တွၼ်ႈသွင်
ၶဝ်ၸိူဝ်းၼၼ်ႉၵေႃႈ မႃးလၢၵ်ႈၸၼ်ဢဝ်ၶႃႈၵႂႃႇၼင်ႈတေႃႇၼႃႈ ဢေးၼူၼ်းၼၼ်ႉသေ ဢေးၼူၼ်းၼၼ်ႉတႄႉ သုၵ်ႉသိၵ်ႉသုၵ်ႉသၵ်ႉ ဢဝ်ၶိူင်ႈမုၼ်ႈမၼ်း ဢၼ်ၼိုင်ႈယဝ်ႉဢၼ်ၼိုင်ႈ မႃးတႃးပၼ်ၶႃႈၵႂႃႇယဝ်ႉ။ ဝၢႆးသေမၼ်းတႃးပၼ်ယဝ်ႉၵေႃႈ ၼင်ႇႁၢင်ႈၼႃႈတႃပေႃးၶဵင်ႈတိင်းၼိင်း ၼင်တႃပေႃးၼၵ်းတိုၵ်းၵိုၵ်းယဝ်ႉ၊ မွင်းယၵ်ႉႁၢင်ႈတူၺ်းၵူၺ်း သမ်ႉပေႃးၶႂ်ႈတူၵ်းၸႂ်လူင်မႃးၵမ်းလဵဝ် တင်းၶူၼ်ႁူဝ်ပုတ်းပုတ်းလူင်ၼၼ်ႉႁေ တေဝႃႈဢမ်ႇမိူၼ်ၽူႈယိင်းၼႆၵေႃႈ သမ်ႉမိူၼ်ယူႇၵူၺ်းၼင်ႇၵဝ်ႇ၊ တေဝႃႈမိူၼ်ၼႆၵေႃႈ မိူၼ်ႁိုဝ်မိူၼ်ႁိုဝ်ဝႆႉဢမ်ႇႁူႉ၊ ဢၼ်ပိူင်ႈမႃးၵေႃႈမီးယူႇတီႈၼႃႈ တီႈလဵဝ်ၼၼ်ႉၵူၺ်း၊ ၵွပ်ႈဝႃႈ ၶူဝ်းၼုင်ႈၶိုၼ်ႈႁူင်းႁဵၼ်းၼၼ်ႉ ၶႃႈပုတ်ႈဢဝ်ၶူဝ်းပီႈဢၢႆႈၶႃႈမႃးၼုင်ႈၵူၺ်း မိူဝ်ႈတႄႇတႄႉ ၶူးၶဝ်ၵေႃႈဝႃႈယူႇၵူၺ်းၼင်ႇၵဝ်ႇ ၶႃႈၵေႃႈဢမ်ႇသူၼ်ၸႂ်သင်လႄႈ ၼုင်ႈၸိူင်ႉၼၼ်မႃးပီႊသိုပ်ႇပီႊယူႇ၊ ၶူးၶဝ်ၵေႃႈယၢမ်ႈၵႂႃႇသေယဝ်ႉ မိူၼ်ပဵၼ်ၶႃႈၵေႃႉလဵဝ် ဢၼ်လႆႈၶႂၢင်ႉၼုင်ႈၶူဝ်းၽူႈၸၢႆးမႃးႁူင်းႁဵၼ်းၼၼ်ႉယဝ်ႉ။
တူၺ်းၵႂႃႇတူၺ်းမႃး ၶႃႈၵေႃႈ ၼင်ႇႁၢင်ႈၶႂ်ႈမိူၼ်ၽူႈမႄႈ ဢၼ်ပိူၼ်ႈဝႃႈၼၼ်ႉၵေႃႈလူဝ်လူဝ်ယဝ်ႉ။ ၶဝ်ၸိူဝ်းၼၼ်ႉၵေႃႈ ယၵ်ႉတူၺ်းၶႃႈသေ
“ႁဵတ်းႁၢင်ႈႁဵတ်းၽၢင်မႃးၵေႃႈ ႁၢင်ႈၽၢင်ၽူႈယိင်းမၼ်းၵေႃႈဢွၵ်ႇမႃးယူႇၼေႃ”
“ယူႇယၢပ်ႇၼႃႇဢေႉသူဝႃႈ မွတ်ႇပႅတ်ႈႁေဢမ်ႇလႆႈႁႃႉ သမ်ႉပေႃးၼၵ်းႁူဝ်ၼၵ်းၸႂ်လူင်ၵႂႃႇမူတ်းယဝ်ႉဢ”
“ဢမ်ႇယၢမ်ႈလႄႈဝႃႈဢိူဝ်ႈ ၵႆႉၵႆႉႁဵတ်းတိၵ်းတိၵ်းမၼ်းတေယၢမ်ႈမႃးၵူၺ်းၵႃႈ” ဢေးၼူၼ်းလၢတ်ႈ။
မိူဝ်ႈပဵၼ်ၼင်ႇၼၼ် ၶႃႈသမ်ႉပေႃးဢမ်ႇႁတ်းၵႂႃႇတၢင်းလႂ်ယဝ်ႉ၊ ၽွင်းတေလူင်းႁူင်းႁဵၼ်းပွၵ်ႈမိူဝ်းၼၼ်ႉ ၶႃႈၵေႃႈဢၢၼ်းၵႂႃႇသုၵ်ႈပႅတ်ႈၼႆယူႇ လိူၵ်ႈလိူၵ်ႈသမ်ႉ ႁူပ်ႉၺႃးဢေးၼူၼ်းသေ
“ယႃႇပေဝူၼ်ႉဢၢၼ်းတေသုၵ်ႈပႅတ်ႈၼႃႈ ပေႃးဝႃႈႁဝ်းဢမ်ႇႁၼ်ၼႃႈသူမီးမုၼ်ႈၼႆ တေၵဵပ်းၶိုၼ်းၵႃႈမုၼ်ႈဢၼ်ႁဝ်းတႃးပၼ်ၼၼ်ႉယဝ်ႉ”
ပေႃးလၢတ်ႈၸိူင်ႉၼႆၵေႃႈ ႁၢင်ႈၶႂ်ႈပဵၼ်ၵူၼ်းမီးငိုၼ်းမႃးႁေၵမ်းၼိုင်ႈယဝ်ႉ၊ ၵူၼ်းဢမ်ႇမီးငိုၼ်းၸိူင်ႉၼင်ႇၶႃႈၼႆႉၵေႃႈ ၵူဝ်ယူႇၵူၺ်းလေႃႇ။
မိူဝ်ႈဢၼ်ၶႃႈပွၵ်ႈမိူဝ်းႁိူၼ်းၵႂႃႇႁင်းၵူၺ်းၼၼ်ႉ ယူႇယူႇဢေးၼူၼ်းၵေႃႈ လႅၼ်ႈလူင်မႃးၵွတ်ႇၶႅၼ်ၶႃႈႁေ
“ဢၢႆႈလႅင်!..ဢေႃ..ဢမ်ႇၸႂ်ႈ ဢေးလႅင်”
မိူၼ်ပဵၼ်ၵေႃႉဢွၼ်တၢင်းသုတ်း ဢၼ်ၵူၼ်းၼႂ်းႁူင်းႁဵၼ်းၼၼ်ႉ တေႁွင်ႉၶႃႈဝႃႈဢေးလႅင်ၼႆ၊ တေႃႈၼင်ႇၶူး ယင်းႁွင်ႉၶႃႈဝႃႈဢၢႆႈယူႇလူး။
“မိူဝ်းၸွမ်းၵၼ်လႄႈ…တၢင်းလဵဝ်ၵၼ်ၵူၺ်း”
ဢေးၼူၼ်းၼႆႉ ပဵၼ်လုၵ်ႈႁဵၼ်းဢၼ်တိုၵ်ႉမႃးယူႇမႂ်ႇၵူၺ်း ႁိူၼ်းႁဝ်းယူႇဢမ်ႇပေႃးၵႆၵၼ်ၵႃႈႁိုဝ်၊ ယွၼ်ႉၶႃႈမိူၼ်ၽူႈၸၢႆးဝႆႉလႄႈ ၸင်ႇဝႃႈဢမ်ႇမီးၽႂ်သူၼ်ၶႂ်ႈလဵၼ်ႈၸွမ်း ၶႃႈလႄႈတင်းမၼ်းၵေႃႈ ဢမ်ႇလႆႈမိုတ်ႈၵၼ်သေၵႃႈႁိုဝ်၊ တေႃႉတႄႉႁူႉဝႃႈ ယူႇၸၼ်ႉလဵဝ်ၵၼ် လႄႈ ႁူႉၸၵ်းၸိုဝ်ႈမၼ်း မွၵ်ႈၼၼ်ႉၵူၺ်း။ ၵေႃႉဢၼ် ၶႃႈလၵ်ႉႁၵ်ႉၼၼ်ႉတႄႉၵေႃႈ ပဵၼ်ပီႈဢၢႆႈမၼ်းယဝ်ႉ ႁူႉဝႃႈမၼ်းပဵၼ်ပီႈဢၢႆႈၶဝ်ၵူၺ်း ၸိုဝ်ႈၶဝ်ႁွင်ႉသင်တႄႉ ၶႃႈယင်းပႆႇႁူႉလူးၵွၼ်ႇ။
ပေႃးၵၢင်ၼႂ်မႃး ၶႃႈၵေႃႈ တေမႃးႁၢင်ႈႁႅၼ်းတူဝ်သေ ပႂ်ႉတူၺ်းတၢင်းၶဝ်လႄႈ တေႁၼ်ၶႃပီႈၼွင်ႉၵႂႃႇႁူင်းႁဵၼ်းၸွမ်းၵၼ်ယူႇ။ ၵႂႃႇၸွမ်းၵၼ်ၼႆၵေႃႈ ဢုပ်ႇလၢတ်ႈယဝ်ႉၵၼ်လူင်ၵႂႃႇ ၼင်ႇႁၢင်ႈပေႉဢၢပ်ႈၵျေႃႇၼႃႇ၊ ပေႃးဢမ်ႇမိူၼ်ၶႃႈ သေဢိတ်း ၶႃႈတႄႉ ပေႃးဝႃႈပီႈၶႃႈၵႂႃႇႁူင်းႁဵၼ်းၼႆ သမ်ႉပေႃးလႆႈလႅၼ်ႈၸွမ်းၵူၼ်ႈၶဝ်သေႇသေႇ ၼၼ်ႉယဝ်ႉ။ ပေႃးဢမ်ႇၶိုတ်းသမ်ႉ ၸွမ်းပွင်ႉတၢင်းလင်မႃးထႅင်ႈႁေ ပဵၼ်ၼၼ်မႃးၸဵမ်မိူဝ်ႈၵေႃႉလဵၵ်ႉယဝ်ႉ တေႃႇထိုင်မိူဝ်ႈလဵဝ်ၵေႃႈ ယင်းတိုၵ်ႉပဵၼ်ၼၼ်ယူႇ။ မိူဝ်ႈၵေႃႉလဵၵ်ႉ ပေႃးဢမ်ႇၶိုတ်းၼႆတႄႉၵေႃႈ ပီႈဢၢႆႈလူင်ႁဝ်းၼၼ်ႉ ၵေႃႉတေပႂ်ႉၶႃႈသေ ၸေးၶႃႈၵႂႃႇယဝ်ႉ၊ မိူဝ်ႈလဵဝ် မၼ်းဢွၵ်ႇႁူင်းႁဵၼ်းသေ ႁႃငိုၼ်းႁဵတ်းၵၢၼ်ၸွႆႈဢူႈႁဝ်းယဝ်ႉ၊ ၵွႆးၵိုတ်း ပီႈယီႈလႄႈပီႈသၢမ်ၵူၺ်း။ ၵမ်ႈၼမ်ၵႂႃႇလႂ်ႁဵတ်းသင်ၵေႃႈ တေၵႂႃႇၸွမ်းၶႃတႃႇသေႇ ပေႃးဝႃႈဢမ်ႇမီးၶႃၵေႃႈ ၼင်ႇဝႃႈၸၢတ်ႈပၢၼ်ၶႃႈၼၼ်ႉ ဢမ်ႇဢၢပ်ႈမီးၽႂ်လဵၼ်ႈၸွမ်းယဝ်ႉမိူၼ်ၵၼ်။
ၶႃႈၵေႃႈ မိူဝ်ႈပဵၼ်ၸိူင်ႉၼၼ် ယွၼ်ႉဢမ်ႇယၢမ်ႈႁိုဝ် ဢမ်ႇတၵ်းသဵင်လႄႈ ဢမ်ႇလၢတ်ႈသင် ႁႃးသွင်ၵေႃႉၵေႃႈ ပွၵ်ႈမိူဝ်းၸွမ်းၵၼ်ၵႂႃႇလွႆးလွႆးယဝ်ႉ။
ယၢမ်းၵၢင်ၼႂ်ၽွင်းဢၼ်ၶႃႈႁၢင်ႈႁႅၼ်းတူဝ်ယူႇၼၼ်ႉ ဢေးၼူၼ်းၵေႃႈ ၶဝ်ႈဝၢင်းႁိူၼ်းႁဝ်းမႃးသေ “ဢေးလႅင်..တၼ်းယဝ်ႉႁႃႉ”
“ဢၢႆႈလႅင်!! ဢူၺ်းၵေႃႉမႂ်းမႃးႁွင်ႉၼေႈ” ပီႈသၢမ်ႁဝ်းႁွင်ႉလၢတ်ႈၸူးၶႃႈ။ တေႃႈၼင်ႇၵူၼ်းတီႈႁိူၼ်းၵေႃႈ ယင်းႁွင်ႉဝႃႈၶႃႈဢၢႆႈယူႇလူး တႃႇတေပဵၼ်ၽူႈယိင်းတဵမ်တူဝ်လႆႈၼၼ်ႉ မၼ်းယၢပ်ႇတၢၼ်ႇႁိုဝ် ဝူၼ်ႉတူၺ်းဢဝ်ၶႃႈလူး။
ၶႃႈၵေႃႈ လႅၼ်ႈလူင်ဢွၵ်ႇမႃးၸူးမၼ်းသေ မၼ်းၵေႃႈ ၸူဝ်းၸၵ်ႉဢဝ်ၶႃႈယဝ်ႉ ႁဝ်းၵေႃႈဢွၼ်ၵၼ်ၵႂႃႇၸွမ်းၵၼ် ႁူမ်ႈပႃးတင်းပီႈဢၢႆႈၶဝ်ၼၼ်ႉယူႇ။ မိူဝ်ႈလႆႈယူႇႁိမ်းၶဝ်ၼၼ်ႉၵေႃႈ ယင်းတိုၵ်ႉႁဵတ်းႁႂ်ႈၶႃႈၸႂ်တိုၼ်ႇတဵၼ်ႈမႃးယူႇလႄႈ ဢမ်ႇႁတ်းတေႃႇၼႃႈၶဝ် ၵွပ်ႈၶႃႈၼၼ်ႉ မေႃႁူႉၸၵ်းတၢင်းဢၢႆမႃးယဝ်ႉႁိုဝ် ။
မိူဝ်ႈယူႇၸမ်ၶဝ် ႁဵတ်းႁႂ်ႈၶႃႈဢမ်ႇႁူႉဝႃႈ ၶႃႈတေသိုပ်ႇႁဵတ်းသင်လႄႈ တေလၢတ်ႈသင်ၵေႃႈ ပေႃးၵႂင်ၵႂင်ၵႃးၵႃးလူင်ၵႂႃႇမူတ်း၊ တေႃႇပေႃးထိုင်ႁူင်းႁဵၼ်း ၶႃႈၵေႃႈဢမ်ႇလႆႈလၢတ်ႈၵႂၢမ်းသင်သေၶေႃႈသေၵမ်းၸူးၶဝ်။
ယိုင်ႈဝၼ်းမၼ်းႁိုင်မႃး ႁႃးဢေးၼူၼ်းၼၼ်ႉၵေႃႈ သမ်ႉပေႃးပဵၼ်ဢူၺ်းၵေႃႉလီၵၼ်ၵႂႃႇယဝ်ႉ၊ ယွၼ်ႉမၼ်းပဵၼ်ၵူၼ်းၵေႃႉလဵဝ် ဢၼ်ယွမ်းႁပ်ႉၶႃႈပဵၼ်ၽူႈယိင်းႁိုဝ်၊ ယွၼ်ႉမၼ်းပဵၼ်ၵူၼ်းၵေႃႉလဵဝ် ဢၼ်ႁွင်ႉၶႃႈဝႃႈဢေးလႅင်ႁိုဝ်၊ ပေႃးဝႃႈတေႉ ၼႂ်းၵၢင်ၸႂ်ၶႃႈၼၼ်ႉၶႃႈၵေႃႈ ၶႂ်ႈႁႂ်ႈပိူၼ်ႈႁွင်ႉၶႃႈဝႃႈဢေးလႅင်ယူႇလႄႈ ၶႂ်ႈႁႂ်ႈပိူၼ်ႈတူၺ်းႁၼ်ဝႃႈ ပဵၼ်ၽူႈယိင်းၵေႃႉၼိုင်ႈၼင်ႇၵဝ်ႇ၊ ၽၢင်ႁၢင်ႈတၢင်းၼွၵ်ႈၶႃႈ သမ်ႉဝႃႈတေမိူၼ်ၽူႈၸၢႆးသေတႃႉၵေႃႈ တူဝ်ၶႃႈၸႂ်ၶႃႈၼၼ်ႉ ဢမ်ႇမီးသင်လႅၵ်ႈလၢႆႈဝႃႈ ၶႃႈၼၼ်ႉဢမ်ႇၸႂ်ႈၽူႈယိင်းလူး။ ယွၼ်ႉၶႃႈဢမ်ႇႁူႉဝႃႈ ၽူႈယိင်းၼၼ်ႉ ၶဝ်ၸႂ်ႉၸၢတ်ႈပၢၼ်ၸိူင်ႉႁိုဝ်ၵၼ်လႄႈ မၼ်းပဵၼ်ၸိူင်ႉႁိုဝ်လႃႇ ၶႃႈၸင်ႇႁႃႁူႉမႃးၵေႃႈ မိူဝ်ႈလႆႈမႃးလဵၼ်ႈၵေႃႉဢေးၼူၼ်းၼၼ်ႉယဝ်ႉ၊ မၼ်းသွၼ်ၶႃႈၵႂႃႇၵမ်းဢိတ်းၵမ်းဢိတ်း ၶႃႈၵေႃႈလႆႈလႅၵ်ႈလၢႆႈၵႂႃႇၵမ်းဢိတ်းၵမ်းဢိတ်း ၸဵမ်ၼွၵ်ႈတူဝ်ၼႂ်းၸႂ် လွင်ႈယူႇလွင်ႈသဝ်းၶႃႈၸိူဝ်း ၼႆႉယဝ်ႉ။
ပူၼ်ႉမႃးၶၢဝ်းတၢင်းၼိုင်ႈပီႊ ၶႃႈၵေႃႈမေႃၸႂ်ႉၸၢတ်ႈပၢၼ် ၼင်ႇၽူႈယိင်းမႃး ၼုင်ႈၶူဝ်းၼုင်ႈလဵင်းၵေႃႈ ၼုင်ႈမိူၼ်ၽူႈယိင်းမႃးလွႆးလွႆးယဝ်ႉ၊ မၢင်မဵဝ်းပေႃးဝႃႈၶႃႈၼုင်ႈဢမ်ႇလူမ်ၸႂ် ၶႃႈၵေႃႈတေဢမ်ႇၼုင်ႈၼင်ႇၵဝ်ႇ၊ ၶိုၼ်ႈႁူင်းႁဵၼ်းမႃးၶိုၼ်းထႅင်ႈ ၶႃႈဢမ်ႇၼုင်ႈယဝ်ႉ ၶူဝ်းပီႈဢၢႆႈၶႃႈၸိူဝ်းၼၼ်ႉ ၶႃႈၵေႃႈ လႆႈႁႂ်ႈဢူႈႁဝ်း သိုဝ်ႉၶူဝ်းမႂ်ႇပၼ်ၶႃႈသေ ၼုင်ႈသႂ်ႇၶူဝ်းၽူႈယိင်းမိူၼ်ပိူၼ်ႈ ၵႂႃႇႁူင်းႁဵၼ်းလႄႈ ဝႆႉၶူၼ်ႁူဝ်ၼင်ႇၼၢင်းယိင်းၶဝ်ဝႆႉၼၼ်ႉ ယူႇယဝ်ႉ။
ဢၼ်လႅၵ်ႈလၢႆႈမႃးၼၼ်ႉၵေႃႈ ပႃးလူၺ်ႈ ၶႂ်ႈႁႂ်ႈၼႂ်းသၢႆတႃ ၵူၼ်းၵေႃႉဢၼ်ၶႃႈလၵ်ႉၵျိူၵ်ႈၼၼ်ႉ ႁၼ်ၶႃႈပဵၼ်ၽူႈယိင်းၵေႃႉၼိုင်ႈ မိူၼ်ပိူၼ်ႈၼၼ်ႉယဝ်ႉ။ ၵွပ်ႈမိုတ်ႈၵၼ်တင်းဢေးၼူၼ်းလႄႈ ၵႆႉမိူဝ်းႁိူၼ်းၶဝ်ၼႃႇသေ လႆႈပဵၼ်ဢၼ်ႁူႉၸၵ်းမိုတ်ႈၵိုဝ်းၶဝ်မႃးယူႇ ၶဝ်ၼၼ်ႉၵေႃႈ ၸိုဝ်ႈႁွင်ႉ ပီႈၼုမ်ႇ ၼႆယဝ်ႉ။ သမ်ႉဝႃႈမိုတ်ႈၵၼ်မႃးသေတႃႉ တွၼ်ႈတႃႇၶႃႈတႄႉၵေႃႈ ဢမ်ႇပေႃးႁတ်းဢုပ်ႇႁတ်းႁူပ်ႉတေႃႇၼႃႈၶဝ်သေၵႃႈႁိုဝ်၊ ဢမ်ႇဝႃႈမိူဝ်ႈလႂ်ၵေႃႈ ယင်းတိုၵ်ႉဢၢႆၶဝ်ယူႇ ၶႃႈၵေႃႈဢမ်ႇႁူႉဝႃႈ တေဢၢႆယွၼ်ႉသင်၊ မွင်းယူႇတေႃႇၼႃႈၶဝ်ၼၼ်ႉၵူၺ်း ၼင်ႇႁၢင်ႈတေႁဵတ်းသင်ၵေႃႈပေႃးဢမ်ႇထုၵ်ႇ၊ ႁၼ်ၶဝ်မိူဝ်ႈလႂ် ႁႃတၢင်းပၢႆႈၼႃႈပၢႆႈတႃပႅတ်ႈသေႇသေႇ ၼၼ်ႉယဝ်ႉ။ ပေႃးဢမ်ႇလႆႈႁၼ်သမ်ႉ လွမ်မွင်းႁႃယူႇၼင်ႇၵဝ်ႇ၊ ပေႃးပၢႆႈပႅတ်ႈသမ်ႉ လႄႇၸွမ်းႁႃၶျွင်းတူၺ်းယူႇၵူၺ်း။
ဢေးၼူၼ်းၵေႃႈ ပေႃးမႃးႁိူၼ်းၶႃႈၼႆ မၼ်းၵေႃႈမိူၼ်ၼၼ်ယဝ်ႉ၊ မၼ်းၼၼ်ႉၵေႃႈ လၵ်ႉၵျိူၵ်ႈပီႈသၢမ်ႁဝ်းဝႆႉယူႇ၊ ပေႃးမႃးႁိူၼ်းၶႃႈ ၶႃႈၵေႃႈတေထၢမ်လွင်ႈပီႈဢၢႆႈမၼ်း ပေႃးမိူဝ်းႁိူၼ်းမၼ်း မၼ်းၵေႃႈတေထၢမ်လွင်ႈပီႈသၢမ်သေႇသေႇ ႁႃးသွင်ၵေႃႉၼႆႉ ၼင်ႇဝႃႈ မီးၸၢတ်ႈပၢၼ်ဢၼ်မိူၼ်ၵၼ်လႄႈ ၸင်ႇမႃးၺႃးၵၼ်ဢမ်ႇႁူႉၼႃႇ။
တွၼ်ႈသွင်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်ၶႃႈ။
