တွၼ်ႈသၢဝ်းသီႇ
မိူဝ်ႈထိုင်တၢင်းၽႄၶဝ်ႈၵႂႃႇၼႂ်းပွၵ်ႉႁဝ်းယဝ်ႉၼႆၵေႃႈ လူမ်းၵေႃႈထူဝ်းႁႅင်းဝႃႈႁႅင်း တူၼ်ႈမႆႉသမ်ႉပေႃးသၼ်ႇၶွၼ်းၼိုင်လူင်ၵႂႃႇမူတ်း ၾႃႉၵေႃႈလင်မေႃးမႃးယူႇ၊ ၶႃႈၼၼ်ႉတႄႉ ၵိုင်ႉၵၢင်ႉထူၺ်ႈၸႂ်ၵပ်ႉလူင်မႃးၵမ်းလဵဝ်ယဝ်ႉ၊ ၶႃၼၼ်ႉၵေႃႈ သမ်ႉပေႃးဢူၼ်ႈဢွၼ်ႇမူတ်း တႃႇတေသိုပ်ႇယၢင်ႈၵႂႃႇထႅင်ႈတၢင်းၼႃႈၼၼ်ႉ ဢမ်ႇမီးႁႅင်းယဝ်ႉလႄႈ ၵႃႈလႆႈၼင်ႈငွမ်ယူႇတီႈၸွၵ်ႉႁူဝ်ႉပိူၼ်ႈ ၼၼ်ႉယူႇ။ မိူဝ်ႈၾႃႉၵၢမ်ႈမိူင်းလပ်းသိင်ႇလပ်းသိင်ႇ ၾူၼ်သိင်းသိင်း လေႃးပႃးၾႃႉမႅပ်ႈ ႁၼ်ငဝ်းၵူၼ်းလမ်လမ်မႃးလႄႈ ၵူၼ်းၵေႃႉၼၼ်ႉၵေႃႈၵိုင်ႉၵၢင်ႉလူမ်ႉလူင်လူင်းၵႂႃႇ တေႃႇၼႃႈတေႃႇတႃ ႁဵတ်းႁႂ်ႈၶႃႈတူၵ်းၸႂ်ၵူဝ်သမ်ႉပေႃးသၼ်ႇတိၼ်းတိၼ်းယဝ်ႉ။ မိူဝ်ႈပဵၼ်ၸိူင်ႉၼၼ် ၶႃႈႁိုဝ်ႁတ်းမိုၼ်းတႃတူၺ်း၊ ယၢမ်းၼၼ်ႉ မိူၼ်မီးသေလွင်ႈလွင်ႈမႃးၶဝ်ႇၶွၼ်းၶႃႈလႄႈ လႆႈငိၼ်းသဵင်ၵူၼ်းမေႃးယူႇႁိမ်းႁူသေ
“ဢေးၼွင်ႉ! ၼင်ႈႁဵတ်းသင်ယူႇတီႈၼၼ်ႈလႃႇ!”
ၼၼ်ႉတႄႉပဵၼ်သဵင်ၶူးၽိဝ်ၾႃႉ ဢၼ်ၵႆႉလႆႈငိၼ်းယူႇတႃႇသေႇယဝ်ႉ ၶႃႈၸင်ႇတေမိုၼ်းတႃတူၺ်း။ တီႈတေႉၵေႃႈဢမ်ႇလႆႈမီးသင်ၵိူတ်ႇၶိုၼ်ႈပဵၼ်မႃးလူး ၶႃႈၵေႃႈၸင်ႇတေတမ်းၸႂ်လႆႈလႄႈ ထူၺ်ႈၸႂ်လႆႈလီမႃးၶိုၼ်းယဝ်ႉ။ ၶူးၼၼ်ႉၵေႃႈ ယိုၼ်းမိုဝ်းၸူးၶႃႈသေယဝ်ႉ ၶႃႈၼၼ်ႉၵေႃႈယိပ်းဢဝ်မိုဝ်းၶူး လူၺ်ႈဢမ်ႇတၼ်းတင်ႈၸႂ် ၶူးၵေႃႈၸၼ်ၶႃႈလုၵ်ႉသေယဝ်ႉ၊ မိူၼ်ဝႃႈဢမ်ႇတၼ်းၾၢင်ႉတူဝ်လႆႈလႄႈ တူဝ်ၶႃႈတင်းၶူးၼၼ်ႉ သုတ်ႉၶဝ်ႈၸမ်ၵၼ်ႁႅင်းလိူဝ်၊ ဢဝ်ၵွၵ်းႁူဝ်ၶႃႈသမ်ႉပေႃးလေႃႇသႂ်ႇၵၢင်းၶူးယူႇ၊ မိုဝ်းၶႃႈၶွၼ်ၼိုင်ႈၼၼ်ႉၵေႃႈ ပၢမ်ႉသႂ်ႇဝႆႉသိုဝ်ႈၼႃႈဢူၵ်းၼၼ်ႉဢဝ်လီလီ။ မိူဝ်ႈယူႇၼႂ်းငဝ်းလၢႆးၸိူင်ႉၼၼ် ဢဝ်ၶႃႈသမ်ႉပေႃးၵႂင်မိုင်လူင်ၵႂႃႇ ၶူးၼၼ်ႉၵေႃႈ သုတ်ႉႁၢင်ႇယၢၼ်ၶႃႈၵႂႃႇသေယဝ်ႉ လၢတ်ႈၸူးၶႃႈ
“ၸွင်ႇပဵၼ်သင်ႁိုဝ်!”
ဢဝ်ၶႃႈသမ်ႉပေႃးၽႅတ်းမႃးလႄႈ ၸင်ႇတေမီးသတိမႃးလႆႈ
“ဢမ်ႇ..ဢမ်ႇပဵၼ်သင်ယဝ်ႉၶႃႈ..”
“ပေႃးၼၼ်ၵေႃႈမိူဝ်းလႄႈ..ႁဝ်းမိူဝ်း!”
ၶႃႈလႄႈတင်းၶူးၼၼ်ႉၵေႃႈ ဢွၼ်ၵၼ်ပႆမိူဝ်းၵႂႃႇၸွမ်းၵၼ်လွႆးလွႆးယူႇ။ ၽွင်းၼၼ်ႉ ႁူဝ်ၸႂ်ၶႃႈတဵၼ်ႈႁႅင်းဝႃႈႁႅင်းယဝ်ႉ ၵူႈပွၵ်ႈပေႃးၶႃႈတူၵ်းၸႂ်ႁိုဝ်ၵူဝ်ၼႆ သမ်ႉဝႃႈႁူဝ်ၸႂ်တေတွတ်ႇႁႅင်း၊ ထူၺ်ႈၸႂ်ယၢပ်ႇလႄႈၵပ်ႉႁႅင်းသေတႃႉ ပေႃးဝႃႈလႆႈသတိမႃးၶိုၼ်းယဝ်ႉၵေႃႈ တေၶႅၼ်းၵႂႃႇယူႇ။ ၵူၺ်းၵႃႈ ဢမ်ႇႁူႉဝႃႈပွၵ်ႈၼႆႉပဵၼ်သင် တၢင်းပဵၼ်ၶႃႈၼၼ်ႉႁၢႆႉႁႅင်းမႃးလိူဝ်သေၵဝ်ႇႁိုဝ်၊ မၼ်းတွတ်ႇတဵၼ်ႈႁႅင်းၼႃႇထိုင်တီႈၶႃႈထိင်းပေႃးဢမ်ႇလႆႈ ၼႃႈၵေႃႈမႆႈမႃးပႃးၸွမ်းယဝ်ႉ တွတ်ႇႁႅင်းပေႃးတၢၼ်ႇမၼ်းတေၵိုတ်းတဵၼ်ႈၵႂႃႇလူးၵွၼ်ႇ။
ယၢမ်းၼင်ႇၼၼ် ၾူၼ်လူင်ၵေႃႈၵိုင်ႉၵၢင်ႉႁႃႇသႂ်ႇလူင်မႃးႁႃႇယႂ်ႇႁႃႇလူင်ယူႇ ၶႃႈၼၼ်ႉၵေႃႈၼႅတ်ႈၵီႈၸွင်ႈသေၵင်ႈၵႂႃႇယဝ်ႉ။ ၵူၺ်းၵႃႈ ၶူးသမ်ႉဢမ်ႇလႆႈပႃးၸွင်ႈလႄႈ မႃးသေႃႉၸွမ်းႁူမ်ႈၸွင်ႈၶႃႈၼၼ်ႉသေ မိူဝ်ႈယူႇၸမ်ၶဝ်ၸိူင်ႉၼၼ် ဢဝ်ၶႃႈႁဵတ်းသင်ပေႃးဢမ်ႇပဵၼ် မိုင်လူင်ၵႂႃႇႁဵတ်းၼၼ်။
“ဢမ်ႇမိူဝ်းယဝ်ႉႁႃႉ!”
ၶူးၵေႃႈယိပ်းဢဝ်ၵၼ်းၸွင်ႈၶႃႈၼၼ်ႉယဝ်ႉ၊ ၸွင်ႈၶႃႈၼၼ်ႉသမ်ႉဢမ်ႇပေႃးယႂ်ႇလႄႈ တွၼ်ႈတႃႇတေလွတ်ႈၵေႃႈ တေလႆႈယူႇၸပ်းၵၼ်ဝႆႉဢိတ်ႉၼိုင်ႈ။ သဵင်ႁူဝ်ၸႂ်ၶႃႈၼၼ်ႉတႄႉ တွတ်ႇလင်သမ်ႉပေႃးဢမ်ႇငိၼ်းသဵင်ၾူၼ် သဵင်လူမ်းသင်သေဢိတ်း ၼၼ်ႉယဝ်ႉ။ မိူဝ်ႈၾႃႉမႅပ်ႈမႃးၼၼ်ႉၵေႃႈ ၶူးၸင်ႇသမ်ႉမႄးၵင်ႈၸွင်ႈသုမ်ႇလူင်းတၢင်းၼႃႈသေ မိုဝ်းမၼ်းၼၼ်ႉၵေႃႈ ၶဝ်ႈမႃးဢဝ်ႁူဝ်ၶႃႈၽၢႆႇၼိုင်ႈၼၼ်ႉ သုတ်ႉၸပ်းႁူဝ်မႃႇမၼ်းသေယဝ်ႉ ၶိုၼ်းဢဝ်မိုဝ်းမၼ်းမႃးပိၵ်ႉဢိုတ်းႁူၶႃႈ ဝႆႉထႅင်ႈၽၢႆႇၼိုင်ႈ၊ ၶႃႈၼၼ်ႉၵေႃႈလပ်းတႃၵႂႃႇၵမ်းလဵဝ် ၸွမ်းလူၺ်ႈတၢင်းယၢမ်ႈၶႃႈၼၼ်ႉယဝ်ႉ၊ မိူဝ်ႈငဝ်းလၢႆးၼၼ်ႉႁၢႆၵႂႃႇယဝ်ႉၵေႃႈ ၶဝ်ၵေႃႈပွႆႇၶႃႈဢွၵ်ႇယူႇ။
လွင်ႈႁဵတ်းသၢင်ႈၶဝ်ၼၼ်ႉ ဢဝ်ၶႃႈသမ်ႉပေႃးၶုၵ်းၸႂ်လႆႈပေႃႈၶႃႈမႃးၵမ်းလဵဝ်၊ မိူဝ်ႈၵေႃႉလဵၵ်ႉလဵၵ်ႉၼၼ်ႉ ပေႃးၵႂႃႇႁူင်းႁဵၼ်းၼႆ ပေႃႈတေပဵၼ်ၵေႃႉၵႂႃႇႁပ်ႉသေယဝ်ႉ ပေႃးၾူၼ်တူၵ်းၼႆၵေႃႈ တေသႂ်ႇပၼ်ၽႃႈယၢင်ၶႃႈသေယဝ်ႉ ယိပ်းမိုဝ်းၵင်ႈၸွင်ႈ ဢွၼ်ၶႃႈပႆမိူဝ်းၵႂႃႇလွႆးလွႆးယူႇ။ သင်ၶဝ်တိုၵ်ႉယူႇၼႆ ၶႃႈၵေႃႈတေလႆႈၵွတ်ႇၶႅၼ်ၶဝ်ႁေ ပႆမိူဝ်းၵႂႃႇၸွမ်းၵၼ် မိူၼ်ၶူးၼႆႉယူႇၸွင်ႇၸႂ်ႈႁိုဝ်။ မိူဝ်ႈၶႃႈဝူၼ်ႉယူႇၼၼ်ႉ ၶႃႈၵေႃႈလႆႈၵွင်ႉသွတ်ႇသႂ်ႇၶႅၼ်ၶူးၵႂႃႇလူၺ်ႈဢမ်ႇႁူႉတူဝ် ယူႇယဝ်ႉ။
ၽိူဝ်ႇႁူႉတူဝ်ၵေႃႈ သမ်ႉပေႃးမႃးထိုင်ႁိူၼ်းယဝ်ႉလူး တေၸၢင်ႈႁဵတ်းႁိုဝ်။ ၸိူင်ႉႁိုဝ်ၵေႃႈဝၼ်းမိူဝ်ႈၼႆႉ ပဵၼ်ဝၼ်းဢၼ်ၾူၼ်မႃးႁူမ်ႈပႃးၾႃႉမႅပ်ႈသေ ၶႃႈၵေႃႈပႆမႃးႁွတ်ႈႁိူၼ်းႁင်းၵူၺ်း ဢမ်ႇလႆႈပဵၼ်သင်ၼၼ်ႉယဝ်ႉ။ မိူၼ်ဝႃႈတေပဵၼ်ယွၼ်ႉမီးၶူးယူႇႁိမ်းၸမ်ၼၼ်ႉႁိုဝ် လွင်ႈႁဵတ်းသၢင်ႈၶဝ်ၼၼ်ႉ လႆႈဝႃႈၸွႆႈၶႃႈလႆႈၼမ်တေႉတေႉယဝ်ႉ ၶႃႈထုၵ်ႇၼီႈၶူးထႅင်ႈယဝ်ႉၸွင်ႇၸႂ်ႈႁိုဝ်။
……………………………………………………
ၽွင်းဢၼ်ၼူၼ်းမူဝ်တိုၵ်ႉလူယူႇလီလီၼၼ်ႉ ယူႇယူႇၵေႃႈမီးသဵင်ၽၵ်းတူၽုၺ်ႇမႃးၼႂ်းႁွင်ႈသေ မီးသဵင်ႁွင်ႉၵူၼ်းၵေႃႉၼိုင်ႈမေႃးမႃး။
“ၼူၼ်း.. လုၵ်ႉယဝ်ႉႁႃႉ…” သဵင်ၼၼ်ႉဢူၼ်ႈဢွၼ်ႇဝၢၼ်ႁူ သမ်ႉဝႃႈလၢတ်ႈဢမ်ႇလင်ၵေႃႈ ငိၼ်းလႆႈထိုင်ၼႂ်းႁူဝ်ၸႂ်ၼူၼ်းမူဝ်ၼၼ်ႉၵမ်းလဵဝ် ယဝ်ႉ။
“ဢေႃႈ!..ပီႈမႃးၸဵမ်ၸဝ်ႉႁႃႉ! ” ၼႅတ်ႈလုၵ်ႉၵႂႃႇၽုၺ်ႇၽၵ်းတူတူၺ်းၵမ်းလဵဝ်ယူႇ။
“ၸဝ်ႉတီႈလႂ်..လႃႈၼႃႇယဝ်ႉၼႆႉ ၸမ်သိပ်းမူင်းယဝ်ႉ..သူႁဵတ်းသင်ယူႇလႃႇ”
“ဢိုမ်ႈ.. လူလိၵ်ႈယူႇၼႃႈ” ၼႅတ်ႈဢဝ်ပပ်ႉမၼ်းၼၼ်ႉသိူင်ႇဝႆႉယူႇတၢင်းလင်မၼ်း ၼင်ႇဝႃႈၵူဝ်ၵေႃႉႁၵ်ႉမၼ်း သႅင်ၶိူဝ်းၼၼ်ႉတေႁၼ်ၸွမ်းၼႆယူႇ။
“ပပ်ႉသင်လႃႇ.. ႁႂ်ႈႁဝ်းတူၺ်းဢိတ်ႉၼိုင်ႈလႄႈ..”
“ဢိုမ်ႈ.. ပဵၼ်ပပ်ႉသႅင်ၶမ်း မိူဝ်းဝဵင်းႁေလႆႈမႃးၵူၺ်း”
“ၸိူင်ႉၼၼ်ႁႃႉ..” သႅင်ၶိူဝ်းၼၼ်ႉတႄႉၵေႃႈ ဢမ်ႇလႆႈသူၼ်ၸႂ်ပပ်ႉၼၼ်ႉသေၵႃႈႁိုဝ် ဢၼ်မၼ်းသူၼ်ၸႂ်ၼႃႇၼၼ်ႉတႄႉ ၼူၼ်းမူဝ်ၼၼ်ႉၵူၺ်း။ ၸုၵ်းယူႇပၢၵ်ႇၽၵ်းတူသေယဝ်ႉ မိုဝ်းသဵမ်ႈလႅမ် သႅင်ၶိူဝ်းၼၼ်ႉၵေႃႈ ၶဝ်ႈယိပ်းဢဝ်ၼႃႈၼူၼ်းမူဝ်ၼၼ်ႉလွႆးလွႆး ၵူမ်ႈၼႃႈၶဝ်ႈၸူးၼူၼ်းမူဝ်လီလီသေ
“ဢွၵ်ႇႁဝ်းၶဝ်မီးယူႇတၢင်းၼွၵ်ႈၼၼ်ႉၼႃႈ! တေႁဵတ်းသင်ၵေႃႈဢၢၼ်းၼႃႇၵူၼ်းထဝ်ႈဢိတ်ႉၼိုင်ႈလႄႈသူ..”
သႅင်ၶိူဝ်းၼၼ်ႉၵေႃႈ ယဵပ်ႇယၢင်ႈၶဝ်ႈၵႂႃႇၼႂ်းႁွင်ႈၼူၼ်းမူဝ်ၼၼ်ႉသေ ပိၵ်ႉဢိုတ်းၽၵ်းတူၵႂႃႇယဝ်ႉ။ သုတ်ႉၼႃႈၶဝ်ႈၸမ်ၼူၼ်းမူဝ် ၶူႈၼင်တုမ်ႉလေႃႇၵၼ်ဝႆႉယူႇ၊ သႅင်ၶိူဝ်းၼၼ်ႉၵေႃႈ ဢဝ်မိုဝ်းမၼ်းၼၼ်ႉ ၸဵတ်ႉပၼ်တီႈတႃၼူၼ်းမူဝ်ၼၼ်ႉၵႂႃႇယဝ်ႉ။
“ၶီႈတႃ..”
ၼူၼ်းမူဝ်ၼၼ်ႉၵေႃႈ ၼႅတ်ႈဢီးမၼ်းပႅတ်ႈသေယဝ်ႉ “ဢွၵ်ႇၵႂႃႇလႄႈ!!..”
“ဢၢႆႁဝ်းယူႇႁႃႉ ဝူၼ်ႉဝႃႈႁဝ်းတေဢမ်ႇလႆႈႁၼ်ၵေႃႈဢမ်ႇၸႂ်ႈ ထႅင်ႈဢိၼ်ႉမႃးႁဝ်းၵေႃႈတေလႆႈႁၼ်ၵူႈဝၼ်းယူႇၵူၺ်း”
“ပေႃးႁၼ်ယၢမ်းၼႆ ၵူဝ်ဝႃႈသူတေဢမ်ႇဢဝ်ႁဝ်းယဝ်ႉၼၼ်ႉၼႃႇ”
“သမ်ႉဝႃႈမီးၶီႈတႃၵေႃႈ ပေႃးပဵၼ်ၼူၼ်းမူဝ်တႄႉပေႉၸႂ်ယူႇၵူၺ်း”
“ဢွၵ်ႇၵႂႃႇလႆႈယဝ်ႉၼႃႈ! ” ၼူၼ်းမူဝ်ၼၼ်ႉၵေႃႈ ၽုၺ်ႇၽၵ်းတူသေ ဢီးမၼ်းဢွၵ်ႇ ၼင်ႇဢမ်ႇသူၼ်ၸႂ်ၼၼ်ႉယဝ်ႉ။
သမ်ႉဝႃႈၵၢပ်ႈပၢၼ်ဝၢၼ်ႈမိူင်းတေလႅၵ်ႈလၢႆႈၵႂႃႇယဝ်ႉသေတႃႉ ၵူၺ်းၵႃႈၼူၼ်းမူဝ်တႄႉ ၸွမ်းၼင်ႇၾိင်ႈၵူၼ်းထဝ်ႈၵူၼ်းၵႄႇၶဝ် တိုဝ်းၵမ်မႃးၼၼ်ႉ မၼ်းၵေႃႈႁိုဝ်တေၽႃႈ၊ ဢမ်ႇဝႃႈဢွၵ်ႇၶဝ်တေလၢတ်ႈၸိူင်ႉႁိုဝ် မၼ်းၼၼ်ႉၵေႃႈမေႃမၢတ်ႈတွင်းထွမ်ႇ ႁဵတ်းၸွမ်းယူႇတႃႇသေႇယဝ်ႉ။ မိူဝ်ႈပႆႇတႄႇၼႃႈႁေႃတေႃႁိူၼ်းၵၼ် ပႆႇလႆႈပဵၼ်ၼႃႈႁိူၼ်းၵူပ်ႉယေးၵေႃႈ ယင်းပႆႇလႆႈယူႇႁူမ်ႈပွင်းၵၼ် ယူႇထင်ႁိူၼ်းလဵဝ်။ ၵေႃႉၽၢႆႇၸၢႆးၵေႃႈ မေႃဝႆႉၵႃႈၶၼ် ဢမ်ႇႁဵတ်းပူၼ်ႉပႅၼ်တေႃႇၽၢႆႇယိင်း ထိင်းသိမ်းဝႆႉၾိင်ႈၵွၼ်ႇဢွၼ်ၵဝ်ႇ ဢမ်ႇပၼ်ႁႂ်ႈလူႉ ၼင်ႇႁူႉၼင်ႇမီးၼၼ်ႉယူႇ။
ၼူၼ်းမူဝ်ၼၼ်ႉၵေႃႈ မိူဝ်ႈတိုၵ်ႉသုၵ်ႈၼႃႈလၢင်ႉတႃမၼ်းယူႇၼႂ်းႁွင်ႈဢၢပ်ႇၼမ်ႉၼၼ်ႉ လိူၵ်ႈလိူၵ်ႈသမ်ႉ သႅင်ၶမ်းသိုပ်ႇၾူင်းၸူးသေယဝ်ႉ။
“ဝႃႈႁိုဝ်လႃႇဢေးယိင်း..မီးလွင်ႈသင်..”
“ဢၢၼ်ႇထိုင်လႂ်ယဝ်ႉ!!..”
“သုတ်းၵႂႃႇယဝ်ႉသွင်ပပ်ႉ! လၢတ်ႈလႆႈဝႃႈသုတ်းၵႂႃႇပပ်ႉမၢႆသၢမ်ယဝ်ႉယူဝ်ႉ ပႃးတီႈႁိူၼ်းသူၼၼ်ႉႁေ လႄႈသိုပ်ႇလူၵႂႃႇထႅင်ႈပပ်ႉမၢႆသီႇၸမ်တူၵ်းၶိုင်ႈယဝ်ႉ ပဵၼ်သင်လႃႇ.. ဝူၼ်ႉဝႃႈႁဝ်းတေလူဢမ်ႇယဝ်ႉလႆႈႁႃႉ! ၼႂ်ၼႆႉပေႃးသႅင်ၶိူဝ်းဢမ်ႇမႃးတႄႉႁဝ်းဢၢၼ်းလူႁႂ်ႈယဝ်ႉယဝ်ႉ”
“ႁဝ်းဝႃႈႁဝ်းတေဢၢၼ်းမိူဝ်းဢဝ်ႁွတ်ႈထိုင်တီႈႁိူၼ်းမိူဝ်ႈၼႆႉၼၼ်ႉယဝ်ႉ”
“တေမႃးယွၼ်ႉလွင်ႈၼႆႉႁႃႉ!”
“ဢမ်ႇမိူဝ်းယဝ်ႉ..တူၺ်းမိူၼ်သူလႅပ်ႈတေလူသုတ်းယဝ်ႉၸွင်ႇၸႂ်ႈ”
“ဢိုမ်ႈ!..ႁဝ်းထိုင်တီႈလႂ်ၸွင်ႇၶႂ်ႈႁူႉႁႃႉ ႁဝ်းထိုင်တီႈ…ႁူဝ်ၸႂ်ၶႃႈႁဝ်းၼၼ်ႉသၼ်ႇဝႆၼိုင်ၶွၼ်း ၼွၼ်းပေႃးဢမ်ႇလပ်း ၸႂ်ၸပ်းၸႂ်ထိုင်လွင်ႈႁဵတ်းသၢင်ႈၶဝ်ၼၼ်ႉတင်းၶိုၼ်းယဝ်ႉ ၽိုၼ်ႉၵႂႃႇၽိုၼ်ႉမႃးႁဵတ်းႁိုဝ်ၵေႃႈတိုၼ်းဢမ်ႇလပ်းလႆႈ!”
“ပေႃးလႆႈယဝ်ႉၼႃႈ!! သႅင်ၶိူဝ်းမႃး သူယင်းတိုၵ်ႉသုၵ်ႉၼႃႈယူႇ ၶႂ်ႈဝႃႈၶဝ်ၵေႃႈမႃးႁၼ်ၼႃႈဢၼ်ပႆႇလႆႈသုၵ်ႈႁေယဝ်ႉၼၼ်ႉၼေႃႈ”
“ႁၢင်ႈႁူႉၼႃႇ လိူဝ်သေႁၼ်ယဝ်ႉ သမ်ႉပၢႆၸဵတ်ႉၶီႈတႃႁဝ်းပၼ်ထႅင်ႈၵွၼ်ႇဢိူဝ်ႈ”
“ႁႃးႁႃး..ႁႃး..ႁႃး.. ” သႅင်ၶမ်းၼၼ်ႉၵေႃႈ ၶူဝ်ၼင်ႇႁၢၼ်ႉၸႂ်ႁၢၼ်ႉၶေႃးယူႇယဝ်ႉ။
“ပေႃးလႄႈ..ယႃႇၶူဝ်ယဝ်ႉ ပေႃးဢမ်ႇၸႂ်ႈလူပပ်ႉသူ ၶဝ်ၵေႃႈတေဢမ်ႇလႆႈမႃးႁၼ်ၸိူင်ႉၼၼ်ၼင်ႇၵဝ်ႇ”
“ၶႂ်ႈဝႃႈလူတင်းၶိုၼ်း ထိုင်တီႈပေႃးလိုမ်းၼွၼ်းၸွင်ႇၸႂ်ႈႁိုဝ်.. ႁဵတ်းႁႂ်ႈႁဝ်းဝူၼ်ႉထိုင်ၶိုၼ်းဝၼ်းဢၼ်သူမႃးၼွၼ်းႁဵတ်းၶႅၵ်ႇႁဝ်းသေ ယွၼ်းလူပပ်ႉၸိူင်းႁဝ်းၼၼ်ႉ သူလူတင်းၶိုၼ်း ထိုင်ၵၢင်ၼႂ်ထၢင်ႇဝႃႈသူလုၵ်ႉမႃးဢၢၼ်ႇၸဵမ်ၸဝ်ႉ တီႈတေႉၵေႃႈဢမ်ႇၼွၼ်း ဢဝ်ႁဝ်းသမ်ႉပေႃးငိူဝ်ႈလူင်ၵႂႃႇၼၼ်ႉၼႃႇ ႁဝ်းဝႃႈႁဝ်းၶၢမ်ႇၼႃႇယဝ်ႉ ထိုင်မွၵ်ႈသၢမ်သီႇမူင်းၼႆႉ ဢမ်ႇတွၼ်ႉႁၼ်ၽႂ်လူလိၵ်ႈလႆႈထိုင်တီႈ ဢမ်ႇၼွၼ်းသေဢိတ်း ထိုင်ၶၢဝ်းၼႆႉမိူၼ်သူၼႃ”
“မႃးႁႃဝႃႈႁင်းၵၼ်ယူႇ သူၵေႃႈၵႃႈဢမ်ႇသုတ်းဢမ်ႇပေႃးၼင်ႇၵဝ်ႇယဝ်ႈ ထိုင်တီႈၼၢႆးသူပေႃးလႆႈႁွင်ႉလုၵ်ႉၵၢင်ဝၼ်းတဵင်ႈၼၼ်ႉ”
“သုတ်းၵေႃႈႁဝ်းဢမ်ႇလူၵူႈၼႃႈမိူၼ်သူလူး တူၺ်းတူၺ်းၶၢမ်ႈၶၢမ်ႈဢိူဝ်ႈၼၼ်ႉ”
“လႂ်ဝႃႈဢမ်ႇထိုင်မိူင်းလႅင်းၼၼ်ႉ ႁဵတ်းၼႆၼႃႇၼေႃႈ..”
“သႅင်ၶိူဝ်းမိူဝ်းယဝ်ႉႁႃႉ!..”
“ဢုပ်ႇၼၢႆးႁဝ်းယူႇတၢင်းၼွၵ်ႈၼၼ်ႉယူဝ်ႉ..မဵဝ်းတေမိူဝ်းငၢႆႈငၢႆႈၵေႃႈဢမ်ႇၸႂ်ႈ!”
“ဢမ်ႇႁူႉၼႃႇ ယူဝ်ႁၼ်ၶီႈတႃသူယဝ်ႉပၢႆႈမိူဝ်းယဝ်ႉၼႆၵႂႃႈ”
“ၶဝ်ဝႃႈသမ်ႉဝႃႈမီးၶီႈတႃၵေႃႈ ပေႃးဝႃႈပဵၼ်ႁဝ်းတႄႉႁၵ်ႉလႆႈယူႇၼႆလူး တေဢမ်ႇပႆႇမိူဝ်း…” ၼူၼ်းမူဝ်ၼၼ်ႉၵေႃႈ ယုမ်ႉဢွၵ်ႇမႃးသေ သိုပ်ႇလၢတ်ႈထႅင်ႈ
“ႁဝ်းပွင်ႇၸႂ်ယဝ်ႉ ပဵၼ်သင်လႄႈသူဢမ်ႇလၢတ်ႈထိုင်ၶိူဝ်းၸူႉၶိူဝ်းၸူဝ်းႁေပွၵ်ႈ ယွၼ်ႉၶူးၸွင်ႇၸႂ်ႈႁိုဝ် ယွၼ်ႉမီးၵူၼ်းၼႂ်းၸႂ်ယဝ်ႉလႄႈ ၸင်ႇဢမ်ႇသူၼ်ၸႂ်ၽႂ်ၸိူင်ႉၼၼ်ၸႂ်ႈယူႇႁိုဝ်”
“ဢၼ်လၢတ်ႈမႃးၼႆႉပဵၼ်သူၵူၺ်းယူဝ်ႉႁဝ်းဝႃႈ!.. လၵ်ႉႁၵ်ႉၶဝ်မႃးပဵၼ်သိပ်းပီႊၵမ်းလဵဝ်ၼႆႉ တိူဝ်ႉၸႂ်ယွၼ်ႉၶဝ်မႃးပဵၼ်လၢႆပွၵ်ႈလၢႆၵမ်း ဢမ်ႇထၢင်ႇဝႃႈ တေလႆႈႁၼ်ဝၼ်းဢၼ်သူတေမီးတၢင်းသိူဝ်ၸွမ်းၶဝ်ၸိူင်ႉၼႆ ႁဝ်းၼပ်ႉထိုဝ် ၸႂ်သိုဝ်ႈယူဝ်းသူၼၼ်ႉတႄႉတႄႉယဝ်ႉဝႃႈ”
“ႁဝ်းဢမ်ႇယုမ်ႇလေႃႇၼႃႈဝႃႈသူတေလိုမ်းၶဝ်ယဝ်ႉ ပေႃးထၢၼ်ႈဝႃႈၼၼ် သူၵေႃႈတေမီးၵေႃႉႁၵ်ႉ ဝႆႉၸူႉဝႆႉၸူဝ်းမိူၼ်ပိူၼ်ႈယူႇၵႂႃႈ”
“ႁဝ်းဢမ်ႇတွၼ်ႉလိုမ်းၶဝ်လႄႈ ဢမ်ႇမီးဝၼ်းတေလိုမ်းၶဝ်လႆႈၼၼ်ႉယဝ်ႉ ၶဝ်ပဵၼ်မၢႆတွင်းလီလီၼႂ်းၸၢတ်ႈပၢၼ်ႁဝ်း၊ ဢၼ်ဢမ်ႇမီးဝၼ်းလိုမ်းလႆႈ မိူဝ်ႈယူႇၸွမ်းၶဝ် ႁဵတ်းႁႂ်ႈႁဝ်းၶုၵ်းၸႂ်လႆႈဢူႈႁဝ်းမႃးယူႇတႃႇသေႇၼၼ်ႉၼႃႇ ႁဝ်းၵေႃႈဝူၼ်ႉၼိူဝ်ၶဝ် မိူၼ်ပဵၼ်ဢူႈႁဝ်းမွၵ်ႈၼၼ်ႉၵူၺ်း”
ၼူၼ်းမူဝ်ဢၼ်တိုၵ်ႉပုၼ်ႈပၢၵ်ႇယူႇၼၼ်ႉၵေႃႈ သမ်ႉပေႃးၵႅၼ်ႉဢွၵ်ႇမႃးၵမ်းလဵဝ်ယဝ်ႉ။
“ထိုင်မိူဝ်ႈလဵဝ်ၵေႃႈ ယင်းပႆႇႁူႉၸၵ်းသဵင်ႁူဝ်ၸႂ်တူဝ်ၵဝ်ႇ ဢၼ်တွတ်ႇတဵၼ်ႈၼၼ်ႉယူႇႁႃႉ”
“သူၵေႃႈဢမ်ႇႁူႉလႆႈလိူဝ်သေၼၼ်ႉလေႃႈၼႃႈ” ယုမ်ႉဢွၵ်ႇမႃးၼင်ႇမီးၵႂၢမ်းလပ်ႉၼႂ်းၸႂ်ဝႆႉယူႇ။ ၽွင်းၼၼ်ႉ မၼ်းသမ်ႉၵၢပ်ႈမၢၵ်ႇဢူမ်ဝႆႉသေ လႆႈၶၢႆးဢွၵ်ႇပႅတ်ႈယဝ်ႉ ၵမ်းၵႅမ်ႈမၼ်းမႃး ၶၢင်းဢွၵ်ႇ “ၸဵပ်း!!”
“ၶဵဝ်ႈၸဵပ်းထႅင်ႈယဝ်ႉႁႃႉ”
“ဢိုမ်ႈ!..”
“လၢတ်ႈယူႇယဝ်ႉ ဝႃႈယႃႇပေၵိၼ်မၢၵ်ႇဢူမ်ၼႆ ၵိၼ်တိၵ်းတိၵ်းလူႉ”
“ဝၢင်းယဝ်ႉၼႃႈ” ၼူၼ်းမူဝ်ယင်းဢမ်ႇပႆႇတၼ်းသင်ႇ သႅင်ၶမ်းၼၼ်ႉ သမ်ႉပေႃးတဵၵ်းပႅတ်ႈယဝ်ႉ။
ၼူၼ်းမူဝ်ဢၼ်ႁၢင်ႈႁႅၼ်းတူဝ်တူဝ်ႈတၼ်းသေ ဢွၵ်ႇႁိူၼ်းမႃးၼၼ်ႉၵေႃႈ ဢမ်ႇလႆႈႁၼ်သႅင်ၶိူဝ်းယူႇယဝ်ႉ ၵူၺ်းႁၼ်ဢွၵ်ႇၶဝ်ၼၼ်ႉၵူၺ်းသေ
“ပီႈၶဝ်ၵႂႃႇတၢင်းလႂ်ယဝ်ႉလႃႇဢွၵ်ႇ!”
“မၼ်းလၢတ်ႈဢွၵ်ႇႁႂ်ႈလၢတ်ႈယိင်းဝႃႈ မီးၵၢၼ်ထႅင်ႈၼႆလႄႈမိူဝ်းၵႂႃႇယဝ်ႉဝႃႈ”
ၼူၼ်းမူဝ်ၼၼ်ႉၵေႃႈ မိူဝ်ႈႁူႉဝႃႈသႅင်ၶိူဝ်းမိူဝ်းယဝ်ႉၼႆ ၶိုၼ်းၶဝ်ႈႁွင်ႈမၼ်းၼၼ်ႉသေယဝ်ႉ သိုပ်ႇလူဢၢၼ်ႇပပ်ႉသႅင်ၶမ်းၼၼ်ႉၵႂႃႇထႅင်ႈယူႇ ၵွပ်ႈဝႃႈတေႁဵတ်းပၢင်ၶႅၵ်ႇၼႆလႄႈ မၼ်းလႆႈယွၼ်းလိုဝ်ႈၵၢၼ် တီႈႁူင်းယႃဝႆႉၸူဝ်ႈၶၢဝ်းယဝ်ႉ။
တွၼ်ႈသၢဝ်းသီႇသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသၢဝ်းႁႃႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
