တွၼ်ႈသၢဝ်းသွင်
ဢူႈမႄႈၼၼ်ႉ တေဢမ်ႇပွင်ႇၸႂ်လုၵ်ႈလၢင်းလႆႈတင်းမူတ်းလေႃႇ၊ ယိုင်ႈဢူႈမႄႈ ၸၢင်ႈပွင်ႉၸၢင်ႈလႃႇ ယိုင်ႈႁဵတ်းႁႂ်ႈလုၵ်ႈလၢင်းႁဝ်း သုတ်ႉဢွၵ်ႇႁၢင်ႇ ဢမ်ႇႁတ်းပိုတ်ႇၸႂ်တေႃႇဢူႈမႄႈမႃးထႅင်ႈၵူၺ်း။ ၶဝ်တေၵူဝ်ဝႃႈ ပေႃးလၢတ်ႈယဝ်ႉ တေၺႃးၵႂၢမ်းလႃႇၵႂၢမ်းပွင်ႉ၊ ပေႃးႁဵတ်းၽိတ်းၵေႃႈ ၵူဝ်ၺႃးၶွၼ်ႉၼႆသေ၊ သမ်ႉဝႃႈမီးလွင်ႈတုၵ်ႉၸႂ်တၢၼ်ႇႁိုဝ်ၵေႃႈ တေၵဵပ်းလွင်ႈတၢင်းတုၵ်ႉၼၼ်ႉ ဝႆႉၵေႃႉလဵဝ်ယူႇ၊ ယိုင်ႈတၢင်းတုၵ်ႉၼၼ်ႉၼၵ်းမႃး ယိုင်ႈတေၸၢင်ႈတုမ်ႉတိူဝ်ႉပၢႆးၸႂ်မႃးလႆႈထႅင်ႈလူၵွၼ်ႇ။
ၸၢႆးသႅင်ၶဵဝ် လူင်းႁူင်းႁဵၼ်းယဝ်ႉပွၵ်ႈမိူဝ်းႁိူၼ်း၊ မိူဝ်ႈၶဝ်ႈမိူဝ်းၼႂ်းႁိူၼ်းၼၼ်ႉၵေႃႈ လႆႈႁၼ်ဢူႈၶဝ်ၼွၼ်းလိုဝ်ႈႁိူဝ်ႉယူႇ၊ ၵေႃႉပဵၼ်မႄႈၶဝ် ဢၼ်တိုၵ်ႉၼင်ႈလိူၵ်ႈၽၵ်းယူႇၼၼ်ႉတႄႉ တင်းၼင်ႈတင်းပွင်ႉ ႁႂ်ႈလုၵ်ႉမႃးၸွႆႈမၼ်း ဢၼ်ႁဵတ်းၵၢၼ်တင်းဝၼ်းတင်းဝၼ်းသေဢမ်ႇၵႃး ၵၢင်ၶမ်ႈၵေႃႈလႆႈမႃးႁဵတ်းထႅင်ႈၼၼ်ႉ ၼႆယူႇ။ မၼ်းၵေႃႈဢမ်ႇၸႂ်ႈဝၼ်းလဵဝ်ၵူၺ်း လၢတ်ႈလႆႈဝႃႈပွင်ႉၵူႈဝၼ်းၵူႈဝၼ်းယဝ်ႉ၊ ပေႃးဝႃႈတေႉ ဢူႈၸၢႆးသႅင်ၶဵဝ်ၶဝ်ၼၼ်ႉၵေႃႈ ၵႂႃႇႁဵတ်းၵၢၼ်ၵေႃႇသၢင်ႈတၢင်းၼွၵ်ႈႁေ မႃးထိုင်ႁိူၼ်းယဝ်ႉၵေႃႈ ၶႂ်ႈလိုဝ်ႈႁိူဝ်ႉလိုဝ်ႈၸႂ်သေ လႆႈၼွၼ်းလိုဝ်ႈၵႂႃႇ ၼၼ်ႉယဝ်ႉ။
မႄႈၸၢႆးသႅင်ၶဵဝ်ဢၼ်လႆႈႁၼ် လုၵ်ႈမၼ်းၶဝ်ႈႁိူၼ်းမႃး ပႃးတၢင်းႁွႆးမၢတ်ႇၸဵပ်းၸွမ်းၼႃႈၼၼ်ႉၵေႃႈ ၼႅတ်ႈထၢမ်ပႃးတၢင်းမႆႈၸႂ်ၵႂႃႇ။ ၵူၺ်းၵႃႈ မိူၼ်မၼ်းၼၼ်ႉၵေႃႈ ဢမ်ႇလႆႈသူၼ်ၸႂ်မႄႈၶဝ်ၼၼ်ႉႁေၵႃႈႁိုဝ် ၶဝ်ႈမိူဝ်းၵႂႃႇၼႂ်းႁွင်ႈၼွၼ်းမၼ်းၼၼ်ႉယူႇ။ မႄႈၶဝ်ၼၼ်ႉၵေႃႈ မိူဝ်ႈလုၵ်ႈၸၢႆးမၼ်းဢမ်ႇတွပ်ႇၼႆ ႁိုတ်းထႃႉပွင်ႉလႃႇ လေႃးပႃးတၢင်းၸႂ်လမ်မႃးထႅင်ႈယဝ်ႉ၊ ၼႂ်းႁိူၼ်းၼၼ်ႉၵေႃႈၼင်ႇႁၢင်ႈ သမ်ႉပေႃးဢမ်ႇမီးၵူၼ်းဢုပ်ႇတေႃႇမၼ်းႁေၵေႃႉယူႇ။
ယၢမ်းၵၢင်ၼႂ်လႅတ်ႇထွင်ႇထွင်ႇထွင်ႇ တွင်ႉၾႃႉၸိုၼ်ႈပၢင်ႇသႂ်၊ တူင်ႈၼႃးပေႃးၶဵဝ်ၸိဝ်းငိဝ်း၊ ၼူၵ်ႉဢွၼ်ႇၶဝ်ၵေႃႈမိၼ်ၽၢႆႈလမ်းၵၼ်၊ ၼိူဝ်ၵိင်ႇမႆႉပၢႆၽူၺ်းၵေႃႈ မီးတင်းၸွၼ်ႈဢွၼ်ႇၼႆႇဢွၼ်ႇ လႅၼ်ႈလမ်းလူၺ်းၵၼ်ဝႆႉယူႇ။ ၶႃႈၵေႃႈ ဢဝ်တင်း လူတ်ႉထိပ်ႇၶႃႈသေ ပၼ်ႇၵႂႃႇႁူင်းႁဵၼ်းလွႆးလွႆး၊ ပဵၼ်ဝၼ်းဢၼ်ၵတ်းယဵၼ်လီလႄႈ လူမ်းလီတေႉတေႉယဝ်ႉ။ မိူဝ်ႈယင်းတိုၵ်ႉလူမ်းလီယူႇၼၼ်ႉ ၼႃႈသဵမ်ႈၶၢဝ်ပွတ်ႇသွတ်ႇလွတ်ႇ ၶူးၽိဝ်ၾႃႉၼၼ်ႉၵေႃႈ မႃးမီးယူႇႁိမ်းၸမ် လမ်းၸွမ်းယူႇတၢင်းၶၢင်ႈၶႃႈၼၼ်ႉယဝ်ႉ။
“မိူဝ်ႈၼႆႉလူမ်းလီၵျႃႉလႃႇ!”
ဢမ်ႇႁူႉဝႃႈၶႃႈပဵၼ်သင် ၶႃႈဢမ်ႇတၼ်းလႆႈတွပ်ႇၶဝ် ၵူၺ်းသမ်ႉမိူၼ်ႇမိုင်တူၺ်းၶဝ်ယူႇ၊ ၽိူဝ်ႇဢၢၼ်းတေတွပ်ႇ ၶဝ်သမ်ႉပေႃးပူၼ်ႉၵႂႃႇၵႆယဝ်ႉ။ သမ်ႉဝႃႈ ၶဝ်ပူၼ်ႉၵႂႃႇယဝ်ႉသေတႃႉ သဵင်လႄႈၶေႃႈၵႂၢမ်းလၢတ်ႈၶဝ်ၼၼ်ႉ တိုၵ်ႉမေႃးယူႇၼႂ်းႁူ၊ ႁၢင်ႈၽၢင်ၶဝ်ၼၼ်ႉၵေႃႈ ယင်းတိုၵ်ႉၸပ်းဝႆႉယူႇၼႂ်းတႃ။
မိူဝ်ႈဢွၼ်ၵၼ်ၶဝ်ႈထႅဝ်ယူႇၼၼ်ႉ ၶူးၵွင်ၶမ်းၼၼ်ႉၵေႃႈ လႆႈမႃးလၢတ်ႈထိုင် လွင်ႈပုင်းလူင် ဢၼ်တုင်းၼမ်ႉ ႁိမ်းသႃလႃးလႆႈၵွႆၵႂႃႇၼၼ်ႉယူႇ။ ယွၼ်ႉမီးႁွႆးၵူၼ်းတင်ႈၸႂ် ႁဵတ်းႁႂ်ႈမၼ်းၵွႆၼႆလႄႈ ႁႂ်ႈလုၵ်ႈႁဵၼ်းၵေႃႉဢၼ်ႁဵတ်းၼၼ်ႉ ဢွၵ်ႇမႃးႁပ်ႉဢဝ်တၢမ်ႇၼႆယဝ်ႉ။
“ၶူးႁူႉယူႇၼႃႈပဵၼ်ၽႂ်ၼႆ ယႃႇႁႂ်ႈၶူးလႆႈတၵ်ႉၸိုဝ်ႈတၵ်ႉသဵင်လႄႈ..”
မိူဝ်ႈၶူးလၢတ်ႈၸိူင်ႉၼၼ်မႃးၵေႃႈ ႁဵတ်းႁႂ်ႈၶႃႈဝူၼ်ႉထိုင်ၶိုၼ်းမိူဝ်ႈဝႃး၊ ဢၼ်ၶႃႈယိူင်းတီႈလင်ဢၢႆႈဢွင်ႇ ဢၢၼ်းလဵတ်းႁႅင်းႁႅင်းၼၼ်ႉ၊ ၵွပ်ႈဝႃႈမိုဝ်းၶႃႈဢမ်ႇမႅၼ်ႈသေ သမ်ႉလဵတ်းၽႅတ်ႈၵႂႃႇၺႃးပုင်းၼမ်ႉလႅဝ်ၼၼ်ႉယဝ်ႉ။ တေဝႃႈႁိုဝ်ၵေႃႈ ပုင်းၼၼ်ႉမၼ်းၽင်ႉယဝ်ႉလႄႈမၼ်းၸင်ႇၵွႆၵူၺ်း၊ မၼ်းပဵၼ်ဢၼ်ၺၢမ်ႉလႄႈ မၼ်းဢမ်ႇၶၢမ်ႇသေ သမ်ႉပေႃးဢဝ်ၸၢၵ်ႇမၼ်း ၽူင်ႉယၢႆႈဢွၵ်ႇၵႂႃႇမူတ်းၼၼ်ႉၼႃႇ။ မိူဝ်ႈပုင်းၼမ်ႉလႅဝ်ၸိူင်ႉၼၼ် ႁဵတ်းႁႂ်ႈၶႃႈဝူၼ်ႉႁင်ပေႃးဢမ်ႇပွင်ႇယဝ်ႉ ၼႅတ်ႈလႅၼ်ႈႁၢင်ႇဢွၵ်ႇတီႈၼၼ်ႈၵမ်းလဵဝ် လိူၵ်ႈလိူၵ်ႈသမ်ႉၽႃႇၺႃးၶူး ၵွင်ၶမ်းၼၼ်ႉယိုင်၊ ၶူးဢၼ်ႁၼ်ၶႃႈၼၼ်ႉၵေႃႈ ၼႅတ်ႈထၢမ်ၸူးၶႃႈ။
“တေႁိပ်ႈၼႅတ်ႈၵႂႃႇတၢင်းလႂ်လႃႇ!”
မိူဝ်ႈပဵၼ်ၸိူင်ႉၼၼ် ၶႃႈၵေႃႈဢမ်ႇႁူႉဝႃႈတေႁဵတ်းၸိူင်ႉႁိုဝ်ယဝ်ႉ။ ၵၢင်ႇၵွၼ်ၶႃႈဢၼ်ယိပ်းမႃးၼၼ်ႉၵေႃႈ ဢဝ်ၼဵပ်းသႂ်ႇတီႈဢႅဝ်ဝႆႉသေ ဢဝ်သိူဝ်ႈႁူမ်ႇဝႆႉယဝ်ႉ ၶႃႈၵေႃႈမႄးသႂ်ႇမီႇသႂ်ႇၵီးသေလၢတ်ႈၸူးၶူးၵႂႃႇ။
“မိူဝ်ႈၵႆႈၶႃႈၽႅတ်ႈၵႂႃႇတၢင်းသႃလႃးၼၼ်ႉ လႆႈႁၼ်ဢၢႆႈဢွင်ႇၶဝ်ဢဝ်ပုင်းၼမ်ႉတႅၵ်ႇဢေႃႈ ၶႃႈဢၢင်ႈတေၵႂႃႇလၢတ်ႈၼႄၶူးဢေႃႈ ႁၼ်ၶူးၵေႃႈလီယဝ်ႉၶႃႈ”
“ၸိူင်ႉၼၼ်ႁႃႉ” ၶူးၼၼ်ႉၵေႃႈ ငွၵ်ႈတူၺ်းတၢင်းသႃလႃးၼၼ်ႉ ႁၼ်ဢၢႆႈဢွင်ႇၶဝ်တေႉယူႇလႄႈ ႁႂ်ႈပူၼ်ႉၵႂႃႇပႅတ်ႈယူႇ။
မိူဝ်ႈလႆႈႁၼ်ၶူးႁွင်ႉဢွၵ်ႇၼႃႈထႅဝ်ႁဵတ်းၼၼ်ၵေႃႈ ၶႃႈၼၼ်ႉတႄႉ ၸူမ်းဝႃႈၸူမ်းယဝ်ႉ။ ဢမ်ႇထၢင်ႇဝႃႈၶႃႈတေဝူၼ်ႉလႆႈၸိူင်ႉၼၼ် မိူဝ်ႈပဵၼ်ၸိူင်ႉၼႆ ႁဵတ်းႁႂ်ႈၶႃႈဝူၼ်ႉလွၵ်းလၢႆးတေၸတ်းၵၢၼ်ၶဝ်မႃးလႆႈယဝ်ႉ၊ ဢမ်ႇၸမ်ပဵၼ်တေလႆႈႁူပ်ႉတေႃႇၼႃႈၶဝ်ၵမ်းသိုဝ်ႈၵေႃႈလႆႈလူး ႁဵတ်းမိူၼ်ၼင်ႇၶႃႈႁဵတ်းမိူဝ်ႈဝႃးၼၼ်ႉၵေႃႈလႆႈယူႇ။ သင်ဢမ်ႇယူႇၼႂ်းထႅဝ်တႄႉ ၶႃႈသမ်ႉပေႃးၶႂ်ႈၶူဝ်ပၼ်လင်လင်ႁေယဝ်ႉ ၵူၺ်းၵႃႈ မိူဝ်ႈၶႃႈတိုၵ်ႉၵၼ်ႈၶူဝ်ယူႇၼၼ်ႉ ဢမ်ႇထၢင်ႇဢမ်ႇထိူမ် ၵေႃႉဢၼ်ၶူးတၵ်ႉၸိုဝ်ႈသမ်ႉပဵၼ်ၶႃႈၼၼ်ႉၼႃႇ။
မိူဝ်ႈပဵၼ်ၸိူင်ႉၼၼ် ၼင်ႇႁၢင်ႈၶႃၶႃႈၼၼ်ႉပေႃးဢမ်ႇမီးႁႅင်းသေဢိတ်း၊ တႃႇတေယၢင်ႈဢွၵ်ႇၵႂႃႇၼႃႈထႅဝ်ၼၼ်ႉၵေႃႈ ၶႃပေႃးဢူၼ်ႈပေႃးဢွၼ်ႇလူင်ၵႂႃႇသဵင်ႈ၊ ၶူးႁူႉလႆႈၸိူင်ႉႁိုဝ်လႃႇ ဢမ်ႇၼၼ်ၵေႃႈ ၶူးႁၼ်ၵၢင်ႇၵွၼ်ၶႃႈႁႃႉတေႃႈ၊ ၶူးၵေႃႈႁႂ်ႈၶႃႈၵႂႃႇၸုၵ်းႁိမ်းမၼ်းသေယဝ်ႉ။
“လၢတ်ႈၼႄလႄႈၽႂ်ဢဝ်ပုင်းတႅၵ်ႇၼႆ သူႁၼ်ယူႇဢမ်ႇၸႂ်ႈႁႃႉဝႃႈၽႂ်ဢဝ်တႅၵ်ႇၼႆ”
ၶူးလၢတ်ႈၸိူင်ႉၼႆ ၶႂ်ႈဝႃႈဢမ်ႇႁူႉ ၶႅၼ်းၸႂ်ဢိတ်ႉၼိုင်ႈ၊ ၶႃႈၵေႃႈ ၼင်ႇမီးလွင်ႈထၢင်ႇႁၢင်ႈလၢတ်ႈမႃးဢိတ်ႉၼိုင်ႈယူႇ။
“မိူဝ်ႈၶႃႈဢၢင်ႈၵႂႃႇလိုဝ်ႈတီႈသႃလႃးၼၼ်ႉ လႆႈႁၼ်ပုင်းၼမ်ႉတီႈႁိမ်းၼၼ်ႉတႅၵ်ႇႁေ တီႈသႃလႃးၼၼ်ႉၵေႃႈ မီးၸၢႆးဢွင်ႇ၊ ၸၢႆးဝၼ်းလၢဝ်၊ ၸၢႆးသႅင်ၶဵဝ်ၶဝ်သၢမ်ၵေႃႉ မီးယူႇတီႈၼၼ်ႈၶႃႈ”
“လႆႈငိၼ်းၸိုဝ်ႈယဝ်ႉၵေႃႈ ဢွၵ်ႇမႃးလႄႈ!”
ၶဝ်သၢမ်ၵေႃႉၼၼ်ႉၵေႃႈ ၵႃႈလႆႈဢွၵ်ႇမႃးယူႇ။ ၶူးၵေႃႈႁႂ်ႈႁဝ်းၵိုတ်းဝႆႉယဝ်ႉ ပၼ်ႁႂ်ႈလုၵ်ႈႁဵၼ်းပူတ်းထႅဝ်ၶဝ်ႈႁွင်ႈၽႂ်ႁွင်ႈမၼ်းၵႂႃႇ။
ၶူးၵေႃႈ ၸင်ႇလႆႈထၢမ်လွင်ႈထၢမ်တၢင်းတီႈၶဝ်ယူႇ ၶဝ်ၵေႃႈယွၼ်ႉဢမ်ႇႁူႉလႄႈ ထဵင်ၶူးၵႂႃႇၵူႈၶေႃႈၵူႈၵမ်းသေဢမ်ႇၵႃး သမ်ႉပၢႆႁိုတ်းပႃးၶူးထႅင်ႈႁေ။
“လၢတ်ႈယဝ်ႉ! ဢမ်ႇလႆႈႁဵတ်းၼႆ! ၶႂ်ႈဝႃႈႁိုဝ်လႃႇ တေႁႂ်ႈလႆႈၸႂ်ႉဢူႈႁဝ်းမႃးလၢတ်ႈၵွၼ်ႇၸင်ႇတေယုမ်ႇႁႃႉ” ဢၢႆႈဢွင်ႇၼၼ်ႉၵေႃႈ တင်းတူၺ်းၶူး လေႃးပႃးသၢႆတႃၸႂ်လမ်ဢၼ်လီၽၢၼ်ႈလူင်မၼ်းၼၼ်ႉယူႇ။
“ၸႂ်ႈၶႃႈဢေႃႈႁဝ်းဢမ်ႇလႆႈႁဵတ်းသင်ၶႃႈ ယူႇယူႇၵေႃႈပုင်းမၼ်းတႅၵ်ႇႁဵတ်းၼၼ်ၵူၺ်း” သႅင်ၶဵဝ်ၵေႃႈလၢတ်ႈၸူးယူႇ။
“ပေႃးဢမ်ႇႁဵတ်းသင် ပုင်းမၼ်းဢမ်ႇတၢၼ်ႇတႅၵ်ႇႁႅင်းပေႃးတၢၼ်ႇၼၼ်ႉလေႃႇ မိူဝ်ႈဝႃးၶူးၵႂႃႇတူၺ်း ယင်းလီယူႇ”
ၶႃႈၼၼ်ႉၵေႃႈ ၼင်ႇႁိုဝ်ပေႃးတေပၼ်ႈၼမ်ႉပဵၼ်တူဝ်မႃးၼၼ်ႉ “မိူဝ်ႈၽွင်းၼၼ်ႉ ၶႃႈႁၼ်ၸၢႆးဢွင်ႇၶဝ် ဢဝ်ၵွၵ်းသွႆးၼၼ်ႉၽၢတ်ႈသဵၼ်ၵႂႃႇတၢင်းၼၼ်ႉၶႃႈဢေႃႈ”
“ၸႂ်ႈယူႇႁႃႉဝၼ်းလႅင်း ယႃႇလႅၼ်ၶူးၼႃ ပေႃးဢမ်ႇၼၼ်ၶူးတေႁႂ်ႈဢူႈသူမႃးတေႉတေႉဢိူဝ်ႈ!”
ဝၼ်းလႅင်းၼၼ်ႉၵေႃႈ တူၺ်းၼႃႈဢၢႆႈဢွင်ႇလႄႈ သႅင်ၶဵဝ်ၼၼ်ႉသေ “ၸႂ်ႈဢေႃႈ!”
ဢမ်ႇထၢင်ႇဝႃႈမၼ်းတေတွပ်ႇမႃးၸိူင်ႉၼၼ် တူၺ်းလႅပ်ႈတေၵူဝ်ပေႃႈၶဝ်ဝႆႉယူႇမိူၼ်ၵၼ်။ ဢၢႆႈဢွင်ႇၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ် ၸူးငၢႆႈသေယဝ်ႉ။
“ၵႃႈပုင်းၵႃႈႁိုဝ်လႃႇ! ! ”
“ယႃႉလူႉၶူဝ်းၶွင်ႁူင်းႁဵၼ်းၼၼ်ႉ ဢမ်ႇၸႂ်ႈဝႃႈသၢႆႈတႅၼ်းယဝ်ႉတေယဝ်ႉၸိူင်ႉၼၼ် ႁဵတ်းၽိတ်းၵေႃႈတေလႆႈႁပ်ႉဢဝ်တၢင်းၽိတ်းၸင်ႇထုၵ်ႇယဝ်ႉ”
“ဢမ်ႇႁူႉႁႃႉ ၶႃႈပဵၼ်လုၵ်ႈၽႂ် ၶူးယၢမ်ႈႁၼ်ၽႂ်ႁတ်းပၼ်တၢမ်ႇၶႃႈလႃႇ ၼႂ်းႁူင်းႁဵၼ်းၼႆႉ! တေႃႈၼင်ႇၶူးလူင်ယင်းဢမ်ႇႁတ်းပၼ် ၶူးႁတ်းပၼ်တၢမ်ႇၶႃႈႁေႁႃႉ၊ ပေႃးဢမ်ႇၶႂ်ႈမီးလွင်ႈသုၵ်ႉယုင်ႈၵေႃႈ တႅၼ်းၶိုၼ်းၵေႃႈယဝ်ႉယဝ်ႉ”
ဢဝ်ငိုၼ်းၼႂ်းထူင်မၼ်းၼၼ်ႉ ပၼ်တီႈၶူးၵွင်ၶမ်းၼၼ်ႉၵႂႃႇယူႇ။
“ပေႃးဢမ်ႇပေႃး မိူဝ်ႈၽုၵ်ႈတေဢဝ်မႃးပၼ်ထႅင်ႈၵူၺ်း”
ဢွၵ်ႇၵႂႃႇပႅတ်ႈႁဵတ်းၼၼ်ယဝ်ႉ။ ဝၼ်းလၢဝ်ၼၼ်ႉၵေႃႈ ၼႅတ်ႈလမ်းၸွမ်းမၼ်းၵႂႃႇ။ ၶူးၼၼ်ႉၵေႃႈ သမ်ႉပေႃးဢမ်ႇၸၢင်ႈဝႃႈႁိုဝ်မိူၼ်ၵၼ်လႄႈ ဢွၵ်ႇၵႂႃႇပႅတ်ႈသေ တီႈၼႃႈၸွမ်ပိဝ်ၼၼ်ႉၵေႃႈ ၵိုတ်းႁႃးသႅင်ၶဵဝ်ၼၼ်ႉၵူၺ်း၊ ၶႃႈၵေႃႈ တင်ႈၸႂ်လၢတ်ႈတေႃႇမၼ်းၵႂႃႇ
“ၵဝ်ဝူၼ်ႉဝႃႈ ၵဝ်လႅပ်ႈႁၢႆႉလိူဝ်ဢၢႆႈသွင်ၵေႃႉၼၼ်ႉယူႇၵူၺ်းၼႃ.. ဝႃႈႁိုဝ်လႃႇသႅင်ၶဵဝ် ဢမ်ႇၵူဝ်ၵဝ်ႁႃႉ”
ၶႃႈၵေႃႈ ၶဝ်ႈၵႂႃႇတူပ်းႁူဝ်မႃႇမၼ်းၼၼ်ႉလွႆးလွႆးယဝ်ႉ “မႂ်းတေလိူၵ်ႈၽၢႆႇလႂ်ၵေႃႈ ဝူၼ်ႉတူၺ်းလီလီလႄႈၼႃႈ ပေႃးမႂ်းဢမ်ႇလႅတ်း မႂ်းၵေႃႈတေဢမ်ႇယွမ်းႁႂ်ႈဢၢႆႈငိူဝ်ႈၶႃသွင်တူဝ်ၼၼ်ႉ ပေႉၵိၼ်မႂ်းလေႃႇ ဢမ်ႇဝႃႈၼၼ်ၼႄႇ”
ထိုင်မႃးထႅင်ႈဝၼ်းလိုဝ်ႈ ၶႃႈၵေႃႈ ႁွင်ႉဝႆႉသႂ်လႅင်း ၼူၼ်းမူဝ်ၶႃ ၵႂႃႇလႄႇတီႈလၢၼ်ႉသႅင်ၶဵဝ်ယူႇ။ ႁၼ်ဝႃႈၵူၼ်းၼႂ်းလၢၼ်ႉၼၼ်ႉ ပေႃးတဵမ်သုၵ်ႉသၵ်ႉလူင်ဝႆႉယဝ်ႉ၊ ၵေႃႉပဵၼ်သႂ်လႅင်း ဢၼ်ဢမ်ႇမေႃယူႇလၢႆၼၼ်ႉၵေႃႈ မိူဝ်ႈႁၼ်ၸိူင်ႉၼၼ် တေႃႉၸွႆႈယုၵ်ႉၸွႆႈသေဢမ်ႇၵႃး ၸႂ်ႉႁႃးၸွႆႈပႃးယဝ်ႉ။ ၵႂႃႇၸဵမ်မိူဝ်ႈၵၢင်ဝၼ်းပႆတဵင်ႈ တေႃႇထိုင်ၵၢင်ဝၼ်းတူၵ်း ၶၢဝ်းဢိုတ်းလၢၼ်ႉၸင်ႇတေလႆႈလိုဝ်ႈ။ ဢၼ်ၶႃႈၶႂ်ႈလၢတ်ႈၵေႃႈ ႁိူဝ်ႉတေႉယဝ်ႉ ၵူၺ်းၵႃႈ ပဵၼ်ႁိူၼ်းပိူၼ်ႈလႄႈ ဢမ်ႇလၢတ်ႈၵူၺ်း၊ ၶႃႈယင်းဢမ်ႇတွၼ်ႉႁဵတ်းၵၢၼ်ႁိူဝ်ႉၸိူင်ႉၼႆႁေပွၵ်ႈလႃႈ ယူႇႁိူၼ်းၵေႃႈယင်းဢမ်ႇတွၼ်ႉႁဵတ်းလူၵွၼ်ႇ၊ ၵူၺ်းၵႃႈမၼ်းၵေႃႈလီမိူၼ်ၵၼ် ပႃႈၶဝ်ၵေႃႈ ႁဵတ်းၶဝ်ႈၽၵ်းမႃးလဵင်ႉႁဝ်းႁေ မိူၼ်ဝႃႈမၼ်းဝၢၼ်ၼင်ႇ ၸိုဝ်ႈသဵင်ဢၼ်လိုဝ်းဝႆႉၼၼ်ႉတေႉတေႉယူႇ။ သႅင်ၶဵဝ်ၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈၵိၼ်ၶဝ်ႈၵုမ်းႁဝ်းၵႂႃႇယဝ်ႉ။
ၸမ်ၶမ်ႈယဝ်ႉၼႆလႄႈ ႁဝ်းၵေႃႈဢွၼ်ၵၼ်ၽႄၵၼ် မိူဝ်းၵႂႃႇႁင်းၽႂ်ႁင်းမၼ်း၊ ၶႃႈၵေႃႈ ပွၵ်ႈမိူဝ်းႁိူၼ်းၵႂႃႇလွႆးလွႆး။ ပေႃးမႃးဝူၼ်ႉတူၺ်းၶိုၼ်း ဢၼ်ႁဵတ်းယူႇဝၼ်းမိူဝ်ႈၼႆႉ တမ်ႉဢမ်ႇတၼ်းႁူႉႁင်လႃႈ မိူဝ်ႈႁဵတ်းမၼ်းတႄႉႁိူဝ်ႉယူႇ ၵူၺ်းၵႃႈ မိူဝ်ႈလဵဝ် မိူၼ်ၶႃႈတေသိူဝ်းၸႂ်တေႉယဝ်ႉ။
ထိုင်ဝၼ်းၶိုၼ်ႈႁူင်းႁဵၼ်းၶိုၼ်းယဝ်ႉ လိူၵ်ႈလိူၵ်ႈသမ်ႉႁူပ်ႉၺႃးသႅင်ၶဵဝ်တီႈတၢင်းၽေၼၼ်ႉႁေ မၼ်းၼၼ်ႉၵေႃႈႁိုဝ်ႁတ်းယူႇၸမ်ၶႃႈလႃႇ ၵူဝ်ဝႃႈဢၢႆႈဢွင်ႇၶဝ်တေမႃးႁၼ်ၼႆၼၼ်ႉၼႃႇ။
“ဝူၼ်ႉဝႃႈဢၢႆႈဢွင်ႇၶဝ်ဢမ်ႇႁူႉႁႃႉ မိူဝ်ႈဝႃးႁဝ်းၵႂႃႇၸွႆႈတီႈလၢၼ်ႉမႄႈသူၼၼ်ႉ မၼ်းပေႃးႁူႉယဝ်ႉၵွၼ်ႇလႃႈ”
သမ်ႉပေႃးဢဝ်မၼ်းၵိုတ်းၵႂႃႇယူႇ။ “ပဵၼ်သင်လႄႈတေၶႂ်ႈမႃးပဵၼ်ဢူၺ်းၵေႃႉၵၼ်တင်းၵဝ်လႃႇ”
“ဝူၼ်ႉဝႃႈမႂ်းလီဢီးလူလႄႈၶႂ်ႈလဵၼ်ႈၵေႃႉၸိူင်ႉၼၼ်ႁႃႉ ဢမ်ႇၸႂ်ႈလေႃႇ၊ ၵဝ်ဝူၼ်ႉဝႃႈ မႂ်းၵေႃႈပဵၼ်ၵူၼ်း ဢၼ်ထုၵ်ႇလီလႆႈႁပ်ႉလွင်ႈလီလီ တီႈဢူၺ်းၵေႃႉၽွင်ႈၼၼ်ႉၼႃႇ”
ယၢမ်းၼၼ်ႉသမ်ႉ ၵႃးဢၢႆႈဢွင်ႇၶဝ်ၽႅတ်ႈမႃးမႅၼ်ႈဢဝ်လီလီ သႅင်ၶဵဝ်ၼၼ်ႉၵေႃႈ ၼႅတ်ႈဢွၵ်ႇႁၢင်ႇၶႃႈၵႂႃႇယဝ်ႉ။
“ၸဵပ်းယူႇႁႃႉ! ဢၼ်ၶဝ်ႁဵတ်းႁၢႆႉမႂ်းၼၼ်ႉ”
မၼ်းၵေႃႈႁိုဝ်တေတွပ်ႇၶႃႈ ၶႃႈၸင်ႇသိုပ်ႇလၢတ်ႈထႅင်ႈ “ၵဝ်ဝႃႈဢၼ်ၸဵပ်းလိူဝ်သေႁွႆးၸမ်ႉၸိူဝ်းၼႆႉ ပဵၼ်တီႈၸႂ်မႂ်းၼၼ်ႉယဝ်ႉ”
“မႂ်းတေႁူႉလွင်ႈသင်လႃႇ ပေႃးဢမ်ႇႁူႉၵေႃႈယႃႇလၢတ်ႈလႄႈ”
“ၵူၼ်းၸိူင်ႉၼင်ႇၶဝ်ဢမ်ႇမေႃၵူမ်ႈၵွမ်းၼွမ်းတေႃႇပိူၼ်ႈလေႃႇ၊ ယိုင်ႈပိူၼ်ႈၸွမ်းၸႂ် ယိုင်ႈထၢင်ႇႁၢင်ႈႁဵတ်းၵူၺ်း၊ ယိုင်ႈၵူဝ်ၶဝ် ယိုင်ႈထၢင်ႇႁၢင်ႈပေႉၵိၼ်ၵူၺ်း၊ ပဵၼ်သင်လႄႈတေသုမ်းၶၢဝ်းယၢမ်းယူႇၸွမ်းၶဝ်လႃႇ ယွၼ်ႉဢူၼ်ႈဢွၼ်ႇႁႃႉ၊ ယွၼ်ႉဢမ်ႇမီးသင်ႁႃႉ၊ ယွၼ်ႉၶဝ်ပဵၼ်ၵူၼ်းမီးၸၼ်ႉထၢၼ်ႈ မီးဢႃႇၼႃႇၸိူင်ႉၼၼ်ႁႃႉ၊ ယွၼ်ႉသင်ၵေႃႈယဝ်ႉ မၼ်းပဵၼ်ၶေႃႈဢၢင်ႈတင်းမူတ်းၵူၺ်း၊ ၼင်ႇႁိုဝ်တေဢမ်ႇႁတ်းလၢတ်ႈဢွၵ်ႇ ၶေႃႈၵႂၢမ်းဝႃႈၵူဝ်ၼႆၼၼ်ႉၼႃႇ ဢမ်ႇၸႂ်ႈႁိုဝ်”
ၶႃႈၵေႃႈလႅၼ်ႈပူၼ်ႉၵႂႃႇတၢင်းၼႃႈမၼ်းသေယဝ်ႉ ၵွင်လင်ပႆၵႂႃႇ ႁူပ်ႉတေႃႇၼႃႈသေဢုပ်ႇၸူးမၼ်းထႅင်ႈ
“ၵူဝ်ဢၼ်ဝႃႈၼၼ်ႉ ၸွင်ႇႁူႉႁႃႉ မၼ်းမီးသဵၼ်ႈမႆလဵၵ်ႉလဵၵ်ႉဢွၼ်ႇ ၶႅၼ်ႈဝႆႉဢိတ်ႉၼိုင်ႈ တင်း လွင်ႈႁတ်းဢၼ်ဝႃႈၼၼ်ႉၼေႈ ၸွင်ႇယုမ်ႇႁိုဝ် ပေႃးဢမ်ႇယုမ်ႇၵေႃႈၸၢမ်းတူၺ်းလႄႈ”
ၽွင်းၼၼ်ႉသမ်ႉ ၶႃႈဢမ်ႇတၼ်းတူၺ်းလင်လႄႈ ၽႃႇၺႃးၵူၼ်းၵေႃႉၼိုင်ႈ ဢဝ်ၶႃႈသမ်ႉပေႃးဢၢင်ႈလူမ်ႉလူင်ၵႂႃႇ လိူၵ်ႈလိူၵ်ႈၵူၼ်းၵေႃႉၼၼ်ႉသမ်ႉ ၸၼ်ၶႅၼ်ၶႃႈဝႆႉသေ
“ပဵၼ်သင်လႄႈ..ပႆတၢင်းဢမ်ႇတူၺ်းတၢင်းလႃႇ!” ၼၼ်ႉတႄႉပဵၼ်ၸွမ်ၶိူဝ်းယဝ်ႉ။
“ႁၢင်ႈမႃးၸဵမ်ၵႆႈယဝ်ႉဢမ်ႇၸႂ်ႈႁႃႉ တိုၵ်ႉထိုင်ဢဝ်တီႈၼႆႈၵူၺ်းလႃႇ ဢၢႆႈၸၢႆးႁဝ်းၶဝ်လူး!”
“ၵႂႃႇႁွတ်ႈႁူင်းႁဵၼ်းယဝ်ႉယူဝ်ႉ!” ယၵ်ႉတူၺ်းသႅင်ၶဵဝ်သေထၢမ်ထႅင်ႈ “ဢူၺ်းၵေႃႉၵၼ်ႁႃႉ”
“ၶႂ်ႈႁူႉႁဵတ်းသင်လႃႇ လွင်ႈၶႃႈၵူၺ်း”
“ၵေႃႈယဝ်ႉလႄႈ..ဢမ်ႇၸႂ်ႈၵေႃႈ..”
မိူဝ်ႈဢၼ်သႅင်ၶဵဝ်ဢၢင်ႈၶဝ်ႈႁွင်ႈႁဵၼ်းၵႂႃႇၼၼ်ႉ ဢၢႆႈဢွင်ႇၶႃဝၼ်းလၢဝ် ဢၼ်ပႂ်ႉယူႇတီႈၼႃႈၽၵ်းတူၼၼ်ႉၵေႃႈ ၶုၼ်ႇႁုၵ်ႉၸၼ်ဢဝ်ထူင်သႅင်ၶဵဝ် ဢွၵ်ႇၼွၵ်ႈၽၵ်းတူၵႂႃႇယဝ်ႉ။ ယၢမ်းၼၼ်ႉ ၶႃႈဢၼ်လႆႈႁၼ်ၸိူင်ႉၼၼ်ၵေႃႈ ၼႅတ်ႈလႅၼ်ႈၵႂႃႇၸွမ်းႁေ
“ပွႆႇမၼ်းလႄႈ!..”
“မႂ်းယႃႇမႃးသုၵ်ႉယုင်ႈၸွမ်း၊ မၼ်းပဵၼ်ၵူၼ်းၵဝ်ဢိူဝ်ႈ မႂ်းႁတ်းမႃးသုၵ်ႉယုင်ႈလႆႈၸိူင်ႉႁိုဝ်!” ဢၢႆႈဢွင်ႇၼၼ်ႉတင်းၼႃႈၵမ်ႇၼႃႈလမ်သေလၢတ်ႈယူႇ။
ၶႃႈၵေႃႈၸႂ်လမ်ၼႃႇယဝ်ႉလႄႈ ၶုၼ်ႇသႅၼ်ႇႁွင်ႉသေႃႇၸူးမၼ်း “မႂ်းတေပွႆႇႁႃႉဢမ်ႇပွႆႇ!!”
“မႂ်းႁဵတ်းသင်ၵဝ်ဢမ်ႇလႆႈလေႃႇ သမ်ႉဝႃႈၵဝ်ဢမ်ႇပွႆႇၵေႃႈ”
ၶႃႈၼၼ်ႉၵေႃႈ ဢမ်ႇသူၼ်ၸႂ်ၽႂ်ယဝ်ႉ ၸွမ်းၼင်ႇသဵင်မီး ၶုၼ်ႇႁွင်ႉသႅၼ်ႇမေႃးပၼ်း ႁႂ်ႈပိူၼ်ႈပေႃးလႆႈငိၼ်းတင်းႁူင်းႁဵၼ်းၼၼ်ႉယိုင်။
“တီႈၼႆႈမီးၵူၼ်းၽိတ်းၵၼ်ၶႃႈ! တီႈၼႆႈမီးၵူၼ်းၽိတ်းၵၼ်!”
လုၵ်ႈႁဵၼ်းၸိူဝ်းဢၼ်လႆႈၸႂ် ၶႂ်ႈႁူႉၶႂ်ႈႁၼ်လွင်ႈပိူၼ်ႈၼၼ်ႉၵေႃႈ ဢွၼ်ၵၼ်လႅၼ်ႈမႃးတူၺ်းယူႇ။ မိူဝ်ႈၵူၼ်းဢွၼ်ၵၼ်လႅၼ်ႈမႃးၼၼ်ႉ
“ဢိုတ်းသူပ်းမႂ်းလႄႈဢေးၼႆႉ ပေႃးမႂ်းဢမ်ႇၶႂ်ႈႁႂ်ႈၵဝ်လၢၵ်ႈပႃးၸွမ်းၵေႃႈ”
ၶႃႈၼၼ်ႉၵေႃႈ ၼင်ႇႁိုဝ်တေလွတ်ႈၼၼ်ႉ ႁူၼ်လင်ႁၢင်ႇဢွၵ်ႇၵႂႃႇၶိုၼ်းမွၵ်ႈႁႃႈယၢင်ႈၼႆႉယဝ်ႉ မႄးၶုၼ်ႇသႅၼ်ႇႁွင်ႉသေႃႇထႅင်ႈ။ ၸဵမ်လုၵ်ႈႁဵၼ်း၊ ၸဵမ်ၶူးဢွၼ်ၵၼ်မႃးတူၺ်း၊ ဢၢႆႈဢွင်ႇၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈပွႆႇသႅင်ၶဵဝ်ၵႂႃႇယူႇယဝ်ႉ။
တွၼ်ႈသၢဝ်းသွင်သုတ်းၵႂႃႇယဝ်ႉလႄႈ သိုပ်ႇတူၺ်းထႅင်ႈတွၼ်ႈသၢဝ်းသၢမ်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
