တွၼ်ႈသၢဝ်းႁႃႈ
ပၢင်တွပ်ႇလိၵ်ႈဢၼ်ဝႃႈၼၼ်ႉ တွၼ်ႈတႃႇလုၵ်ႈႁဵၼ်းၶဝ်ၼႆႉ လႆႈဝႃႈပဵၼ်ပၢင်တိုၵ်းလူင်ဢၼ်ၼိုင်ႈ၊ ပဵၼ်ပၢင်တိုၵ်းဢၼ်ၸႂ်ႉ ပၢႆးဝူၼ်ႉ၊ ဢဝ်လွင်ႈမၢႆတွင်း ပဵၼ်ၶိူင်ႈမိုဝ်းၼၼ်ႉယဝ်ႉ၊ ယွၼ်ႉပိူဝ်ႈဢမ်ႇႁူႉဝႃႈၽူႈၶဵၼ် ဢၼ်ပဵၼ်ၶေႃႈထၢမ်ၼၼ်ႉတေမႃးၸိူင်ႉႁိုဝ် လႄႈ ၼင်ႇႁိုဝ်တေႁပ်ႉမိုဝ်းမၼ်းဝႆႉလႆႈၼၼ်ႉၵေႃႈ တေလႆႈႁၢင်ႈႁႅၼ်းၶိူင်ႈမိုဝ်း ႁႂ်ႈၽွမ်ႉတူဝ်ႈတၼ်းယူႇတႃႇသေႇ။ ပေႃးဢမ်ႇမီးလွင်ႈႁၢင်ႈႁႅၼ်းၵေႃႈ တိုဝ်ႉတၢင်းတႃႇတူၵ်းသုမ်းၼၼ်ႉမီးၼမ်ယူႇ၊ သင်မီးလွင်ႈယုမ်ႇယမ်လႄႈ မီးလွင်ႈႁၢင်ႈႁႅၼ်းလႆႈလီၵေႃႈ တႃႇတေဢွင်ႇပေႉလႆႈဢၼ်ဝႃႈၼၼ်ႉ တေႁၼ်လူင်ႈၼႃႈဝႆႉထႃႈယဝ်ႉ။
ၶၢဝ်းၾူၼ်ၸမ်ဝၢႆး ၶၢဝ်းၼၢႆးယွတ်ႇဢွႆမႃးလွႆးလွႆး ပၢင်တွပ်ႇလိၵ်ႈလူင်ပွၵ်ႈၵမ်းၼိုင်ႈ ဢၼ်ဝႃႈၼၼ်ႉၵေႃႈ ၸမ်ထိုင်မႃးယဝ်ႉ၊ လုၵ်ႈႁဵၼ်းၶဝ်ၼႂ်းႁူင်းႁဵၼ်းၼၼ်ႉ ဢွၼ်ၵၼ်ၽိုၵ်းၽွၼ်ႉလိၵ်ႈၵၼ် ပေႃးပၼ်းလူင်ၵႂႃႇမူတ်းယူႇ။ ဢမ်ႇဝႃႈၸွမ်းသႃလႃး ၸွမ်းသူၼ်ၸိူဝ်းၼၼ်ႉ ၶူးၶဝ်ၵေႃႈပၼ်ၶၢဝ်းယၢမ်းတႃႇတေလူဢၢၼ်ႇလိၵ်ႈ တွၼ်ႈတႃႇတေတွပ်ႇၼၼ်ႉ ၼႆယဝ်ႉ။ ၼင်ႇႁိုဝ်တေႁၢင်ႈႁႅၼ်းတွပ်ႇလိၵ်ႈၼႆၼၼ်ႉ ၶူးၶဝ်ၵေႃႈလႆႈဢိုတ်းႁဵၼ်းပၼ်ယူႇ သွင်ဝၼ်းၼႆႉယဝ်ႉ။
ၶႃႈၼၼ်ႉၵေႃႈ ႁိုဝ်တေယွမ်းသုမ်းလႃႇ၊ ၼင်ႇႁိုဝ်ပေႃးတေဢွင်ႇပူၼ်ႉၸၼ်ႉၵႂႃႇ၊ ၼင်ႇႁိုဝ်ပေႃးတေဢမ်ႇသုမ်းငိုၼ်း၊ ဢမ်ႇသုမ်းႁႅင်းဢၼ်ၼၢႆးႁဝ်း ႁႃပၼ်ႁႂ်ႈလႆႈၶိုၼ်ႈႁဵၼ်းသွၼ်လိၵ်ႈၼၼ်ႉ၊ ၵၢင်ၶမ်ႈၼႆၵေႃႈ ၶတ်းၸႂ်လူတူၺ်းတင်းၶိုၼ်းတင်းၶိုၼ်းယဝ်ႉ၊ ၵၢင်ၼႂ်ၼႆၵေႃႈ ၶႃႈလၢတ်ႈႁႂ်ႈဢၢႆႈၸၢႆးမႃးပူၵ်းၶႃႈႁေ မိူၼ်ၼင်ႇဝႃႈၼၼ်ႉယဝ်ႉ လုၵ်ႉၸဝ်ႉႁႅင်းၼႃႇ သမ်ႉဝႃႈၶႃႈတေၶတ်းၸႂ် ၽတ်းလိၵ်ႈလူလိၵ်ႈယူႇသေတႃႉ တႃၼွၼ်းဢမ်ႇၸိုၼ်ႈလႄႈ ၶႃႈလႄႈပပ်ႉၶႃႈၼၼ်ႉၵေႃႈ ၼွၼ်းလပ်းၵွင်ၵၼ်ၶိုၼ်း တေႃႇထိုင်မိူင်းလႅင်းႁေၵူၺ်း ယဝ်ႉ။
ပေႃးမႃးဝူၼ်ႉတူၺ်းၶိုၼ်း ဢၼ်ၶႃႈၶတ်းၸႂ်တူၺ်း ၶတ်းၸႂ်လူမႃးမိူဝ်ႈဝၼ်းပူၼ်ႉ ၵူႈၶမ်ႈၵူႈၶမ်ႈၼၼ်ႉ ၼင်ႇႁၢင်ႈပေႃးလူဝ်ႇတွပ်ႇမႃးၼႆၶႃႈ သမ်ႉပေႃးဢမ်ႇတွင်းႁေတူဝ်ယဝ်ႉလႄႈ လႆႈမႃးမႄးလူၶိုၼ်းတင်းမူတ်းယူႇ။ သင်ႁူႉၼၼ်ၶႃႈမႃႇဢၢၼ်ႇယဝ်ႉမိူဝ်ႈၼၼ်ႉ ပေႃးတေလႆႈဢၢၼ်ႇၶိုၼ်းၸိူင်ႉၼႆ။ ၼၢႆးႁဝ်းၼၼ်ႉၵေႃႈ မွင်းႁူႉဝႃႈပိူၼ်ႈတေတွပ်ႇလိၵ်ႈယဝ်ႉၼႆ ႁိုဝ်ႁတ်းပၼ်ႁဵတ်းၵၢၼ်သင်လႃႇ ၸႂ်ႉႁႃးဢၢၼ်ႇလိၵ်ႈတိၵ်းတိၵ်းၵူၺ်းၼၼ်ႉယဝ်ႉ။ ၶႃႈတႄႉႁိုဝ်တေဢၢၼ်ႇလႆႈၼႄႇ ပေႃးၵၢင်ဝၼ်းၼႆတႄႉ တင်းမွၼ်ႁူဝ်ဢူၼ်ႈဢူၼ်ႈၼၼ်ႉႁေ ၼွၼ်းပေႃးလိုမ်းႁၢင်ႈလိုမ်းတူဝ် သမ်ႉပေႃးၶႂ်ႈလိုမ်းပႃးလိၵ်ႈယဝ်ႉၵွၼ်ႇ။
ထိုင်ဝၼ်းတွပ်ႇလိၵ်ႈမႃးယဝ်ႉ ႁၼ်လုၵ်ႈႁဵၼ်းၶဝ် ဢွၼ်ယိပ်းတင်းပပ်ႉတင်းၵမ် ႁၢင်ႈႁႅၼ်းတႃႇတေတွပ်ႇၵၼ်ႁင်းၽႂ်ႁင်းမၼ်းယူႇ။ ၵမ်ႈၽွင်ႈၵေႃႈ တေၶဝ်ႈႁွင်ႈယဝ်ႉ ၵူဝ်ဢမ်ႇတွင်း ၼႅတ်ႈဢွၼ်ၵၼ်ဢၢၼ်ႇတေႉဢၢၼ်ႇဝႃႈ။ ၶႃႈၼၼ်ႉတႄႉဢဝ်ၵၢမ်ႇမၼ်းဝႃႈယဝ်ႉ တွင်းႁိုဝ်ဢမ်ႇတွင်းႁိုဝ်ၵေႃႈတိူင်းမၼ်းႁေ၊ ၶႂ်ႈဢၢၼ်ႇၶိုၼ်းယူႇၵေႃႈ ဢမ်ႇၸၢင်ႈဢၢၼ်ႇယဝ်ႉ ၵွပ်ႈဝႃႈၶမ်ႈဝႃးၼၼ်ႉ ၶႃႈဢၢၼ်ႇလိၵ်ႈလိုၵ်းပႅတ်ႈလႄႈ လိုမ်းသိမ်းပပ်ႉသႂ်ႇၼႂ်းထူင်ႁေ ဢမ်ႇလႆႈဢဝ်မၼ်းမႃးသႂ်ႇၸွမ်း၊ လိူဝ်သေၼၼ်ႉ ထူၵ်းတူၺ်းၼႂ်းထူင်ၵေႃႈ သမ်ႉဢမ်ႇလႆႈဢဝ်ၵမ်ၸိုမ်းမႃးပႃးထႅင်ႈၵွၼ်ႇ၊ တေတွပ်ႇလိၵ်ႈယူႇယဝ်ႉ တၢင်းလိုမ်းၶႃႈၼၼ်ႉၵေႃႈ ႁဵတ်းၵၢၼ်လႆႈလီတႄႉၼင်ႇၵဝ်ႇဝႃႈ။ ၶႃႈထၢင်ႇတႄႉ လိၵ်ႈဢၼ်ၶႃႈၶတ်းၸႂ်ဢၢၼ်ႇမႃးၼၼ်ႉၵေႃႈ လႅပ်ႈတေလိုမ်းပႃးယဝ်ႉဝႃႈ ပေႃးဝႃႈမိူဝ်ႈၼႆႉၶႃႈဢမ်ႇလႆႈၵေႃႈ မိူဝ်ႈၽုၵ်ႈမိူဝ်းႁိုဝ်းမႃး ၶႃႈတိုၼ်းတေဢမ်ႇဢၢၼ်ႇလိၵ်ႈ ၼၼ်ႉယဝ်ႉ။
လိူၵ်ႈလိူၵ်ႈမိူဝ်ႈတေၶဝ်ႈႁွင်ႈၼၼ်ႉၵေႃႈ ၸွမ်ၶိူဝ်းသမ်ႉမႃးႁႃၶႃႈသေယဝ်ႉ
“ၶတ်းၸႂ်ၼႃႈ!”
မိူဝ်ႈႁၼ်ၼႃႈၶဝ်ၼၼ်ႉၵေႃႈ လႆႈဝႃႈၵၢမ်ႇလီယူႇ
“ယွၼ်းယိမ်ၵမ်လႅမ်ႈလူႉ!”
“တေၶဝ်ႈႁွင်ႈယူႇယဝ်ႉ ယင်းဢမ်ႇပႆႇမီးၵမ်ယူႇႁႃႉၼႆႉ ဢမ်ႇၸႂ်ႈဝႃႈလိုမ်းပႃးလိၵ်ႈယဝ်ႉယူဝ်ႉ” တင်းလၢတ်ႈ တင်းဢဝ်ၵမ်မၼ်းၼၼ်ႉ ယိုၼ်ႈပၼ်ၶႃႈမႃးယူႇယဝ်ႉ။
“ၵဝ်ယုမ်ႇယူႇဝႃႈမႂ်းတေႁဵတ်းလႆႈယူႇၼႃႈ” လုပ်ႈႁူဝ်ၶႃႈလွႆးလွႆးယဝ်ႉ ပူၼ်ႉၶဝ်ႈႁွင်ႈတွပ်ႇလိၵ်ႈမၼ်းၵႂႃႇ။
ၶႃႈၵေႃႈဢမ်ႇလႆႈသႂ်ႇၸႂ်ၸွမ်းႁေၵႃႈႁိုဝ်၊ မိူဝ်ႈၶူးၶဝ်ၽုၺ်ႇႁွင်ႈမႃးယဝ်ႉၼႆၵေႃႈ ၸႂ်ၶိုၼ်ႈ၊ ၸႂ်ၵူဝ်၊ ၸႂ်သၼ်ႇ၊ လူမ်းတွင်ႉဢိဝ်ႈၵေႃႈမႃး လေႃးပႃးၵၼ်မူတ်းယဝ်ႉ ပေႃးတေဝႃႈတေႉတွပ်ႇလိၵ်ႈမႃးယူႇၵူႈပီႊၵေႃႈ တေၶဝ်ႈႁွင်ႈတွပ်ႇလိၵ်ႈမိူဝ်ႈလႂ် ႁၢင်ႈပဵၼ်ၼႆယူႇသေႇသေႇ ဢမ်ႇယၢမ်ႈသေပွၵ်ႈၼၼ်ႉယဝ်ႉ။ မိူဝ်ႈဢၼ်ၶူးၶဝ် ၸႅၵ်ႇပၼ်ၽိုၼ်ၶေႃႈထၢမ်ၼၼ်ႉၶႅၼ်းၼႃႇ ႁိူဝ်ႇသမ်ႉပေႃးၶႂ်ႈတႅၵ်ႇယဝ်ႉ၊ ၼႂ်းႁွင်ႈၼၼ်ႉၵေႃႈ သမ်ႉပေႃးယဵၼ်သႅပ်း လိူတ်ႈၸွမ်းၼႃႈၼႆႉၵေႃႈ ပေႃးဢမ်ႇၶႆႈလိူဝ်သင်ၼၼ်ႉယိုင်။ မိူဝ်ႈလႆႈႁၼ်ၶေႃႈထၢမ် ၸႂ်ၸင်ႇတေယဵၼ်မႃးလႆႈသေ တွပ်ႇၵႂႃႇၼင်ႇဢၼ်ၶႃႈတွင်းလႆႈၼၼ်ႉဢွၼ်တၢင်း ယူႇယဝ်ႉ။
ၶႃႈၵေႃႈတင်းလႆႈႁေဢမ်ႇလႆႈႁေ တွပ်ႇၵႂႃႇယဝ်ႉ လိူၵ်ႈလိူၵ်ႈသမ်ႉၵႂႃႇသူင်ႇမိူဝ်ႈလဵဝ်ၵၼ်တင်း ဢၢႆႈဢွင်ႇၼၼ်ႉလႄႈ လႆႈႁၼ်ႁင်းမၼ်းၼၼ်ႉတႄႉ သူင်ႇၶေႃႈထၢမ်မၼ်းပၼ်ၶူးၶိုၼ်းၵူၺ်း ဢမ်ႇတွပ်ႇသေဢိတ်း၊ ၵူၼ်းၸိူင်ႉၼင်ႇၶဝ် ယူႇၼႂ်းႁွင်ႈၵေႃႈဢမ်ႇလႆႈတင်ႈၸႂ်ႁဵၼ်းယူႇယဝ်ႉ သူင်ႇဢၼ်ပဝ်ႇမၼ်းၵႂႃႇၵူၺ်း ဢမ်ႇလၢၵ်ႇလၢႆးသင်ၼင်ႇၵဝ်ႇ။ တွပ်ႇၵႂႃႇယဝ်ႉ ၽႃႇသႃႇဢိင်းၵလဵတ်ႈဢၼ်ၼိုင်ႈ ၶႅၼ်းၸႂ်မႃးဢိၼ်ႉ။
တွပ်ႇၽႃႇသႃႇၼိုင်ႈယဝ်ႉၵႂႃႇၵေႃႈ တေလႆႈမိူဝ်းလိုမ်ႉၽိုၵ်းၽွၼ်ႉၶိုၼ်းထႅင်ႈ ၽႃႇသႃႇဢၼ်ၼိုင်ႈ၊ ဝၼ်းယဝ်ႉဝၼ်း ၵုမ်ႇမိုင်ႉတူၺ်းလိၵ်ႈတူၺ်းလၢႆးၵူၺ်း သမ်ႉပေႃးဢမ်ႇတၼ်းလဵၼ်ႈတၼ်းႁဵတ်းသင်ယဝ်ႉ။ သၢမ်ဝၼ်းယဝ်ႉၵႂႃႇ ဢမ်ႇတၼ်းႁူႉသင် ဝၼ်းထီႉသီႇဝၼ်းလိုၼ်းသုတ်း ၽႃႇသႃႇလိုၼ်းသုတ်း ပဵၼ်ၽႃႇသႃႇပိုၼ်းၼႆလႄႈ လႆႈဢဝ်ဢလွတ်ႈမၼ်းၼမ်လိူဝ်ပိူၼ်ႈၼၼ်ႉယဝ်ႉ။ မိူဝ်ႈပိူၼ်ႈဢွၼ်ၵၼ်တိုၵ်ႉၶဝ်ႈထႅဝ် တၢင်ႇၸွမ်ပိဝ်ၵၼ်ယူႇၼၼ်ႉ လိူၵ်ႈလိူၵ်ႈၸၢႆးၸၢႆးၼၼ်ႉၵေႃႈ မဝ်းလူမ်ႉလူင်းၵႂႃႇၼႂ်းထႅဝ်ၼၼ်ႉၵမ်းလဵဝ်။ ပွၵ်ႈၼႆႉ လၢတ်ႈလႆႈဝႃႈတေပဵၼ်ႁၢႆႉႁႅင်းဝႆႉယူႇ ၶူႈၼင်ၵေႃႈလိူတ်ႈဢွၵ်ႇပႃး ၶူးပဵင်းလၢဝ်ၵေႃႈ ၼႅတ်ႈဢွၼ်ဢဝ်ၵႂႃႇႁူင်းယႃယူႇ။ ဝၼ်းမိူဝ်ႈၼႆႉၵေႃႈ မၼ်းၵေႃႈဢမ်ႇလႆႈတွပ်ႇလိၵ်ႈၸွမ်းပိူၼ်ႈၵႂႃႇႁေယဝ်ႉ။
မိူဝ်ႈၶႃႈႁၼ်ၸိူင်ႉၼၼ်ၵေႃႈ ဢမ်ႇႁူႉဝႃႈပဵၼ်သင် ၸႂ်ၵေႃႈဢမ်ႇလီၸွမ်းမၼ်းမႃးယဝ်ႉ မိူၼ်ဝႃႈမၼ်းၼၼ်ႉ တေတူၺ်းလိၵ်ႈၼမ်ပူၼ်ႉတီႈၼႃႇ ထိုင်တီႈလႆႈပဵၼ်ၸိူင်ႉၼၼ်မႃးယူႇ။ သမ်ႉဝႃႈမႆႈၸႂ်တၢၼ်ႇလႂ်ၵေႃႈ ပၢင်တိုၵ်းဢၼ်တိုၵ်ႉၵိုတ်းလိူဝ်ယူႇပႃႈၼႃႈၶႃႈၼၼ်ႉ ႁူႉတေလႆႈတေႃႇသူႈၸွမ်းမၼ်းႁႂ်ႈယဝ်ႉႁေၵွၼ်ႇ ၼၼ်ႉယဝ်ႉ။
မွင်းၶႃႈဢွၵ်ႇႁွင်ႈတွပ်ႇလိၵ်ႈမႃးၵူၺ်း လႆႈႁၼ်ၼူၼ်းမူဝ်မႃးႁႄႉတၢင်းၶႃႈၼၼ်ႉသေယဝ်ႉ။
“တွပ်ႇလႆႈယူႇႁႃႉ!..”
“ဢမ်ႇႁူႉယဝ်ႉ!”
“ပဵၼ်သင်လႄႈဝႃႈၼၼ်လႃႇ ဢမ်ႇယုမ်ႇၸႂ်တူဝ်ၵဝ်ႇႁႃႉ!.. တူၺ်းသီၼႃႈသူတႄႉလႅပ်ႈတေတွပ်ႇလႆႈယူႇၵူၺ်း”
“ပဵၼ်သင်လႄႈပႆႇမိူဝ်းလႃႇ!”
“ပႂ်ႉသူလႄႈ သႂ်လႅင်းၼၼ်ႉၼႃႇ ႁဝ်းၵႂႃႇၸႂ်းၸၢႆးၸၢႆးတီႈႁူင်းယႃၸွမ်းၵၼ်”
“ပဵၼ်သင်လႄႈႁဝ်းတေလႆႈၵႂႃႇၸွမ်းလႃႇ!”
“သူမိူဝ်းႁိူၼ်းၵေႃႈဢမ်ႇၸၢင်ႈမိူဝ်းႁဵတ်းသင်ၼင်ႇၵဝ်ႇ”
ၵွပ်ႈဝႃႈတွပ်ႇလိၵ်ႈယဝ်ႉၼႆၵေႃႈ ပိူၼ်ႈတေဢိုတ်းႁဵၼ်းပၼ်ၸွမ်းၵမ်းလဵဝ်ယူႇယဝ်ႉ။ ပွၵ်ႈၼႆႉၵေႃႈ ပိူၼ်ႈတေဢိုတ်းပၼ်ယူႇမွၵ်ႈသိပ်းဝၼ်းၼႆႉလႄႈ ၶႃႈၵေႃႈပႆႇႁူႉဝႃႈဝၼ်းလိုဝ်ႈၼႆႉတေႁဵတ်းသင် မိူဝ်ႈၼႆႉၵေႃႈ တေဢၢၼ်းမိူဝ်းၼွၼ်းပွႆႇတူဝ်ပွႆႇၸႂ်ယူႇတီႈႁိူၼ်းၼၼ်ႉၵူၺ်း။
“ၸၢင်ႈဢိူဝ်ႈ! ႁဝ်းမီးၵၢၼ်လူဝ်ႇႁဵတ်းတင်းၼမ်ၼၼ်ႉယဝ်ႉ!”
“ၼွၼ်းတင်းဝၼ်းတင်းဝၼ်းဢမ်ႇလီၼႃ လူဝ်ႇလႆႈတူင်ႉတူင်ႉၼိုင်ၼိုင်ၽွင်ႈဢိူဝ်ႈ”
“ႁဵတ်းႁိုဝ်ႁူႉလႃႇဝႃႈႁဝ်းတေမိူဝ်းၼွၼ်း!”
“ၼႃႈတႃသူလၢတ်ႈၼႄမူတ်းယဝ်ႉၼႃႈ” ၵွတ်ႇဢဝ်ၶႅၼ်ၶႃႈဝႆႉသမ်ႉပေႃးမၼ်ႈတဵင်ႈတဵင်ႈသေ “ႁဝ်းဢမ်ႇပၼ်သူမိူဝ်းလေႃႇၼႃႈ ပႂ်ႉႁႂ်ႈသႂ်လႅင်းဢွၵ်ႇႁွင်ႈမႃးၵွၼ်ႇလႄႈ”
ယၢမ်းၼၼ်ႉၵေႃႈ လႆႈႁၼ်သႅင်ႁၵ်ႉလႄႈၶမ်းၽွင် မႃးၸွမ်းၵၼ် ၼင်ႇၸႂ်ဢမ်ႇပေႃးလီႁေၵႃႈႁိုဝ်ၼၼ်ႉယဝ်ႉ။ ၼူၼ်းမူဝ်ၸင်ႇႁွင်ႉၸူးၶႃၵႂႃႇႁေ
“ႁေႉ!..သႅင်ႁၵ်ႉ..ၶမ်းၽွင် မႃးတၢင်းၼႆႉလႄႈ”
ၶႃၵေႃႈဢွၼ်ၵၼ်ပႆမႃးတီႈႁႃးယူႇၼၼ်ႉယဝ်ႉ။
“တူၺ်းသီၼႃႈသူသွင်ၵေႃႉလႅပ်ႈဢမ်ႇပေႃးလီႁေၵႃႈႁိုဝ်လႃႇ”
“ဢိုမ်ႈ! ႁဝ်းတွပ်ႇၽိတ်းႁူဝ်ၶေႃႈမၼ်းၵႂႃႇသွင်ႁူဝ်” ၶမ်းၽွင်လၢတ်ႈၼင်ႇဢမ်ႇမီးႁႅင်းသေဢိတ်းၼၼ်ႉယဝ်ႉ။
“ႁဝ်းဢမ်ႇလႆႈတွပ်ႇႁူဝ်ၼိုင်ႈ ဢမ်ႇလႆႈတူၺ်းပႃး”
“ဢမ်ႇပဵၼ်သင်လေႃႇၼႃႈ ပူၼ်ႉၵႂႃႇယဝ်ႉ မွၵ်ႈၼၼ်ႉၵူၺ်းမၼ်းၵေႃႈဢမ်ႇယွမ်းၼမ်ႁေၵႃႈႁိုဝ်လေႃႇ”
“ၸႂ်ႈဢိူဝ်ႈၵူၼ်းၸိူင်ႉၼင်ႇသူၶႅၼ်ႇယူႇယဝ်ႉလူး ပေႃးဢမ်ႇမႃးပဵၼ်ႁဝ်းသူတေႁဵတ်းႁိုဝ်ႁူႉလႃႇ”
ၶႃႈၼၼ်ႉတႄႉ တင်းလႆႈႁေဢမ်ႇလႆႈႁေ တွပ်ႇယဝ်ႉၵႂႃႇယဝ်ႉၼႆၵေႃႈ ပဵၼ်ဢၼ်လူမ်ၸႂ်တႄႉတႄႉယဝ်ႉ။ ၸင်ႇလၢတ်ႈတီႈၶဝ် ဢၼ်ၶမ်ၸႂ်ယူႇၼၼ်ႉၵႂႃႇဝႃႈ “တွပ်ႇယဝ်ႉၵႂႃႇယဝ်ႉ တေဝူၼ်ႉၸွမ်းႁဵတ်းသင် ဢမ်ႇၸၢင်ႈဢဝ်ၶိုၼ်းမႃးလႆႈၵဝ်ႇ တႃႉမိူဝ်းၼွၼ်းလဵၼ်ႈႁေဢမ်ႇလီႁိုဝ်”
“သူၸွင်ႇတေၵႂႃႇႁူင်းယႃၸွမ်းႁဝ်းၼႄႇ” ၼူၼ်းမူဝ်ၼၼ်ႉၵေႃႈ ထၢမ်ၵႂႃႇတီႈသႅင်ႁၵ်ႉၶႃၶမ်းၽွင်ၼၼ်ႉယူႇ။
“ဢိုမ်ႈ! ၵႂႃႇၵေႃႈလီယူႇၵူၺ်း”
သွင်ၶႃၵေႃႈလႆႈၵိုတ်းပႂ်ႉသႂ်လႅင်းၸွမ်းႁႃးယူႇယဝ်ႉ။ ၵမ်းၼၼ်ႉ လႆႈႁၼ်သႂ်လႅင်းလႄႈၸိုၼ်ႈသႂ်ပႆမႃးၸွမ်းၵၼ်မႃးတၢင်းႁႃးၼၼ်ႉယူႇ။
ၸိုၼ်ႈသႂ်ၼၼ်ႉၵေႃႈ လႆႈဢွၵ်ႇႁူင်းပလိၵ်ႈမႃး ၼႂ်းဝၼ်းဢၼ်ႁဝ်းၵႂႃႇၸႂ်းမၼ်းၼၼ်ႉၵူၺ်း၊ ယွၼ်ႉမီးၽူႈမီးပုၼ်ႈၽွၼ်းယိင်းၵေႃႉၼိုင်ႈ လႆႈၸွႆႈထႅမ်မၼ်းဝႆႉယဝ်ႉ။ တွၼ်ႈတႃႇသၢႆႈတႅၼ်းၶိုၼ်း ဢၼ်ပလိၵ်ႈယိင်းၵေႃႉၼၼ်ႉၸွႆႈထႅမ်မၼ်းၼႆၵေႃႈ ပေႃးမီးၶၢဝ်းယၢမ်းၼႆ ႁႂ်ႈမၼ်းၵႂႃႇႁဵတ်းၵၢၼ်ၸွႆႈၼႆယူႇ။ ဝၼ်းမိူဝ်ႈၼႆႉၵေႃႈ မိူၼ်ဝႃႈမၼ်းၼၼ်ႉ တေလႆႈၵႂႃႇႁူင်းပလိၵ်ႈ ႁဵတ်းၵၢၼ်သၢႆႈၼီႈမၼ်းယဝ်ႉ ၼူၼ်းမူဝ်ၵေႃႈဢမ်ႇလႆႈႁွင်ႉမၼ်းၵႂႃႇၸွမ်း။
ႁဝ်းၵေႃႈဢွၼ်ၵၼ်ပၼ်ႇလႅင်ႁဝ်းၼၼ်ႉ ၵႂႃႇတၢင်းႁူင်းယႃလွႆးလွႆးယူႇယဝ်ႉ။ ၶဝ်သီႇၵေႃႉၼၼ်ႉၵေႃႈ တင်းဢုပ်ႇတင်းယဝ်ႉယွၵ်ႇၵၼ်လူင်ၵႂႃႇ ၶႃႈၼၼ်ႉတႄႉၵႂႃႇတၢင်းလင်ၶဝ်ႁေ ထွမ်ႇၶဝ်ယဝ်ႉယုမ်ႉၸွမ်းၵူၺ်း။ ပေႃးမႃးဝူၼ်ႉတူၺ်းယဝ်ႉ ၼႂ်းၸၢတ်ႈပၢၼ်ၶႃႈ ဢၼ်လႆႈယူႇၸွမ်းဢူၺ်းၵေႃႉၼမ်ၼမ်ႁဵတ်းၼႆ မိူၼ်တေပဵၼ်ပွၵ်ႈဢွၼ်တၢင်းသုတ်းႁိုဝ် ဢမ်ႇၼၼ်ၵေႃႈ ယၢမ်ႈမီးယူႇႁိုဝ်၊ ၵူၺ်းၵႃႈပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း ဢၼ်ၶႃႈတွင်းလႆႈ သဵင်ၶူဝ် သဵင်ဢုပ်ႇလၢတ်ႈ သဵၼ်ႈတၢင်းတၢင်းဢၼ်ယၢဝ်းၵႆ မၢၵ်ႇလူတ်ႉထိပ်ႇႁဝ်းၵေႃႈ ၵိင်ႈၵႂႃႇၸွမ်းၵၼ်လွႆးလွႆး ပဵၼ်ၽၢင်ႁၢင်ႈဢၼ်လီႁၢင်ႈလီတႄႉတႄႉ။ ယိုင်ႈၶႃႈယူႇၸွမ်းၶဝ်ႁိုင်မႃး ယိုင်ႈလွင်ႈၸမ်ၸႂ်ႁဝ်းၼၼ်ႉ တိူဝ်းၼမ်မႃးတိၵ်းတိၵ်း ၶႃႈဝူၼ်ႉဝႃႈတေဢမ်ႇမီးဢူၺ်းၵေႃႉယဝ်ႉလႄႈ တေဢမ်ႇပဵၼ်ဢူၺ်းၵေႃႉတင်းၽႂ်လႆႈထႅင်ႈယဝ်ႉ။ မိူၼ်ၵႂၢမ်းၶေႃႈၼၼ်ႉ တေၸူမ်ႁၢႆၵႂႃႇ တၢင်းသိူဝ်းဢၼ်ၶဝ်ပၼ်ၶႃႈမႃးလႄႈ တၢင်းယုမ်ႉဢၼ်ၶဝ်ယုမ်ႉၸူးၶႃႈ လွင်ႈဢုၼ်ႇၸႂ် ဢၼ်ၶဝ်ယိုၼ်ႈမႅင်ႇပၼ်ၼၼ်ႉမူတ်းယဝ်ႉ။
တႄႇၸဵမ်မိူဝ်ႈဝၼ်းဢၼ်ၶႃႈတႅပ်းတတ်း တေဢၢၼ်းလႅၵ်ႈလၢႆႈတူဝ်ၸဝ်ႈၵဝ်ႇ ၶႃႈဝႃႈတူဝ်ၶႃႈၼၼ်ႉ မၼ်းလႅၵ်ႈလၢႆႈယၢပ်ႇၼႃႇ လႅၵ်ႈလၢႆႈဢမ်ႇလႆႈယဝ်ႉ။ ယွၼ်ႉထူပ်းလွင်ႈယၢပ်ႇမႃးယူႇလၢႆလွင်ႈလၢႆဢၼ်၊ ၸွမ်းလူၺ်ႈႁူဝ်ၸႂ်ဢၼ်ၶႃႈ ဢမ်ႇၶႂ်ႈၶၢမ်ႇၼၼ်ႉသေ လႆႈၽိုတ်ႉဢီးတၢင်းယၢပ်ႇလူင်ၼၼ်ႉၵႂႃႇ ၵမ်းဢိတ်းၵမ်းဢိတ်း တူဝ်ၶႃႈၼၼ်ႉၵေႃႈ မိူၼ်တေလႅၵ်ႈလၢႆႈၵႂႃႇၵမ်းလွႆးလွႆး လူၺ်ႈဢမ်ႇတၼ်းႁူႉမႃးယဝ်ႉ။ မိူၼ်ဝႃႈ ဝၼ်းမိူဝ်ႈၼႆႉ ဝူၼ်ႉတူၺ်းၶိုၼ်းတၢင်းလင်ၼၼ်ႉ ႁၼ်ဝႃႈၶႃႈလႅၵ်ႈလၢႆႈမႃးၼမ်တႄႉယဝ်ႉ လွင်ႈၸိူဝ်းဢၼ်ၶႃႈဝႃႈႁဵတ်းဢမ်ႇလႆႈ ၶႃႈၵေႃႈႁဵတ်းလႆႈ၊ ၶႃႈၶၢမ်ႈပူၼ်ႉမၼ်းမႃးလႆႈ ယွၼ်ႉမီးၵူၼ်းႁိမ်းၶၢင်ႈ၊ ၵူၼ်းပၼ်ႁႅင်း ၶႃႈဝူၼ်ႉဝႃႈၶႃႈတေလႆႈၸႂ်ၵူၼ်းၸိူဝ်းၼႆႉလႄႈ ၵူၼ်းဢၼ်မီးယူႇႁိမ်းႁွမ်းတူဝ်ၶႃႈၼၼ်ႉမႃးတိၵ်းတိၵ်း လူၺ်ႈတီႈၶၢတ်ႇၶဝ်ၼၼ်ႉဢမ်ႇလႆႈယဝ်ႉ။
သမ်ႉဝႃႈၶႃႈတေလႅၵ်ႈလၢႆႈမႃးတၢၼ်ႇႁိုဝ်ၵေႃႈယဝ်ႉ တွၼ်ႈတႃႇၵူၼ်းၵမ်ႈၽွင်ႈတႄႉ ယင်းတိုၵ်ႉႁၼ်ၸေႈၽိူၵ်ႇဢၼ်ဢိူၵ်ႇၼမ်ႉမိုၵ်ႉယူႇၼၼ်ႉ ဢမ်ႇမီးဝၼ်းပဵၼ်ၸေႈၽိူၵ်ႇလႆႈၼႆယူႇ။ ၵူၺ်းၵႃႈ ၶႃႈၵေႃႈဝူၼ်ႉႁၼ်လႆႈဝႃႈ ၼမ်ႉမိုၵ်ႉဢၼ်ဢိူၵ်ႇၼုၵ်းၸွမ်းၸေႈၽိူၵ်ႇၼၼ်ႉ သင်ဝႃႈမၼ်းမေႃၸၼ်ႁၢင်ႈႁႂ်ႈမၼ်းႁၢင်ႈလီၼႆ ယင်းမီးၵႃႈၶၼ်လိူဝ်သေၸေႈၽိူၵ်ႇလၢႆလၢႆလူးၵွၼ်ႇ။ လႄႈၶႃႈၵေႃႈ တေဢမ်ႇဢၢၼ်းပဵၼ်ၸေႈၽိူၵ်ႇဢၼ်ဢိူၵ်ႇၼမ်ႉမိုၵ်ႉလၢႆလၢႆၵူၺ်း၊ ၶႃႈတေဢမ်ႇယိူင်းဢၢၼ်းႁႂ်ႈပဵၼ်ၵူၼ်းလီၼင်ႇၸေႈၽိူၵ်ႇ လႄႈတေပဵၼ်တူဝ်ၶႃႈဢၼ်ဢိူၵ်ႇၼမ်ႉမိုၵ်ႉသေ ၸၼ်ဢဝ်ၸၢတ်ႈပၢၼ်ၶႃႈၵႂႃႇၼိူဝ်ၸေႈၽိူၵ်ႇၼၼ်ႉယဝ်ႉ။
တွၼ်ႈသၢဝ်းႁႃႈသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသၢဝ်းႁူၵ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
