တွၼ်ႈသၢဝ်းၸဵတ်း
မၢၵ်ႉလိၵ်ႈၼၼ်ႉ သမ်ႉဝႃႈဢမ်ႇလႆႈတႅပ်းတတ်းပၼ် ၵႃႈၶၼ်ၵူၼ်းလႆႈၵေႃႈ၊ ၵူၺ်းၵႃႈ ၵမ်ႈၽွင်ႈသမ်ႉဢမ်ႇလႆႈဝူၼ်ႉၸိူင်ႉၼၼ်၊ တေႁၼ်မၼ်းလမ်ႇလွင်ႈ ပဵၼ်သရေႇၼႃႈတႃ တွၼ်ႈတႃႇတူဝ်ၵဝ်ႇ တႃႇၼႂ်းတူင်ႇဝူင်းမႃးယဝ်ႉ။ ဢမ်ႇဝႃႈတေပဵၼ်ဢူႈမႄႈၸိူဝ်းၼႆႉ ပေႃးလုၵ်ႈလႆႈမၢၵ်ႉလိၵ်ႈၼမ်ၼႆၵေႃႈ ၵူဝ်ဢမ်ႇလႆႈဢဝ်ၵႂႃႇၶႆႈလၢတ်ႈၼႄပိူၼ်ႈ၊ ယွင်ႈၼႄပိူၼ်ႈ၊ ႁႂ်ႈပိူၼ်ႈဢၢမ်းလုၵ်ႈၶဝ်ၵတ်ႉၶႅၼ်ႇၵႃႈႁိုဝ်၊ မီးၼမ်ႉၵတ်ႉတၢၼ်ႇႁိုဝ် ပေႃးလုၵ်ႈၶႅၼ်ႇၵေႃႈ ၼင်ႇဝႃႈပၼ်ၼႃႈပၼ်တႃဢူႈမႄႈမႃး ၼၼ်ႉယူႇ။
ထိုင်ဝၼ်းၶိုၼ်ႈႁူင်းႁဵၼ်းမႃးယဝ်ႉ ၶူးၶဝ်ၵေႃႈ ပိုၼ်ၽၢဝ်ႇမၢၵ်ႉလိၵ်ႈပၼ်ႁဝ်းလုၵ်ႈႁဵၼ်းသေ ၶႃႈၼၼ်ႉတႄႉၵေႃႈ ဢမ်ႇလႆႈဝႃႈႁၢင်ႈႁၢႆႉၼင်ႇၵဝ်ႇ တေႃႉတႄႉပူၼ်ႉၵႂႃႇယူႇၵူႈဢၼ် ဢၼ်လႆႈၼမ်တႄႉဢမ်ႇမီး၊ ဝၼ်းလၢဝ်ဢၼ်ၸုၵ်းယူႇႁိမ်းၶႃႈၼၼ်ႉၵေႃႈ လႆႈႁၼ်မၢၵ်ႉလိၵ်ႈမၼ်းသေယဝ်ႉ ဢဝ်ၼမ်ႉတႃၸိုမ်ႉယမ်းလူင်မႃးၵမ်းလဵဝ်သေ ဢႅၼ်ႇလႅၼ်ႈဢွၵ်ႇတီႈၵူၼ်းမူႇတူၺ်းမၢၵ်ႉလိၵ်ႈၸိူဝ်းၼၼ်ႉ ၵႂႃႇတၢင်းလင်ႁူင်းႁဵၼ်းပုၼ်ႉယဝ်ႉ။ ၶႃႈၵေႃႈၶႂ်ႈႁူႉယူႇဝႃႈမၼ်းႁႆႈႁဵတ်းသင်ၼႆ တီႈတေႉၵေႃႈမၼ်းလႆႈပဵၼ်ထီႉသၢမ်ၵမ်းလဵဝ် မၼ်းတေၸူမ်းထိုင်တီႈပေႃးႁႆႈၵႂႃႈထၢင်ႇ၊ ၶႃႈၵေႃႈယင်းဢမ်ႇထၢင်ႇဝႃႈ မၼ်းတေလႆႈပဵၼ်ထီႉသၢမ်ၵွၼ်ႇယဝ်ႉ ႁၼ်လဵၼ်ႈၵေႃႉၵၼ်တင်းဢၢႆႈဢွင်ႇ ဢၼ်ဢမ်ႇႁၼ်သူၼ်ၸႂ်လိၵ်ႈသူၼ်ၸႂ်လၢႆးသင် ၸိူင်ႉၼၼ်ၼၼ်ႉ။
မိူဝ်ႈႁၼ်ဝၼ်းလၢဝ်လႆႈၸိူင်ႉၼၼ်ၵေႃႈ ၶႃႈႁိုဝ်လိုမ်းတူၺ်း မၢၵ်ႉလိၵ်ႈဢၢႆႈဢွင်ႇၼၼ်ႉလႃႇ တေဝႃႈႁိုဝ် မၼ်းၼၼ်ႉ ဢွင်ႇၵူႈၽႃႇသႃႇယဝ်ႉ၊ ႁူမ်ႈပႃးၽႃႇသႃႇဢိင်းၵလဵတ်ႈ ဢၼ်သူင်ႇၶေႃႈတွပ်ႇပဝ်ႇပၼ်ၶိုၼ်းၼၼ်ႉ ပိူၼ်ႈပၼ်ပၢၵ်ႇၼိုင်ႈ မၼ်းလႆႈပဵၼ်ၸဵတ်းသိပ်းၵမ်းလဵဝ်ၼေႈ။
ယၢမ်းၼၼ်ႉသႂ်လႅင်းၵေႃႈမႃးတူၺ်းၸွမ်းႁေ
“ၼူၼ်းမူဝ်လႆႈထီႉၼိုင်ႈထႅင်ႈယဝ်ႉ!.. မၼ်းပေႉဢဝ်သင်မႃးတွပ်ႇလႃႇ လႆႈထီႉၼိုင်ႈယူႇတႃႇသေႇၼႆႉ၊ ပေႃးဢမ်ႇပၼ်ပိူၼ်ႈႁိမ်မၼ်းလႆႈတေႉလူင်.. တူၺ်းသႅင်ဢွင်ႇတႄႉ တေလႅပ်ႈၸႂ်လမ်ယဝ်ႉၵႂႃႈ၊ ဝၼ်းလၢဝ်ၵေႃႈတေၵႂႃႇႁွင်ႉႁႆႈသေတီႈတီႈယဝ်ႉ”
ၶႃႈဢၼ်လႆႈငိၼ်းမၼ်းလၢတ်ႈၼၼ်ႉၵေႃႈ တေဢမ်ႇထၢမ်သမ်ႉၶႂ်ႈႁူႉဝႆႉလႄႈ
“ပဵၼ်သင်လႄႈၶဝ်တေလႆႈပဵၼ်ၸိူင်ႉၼၼ်လႃႇ!”
မၼ်းၼၼ်ႉၵေႃႈၸၼ်ၶႃႈဢွၵ်ႇတီႈမူႇၽုင်ၵူၼ်းၼၼ်ႉသေလႄႈ
“မၼ်းႁိုဝ်ၵႂႃႇၸႂ်ႈၼႄႇ သႅင်ဢွင်ႇၼၼ်ႉ သူဢမ်ႇႁၼ်ႁႃႉ ၶဝ်တင်ႈၸႂ်ႁဵၼ်းၵႃႈႁိုဝ်ၼႆ ဝူၼ်ႉဝႃႈၶဝ်ၶႂ်ႈလႆႈထီႉသွင်ထီႉသၢမ်ၵူၺ်းၵေႃႈဢမ်ႇၸႂ်ႈ ၶဝ်ဢမ်ႇလႆႈထီႉၼိုင်ႈလႄႈ ပဵၼ်ၼၼ်ယဝ်ႉ”
“ထိုင်တၢၼ်ႇၼၼ်ႉတေႉႁႃႉ ယဝ်ႉဝၼ်းလၢဝ်လူး..ႁမ်ႉ ႁႆႈႁဵတ်းႁင်လႃႇ”
“ၼၼ်ႉၵေႃႈဢမ်ႇလႆႈထီႉၼိုင်ႈလႄႈႁႆႈၵူၺ်းၼင်ႇၵဝ်ႇ! တေလႆႈလၢတ်ႈၸိူင်ႉႁိုဝ်လႃႇ ဢူႈမႄႈၶဝ်ပဵၼ်ၵူၼ်းမီးၼႃႈမီးတႃၼၼ်ႉၼႃႇ ပေႃးၵႂႃႇၼႂ်းၵႄႈၼႂ်းၵၢင်ပိူၼ်ႈၵေႃႈ ပေႃးၵတ်ႉပေႃးၶႅၼ်ႇၼႆၵေႃႈ ပိူၼ်ႈတေယွင်ႈတေဢၢမ်းၼၼ်ႉယိုင်၊ ပေႃးဢမ်ႇလႆႈသမ်ႉ ဢူႈၶဝ်တေပွင်ႉသေဢမ်ႇၵႃး ပေႃးၸႂ်လမ်မႃး ၸၢင်ႈၺႃးၶွၼ်ႉပႃးၵွၼ်ႇယဝ်ႉ”
“လႆႈပဵၼ်ထီႉသၢမ် ပေႃးဢဝ်ႁဝ်းဝႃႈတႄႉၶႅၼ်ႇၼႃႇယဝ်ႉ! ႁဝ်းယင်းဢမ်ႇထၢင်ႇဝႃႈ ၶဝ်တေလႆႈပဵၼ်ထီႉသၢမ်ၵွၼ်ႇၼၼ်ႉ ၵႆႉႁၼ်မၼ်းၵေႃႈ ၵႆႉၸႂ်ႉသႅင်ၶဵဝ် ႁဵတ်းၵၢၼ်ႁိူၼ်းပၼ်သေႇသေႇ”
“ၸႂ်ႈယူႇၵူၺ်းလွင်ႈၼၼ်ႉၵေႃႈ မၢင်ပွၵ်ႈၵေႃႈသမ်ႉလီဢီးလူမၼ်းဝႆႉၵဝ်ႇဢိူဝ်ႈ”
“ဢမ်ႇႁၼ်တေဢီးလူတီႈလႂ်လႃႈ ၵႆႉႁၼ်ထၢင်ႇလဵၵ်ႉပိူၼ်ႈတႃႇသေႇ လၢတ်ႈတေႃႇပိူၼ်ႈၵေႃႈ ဢမ်ႇတွၼ်ႉလၢတ်ႈလီလီႁေပွၵ်ႈ လႆႈၸႂ်ပေႉၵိၼ်ပိူၼ်ႈပေႃးတၢၼ်ႇၼၼ်ႉ”
“ဢၼ်ၶဝ်ပဵၼ်ၸိူင်ႉၼၼ်ၵေႃႈ မၼ်းမီးလွင်ႈမီးတၢင်းမၼ်းမိူၼ်ၵၼ်ယဝ်ႉ ယွၼ်ႉၶဝ်ထူပ်းလွင်ႈႁုၵ်ႉႁၢႆႉမႃးလႄႈ ၼႂ်းၸၢတ်ႈပၢၼ်ၶဝ်ၼၼ်ႉၵေႃႈ တေၵႂႃႇၸွမ်းလွင်ႈႁုၵ်ႉႁၢႆႉတိၵ်းတိၵ်းၼၼ်ႉယဝ်ႉ၊ ဢမ်ႇဝႃႈလၢႆးၵႄႈၶႆပၼ်ႁႃႁိုဝ်၊ လၢႆးႁဵတ်းႁႂ်ႈမူၼ်ႈသိူဝ်းႁိုဝ်ၸိူဝ်းၼႆႉ၊ တွၼ်ႈတႃႇမွတ်ႇပႅတ်ႈလွင်ႈႁုၵ်ႉႁၢႆႉ ဢၼ်မၼ်းလႆႈထူပ်း၊ မၢင်ပွၵ်ႈလွင်ႈၶမ်ၸႂ် လွင်ႈတုၵ်ႉၸႂ် ဢၼ်ပူတ်းပွႆႇဢမ်ႇလႆႈၼၼ်ႉၵေႃႈ ၼင်ႇႁိုဝ်မၼ်းတေလူမ်ၸႂ်လႆႈၼၼ်ႉ တေလႆႈႁႃတီႈပွႆႇဝၢင်းမၼ်းၼၼ်ႉယိုင်၊ မိူဝ်ႈလႆႈပေႉၵိၼ်ပိူၼ်ႈ၊ မိူဝ်ႈလႆႈႁၼ်ပိူၼ်ႈယၢပ်ႇၽိုတ်ႇလိူဝ်ႁဝ်းၼႆ မၼ်းႁဵတ်းႁႂ်ႈတူဝ်ၸဝ်ႈၵဝ်ႇၼၼ်ႉ လီမႃးလႆႈလႄႈ မၼ်းၸင်ႇလႆႈႁဵတ်းၼၼ်ႉယဝ်ႉ”
သႂ်လႅင်းၵေႃႈ လႆႈၶႆႈၼႄ လွင်ႈဝၼ်းလၢဝ်ၼၼ်ႉၵႂႃႇယူႇ။
တီႈၼႂ်းႁိူၼ်းလူင်ဢၼ်ၵႂၢင်ႈယႂ်ႇ ပေႃးယူႇၼႂ်းသၢႆတႃၵူၼ်းတၢင်းၼွၵ်ႈတူၺ်းၼၼ်ႉ ၶဝ်ႈပဵၼ်လင်ႁိူၼ်းဢၼ်မၢၵ်ႈမီးလီပဵၼ်တႄႉယဝ်ႉ၊ ၵူၺ်းၵႃႈ ၼႂ်းႁိူၼ်းလူင်လင်ၼၼ်ႉ ဢမ်ႇတွၼ်ႉလႆႈငိၼ်းသဵင်ႁူၼ်ႉၶူဝ်လႄႈ သဵင်ဢုပ်ႇမူၼ်ႈ၊ ၵူၺ်းလႆႈငိၼ်းသဵင်ပွင်ႉၶၢင်း၊ သဵင်ႁိုတ်းထႃႉလႃႇ၊ သဵင်တဵတ်ႇယဵၼ်၊ သဵင်ဢိုတ်ႇႁႆႈယူႇၼႂ်းလပ်းသိင်ႇ။ ၵူၼ်းယူႇၼႂ်းႁိူၼ်းလူင်လင်ၼၼ်ႉ မၼ်းတင်းငဝ်လႄႈငႅဝ်တႄႉတႄႉယူႇ။
ဝၼ်းလၢဝ်ဢၼ်ၶဝ်ႈမိူဝ်းၼႂ်းႁိူၼ်းၼၼ်ႉ ႁူပ်ႉႁၼ်ဢူႈၶဝ် မီးယူႇတီႈတင်ႇၼင်ႈ ၼႂ်းႁိူၼ်းၼၼ်ႉသေယဝ်ႉ သူတ်ႉၵိၼ်ၼမ်ႉၼဵင်ႈၼင်ႇတဵတ်ႇယဵၼ်သေ ၼိူဝ်ၽိူၼ်တၢင်းၼႃႈမၼ်းၼၼ်ႉၵေႃႈ မီးၶွၼ်ႉဝၢႆတမ်းဝႆႉ ယူႇယဝ်ႉ။
“လႆႈထီႉသၢမ်ၼႆႁႃႉ! မႂ်းလၢတ်ႈၵဝ်ဝႃႈႁိုဝ်ဝႆႉလႃႇ..ၸွင်ႇမႂ်းတွင်းယူႇႁိုဝ်”
“ၸၢႆးၽိတ်းၵႂႃႇယဝ်ႉၶႃႈဢူႈ! ၸၢႆးၽိတ်းၵႂႃႇယဝ်ႉ ၸၢႆးႁဵတ်းဢမ်ႇလႆႈ”
ၼႅတ်ႈၶူပ်ႉၶဝ်ႇဢွၼ်ႈဝွၼ်းဢူႈၶဝ် ၵႂႃႇတၢင်းၼမ်ႉတႃၼၼ်ႉယူႇ။
“ၸိူင်ႉၼၼ်ႁႃႉ! ႁၢင်ႈလုၵ်ႈၸၢႆးၵဝ်ၼၼ်ႉ ဢမ်ႇတွၼ်ႉသင်ႇသွၼ်ဝႃႈ ႁဵတ်းဢမ်ႇလႆႈႁေပွၵ်ႈ ဢမ်ႇမီးႁင်ဢၼ်ႁဵတ်းဢမ်ႇလႆႈၼႆ ၸွင်ႇၵဝ်ယၢမ်ႈလၢတ်ႈယူႇႁိုဝ်!”
“ဢေႃႈ…”
“တွင်းလႆႈယူႇ ၵူၺ်းၵႃႈမႂ်းၵေႃႈႁဵတ်းဢမ်ႇလႆႈလူး” တင်းလၢတ်ႈတင်းၵမ်ၶွၼ်ႉမၼ်းၼၼ်ႉသေ ၽတ်ႉသႂ်ႇဝၼ်းလၢဝ်ၵႂႃႇႁႅင်းႁႅင်းယူႇ။
“ၸၢႆးၵူဝ်ယဝ်ႉ! ၸၢႆးၵူဝ်ယဝ်ႉၶႃႈဢူႈ”
“ၵူဝ်ၼႆႁႃႉ! ၵဝ်တွၼ်ႉသွၼ်ႁႂ်ႈမႂ်းၵူဝ်ယူႇႁႃႉ” ၶႅၼ်းသိုပ်ႇၽတ်ႉသႂ်ႇမၼ်းႁႅင်းႁႅင်းမႃးထႅင်ႈ။
“ပွၵ်ႈၼႃႈမႃး! ၸၢႆးတေႁဵတ်းႁႂ်ႈလႆႈၵူၺ်း”
ဢူႈမၼ်းၼၼ်ႉၵေႃႈ ၵူမ်ႈၼႃႈႁွင်းဢဝ်ဝၼ်းလၢဝ်ၼၼ်ႉလုၵ်ႉၶိုၼ်ႈမႃးသေယဝ်ႉ။
“ႁဵတ်းၼႆၵႂႃႈလုၵ်ႈၸၢႆး! တွင်းဝႆႉလႄႈၼႃႈၵႂၢမ်းမႂ်း”
ဝၼ်းလၢဝ်ၼၼ်ႉၵေႃႈ သမ်ႉပေႃးသၼ်ႇသၼ်ႇသၢႆသၢႆလူင်ၵႂႃႇယူႇယဝ်ႉ။
မိူဝ်ႈဢၼ်ၶႃႈလႆႈငိၼ်းၸိူင်ႉၼၼ်ၵေႃႈ ႁၼ်ၸႂ်မၼ်းမႃးယူႇဢိတ်ႉၼိုင်ႈ မိူၼ်ၶႃႈၵေႃႈ လႅပ်ႈတေမီးၸႂ်ဢီးလူမၼ်းမႃးမိူၼ်ၵၼ်၊ ၸၢတ်ႈပၢၼ်ၶဝ်ၼၼ်ႉၵေႃႈ တေငဝ်ယူႇလႄႈ လိူဝ်ၼၼ်ႉသမ်ႉ မႃးလဵၼ်ႈၵေႃႉဢၢႆႈဢွင်ႇ ၵူၼ်းဢဝ်ၸႂ်ၸဝ်ႈၵဝ်ႇဝႃႈၼၼ်ႉထႅင်ႈႁေ။ ၼႂ်းတၢင်းဝူၼ်ႉၶႃႈၵေႃႈမီးဢွၵ်ႇမႃးဝႃႈ မိူဝ်ႈၶဝ်ထူပ်းၵူၼ်းဢၼ်ဢမ်ႇလီၼႆ ၶဝ်ၸင်ႇပဵၼ်ၵူၼ်းဢမ်ႇလီယဝ်ႉ၊ သင်ၶဝ်ထူပ်းၵူၼ်းလီလီ လဵၼ်ႈၵေႃႉၵူၼ်းလီလီၼႆ ၸွင်ႇၸၢတ်ႈပၢၼ်ၶဝ်ၼၼ်ႉ ဢၢပ်ႈတေလႅၵ်ႈလၢႆႈမႃးယူႇႁိုဝ်။ မိူၼ်ၸိူင်ႉၼင်ႇၶႃႈမႃးလဵၼ်ႈၵေႃႉ ၼူၼ်းမူဝ်ၶဝ်ၼႆႉၵေႃႈ ၸၢတ်ႈပၢၼ်ၶႃႈၼၼ်ႉ ႁၼ်လႆႈၸႅင်ႈလႅင်းယူႇဝႃႈ မၼ်းလီမႃးၼႆ၊ ပေႃးဝႃႈႁူၺ်းႁွင်ႉဢဝ်ၶဝ်မႃးလဵၼ်ႈၵေႃႉႁဝ်းလူး တေပဵၼ်ၸိူင်ႉႁိုဝ်မႃးၼေႃ။
မိူဝ်ႈၼၼ်ႉၶႃႈၵေႃႈဝူၼ်ႉလႆႈထႅင်ႈဝႃႈ ပေႃးဝႃႈၶႃႈႁူၺ်းဢဝ် ဝၼ်းလၢဝ်မႃးႁဵတ်းၵေႃႉႁဝ်းၼႆ ၵူၼ်းၸိူင်ႉၼင်ႇဢၢႆႈဢွင်ႇၼၼ်ႉၵေႃႈ ယူဝ်တေၸၢင်ႈႁၵ်းၶႅၼ်ႁၵ်းၶႃၵူၼ်းၸွႆႈမၼ်းလႆႈ ၼၼ်ႉယဝ်ႉ။
ယုမ်ႇဝႃႈ ၵူၼ်းၸိူင်ႉၼင်ႇဝၼ်းလၢဝ်ၼၼ်ႉ တေလႅၵ်ႈလၢႆႈၸႂ်လႆႈယူႇၵူၺ်း ဢမ်ႇမီးၽႂ် ဢၼ်လႆႈၸႂ်ယူႇၸွမ်းလွင်ႈႁုၵ်ႉႁၢႆႉ ၵျႃႇၸွမ်းလွင်ႈလပ်းသိင်ႇလႆႈတႃႇသေႇ၊ ၽႂ်ၽႂ်ၵေႃႈၶႂ်ႈယူႇတီႈဢၼ်ႁဵတ်းႁႂ်ႈ တူဝ်ၸဝ်ႈၵဝ်ႇၵတ်းယဵၼ်ၸႂ်လႆႈ ၼၼ်ႉယဝ်ႉ၊ ဢမ်ႇဝႃႈႁဵတ်းလွင်ႈလီႁိုဝ်လွင်ႈဢမ်ႇလီ တိုၼ်းၶႂ်ႈႁႂ်ႈတူဝ်ၵဝ်ႇယူႇလူမ်ၸႂ်မႃးယူႇ။ ယွၼ်ႉၵူၼ်းႁဝ်းၼၼ်ႉ မီးႁူဝ်ၸႂ်မိူၼ်ၵၼ်ၼၼ်ႉၼႃႇ။
ၶႃႈၼၼ်ႉၵေႃႈၼႅတ်ႈၵႂႃႇႁႃတူၺ်းဝၼ်းလၢဝ်ၵမ်းလဵဝ်သေ သႂ်လႅင်းၼၼ်ႉၵေႃႈလမ်းမႃးၸွမ်းၽၢႆႇလင်ယဝ်ႉ
“တေၵႂႃႇတၢင်းလႂ်လႃႇ!” ၶႃႈႁိုဝ်တၼ်းတွပ်ႇမၼ်း မွင်းႁၼ်ဝၼ်းလၢဝ်ၵူၺ်း ၵႂႃႇၸူးမၼ်းသေယဝ်ႉ။
“ယူဝ်ဝႃႈၵႂႃႇတၢင်းလႂ်…တီႈတေႉၵေႃႈ မႃးလၵ်ႉႁႆႈယူႇလင်တူၼ်ႈမႆႉၼႆႉၵူၺ်းလူး”
“မႂ်းမႃးႁဵတ်းႁင်လႃႇ!”
“ၸိူဝ်းၼႆႉၵဝ်မႃးယူႇသေႇသေႇ ပဵၼ်သင်လႄႈမႃးဢမ်ႇလႆႈ မႂ်းမႃးလႆႈၵဝ်ၵေႃႈမႃးလႆႈၵူၺ်းလေႃႇ!”
မၼ်းၼၼ်ႉၵေႃႈ လုၵ်ႉၵႂႃႇပႅတ်ႈၶႃႈသေယဝ်ႉ။ ၶႃႈၵေႃႈဢမ်ႇလႆႈသူၼ်ၸႂ်ဝႃႈမၼ်းတေၵႂႃႇတၢင်းလႂ် ၵူၺ်းၵႃႈ မိူဝ်ႈလၢတ်ႈပႆႇသုတ်းၼၼ်ႉ ၶႃႈတိုၼ်းတေလၢတ်ႈႁႂ်ႈမၼ်းသုတ်းယဝ်ႉ။
“ထၢင်ႇဝႃႈပဵၼ်ၵူၼ်းၺၢမ်ႉမႄႈတီႈလႂ် ပဵၼ်ဢၢႆႈၵူၼ်းႁၢႆႉဝၼ်းလၢဝ်ၼၼ်ႉၵူၺ်းလူး”
ဢဝ်မၼ်းသမ်ႉပေႃးဝိၼ်ႇဝၢႆႇၸူးၶႃႈ တင်းၼႃႈၵမ်ႇၼႃႈလမ်လူင်ၼၼ်ႉယဝ်ႉ။
“မႂ်းၶႂ်ႈဝႃႈၸိူင်ႉႁိုဝ်လႃႇ! ”
မႃးငႅၼ်းပၼ်ၶေႃးၶႃႈႁႅင်းဝႃႈႁႅင်း ဢဝ်ၶႃႈသုတ်ႉဢီးထူၵႂႃႇၸူးတူၼ်ႈမႆႉၼၼ်ႉသေ ၶႃႈသမ်ႉပေႃးထူၺ်ႈၸႂ်ဢမ်ႇၶႂ်ႈလႆႈယဝ်ႉၼေႈ သႂ်လႅင်းဢၼ်လႆႈႁၼ်ၼၼ်ႉၵေႃႈ ၼႅတ်ႈမႃးသေယဝ်ႉ ဢီးမၼ်းဢွၵ်ႇပႅတ်ႈယူႇ။
ၶႃႈၵေႃႈႁိုဝ်တေထွႆ ယွၼ်ႉမၼ်းငႅၼ်းၶေႃးၶႃႈၼၼ်ႉၵူၺ်း သုတ်ႉပႆၶဝ်ႈၸမ်ၸမ်မၼ်းသေယဝ်ႉ
“မႂ်းၵႅၼ်ႇၶႅင်လႆႈမွၵ်ႈၼႆႉၵူၺ်းႁႃႉ! ၸႂ်ႈယဝ်ႉ..မႂ်းၵေႃႈၵႅၼ်ႇၶႅင်လႆႈမွၵ်ႈၼႆႉၵူၺ်း” ၶႃႈၼၼ်ႉၵေႃႈ သုတ်ႉၶဝ်ႈၵႂႃႇၸမ်ၸမ်မၼ်းသေယဝ်ႉ “သမ်ႉဝႃႈမႂ်းၵႅၼ်ႇၶႅင်ႁၢႆႉတၢၼ်ႇႁိုဝ်ၵေႃႈ မႂ်းၼၼ်ႉ ယင်းတိုၵ်ႉၵူဝ်ဢူႈသူယူႇဢမ်ႇၸႂ်ႈႁိုဝ်လႃႇ”
ၶႃႈၵေႃႈပႆဢွၵ်ႇၽၢတ်ႇယၢၼ်မၼ်းၵႂႃႇပႅတ်ႈယဝ်ႉ။ မၼ်းယူင်းႁႂ်ႈၶႃႈၸႂ်လမ်လႄႈ ၶႃႈၵေႃႈလႆႈလၢတ်ႈၵႂႃႇၸိူင်ႉၼၼ် ၼၼ်ႉယိုင်။ ပေႃးဝႃႈတေႉ ၶႃႈဢၢၼ်းၶႂ်ႈလၢတ်ႈတေႃႇမၼ်းလီလီယူႇၼႃ၊ ၵူၺ်းၵႃႈ ႁၼ်ၼႃႈမၼ်းယဝ်ႉ ၶႃႈလၢတ်ႈၵႂၢမ်းလီလီတေႃႇဢမ်ႇပေႃးလႆႈလႄႈ ႁဵတ်းႁႂ်ႈလွင်ႈလဵၵ်ႉပဵၼ်လွင်ႈယႂ်ႇၵႂႃႇယဝ်ႉ၊ မၢင်ၵမ်းၵေႃႈ ၶိုၼ်းဝူၼ်ႉယူႇဝႃႈ တႃႉဢမ်ႇၵႂႃႇသုၵ်ႉယုင်ႈၸွမ်းမၼ်းတေလီႁိုဝ် ၼႆယူႇ။
သႂ်လႅင်းၼၼ်ႉၵေႃႈ မႃးၸွမ်းၶႃႈသေယဝ်ႉ
“ပဵၼ်ၸိူင်ႉႁိုဝ်လႃႇၸွင်ႇၸဵပ်းႁိုဝ်!..မီးႁွႆးလႅင်ႁႅင်းတေႉယဝ်ႉ” ထွတ်ႇဢဝ်ၽႃႈပၢႆႉၶေႃးမၼ်းၼၼ်ႉ မႃးသႂ်ႇပၼ်ၶႃႈၵႂႃႇ။
“ႁဵတ်းသင်ယူႇလႃႇ ထၢင်ႇဝႃႈသူပဵၼ်ၸၢႆးၸိူင်းၼႆၵႂႃႈ”
“ပေႃးမႃးဝူၼ်ႉတူၺ်းယဝ်ႉ ႁဝ်းၵေႃႈမိူၼ်ယူႇၼႃ သူဢမ်ႇဝႃႈၼၼ်ႁႃႉ ၸၢႆးၸိူင်းဢၼ်ၵႂႃႇၸွႆႈၼၢင်းၸိူင်းမၼ်း မိူဝ်ႈၼၢင်းၸိူင်းထူပ်းၽေးယူႇ”
“ၵူၺ်းၵႃႈႁဝ်းဢမ်ႇၶႂ်ႈပဵၼ်ၼၢင်းၸိူင်းသူၼႃ”
သႂ်လႅင်းၼၼ်ႉၵေႃႈ ယဵၼ်ၵႂႃႇၵႅပ်ႉၼိုင်ႈ၊ ဝိၼ်ႇဝၢႆႇၼႃႈၸူးၶႃႈသေ “သူႁတ်းတေႉယဝ်ႉၼႃႈ.. ပေႃးပဵၼ်ႁဝ်းထုၵ်ႇၶဝ်ငႅၼ်းၶေႃးႁဵတ်းၼၼ် ႁဝ်းဢမ်ႇႁတ်းတူၺ်းၼႃႈၶဝ်ၵွၼ်ႇယဝ်ႉ”
ၶႃႈၵေႃႈတူပ်းမႃႇမၼ်းလွႆးလွႆးသေ “တွင်းဝႆႉလႄႈၼႃႈၼွင်ႉသၢဝ်! ပီႈသူတေလၢတ်ႈၼႄ ယိုင်ႈႁဝ်းဢူၼ်ႈဢွၼ်ႇ ပိူၼ်ႈယိုင်ႈၶႅၼ်းပေႉၵိၼ်ႁဝ်းငၢႆႈယဝ်ႉ၊ ႁဝ်းဢမ်ႇႁဵတ်းႁႂ်ႈၶဝ်ၵူဝ်သေတႃႉ ၵူၺ်းၵႃႈဢမ်ႇထုၵ်ႇလီႁဵတ်းႁႂ်ႈၶဝ်ႁၼ်ဝႃႈ ႁဝ်းၵူဝ်ၶဝ်ၼၼ်ႉယဝ်ႉ”
ႁႃးၵေႃႈၵွတ်ႇၶေႃးၵၼ်လူင်ၵႂႃႇယူႇယဝ်ႉ။
မိူဝ်ႈၶဝ်ႈၵႂႃႇၼႂ်းႁွင်ႈႁဵၼ်းၼၼ်ႉၵေႃႈ မီးၵူၼ်းၼင်ႈဢုပ်ႇၵၼ်ပဵၼ်ပၢင်ပဵၼ်ပၢင်၊ ပိူၼ်ႈဢိုတ်းႁူင်းႁဵၼ်း ဢမ်ႇလႆႈႁၼ်ၵၼ်ဢဝ်လၢႆဝၼ်းၵူၺ်းၵေႃႈ ဢုပ်ႇၵၼ်ပေႃးတၢၼ်ႇဝႃႈ ဢမ်ႇလႆႈႁၼ်ၵၼ်ပဵၼ်ပီၼၼ်ႉယဝ်ႉ။ မႂ်းၵႂႃႇလႄႇတၢင်းလႂ်လႃႇ မႂ်းႁဵတ်းသင်လႃႇမိူဝ်ႈပိူၼ်ႈဢိုတ်းႁဵၼ်း၊ ၵဝ်တႄႉၵႂႃႇလႄႇဢိူဝ်ႈ၊ ၵဝ်တႄႉၵႂႃႇႁဵတ်းၵၢၼ်ၼႃႇ၊ မိူဝ်ႈပွႆးဢွၵ်ႇဝႃႇၼၼ်ႉမႂ်းၵႂႃႇလႄႇၸွမ်းၽႂ်လႃႇ မၢဝ်ႇမႂ်းႁႃႉ၊ ၽွင်းၶၢဝ်းဢိုတ်းႁဵၼ်းသိပ်းဝၼ်းၼၼ်ႉ ထၢမ်ၵၼ်ပေႃးဢမ်ႇယဝ်ႉလႆႈႁေပွၵ်ႈယဝ်ႉ ဢၼ်ဢုပ်ႇၶႆႈလႆႈၼမ်ၼႃႇၼၼ်ႉၵေႃႈ မိူဝ်ႈပွႆးဢွၵ်ႇဝႃႇၼၼ်ႉၵႂႃႈ မၢင်ၵေႃႉၵေႃႈ တွႆးမၢဝ်ႇပွမ်တူဝ်ႁေလႄႇပွႆးၸိူဝ်းၼႆႉၼႃႇ ထၢမ်ၵၼ်သဵင်ဢူၼ်ဢၼ် မေႃးပၼ်းလူင်ၵႂႃႇမူတ်းတေႉၵဝ်ႇ။
ၶႃႈၵေႃႈမိူဝ်ႈဢိုတ်းႁူင်းႁဵၼ်းၼၼ်ႉ ယူႇႁိူၼ်းၵူၺ်း၊ ဢွၵ်ႇဝႃႇၵေႃႈဢမ်ႇလႆႈၵႂႃႇၵျွင်း ယွၼ်ႉဢမ်ႇလႆႈၵႂႃႇႁူင်းႁဵၼ်းၼႆလႄႈ ၶႃႈလုၵ်ႉလႃႈသေဢမ်ႇတၼ်းၶိုတ်းပိူၼ်ႈ၊ ၵၢင်ၶမ်ႈၵေႃႈဢမ်ႇလႆႈၵႂႃႇ ယွၼ်ႉဢမ်ႇလူဝ်ႇတူၺ်းလိၵ်ႈယဝ်ႉ ၶႃႈၵေႃႈတူၺ်းၸိူင်းႁေ သမ်ႉပေႃးဢမ်ႇၶုၵ်းၸႂ်လႆႈယဝ်ႉ။ ၵွပ်ႈဝႃႈ ဝၼ်းလိုဝ်ႈၼႆၵေႃႈ ၸွမ်ၶိူဝ်း လႆႈဢဝ်ၶွမ်းမၼ်းလႄႈ ၶႅပ်းၶူၺ်ႇမႃးပၼ်ၶႃႈတူၺ်းၼၼ်ႉယိုင်။
ဝၢႆးသေဢွၵ်ႇဝႃႇယဝ်ႉၵေႃႈ လႆႈၵႂႃႇႁဵတ်းသူၼ်ၸွမ်းၼၢႆးႁဝ်းယူႇလၢႆဝၼ်း၊ ဢမ်ႇတၼ်းႁူႉႁင် ပိူၼ်ႈၵေႃႈသမ်ႉပေႃးၶိုၼ်းၶိုၼ်ႈႁူင်းႁဵၼ်း ထိုင်ဝၼ်းမိူဝ်ႈၼႆႉယဝ်ႉၼၼ်ႉၼႃႇ။
တွၼ်ႈသၢဝ်းၸဵတ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢဝ်းပႅတ်ႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
