ၸိူဝ်းတူဝ်လဵဝ်မႃးၵူၺ်း ၽႂ်ၵေႃႈယၵ်ႉတူၺ်းတၵ်ႉထၢမ်
“မႃးၵေႃႉလဵဝ်ၵူၺ်းႁ”
“ငိၼ်းၶၢဝ်ႇဝႃႈမီးမၢဝ်ႇယဝ်ႉ ဢမ်ႇႁွင်ႉမႃးပႃးလႃႇ”
“ၵူဝ်သူႁူႉၸၵ်းလႄႈဢမ်ႇႁွင်ႉမႃးဢိူဝ်ႈ” ယုမ်ႉသႂ်တွပ်ႇပၼ်ၶဝ် သႆၢတႃမွင်မွင် ယၵ်ႉတူၺ်းၸိူဝ်းၶဝ်ဢၼ်သုၵ်ႉသၵ်ႉၸွမ်းလုၵ်ႈၸွမ်းလၢင်းယူႇၼၼ်ႉ လၢတ်ႈယူႇၼႂ်းၸႂ် “ႁဝ်းဢမ်ႇမီးဝၼ်းၸိူင်ႉၼႆယဝ်ႉ”
“ယုမ်ႉသႂ် လိူၵ်ႈတူၺ်းလႄႈဢူၺ်းၵေႃႉၸဝ်ႈမၢဝ်ႇ ဢမ်ႇပႆႇမီးၸူႉၵေႃႈမီးယူႇလႆၢၵေႃႉဢိူဝ်ႈ” သွႆႈၶမ်းလၢတ်ႈၸူးယုမ်ႉသႂ်။
“ဢိမ်ႇယဝ်ႉၼႃႈ…”
“လၢတ်ႈပေႃးတၢၼ်ႇယၢမ်ႈမီးယဝ်ႈ…ယၢမ်ႈယူႇႁတေႃႈ”
ပေႃးမႃးဝူၼ်ႉတူၺ်း မၼ်းလႄႈၵူၼ်းၵေႃႉၼၼ်ႉၵေႃႈ ဢမ်ႇၸႂ်ႈၵေႃႉႁၵ်ႉၵၼ်လူး တေဝႃႈပဵၼ်ၵူၼ်းႁူႉၸၵ်းၵေႃႈ ဢမ်ႇႁူႉလွင်ႈသင်ၵဵဝ်ႇလွင်ႈၶဝ်တေႉတေႉ တေဝႃႈၵူၼ်းၵဝ်းၵၼ်ၵေႃႈ ဝၼ်းဝၼ်းသေလၢႆ ဢမ်ႇလၢတ်ႈတေႃႇၵၼ် တေဝႃႈဢမ်ႇႁၵ်ႉၵေႃႈသမ်ႉလၵ်ႉၸႂ်ထိုင်ၶဝ်ယူႇၽႆၢႇလဵဝ်။
“ဢမ်ႇယၢမ်ႈ…”
“ၼၼ်ႉၵူၺ်း…ၶမ်ႈၼႆႉဢမ်ႇမဝ်းယႃႇမိူဝ်းၼ”
ယၢမ်းၶမ်းလပ်းသိင်ႇ ၶၢဝ်းၶိင်ႇၼင်ႈဝႅင်းပၢင်ၵျေႃႇမူၼ်ႈ ၶၢဝ်းၵူၼ်းဢူၼ်ႈႁႅင်းယွမ်း လဝ်ႈပီႇယႃႇ ၵႃႈၵိၼ်ၵႃႈဢိမ်ႇ မၢင်ၵေႃႉၶတေၵိၼ်ပႃးမိူဝ်ႈၽုၵ်ႈလူးၵွၼ်ႇယဝ်ႉ။
ယုမ်ႉသႂ်ၼင်ႈၵိၼ်ယူႇႁိမ်းၸဝ်ႈသၢဝ် ဢုပ်ႇလၢတ်ႈၵႂၢမ်းယဝ်ႉယွၵ်ႇယုမ်ႉၶူဝ်ၵၼ်ယူႇလႄႈ မၢဝ်ႇၼုမ်ႇဢူၺ်းၵေႃႉၸဝ်ႈမၢဝ်ႇ မႃးၼင်ႈၶႅပ်ႇၶၢင်ႈၸမ်တၵ်ႉၸူး မၼ်းၵေႃႈတူင်ႉတၵ်ႉတွပ်ႇယဵၼ်ႇငႄႈ သႆၢတႃဝႄႈတူၺ်းၵႆ ဢမ်ႇယၵ်ႉတူၺ်းၽႂ်ဝႃႈ တေမီးၵေႃႉထုၵ်ႇၸႂ်လႃႈ။
ၸဝ်ႈသၢဝ်ၵိၼ်မဝ်းၼႃႇယဝ်ႉလႄႈ သူင်ႇသင်ႇၵၼ်သေ ဢွၼ်ၵၼ်ပွၵ်ႈမိူဝ်းၵႂႃႇႁင်းၽႂ်မၼ်း။ ၸိူဝ်း ဢူၺ်းၵေႃႉ မၼ်းၼၼ်ႉတႄႉ ဢွၵ်ႇမိူဝ်းပဵၼ်ၵူႈပဵၼ်တွႆး မီးမၼ်းၵူၺ်း ပွၵ်ႈမိူဝ်းၵႂႃႇၵေႃႉလဵဝ် မၢဝ်ႇထၢမ်မိူဝ်းသူင်ႇၵေႃႈ ဢမ်ႇၽွမ်ႉလႄႈ ဝႄႈၼႃႈသေ ဢွၵ်ႇပႆၢႈသွတ်ႉမႃးယဝ်ႉ။
ၶမ်ႈၶိုၼ်းလိူၼ်လႅင်းလႅင်း ငဝ်းၵူၼ်းႁၼ်ၸႅင်ႈ မၼ်းၼင်ႈႁွင်ႉႁႆႈယူႇတီႈၶၢင်ႈတၢင်း ၵေႃႉဢမ်ႇႁူႉတႄႉဝႃႈၽဵတ်ႇလွၵ်ႇ ၽႂ်ၵေႃႈႁိုဝ်ႁူႉၼႂ်းၸႂ်မၼ်းလႆႈ ႁူဝ်ၸႂ်ဢိုတ်ႇႁႆႈႁွၼ်ႉမႆႈယူႇၸဵမ်ႈၵႆႈ ၽႂ်ဢမ်ႇလႆႈငိၼ်းၵူၺ်းဢိူဝ်ႈ။
တၢင်းမုင်ႈမွင်းဢၼ်ၶဝ်ဝႆႉပၼ် လွင်ႈၼွၼ်းၾၼ်ဢၼ်ယၢမ်ႈဢုပ်ႇလၢတ်ႈၵၼ် မၼ်းလႆႈႁၼ်ႁၢင်ႈၽၢမ်းတႃမႃး ဢၼ်မီးပႃးၶဝ်ယူႇႁိမ်းၶၢင်ႈ ယုမ်ႉဝႆၢႇၼႃႈယၵ်ႉတူၺ်းၵၼ်ၸူမ်းသိူဝ်း ၶွၼ်ႈႁႅင်းႁူမ်ႈပဵၼ်ၼႃႈႁိူၼ်းလဵဝ်ၼႆၼၼ်ႉ ၸိုင်သမ်ႉၸီးၸမ်ႉတွၵ်ႈတမ်တႅင်းသႂ်ႇႁူဝ်ၸႂ် ပေႃးၵႅၼ်းၸၢတ်ႈၸၢတ်ႈ။
လၢတ်ႈလႆၢပွၵ်ႈယဝ်ႉ ဢမ်ႇႁၵ်ႉ ၵူၺ်းၵႃႈ ၵွပ်ႈသင်လႄႈႁၢမ်ႈဢမ်ႇလႆႈ တေႃႇၼင်ႇတူဝ်ၵဝ်ႇၵူၺ်းထိင်းဢမ်ႇလႆႈ သမ်ႉပေႃးၵိၼ်လဝ်ႈႁွင်ႉႁႆႈယူႇၼႂ်းတၢင်းၸိူင်ႉၼၼ် သမ်ႉဝႃႈမိူၼ်ၾၼ်ၵေႃႈပဵၼ်လွင်ႈတေႉယဝ်ႉ ၼင်ႈဝူၼ်ႉၶႆႈၶိုၼ်းၶမ်ႈၶိုၼ်းမိူဝ်ႈဝႃးယူႇတီႈၽိူၼ်မူႇၶဝ်ႈၼၼ်ႉႁင်းမၼ်း။
သဵင်ၾူၼ်းမေႃးလင် “ႁလူဝ်ပီႈ..မိူဝ်ႈၼႆႉမီးၵၢၼ်လမ်ႇလွင်ႈ ႁူဝ်ၼႃႈႁႂ်ႈမႃးၼႆဝႃႇ” သဵင်ဝၢၼ်ဢွၼ်ႇၼွင်ႉယိင်းလီႁၵ်ႉလီမိုတ်ႈတီႈႁဵတ်းၵၢၼ်မၼ်းၼၼ်ႉတၵ်ႉၸူးမႃး။
ၼွင်ႉယိင်းၵူၼ်းလီမိုတ်ႈလႄႈ ပဵၼ်ၵူၼ်းႁၢင်ႈလီ လီႁၵ်ႉ ဢမ်ႇလၢၵ်ႇလႆၢးတေမီးၵူၼ်းတၵ်ႉၵူၼ်းၵဝ်းၼမ် ၵေႃႉၸမ်ၸႂ်မၼ်းၵေႃႈပႃးၸွမ်း ပဵၼ်မႆၢၼိုင်ႈၵွၼ်ႇလႄႈ ယုမ်ႉသႂ်ယူႇၼႂ်းၵႄႈႁဵတ်းမိူၼ်ဢမ်ႇႁူႉ ၸႂ်လူႉယူႇၵေႃႈ ယဵၼ်ႉၶၢမ်ႇသေ တေဝႃႈႁိုဝ်ၵေႃႈၶဝ်တင်းဢုပ်ႇၵၼ်ၸမ်ၸႂ်ၵၼ် လိူဝ်သေမၼ်းလႄႈတင်းၶဝ်ယူႇ။
ၼႂ်းၵႄႈတၢင်းႁၵ်ႉ ဢမ်ႇမီးလွင်ႈၸႅင်ႈလႅင်း ဢမ်ႇပွင်ႇၸႅင်ႈ တေယူႇႁိုဝ်ၵႂႃႇ မီးႁိုဝ်ဢမ်ႇမီး တေလႆႈႁဵတ်းႁိုဝ် ၵႂႃႇၸိူင်ႉႁိုဝ် ဢမ်ႇႁူႉၸၵ်းယဝ်ႉလီႁိုဝ် ဢမ်ႇမီးသင်ဢၼ်ႁဵတ်းႁူမ်ႈပွင်းၵၼ် ၵႂၢမ်းတူင်ႉတၵ်ႉၸူးၵူၺ်းယင်းၶၢတ်ႇ တင်းသွင်ယဵၼ်ႁႆၢၽၢတ်ႇ မီးသင်ၵေႃႈဢမ်ႇၸၢင်ႈလၢတ်ႈလႆႈ ယွၼ်ႉဢမ်ႇၸႂ်ႈသင်ၵၼ်လူး။
သမ်ႉဝႃႈတေႁွင်ႉႁႆႈတၢၼ်ႇႁိုဝ်ၵေႃႈ ၶဝ်ဢမ်ႇလႆႈငိၼ်း၊ သမ်ႉဝႃႈတုၵ်ႉယူႇၵေႃႈ ၶဝ်ဢမ်ႇႁပ်ႉႁူႉမၼ်းလႆႈ၊ သမ်ႉဝႃႈဢမ်ႇမီးႁဝ်းၵေႃႈ ၶဝ်မီးသၢဝ်တင်းၼမ် ဢၼ်ၽွမ်ႉတႃႇလၢတ်ႈၵႂၢမ်းႁၵ်ႉၸူး ႁဝ်းၵေႃႈ ပဵၼ်မွၵ်ႈၼၼ်ႉၵူၺ်း။
မိူဝ်ႈယွမ်းၵေႃႈယွမ်းမႃးယဝ်ႉ ဢမ်ႇမီးသင်လီမႃး ႁိူဝ်ႉၵေႃႈႁိူဝ်ႉယဝ်ႉ ႁၵ်ႉၵေႃႈလိုဝ်ႈသေ တေတုၵ်ႉႁိုဝ်သိူဝ်း မီးမၼ်းႁိုဝ်ဢမ်ႇမီး ဢမ်ႇမီးသင်လႅၵ်ႈလႆၢႈ မၼ်းတိုၼ်းဢမ်ႇယူႇၸဵမ်လႂ်။
ယုမ်ႉသႂ် ပႃးထူင်မၼ်းသေၵႂႃႇႁဵတ်းၵၢၼ် တင်းဢၼ်ႁူဝ်မဝ်းၵေႃႈပႆႇပေႇၼၼ်ႉသေ ပႆၵႂႃၸွမ်းတၢင်းၵေႃႈ ၶႂ်ႈဝၢင်းတူဝ်လူမ်ႉပဵၼ်ၵမ်း ၵူၺ်းၵႃႈဢမ်ႇလူမ်ႉပဵၼ်ၵမ်း လူမ်ႉၵမ်းလဵဝ်သေ ၵႂႃႇမီးယူႇတီႈႁူင်းယႃၼၼ်ႉၼႃႇ။
ယုမ်ႉသႂ်ၼႃႈမွင်ႁႅင်ႈႁွင်ႁွင် ဢမ်ႇႁူႉတေၸၢင်ႈလၢတ်ႈတီႈၽႂ် ဢမ်ႇႁူႉတေလႆႈလၢတ်ႈၸိူင်ႉႁိုဝ် လၢတ်ႈၼႄၵူၼ်းတီႈႁိူၼ်းၶဝ်ၵေႃႈတေမႆႈၸႂ် ဢူၺ်းၵေႃႉၵေႃႈၽႂ်ဢမ်ႇတၼ်း ၵူၺ်းမီးၵူၼ်းတီႈႁဵတ်းၵၢၼ် ဢၼ်လၢတ်ႈ မႃးဝႃႈ “ဢမ်ႇလူဝ်ႇမႃးႁဵတ်းၵၢၼ်ၵေႃႈလႆႈၼႃႈ”ၼႆၵူၺ်း။
ၼွၼ်းလိုဝ်ႈယူႇၵေႃႈဢမ်ႇသိူဝ်း ၶႂ်ႈၶိုၼ်းၵပ်းသိုပ်ႇၸူးလၢတ်ႈၶဝ်ဝႃႈ ႁဝ်းဢမ်ႇယူႇလီဢိူဝ်ႈၼႃႈ ပဵၼ်လႆႈတၢင်းဝူၼ်ႉလႆၢလႆၢၵူၺ်း တေႃႈၼင်ႇမိူဝ်ႈပဵၼ်ၶႆႈလိူတ်ႈဢွၵ်ႇ ၼွၼ်းယူႇတီႈႁူင်းယႃ သိုပ်ႇၾူင်းႁႃတင်းဢမ်ႇႁပ်ႉ သူင်ႇၶေႃႈၵႂၢမ်းဝႆႉၵေႃႈတင်းဢမ်ႇတူၺ်း တေႃႇထိုင်ပေႃးလႆႈမွတ်ႇပႅတ်ႈၶိုၼ်း။
ၸႂ်လဵၵ်ႉယူႇဢိူဝ်ႈ ႁိူဝ်ႉၸႂ်ၸွမ်းၼႃႇသေ မုင်ႈမွင်းၼိူဝ်မၼ်းၼႃႇပူၼ်ႉ ဢဝ်ပဵၼ်တၢင်းမႆႈၸႂ်ၼႃႇလႄႈ ၶတ်းၸႂ်ဝႄႈပႆၢႈႁႂ်ႈၵႆၵႆ ၼွၼ်းယဵၼ်လပ်းတႃလိုဝ်ႈႁိူဝ်ႉၵႂႃႇၼႂ်းႁူင်းယႃၼၼ်ႉယဝ်ႉ။
သဵင်ဢၼ်တဵတ်ႇယဵၼ်ယူႇၼၼ်ႉ ၽႂ်ႁိုဝ်လႆႈႁူႉငိၼ်းၸွမ်း၊ ႁူၺ်ႇတႃဢၼ်ၶီမွင်ယူႇၼၼ်ႉတေမီးၽႂ်ႁူႉပွင်ႇၸႅင်ႈ၊ သဵင်ၶူဝ်ဢၼ်သိူဝ်းၸႂ်ယူႇၼၼ်ႉ ၽႂ်တေႁူႉဝႃႈမၼ်းသိမ်းဝႆႉတၢင်းတုၵ်ႉမွၵ်ႈႁိုဝ် တေမီးၽႂ် မႃးပိုတ်ႇၸႂ်မၼ်းလႆႈ ႁူဝ်ၸႂ်ဢၼ်လပ်ႉသိမ်းဝႆႉ မီးမၢၵ်ႈလႅဝ်းၽႆၢႁႄႉၵႅတ်ႇ ဢမ်ႇပၼ်ၽႂ်မႃးၵဝ်းလဵၼ်ႈၸႂ်ထႅင်ႈယဝ်ႉ။
တႅမ်ႈ-သႅၼ်ငဝ်း
1/8/2025
