ၸိူင်းၼႆၼၼ်ႉ လၢတ်ႈလႆႈဝႃႈပဵၼ်သုၼ်ႇၼိုင်ႈ တွၼ်ႈတႃႇၸၢတ်ႈပၢၼ်ၽႂ်သေၵေႃႉၵေႃႉ ႁူမ်ႈပႃးၶႃႈယဝ်ႉ၊ မၼ်းပဵၼ်တင်းဢူၺ်းၵေႃႉလႄႈ ပၼ်တၢင်းမူၼ်ႈၸႂ်လႆႈ မိူဝ်ႈယူႇႁင်းၵူၺ်း။ ၵူၺ်းၵႃႈ မၼ်းၵေႃႈဢမ်ႇၸႂ်ႈတီႈယႃၸႂ်လႆႈ လွင်ႈလဵဝ်ၵူၺ်း မၼ်းပၼ်တင်း တၢင်းႁူႉတၢင်းႁၼ်၊ ပၼ်ပၢႆးဝူၼ်ႉၶေႃႈၶႆႈၸႂ် လႆႈတင်းၼမ်တင်းလၢႆ ၼၼ်ႉယဝ်ႉ။
မိူဝ်ႈတူၺ်းငဝ်းဢမ်ႇၼၼ်မိူဝ်ႈဢၢၼ်ႇၸိူင်းယူႇၼၼ်ႉ မၼ်းသၢင်ႈပၼ်ႁႂ်ႈၸႂ်ႁဝ်း ၸပ်းၸွမ်းႁွမ်းပႃး ပေႃးတၢၼ်ႇဝႃႈတူဝ်ႁဝ်းၼၼ်ႉ ပဵၼ်ၵူၼ်းယူႇၼႂ်းၸိူင်းယဝ်ႉ မၢင်ပွၵ်ႈၼႆႉ၊ တီႈမွင်ၸႂ်ၼႆၵေႃႈ ႁႆႈႁေ၊ တီႈလီၶႆႈၶူဝ်ၵေႃႈ ၶူဝ်ႁေ သမ်ႉယူႇၵေႃႉလဵဝ်ႁင်းၵွႆး ပိူၼ်ႈႁၼ်ၵေႃႈ ၼင်ႇဝႃႈပဵၼ်ၵူၼ်းယွင်ႇ ယဝ်ႉယိုင်။ ဝႃႈပဵၼ်ၵူၼ်းယွင်ႇၼႆၵေႃႈလႆႈယူႇၵူၺ်း ၶႃႈၵေႃႈပဵၼ်ၵူၼ်းယွင်ႇၵေႃႉၼိုင်ႈလႄႈ ၸင်ႇလႆႈပဵၼ်ၵူၼ်းယွင်ႇၸိူင်း တင်းတူၺ်း၊ တင်းဢၢၼ်ႇ၊ တင်းတႅမ်ႈ ယဝ်ႉ။
သမ်ႉဝႃႈယွင်ႇတၢၼ်ႇႁိုဝ်ၵေႃႈ ဢမ်ႇၼိုင်ႇတူၺ်းလႆႈ ၵူႈတွၼ်ႈၵူႈႁူဝ်ၵူႈလွင်ႈၼင်ႇၵဝ်ႇလႂ် တူၺ်းဝႃႈ ဢၼ်လႂ်လီသူၼ်ၸႂ်လႄႈ မၼ်းတေပၼ်ၽွၼ်းလီယူႇႁိုဝ်ၼႆ ၼၼ်ႉယဝ်ႉ။ ၵူၼ်းႁဝ်းၵေႃႉၼိုင်ႈလႄႈၵေႃႉၼိုင်ႈၵေႃႈ တၢင်းသူင်ဢမ်ႇမိူၼ်ၵၼ် သႅၼ်းၸိူင်း ၵၢၼ်တူၺ်းၸိူင်းၵေႃႈ တေဢမ်ႇမိူၼ်ၵၼ်၊ ၵမ်ႈၽွင်ႈလႆႈၸႂ်တူၺ်း ၸိူင်းပွတ်း၊ ၵမ်ႈၽွင်ႈၵေႃႈ လႆႈၸႂ်တူၺ်းၸိူင်းယၢဝ်း။
ၸိူင်းၵေႃႈ မီးလၢႆသႅၼ်းလၢႆမဵဝ်းယဝ်ႉ ၵူၺ်းၵႃႈပေႃးတူၺ်းၶၢဝ်ႉၶၢဝ်ႉမၼ်းတႄႉၵေႃႈ မီးၸိူင်းဢၼ်ပဵၼ်တႄႉမီးတႄႉ ဢၢင်ႈဢိင်မႃးလွင်ႈတႄႉသေ ၶူင်သၢင်ႈၶိုၼ်ႈမႃး လႄႈ ၸိူင်းဢၼ်ဢဝ်ပၢႆးဝူၼ်ႉသေ ၶူင်သၢင်ႈၶိုၼ်ႈမႃး ၼႆယူႇ။ မၼ်းၵေႃႈ မီးတင်းၸိူင်း ဢၼ်ပၼ်ၽွၼ်းလီ တွၼ်ႈတႃႇႁဝ်းလႄႈ ပၼ်ၽွၼ်းတုမ်ႉယွၼ်ႈႁဝ်းလႆႈမိူၼ်ၵၼ်ယဝ်ႉ။
ၸိူင်းၼႆႉ မၼ်းပဵၼ်ႁႅင်းဢီးသူၼ်း ႁႂ်ႈႁဝ်းၶႂ်ႈႁဵတ်းၶႂ်ႈသၢင်ႈ ၶႂ်ႈယိူင်ႈၸွမ်းမၼ်းမႃးလႆႈယဝ်ႉ၊ မိူၼ်ၼင်ႇႁၼ်ၶဝ်ၵိၼ်ၼႆၵေႃႈ တွင်ႉမႆႈၸွမ်းယဝ်ႉ၊ ႁၼ်ၶဝ်ယုမ်ႉၵေႃႈ သိူဝ်းၸွမ်း၊ ႁၼ်ၶဝ်ႁႆႈၵေႃႈ တိူဝ်ႉၸႂ်ၸွမ်း၊ ၵူၺ်းၵႃႈ မိူဝ်ႈၶဝ်ႁၢႆႉ မိူဝ်ႈၶဝ်မိူၵ်ႈလိူင်းမႃးၼၼ်ႉၵေႃႈ ၸၢင်ႈတိူဝ်ႉပၢႆးၸႂ် ၶႂ်ႈႁၢႆႉၶႂ်ႈမိူၵ်ႈမႃးၸွမ်းလႆႈယဝ်ႉ ပိူၼ်ႈၸင်ႇမီးယူႇဝႃႈ ပေႃးဢႃႇယုပႆႇလႆႈ 18 ဢမ်ႇထုၵ်ႇလီတူၺ်းၼႆ။ ၸိူင်းၼႆႉ မၼ်းလီႁိုဝ်မၼ်းႁၢႆႉႁိုဝ် ဢမ်ႇၼမ်ၵေႃႈဢေႇ မၼ်းသေႃႇသူၼ်းယူင်းၵဝ်း ပၼ်ႁႂ်ႈၸႂ်ၵူၼ်းတူၺ်းမၼ်း ၶဝ်ႈၵႂႃႇယူႇၸွမ်းမၼ်းလႆႈယဝ်ႉ။
ၵွပ်ႈၼၼ်လႄႈ မိူဝ်ႈၶႂ်ႈႁႂ်ႈတူင်ႇဝူင်းႁဝ်းပဵၼ်ၸိူင်ႉႁိုဝ်၊ ၶႂ်ႈႁႂ်ႈတီႈဢၼ်ႁဝ်းယူႇၼၼ်ႉ မိူၼ်ႁိုဝ်ၼႆၵေႃႈ ၵၢၼ်သူၼ်းတုမ်လူၺ်ႈၸိူင်းၼၼ်ႉ ပဵၼ်ဢၼ်လမ်ႇလွင်ႈတႄႉတႄႉယဝ်ႉ၊ ပေႃးႁဝ်းႁဵတ်းဢၼ်လိူင်းၸိူင်းၼႆၵေႃႈ ၵူၼ်းတူၺ်းၸိူင်းႁဝ်းၼၼ်ႉၵေႃႈ တေၸၢင်ႈပဵၼ်ၵူၼ်းလိူင်းၸိူင်းလႆႈ၊ ပေႃးသၢင်ႈၸိူင်းဢၼ်ၽိတ်းၵၼ်လႃႇၵၼ်ၼႆၵေႃႈ ၼႂ်းတူင်ႇဝူင်းႁဝ်း တေပဵၼ်ၸိူင်ႉၼၼ်မႃးယဝ်ႉ။ သင်ႁဝ်းႁဵတ်းဢၼ်ပၼ်တၢင်းႁူႉႁိုဝ် ပၼ်တွၼ်ႈသွၼ်ၼႆၵေႃႈ ၸၢင်ႈၸုင်ၸၼ်ဢွၼ်ဢဝ်ၵူၼ်းတူၺ်းမၼ်း မေႃဝူၼ်ႉၶႆႈၸႂ်ထိုင်လွင်ႈလီမႃးလႆႈယူႇ ၼႆႉတႄႉပဵၼ်ၶေႃႈၶႆႈၸႂ် ၵူၼ်းယွင်ႇၵေႃႉၼိုင်ႈၵူၺ်းၼင်ႇၵဝ်ႇ။
ပေႃးတေဢဝ်ၸိူင်းဢၼ်ၶႃႈတူၺ်း ၵမ်ႈၼမ်တေတူၺ်းၸိူင်းၵူဝ်းရီးယႃးၸၢၼ်း ပဵၼ်ၸိူင်းဢၼ်တူၺ်းယဝ်ႉ မၼ်းသၢင်ႈပၼ်ႁႂ်ႈႁဝ်းႁပ်ႉႁူႉထိုင်လႆႈ လွင်ႈဢၼ်ပဵၼ်ယူႇလႄႈ ၵၢၼ်ၼႄၸိူင်းၶဝ် မၼ်းၶဝ်ႈတၢင်းတိုဝ်း မၼ်းၶဝ်ႈၵၼ်တင်းၾိင်ႈပိူင် ၵူၼ်းဢေးသျႃး ၸိူင်ႉၼင်ႇႁဝ်းၼႆႉယဝ်ႉ။ မၼ်းၼႄႁႂ်ႈႁၼ်လႆႈ ၵၢၼ်ၸႂ်ႉၸၢတ်ႈပၢၼ်ၶဝ်ၼၼ်ႉ မႃးတုမ်ႉယွၼ်ႈထိုင်လႆႈ လွင်ႈပဵၼ်ယူႇၼၼ်ႉတႄႉလႄႈ လွင်ႈလႂ်လွင်ႈၼၼ်ႉ ဢမ်ႇဝႃႈၵၢၼ်မိူင်း၊ ၵၢၼ်ပၢႆးမၢၵ်ႈမီး၊ လွင်ႈမၢႆမီႈ၊ လွင်ႈမေႃယႃ မၼ်းသၢင်ႈပၼ်ႁႂ်ႈႁၼ် မိူၼ်လွင်ႈၼၼ်ႉပဵၼ်တႄႉလႄႈ မၼ်းၼႄႁႂ်ႈႁၼ်ၸႅင်ႈလႅင်းလႆႈဝႃႈ မီးၸိူင်ႉႁိုဝ်ပဵၼ်ၸိူင်ႉႁိုဝ် မၼ်းပွင်ႇၸႂ်ငၢႆႈ၊ ၼိူဝ်ႉလိူင်ႈမၼ်းၵေႃႈ ပဵၼ်ဢၼ်လီသူၼ်ၸႂ်ဝႆႉတႄႉတႄႉ၊ ၸွမ်းၼင်ႇဢၼ်တူၺ်းမႃးၼၼ်ႉ ပဵၼ်ၸိူင်ႉ ၼႆယဝ်ႉ။ ၵမ်ႈၼမ် ၶဝ်ၸႂ်ႉပၢႆးဝူၼ်ႉသေၵႄႈၶႆပၼ်ႁႃ လိူဝ်သေၸႂ်ႉဢဵၼ်ႁႅင်းၵႄႈၶႆပၼ်ႁႃ။ ၵူၼ်းလဵၼ်ႈၸိူင်းမၼ်းၵေႃႈ မီးၼမ်ႉၵတ်ႉတႄႉတႄႉ တူဝ်ၸိူင်းမၼ်းႁပ်ႉပဵၼ်တူဝ်ဢၼ်လီၸင်းၼႆၵေႃႈ ၼင်ႇႁၢင်ႈသမ်ႉပေႃးဢမ်ႇမီးတီႈလီဢီးလူသေဢိတ်းၼၼ်ႉယဝ်ႉ။ လၢတ်ႈလႆႈဝႃႈ ၸိူင်းၵူဝ်းရီးယႃးၼႆႉၵေႃႈ ပဵၼ်ၸိူင်းဢၼ်ၶိုတ်းၸၼ်ႉလုမ်ႈၾႃႉဝႆႉမိူင်းၼိုင်ႈယူႇ။
ပေႃးႁဝ်းတူၺ်းၸိူင်းဢၼ်လီၵေႃႈ တေပၼ်လွင်ႈလီတႃႇႁဝ်းယဝ်ႉ၊ ပေႃးတူၺ်ၸိူင်းဢၼ် ဢမ်ႇပၼ်ၽွၼ်းလီ ၵုမ်ႇၽိတ်းႁူဝ်ၵၼ်၊ ႁိမ်ၸူႉႁိမ်ၸူဝ်းၵၼ်၊ ထၢင်ႇလဵၵ်ႉတဵၵ်းတဵင်ၵၼ် ဢမ်ႇမီးလွင်ႈၶိုပ်ႈၼႃႈသင်မႃးၵေႃႈ တႃႇၵူၼ်းတူၺ်းမၼ်းၵေႃႈ တေဢမ်ႇပၼ်ၽွၼ်းလီသေဢမ်ႇၵႃး ၸၢင်ႈသၢင်ႈပၼ်ႁႂ်ႈၸႂ်ၵူၼ်းတူၺ်းမၼ်း ဝူၼ်ႉႁၼ်မိူၼ်ဝႃႈ ၽဝၸဝ်ႈၵဝ်ႇၼၼ်ႉ တေမိူၼ်ၼင်ႇၼႂ်းၸိူင်းၼၼ်ႉမႃးႁိုဝ် ၼႆၵေႃႈၸၢင်ႈပဵၼ်လႆႈယဝ်ႉ။
ၸိူင်းၼႆၼၼ်ႉ မၼ်းဢမ်ႇလႆႈသူၼ်းတုမ်လွင်ႈႁဵတ်းသၢင်ႈၽၢႆႇၼွၵ်ႈၵူၺ်း မၼ်းယင်းသူၼ်းႁူၺ်းပႃးၸႂ်ၵူၼ်းတူၺ်း ဢၼ်မီးယူႇတၢင်းၼႂ်းၼၼ်ႉလႆႈပႃးယဝ်ႉ၊ ၵွပ်ႈၼၼ် ၶႂ်ႈတိုၵ်းသူၼ်းထိုင် ၽူႈၶူင်သၢင်ႈၸိူင်းၶဝ်၊ ဢၼ်လႆႈၸႂ်ႁဵတ်း ၸိူင်းပိတ်းၸိူင်းပွတ်းၸိူဝ်းၼႆႉၵေႃႈ လီဝူၼ်ႉသၢင်ႈပၼ်ႁႂ်ႈ ၵူၼ်းတူၺ်းမၼ်း မီးပၢႆးဝူၼ်ႉဢၼ်ပဵၼ်ၽၢႆႇလီ ဢၼ်ၸၢင်ႈပူၵ်းပွင်ပၼ် တူင်ႇဝူင်းႁဝ်းလႆႈၼၼ်ႉသေ ၶူင်သၢင်ႈဢွၵ်ႇမႃးယဝ်ႉ။
ပေႃးမႃးတူၺ်းတႆးႁဝ်းၵေႃႈ မီးယူႇၸိူင်းဢၼ်ၶူင်သၢင်ႈဢွၵ်ႇမႃး ၵူၺ်းၵႃႈ မၼ်းမီးဢေႇႁႅင်းၼႃႇလႄႈ တေႃႈၼင်ႇၼႂ်းတူင်ႇဝူင်းတႆးႁဝ်းၵူၺ်းၵေႃႈ ယင်းဢမ်ႇထူဝ်ႈထိုင်လႆႈလီလီလူးၵွၼ်ႇ။ ယွၼ်ႉမၼ်းဢမ်ႇၵႂၢင်ႈၶႂၢင်လႄႈ ၸင်ႇဢမ်ႇမီးၵူၼ်းသူင်ႁဵတ်းမၼ်းႁိုဝ်၊ ယွၼ်ႉဢမ်ႇႁဵတ်းလႄႈ ၸင်ႇဢမ်ႇၵႂၢင်ႈၶႂၢင်လႆႈႁိုဝ်ၼႆ ၶႂ်ႈဝူၼ်ႉၵေႃႈလီဝူၼ်ႉတူၺ်းယူႇ။ ယွၼ်ႉဢမ်ႇမီးငိုၼ်းလူင်းတိုၼ်းၵေႃႈ တေလၵ်ႉဝႃႈယူႇႁိုဝ်၊ ယွၼ်ႉဢမ်ႇမီးၵူၼ်းမီးၼမ်ႉၵတ်ႉၼႆၵေႃႈ တေႃႈၶႂ်ႈဝႃႈပႃးသေလၢႆ သင်သူၼ်ၸႂ်ၶႂ်ႈႁဵတ်းၸိုင် တူဝ်ထူပ်းလႄႈၵၢၼ်လူင်းမိုဝ်းႁဵတ်းၼၼ်ႉ တေႃႈတေၼႄဢွၵ်ႇမႃးပၼ် ၼမ်ႉၵတ်ႉယူႇဢမ်ႇႁၢင်ႉ။
ပေႃးမႃးတူၺ်းမိူင်းပိူၼ်ႈတႄႉ ၸိူင်းၼၼ်ႉ ဢဝ်ၸႂ်ႉတိုဝ်းပႃး ၼႂ်းၵၢၼ်မိူင်း၊ ၵၢၼ်သူၼ်းတုမ်၊ ၵၢၼ်ၶႂၢၵ်ႈဝႃႇတ ၸိူဝ်းၼႆႉမႃးယဝ်ႉ၊ လိူဝ်ၼၼ်ႉယင်းပဵၼ်လွၵ်းၵၢတ်ႇႁႃငိုၼ်းထႅင်ႈလူးၵွၼ်ႇ၊ ယၢမ်းလဵဝ်ၼႆႉ App တူၺ်းၸိူင်းၼႆၵေႃႈ လိူင်ႇၼမ်မႃးတိၵ်းတိၵ်း၊ ဢၼ်တူၺ်းလၢႆၵေႃႈမီး ဢၼ်သဵင်ႈၵႃႈမၼ်းၵေႃႈမီးယဝ်ႉ။
ၵၢၼ်တူၺ်းၸိူင်းၼႆႉ ပေႃးမေႃတူၺ်း မၼ်းဢမ်ႇလႆႈသုမ်းၶၢဝ်းယၢမ်းလႄႈ မၼ်းယင်းမိူၼ်ပဵၼ်ၵၢၼ်ႁဵၼ်းပႃးလူးၵွၼ်ႇ တႄႇၸဵမ်လွၵ်းလၢႆးၵၢၼ်ထႆႇပိူၼ်ႈ၊ လၢႆးဝႆႉဝၢင်းတူဝ်ပိူၼ်ႈ၊ ၵၢၼ်လဵၼ်ႈၸိူင်းပိူၼ်ႈ၊ လွၵ်းၸိူင်းမၼ်းၵႂႃႇၸိူင်ႉႁိုဝ်၊ မၼ်းတေဢဝ်မႃးၸႂ်ႉတိုဝ်း ၼႂ်းၸၢတ်ႈပၢၼ်ႁဝ်းလႆႈၸိူင်ႉႁိုဝ်၊ မၼ်းပၼ်တွၼ်ႈသွၼ်သင်ႁဝ်းၽွင်ႈ၊ တွၼ်ႈတႃႇၶႃႈၵေႃႈ ၸိူင်းၼၼ်ႉ ပဵၼ်တူဝ်ထူပ်းၶႃႈတွၼ်ႈၼိုင်ႈ၊ မၢင်လွင်ႈမၢင်ဢၼ်ၼႂ်းၸၢတ်ႈပၢၼ်တေႉ ဢမ်ႇမီးလႄႈ လႆႈတူၺ်းဢဝ်ၼႂ်းၸိူင်းၼၼ်ႉသေ သိုပ်ႇသၢင်ႈသူင်ႇထိုင်ပၼ်ၽူႈလူလိၵ်ႈႁဝ်းၵႂႃႇ ၼၼ်ႉယဝ်ႉ။
ယိူင်းဢၢၼ်းၵၢၼ်တူၺ်းၸိူင်း ၵေႃႉၼိုင်ႈလႄႈၵေႃႉၼိုင်ႈၼၼ်ႉတႄႉၵေႃႈ တေပိူင်ႈၵၼ်ယူႇ မၼ်းၵေႃႈတေမီးဝႃႈ ၸိူင်းမၼ်းလီတူၺ်းသေတူၺ်း၊ ၵူၺ်းသမ်ႉ ၵူၼ်းလဵၼ်ႈၸိူင်းမၼ်းႁၢင်ႈလီႁၢင်ႈလဝ်းလႄႈ ၸႂ်ၸပ်းပႃးၵူၼ်းသေ ၵေႃႉၼၼ်ႉလဵၼ်ႈဢၼ်လႂ်ၵေႃႈ သိုပ်ႇတူၺ်းၵႂႃႇထႅင်ႈ၊ မိူဝ်ႈတူၺ်းၵႂႃႇတိၵ်းတိၵ်းယဝ်ႉ မိူၼ်တေလၢမ်းၵႂႃႇတိၵ်းတိၵ်းသေ ၸပ်းၸွႆးၸိူင်းၸပ်းၸွႆးၵူၼ်း ပဵၼ်ၵၢၼ်ယွင်ႇၵႂင်မဝ်းမႃး ဢမ်ႇပဵၼ်ၵၢၼ်ပဵၼ်ငၢၼ်းၵွပ်ႈမၼ်းမႃး၊ ၶႃတႃၼွၼ်းယွၼ်ႉမၼ်းမႃး ၸိူဝ်းၼႆႉၵေႃႈမီးယဝ်ႉ။
သင်ဝႃႈမိူၼ်လူမ်းလူင်ဝႆႉၼႆၵေႃႈ ဝႆႉဝႃႈပဵၼ်တၢင်းဝူၼ်ႉၵူၼ်းယွင်ႇသေၶႃႈလႄႈ၊ သင်ဝႃႈမၼ်းၶႂ်ႈၸႂ်ႈဝႆႉၼႆၵေႃႈ ၶႅၼ်းတေႃႈဢဝ်သိုပ်ႇတေႃႇယွတ်ႈ ပၼ်သေၵမ်း၊ ႁူႉၼႃႇတႄႉဢမ်ႇၸႂ်ႈ ၶႆႈၸႂ်ဝူၼ်ႉၺႃးသေလႆႈလၢတ်ႈဢွၵ်ႇမွၵ်ႇၼႄၵူၺ်းၶႃႈ၊ သင်မီးတီႈၽိတ်းတီႈပိူင်ႈ တီႈႁိူင်ႈတီႈၵိူင်းၼႆၵေႃႈ ၸွႆႈၸီႉၸမ်ႈမူၼ်ႉမႄးၸင်ႇတူၵ်းထုၵ်ႇၶႃႈယဝ်ႉ၊ ပေႃးဢမ်ႇမႄးၵေႃႈ ဢမ်ႇမေႃၼႆၶႃႈလႄႈ ယွၼ်းႁပ်ႉၶၢမ်ႇဢဝ်တၢင်းမူၼ်ႉမႄးယႂ်ႇၼမ်ယူႇၶႃႈ။
ယိၼ်းၸူမ်းဢၼ်လူဢၢၼ်ႇတေႃႇပေႃးသုတ်းၶႃႈ။
ပၢႆၵမ်−သႅၼ်ငဝ်း
21/07/2023
