တွၼ်ႈသၢဝ်းပႅတ်ႇ
တၢင်းႁၵ်ႉၽွင်းၶိုၼ်ႈႁဵၼ်းၼၼ်ႉ… ၶူးၶဝ်၊ ၵူၼ်းလူင်ၶဝ် တေၵႆႉၵႆႉဢွၼ်ၵၼ်လၢတ်ႈယူႇတႃႇသေႇဝႃႈ ယႃႇပေဝႆႉၸူႉဝႆႉၸူဝ်းမိူဝ်ႈၶိုၼ်ႈႁဵၼ်း၊ ပဵၼ်လုၵ်ႈႁဵၼ်းၵေႃႈ ထုၵ်ႇလီၶတ်းၸႂ်ႁဵၼ်းလိၵ်ႈဢိူဝ်ႈၼႆ။ ၵူၺ်းၵႃႈ တၢင်းႁၵ်ႉဢၼ်ဝႃႈၼၼ်ႉ မၼ်းႁၢမ်ႈၵၼ်ဢမ်ႇလႆႈလႄႈ တေႃႈၼင်ႇလုၵ်ႈဢွၼ်ႇလဵၵ်ႉလဵၵ်ႉၵူၺ်း ယင်းမီးၸူႉယူႇ။ ဢၼ်ပဵၼ်ၵူၼ်းၼုမ်ႇသၢဝ် တႄႇႁႃၶိုၼ်ႈႁၢတ်ႈႁၢႆးမႃးၼၼ်ႉလူး တေႁၢမ်ႈလႆႈယူႇႁႃႉ သမ်ႉပဵၼ်ပၢၼ်ဢၼ်ၶႂ်ႈႁဵတ်းၶႂ်ႈၸၢမ်းထႅင်ႈႁေ ယိုင်ႈပိူၼ်ႈႁၢမ်ႈ ယိုင်ႈၶႂ်ႈႁဵတ်းလူးၵွၼ်ႇယဝ်ႉ။ သမ်ႉဝႃႈပၵ်းပိူင်ႁၢမ်ႈႁၵ်ႉၵၼ်ၼႂ်းႁူင်းႁဵၼ်းၼၼ်ႉ တေမီးပဵၼ်ပၢၵ်ႇပဵၼ်ႁဵင်ၵေႃႈ ယင်းတေဢမ်ႇၵူဝ်တၢၼ်ႇ ၵူၼ်းၵေႃႉၼၼ်ႉဢမ်ႇႁၵ်ႉလူးၵွၼ်ႇႁိုဝ်။
ယွၼ်ႉသင်လႄႈဢမ်ႇလီဝႆႉၸူႉမိူဝ်ႈၶိုၼ်ႈႁဵၼ်း၊ ဝႆႉၸူႉယဝ်ႉမၼ်းပဵၼ်သင်ၼႆ ၵူၼ်းၵမ်ႈၼမ်ၵေႃႈတေဝူၼ်ႉလႆႈႁေလၢတ်ႈၵူၺ်း ယင်းဢမ်ႇတွၼ်ႉလၢတ်ႈၼႄလွင်ႈၼႄတၢင်းမၼ်း ယွၼ်ႉသင်ၼႆလူးၵွၼ်ႇ။ ၵေႃႉဢၼ်ႁၢမ်ႈတႄႉႁၢမ်ႈယဝ်ႉ ၵေႃႉဢၼ်ဢမ်ႇႁူႉလွင်ႈႁူႉတၢင်းမၼ်းၼၼ်ႉၵေႃႈ ပေႃးမၼ်းၶႂ်ႈႁဵတ်းၵေႃႈတိုၼ်းတေႁဵတ်းယူႇဢမ်ႇႁၢင်ႉ။
ဝႆႉၸူႉဢၼ်ဝႃႈၼၼ်ႉမၼ်းဢမ်ႇလီၸိူင်ႉႁိုဝ် ယွၼ်ႉသင်လႄႈႁၢမ်ႈလႃႇ မိူဝ်ႈမီးၸူႉမီးၸူဝ်းမႃးၼၼ်ႉသမ်ႉ ၸွင်ႇသမ်ႉသူၼ်ၸႂ်ၵၢၼ်ႁဵၼ်းယူႇယဝ်ႉႁိုဝ်၊ မိူဝ်ႈမီးတၢင်းႁၵ်ႉမႃးၵေႃႈ တၢင်းမဝ်းၵေႃႈၸၢင်ႈၸပ်းၸွႆးၸွမ်းယူႇ။ ၵမ်ႈၽွင်ႈမီးၵေႃႉႁၵ်ႉၼႆၵေႃႈ မေႃၸွႆႈမေႃထႅမ်ၵၼ် မေႃၸုင်ၸၼ်ၵၼ်ႁႂ်ႈလီမႃးယဝ်ႉ။ ၵူၺ်းၵႃႈၵမ်ႈၽွင်ႈၵေႃႈ ႁၵ်ႉၵၼ်ၼႃႇပူၼ်ႉလူၼ်ႉလိူဝ်၊ ႁႅင်းႁၵ်ႉၼၼ်ႉၶႂ်ႈဢုပ်ႉပိူင်ႇဝႆႉႁင်းၵူၺ်းလႄႈ မေႃၶႅၼ်ႁႄႉသီး၊ ႁဵတ်းသင်ၵေႃႈ ယူႇၸမ်ၵၼ်ဢမ်ႇၽၢတ်ႇ၊ ပေႃးႁၼ်ၶဝ်ၵႂႃႇယူႇႁိမ်းၽႂ်ၵေႃႈ ႁၼ်ယဝ်ႉၸႂ်ဢမ်ႇၵတ်းယဵၼ်၊ ဢဝ်ပဵၼ်တၢင်းမႆႈၸႂ်မႆႈၶေႃး တႅၼ်းတီႈတေမႃးသူၼ်ၸႂ်လိၵ်ႈသူၼ်ၸႂ်လၢႆး၊ ၸႂ်သမ်ႉၵႂႃႇသူၼ်ၸႂ်ၸူႉႁဝ်းၼၼ်ႉၵူၺ်းယဝ်ႉ။ မိူဝ်ႈႁၵ်ႉၵၼ်ၵေႃႈလီ မိူဝ်ႈမီးပၼ်ႁႃၵၼ်မႃးၵေႃႈသမ်ႉၶီ၊ ဢမ်ႇပဵၼ်ၵိၼ်ပဵၼ်ယႅမ်ႉ၊ ၸႂ်ၵေႃႈဢမ်ႇသိူဝ်း ဢမ်ႇမီးသမ်ႇမထိ၊ ၸႂ်ဢမ်ႇပၵ်းၸပ်းၸွမ်းၵၢၼ်ႁဵၼ်းယဝ်ႉ ၵမ်ႈၽွင်ႈဢမ်ႇပဵၼ်ၵိၼ်ပဵၼ်ၼွၼ်းၵွပ်ႈမၼ်းလူးၵွၼ်ႇ။ ယွၼ်ႉၼၼ်လႄႈ ပိူၼ်ႈၸင်ႇဝႃႈႁၢမ်ႈဝႆႉၸူႉမိူဝ်ႈၽွင်းႁဵၼ်းၼႆ ၼၼ်ႉယဝ်ႉ။
တၢင်းႁၵ်ႉႁၢမ်ႈဢမ်ႇလႆႈ တေႁၵ်ႉၽႂ်ႁၵ်ႉၵေႃႉလႂ်ၵေႃႈ မၼ်းလႅၵ်ႈလၢႆႈယူႇတႃႇသေႇ ယဝ်ႉ။ ၵွပ်ႈၼၼ်လႄႈ မိူဝ်ႈၽွင်းႁဵၼ်းၵေႃႈ ထုၵ်ႇလီပၵ်းၸႂ်ၵၢၼ်ႁဵၼ်းႁဝ်းႁႂ်ႈလီ ၸၢတ်ႈပၢၼ်ၼၼ်ႉ မၼ်းၵေႃႈမီးသႅၼ်းလႂ်ပၢၼ်ၼၼ်ႉမႃးယူႇ၊ ပၢၼ်ႁဵၼ်းၵေႃႈႁဵၼ်း၊ ပၢၼ်ႁဵတ်းၵၢၼ်ၵေႃႈတေမႃး ပၢၼ်မီးၵေႃႉၵူႈၼႆၵေႃႈတေထိုင်ယူႇ၊ ၵေႃႉဢၼ်ႁဝ်းၵူဝ်ဢမ်ႇလႆႈၼၼ်ႉၵေႃႈ မိူဝ်ႈထိုင်ၶၢဝ်းယၢမ်းမႃး မၼ်းၵေႃႈတေမႃးႁႃႁဝ်းလႄႈ မိူဝ်ႈမၼ်းဢမ်ႇထိူၵ်ႈႁဝ်းၵေႃႈ တေဢွၵ်ႇၵႂႃႇပႅတ်ႈၼႆ ပဵၼ်သၽႃႇဝမၼ်းၵူၺ်း။
တီႈၼႂ်းႁူင်းႁဵၼ်း မိူဝ်ႈပိူၼ်ႈပူတ်းထႅဝ်သေ တေပွၵ်ႈမိူဝ်းႁိူၼ်းၵၼ်ၼၼ်ႉ ၶူးလူင်ၼႆၵေႃႈဢွၵ်ႇမႃးလၢတ်ႈ
“မိူဝ်ႈၶမ်ႈပွႆးဢွၵ်ႇဝႃႇၼၼ်ႉ မီးလုၵ်ႈႁဵၼ်းၶဝ်ဢွၼ်ၵၼ်လၵ်ႉလႄႇ ပဵၼ်ၵူႈပဵၼ်တွႆးယဝ်ႉ သမ်ႉဝႃႈၶူးဢမ်ႇႁၼ်ၵေႃႈ ႁူႉယူႇဝႃႈပဵၼ်ၽႂ် မီးသၢႆၶၢဝ်ႇၶူးဝႆႉတင်းၼမ် ဢၼ်သူင်ႇမႃးပၼ်၊ ၼင်ႇႁိုဝ်တၢမ်ႇၼၵ်းတေမဝ် ၼၼ်ႉ ထုၵ်ႇလီဢွၵ်ႇမႃးႁင်းၵူၺ်းယူႇ၊ ပေႃးၺႃးၶူးႁွင်ႉၼႆ ယုမ်ႇဝႃႈတေၺႃးပဵၼ်သွင်ပုၼ်ႈယဝ်ႉ”
လုၵ်ႈႁဵၼ်းၶဝ်ၵေႃႈ ဢမ်ႇႁၼ်မီးၽႂ်ႁတ်းဢွၵ်ႇမႃးယွမ်းႁပ်ႉႁေၵေႃႉယဝ်ႉ၊ ယၢမ်းၼၼ်ႉ ၶူးပိုၼ်ၵေႃႈ ယိပ်းဢဝ်ၽိုၼ်ၸေႈမၼ်းၼၼ်ႉပၼ်ၵႂႃႇတီႈ ၶူးလူင်ယဝ်ႉ။ မိူဝ်ႈႁၼ်ၸိူင်ႉၼၼ် လုၵ်ႈႁဵၼ်းဢၼ် ၶိၼ်းၵၼ် လၵ်ႉၵႂႃႇလႄႇပွႆးၸွမ်းၵၼ် ၸိူဝ်းၼၼ်ႉၵေႃႈ ၼႅတ်ႈဢွၵ်ႇၵႂႃႇပဵၼ်ၽုင်ပဵၼ်ၽုင်ဝႆႉယူႇ။ လိူၵ်ႈလိူၵ်ႈၼႂ်းၼၼ်ႉသမ်ႉပႃးလႅင်းမိူင်း ဢူၺ်းၵေႃႉဢၢႆႈၸၢႆးႁဝ်းၼၼ်ႉၵေႃႉၼိုင်ႈ၊ ႁူမ်ႈပႃးယိင်းၶမ်း ဢၼ်ယူႇႁွင်ႈႁဝ်း ဢမ်ႇသူပ်းဢမ်ႇသဵင်ႁေပွၵ်ႈၼၼ်ႉ လႆႈဢွၵ်ႇၵႂႃႇၸုၵ်းယူႇႁိမ်းၵၼ်ယဝ်ႉ။ ထႅင်ႈၵူႈၼိုင်ႈဢၼ်ဢမ်ႇလွတ်ႈလႆႈၼၼ်ႉတႄႉ သၢႆပိူင်းလႄႈၽွင်းလႅင်း ၼၼ်ႉယဝ်ႉ။ ပိူၼ်ႈႁွင်ႉဢွၵ်ႇမိူဝ်ႈလႂ်ၵေႃႈတိုၼ်းပႃးၶႃသေႇသေႇ ၺႃးၶွၼ်ႉတၢၼ်ႇႁိုဝ်ၵေႃႈ ဢမ်ႇတွၼ်ႉႁဵတ်းႁႂ်ႈတၢင်းႁၵ်ႉသွင်ၶႃၼၼ်ႉ ၽၢတ်ႇယၢၼ်ၵၼ်လႆႈလႃႈ၊ တေႃႈၼင်ႇယူႇၼႂ်းႁွင်ႈႁဵၼ်းၵူၺ်း တူဝ်ၸပ်းၵၼ်ယူႇတႃႇသေႇ ဢမ်ႇၵူဝ်ၽႂ်တေမႃးႁၼ်ႁိုဝ် ဢမ်ႇၵူဝ်ၽႂ်တေမႃးႁူႉ၊ တေဝႃႈႁိုဝ်ၵေႃႈပိူၼ်ႈႁူႉတင်းႁူင်းႁဵၼ်းယဝ်ႉၵဝ်ႇလႂ် ၶူးလၢတ်ႈၵေႃႈဢမ်ႇလႆႈလူး တွၼ်းႁေၺႃးတၢမ်ႇၵေႃႈဢမ်ႇလၢပ်ႇ ၼၼ်ႉယဝ်ႉ။
သမ်ႉဝႃႈဢၼ်ဢွၵ်ႇၵႂႃႇၼၼ်ႉမီးၼမ်ယဝ်ႉသေတႃႉ ဢၼ်ဢမ်ႇဢွၵ်ႇမၼ်းၵေႃႈ ယင်းတိုၵ်ႉၵိုတ်းတင်းၼမ်ၼၼ်ႉယဝ်ႉ၊ မိူၼ်ၼင်ႇႁူဝ်ၼႃႈလုၵ်ႈႁဵၼ်းႁဝ်း သႅင်ၶိူဝ်း၊ ၸၢႆးသိူဝ်၊ ဢၢႆႈၸၢႆးႁဝ်းၼၼ်ႉ ယင်းၵႂႃႇလႄႇၸွမ်းသၢဝ်ၶဝ်ယူႇလႃႇ။ တွၼ်းႁေဝႃႈၽႂ်လႅတ်းၵေႃႈမၼ်းလွတ်ႈၼၼ်ႉၼႃႇ လွင်ႈၸိူင်ႉၼႆတႄႉ။ ၶူးၶဝ်ၵေႃႈ ႁွင်ႉၵိုတ်းဝႆႉသေ ပွႆႇႁႂ်ႈလုၵ်ႈႁဵၼ်းဢၼ်ဢမ်ႇၵဵဝ်ႇၶွင်ႈၼၼ်ႉ မိူဝ်းၵႂႃႇမူတ်းမူတ်းယဝ်ႉ။
ပေႃးပဵၼ်ၶူးလူင်ပၼ်တၢမ်ႇတႄႉ သင်ဢမ်ႇသင်ၵေႃႈ တေပဵၼ်ၶွၼ်ႉၵူၺ်း၊ ပေႃးမိူဝ်ႈၽုၵ်ႈၶိုၼ်ႈႁူင်းႁဵၼ်းၵေႃႈ တေငိၼ်းသဵင်ၶဝ်ပွင်ႉၵၼ်ဢွၵ်ႇမႃးယူႇ။
……………………………………
ၼူၼ်းမူဝ်ဢၼ်ႁူႉဝႃႈ မိူဝ်ႈၼၼ်ႉသႅင်ၶိူဝ်းမီးၸူႉယဝ်ႉၼႆၵေႃႈ ၼႃႈသမ်ႉပေႃးဢမ်ႇၵီႈမႃးၵမ်းလဵဝ်ယဝ်ႉ။ တေပွႆႇၵႂႃႇၵေႃႈသမ်ႉၶႂ်ႈႁူႉယူႇ ႁူႉၵႂႃႇယဝ်ႉၵေႃႈဢမ်ႇလႆႈလွင်ႈသင်မႃး၊ မၼ်းၵေႃႈပဵၼ်လွင်ႈပူၼ်ႉၵႂႃႇယဝ်ႉ၊ ဝူၼ်ႉၸိူင်ႉႁိုဝ်ၵေႃႈ သမ်ႉဢမ်ႇၵတ်းယဵၼ်ၸႂ်လႆႈမိူဝ်ႈပႆႇလႆႈႁူႉ၊ ပေႃးတေထၢမ်သႅင်ၶိူဝ်းသမ်ႉဢမ်ႇပေႃးလီလႄႈ ဢၼ်ႁူႉလီလိူဝ်ပိူၼ်ႈၼၼ်ႉၵေႃႈ ၵႃႈတေလႆႈပဵၼ်သႅင်ၶမ်း ယူႇယဝ်ႉ။
သဵင်ၾူင်းလင်မေႃးမႃးၼႂ်းထူင် သႅင်ၶမ်းၵေႃႈႁပ်ႉသေ “ဝႃႈႁိုဝ်လႃႇဢေးၼူၼ်း! လူသုတ်းပပ်ႉယဝ်ႉၸွင်ႇၸႂ်ႈ!”
ၼူၼ်းမူဝ်ၼၼ်ႉၵေႃႈပိၵ်ႉပပ်ႉၼၼ်ႉၵႂႃႇသေယဝ်ႉ “ ဢိုမ်ႈ! သုတ်းယဝ်ႉ ပဵၼ်သင်လႄႈသုတ်းၵႂႃႇတီႈၼၼ်ႈၵူၺ်းလႃႇ”
သႅင်ၶမ်းၼၼ်ႉၵေႃႈယုမ်ႉၶိတ်ႈသေယဝ်ႉ “ ၸေႈမၼ်းဢမ်ႇပေႃးတႅမ်ႈယဝ်ႉၼႃႇ ၸၢင်ႈႁဵတ်းႁိုဝ်၊ ဢၼ်လူသုတ်းယဝ်ႉၼႆႉ တူၺ်းသီၼႃႈသူတႄႉ ဢမ်ႇၶႂ်ႈႁူႉလွင်ႈႁဝ်းတၢၼ်ႇလွင်ႈသႅင်ၶိူဝ်းၵွၼ်ႇယူဝ်ႉ”
“ဢိုမ်ႈ! ၶဝ်ပဵၼ်ၽႂ်လႃႇ မိူဝ်ႈၼၼ်ႉႁဝ်းယင်းထၢင်ႇဝႃႈ ၶဝ်ဢမ်ႇမီးၸူႉလူးၵွၼ်ႇ”
“လၢတ်ႈယဝ်ႉ..ယႃႇပေၶႂ်ႈလူၼႆ ပဵၼ်ႁိုဝ်လႃႇၵမ်းၼႆႉ”
“ဢမ်ႇဢၢၼ်းလၢတ်ႈၼႄၵၼ်ၸွင်ႇၸႂ်ႈႁိုဝ်! ႁၼ်သူမၼ်ႈဢူၵ်းမၼ်ႈၸႂ်တၢၼ်ႇၼႆႉ ယင်းၵိုတ်းထႅင်ႈယူႇဢမ်ႇၸႂ်ႈႁႃႉ”
“သူတေၶႂ်ႈႁူႉႁဵတ်းသင်လႃႇ မၼ်းပဵၼ်လွင်ႈဝၼ်းလင်ၵႂႃႇယဝ်ႉလူး ယဝ်ႉၵေႃႈ ၶဝ်ၵေႃႈပဵၼ်ၵေႃႉႁၵ်ႉသူ ၸဝ်ႈၽူဝ်မၢႆသူယူႇယဝ်ႉ တေၵႂႃႇသူၼ်ၸႂ်ႁဵတ်းသင်ထႅင်ႈ၊ သမ်ႉဝႃႈၶဝ်တေမီးၸူႉပဵၼ်ၽႂ်ၵေႃႈ သူယင်းယဵၼ်ႉၸႂ်သေ ပႂ်ႉၶဝ်မႃးလႆႈထိုင်ဝၼ်းမိူဝ်ႈၼႆႉဢမ်ႇၸႂ်ႈႁိုဝ်”
“ၸႂ်ႈယူႇၵူၺ်း! ဢမ်ႇၶႂ်ႈႁူႉလွင်ႈၶဝ်ယဝ်ႉၵေႃႈလႆႈ ၵူၺ်းၵႃႈ လွင်ႈသူၼၼ်ႉတႄႉတေဢမ်ႇလွတ်ႈႁဝ်းႁူႉၼႃ”
ဝၼ်းယဝ်ႉဝၼ်းပူၼ်ႉၵႂႃႇ ပၢင်ၶႅၵ်ႇၼူၼ်းမူဝ်ၶဝ်ၵေႃႈၸမ်ထိုင်မႃးတိၵ်းတိၵ်းယဝ်ႉ၊ ၵူၺ်းၵႃႈ သႅင်ၶမ်းၼၼ်ႉတႄႉ ဢမ်ႇပေႃးတိုၼ်ႇတဵၼ်ႈၸွမ်းသင်ႁေၵႃႈႁိုဝ် ၵုမ်ႇမိုင်ႉႁဵတ်းၵၢၼ်မၼ်း ၸဝ်ႉတေႃႇၶမ်ႈ၊ ၵႂႃႇတၢင်းၼိုင်ႈမိူဝ်းတၢင်းၼိုင်ႈ၊ ႁဵတ်းၼၼ်ယူႇၵူႈဝၼ်းၵူႈဝၼ်း မၢင်ပွၵ်ႈၶၢဝ်းယၢမ်းၵိၼ်ၶဝ်ႈပေႃးဢမ်ႇတၼ်း ဝၼ်းလိုဝ်ႈၵေႃႈယင်းဢမ်ႇလႆႈလိုဝ်ႈလူးၵွၼ်ႇ။
ယၢမ်းၵၢင်ၼႂ်လႃႈတၢၼ်ႇတၢၼ်ႇၼၼ်ႉ သဵင်ႁိင်ႇၽၵ်းတူလင်မေႃးမႃး မႅၼ်ႈၽွင်းဢၼ်သႅင်ၶမ်းတိုၵ်ႉၼွၼ်းဝၢၼ်ယူႇလႄႈ ဢမ်ႇၶႂ်ႈလုၵ်ႉၵေႃႈ သဵင်မၼ်းသမ်ႉလင်ဢမ်ႇၵိုတ်းဢမ်ႇလိုဝ်ႈ ၵႃႈလႆႈလုၵ်ႉၵႂႃႇယဝ်ႉ။ ၼႃႈဢမ်ႇၵီႈတႃဢမ်ႇမိုၼ်းလီလီသေ
“မီးလွင်ႈသင်ၶႃႈ!”
“ဢေးယိင်းၶၢဝ်းၼႆႉတိုၵ်ႉၼွၼ်းယူႇႁႃႉၼႆႉ ၶမ်ႈဝႃးႁဝ်းလၢတ်ႈဝႃႈ မိူဝ်ႈၼႆႉတေမႃးႁွင်ႉၵႂႃႇတူၺ်းၶူဝ်းၼႆ”
“ဢေႃဢိူဝ်ႈ! ၵၢၼ်ၼမ်ႁေလိုမ်းၵႂႃႇယဝ်ႉ တေႃႈၼင်ႇၼွၼ်းၵူၺ်း ႁဝ်းယင်းလိုမ်းလူးၵွၼ်ႇဢိူဝ်ႈ ၸင်ႇႁႃလႆႈၼွၼ်းမိူဝ်ႈၵႆႈၼႆႉၵူၺ်း”
တႃတႄႉဢမ်ႇမိုၼ်း သူပ်းတႄႉလၢတ်ႈပေႃးဢမ်ႇလိုဝ်ႈ၊ ၼူၼ်းမူဝ်ၼၼ်ႉၵေႃႈ ၶဝ်ႈမိူဝ်းဢဝ်သိူဝ်ႈသွၼ်ႉမၼ်းမႃးႁူမ်ႇပၼ်ယဝ်ႉ လၢၵ်ႈဢဝ်မၼ်းၶိုၼ်ႈလူတ်ႉၵႂႃႇသေ ႁႂ်ႈသႅင်ၶိူဝ်းဢိုတ်းၽၵ်းတူပၼ်ယဝ်ႉ ဢွၼ်ၵၼ်မုင်ႈၼႃႈၵႂႃႇၸူးတီႈလၢၼ်ႉၶူဝ်းၵမ်းလဵဝ်။ သႅင်ၶမ်းၼၼ်ႉတႄႉ ၼွၼ်းလူင်ၵႂႃႇ ပေႃးဢမ်ႇႁူႉတူဝ်ဝႃႈ ပိူၼ်ႈဢဝ်မၼ်းၵႂႃႇတၢင်းလႂ်လူးၵွၼ်ႇ။ ႁွတ်ႈထိုင်ယဝ်ႉၵေႃႈ ၼူၼ်းမူဝ်လႆႈၸၼ်မၼ်းလုၵ်ႉၵႂႃႇယူႇ၊ ၽၢင်ႁၢင်ႈမၼ်းၼၼ်ႉတႄႉ ပေႃးတၢၼ်ႇၵူၼ်းမဝ်းလဝ်ႈယဝ်ႉ၊ တေဝႃႈႁိုဝ်ၵေႃႈ ၸင်ႇႁႃလႆႈၼွၼ်းမိူဝ်ႈမိူင်းလႅင်းၼၼ်ႉၵူၺ်းလႄႇ ဢဝ်ဝၢင်းတီႈလႂ်ၵေႃႈ ၼွၼ်းၵႂႃႇတီႈၼၼ်ႈၵူၺ်း၊ ၸဝ်ႈလၢၼ်ႉသမ်ႉပေႃးလႆႈႁႂ်ႈမၼ်းၵႂႃႇၼွၼ်းယူႇတီႈလိုဝ်ႈႁိူဝ်ႉၶဝ် ၼၼ်ႉယဝ်ႉ။
ဢမ်ႇႁိုင်ဢမ်ႇၼၢၼ်း ၽူႈၸၢႆးလဝ်းၸႂ်ၼမ် ဢၼ်သႅင်ၶမ်းႁၼ်မိူဝ်ႈဝၼ်းပူၼ်ႉၼၼ်ႉၵေႃႈ လႆႈၶဝ်ႈလၢၼ်ႉမႃးထႅင်ႈယူႇ။ မိူဝ်ႈႁၼ်သႅင်ၶိူဝ်းၶႃယဝ်ႉၵေႃႈ
“ပီႈဢၢႆႈပီႈလူဝ်းႁဝ်းၶဝ်! မႃးႁွတ်ႈၵၼ်ႁိုင်ယဝ်ႉႁႃႉ!” သၢႆတႃမၼ်းၼၼ်ႉတႄႉ မိူၼ်လွမ်ႁႃၽႂ်သေၵေႃႉၵေႃႉယူႇ။
“ၽိူဝ်ၶမ်းၵေႃႈႁွတ်ႈထိုင်ယဝ်ႉႁႃႉ တိုၵ်ႉဢၢင်ႈၸႂ်ႉပီႈဢၢႆႈသူသိုပ်ႇၾူင်းတူၺ်းယူႇ”
“ဢမ်ႇလူဝ်ႇသိုပ်ႇယဝ်ႉၶႃႈ! ယဝ်ႉဢူၺ်းၵေႃႉၸဝ်ႈသၢဝ်ၶႃႈလူး”
“ဢၼ်ၶတ်းၸႂ်မႃးၼႆႉ..ယွၼ်ႉၼႆႉၵူၺ်းယူဝ်ႉ!” သႅင်ၶိူဝ်းလၢတ်ႈၸူးမၼ်းၵႂႃႇ။
“ၶႃႈတင်ႈၸႂ်ပႅတ်ႈၵၢၼ်ပႅတ်ႈငၢၼ်းၶႃႈသေ မႃးၶႃႈဢေႃႈၼႆႉ ပၢင်ၶႅၵ်ႇပီႈဢၢႆႈၶႃႈပဵၼ်ၵေႃႉ ၶႃႈၵေႃႈထုၵ်ႇလီႁဵတ်းႁႂ်ႈတဵမ်တီႈဢမ်ႇၸႂ်ႈႁိုဝ်!”
ၶဝ်သၢမ်ၵေႃႉတႄႉၵေႃႈ ဢွၼ်ၵၼ်ၼုင်ႈတူၺ်းၶူဝ်းၽႂ်ၶူဝ်းမၼ်း ၼင်ႇႁၢင်ႈလီႁၢင်ႈငၢမ်းၵၼ်ၵႂႃႇယဝ်ႉ။ သႅင်ၶမ်းၼၼ်ႉၵေႃႈ ၼွၼ်းႁိုင်ယူႇတၢၼ်ႇတၢၼ်ႇ သဵင်ၾူင်းမေႃးမႃးလႄႈ ၽႅတ်းတိုၼ်ႇၵမ်းလဵဝ်သေ ၶုၼ်ႇလုၵ်ႉၵႂႃႇယူႇ။ မိူဝ်ႈႁပ်ႉၵႂႃႇယဝ်ႉၵေႃႈ
“သႅင်ၶမ်းမိူဝ်ႈလဵဝ်ႁဝ်းမႃးမီးတၢင်းၼွၵ်ႈယဝ်ႉ! ပေႃးယဝ်ႉၵေႃႈႁႂ်ႈၽိူဝ်ၶမ်းမိူဝ်းသူင်ႇလႄႈၼႃႈ”
မိူဝ်ႈႁပ်ႉၽူင်းယဝ်ႉၵေႃႈ တႃၼွၼ်းၼၼ်ႉ ၸိုၼ်ႈမႃးၵမ်းလဵဝ်၊ ၼူၼ်းမူဝ်ႁူႉလီလိူဝ်ပိူၼ်ႈဝႃႈ တႃႇပူၵ်းႁႂ်ႈတႃၼွၼ်းသႅင်ၶမ်းၸိုၼ်ႈၼၼ်ႉ သဵင်ႁွင်ႉၵူၼ်းတႄႉၵႃႈၶႂ်ႈႁွင်ႉယဝ်ႉ ပေႃးပဵၼ်သဵင်ၾူင်းၼႆတႄႉ မၼ်းတိုၼ်းႁပ်ႉသေႇသေႇ၊ ၵမ်ႈၼမ်ၵေႃႈတေၵႆႉမီးၵူၼ်းၵပ်းသိုပ်ႇၵပ်းသၢၼ် ၸွမ်းၼႃႈၵၢၼ်မၼ်း ၼၼ်ႉယဝ်ႉ။
ၼႂ်းလၢၼ်ႉၼၼ်ႉတႄႉ လိူဝ်သေၸဝ်ႈလၢၼ်ႉယဝ်ႉ ထႅင်ႈၽူႈၸၢႆးၸႂ်ၼမ်ဢၼ်မၼ်းႁၼ်ၼၼ်ႉတႄႉ ယင်းဢမ်ႇမီးၽႂ်။ ဢမ်ႇႁူႉဝႃႈ ၼူၼ်းမူဝ်ၼၼ်ႉၶႂ်ႈဝႃႈပဵၼ်ၵေႃႉလႂ် မၼ်းၵေႃႈႁႂ်ႈၸဝ်ႈလၢၼ်ႉ ဢဝ်ၶူဝ်းၼၼ်ႉမႃးပၼ်မၼ်းသႂ်ႇသေ သႂ်ႇတူၺ်းယဝ်ႉ ထုၵ်ႇမႅၼ်ႈတင်း တူဝ်ၵူမ်လဝ်းသေး ဢမ်ႇယႂ်ႇပူၼ်ႉလဵၵ်ႉႁႅင်း ႁၼ်ဢူၵ်းပဵၼ်ဢူၵ်း ၵုမ်ႇပဵၼ်ၵုမ်ႇ လီယၵ်ႉလီယဵမ်ႈတႃၼႃႇ ၽူႈယိင်းတႆးသႂ်ႇၶူဝ်းတႆးၼႆ တိုၼ်းႁၢင်ႈလီယူႇသေႇသေႇ။ သမ်ႉဝႃႈဢမ်ႇလႆႈႁၢင်ႈၶိူင်ႈႁၢင်ႈၾၢင်သင်ၵေႃႈယဝ်ႉ တၢင်းႁၢင်ႈလီမၼ်းၼၼ်ႉတႄႉ သွင်ႇႁိူဝ်ႈပိူင်းထွင်ႇပၼ်သၢႆတႃ ၽိူဝ်ၶမ်းပေႃးမိူၼ်ႇမိုင်လူင်တူၺ်းယူႇ။ တေဝႃႈႁိုဝ်ၵေႃႈ ၸဝ်ႈလၢၼ်ႉသမ်ႉပေႃးဢၢမ်းမိူၼ်ၵၼ်ယဝ်ႉ။ မၼ်းတႄႉၵေႃႈသႂ်ႇတူၺ်းထုၵ်ႇယဝ်ႉၼႆၵေႃႈ လၢႆႈၶူဝ်းမၼ်းသေ ထၢမ်ၸဝ်ႈလၢၼ်ႉၵႂႃႇ
“တီႈၼႆႈၸွင်ႇမီးၵူၼ်းၸိုဝ်ႈႁွင်ႉၽိူဝ်ၶမ်းၶႃႈႁႃႉ!”
ၸဝ်ႈလၢၼ်ႉၵေႃႈၸီႉၵႂႃႇတီႈဢၼ်မီးၽူႈၸၢႆးၵေႃႉလဵဝ် ၼင်ႈပႂ်ႉယူႇၼၼ်ႉလႄႈ မၼ်းၼၼ်ႉၵေႃႈ ၶဝ်ႈၵႂႃႇၸူးသေယဝ်ႉ။
“သူၸိုဝ်ႈႁွင်ႉၽိူဝ်ၶမ်းၶႃႈႁႃႉ”
ၽိူဝ်ၶမ်းၼၼ်ႉၵေႃႈ သၢႆတႃပၵ်းၸူးမၼ်းယဝ်ႉ ယုမ်ႉလၢတ်ႈဢုပ်ႇၸူးၵႂႃႇ
“ၸႂ်ႈယဝ်ႉၶႃႈ!”
“သူပဵၼ်ၽႂ်လႃႇ! ပဵၼ်သင်လႄႈၼူၼ်းမူဝ်တေလႆႈႁႂ်ႈႁဝ်းၵႂႃႇၸွမ်းသူ! ႁူႉၸၵ်းၵၼ်ႁႃႉ”
“မွၵ်ႈၼၼ်ႉယဝ်ႉ! ၵႂႃႇၵၼ်လႆႈယဝ်ႉၸွင်ႇၸႂ်ႈ”
“ဢိုမ်ႈ! ၵႂႃႇၵေႃႈၵႂႃႇလႄႈ”
ၸဝ်ႈလၢၼ်ႉၼၼ်ႉၵေႃႈဢဝ်ၶူဝ်းၼၼ်ႉ ယိုၼ်ႈပၼ်ၵႂႃႇတီႈၽိူဝ်ၶမ်းၼၼ်ႉ ယူႇယဝ်ႉ။
ၸွမ်းၼင်ႇဢၼ်သႅင်ၶမ်းၵႆႉလႆႈႁၼ် ၽိူဝ်ၶမ်းၼႃႇ လိူဝ်သေ လွင်ႈဢမ်ႇသၢင်ႇထုၵ်ႇၼၼ်ႉလႄႈ သမ်ႉပဵၼ်ၵူၼ်းႁူႉၸၵ်းၵၼ်တင်း ၼူၼ်းမူဝ်ၼႆၵေႃႈ မၼ်းမိူၼ်ဝႃႈၶဝ်တင်ႈၸႂ် ၸိူင်ႉႁိုဝ်ဝႆႉၵေႃႈဢမ်ႇႁူႉယဝ်ႉ။ တေဝႃႈတင်ႈၸႂ်ၶဝ်ႈႁႃမၼ်းသမ်ႉ ပႃးၽူႈယိင်းၼၼ်ႉယဝ်ႉ ႁဵတ်းႁႂ်ႈမၼ်းလၢမ်းယၢပ်ႇ၊ မၼ်းၶႂ်ႈၶဝ်ႈႁႃႁႃႉ ဢမ်ႇၼၼ်ၵေႃႈ ဢမ်ႇလႆႈတင်ႈၸႂ်တေႉတေႉႁႃႉ။
“ႁဵတ်းႁိုဝ်ႁူႉၸၵ်းၵၼ်တင်းၼူၼ်းမူဝ်ၶႃႈလႃႇ!”
“ၶဝ်ပဵၼ်ပီႈလူဝ်းႁဝ်း!”
“ၶႂ်ႈဝႃႈႁူႉၸၵ်းၵၼ်ႁိုင်ယဝ်ႉၶႃႈယူဝ်ႉပေႃးၼႆတႄႉ”
“ဢိုမ်ႈ! ၵူၺ်းၵႃႈၸင်ႇႁႃလႆႈႁူပ်ႉၶဝ်မိူဝ်ႈမႃးတႅၵ်ႈၶူဝ်း တီႈၼႂ်းလၢၼ်ႉၼႆႉၵူၺ်းၼင်ႇၵဝ်ႇ”
သႅင်ၶမ်းၼၼ်ႉၵေႃႈ လွမ်ဝူၼ်ႉယူႇၼႂ်းၸႂ် “ၶႂ်ႈဝႃႈဝၼ်းၼၼ်ႉ တေပဵၼ်လွင်ႈဢမ်ႇသၢင်ႇထုၵ်ႇၵူၺ်း” ဢမ်ႇဝႆႉၸႂ်သင်သေယဝ်ႉ။
“ဢေႃႈ! ယိၼ်းၸူမ်းလႆႈႁူႉၸၵ်းၵၼ်ၶႃႈ ”
ဢဝ်တီႈၵပ်းသိုပ်ႇမၼ်းၼၼ်ႉ ယိုၼ်ႈပၼ်တီႈ ၽိူဝ်ၶမ်းၼၼ်ႉသေ
“ႁဝ်းပဵၼ်ၽူႈတၢင်ၼႃႈၶႃႈဢေႃႈ! ၵမ်ႈၼမ်ၵေႃႈ တေၸွႆႈၵႄႈၶႆပၼ်ႁႃၵူၼ်းၸိူဝ်းဢၼ် ဢမ်ႇမီးသုၼ်ႇလႆႈၸိူဝ်းၼႆႉ၊ လွင်ႈပၼ်ႁႃၼႃႈႁိူၼ်းၸိူဝ်းၼႆႉတႄႉၵေႃႈ တေဢမ်ႇႁပ်ႉႁဵတ်းၼင်ႇၵဝ်ႇ ၵူၺ်းၵႃႈ ပေႃးဝႃႈပဵၼ်သူတႄႉ တေတူၺ်းတူၺ်းႁေၸွႆႈယူႇၶႃႈၼႃ ႁၼ်ဝႃႈပဵၼ်ဢူၺ်းၵေႃႉၵၼ်တင်းပီႈဢၢႆႈႁဝ်း”
ၽိူဝ်ၶမ်းၼၼ်ႉၵေႃႈသူင်ႇသႅင်ၶမ်းႁွတ်ႈထိုင်တီႈၼႃႈႁိူၼ်းၵႂႃႇယူႇ။ သႅင်ၶမ်း လူင်းလူတ်ႉယဝ်ႉ။
“ယိၼ်းၸူမ်းယဝ်ႉၶႃႈ ၸွႆႈမႃးသူင်ႇ!”
“ဢမ်ႇႁွင်ႉၵၼ်ၶဝ်ႈႁိူၼ်းသေဢိတ်ႉၼိုင်ႈႁႃႉ!”
“ဢေႃႈ! မိူၼ်ဝႃႈႁိူၼ်းႁဝ်းၼၼ်ႉ ဢမ်ႇပႆႇမီးတီႈႁပ်ႉၶႅၵ်ႇၵူၺ်းၶႃႈဢေႃႈ”
“ႁဵတ်းလႆႈတီႈၵၼ်တေႉယဝ်ႉၶႃႈ ပေႃးတေလၢတ်ႈသိုဝ်ႈၸိူင်ႉၼႆ ဢမ်ႇလၢတ်ႈၼၼ်ႉတေလီလိူဝ်ၶႃႈယဝ်ႉ ပေႃးၼၼ် မိူဝ်းၵွၼ်ႇယဝ်ႉၼႃႈ”
တွၼ်ႈသၢဝ်းပႅတ်ႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢဝ်းၵဝ်ႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
