တွၼ်ႈသီႇသိပ်းသၢမ်
သႅင်ၶမ်းၼၼ်ႉၵေႃႈ မိူဝ်ႈဢၼ်လႆႈႁၼ်ပပ်ႉမၢႆတွင်းယုမ်ႉလိူၼ်ၼၼ်ႉ ၸင်ႇၶုၵ်းၸႂ်လႆႈဝၼ်းဢၼ်ၶႃဢုပ်ႇၵၼ် လွင်ႈဢၼ်ဝႃႈ ပေႃးဝၼ်းၼိုင်ႈ ၶႃလႆႈၽၢတ်ႇယၢၼ်ၵၼ်ၵႂႃႇၼႆ သင်မီးလွင်ႈၶႂ်ႈလၢတ်ႈၼႄၵၼ်ၵေႃႈ ႁႂ်ႈမၢႆဝႆႉၼႂ်းပပ်ႉသေ တေလႆႈဢဝ်မႃးၼႄၵၼ်ၶိုၼ်းၼႆယူႇ။
မၼ်းၵေႃႈ လႆႈၽိုၼ်ႉပပ်ႉလိၵ်ႈဢၼ်ယုမ်ႉလိူၼ်တႅမ်ႈဝႆႉၼၼ်ႉၵႂႃႇယဝ်ႉ။
မၢႆဝၼ်း 21 July 2012 ဢေးယိင်း ၶႂၢင်းပၼ်ၵဝ်ၼႃႈ ၵဝ်ဢမ်ႇလႆႈတင်ႈၸႂ်လၢတ်ႈဢမ်ႇလီတေႃႇမႂ်း၊ ႁၼ်မႂ်းၸႂ်လမ်ယဝ်ႉ ၵဝ်ၵေႃႈၸႂ်ဢမ်ႇလီမိူၼ်ၵၼ်၊ ၶႂၢင်းပၼ်ၵဝ်ၼႃႈ လွင်ႈဢၼ်ၵဝ်လႆႈထူပ်းၼၼ်ႉ မၼ်းလၢတ်ႈၼႄမႂ်းဢမ်ႇလႆႈ၊ မၼ်းလီဢၢႆထိုင်တီႈ ဢမ်ႇႁတ်းႁူပ်ႉၼႃႈမႂ်းဢိူဝ်ႈ။ ၶႂၢင်းပၼ်ၵဝ်ၼႃႈ ၵဝ်ဝူၼ်ႉဝႃႈ ပေႃးႁဵတ်းဢမ်ႇလီတေႃႇမႂ်း မႂ်းတေဢွၵ်ႇႁၢင်ႇၵဝ်ၵႂႃႇ၊ တေၸင်းၵဝ်ၵႂႃႇပႅတ်ႈ၊ မိူဝ်ႈလႂ်မႂ်းၸင်းၵဝ် ၵဝ်ၵေႃႈတေလႆႈၽၢတ်ႇယၢၼ်မႂ်းၵႂႃႇ ႁႂ်ႈပေႃးလိုမ်းၸႂ်လႆႈဢိူဝ်ႈ။
ၵဝ်တေလႆႈႁဵတ်းႁိုဝ်လႃႇ၊ ၵဝ်တေပၢႆႈၵႂႃႇလီႁႃႉ၊ ၵဝ်တေၵႂႃႇယူႇတီႈလႂ်လီ၊ ၵဝ်ဢမ်ႇၶႂ်ႈယူႇႁိူၼ်းလင်ၼႆႉယဝ်ႉ၊ သင်ဢမ်ႇမီးဢူႈႁဝ်း ၵဝ်ၵေႃႈတေပၢႆႈၵႂႃႇၵႆၵႆယဝ်ႉဝႃႈ၊ သမ်ႉဝႃႈၵဝ်ၶႂ်ႈလၢတ်ႈၼႄမႂ်းယူႇၵေႃႈ ၶေႃႈၵႂၢမ်းတႃႇတေလၢတ်ႈဢွၵ်ႇသူပ်းၼၼ်ႉ မၼ်းႁဵတ်းႁႂ်ႈၵဝ်လၢတ်ႈဢမ်ႇလႆႈသေဢိတ်း၊ တေၸႂ်လမ်ၵဝ်ႁိုဝ် တေၸင်းၵဝ်ႁိုဝ် ၵဝ်ပၼ်ႁႂ်ႈမႂ်းႁဵတ်းလႆႈယူႇၼႃႈ။
မၢႆဝၼ်း 15 August 2012 လိုၼ်းသုတ်းမႂ်းၵေႃႈႁူႉႁႂ်ႈလႆႈ၊ သမ်ႉဝႃႈၵဝ်ယွမ်းၼွမ်းမႂ်းပဵၼ်လၢႆၵမ်းၵေႃႈ ဢမ်ႇႁဵတ်းႁႂ်ႈၵဝ်ဝူၼ်ႉၽိတ်းတေႃႇမႂ်းလႆႈ၊ ဢၼ်ၵဝ်တေလၢတ်ႈၼႄမႂ်းလႆႈၵေႃႈ ၶႂၢင်းပၼ်ၵဝ်ၼႃႈ၊ ၵူႈလွင်ႈဢၼ်ၵိူတ်ႇၶိုၼ်ႈပဵၼ်မႃးၼၼ်ႉ မၼ်းတိုၼ်းမီးတီႈသုတ်းသဵင်ႈဢိူဝ်ႈ၊ ၵႂၢမ်းလပ်ႉဢၼ်ဝႃႈၼၼ်ႉမၼ်းဢမ်ႇမီးတေႉလူး ပေႃးတေပွႆႇမၼ်းပဵၼ်ၵႂႃႇၸိူင်ႉၼႆတိၵ်းတိၵ်း ၸၢတ်ႈပၢၼ်ၵဝ်ၵေႃႈ တေပဵၼ်ၸိူင်ႉၼႆတိၵ်းတိၵ်းယဝ်ႉ၊ ၵဝ်ဝႃႈၵဝ်တေႁဵတ်းႁႂ်ႈမၼ်းသုတ်းသဵင်ႈၵႂႃႇလႆႈယဝ်ႉၼႃႈ။ လွင်ႈဢၼ်မႂ်းလၢတ်ႈမႃးၼၼ်ႉ ၵဝ်ယင်းတိုၵ်ႉတွင်းလႆႈယူႇ
“ပဵၼ်သင်လႄႈပေႉမႃးငိူဝ်ႈလႃႇ! ယွၼ်ႉၵူဝ်ပိူၼ်ႈတေတူၺ်းၸိူင်ႉႁိုဝ်ႁေ ယွမ်းပၼ်ႁႂ်ႈၶဝ် ပူၼ်ႉပႅၼ်တူဝ်ၸဝ်ႈၵဝ်ႇၸိူင်ႉၼႆလႆႈၸိူင်ႉႁိုဝ်?၊ ၵေႃႉဢၼ်ယၢပ်ႇၽိုတ်ႇၼၼ်ႉဢမ်ႇၸႂ်ႈပိူၼ်ႈၼႃ ပဵၼ်မႂ်းဢိူဝ်ႈ၊ မႂ်းၵူၺ်းဢိူဝ်ႈဢၼ်လႆႈၶၢမ်ႇ၊ ဢမ်ႇၸႂ်ႈပိူၼ်ႈ”
ၸႂ်ႈယဝ်ႉ ဢမ်ႇဝႃႈၵဝ်တေႁဵတ်းသင်ၵေႃႈ ၵေႃႉဢၼ်ယၢပ်ႇၽိုတ်ႇၼၼ်ႉ ပဵၼ်ၵဝ်မူတ်းမူတ်းၵူၺ်း၊ ၵဝ်ဝူၼ်ႉဝႃႈ ၵဝ်ထူပ်းတၢင်းဢွၵ်ႇဢၼ်လီလႄႈ ဢၼ်ႁဵတ်းႁႂ်ႈၵဝ်ပူၼ်ႉလွတ်ႈလွင်ႈတၢင်းတုၵ်ႉၼႆႉယဝ်ႉၼႃႈ။
ၵဝ်ဝူၼ်ႉဝႃႈ ၵဝ်ၵၢမ်ႇလီဢၼ်လႆႈၵိူတ်ႇမႃးမီးဢူႈမီးမႄႈ ဢၼ်လႆႈယူႇၸွမ်းၵၼ်ၼင်ႇဢုၼ်ႇၸႂ်၊ ၵူၺ်းၵႃႈ ဝၼ်းဢၼ်မႄႈၵဝ်သဵင်ႈၵႂႃႇၼၼ်ႉ ပဵၼ်ဝၼ်းဢၼ်ၵဝ်ႁူႉၸၵ်းလွင်ႈတၢင်းတုၵ်ႉမႃးလႄႈ ပွင်ႇၸႂ်မႂ်းမႃးယဝ်ႉ၊ ၵူၼ်းၵေႃႉလဵဝ် ဢၼ်ၵဝ်တေပိုင်ႈဢိင်လႆႈ သမ်ႉပဵၼ်ၵူၼ်းၵေႃႉဢၼ် ႁဵတ်းႁၢႆႉၵဝ်၊ ၵဝ်ဝႃႈ တႃႇတေသိုပ်ႇယူႇၵႂႃႇၼႆႉ ၵဝ်ဢမ်ႇမီးႁႅင်းသူႈယဝ်ႉၼႃႈ။ သမ်ႉဝႃႈ ၵဝ်မုင်ႈမွင်းႁႂ်ႈ ၶဝ်လုၵ်ႉတိုၼ်ႇၶိုၼ်ႈမႃး ဝၼ်းယဝ်ႉဝၼ်းၵေႃႈ ၵဝ်ဢမ်ႇႁၼ်တၢင်းယဝ်ႉ၊ သင်ဝႃႈ ၵဝ်ႁၢႆၵႂႃႇယဝ်ႉၼႆ ယူဝ်ၶဝ်တေၸၢင်ႈၶိုၼ်းလီမႃးမိူၼ်ၵဝ်ႇၵေႃႈပဵၼ်လႆႈ မၼ်းၵေႃႈပဵၼ်တၢင်းမုင်ႈမွင်း ဢၼ်ၵဝ်ဢမ်ႇႁၼ်လႆႈ ၼၼ်ႉယဝ်ႉ။
မၢႆဝၼ်း 18 August 2012 ယွမ်းၼွမ်းၼႃႈဢေးယိင်း လွင်ႈဢၼ်ၵဝ်တႅပ်းတတ်းၵႂႃႇၼၼ်ႉ ဢမ်ႇလႆႈလၢတ်ႈၼႄမႂ်း၊ တွၼ်ႈတႃႇမႂ်း သမ်ႉဝႃႈဢမ်ႇမီးၵဝ်ၵေႃႈ မႂ်းယင်းတိုၵ်ႉတေၸုၵ်းမၼ်ႈတူဝ်ၵဝ်ႇလႆႈယူႇ၊ ဢမ်ႇဝႃႈႁိုင်လၢႆပီႊ မႂ်းၵေႃႈယင်းတိုၵ်ႉပဵၼ်ၽူႈယိင်းဢၼ် ၵႅၼ်ႇၶႅင်လႄႈႁတ်းႁၢၼ်ယူႇတႃႇသေႇယဝ်ႉ၊ ၵူၺ်းၵႃႈ မိူဝ်ႈထူပ်းၵူၼ်းလီၵေႃႈ မေႃၶဝ်ႈႁႃဢုပ်ႇဢူဝ်းၶဝ်လႄႈ ယႃႇယူႇၵေႃႉလဵဝ်ၼႃႈ လွင်ႈတၢင်းငဝ်ၼၼ်ႉၵေႃႈ ၸၢင်ႈႁဵတ်းႁၢႆႉမႂ်းလႆႈဢိူဝ်ႈ။
မၢႆဝၼ်း 19 August 2012….
ပဵၼ်မၢင်ၸေႈပဝ်ႇဝႆႉယူႇ ယွၼ်ႉပိူဝ်ႈ ပဵၼ်ဝၼ်းဢၼ် ယုမ်ႉလိူၼ်လႆႈၽၢတ်ႇယၢၼ်ၵႂႃႇပႅတ်ႈၼၼ်ႉယဝ်ႉ။
သႅင်ၶမ်းဢၼ်လူဢၢၼ်ႇသုတ်းၵႂႃႇယဝ်ႉၼၼ်ႉ ၼမ်ႉတႃမၼ်းၸိုမ်ႉယမ်းဝႆႉသေ လၢတ်ႈၵႂႃႇႁင်းၵူၺ်းမၼ်း “ယင်းတိုၵ်ႉၸွမ်းပွင်ႉၵၼ်လႆႈယူႇ”။
ယၢမ်းႁူဝ်ၶမ်ႈၼၼ်ႉ ၽူၼ်ၵေႃႈသမ်ႉတူၵ်းသေ ၼႃႈၾႃႉၼႃႈမိူင်းၵေႃႈ ပေႃးလမ်ၽိုတ်းၽိုတ်းယဝ်ႉ၊ သႅင်ၶမ်းဢၼ်ၼွၼ်းလိုဝ်ႈယူႇၼၼ်ႉၵေႃႈ ၼင်ႇႁၢင်ႈၵွႆႈယူႇၵွႆႈၵတ်းလၢင်ႈမႃးတိၵ်းတိၵ်းလႄႈ၊ ႁႃၽႃႈႁူမ်ႈသွၼ်ႉသႂ်ႇသွၼ်ႉသႂ်ႇတိၵ်းတိၵ်းယူႇ၊ ဢုၼ်ႇမႃးယဝ်ႉၵေႃႈ ၸင်ႇလႆႈမွႆႈလပ်းၵႂႃႇယဝ်ႉ။ ၽိူဝ်ၶမ်းၼၼ်ႉမိူဝ်ႈႁူႉဝႃႈ သႅင်ၶမ်းဢမ်ႇႁုင်ၶဝ်ႈၽၵ်းၵိၼ်ႁင်းၵူၺ်းၼႆၵေႃႈ လႆႈတူမ်ႈႁုင်ၶဝ်ႈၽၵ်းမႃးပၼ်ယူႇ၊ မိူဝ်ႈႁွတ်ႈႁိူၼ်းၼၼ်ႉ တင်းၽူၼ်တူၵ်းလႄႈ သဵင်တွႆႇၽၵ်းတူၼၼ်ႉ လႅပ်ႈဢမ်ႇငိၼ်းၼႆၵေႃႈ လႆႈသိုပ်ႇၾူင်းႁႃယဝ်ႉ၊ သိုပ်ႇၵမ်းယဝ်ႉၵမ်းယူႇ သႅင်ၶမ်းဢၼ်လႆႈငိၼ်းဢမ်ႇလႆႈငိၼ်းလီၼၼ်ႉၵေႃႈ လွမ်လွမ်တၢဝ်းႁႃ ၼင်ႇတၢင်းယၢမ်ႈမၼ်းၼၼ်ႉသေ ႁပ်ႉၵႂႃႇယဝ်ႉ။
“မႂ်ႇသုင်ၶႃႈ!..”
“ႁဝ်းဢိူဝ်ႈ ၽိူဝ်ၶမ်း မိူဝ်ႈလဵဝ်မႃးမီးယူႇတီႈၼႃႈႁိူၼ်းသူၼႆႉယဝ်ႉၶႃႈ”
သႅင်ၶမ်းၼၼ်ႉၵေႃႈ ၸွမ်းၼင်ႇႁႅင်းမီးၼၼ်ႉ ၵၢၼ်ႉၵူၵ်ႉၵၢၼ်ႉၵၢၵ်ႉလူင်ၵႂႃႇၽုၺ်ႇၽၵ်းတူယူႇ။ ၽိူဝ်ၶမ်းၵေႃႈ မိူဝ်ႈဢၼ်လႆႈႁၼ် သီၼႃႈသႅင်ၶမ်း ဢမ်ႇပေႃးလီၵႃႈႁိုဝ်လႄႈ
“သူဢမ်ႇယူႇလီၶႃႈႁႃႉ” မိုဝ်းမၼ်းၼၼ်ႉၵေႃႈ ယိုၼ်ႈၵမ်းထိုင်ၼႃႈၽၢၵ်ႇသႅင်ၶမ်းၼၼ်ႉၵမ်းလဵဝ်ယူႇ။
“ၼိူဝ်ႉမႆႈတေႉယဝ်ႉ..ၵိၼ်ယႃယူႇႁႃႉၼႆႉ”
သႅင်ၶမ်းၵေႃႈ ၶွၼ်းႁူဝ်ၼႄၵႂႃႇၵူၺ်း၊ ၽိူဝ်ၶမ်းၼၼ်ႉၵေႃႈ ၸွႆႈႁွင်းဢဝ်သႅင်ၶမ်းၵႂႃႇလိုဝ်ႈသေယဝ်ႉ၊ ဢဝ်ၶဝ်ႈၽၵ်းဢၼ်မၼ်းႁႅၼ်းမႃးပၼ်ၼၼ်ႉ ႁႂ်ႈသႅင်ၶမ်းၵိၼ်သေ ၵိၼ်ယႃၼွၼ်းလိုဝ်ႈႁိူဝ်ႉၵႂႃႇယူႇ၊ ၽွင်းဢၼ်သႅင်ၶမ်းၼွၼ်းလပ်းယဵၼ်ၵႂႃႇယဝ်ႉၼၼ်ႉၵေႃႈ မၼ်းတႄႉႁိုဝ်တေပႃႈမိူဝ်း ပႂ်ႉတူၺ်းလုမ်းလႃးတင်းၶိုၼ်းယဝ်ႉ၊ ၵၢင်ၼႂ်ယဝ်ႉ သႅင်ၶမ်းၵေႃႈမိူၼ်တေၸိုၼ်ႈၶႅၼ်းမႃးယူႇဢိတ်ႉၼိုင်ႈ၊ ၽိူဝ်ၶမ်းၵေႃႈ ႁႂ်ႈသႅင်ၶမ်းၵိၼ်ၶဝ်ႈၵိၼ်သင်သေ သိုပ်ႇလိုဝ်ႈႁိူဝ်ႉၼွၼ်းၵႂႃႇထႅင်ႈယူႇ။
ၽွင်းဢၼ်သႅင်ၶမ်းဢမ်ႇယူႇလီၼၼ်ႉ ၽိူဝ်ၶမ်းၼၼ်ႉတႄႉၵေႃႈ လုမ်းလႃးတူၺ်းထိုင်၊ ၸဵမ်ၶဝ်ႈၸဵမ်ၼမ်ႉၸဵမ်ယႃ ဢမ်ႇပၼ်လုတ်ႈသေတႃႇၼၼ်ႉယဝ်ႉ။ ႁိုင်ယူႇ သီႇဝၼ်းၼႆႉ သႅင်ၶမ်းၵေႃႈ ၸိုၼ်ႈၶႅၼ်းမႃးၶိုၼ်းယဝ်ႉလႄႈ ၽိူဝ်ၶမ်းၼၼ်ႉၵေႃႈ ယင်းတိုၵ်ႉႁဵတ်းၶဝ်ႈၽၵ်းမႃးပၼ်ယူႇ။
သႅင်ၶမ်းမိူဝ်ႈဢၼ်ၶႅၼ်းလီယဝ်ႉၼႆၵေႃႈ လႆႈၵႂႃႇႁဵတ်းၵၢၼ်မၼ်းၶိုၼ်းသေ၊ မိူဝ်ႈဢွၵ်ႇႁိူၼ်းမႃးၼၼ်ႉ ႁူပ်ႉၺႃးၽိူဝ်ၶမ်းလီလီ
“မႂ်ႇသုင်ၵၢင်ၼႂ်ၶႃႈ.. တေၵႂႃႇႁဵတ်းၵၢၼ်ယဝ်ႉႁႃႉ”
“ဢေႃႈ..မႂ်ႇသုင်မိူၼ်ၵၼ်ၶႃႈ ၸူဝ်ႈဢမ်ႇယူႇလီၼႆႉထၢင်ႇတႄႉဢၼ်လူဝ်ႇႁဵတ်း မီးပဵၼ်ၵွင်လူင်ယဝ်ႉၶႃႈဢေႃႈ”
“ႁဝ်းႁဵတ်းၶဝ်ႈမႃးပၼ်..”
ဢဝ်ၵွင်ႇၶဝ်ႈမၼ်းယိုၼ်ႈၸူး သႅင်ၶမ်းၵေႃႈ ႁပ်ႉဢဝ်သေ
“ယိၼ်းၸူမ်းယဝ်ႉၶႃႈ..တေၵိၼ်ႁႂ်ႈဝၢၼ်ၶႃႈၼႃ”
“ၵႂႃႇႁဵတ်းၵၢၼ်ၵေႃႈ လုမ်းလႃးတူၺ်းထိုင်ပၢႆးယူႇလီၽွင်ႈၶႃႈလႄႈၼႃႈ၊ ႁွႆးၸဵပ်းၵေႃႈယင်းပႆႇၶႅၼ်း တေၵိၼ်သင်ၵေႃႈၾၢင်ႉဢိတ်ႉၼိုင်ႈၶႃႈၼႃ”
“ယိၼ်းၸူမ်းယဝ်ႉၶႃႈ ” ယုမ်ႉၸူးၼင်ႇတဵမ်ၸႂ်ၵႂႃႇယူႇ။
သွင်ၶႃၵေႃႈ ၽၢတ်ႇၽႄၵၼ်ၵႂႃႇႁဵတ်းၵၢၼ်ႁင်းၽႂ်မၼ်းယူႇယဝ်ႉ။
ၼႂ်းၽွင်းၶၢဝ်းဢၼ်လႆႈၸႂ်ႉၶၢဝ်းယၢမ်းၸွမ်းၵၼ်မႃးယူႇလၢႆဝၼ်း မိူၼ်ၼင်ႇဝႃႈလွင်ႈၸမ်ၸႂ်ၶႃၼၼ်ႉၵေႃႈ တိူဝ်းၶိုၼ်ႈမႃးထႅင်ႈယူႇ၊ ၽိူဝ်ၶမ်းၼၼ်ႉၵေႃႈ ၼင်ႇႁိုဝ်တေလႆႈလၢတ်ႈတေႃႇသႅင်ၶမ်းၼၼ်ႉတႄႉ ႁႃၶေႃႈဢၢင်ႈ ထၢမ်ထိုင်ပၢႆးယူႇလီသေ ဢုပ်ႇၵႂႃႇဢုပ်ႇမႃး မၢင်ပွၵ်ႈၵႂၢမ်းပေႃးယၢဝ်း ယူႇယဝ်ႉ။
ၸွမ်ၶိူဝ်းဢၼ်လိုဝ်ႈတီႈႁိူၼ်းၽိူဝ်ၶမ်းၼၼ်ႉ ယူႇၵႂႃႇယူႇမႃး သမ်ႉပေႃးမီးဝူင်ႈပၢႆပၢႆယဝ်ႉ။ မိူဝ်ႈဢၼ်ဝူၼ်ႉ တေမိူဝ်းႁိူၼ်းၼၼ်ႉ ၸင်ႇၵပ်းသိုပ်ႇသႅင်ၶမ်းသေ မႃးပႂ်ႉယူႇတီႈႁဵတ်းၵၢၼ်သႅင်ၶမ်းၼၼ်ႉယဝ်ႉ။
“မႃးႁဵတ်းသင်တီႈၼႆႈလႃႇ!!..”
ၶႅၼ်မၼ်းၼၼ်ႉၵေႃႈ မႃးၵွင်ႉႁွႆႈမႃႇသႅင်ၶမ်းၵႂႃႇ ၼင်ႇမိုတ်ႈၵၼ်ၼႃႇၼၼ်ႉယဝ်ႉ။
“ၸႂ်ထိုင်လႄႈမႃးၵူၺ်းဢိူဝ်ႈ!! ၸၢင်ႈတေမႃးႁဵတ်းသင်လႃႇ.. လုၵ်ႉၼွၵ်ႈမိူင်းႁေႁိပ်ႈၼႅတ်ႈမႃးႁႃမႂ်းၵမ်းလဵဝ်ဢိူဝ်ႈၼႆႉ”
သႅင်ၶမ်းၵေႃႈဢဝ်မိုဝ်းမၼ်းဢွၵ်ႇၵႂႃႇပႅတ်ႈယဝ်ႉ “ယႃႇမႃးႁႃလႅၼ်ၵၼ်ယူႇ..ၼူၼ်းမူဝ်လၢတ်ႈမႃးဝႃႈ ပီႈမႃးႁွတ်ႈၸဵမ်မိူဝ်ႈဝူင်ႈပူၼ်ႉပုၼ်ႉဢမ်ႇၸႂ်ႈႁိုဝ်လႃႇ!..ၸမ်မိူဝ်းၶိုၼ်းလႄႈမႃးဝႄႉၵူၺ်းဢိူဝ်ႈလေႃႇ..”
“သမ်ႉဝႃႈၵေႃႉဢွၼ်တၢင်းသုတ်း..ဢၼ်ၵဝ်ထူပ်းၼၼ်ႉ ဢမ်ႇၸႂ်ႈမႂ်းၵေႃႈ ၵေႃႉလိုၼ်းသုတ်းၼၼ်ႉ တိုၼ်းပဵၼ်မႂ်းတႃႇသေႇဢိူဝ်ႈ..”
“တေမိူဝ်းၵေႃႈမိူဝ်းလႃႈ မႃးႁႃလၢတ်ႈၵႂၢမ်းၼမ်ယူႇ”
သွင်ၶႃၵေႃႈ လႆႈၼင်ႈဢုပ်ႇၵၼ်ယူႇတီႈ လၢၼ်ႉ Cafe ႁိမ်းႁွမ်းၸိူဝ်းၼၼ်ႉယဝ်ႉ။
“ပွၵ်ႈၼႆႉ တေၵႂႃႇၶိုၼ်းယူႇႁႃႉ!!” သႅင်ၶမ်းထၢမ်။
“ဢမ်ႇၵႂႃႇယဝ်ႉ..ပွၵ်ႈၼႆႉ ဢၢၼ်းမႃးယူႇတေႉတေႉဢိူဝ်ႈ.. မႂ်းလူးၽွမ်ႉယဝ်ႉႁႃႉ”
“ၽွမ်ႉလွင်ႈသင်လႃႇ..လၢတ်ႈႁႂ်ႈမၼ်းၸႅင်ႈလႅင်းဢိၼ်ႉလႄႈ”
“ၽွမ်ႉတေႇၼႃႈႁိူၼ်းၸွမ်းၵဝ်ၼၼ်ႉၼႃႇ.. ၵဝ်ဝႃႈၵဝ်ၽွမ်ႉတႃႇတေသၢင်ႈၼႃႈႁိူၼ်းၸွမ်းမႂ်းယဝ်ႉလႄႈ တေဢမ်ႇဢၢၼ်းၵႂႃႇယဝ်ႉ”
“ႁႃးႁႃး..ႁႃး..” ဢဝ်သႅင်ၶမ်းသမ်ႉပေႃးၶူဝ်လင်ဢွၵ်ႇမႃးယဝ်ႉ “ၶႃႈလၢတ်ႈယူႇႁႃႉဝႃႈ တေတေႇၼႃႈႁိူၼ်းၸွမ်းပီႈ..ယႃႇဝူၼ်ႉႁင်းၵူၺ်းၼႃႇလႄႈ”
“ၵူၼ်းၸိူင်ႉၼင်ႇၵဝ်ၼႆႉ ပိူၼ်ႈႁိမ်ၵၼ်ယွၼ်ႉမၼ်းပေႃးတၢၼ်ႇႁင် ပဵၼ်သင်လႄႈမႂ်းဢမ်ႇၶႂ်ႈလႆႈလႃႇ ဢမ်ႇၵူဝ်တိူဝ်ႉၸႂ်ဝၢႆးလင်ႁႃႉ၊ ၵဝ်ပႂ်ႉလႆႈယူႇၼႃႈ မိူဝ်ႈလႂ်ၵေႃႈၵဝ်ပႂ်ႉလႆႈယူႇၵူၺ်း”
“ပႂ်ႉၵႂႃႇတေႃႇၸူဝ်ႈလႃႈပေႃးၼႆ…”
“မႂ်းၵေႃႈတေယူႇပဵၼ်ၵူၼ်းလွတ်ႈလႅဝ်းၵႂႃႇတေႃႇၸူဝ်ႈၵႃႈပေႃးၼႆ”
“ပဵၼ်ၸိူင်ႉႁိုဝ်ၵေႃႈ ၶႃႈဢမ်ႇဢဝ်ပီႈ လႄႈ တိုၼ်းတေဢမ်ႇဢဝ်ပီႈၼၼ်ႉယဝ်ႉ”
“ၸွင်ႇယၢမ်ႈငိၼ်းႁႃႉ ပိူၼ်ႈဝႃႈဢမ်ႇၶႂ်ႈလႆႈဢၼ်လႂ် တိုၼ်းတေလႆႈဢၼ်ၼၼ်ႉၼႆဝႃႇ”
သႅင်ၶမ်းၵေႃႈယုမ်ႉၸူးသေ
“ၵူၺ်းၵႃႈ ဢၼ်လႂ်ၶႃႈဢမ်ႇၶႂ်ႈလႆႈ ၶႃႈတေဢဝ်ပႅတ်ႈႁႂ်ႈမၼ်းၵႆၵႆၼၼ်ႉယဝ်ႉ”
လုၵ်ႉဢွၵ်ႇၵႂႃႇပႅတ်ႈၸွမ်ၶိူဝ်းၼၼ်ႉယူႇ၊
“ထဵင်ႁၢႆႉတေႉယဝ်ႉ.. ၼႆႉယဝ်ႉဢၼ်ႁဵတ်းႁႂ်ႈၸၼ်ၸႂ်” ၸွမ်ၶိူဝ်းၵေႃႈ ယုမ်ႉယူႇၸုတ်းၵုတ်းႁင်းမၼ်းသေယဝ်ႉ ၸင်ႇသိုပ်ႇၽူင်းၸူး ၽိူဝ်ၶမ်းသေ
“ဢၢႆႈၵေႃႉ! ယွၼ်းႁဵတ်းၶႅၵ်ႇထႅင်ႈၼႃႈ”
“ၸိုင်ဝႃႈသွင်သၢမ်ဝၼ်းၵူၺ်းလႃႇ မိူဝ်ႈလဵဝ်ပေႃးမီးၸမ် သွင်ဝူင်ႈယဝ်ႉယူဝ်ႉၼႆႉ”
“ၵဝ်မီးၵၢၼ်ဢၼ်တေလႆႈႁဵတ်းဢိူဝ်ႈ!!”
“ယင်းဢမ်ႇႁၼ်ႁဵတ်းၵၢၼ်သင် လိူဝ်သေၵိၼ်ႁေလႄႇႁေ ပွၵ်ႈၼႆႉၵေႃႈလွင်ႈၽူႈယိင်းထႅင်ႈၵူၺ်းယူဝ်ႉ၊ ပေႃးဢမ်ႇႁွင်ႉပိူၼ်ႈၶဝ်ႈႁိူၼ်းၵေႃႈ လႆႈယူႇၵူၺ်း”
“ၸူမ်းယဝ်ႉၼႃႈဢၢႆႈၵေႃႉ မႂ်းၼႆႉႁူႉၸႂ်ၵဝ်လိူဝ်ပိူၼ်ႈတေႉဢေႉ”
ယၢမ်းႁူဝ်ၶမ်ႈ သႅင်ၶမ်းၼၼ်ႉၵေႃႈ ႁွင်ႉလဵင်ႉၶဝ်ႈၽိူဝ်ၶမ်းၵႂႃႇတီႈလၢၼ်ႉလၢၼ်ႉၼိုင်ႈယူႇ။
“ဢမ်ႇထၢင်ႇဝႃႈသူတေၸဵဝ်းႁွင်ႉလဵင်ႉၶဝ်ႈႁဝ်း ဝႆးတၢၼ်ႇၼႆႉၼႃ”
“ႁဝ်းဢမ်ႇပေႃးလႆႈၸႂ်ထုၵ်ႇၼီႈၽႂ်ၶႃႈ.. မိူဝ်ႈလႂ်မိူဝ်ႈလႆႈလၢတ်ႈဝႆႉယဝ်ႉၵေႃႈ ၵႃႈတေလႆႈႁဵတ်းၸွမ်းယဝ်ႉ… ၵူဝ်ဢမ်ႇမီးၶၢဝ်းယၢမ်းႁေလိုမ်းပႅတ်ႈၶဢေႃႈ”
“သူလိုမ်းၵေႃႈ ႁဝ်းဢမ်ႇလိုမ်းၶႃႈ ပေႃးဝႃႈသူလိုမ်းႁဝ်းၵေႃႉတေတူၵ်ႇၵူၺ်း”
ယၢမ်းၼၼ်ႉ ၼိူဝ်ၽိူၼ်ၶဝ်ၼၼ်ႉၵေႃႈ ပိူၼ်ႈၸင်ႇဢဝ်ၶဝ်ႈၽၵ်းဢၼ်သင်ႇဝႆႉၼၼ်ႉ မႃးတမ်းပၼ်ၵႂႃႇယူႇ။ သွင်ၶႃၵေႃႈ တင်းၵိၼ်တင်းဢုပ်ႇၵၼ်ယဝ်ႉ။ ၽိူဝ်ၶမ်းၵေႃႈ လႆႈထၢမ်ထိုင် လွင်ႈယူႇလီသႅင်ၶမ်းသေ
“ပဵၼ်ၸိူင်ႉႁိုဝ်မႃးၶႃႈ..ၸွင်ႇတိုၵ်ႉၸဵပ်းယူႇၶႃႈႁိုဝ်”
“ဢမ်ႇၸဵပ်းယဝ်ႉၶႃႈ..”
သွင်ၶႃၵေႃႈယဵၼ်လူင်ၵႂႃႇသေ ၵူၺ်းမီးသဵင်ၸေႃႉသဵင်ဝၢၼ်ႇတွႆႇၵၼ်ၵူၺ်း၊ ၵိၼ်ၵႂႃႇလွႆးလွႆးယဝ်ႉ၊ မိူၼ်တေဢိမ်ႇၵၼ်မႃးယဝ်ႉလႄႈ သႅင်ၶမ်းၼၼ်ႉၵေႃႈ ယၵ်ႉတူၺ်းၸူးၽိူဝ်ၶမ်းၵႂႃႇယဝ်ႉ။
“ယိၼ်းၸူမ်းသူတေႉယဝ်ႉၶႃႈ… ဢၼ်ၸွႆႈတူၺ်းထိုင်ႁဝ်း မိူဝ်ႈဢမ်ႇယူႇလီ ၸဵမ်မိူဝ်ႈဝၼ်းၼၼ်ႉ ႁဝ်းၵေႃႈဢမ်ႇပႆႇတၼ်းလႆႈလၢတ်ႈ ၶေႃႈၵႂၢမ်းယိၼ်းၸူမ်းတီႈသူ..”
“ႁၼ်သူယူႇလီၸိူင်ႉၼႆၵူၺ်းၵေႃႈ သိူဝ်းၸႂ်ယဝ်ႉၶႃႈ…”
သႅင်ၶမ်းၵေႃႈဢဝ်တင်းယုမ်ႉမၼ်း တွပ်ႇၸူးၵႂႃႇၵူၺ်း၊ ၽိူဝ်ၶမ်းၼၼ်ႉၵေႃႈ မိုင်ယၵ်ႉတူၺ်းသႅင်ၶမ်းၵႂႃႇတင်းႁိုင် ထိုင်တီႈၸဝ်ႈတူဝ်မၼ်းပေႃးလႆႈထၢမ်ၸူး။
“တူၺ်းသင်ယူႇၶႃႈ!..တၢင်းလင်ႁဝ်းမီးသၢဝ်ႁၢင်ႈလီဝႆႉၶႃႈႁႃႉ” သႅင်ၶမ်းၼၼ်ႉၵေႃႈ ၼင်ႇႁိုဝ်တေဢမ်ႇမႃး ယွၼ်ႈထိုင်မၼ်းၼၼ်ႉ ၶတ်းၸႂ်လၢတ်ႈဢွၵ်ႇပူၼ်ႉၶွပ်ႇၵႂႃႇယူႇ။
ၽိူဝ်ၶမ်းၼၼ်ႉၵေႃႈငႅၼ်ႈၸူးသေယဝ်ႉ သၢႆတႃပၵ်းတူၺ်းသႅင်ၶမ်းႁေ
“ၸႂ်ႈဢေႃႈ..ႁဝ်းတူၺ်းသၢဝ်ႁၢင်ႈလီဝႆႉယူႇၶႃႈ ၵူၺ်းဢမ်ႇမီးတၢင်းလင်သူ ပဵၼ်ၵေႃႉဢၼ်မီးယူႇတၢင်းၼႃႈႁဝ်းၼႆႉယဝ်ႉ”
သႅင်ၶမ်းၵေႃႈၵိူင်းဢွၵ်ႇတူဝ်မၼ်းပႅတ်ႈ ႁႂ်ႈႁၼ်ၽူႈယိင်းဢၼ်ယူႇပႃႈလင်မၼ်းၼၼ်ႉ တေႃႇၼႃႈတင်းၽိူဝ်ၶမ်းၼၼ်ႉလႄႈ ဝိၼ်ႇတူၺ်းၵႂႃႇၸွမ်းႁေယဝ်ႉ။
“ၸႂ်ႈယဝ်ႉၶႃႈ ၶဝ်ႁၢင်ႈလီတေႉၶႃႈလူး..”
ၽိူဝ်ၶမ်းၵေႃႈဢမ်ႇသူၼ်ၸႂ်သင်ယဝ်ႉ လၢတ်ႈၵႂႃႇၸွမ်းၼင်ႇသဵင်ႁူဝ်ၸႂ်မၼ်းၼၼ်ႉသေ
“ႁဝ်းလႆႈၸႂ်သူဢေႃႈ..” ဢဝ်သႅင်ၶမ်းၵိုတ်းမိုင်လူင်ၵႂႃႇ သမ်ႉပေႃးဢမ်ႇၸၢင်ႈလၢတ်ႈၵႂၢမ်းလႆႈ ၼၼ်ႉယဝ်ႉ။
တွၼ်ႈသီႇသိပ်းသၢမ်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇသိပ်းသီႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
