တွၼ်ႈသၢဝ်းႁူၵ်း
သင်ၵေႃႈယဝ်ႉ ပေႃးဝႃႈႁဵတ်းပူၼ်ႉႁႅင်းဢၼ်မီးၼၼ်ႉၼႃႇၵေႃႈ ၸၢင်ႈတေတုမ်ႉတိူဝ်ႉၶိုၼ်း တူဝ်ၸဝ်ႈၵဝ်ႇမႃးယဝ်ႉ။ သမ်ႉဝႃႈတေပဵၼ်လွင်ႈလီတၢၼ်ႇလႂ်ၵေႃႈယဝ်ႉ ထုၵ်ႇလီႁဵတ်းႁႂ်ႈမၼ်းၵိုင်ႇတၢၼ်ႇပဵင်းပေႃးၵူၺ်း၊ ဢူႈမႄႈၵေႃႈ မိူဝ်ႈႁၼ်ဢၼ်လီဢၼ်ၶႅမ်ႉ ဢၼ်ထုၵ်ႇလီပၼ်ႁႂ်ႈလုၵ်ႈမေႃ၊ ထုၵ်ႇလီပၼ်ႁႂ်ႈလုၵ်ႈႁဵၼ်းၼၼ်ႉၼႆၵေႃႈ ဢမ်ႇၸမ်ပဵၼ် တေဢဝ်ပၼ်ၵူႈလွင်ႈၵေႃႈလႆႈယူႇ၊ ဢဝ်ဢၼ်ၵိုင်ႇတၢၼ်ႇၸွမ်းၼင်ႇသႅၼ်းပၢၼ် ဢၼ်လုၵ်ႈႁပ်ႉႁူႉလႆႈလႄႈ လွင်ႈဢၼ်လုၵ်ႈတေႁပ်ႉလႆႈၵူၺ်းၼၼ်ႉ ၸင်ႇတေလီယူႇ။ သင်ၸိူဝ်ႉဝႃႈလုၵ်ႈဢွၼ်ႇဢမ်ႇႁပ်ႉလႆႈႁိုဝ် ႁဵတ်းဢမ်ႇလႆႈမႃး ၵေႃႉဢၼ်တေလႆႈႁပ်ႉၽွၼ်းတုမ်ႉယွၼ်ႈၼၼ်ႉ ဢမ်ႇၸႂ်ႈဢူႈမႄႈၵမ်းသိုဝ်ႈ ပဵၼ်လုၵ်ႈႁဝ်းၼၼ်ႉၵမ်းလဵဝ်ယဝ်ႉ။
ဢမ်ႇဝႃႈဢူႈမႄႈတေႁဵတ်းသင်ပၼ်လုၵ်ႈၵေႃႈယဝ်ႉ ထုၵ်ႇလီတူၺ်းလုၵ်ႈႁဝ်းလႄႈ ႁူႉလွင်ႈလုၵ်ႈႁဝ်းႁႂ်ႈလီ ၸင်ႇတေႁဵတ်းပၼ်၊ ဢမ်ႇၸမ်ပဵၼ် တေလႆႈပၼ်ၶဝ်ၵူႈလွင်ႈၵေႃႈလႆႈ လွင်ႈဢၼ်ၶဝ်ႁႃဢဝ်လႆႈႁင်းၵူၺ်းၼၼ်ႉ ပၼ်ႁႂ်ႈၶဝ်ႁဵတ်းဢဝ်ႁင်းၵူၺ်းသေ၊ ၵၢၼ်ႁဵၼ်းႁူႉႁင်းၵူၺ်းၼၼ်ႉ တေဢွၼ်ၶဝ်ႁူႉၵႂၢမ်းလႄႈၵေႃႉယႂ်ႇမႃးယူႇ။
ႁဝ်းၵေႃႈဢွၼ်ၵၼ်ၵႂႃႇႁွတ်ႈထိုင်တီႈႁူင်းယႃသေ လႆႈႁၼ်ဢူႈမႄႈၸၢႆးၸၢႆးၼၼ်ႉ မႃးမီးယူႇတီႈႁူင်းယႃပႂ်ႉတူၺ်းမၼ်းယူႇ ၼၼ်ႉယဝ်ႉ။ ၵေႃႉပဵၼ်မႄႈ ဢၼ်လႆႈႁၼ်လုၵ်ႈၼွၼ်းၽႅၼ်ၼမ်ႉၵိူဝ်ယူႇႁဵတ်းၼၼ်ၵေႃႈ ႁိုဝ်တေၵတ်းယဵၼ်ၸႂ်လႆႈလႃႇ ၵုမ်ႇၼင်ႈသေႃႉဢူၵ်းဢူႈၶဝ်ၼၼ်ႉသေ ႁွင်ႉႁႆႈ၊ ဝူၼ်ႉၽိတ်းတေႃႇလုၵ်ႈမၼ်းၼၼ်ႉယူႇတိၵ်းတိၵ်းၵူၺ်း။
ႁဝ်းၵေႃႈလႆႈဢွၼ်ၵၼ်ၶဝ်ႈၵႂႃႇၸူးတီႈၸၢႆးၸၢႆးၼၼ်ႉသေ ၼူၼ်းမူဝ်ၼၼ်ႉ ၸင်ႇတူင်ႉတၵ်ႉၸူးတီႈဢူႈမႄႈၶဝ်ၼၼ်ႉၵႂႃႇ
“မႂ်ႇသုင်ၶႃႈ ဢူႈလုင်း.. မႄႈပႃႈ.. ယိင်းၶဝ်ပဵၼ်ဢူၺ်းၵေႃႉတင်းၸၢႆးၸၢႆးဢေႃႈ”
“မႃးၸႂ်းၸၢႆးၸၢႆးႁႃႉ! ထိုင်မိူဝ်ႈလဵဝ်ၶဝ်ယင်းပႆႇႁူႉတူဝ်မႃးၼေႈ”
“ပဵၼ်ၸႂ်ဢမ်ႇလီတႄႉဢေႃႈ ဢၼ်လႆႈႁၼ်ၶဝ်ပဵၼ်ၸိူင်ႉၼၼ်”
“သမ်ႉမႅၼ်ႈၽွင်းၶၢဝ်းတွပ်ႇလိၵ်ႈႁေၼၼ်ႉၼႃႇ မေႃၵေႃႈဝႃႈၶဝ်လိုဝ်ႈႁိူဝ်ႉဢေႇႁႅင်းၼႃႇၼႆဢိူဝ်ႈ ၸူဝ်ႈၽွင်းတွပ်ႇလိၵ်ႈၼႆႉၵေႃႈ မိူၼ်ဝႃႈမၼ်းတေၶတ်းၸႂ်ႁႅင်း ထိုင်တီႈဢမ်ႇလႆႈလပ်းလႆႈၼွၼ်းၼၼ်ႉယိုင် သမ်ႉပေႃးလႆႈပဵၼ်ၸိူင်ႉၼၼ်ယဝ်ႉ”
ၶႃႈၼၼ်ႉၵေႃႈ မိူဝ်ႈႁၼ်ၶဝ်ၼွၼ်းယူႇၸိူင်ႉၼၼ် ဢမ်ႇယဵၼ်ႉလႆႈတေလၢတ်ႈဢွၵ်ႇၼႄ လွင်ႈဢၼ်ၸၢႆးၸၢႆး လႆႈထူပ်းမိူဝ်ႈပူၼ်ႉမႃးၼၼ်ႉ
“မိူဝ်ႈပူၼ်ႉမႃးၼၼ်ႉၵေႃႈ ၶဝ်ၵေႃႈယၢမ်ႈမဝ်းလူမ်ႉတီႈႁူင်းႁဵၼ်းမိူၼ်ၵၼ်ဢေႃႈ မၼ်းၵူဝ်ဝႃႈဢူႈလုင်းႁဝ်းၶဝ် တေမႆႈၸႂ်ၸွမ်းမၼ်းလႄႈ ဢမ်ႇပၼ်ႁႂ်ႈလၢတ်ႈၼႄဢူႈလုင်းႁဝ်းၶဝ်ၶႃႈဢေႃႈ”
မႄႈၶဝ်ၼၼ်ႉၵေႃႈ ယိပ်းဢဝ်တင်းမိုဝ်းၸၢႆးၸၢႆးၼၼ်ႉယဝ်ႉ ႁွင်ႉႁႆႈတေႃႇၼႃႈႁဝ်းၼၼ်ႉၵမ်းလဵဝ်သေ
“မႄႈၽိတ်းၵူၺ်း! ဢၼ်ႁႂ်ႈလုၵ်ႈၶတ်းၸႂ်ႁဵၼ်းၼႃႇပူၼ်ႉတီႈ၊ လုၵ်ႈၵေႃႈဢမ်ႇတွၼ်ႉတွပ်ႇသင်ၶိုၼ်း၊ ၶႂ်ႈႁႂ်ႈလုၵ်ႈမေႃသင်ၵေႃႈ ႁႃမႃးပၼ်ႁဵၼ်းတိၵ်းတိၵ်းၵူၺ်း၊ ဢမ်ႇႁူႉဝႃႈလုၵ်ႈတေမီးလွင်ႈယၢပ်ႇၽိုတ်ႇတုၵ်ႉၸႂ် ယွၼ်ႉလွင်ႈႁဵတ်းသၢင်ႈမႄႈၸိူင်ႉၼႆ၊ ပဵၼ်သင်လႄႈဢမ်ႇလၢတ်ႈၼႄမႄႈ ၸဵပ်းၵေႃႈလၢတ်ႈၼႄလႄႈ၊ ယၢပ်ႇၵေႃႈလၢတ်ႈၼႄလူႉ ဢၼ်မႄႈလႆႈႁၼ်လုၵ်ႈၼွၼ်းယူႇ ဢမ်ႇတၵ်းသဵင်ၸိူင်ႉၼႆ ယိုင်ႈၶႅၼ်းႁဵတ်းႁႂ်ႈႁူဝ်ၸႂ်မႄႈၸဵပ်းမႃးၼၼ်ႉယဝ်ႉ တိုၼ်ႇၶိုၼ်ႈမႃးလႄႈ ၸၢႆး…”
ၶႃႈဢၼ်လႆႈႁၼ်မႄႈၸၢႆးၸၢႆးႁွင်ႉႁႆႈတေႉႁႆႈဝႃႈၼၼ်ႉၵေႃႈ တွႆႇသႂ်လႅင်းသေသွပ်ႉသႅပ်ႉၸူး
“ႁဝ်းလၢတ်ႈသင်ၽိတ်းၵႂႃႇယဝ်ႉလႃႇ!”
“သူၵေႃႈ..လၢတ်ႈႁႂ်ႈမၢၵ်ႇႁူဝ်ၸႂ်မႄႈၶဝ် တေတႅၵ်ႇလႅဝ်ၵႂႃႇယဝ်ႉၼၼ်ႉၼႃႇ”
“ၸွင်ႇၶဝ်တေတၢႆႁိုဝ်!” ၵႆႉႁၼ်ပေႃးဢၢၼ်ႇပပ်ႉဢလွင်းၸိူဝ်းၼႆႉ မၢၵ်ႇႁူဝ်ၸႂ်တႅၵ်ႇၵေႃႈ တၢႆယဝ်ႉၵူၺ်းလူႉ ၸင်ႇလႆႈထၢမ်ၵႂႃႇၸိူင်ႉၼၼ်ၼၼ်ႉၼႃႇ။ သႂ်လႅင်းၼၼ်ႉၵေႃႈ လၢၵ်ႈၶႃႈထွႆဢွၵ်ႇႁၢင်ႇၵႂႃႇၵႆၶဝ်ဢိတ်ႉယဝ်ႉ။
“သူယႃႇလၢတ်ႈၵႂၢမ်းယဝ်ႉၼႃႈ!”
ႁဝ်းၵေႃႈပႂ်ႉတူၺ်းၵၼ်ႁိုင်ယူႇတၢၼ်ႇတၢၼ်ႇ ၸၢႆးၸၢႆးဢမ်ႇပႆႇတိုၼ်ႇလႄႈ ဢမ်ႇႁူႉဝႃႈတေႁဵတ်းသင်ယဝ်ႉ၊ ၼူၼ်းမူဝ်ၵေႃႈ ဢွၼ်သူင်ႇသင်ႇတီႈပေႃႈမႄႈၶဝ်ၼၼ်ႉသေ ႁဝ်းၸင်ႇဢွၼ်ၵၼ်ဢွၵ်ႇမိူဝ်းၵႂႃႇယူႇ။ မိူၼ်ဝႃႈတေတွင်ႉမႆႈၶဝ်ႈႁင်းၽႂ်ႁင်းမၼ်းမႃးယဝ်ႉလႄႈ ယၢမ်းၼၼ်ႉ သမ်ႉတေႃႇတၢင်းမိူဝ်းႁိူၼ်းသႂ်လႅင်းသေ မၼ်းၵေႃႈ ၸင်ႇလႆႈဢွၼ်ႁဝ်းမိူဝ်းလႄႇႁိူၼ်းမၼ်းၵႂႃႇ။
ႁိူၼ်းသႂ်လႅင်းၼၼ်ႉ မီးယူႇတၢင်းၼွၵ်ႈဝဵင်းၼၼ်ႉယဝ်ႉ လုၵ်ႉတီႈႁူင်းယႃပၼ်ႇလူတ်ႉထိပ်ႇၼၼ်ႉၵႂႃႇ တေၸႂ်ႉၶၢဝ်းယၢမ်းယူႇမွၵ်ႈ 15 မိၼိတ်ႉၼႆႉၶႃႈၵႂႃႈ။ ပေႃးၵႂႃႇႁူင်းႁဵၼ်းၼႆၵေႃႈ တေၸႂ်ႉၶၢဝ်းယၢမ်းၸမ်ၸမ်ယူႇမွၵ်ႈ 20 မိၼိတ်ႉ ၼႆႉယဝ်ႉ ၶႂ်ႈတၢၼ်ႇလုၵ်ႉတီႈႁိူၼ်းႁဝ်းၵႂႃႇသူၼ်ၼၼ်ႉၵူၺ်း။
တီႈႁိူၼ်းၶဝ်ၼၼ်ႉ ပဵၼ်လင်ႁိူၼ်းဢၼ်ဢမ်ႇလႆႈၵႂၢင်ႈယႂ်ႇသင်ၵႃႈႁိုဝ်သေတႃႉ သူၼ်ၶဝ်ၼၼ်ႉတႄႉၵႂၢင်ႈယႂ်ႇတေႉတေႉယဝ်ႉ။ ဢူႈမႄႈၶဝ်ၼၼ်ႉၵေႃႈ ၸူမ်းႁပ်ႉၸွမ်းတွၼ်ႈႁဝ်းၼႃႇ မေႃဢုပ်ႇမေႃလၢတ်ႈဢူၼ်ႈဢွၼ်ႇဝၢၼ်ႁူ ၶႂ်ႈၵိၼ်သင်ၶႂ်ႈႁဵတ်းသင်ၼႆၵေႃႈ ပၼ်ႁႂ်ႈႁဝ်းႁဵတ်းၵၼ်လီလီငၢမ်းငၢမ်းယူႇ။
သႂ်လႅင်းၼၼ်ႉၵေႃႈ လႆႈဢွၼ်ႁဝ်းၵႂႃႇလႄႇၼႂ်းသူၼ်ၶဝ် ၵႂႃႇၵဵပ်းၽၵ်းယူႇယဝ်ႉ ၼႂ်းသူၼ်ၶဝ်ၼၼ်ႉၵေႃႈ မီးၸဵမ်မွၵ်ႇ၊ ၸဵမ်မၢၵ်ႇ ပေႃးတဵမ်လွမ်ႉႁိူၼ်းလူင်ဝႆႉ လိူဝ်ၼၼ်ႉ ၽၵ်းၼႂ်းသူၼ်ဢၼ်ၽုၵ်ႇဝႆႉၼႆၵေႃႈ ၼုမ်ႇလီၼႃႇ။ ၽၵ်းဢၼ်ၽုၵ်ႇႁိမ်းၶွၵ်ႈမူၶဝ်ၼၼ်ႉ ယိုင်ႈၶႅၼ်းၼုမ်ႇဝႃႈၼုမ်ႇယဝ်ႉဝႃႈ။ ၸွမ်းလႅၼ်ႁူဝ်ႉလႅၼ်သူၼ်ၼၼ်ႉၵေႃႈ သမ်ႉမီးတင်းတူၼ်ႈမၢၵ်ႇသၢင်းၽေႃး ဢၼ်ၵွၼ်ႈသုၵ်းလိူင်ယူႇၼိူဝ်တူၼ်ႈၼၼ်ႉလႄႈ၊ မၢၵ်ႇၸွၵ်းမၢၵ်ႇဢူဝ်း ဢၼ်ဢွင်ႇဢွႆႈတွင်ႇယူႇၸွမ်းၵိင်ႇၸွမ်းၵၢၼ်ႈမၼ်းၼၼ်ႉ လႅပ်ႈဝၢၼ်တေႉယဝ်ႉ။ လဵပ်ႈၵႂႃႇႁိမ်းၶႃႇတႅင်ၼၼ်ႉသမ်ႉ လႆႈႁၼ်ပႃးၸဵမ်တူၼ်ႈမၢၵ်ႇၵႃႇလၢႆလၢႆတူၼ်ႈ လိူဝ်သေမၢၵ်ႇၵွၼ်ႈယဝ်ႉ သမ်ႉလုၵ်ႈယႂ်ႇထႅင်ႈႁေ မိုဝ်းၵေႃႈၶူမ်းမႃးယဝ်ႉ၊ ပေႃးမၼ်းဢမ်ႇဢဝ်လဵင်ႉတႄႉ ၶႃႈတေယွၼ်းၵိၼ်ယဝ်ႉဝႃႈ သၢႆတႃၶႃႈၼၼ်ႉတႄႉ ၸုၵ်းမိုင်ၸိူဝ်ႈတူၺ်းမၢၵ်ႇၵႃႇတူၼ်ႈၼၼ်ႉယူႇၵူၺ်း။ ယၢမ်းၼၼ်ႉ သႂ်လႅင်းၵေႃႈ
“ဢေးယိင်း! ၵဵပ်းပႃးမၢၵ်ႇၵႃႇႁေၼႃႈ!” တင်းၵႂႃႇၵဵပ်းၽၵ်းသေ ႁွင်ႉလၢတ်ႈၸူးၶႃႈ ဢၼ်ဢမ်ႇပႆႇၶႂ်ႈၽၢတ်ႇတူၼ်ႈမၢၵ်ႇၵႃႇၼၼ်ႉယဝ်ႉ။
ထုၵ်ႇၸႂ်ယိင်းတႄႉဢေႃႈၵႂၢမ်းၶေႃႈၼၼ်ႉ၊ ၶႃႈၼၼ်ႉတႄႉ ထွတ်ႇတၢင်းသိူဝ်ႈသွၼ်ႉၶႃႈၼၼ်ႉသေ မတ်ႉၶႅၼ်မၼ်းသႂ်ၵိုၵ်းၵၼ်ယဝ်ႉၵေႃႈ ပိတ်းသႂ်ႇပိတ်းသႂ်ႇတိၵ်းတိၵ်း ဢမ်ႇတၼ်းႁူႉ ၵွင်လူင်မၼ်းသမ်ႉပေႃးဢမ်ႇၸၢင်ႈမတ်ႉယဝ်ႉ ၸင်ႇတေၶုၵ်းၸႂ်လႆႈမႃး။
“ဢဝ်ၼမ်ၼႃႇယဝ်ႉယူဝ်ႉၼႆႉ”
“ဢဝ်လႃႈ! ယင်းဢမ်ႇမီးၽႂ်ၵိၼ်လူးၵွၼ်ႇ၊ မၢၵ်ႇၸွၵ်းၸိူဝ်းၼၼ်ႉၵေႃႈ ပေႃးမီးဢၼ်သုၵ်းမၼ်းၵေႃႈ ၵဵပ်းလႆႈယူႇၼႃႈ” သႂ်လႅင်းႁွင်ႉလၢတ်ႈၸူး
“ၶႂ်ႈဢဝ်ယူႇၵူၺ်း ဢမ်ႇမီးတီႈသႂ်ႇယဝ်ႉႁဝ်း” ႁၼ်ၼူၼ်းမူဝ်တိုၵ်ႉမႃးထိုင်တီႈၶႃႈၼၼ်ႉၵေႃႈ “ၼူၼ်းမူဝ်ၵႂႃႇဢဝ်လႄႈ!”
“တေႁႂ်ႈႁဝ်းဢဝ်ၸိူင်ႉႁိုဝ်လႃႇ! ႁဝ်းယင်းဢမ်ႇမေႃဢဝ် တီႈသႂ်ႇမၼ်းၵေႃႈယင်းဢမ်ႇပႃးမႃး”
ၼူၼ်းမူဝ်ၼၼ်ႉ ၵွပ်ႈပိူဝ်ႈပဵၼ်လုၵ်ႈၽူႈၵူၼ်းလီၶဝ်လႄႈ တေဢမ်ႇယၢမ်ႈၸႂ်ႉၸၢတ်ႈပၢၼ် ယူႇၸွမ်းသူၼ်ၸွမ်းႁႆႈ မိူၼ်ၼင်ႇႁဝ်းၸိူဝ်းၼႆႉ။ တေဢမ်ႇပေႃးမေႃၵႂႃႇမေႃပႆၵႃႈႁိုဝ် ၵူဝ်တိၼ်တေဢိူၵ်ႇတေၵူဝ်ႈ ယွၼ်ႉပဵၼ်ၵူၼ်းႁၵ်ႉလွင်ႈမူတ်းသႂ်ၼႃႇၼႃႇ ၼၼ်ႉယဝ်ႉ။ တေႃႇတေႃႇမၼ်းတေႁတ်း ၽၢၼ်ႇၶွၵ်ႈမူမႃးလႆႈ၊ ဢၼ်ပဵၼ် သႅင်ႁၵ်ႉၶႃၶမ်းၽွင်ၼၼ်ႉတႄႉ ၸွမ်းသႂ်လႅင်းၵႂႃႇၵဵပ်းၽၵ်းၵၼ် ယူႇယဝ်ႉ။
“ထွတ်ႇသိူဝ်ႈသူလႄႈ ႁဝ်းတေႁဵတ်းၼႄ”
“တေသႂ်ႇၸိူင်ႉၼႆၼႃ ၵမ်ႉတေဢိူၵ်ႇမူတ်းႁေယဝ်ႉဢိူဝ်ႈ!”
“သႂ်ႇမၢၵ်ႇၸွၵ်းၵူၺ်း! ၸၢင်ႈတေပဵၼ်သင်လႃႇ ဢမ်ႇထၢင်ႇဝႃႈၵူၼ်းလီၸိူင်ႉၼင်ႇသူၼႆႉ သိူဝ်ႈဢွၼ်ႇၽိုၼ်ၼိုင်ႈၵူၺ်းၵေႃႈ ယွၼ်းၸႂ်ႉဢမ်ႇလႆႈၼႆၼႃ ဢၼ်ႁဝ်းဝူၼ်ႉဝႃႈသူပဵၼ်ၵူၼ်းလီၼၼ်ႉ မိူၼ်ႁဝ်းတေဝူၼ်ႉၽိတ်းယဝ်ႉ”
မၼ်းၼၼ်ႉၵေႃႈ တင်းၼႃႈဢမ်ႇၵီႈသေ ထွတ်ႇသိူဝ်ႈမၼ်းမႃးယိုၼ်ႈပၼ်ၶႃႈယဝ်ႉ
“သူၵေႃႉၵႂႃႇဢဝ်လႄႈ ႁဝ်းတႄႉဢမ်ႇမေႃဢဝ်ၼႃ!”
ၶႃႈၵေႃႈၼႅတ်ႈလႅၼ်ႈၵႂႃႇတၢင်းတူၼ်ႈမၢၵ်ႇၸွၵ်း ဢၼ်မီးယူႇသီႇႁႃႈတူၼ်ႈၼၼ်ႉယူႇ ၼူၼ်းမူဝ်ၼၼ်ႉၵေႃႈ ယိပ်းၸွၵ်းမၢၵ်ႇၵႃႇယဝ်ႉ ၸုၵ်းပႂ်ႉၶႃႈယူႇတႂ်ႈငဝ်ႈတူၼ်ႈမၢၵ်ႇၵႂႃႇၼၼ်ႉသေ ၶႃႈၼၼ်ႉတႄႉ ပိတ်းလႆႈၼိုင်ႈလုၵ်ႈၵေႃႈ ၵွၵ်းပိူၵ်ႇမၼ်းသေ ၵိၼ်ၸိမ်းတူၺ်းၵႂႃႇ ဢမ်ႇႁူႉဝႃႈမၢၵ်ႇၸွၵ်းႁိူၼ်းသႂ်လႅင်းၶဝ် မိူဝ်ႈၽုၵ်ႇမၼ်းလိုမ်းသႂ်ႇၵိူဝ်ဝၢၼ်ႁိုဝ် သူမ်ႈလႅမ်ဝိတ်း ၵိၼ်ၵိပ်ႇလဵဝ်တႃပေႃးလိၵ်းၼႃႈပေႃးႁူႇလူင်ၵႂႃႇၵမ်းလဵဝ်။
မိူဝ်ႈပဵၼ်ၸိူင်ႉၼၼ် ၶႃႈၼၼ်ႉၵေႃႈ ႁဵတ်းၵႅင်ႈၵိၼ် ႁၢင်ႈလီႁၢင်ႈဝၢၼ်ၼင်ႇၸဵမ်းဝႃႈၸဵမ်းယဝ်ႉ။
“ဝၢၼ်တေႉယဝ်ႉ ၵိၼ်တူၺ်းၼႄႇဢေးၼူၼ်း ၼမ်ႉလူင်မၼ်းၵိုၼ်းဝႃႈၵိုၼ်းယဝ်ႉ!”
ၼူၼ်းမူဝ်ၼၼ်ႉၵေႃႈ ယိုၼ်ႈမိုဝ်းမၼ်းမႃးဢဝ်သေယဝ်ႉ ၶႃႈၼၼ်ႉတႄႉ မိုင်ၸိူဝ်ႈပႂ်ႉတူၺ်းမၼ်းဢဝ်ၶဝ်ႈသူပ်းၵူၺ်း။ ႁိူဝ်ႇဢိူဝ်ႈ ၼႃႈလူင်မၼ်းၼၼ်ႉၵေႃႈ သမ်ႉပေႃးႁူႇလူင်မႃးၵမ်းလဵဝ်၊ ၼႅတ်ႈၶၢႆးပႅတ်ႈဝႆးဝႆးသေယဝ်ႉ ဢဝ်မၼ်းသမ်ႉပေႃးၵႅၼ်ႉဢွၵ်ႇမႃးယူႇ။ မၼ်းၵေႃႈ ၵိုင်ႉၵၢင်ႉပွႆႇၸွၵ်းမၢၵ်ႇၵႃႇၼၼ်ႉပႅတ်ႈသေ လမ်းၶႃႈ၊ သမ်ႉပေႃးဢမ်ႇတၼ်းတူၺ်းဝႃႈ မၢၵ်ႇၵႃႇၼၼ်ႉႁေႈမိူဝ်လူင်ၵႂႃႇမူတ်းယဝ်ႉ။ ၶႃႈၼၼ်ႉၵေႃႈႁိုဝ်တေႁူႉလႃႇဝႃႈမၼ်းႁေႈ ၽိူဝ်ႇလႅၼ်ႈမႃးပလၢတ်ႈမၼ်းလူမ်ႉ ၸင်ႇတေႁူႉၵူၺ်း။
“ႁိူဝ်ႇ! ဢေးၼူၼ်း! မၢၵ်ႇၵႃႇၵဝ်ႁေႈမူတ်းယဝ်ႉဢိူဝ်ႈ!” မၼ်းၼၼ်ႉၵေႃႈမိူၼ်တေတူၵ်းၸႂ်မိူၼ်ၵၼ်လႄႈ
“ႁိူဝ်ႇဢိူဝ်ႈ!”
ၸၢင်ႈႁဵတ်းႁိုဝ် ၵႃႈလႆႈၵဵပ်းသႂ်ႇသိူဝ်ႈၶိုၼ်းၵူၺ်း ၵတ်ႉၵႃႈၸွမ်းၸိူဝ်းၼၼ်ႉပဵၼ်တီႈပဵင်းမီးတူၼ်ႈယိူဝ်ႈၵူၺ်းလႃႈ။ ယွၼ်ႉမၼ်းၼမ်ၼႃႇလႄႈ သႂ်လႅင်းၶဝ်ပေႃးမႃးၶိုၼ်းယဝ်ႉ ႁႃးၵဵပ်းတမ်ႉပႆႇယဝ်ႉ
“ဢမ်ႇၸႂ်ႈၵဵပ်းမၢၵ်ႇၸွၵ်းယူႇႁႃႉ!”
“ဢေးယိင်းၼၼ်ႉၼႃႇ! လႅၼ်ႁဝ်းၵိၼ်မၢၵ်ႇၸွၵ်းႁေ ဢဝ်မၢၵ်ႇၵႃႇမၼ်းႁေႈၼၼ်ႉယိုင်”
“မၼ်းလဵင်ႉသူမၢၵ်ႇၸွၵ်းသူမ်ႈၼၼ်ႉၵႂႃႈ”
“ၸႂ်ႈယဝ်ႉဝႃႈ”
သႂ်လႅင်းၼၼ်ႉၵေႃႈ တူၺ်းၼႃႈႁႃးသေယုမ်ႉယဝ်ႉ။
“တၢင်းယုမ်ႇၵႂႃႇယုမ်ႇမၼ်းလူႉ” မၼ်းၼၼ်ႉၵေႃႈ ဝၢင်းသႃႉသွင်းၽၵ်းၼၼ်ႉသေ ၸူဝ်းဢွၼ်ဢဝ် ၶမ်းၽွင်ၶႃ သႅင်ႁၵ်ႉ ၵႂႃႇၵဵပ်းမၢၵ်ႇၸွၵ်း တူၼ်ႈၸိူဝ်းဢၼ်ၶႃႈပႆႇလႆႈၸိမ်းတူၺ်းၼၼ်ႉယူႇ၊ ႁႃးၵေႃႈၵဵပ်းမၢၵ်ႇၵႃႇႁႃး ၶဝ်ၵေႃႈၵဵပ်းမၢၵ်ႇၸွၵ်းၶဝ် ၵဵပ်းယဝ်ႉယဝ်ႉၵေႃႈ လႆႈဢွၼ်ၵၼ်ပွၵ်ႈမိူဝ်းၵႂႃႇၶိုၼ်းယဝ်ႉ။
ႁဝ်းၵေႃႈဢွၼ်ၵၼ်မႃးသုၵ်ႈမၢၵ်ႇသုၵ်ႈၽၵ်းႁဝ်းသေယဝ်ႉ သႂ်လႅင်းၼၼ်ႉၵေႃႈ ႁၢင်ႈႁႅၼ်းႁဵတ်းၽၵ်းလဵင်ႉႁဝ်းၵႂႃႇ။ ၶႃႈၼၼ်ႉတႄႉၵွပ်ႈဢမ်ႇမေႃႁဵတ်းလႄႈ သုၵ်ႈမၢၵ်ႇမႆႉယဝ်ႉၵေႃႈ ယိပ်းတင်းပၢၼ်ႉမၼ်းၼၼ်ႉသေ ဢဝ်မႃးၼင်ႈၵိၼ်ယူႇတၢင်းၼွၵ်ႈႁင်းၵူၺ်း ယဝ်ႉ။ မိူၼ်ဝႃႈမၢၵ်ႇၸွၵ်း ဢၼ်သႂ်လႅင်းၵဵပ်းၼၼ်ႉတႄႉ သမ်ႉပေႃးၸဵမ်းဝၢၼ်လူင်ဝႆႉယူႇ။ ပဵၼ်ၸဝ်ႈမၼ်းလႄႇၼေႃႈ ႁူႉယူႇၵူၺ်းၵႂႃႈတူၼ်ႈလႂ်သူမ်ႈတူၼ်ႈလႂ်ၸဵမ်း။
ဢမ်ႇႁိုင်ဢမ်ႇၼၢၼ်း သႂ်လႅင်းၼၼ်ႉၵေႃႈ ႁဵတ်းၽၵ်းသုၵ်းတမ်းတဵမ်ၽိူၼ်ဝႆႉ ယူႇယဝ်ႉ။ ၽၵ်းဢၼ်မၼ်းႁဵတ်းၼၼ်ႉတႄႉ ၽၵ်းၵၢတ်ႇလုင်းၶူဝ်ႈ၊ ၶင်ႇပွင်းၽၵ်းၼွၵ်ႇ ဢိၵ်ႇတင်းၼမ်ႉၽိတ်ႉၼွၵ်း ဢၼ်မီးၽၵ်းၵပ်းပေႃးတဵမ်ၽိူၼ်လူင်ဝႆႉ မီးၸဵမ်ၽၵ်းမီႇၽၵ်းၵီး၊ ၽၵ်းၵၢတ်ႇတူမ်ႈ၊ ထူဝ်ႇတူမ်ႈ၊ မၢၵ်ႇၵေႃႇလၶတူမ်ႈ၊ ၽၵ်းၼွၵ်ႇ၊ ၽၵ်းၶႅဝ်းတွင်း သေယဝ်ႉ ႁၢင်ႈႁႅၼ်းၵိၼ်ၶဝ်ႈၵၼ်ယူႇယဝ်ႉ။ လိူၵ်ႈလိူၵ်ႈတႅင်ပေႃးတဵမ်သူၼ်ၼၼ်ႉ ဢမ်ႇပႃးမႃးလႄႈ
“ႁိူဝ်ႇ! ၸွင်ႇလိုမ်းတႅင်ယဝ်ႉႁိုဝ်ၼႆႉ!”
ၶႃႈဢၼ်လႆႈငိၼ်းၸိူင်ႉၼၼ်ၵေႃႈ ၼႅတ်ႈလုၵ်ႉၵႂႃႇတၢင်းဝၢၼ်ႇမၢၵ်ႇမႆႉ ဢၼ်သုၵ်ႈဝႆႉၼၼ်ႉသေ ယိုၼ်ႈပၼ်မၼ်းၵႂႃႇယူႇ
“တၼ်းၵဵပ်းၸဵမ်မိူဝ်ႈလႂ်လႃႇ”
“ၵဵပ်းမိူဝ်ႈႁဝ်းၵႂႃႇၵဵပ်းမၢၵ်ႇၵႃႇႁူင်ႈၸွမ်းလိၼ်ၼၼ်ႉၼႃႇ”
ဝူၼ်ႉယဝ်ႉၵေႃႈမိူဝ်ႈၼၼ်ႉ ယဵၼ်ႉဢမ်ႇလႆႈႁူၺ်ႇမၼ်းလဝ်းလီၼႃႇလႄႈ ၶႃႈၵေႃႈလႆႈၵဵပ်းသႂ်ႇမႃးၸွမ်းၸွၵ်းမၢၵ်ႇၵႃႇႁေၼၼ်ႉၼႃႇ။ သႂ်လႅင်းၼၼ်ႉၵေႃႈ လုၵ်ႉဢဝ်ၵႂႃႇပွၵ်ႇသႂ်ႇဝၢၼ်ႇမႃးတမ်းပၼ်ယဝ်ႉ။
ႁဝ်းၵေႃႈၵိၼ်ၶဝ်ႈၵုမ်းၵၼ်ၵႂႃႇ ပဵၼ်တႃႇၶဝ်ႈဢၼ်ဝၢၼ်တေႉယဝ်ႉ၊ ၵိၼ်ၵိၼ်ဢုပ်ႇဢုပ်ႇ ဢမ်ႇတၼ်းႁူႉႁင် ၶႃႈၵိၼ်ၵႂႃႇပေႃးတၼ်းမူတ်းပဵၼ် သွင်ဝၢၼ်ႇယဝ်ႉ။ ၵိၼ်ၼမ်ၼႃႇဢႃးလႃး တွင်ႉၵေႃႈၵွႆႈယူႇၵွႆႈၵႆႈမႃး လုၵ်ႉပေႃးဢမ်ႇၶႂ်ႈလႆႈယဝ်ႉ ၸၢင်ႈတေႁဵတ်းႁိုဝ် ၶွင်ဝၢၼ်ၶွင်မၵ်ႉလႄႈ ၵိၼ်သႂ်ႇတိၵ်းတိၵ်းၼၼ်ႉၼႃႇ၊ ၼမ်ႉၽိတ်းၼႆႉမဵဝ်းၵိၼ်ၵပ်းၶဝ်ႈဝၢၼ်ၼႃႇလူင်။ ပိူၼ်ႈပေႃးလုၵ်ႉၵႂႃႇသိမ်းၽိူၼ်ၵၼ်မူတ်းယဝ်ႉ ၶႃႈတႄႉ တိုၵ်ႉၼင်ႈငိူဝ်ႈယူႇႁိမ်းၽိူၼ်ၼၼ်ႉ ထိုင်တီႈၶမ်းၽွင်ၶႃၼူၼ်းမူဝ် ပေႃးလႆႈၸွႆႈလုၵ်ႉဢဝ်ၼၼ်ႉၼႃႇ။
ၽိူဝ်ႇတူၺ်းၵႂႃႇတူၺ်းမႃး ဢမ်ႇတၼ်းႁူႉ ပေႃးမီးၵႂႃႇသီႇမူင်းပၢႆယဝ်ႉ။ တေမိူဝ်းၵမ်းလဵဝ်သမ်ႉတွင်ႉတိုၵ်ႉၵႂ်ႈယူႇ၊ ပေႃးၼၢၼ်းမိူဝ်းသမ်ႉတေႁွတ်ႈႁိူၼ်းၶမ်ႈ။ ၼူၼ်းမူဝ်၊ သႅင်ႁၵ်ႉ၊ ၶမ်းၽွင်ၶဝ် ၼၼ်ႉတႄႉ ဢွၼ်ၵၼ်ႁၢင်ႈႁႅၼ်းတူဝ်ၵၼ်ယဝ်ႉလီငၢမ်းယူႇ၊ ပေႃးၶႃႈဝႃႈၽွမ်ႉယဝ်ႉၼႆၵေႃႈ ၶဝ်ပေႃးလူဝ်ႇပၼ်ႇလူတ်ႉထိပ်ႇၶဝ်ၵူၺ်း ယဝ်ႉ။ ၶႃႈၼၼ်ႉသမ်ႉ ပေႃးဝႃႈၵိၼ်ဢိမ်ႇႁႅင်းၼႃႇ ယႃႇဝႃႈတေလုၵ်ႉၵႂႃႇလႃႈ လူဝ်ႇမႄးၼွၼ်းၶိုၼ်းၵူၺ်း ထိုင်တီႈၶႃႈသမ်ႉပေႃးလၢတ်ႈဢွၵ်ႇမႃး
“သႂ်လႅင်း! ယွၼ်းႁဵတ်းၶႅၵ်ႇသေၶိုၼ်းဢမ်ႇလႆႈႁႃႉ!”
“လႆႈယူႇလေႃႇ!”
“သႂ်လႅင်းၼႆႉၵေႃႈ ႁၢင်ႈၸွမ်းၸႂ်မၼ်းၼႃႇ ၵမ်ႉၼၢႆးၶဝ်တေလႃႇမၼ်းယဝ်ႉ ႁႂ်ႈမၼ်းမိူဝ်းလႄႈ ယႃႇႁႂ်ႈမၼ်းၼွၼ်း” ၼူၼ်းမူဝ်လၢတ်ႈ ဢဝ်ၶႃႈသမ်ႉပေႃးႁၼ်ၼႃႈၼၢႆးႁဝ်း ယူႇယဝ်ႉ။
ၸၢင်ႈႁဵတ်းႁိုဝ်လႃႇ ၶႃႈၵေႃႈၵႃႈလႆႈလုၵ်ႉမႃးသေ သူင်ႇသင်ႇသႂ်လႅင်းယဝ်ႉ။ ဢူႈမႄႈၶဝ်ၼၼ်ႉၵေႃႈ ၸွၵ်းပၼ်မၢၵ်ႇမႆႉႁဝ်းဢၼ်ၵဵပ်းမႃးမိူဝ်ႈၵႆႈၼၼ်ႉ ၵေႃႉၸွၵ်းၸွၵ်းသႂ်ႇၼႂ်းသွင်းလူတ်ႉထိပ်ႇႁဝ်းသေ ႁဝ်းၵေႃႈမိူဝ်းၵႂႃႇလွႆးလွႆးယူႇ။
ၽွင်းဢၼ်ပၼ်ႇလူတ်ႉထိပ်ႇၶဝ်ႈဝဵင်းမႃးၶိုၼ်းၼၼ်ႉ လႆႈလတ်းၽၢၼ်ႇထုင်ႉၼႃးဢၼ်ၵႂၢင်ႈယႂ်ႇ၊ သီၶဵဝ်ၶဝ်ႈၼႃးတူင်ႉၼိုင်သၼ်ႇၶွၼ်းဝႆ၊ ႁူင်းၶဝ်ႈမုတ်းဢွၵ်ႇယွႆႉယွတ်ႇၵွမ်ႈၵွမ်ႈမၢၵ်ႈလီ၊ လူမ်းၽတ်ႉဢီးထွင်း သုတ်ႇၼူမ်မႅၼ်ႈၺႃးဢၢႆမၼ်း ပေႉၵႅၼ်ႇမႃးႁွမ်၊ တွင်ႉၾႃႉသီလိူင်ၶမ်းငဝ်း ႁိူဝ်ႈဝဝ်းယူႇတၢင်းတူၵ်း ၽွင်းတႃဝၼ်းၸၢႆႉၸိူၼ်းၸမ်လပ်ႉလွႆ ၵမ်ႉထႅင်ႈတၢင်းႁၢင်ႈလီထုင်ႉၼႃးၼၼ်ႉ လီယၵ်ႉလီယဵမ်ႈ သၽႃႇဝမိူင်းႁဝ်း ႁၢင်ႈလီထိုင်တၢၼ်ႇၼႆႉႁႃႉ မိူၼ်ၶႃႈၸင်ႇႁႃႁပ်ႉႁူႉလႆႈမၼ်း ဝၼ်းမိူဝ်ႈၼႆႉၵူၺ်း။
တွၼ်ႈသၢဝ်းႁူၵ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢဝ်းၸဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
