တွၼ်ႈသၢဝ်း
မၼ်းပဵၼ်သၽႃႇဝၵူၺ်းႁိုဝ်၊ မၼ်းပဵၼ်တၢင်းယၢမ်ႈၵူၼ်းႁိုဝ်၊ ပဵၼ်လွင်ႈဢၼ်လီႁၢၼ်ႉၸႂ်ႁိုဝ် ဢၼ်လႆႈလၢတ်ႈထိုင်လွင်ႈဢမ်ႇလီပိူၼ်ႈ၊ လႆႈဢဝ်လွင်ႈတူဝ်ၵဝ်ႇၼၼ်ႉတႅၵ်ႈၼိူင်းၵၼ်တင်းပိူၼ်ႈ၊ သႄႉၼႄးပိူၼ်ႈ ႁဵတ်းမိူၼ်ဝႃႈ တူဝ်ၵဝ်ႇၼၼ်ႉပဵၼ်ၵူၼ်းလီ ဢမ်ႇယၢမ်ႈႁဵတ်းၽိတ်းတီႈလႂ် မိူဝ်ႈယူႇပႃႈၼႃႈၵေႃႈယုမ်ႉၸူးၼင်ႇပဵၼ်ဢူၺ်းလီ၊ ပေႃးယူႇပႃႈလင်သမ်ႉ လၢတ်ႈလွင်ႈဢမ်ႇလီလၢႆလၢႆ၊ ပေႃးပိူၼ်ႈလၢတ်ႈၸူးၸဝ်ႈၵဝ်ႇၶိုၼ်းသမ်ႉ ဢမ်ႇၵျိူၵ်ႈၸႂ်၊ မေႃမီးလွင်ႈပႅင်းၸင်းမႃး ၼင်ႇဝႃႈတူဝ်ၸဝ်ႈၵဝ်ႇၼၼ်ႉ ႁဵတ်းလီယူႇတႃႇသေႇယဝ်ႉ။
သင်ဢဝ်လွင်ႈလၢတ်ႈထိုင်ဢၼ်ဢမ်ႇလီပိူၼ်ႈၼၼ်ႉ လႅၵ်ႈလၢႆႈ လၢတ်ႈထိုင်လွင်ႈလီလီၵူၺ်းၼႆ မၼ်းတေလီတေႃႇပိူၼ်ႈလႄႈ တေႃႇႁဝ်းမႃးတႄႉတႄႉယူႇ၊ မိူဝ်ႈၵုမ်ႇမိုင်ႉဢဝ်လွင်ႈၸဝ်ႈၵဝ်ႇ ၵႂႃႇတႅၵ်ႈၼိူင်းတင်းပိူၼ်ႈယူႇၼၼ်ႉ မႃးထတ်းသၢင်တူၺ်းၶိုၼ်း တူဝ်ၸဝ်ႈၵဝ်ႇၼႆ တေၸၢင်ႈႁၼ်ၵႃႈၶၼ်တူဝ်ၵဝ်ႇလႄႈ ႁၼ်ၵႃႈၶၼ်ပိူၼ်ႈမႃးယဝ်ႉ။ မိူဝ်ႈႁဵတ်းၽိတ်းၼၼ်ႉ ယွမ်းႁပ်ႉၽိတ်းသေ ၸႂ်ႁဝ်းၵေႃႈတေၵတ်းယဵၼ်မႃးၸွမ်းယူႇ။ ႁၼ်ၽႂ်ၵေႃႈယုမ်ႉၸူးသေ မၼ်းဢမ်ႇႁဵတ်းႁႂ်ႈ ၵႃႈၶၼ်ႁဝ်းတူၵ်းလူင်းၼင်ႇၵဝ်ႇ။ ဢမ်ႇဝႃႈယူႇပႃႈၼႃႈႁိုဝ်ပႃႈလင် ၸႂ်ႁဝ်းၼၼ်ႉ ထုၵ်ႇလီမီးလွင်ႈသိုဝ်ႈယူဝ်းယူႇ ဢမ်ႇၸႂ်ႈႁိုဝ်၊ မိူဝ်ႈပိူၼ်ႈလၢတ်ႈၸူးႁဝ်းၼၼ်ႉ ႁပ်ႉထွမ်ႇတူၺ်းၵေႃႈဢမ်ႇယွမ်းသင်လူး၊ ပေႃးမီးတၢင်းႁူႉတေႉတႄႉ ယင်းတေမေႃထတ်းသၢင်တူၺ်း ၶေႃႈၵႂၢမ်းဢၼ်ပိူၼ်ႈလၢတ်ႈၼႄလူးၵွၼ်ႇဝႃႈ မၼ်းမီးလွင်ႈမီးတၢင်းတၢၼ်ႇႁိုဝ်ၼႆ။
ၵူၼ်းႁဝ်း မၼ်းႁူႉတိုၼ်းမီးတီႈယွပ်ႈယွမ်း လႄႈ တီႈလီယူႇယဝ်ႉ၊ ယူႇတီႈဝႃႈၼႂ်းသၢႆတႃၵူၼ်းၵေႃႉၼိုင်ႈလႄႈၵေႃႉၼိုင်ႈၼၼ်ႉ တေတူၺ်းႁဝ်းၸိူင်ႉႁိုဝ်ၵူၺ်း၊ ဢမ်ႇမီးၽႂ်ႁူႉၸၵ်းႁဝ်းလႆႈလီ တၢၼ်ႇတူဝ်ၸဝ်ႈၵဝ်ႇ။ ဢမ်ႇဝႃႈႁဝ်းပဵၼ်ၵူၼ်းၸိူင်ႉႁိုဝ်ၵေႃႈယဝ်ႉ တေၸွမ်းၸႂ်ႁဵတ်းၸွမ်းၵႂၢမ်းဢၼ်ပိူၼ်ႈလၢတ်ႈၼၼ်ႉ ၵူႈၵေႃႉ၊ ၵူႈလွင်ႈ၊ ၵူႈဢၼ် ဢမ်ႇလႆႈ ယွၼ်ႉဢမ်ႇၸႂ်ႈသုၼ်ၵၢင်တႃႇၵူၼ်းတင်းၼမ် ၵူၺ်းပဵၼ်သုၼ်ႇၼိုင်ႈၼႂ်းတူင်ႇဝူင်းၼၼ်ႉၵူၺ်း။
ၶႃႈဢၼ်ယူႇၼႂ်းသိုင်ႇမိုဝ်ႉၼၼ်ႉၵေႃႈ ဢမ်ႇမေႃႁဵတ်းသင်လႄႈ ဢမ်ႇၸၢင်ႈႁဵတ်းသင်ယဝ်ႉ ၸင်ႇဢွၵ်ႇမႃးတၢင်းၼွၵ်ႈၶိုၼ်းယူႇ။ ပႃႈဢၼ်ဢွၼ်ၵၼ်ၼင်ႈႁေၵိၼ်ႁေ ဢုပ်ႇၵၼ်၊ လၢတ်ႈထိုင်လွင်ႈပိူၼ်ႈယူႇၸိူဝ်းၼၼ်ႉၵေႃႈ တူၺ်းၶႃႈသေယဝ်ႉ
“ၵူၼ်းပေႃးၵေႃႉယႂ်ႇတၢၼ်ႇၼႆႉယဝ်ႉ ၶူဝ်ႈၼင်ပွင်းၵူၺ်းၵေႃႈဢမ်ႇမေႃၵွၼ်ႇၵႂႃႈ”
“ႁၢင်ႈပဵၼ်လၢၼ်ၼၢႆးဢွၼ်ႇပွၵ်ႉႁႃႈၼၼ်ႉဢမ်ႇၸႂ်ႈႁႃႉ!”
“ဢိူဝ်ႈၵဝ်ဝႃႇလႄႈ ၼၢႆးၶဝ်ၸွင်ႇပၼ်ႁဵတ်းၵၢၼ်ႁင်ၵေႃႈဢမ်ႇၸႂ်ႈ မိူၼ်ၼႆယဝ်ႉ လုၵ်ႈဢွၼ်ႇပေႃးဢမ်ႇမေႃၸႂ်ႉၵေႃႈ တေမေႃႁဵတ်းႁင်ၼႄႇ ”
“ၵႃႈၶႂ်ႈၸႂ်ႉယဝ်ႉဢိူဝ်ႈ ပေႃးဢမ်ႇလႆႈလွင်ႈၵေႃႈ မၼ်းတိုၼ်းဢမ်ႇလႆႈလွင်ႈၵူၺ်းလေႃႇ”
“ပေႃးဢေးလႅင်ႁဝ်းမိူၼ်ၼၼ်တႄႉ ၺႃးၶွၼ်ႉပေႃးဢမ်ႇယဝ်ႉၼႆႉ”
“လုၵ်ႈဢွၼ်ႇမိူဝ်ႈလဵဝ်ၼႆႉ ၶဝ်တိုၼ်းၶၢၼ်ႉၵူၺ်းႁႃႉတေႃႈၵဝ်ဝႃႈ တူၺ်းဢေးသႅင်လိုၼ်းႁိမ်းႁိူၼ်းႁဝ်းၼၼ်ႉၵေႃႈ ၶၢၼ်ႉဝႃႈၶၢၼ်ႉယဝ်ႉ လုၵ်ႉလႃႈဝႃႈလုၵ်ႉလႃႈၼေႈ ၵႂႃႇႁူင်းႁဵၼ်းၵေႃႈ ပေႃႈမႄႈၶဝ် ယင်းတိုၵ်ႉလႆႈလုၵ်ႉႁဵတ်းၶဝ်ႈႁဵတ်းၽၵ်းပၼ်ယူႇ”
“ၼၼ်ႉယဝ်ႉဝႃႈ ဢေးလၢဝ် တၢင်းတူၵ်းႁိူၼ်းႁဝ်းၼၼ်ႉၵေႃႈမိူၼ်ၼၼ်ယဝ်ႉဝႃႈ သမ်ႉၸၢင်ႈတွပ်ႇၸၢင်ႈထဵင်ပိူၼ်ႈထႅင်ႈႁေ”
“ၵၢမ်ႇလီလႃႈ..ဢေးမူၺ်ႁဝ်းၼၼ်ႉယင်းဢမ်ႇပဵၼ်ၼၼ်”
“ဢေးလုၵ်ႈႁဝ်းၼၼ်ႉတႄႉ မေႃႁုင်ၶဝ်ႈႁဵတ်းၽၵ်းႁင်းၵူၺ်းမၼ်းယဝ်ႉဢိူဝ်ႈ ၵႂႃႇႁူင်းႁဵၼ်းၵေႃႈဢမ်ႇလႆႈမႆႈၸႂ်သင်ၸွမ်းယဝ်ႉ”
“ဢေးလႅင်ႁဝ်းၼၼ်ႉၵေႃႈ ႁဵတ်းႁင်းၵူၺ်းမၼ်းလၢႆလၢႆယဝ်ႉဝႃႈမိူဝ်ႈလဵဝ်”
ဢွၼ်ၵၼ်ဢုပ်ႇယွင်ႈလုၵ်ႈၵဝ်လုၵ်ႈမႂ်းၼႄၵၼ်ယူႇ။ တေႃႇၶဝ်ဢုပ်ႇယဝ်ႉတႄႉ ၼင်ပွင်းဢၼ်ၵိုတ်းပဵၼ်ထူင်လူင်ၼၼ်ႉၵေႃႈ ပိူၼ်ႈသမ်ႉပေႃးတေၶူဝ်ႈမူတ်းယဝ်ႉလူးၵွၼ်ႇ။ ပေႃးဝႃႈတေႉ ဢၼ်ၶဝ်မေႃႁဵတ်းၼၼ်ႉသမ်ႉ ဢမ်ႇႁဵတ်းၼင်ႇၵဝ်ႇ၊ ဢၼ်ၶႃႈဢမ်ႇမေႃႁဵတ်းၼၼ်ႉတႄႉ သမ်ႉဝႃႈပဵၼ်ၵူၼ်းဢမ်ႇလႆႈလွင်ႈၼႆဝႃႇ၊ ပေႃးဢဝ်ၶႃႈဝႃႈတႄႉ ၶဝ်ၶႅၼ်းပဵၼ်ၵူၼ်းဢၼ်ပႅတ်ႈလၢႆလိူဝ်သေၶႃႈယဝ်ႉ မေႃယူႇၵေႃႈဢမ်ႇႁဵတ်း၊ သင်ၶႃႈဢမ်ႇဝူၼ်ႉဝႃႈမႃးၸွႆႈႁဵတ်းၵၢၼ်လီၵုသူဝ်ႇၼႆတႄႉ တေထဵင်ပၼ်ၶိုၼ်းႁေယဝ်ႉ ၵူၼ်းလူင်ၸိူဝ်းၼၼ်ႉ မၢင်ပွၵ်ႈၵေႃႈဢမ်ႇၶႂ်ႈဝႆႉၼႃႈယဝ်ႉ။
မိူဝ်ႈၶႃႈၵႂႃႇၼႂ်းဝတ်ႉ ဢၼ်မီးသႂ်လႅင်းလႄႈၼူၼ်းမူဝ်ၶႃသွင်ၵေႃႉၵူၺ်းၼၼ်ႉ ယင်းတိုၵ်ႉပတ်းၽဵဝ်ႈၼႂ်းၵျွင်းလူင်ယူႇ။ ၶႃႈယင်းဢမ်ႇပႆႇလႆႈၵႂႃႇတၵ်ႉၶႃ မွင်းႁၼ်ၶႃႈၵႂႃႇၸူးၵူၺ်း ပေႃးၼႅတ်ႈႁွင်ႉလၢတ်ႈတေႃႇယူႇယဝ်ႉ။
“ဢေးယိင်းၵေႃႈမႃးႁေႁႃႉ!..” ၼူၼ်းမူဝ်တင်းလၢတ်ႈတင်းယုမ်ႉၸူး။
“မႃးၵေႃႈလီယဝ်ႉ” သႂ်လႅင်းဢဝ်တင်းယူးႁေယိုၼ်ႈပၼ်ၶႃႈၵႂႃႇ။
ပတ်းႁိူၼ်းပတ်းယေးၵူၺ်းတႄႉ ၶႃႈၵေႃႈပတ်းယူႇၵူၺ်းၼင်ႇၵဝ်ႇ မၢင်ပွၵ်ႈမၢင်လႂ်၊ ၵူၺ်းၵႃႈ ဢမ်ႇႁူႉဝႃႈပတ်းၼႂ်းဝတ်ႉၼႆႉၸွင်ႇတေမိူၼ်ၵၼ်တႄႉဢမ်ႇႁူႉ။ ၶႃႈၵေႃႈ ပတ်းၵႂႃႇၸွမ်းၶႃလွႆးလွႆး၊ ၵူၺ်းၵႃႈ ယူးၼၼ်ႉသမ်ႉ ၵၼ်းမၼ်းၶႂ်ႈၶွၼ်းၶွၼ်းဝႆႉလႄႈ ပတ်းၵႂႃႇတၢၼ်ႇတၢၼ်ႇ ဢမ်ႇႁိုင်ၵေႃႈၵၼ်းမၼ်းႁၵ်းၵႂႃႇယဝ်ႉ။ ၶႃႈဝႃႈတႄႉ ၶႃႈလႄႈတင်းဝတ်ႉၼၼ်ႉ ဢမ်ႇမႅၼ်ႈၵၼ်ယဝ်ႉ၊ ထၢင်ႇတႄႉၶႃႈတေပဵၼ်ၵူၼ်းမီးဝူတ်ႈၼႃဝႆႉယူဝ်ႉ ႁဵတ်းသင်ၵေႃႈ ပေႃးဢမ်ႇလီလူင်ၵႂႃႇမူတ်း၊ မိူဝ်ႈၼၼ်ႉ ၶႃႈၶုၵ်းၸႂ်လႆႈႁိူၼ်းတေႉယဝ်ႉ ၼႂ်းၸႂ်ၶႃႈၼၼ်ႉ ႁွင်ႉသႅၼ်ႇမေႃးပၼ်းလူင်ၵႂႃႇ “ၶႂ်ႈမိူဝ်းႁိူၼ်း” လင်ဝႃႈလင်ယဝ်ႉ။ တွၼ်းသေဝႃႈ မၼ်းဢမ်ႇမီးသဵင်ဢွၵ်ႇမႃးၵူၺ်း၊ ၶႃႈၵေႃႈ ၼင်ႈႁေထူၺ်ႈၸႂ်လူင်ယူႇႁဵတ်းၼၼ်ယဝ်ႉ။
ဢမ်ႇထၢင်ႇဝႃႈသႂ်လႅင်းတေမႃးၸူးၶႃႈသေယဝ်ႉ ယိပ်းဢဝ်ယူးလႄႈတင်းၵၢၼ်ႈမၼ်း မႄးဢဝ်သဵၼ်ႈမႆမၼ်းၼၼ်ႉ ၶွတ်ႇၵႂႃႇၵႂႃႇမႃးမႃးႁေယဝ်ႉ ယူးၼၼ်ႉၵေႃႈ ၸႂ်ႉလႆႈမႃးၶိုၼ်းယူႇ။
“ယူးၼႆႉမၼ်းတိုၼ်းဢမ်ႇလီၵူၺ်း ၸႂ်ႉဢၼ်ႁဝ်းၼႆႉလႄႈ ႁဝ်းတေၸႂ်ႉၵူၺ်းဢၼ်သူၼၼ်ႉ” မၼ်းၵေႃႈဢဝ်ယူးမၼ်းၼၼ်ႉ ပၼ်ၶႃႈသေယဝ်ႉ ဢဝ်ယူးဢၼ်ၶႃႈၸႂ်ႉၼၼ်ႉၵႂႃႇယူႇ။
မိူဝ်ႈဢၼ်ငိၼ်းသႂ်လႅင်းလၢတ်ႈၸိူင်ႉၼၼ်မႃးၵေႃႈ ၸင်ႇႁဵတ်းႁႂ်ႈၶႃႈမီးႁႅင်းလုၵ်ႉမႃးယူႇ။ ဢမ်ႇၸႂ်ႈဝႃႈၶႃႈႁဵတ်းႁႂ်ႈမၼ်းဢမ်ႇလီ ၵူၺ်းၵႃႈ မၼ်းတိုၼ်းဢမ်ႇလီဝႆႉယူႇယဝ်ႉ။
ၼူၼ်းမူဝ်ဢၼ်ႁၼ်ၶႃႈပတ်းယူးၼၼ်ႉၵေႃႈ
“ႁဝ်းဝႃႈတႄႉ..သူတေၵႆႉပတ်းႁိူၼ်းတေႉယဝ်ႉ”
“ဢမ်ႇၼႃ..ႁဝ်းပတ်းမၼ်းပဵၼ်သင်လႃႇ လၢတ်ႈသိုဝ်ႈသိုဝ်ႈၵေႃႈလႆႈယူႇၵူၺ်း ဝႃႈႁဝ်းၼၼ်ႉဢမ်ႇမေႃသေဢိတ်းၼႆ”
“ပဵၼ်သင်တေလႆႈလၢတ်ႈၸိူင်ႉၼၼ်လႃႇ သူပတ်းၶႅမ်ႉတေႉဢိူဝ်ႈ”
သႂ်လႅင်းၼၼ်ႉၵေႃႈ မႄးလၢတ်ႈၸွမ်းမၼ်းၵႂႃႇထႅင်ႈႁေ ဢဝ်ၶႃႈသမ်ႉပေႃးဢမ်ႇၸၢင်ႈလၢတ်ႈသင်ၸွမ်းလႆႈယဝ်ႉ။ ႁဵတ်းၵႂႃႇႁဵတ်းမႃး ၼႂ်းဝတ်ႉဢၼ်ၵႂၢင်ႈယႂ်ႇလူင်ၼၼ်ႉၵေႃႈ ဢွၼ်ၵၼ်ပတ်းၽဵဝ်ႈသမ်ႉပေႃးယဝ်ႉမူတ်းယူႇ။
မိူဝ်ႈၼႆႉတင်းဝၼ်း ၵမ်ႉသႂ်လႅင်းၸႂ်ႉႁဵတ်းဢၼ်ပုၼ်ႉ ၼူၼ်းမူဝ်ႁႂ်ႈႁဵတ်းဢၼ်ၼၼ်ႉ ႁဵတ်းဢၼ်ယဝ်ႉဢၼ်ၸွႆႈၵၼ်ၵႂႃႇ ဢမ်ႇတၼ်းႁူႉၶၢဝ်းယၢမ်း ပေႃးတၼ်းမီးႁူဝ်ၶမ်ႈယဝ်ႉ။ ၵမ်ႈၽွင်ႈဢၼ်မႃးလႄႇၼၼ်ႉၵေႃႈ ဢွၼ်ၵၼ်မႃးယဝ်ႉ။ မိူဝ်ႈဢၼ် သႂ်လႅင်း၊ ၼူၼ်းမူဝ်၊ သႅင်ႁၵ်ႉ၊ ၶမ်းၽွင် လႄႈၶႃႈ တိုၵ်ႉဢွၼ်ၵၼ်ၵိၼ်ၶဝ်ႈယူႇၼၼ်ႉ ဢၢႆႈၸၢႆးၵေႃႈ မႃးႁွင်ႉၶႃႈသေယဝ်ႉ
“ဢေးယိင်း ၸွင်ႇမႂ်းတေမိူဝ်းႁႃႉ”
မိူဝ်ႈငိၼ်းၸိူင်ႉၼၼ် ၶဝ်ၼၼ်ႉတႄႉ ဢမ်ႇၶႂ်ႈပၼ်ၶႃႈမိူဝ်းသေဢိတ်း။ ၵူၺ်းၵႃႈ မိူဝ်ႈၾူၼ်တူၵ်းၸိူင်ႉၼႆ ၶႃႈထုၵ်ႇလီပွၵ်ႈမိူဝ်းႁိူၼ်း ဢွၼ်တၢင်းမိူင်းတေလပ်းသိင်ႇ ၼၼ်ႉယဝ်ႉ။
“မိူဝ်းဢိူဝ်ႈ! ပႂ်ႉၽွင်ႈလႄႈ”
ၶႃႈၵေႃႈသူင်ႇသင်ႇၶဝ်ယဝ်ႉ ၵႂႃႇၸူးဢၢႆႈၸၢႆးၶဝ်ယူႇ။ ၵူၺ်းၵႃႈ ဢၢႆႈၸၢႆးၶဝ်ၼၼ်ႉသမ်ႉဢမ်ႇပႆႇမိူဝ်း ႁႂ်ႈၶႃႈမိူဝ်းၸွမ်းၶူးၽိဝ်ၾႃႉ ဢၼ်ဢဝ်ၵႃးမၼ်းမႃးၼၼ်ႉၼႆယဝ်ႉ။ မိူဝ်ႈငိၼ်းၸိူင်ႉၼၼ်ၵေႃႈ လီမိူၼ်ၵၼ် တေဢမ်ႇလႆႈပႆယမ်းၽူၼ်လူင်မိူဝ်း ၶႃႈၵေႃႈၼႅတ်ႈၵႂႃႇၶိုၼ်ႈၵႃးၶူး ဢၼ်ပႂ်ႉဝႆႉၼၼ်ႉယူႇ။
“မိူဝ်ႈၼႆႉပဵၼ်ႁိုဝ်လႃႇ လႆႈၸွႆႈပိူၼ်ႈႁိူဝ်ႉယူႇႁႃႉ” ၶူးၵေႃႈထၢမ်ၸူးၶႃႈ။
“ဢမ်ႇႁိူဝ်ႉၶႃႈ…မၼ်းၵျေႃႇဢေႃႈ ဢမ်ႇတၼ်းလႆႈဝူၼ်ႉသင် ပိူၼ်ႈႁဵတ်းႁင်ၵေႃႈႁဵတ်းၵႂႃႇတိၵ်းတိၵ်းၵူၺ်း”
“လူဝ်ႇၵႆႉၵႆႉမႃးယဝ်ႉပေႃးၼၼ်တႄႉ!..”
“ပေႃးလၢတ်ႈၸိူင်ႉၼႆၵေႃႈ ၶႃႈသမ်ႉပေႃးႁိူဝ်ႉမႃးယဝ်ႉ” မိူဝ်ႈဝူၼ်ႉၸိူင်ႉၼၼ် ၼင်ႇႁၢင်ႈႁွႆးၽႃႉတိူဝ်ႉၼၼ်ႉၵေႃႈ သမ်ႉပေႃးၸဵပ်းမႃးၵမ်းလဵဝ် ႁွႆးၼမ်ႉမၼ်းၽူင်ႉသႂ်ႇၼၼ်ႉၵေႃႈ သမ်ႉပေႃးမႆႈသႅပ်ႇလူင်မႃးယူႇ။
“မိူဝ်ႈၵႆႈတိုၵ်ႉလၢတ်ႈဝႃႈလီၵျေႃႇယူႇ သမ်ႉပေႃးတၼ်းလၢႆႈၵႂၢမ်းယဝ်ႉလႃႇ”
“ပေႃးၶူးဢမ်ႇမႃးလၢတ်ႈၸိူင်ႉၼၼ် ၶႃႈသမ်ႉပေႃးလိုမ်းယဝ်ႉၵွၼ်ႇၼႆႉ ဝႃႈၺႃးၽႃႉတိူဝ်ႉၼႆ ၸဵပ်းဝႃႈၸဵပ်းယဝ်ႉ”
“တၢင်းလင်လူတ်ႉၶူးၼၼ်ႉ မီးၵွင်ႇယႃယူႇၼႃ ၸွင်ႇတေသႂ်ႇႁိုဝ် ၶူးတေဢဝ်ပၼ်”
“ဢမ်ႇယဝ်ႉၶႃႈ မိူဝ်းသႂ်ႇတီႈႁိူၼ်းၵေႃႈလႆႈယူႇ”
“ဢဝ်ဝႃႈလႄႈ!”
ပေႃးဝႃႈၶဝ်ႈဝႃႇယဝ်ႉၼႆၵေႃႈ ၼင်ႇႁၢင်ႈၼႂ်းဝႃႇၼၼ်ႉ ၾူၼ်ၼႆႉတူၵ်းယူႇတႃႇသေႇယဝ်ႉ။ မၢင်လိူၼ်ၾူၼ်တူၵ်း ထၢၼ်ႈပေႃးဢမ်ႇႁၼ်လိူၼ်ႁၼ်ဝၼ်းၵေႃႈမီး။ လိူဝ်သေၼၼ်ႉ ပေႃးၾူၼ်တူၵ်းၼႆ သမ်ႉၼွၼ်းၵျေႃႇၼႃႇ ဢမ်ႇၶႂ်ႈလုၵ်ႉသေဢိတ်း။ ၵူၺ်းၵႃႈ ယိုင်ႈၾူၼ်တူၵ်း ယိုင်ႈတေလႆႈလုၵ်ႉၸဝ်ႉၼၼ်ႉယဝ်ႉ ယွၼ်ႉဢမ်ႇၸၢင်ႈပၼ်ႇလႅင်ထိပ်ႇၵႂႃႇ တၢင်းမိုၼ်ႈတၢင်းဢုင်ၼႃႇ။ ၼႂ်ၼႆႉၵေႃႈ ၶိုၼ်ႈႁူင်းႁဵၼ်းၶိုၼ်းယဝ်ႉလႄႈ ဢၢႆႈၸၢႆးၶဝ်ၼၼ်ႉတႄႉ ဢွၼ်ၵၼ်ၵႂႃႇထႃႈဢွၼ်တၢင်းၶႃႈယူႇ ယွၼ်ႉၶႃႈလုၵ်ႉလႃႈလႄႈ ဢမ်ႇတၼ်းၶိုတ်းၶဝ်ၵႂႃႇ လိူဝ်ၼၼ်ႉၵေႃႈ ဢမ်ႇပေႃးၶႂ်ႈၵႂႃႇၸွမ်းၶဝ်ၵႃႈႁိုဝ် ၸိူင်ႉႁိုဝ်ၵေႃႈ ပေႃးၾူၼ်တူၵ်းၼႆ ႁူင်းႁဵၼ်းၵေႃႈဢမ်ႇလႆႈၶဝ်ႈထႅဝ်ႁေ တူၵ်းလိုၼ်းဢိတ်းဢွတ်းၵူၺ်းတႄႉ ဢမ်ႇပဵၼ်ႁင်။ ၶႃႈၵေႃႈၵိၼ်ၶဝ်ႈၵိၼ်သင်ယဝ်ႉ ဢွၵ်ႇႁိူၼ်းမႃး ယင်းတိုၵ်ႉႁၼ် ၸွမ်ၶိူဝ်းပႂ်ႉဝႆႉယူႇလႄႈ
“ႁဵတ်းႁင်ပႆႇၵႂႃႇလႃႇ!..”
“မႃးဢမ်ႇၶိုတ်းၼုမ်ႇႁိူင်းၶဝ်ယဝ်ႉၼၼ်ႉၼႃႇ!”
“လုၵ်ႉလႃႈၵႂႃႈထၢင်ႇ! ပဵၼ်ႁင်ဢမ်ႇလမ်းၵႂႃႇၸွမ်းၶဝ်ႁေ တေပႂ်ႉၶႃႈႁဵတ်းႁင်လႃႇ”
“မၼ်းဢမ်ႇၶိုတ်းယဝ်ႉ!”
ယၵ်ႉတူၺ်းၶႃႈႁေယုမ်ႉယူႇ မိူၼ်တေဝူၼ်ႉသေလွင်ႈလွင်ႈယူႇၼၼ်ႉယဝ်ႉ။ သၢႆတႃမၼ်းၼၼ်ႉၵေႃႈ တူၺ်းဢဝ်ၶႃႈသမ်ႉပေႃးၶႂ်ႈလီၵူဝ်မႃးယဝ်ႉဝႃႈ။
ယၢမ်းၵၢင်ဝၼ်း မိူဝ်ႈဢၼ်ၶႃႈၽုၺ်ႇၵွၵ်းသွႆးႁေ တေဢၢင်ႈၵိၼ်ၶဝ်ႈယူႇႁင်းၵူၺ်းၼၼ်ႉၵေႃႈ ၼူၼ်းမူဝ်၊ သႂ်လႅင်း၊ သႅင်ႁၵ်ႉ လႄႈ ၶမ်းၽွင် ဢွၼ်ၵၼ်ၶၢႆႉမူႇၶဝ်ႈၶဝ် မႃးႁႃၶႃႈယူႇယဝ်ႉ။
“လဵၼ်ႈၵေႃႉၵၼ်မႃးႁိုင်ၵႃႈႁိုဝ်ယဝ်ႉ ပဵၼ်သင်လႄႈတိုၵ်ႉတေၼင်ႈၵိၼ်ၶဝ်ႈႁင်းၵူၺ်းယူႇ ဢမ်ႇႁၼ်ႁဝ်းၼႆႉ ပဵၼ်ဢူၺ်းၵေႃႉသူၽွင်ႈႁႃႉ” သႂ်လႅင်းၼၼ်ႉၵေႃႈ တူၺ်းၼႃႈၶႃႈၼင်ႇၸႂ်လဵၵ်ႉၶေႃးၶူမ်ဝႆႉယူႇ။
“ႁဝ်းၵေႃႈပဵၼ်ၵူၼ်းႁူႉၸၵ်းၵၼ်ၵူၺ်းဢမ်ႇၸႂ်ႈႁိုဝ်လႃႇ”
ဢဝ်သႅင်ႁၵ်ႉလႄႈၶမ်းၽွင်ၶႃပေႃးမိုင်လူင်ၵႂႃႇ တေဢၢင်ႈႁူၼ်ၵႂႃႇၶိုၼ်းတီႈၵဝ်ႇယူႇယဝ်ႉ။
“ၵိၼ်တီႈၼႆႈလႄႈ တေသူၼ်ၸႂ်မၼ်းႁဵတ်းသင်” ၼူၼ်းမူဝ်ၶိုၼ်းလၢတ်ႈၸူးၶႃၵႂႃႇ ၼင်ႇဢမ်ႇသူၼ်ၸႂ်ၶႃႈသေဢိတ်းၼၼ်ႉယဝ်ႉ။
ၶႃသွင်ၵေႃႉၼၼ်ႉၵေႃႈ တေၸၢင်ႈႁဵတ်းႁိုဝ် ၵႃႈလႆႈတမ်းၵွၵ်းၶဝ်ႈၶႃၵႂႃႇႁဵတ်းၼၼ်ၵူၺ်း။
“သမ်ႉဝႃႈႁဝ်းဢမ်ႇၸႂ်ႈဢူၺ်းၵေႃႉသူၵေႃႈ ႁဝ်းၶႂ်ႈႁႂ်ႈသူႁူႉဝႆႉဝႃႈ သူၼၼ်ႉပဵၼ်ဢူၺ်းၵေႃႉႁဝ်းယဝ်ႉ ႁဝ်းၵေႃႈလႆႈႁူႉၸၵ်းၵၼ် မိုတ်ႈၵၼ်ၸဵမ်မိူဝ်ႈသူဢုပ်ႇၸူးႁဝ်းၼၼ်ႉယဝ်ႉ” ၼူၼ်းမူဝ်ၼၼ်ႉၵေႃႈ တင်းလၢတ်ႈ တင်းတၵ်းၽၵ်းမၼ်းသႂ်ႇပၼ်ၼႂ်းၵွၵ်းၶဝ်ႈၶႃႈၵႂႃႇယဝ်ႉ။
ၶဝ်ႁဵတ်းႁႂ်ႈၶႃႈၵူဝ်ၶဝ်တေႉယဝ်ႉ သင်ၶဝ်ၸၢၼ်ႈၸင်းၶႃႈ၊ ဢိမ်ႇမိူဝ်ႈၶႃႈ ဢမ်ႇၶႂ်ႈႁူႉၸၵ်းၶႃႈယင်းတေလီ ၵူၺ်းၵႃႈ ယိုင်ႈၶႃႈဢမ်ႇသူၼ်ၸႂ် ယိုင်ႈၶတ်းၸႂ်ၶဝ်ႈႁႃၶႃႈ၊ သမ်ႉဝႃႈၶႃႈတေလၢတ်ႈၵႂၢမ်းဢမ်ႇလီတေႃႇၶဝ်ၵေႃႈ ၶဝ်ယင်းဢမ်ႇသူၼ်ၸႂ် ႁူႉယူႇဝႃႈၶႃႈပဵၼ်ၵူၼ်းဢမ်ႇလီၵေႃႈ ယင်းၶႂ်ႈပဵၼ်ၵေႃႉယူႇ။ ႁဵတ်းလီတေႃႇၶႃႈ ယုမ်ႉလၢတ်ႈၵႂၢမ်းဝၢၼ်တေႃႇၶႃႈ၊ ၸွႆႈထႅမ်ၶႃႈ၊ မႆႈၸႂ်ၶႃႈ၊ ၶဝ်ပဵၼ်ၵူၼ်းလီတေႉယဝ်ႉ ၵူၺ်းၵႃႈ ယိုင်ႈႁၼ်ၶဝ်လီတေႃႇၶႃႈၵႃႈႁိုဝ်ၵေႃႈ ၶႃႈယိုင်ႈၶႅၼ်းၶႂ်ႈပၢႆႈၶဝ်ၵႃႈၼၼ်ႉယဝ်ႉ၊ ဢမ်ႇႁူႉဝႃႈၶႃႈတေလႆႈႁဵတ်းၸိူင်ႉႁိုဝ်တီႈၶဝ် ၶႃႈၼၼ်ႉဢမ်ႇထုၵ်ႇလီမီးဢူၺ်းၵေႃႉ၊ ဢမ်ႇထုၵ်ႇလီမီးတၢင်းသိူဝ်းသေ ယုမ်ႉယုမ်ႉယၢႆႈယၢႆႈယူႇ လူၺ်ႈတီႈလိုမ်းၵူၼ်းၵေႃႉဢၼ်ယူႇႁိမ်းၶၢင်ႈၶႃႈ ပၼ်ႁႅင်းၸႂ်ၶႃႈမႃးတႃႇသေႇလႄႈ ၵေႃႉဢၼ်ပဵၼ်သုၼ်ႇၼိုင်ႈၼႂ်းၸၢတ်ႈပၢၼ်ၶႃႈၼၼ်ႉ။
တွၼ်ႈသၢဝ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢဝ်းဢဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
