တွၼ်ႈသိပ်းၸဵတ်း
ႁူင်းႁဵၼ်းပဵၼ်တီႈသွၼ်လိၵ်ႈသွၼ်လၢႆးလႄႈ မၼ်းၵေႃႈပဵၼ်ပိုၼ်ႉတီႈ ဢၼ်လႆႈႁဵၼ်းႁူႉလွင်ႈၵူၼ်းပႃးယူႇယဝ်ႉ။ တႄႇၸဵမ်ၵၢၼ်ယူႇႁူမ်ႈႁွမ်းၸွမ်းၵၼ်၊ လွင်ႈႁဵတ်းသၢင်ႈတူင်ႉၼိုင်ႁူမ်ႈၵၼ်၊ လွင်ႈလဵပ်ႈႁဵၼ်းၵၼ်ၵေႃႉတေႃႇၵေႃႉ ဢမ်ႇဝႃႈတေပဵၼ်ဢူၺ်းၵေႃႉၵၼ်၊ ၵေႃႉႁၵ်ႉၵၼ်၊ ၵေႃႉၸင်းႁိုဝ် ၵေႃႉဢမ်ႇထုၵ်ႇမႅၼ်ႈၵၼ်ၸိူဝ်းၼႆႉ မၼ်းဢမ်ႇလႆႈမီးၵူၼ်းသွၼ်ႁႂ်ႈႁူႉ ၵူၺ်းၵႃႈ ၵူၼ်းႁဝ်းၵေႃႈ လဵပ်ႈႁဵၼ်းႁူႉၵႂႃႇၸွမ်းသၽႃႇဝသႅၼ်းပၢၼ်မၼ်း ၼၼ်ႉယဝ်ႉ။
ၶႃႈယၢမ်ႈလၢတ်ႈဝႃႈ ၶႃႈတေဢမ်ႇဢၢၼ်းႁဵတ်းၽိတ်းပၵ်းပိူင်ၶေႃႈဢၼ်ဝႃႈ တေဢမ်ႇလႆႈဝႆႉၸူႉၼၼ်ႉ ဢမ်ႇဝႃႈၸိူင်ႉႁိုဝ်ၵေႃႈယဝ်ႉ ၶႃႈတိုၼ်းတေဢမ်ႇႁဵတ်း။ ၵူၺ်းၵႃႈ မၼ်းၵေႃႈမီးၶၢဝ်ႇဢွၵ်ႇမႃး ပိူၼ်ႈသမ်ႉပေႃးႁူႉၵၼ်တင်းႁူင်းႁဵၼ်း လူၺ်ႈတီႈၶႃႈဢမ်ႇလႆႈႁဵတ်းသင်ၸိူင်ႉၼႆ မၼ်းဢမ်ႇယိုင်ႈယႂ်ႇတွၼ်ႈတႃႇၶႃႈၼႃႇၽႅဝ်ႁႃႉ သမ်ႉပၢႆပဵၼ်တင်းၶူးထႅင်ႈၵွၼ်ႇ။
သင်ၸိူဝ်ႉဝႃႈဢမ်ႇမီးၶေႃႈႁၢမ်ႈတႄႉ ၵၢၼ်မီးၸူႉမၼ်းၵေႃႈ ဢမ်ႇၸႂ်ႈလွင်ႈလၢၵ်ႇလၢႆးသင်ၼင်ႇၵဝ်ႇ၊ ၵူၺ်းၵႃႈ ယွၼ်ႉၶေႃႈႁၢမ်ႈလႄႈ မိူဝ်ႈမီးၵေႃႈ တေလႆႈလၵ်ႉမီးဢဝ်ၵူၺ်းၼၼ်ႉယဝ်ႉ။ ပေႃးၶူးႁူႉဝႃႈ ၽႂ်ပဵၼ်ၸူႉၵၼ်ၼႆၵေႃႈ လႆႈၶၢမ်ႇၶူးႁွင်ႉဢွၵ်ႇၼႃႈထႅဝ် ႁႂ်ႈလႆႈတၢင်းဢၢႆသေဢမ်ႇၵႃး သမ်ႉႁႅမ်တေႃႇၼႃႈပိူၼ်ႈထႅင်ႈႁေၼၼ်ႉၼႃႇ။ လိူဝ်သေဢၢႆပိူၼ်ႈယဝ်ႉ ပိူၼ်ႈၵေႃႈပေႃးႁူႉတင်းႁူင်းႁဵၼ်းၼၼ်ႉယိုင်၊ သမ်ႉဝႃႈၶူးၶဝ်တေႁဵတ်းႁႂ်ႈ လုၵ်ႈႁဵၼ်းဢၢႆတၢၼ်ႇႁိုဝ်ၵေႃႈယဝ်ႉ ယင်းမီးလုၵ်ႈႁဵၼ်းတင်းၼမ်တင်းလၢႆ ဢၼ်ပဵၼ်ၸူႉၵၼ် လူၺ်ႈတီႈဢမ်ႇသူၼ်လွင်ႈၸိူင်ႉၼႆ။ ပေႃးမႃးဝူၼ်ႉတူၺ်း ဢၼ်ပဵၼ်ယူႇလႄႈဢၼ်ႁၼ်ယူႇၼၼ်ႉ လွင်ႈဝႃႈလုၵ်ႈႁဵၼ်းမီးၸူႉၼႆ ဢမ်ႇၸႂ်ႈလွင်ႈလၢၵ်ႇလၢႆးသင် မိူၼ်တေပဵၼ်ႁူင်းႁဵၼ်းလူင်လင်ၼႆႉၵူၺ်းၼၼ်ႉယဝ်ႉ သႂ်ႇၸႂ်သႂ်ႇၶေႃးလွင်ႈၵၢၼ်မီးၸူႉၼႃႇ။
သမ်ႉဝႃႈသၢႆတႃပိူၼ်ႈၼၼ်ႉ တေတူၺ်းၶႃႈၸိူင်ႉႁိုဝ် မိူၼ်ၶႃႈတေယၢမ်ႈၵႂႃႇယဝ်ႉ၊ ယွၼ်ႉသၢႆတႃၵူၼ်းၼမ်ၵူၼ်းလၢႆ ဢၼ်တူၺ်းၶႃႈလူၺ်ႈလွင်ႈလၢၵ်ႇလၢႆး ၼႂ်းတူဝ်ၶႃႈၼၼ်ႉ မၼ်းဢမ်ႇလႆႈမီးပွၵ်ႈၼႆႉၵူၺ်းလူး၊ မၼ်းၶႂ်ႈမီးၸမ်ၵူႈဝၼ်းယဝ်ႉ။ ၶႃႈၵေႃႈဢမ်ႇပေႃးသူၼ်ၸႂ်ၵႃႈႁိုဝ် ယွၼ်ႉမၼ်းဢမ်ႇၸႂ်ႈလွင်ႈတေႉလႄႈ ၶႃႈၵေႃႈဢမ်ႇလႆႈႁဵတ်းသင်ၽိတ်းလူး။ မိူဝ်ႈဢၼ်လုၵ်ႈႁဵၼ်းတင်းၼမ် ဢွၼ်ၵၼ်မႃးၶဝ်ႈထႅဝ်တၢင်ႇၸွမ်ပိဝ်ၵၼ်ယဝ်ႉၵႂႃႇၼၼ်ႉ ၶူးလူင်ၵေႃႈၶိုၼ်ႈမႃးမွၵ်ႇလၢတ်ႈၶေႃႈၵႂၢမ်းသေ ဝၢႆႇတူၺ်းမႃးတၢင်းၶႃႈယူႇၼၼ်ႉယဝ်ႉ။
“ၸွမ်းလူၺ်ႈမီးလုၵ်ႈႁဵၼ်း ဢၼ်ႁဵတ်းၽိတ်းပၵ်းပိူင်ႁူင်းႁဵၼ်းလႄႈ ဝၼ်းမိူဝ်ႈၼႆႉ ၶူးၵေႃႈ တေႁွင်ႉလုၵ်ႈႁဵၼ်းၵေႃႉဢၼ်ႁဵတ်းၽိတ်းၼၼ်ႉ မႃးတၢင်းၼႃႈၼႆႉ ၼႄႁႂ်ႈသူၵူႈၵေႃႉ ပေႃးတေႁူႉဝႃႈမၼ်းၽိတ်းလွင်ႈသင်ၼႆၼၼ်ႉယဝ်ႉ”
မိူဝ်ႈငိၼ်းၸိူင်ႉၼၼ် ၼင်ႇႁၢင်ႈၸႂ်ၶေႃးဢမ်ႇပေႃးၶႂ်ႈလီယဝ်ႉ၊ ပေႃးဝႃႈထုၵ်ႇႁွင်ႉဢွၵ်ႇတၢင်းၼႃႈၼၼ်ႉၼႆ မိူၼ်တင်းယွမ်းႁပ်ႉဝႃႈ ၶႃႈႁဵတ်းၽိတ်းၼၼ်ႉယဝ်ႉ၊ ၵူၺ်းၵႃႈ သင်ဢမ်ႇဢွၵ်ႇ ၶူးၵေႃႈတေၸီႉမႃးတၢင်းၶႃႈသေ တေလၢတ်ႈႁႂ်ႈၶႃႈဢွၵ်ႇႁႂ်ႈလႆႈယူႇ။ ဝူၼ်ႉသင်ဢမ်ႇမႃးသင်ယဝ်ႉ၊ ဢၼ်ဝူၼ်ႉလႆႈယၢမ်းၼႆႉၵေႃႈ လူဝ်ႇလႆႈဢွၵ်ႇပူၼ်ႉထႅဝ်ၼႆႉၵႂႃႇႁႂ်ႈလႆႈၵူၺ်း၊ ၵမ်းၼၼ်ႉ ပၢႆးဝူၼ်ႉဢၼ်ဝႃႈ “ပဵၼ်လူမ်း”ၼႆၵေႃႈၽုတ်းဢွၵ်ႇမႃးယဝ်ႉ။ ၵူၺ်းၵႃႈ ႁိမ်းႁွမ်းၼၼ်ႉ ပိုၼ်ႉလိၼ်သမ်ႉမီးဢုင်ႁေ တေပဵၼ်လူမ်းၵေႃႈ ၶူဝ်းသမ်ႉတေဢိူၵ်ႇထႅင်ႈ။ မိူဝ်ႈဢၼ်ၶူးႁွင်ႉၸိုဝ်ႈၶႃႈဢွၵ်ႇမႃးၼၼ်ႉ တေၸၢင်ႈႁဵတ်းႁိုဝ် ၶႃႈၵေႃႈလူမ်ႉလူင်းၼင်ႇဢမ်ႇႁူႉတူဝ်ၼၼ်ႉမႃးၵမ်းလဵဝ်ယဝ်ႉ။
မိူဝ်ႈပဵၼ်ၸိူင်ႉၼၼ် ပိူၼ်ႈၵေႃႈဢွၼ်ၵၼ်တူၺ်းမႃးတၢင်းၶႃႈသေယဝ်ႉ ၵူၼ်းဢၼ်ယူႇႁိမ်းၶႃႈၼၼ်ႉၵေႃႈ ၼႅတ်ႈႁပ်ႉဢဝ်ၶႃႈသေ ဢွၼ်ၵၼ်လၢတ်ႈႁႂ်ႈဢဝ်ၶႃႈၵႂႃႇႁွင်ႈယႃၼႆယူႇ၊ ၶဝ်ၸိူဝ်းၼၼ်ႉၵေႃႈ ဢွၼ်ၽႃၽိူဝ်းၶႃႈလူင်ၵႂႃႇယဝ်ႉ။ ၶႃႈၵေႃႈၼင်ႇႁိုဝ်တေမိူၼ်လိုမ်းတူဝ်တေႉတေႉၼၼ်ႉ ၵႃႈမီးၵႃႈပွႆႇတူဝ်ၶႃႈတင်းမူတ်းယူႇ။
မိူဝ်ႈၵႂႃႇႁွတ်ႈႁွင်ႈယႃယဝ်ႉၵေႃႈ သမ်ႉပေႃးလူမ်ၸႂ်လူမ်ၶေႃးမႃးၵမ်းလဵဝ်၊ ၶူးပဵင်းလၢဝ်ၼၼ်ႉ မႃးတူၺ်းၶႃႈသေယဝ်ႉ မိူၼ်တေႁူႉၶိုတ်းလႄႈ
“မိုၼ်းတႃလႆႈယဝ်ႉၼႃႈ!”
ၶႃႈၵေႃႈမိုၼ်းတႃမႃးသေ တူၺ်းၶူးယဝ်ႉ
“ၶႃႈပဵၼ်လူမ်းယူႇၶႃႈဢေႃႈၶူး”
“ႁူႉယူႇၼႃႈဝႃႈႁဵတ်းၵႅင်ႈ ၵူၼ်းပဵၼ်လူမ်းသင် ၼႃႈၽၢၵ်ႇတေႁူႇ ပိူၵ်ႇတႃၽႅပ်ႉယုပ်းၽႅပ်ႉယုပ်းလႆႈယူႇ”
“ၶႃႈယွၼ်းလိုဝ်ႈၵႅပ်ႉၼိုင်ႈၶႃႈပေႃးၼႆ ပၼ်ပိူၼ်ႈပူတ်းထႅဝ်ယဝ်ႉၶႃႈၸင်ႇၵွႆႈၵႂႃႇ”
ၶူးၵေႃႈဢမ်ႇၸၢင်ႈလၢတ်ႈသင်ယဝ်ႉလႄႈ ဝၢႆးသေပိူၼ်ႈပူတ်းထႅဝ်ယဝ်ႉ ၸင်ႇသမ်ႉမီးၼူၼ်းမူဝ်မႃးၸူးၶႃႈသေ
“ၶူးလူင်ဝႃႈ ပေႃးတိုၼ်ႇမႃးယဝ်ႉၵေႃႈ..ႁႂ်ႈၵႂႃႇၸူးၶူးၼႆဝႃႇ”
“ၶူးလူင်! ပဵၼ်သင်လႄႈၶႂ်ႈထူပ်းႁဝ်းၵျႃႇလႃႇ.. ၵႂႃႇၵေႃႈၵႂႃႇဢိူဝ်ႈ”
ၶႃႈၵေႃႈလုၵ်ႉႁေဢွၵ်ႇၵႂႃႇယူႇယဝ်ႉ။ ယၢမ်းၼၼ်ႉ ၼူၼ်းမူဝ်ဢၼ်လႆႈငိၼ်းၶၢဝ်ႇမႃးမိူၼ်ၵၼ်ၼၼ်ႉၵေႃႈ
“ၸႂ်ႈတေႉယူႇႁႃႉ! ၶၢဝ်ႇဢၼ်ပိူၼ်ႈလၢတ်ႈထိုင်လွင်ႈသူၼၼ်ႉ ငိၼ်းဝႃႈမိူဝ်ႈၼႆႉၶူးၽိဝ်ၾႃႉၵေႃႈ ထုၵ်ႇလိုပ်ႈဢွၵ်ႇ..ဢမ်ႇပၼ်မႃးႁဵတ်းၶူးၸွႆႈယဝ်ႉၼႆ”
“ပဵၼ်သင်လႄႈ..တေလႆႈႁဵတ်းၸိူင်ႉၼၼ်လႃႇ! ၶူးဢမ်ႇလႆႈႁဵတ်းသင်ၽိတ်းလူး”
“ပဵၼ်ၶေႃႈသင်ႇၶူးလူင်ၼၼ်ႉၼႃႇ ၸၢင်ႈတေႁဵတ်းႁိုဝ် ၶူးလူင်ယႂ်ႇလိူဝ်ပိူၼ်ႈလူး မၼ်းဝႃႈႁိုဝ်ၵေႃႈ ၵႃႈလႆႈဝႃႈၸိူင်ႉၼၼ်ၵူၺ်းဢိူဝ်ႈ”
“ၶူးတီႈၼႂ်းႁူင်းႁဵၼ်းၼႆႉယွင်ႇၵၼ်ၵူႈၵေႃႉယဝ်ႉ”
ဢဝ်ၶူးပဵင်းလၢဝ်ပေႃးယၵ်ႉတူၺ်းၶႃႈမႃးယူႇ။
မိူဝ်ႈႁွတ်ႈထိုင်ၵႂႃႇၼႂ်းႁွင်ႈၽူႈၵွၼ်းႁူင်းႁဵၼ်းၼၼ်ႉ ၶႃႈၵေႃႈမိူၼ်ပႃးလူမ်းၸႂ်လမ်ဝႆႉဢိတ်ႉၼိုင်ႈယူႇ၊ ႁၼ်ၼႃႈၶူးယဝ်ႉၵေႃႈ ၶႂ်ႈထွတ်ႇၶႅပ်းတိၼ်ဝိုတ်ႉထိုမ်ႈသႂ်ႇပၼ်ႁေယဝ်ႉ၊ ၵူၺ်းၵႃႈ ပေႃးၶႃႈႁဵတ်းၸိူင်ႉၼၼ် ၼၢႆးႁဝ်းၼၼ်ႉယဝ်ႉ ဢၼ်တေလႆႈလိူတ်ႇမႆႈမႃး။ လိူၵ်ႈလိူၵ်ႈသမ်ႉ ႁၼ်မႅၼ်ႈၺႃး ၶူးၸၢမ်ႁွမ်ၼၼ်ႉလႄႈ ႁဵတ်းႁႂ်ႈၶႃႈတူၵ်းၸႂ်မႃးယူႇဢိတ်ႉၼိုင်ႈ၊ မိူဝ်ႈၼၼ်ႉၵေႃႈ ႁဵတ်းႁႂ်ႈၶႃႈဝူၼ်ႉလႆႈသေလွင်ႈလွင်ႈမႃးယူႇ။
“ႁူႉယူႇဢမ်ႇၸႂ်ႈႁႃႉႁွင်ႉမႂ်းမႃးႁဵတ်းသင် ယွၼ်ႉမႂ်းၵေႃႉလဵဝ်သေ ႁဵတ်းႁႂ်ႈၶူးၽိဝ်ၾႃႉပေႃးလႆႈဢွၵ်ႇႁူင်းႁဵၼ်းၼၼ်ႉ မၼ်းသၢင်ႇထုၵ်ႇယူႇႁႃႉ”
“ၵဵဝ်ႇသင်ၵၼ်တင်းၶႃႈလႃႇ.. ဢမ်ႇၸႂ်ႈၶူးၵူၺ်းၶႃႈႁိုဝ်..ၵေႃႉလိုပ်ႈဢွၵ်ႇ ၶႃႈတမ်ႉဢမ်ႇလႆႈႁဵတ်းသင်ၶႃႈလူး”
“ၼႃႈလိူမ်ႈတေႉယဝ်ႉ! ႁတ်းလၢတ်ႈလႆႈၸိူင်ႉႁိုဝ်လႃႇ ပိူၼ်ႈပေႃးႁူႉၵၼ်တင်းႁူင်းႁဵၼ်းယဝ်ႉ” ၶူးၸၢမ်ႁွမ်လၢတ်ႈ။
“လွင်ႈသင်ၶႃႈ ၶႃႈတမ်ႉဢမ်ႇႁူႉလူး ”
“မႂ်းလႄႈတင်းၶူးၽိဝ်ၾႃႉၼၼ်ႉ ပဵၼ်ၸူႉၵၼ်ၼႆ ဢမ်ႇၸႂ်ႈႁႃႉ”
“ၶႃႈတူၵ်းၸႂ်တေႉၶႃႈယဝ်ႉ မိူဝ်ႈၶႃႈလႆႈငိၼ်းၶၢဝ်ႇၸိူင်ႉၼႆ ဢမ်ႇထၢင်ႇဝႃႈမၼ်းတေပဵၼ်တေႉ ၸႂ်ႈတေႉၶႃႈႁႃႉမိူၼ်ၶူးၸၢမ်ႁွမ်ႁဝ်းတေႁူႉလီ တေႉၼၼ်ႉယဝ်ႉ”
“မႂ်းလၢတ်ႈလွင်ႈသင်ယူႇလႃႇ!” ၶူးလူင်။
“ၶႃႈၵေႃႈလၢတ်ႈလွင်ႈဢၼ်ၶူးၶဝ်ႁူႉမႃးၼၼ်ႉၵူၺ်း၊ ၵူၺ်းၵႃႈ ပဵၼ်သင်လႄႈ..ၶႃႈမႃးမိူဝ်ႈလႂ် ႁၼ်ၶူးၶႃယူႇၸွမ်းၵၼ်ယူႇတႃႇသေႇလႃႇ ဢမ်ႇၸႂ်ႈဝႃႈမီးသေၸိူဝ်ႉသေလွင်ႈၶႃႈႁႃႉ”
“ယွင်ႇၵႂႃႇယဝ်ႉၼႄႇ!”
“ဝၢႆးသေၶႃႈဢွၵ်ႇႁွင်ႈၵႂႃႇယဝ်ႉ ပေႃးပိူၼ်ႈႁူႉဝႃႈၶႃႈႁၼ်ၶူးၶဝ် ႁဵတ်းသင်ၵၼ်ယူႇၼႂ်းႁွင်ႈၼႆ ၸွင်ႇလႅပ်ႈတေမီးၵူၼ်းယုမ်ႇဢၼ်ၶႃႈလၢတ်ႈႁိုဝ်၊ ၵွပ်ႈဝႃႈၵူၼ်းၵေႃႉဢၼ်ၶဝ်ႈမႃးၼႂ်းႁွင်ႈၼႆႉၵေႃႈ မီးၶႃႈၵူၺ်းလူး ၶူးသွင်ၵေႃႉႁၼ်ထိုင်ၸိူင်ႉႁိုဝ်လႃႇ”
မိူၼ်ၶူးၸၢမ်ႁွမ်ၼၼ်ႉ ၼႃႈတေမႆႈမႃးယဝ်ႉလႄႈ “မႂ်းတေႁဵတ်းသင်လႃႇ တေပွႆႇၶၢဝ်ႇလိုဝ်းၸိူင်ႉၼၼ်ႁႃႉ”
တူဝ်ၸဝ်ႈၵဝ်ႇႁဵတ်းၸိူင်ႉႁိုဝ်ၼႆႁူႉလီလိူဝ်ပိူၼ်ႈ၊ မိူဝ်ႈထိုင်ၵမ်းတူဝ်ၵဝ်ႇထူပ်းမႃးၼၼ်ႉ တေလိူတ်ႇမႆႈလိူဝ်ပိူၼ်ႈၼၼ်ႉယဝ်ႉ။
“ပဵၼ်လွၵ်းလၢႆးလီတေႉၶႃႈယဝ်ႉ ယိၼ်းၸူမ်းယဝ်ႉၶႃႈ ပၼ်တၢင်းႁၼ်ထိုင်ဢၼ်လီလီၸိူင်ႉၼႆ”
“ဢမ်ႇထၢင်ႇဝႃႈၶႃႈတေလႆႈမႃးႁၼ်ဢၼ်ဢမ်ႇလီၸိူင်ႉၼႆ ၶူးလူင်ႁဝ်းဢမ်ႇၵူဝ်ၵူၼ်းတေႁူႉၶၢဝ်ႇ ဢၼ်ၶႃႈတေလၢတ်ႈဢွၵ်ႇၵႂႃႇၽွင်ႈႁႃႉ”
“မႂ်းတေလၢတ်ႈသင်လႃႇ? မႂ်းလၢတ်ႈလွင်ႈသင်လႃႇ? လၢတ်ႈႁႂ်ႈၵဝ်ပွင်ႇၸႂ်ဢိတ်ႉၼိုင်ႈလႄႈ!”
မၼ်းၵေႃႈၸႂ်ႈယူႇ ၵူၼ်းၸိူင်ႉၼင်ႇၶူးလူင် တေႁူႉလွင်ႈသင်လႃႇ ႁူႉဝႃႈပိူၼ်ႈလၢတ်ႈသင်ၵေႃႈ မၼ်းပဵၼ်ၸိူင်ႉၼၼ်ၵူၺ်း၊ ယင်းဢမ်ႇတွၼ်ႉတူၺ်းလူၺ်ႈသၢႆတႃမၼ်းလူးၵွၼ်ႇဝႃႈ ႁူင်းႁဵၼ်းလင်ၼႆႉၼၼ်ႉ မၼ်းပဵၼ်ၸိူင်ႉႁိုဝ်၊ ၵွမ်ႉၸႂ်ယႂ်ႇဢဝ်ၵူၼ်းမႃးလၢတ်ႈၼႄၵူၺ်း လႆႈငိၼ်းၸိူင်ႉႁိုဝ် လႆႈႁူႉမွၵ်ႈႁိုဝ်ၵေႃႈ တႅပ်းတတ်းႁဵတ်းသၢင်ႈၵႂႃႇ၊ ယင်းဢမ်ႇထတ်းသၢင်တူၺ်းလီလီ ႁႂ်ႈၸႅင်ႈလႅင်းလူးၵွၼ်ႇ။
“ၵေႃႈၶူးၶႃသွင်ၵေႃႉပဵၼ်ၸူႉၵၼ်ဢမ်ႇၸႂ်ႈၶႃႈႁိုဝ်? လၢတ်ႈၵႂၢမ်းဝၢၼ်တေႃႇၵၼ်ၼင်ႇပဵၼ်ၸူႉၵၼ်၊ ႁဵတ်းလွင်ႈဢၼ်ၵူၼ်းပဵၼ်ၸူႉၵၼ်ႁဵတ်း၊ ၶႃႈလႆႈႁၼ်မိူဝ်ႈၶႃႈၶဝ်ႈႁွင်ႈမႃးၼႆ ပဵၼ်ႁိုဝ်ၶႃႈလႃႇ ၸွင်ႇမၼ်းၸႂ်ႉလႆႈၶႃႈ၊ မိူၼ်ဝႃႈၶၢဝ်ႇလိုဝ်းၼႂ်းႁူင်းႁဵၼ်းၼႆႉၵေႃႈသမ်ႉ ၽႄႈဝႆးၼႃႇၶႃႈၼေႈ ၶႃႈၵေႃႈႁၢမ်ႈဢမ်ႇလႆႈမိူၼ်ၵၼ်”
“မႂ်းယွင်ႇၵႂႃႇယဝ်ႉၼႄႇ! တေလၢတ်ႈလွင်ႈဢမ်ႇၸိုဝ်ႈဢမ်ႇၸႂ်ႈၸိူင်ႉၼႆ ”
“ၸိူင်ႉၼၼ်ၶႃႈႁႃႉ.. လွင်ႈၶႃႈလူးမၼ်းၸိုဝ်ႈၸႂ်ႈမၢၼ်ႇမႅၼ်ႈယူႇၶႃႈၼႄႇ၊ ၶူးႁၼ်တႂ်ႈတႃယူႇၶႃႈႁႃႉ၊ ၶူးၵေႃႈလႆႈငိၼ်းပိူၼ်ႈဢုပ်ႇၵၼ် ပိူၼ်ႈလၢတ်ႈၵၼ်ၵူၺ်း၊ ပေႃးဢမ်ႇၶႂ်ႈႁႂ်ႈၶႃႈလၢတ်ႈလွင်ႈၼႆႉၵေႃႈ၊ ၶိုၼ်းႁႂ်ႈၶူးၽိဝ်ၾႃႉမႃးႁဵတ်းၵၢၼ်ၶိုၼ်းၶႃႈလႄႈ ပေႃးဢမ်ႇၼၼ် ၶႃႈႁူႉၶႃႈႁၼ်ႁင် ၸႂ်ႈႁေဢမ်ႇၸႂ်ႈႁေ ၶႃႈၵေႃႈတေလၢတ်ႈမူတ်းမူတ်း ၼင်ႇဢၼ်ၶႃႈၶႂ်ႈလၢတ်ႈၼၼ်ႉ၊ ယဝ်ႉၵေႃႈ ၶၢဝ်ႇလိုဝ်းဢၼ်ဢမ်ႇႁူႉတီႈၵႂႃႇတီႈမႃးၼၼ်ႉ ၶူးထုၵ်ႇလီလႆႈၵႄႈၶႆၵႂႃႇဢေႃႈ၊ ပေႃးဢမ်ႇၼၼ် လွင်ႈၶူးၶဝ်ၼႆႉၵေႃႈ ႁၢမ်ႈသူပ်းၶႃႈဢမ်ႇလႆႈမိူၼ်ၵၼ်”
“မႂ်းလွၵ်ႇၵဝ်ယူႇၸွင်ႇၸႂ်ႈ!”
“ဢမ်ႇလႆႈလွၵ်ႇၶႃႈ.. ၶႃႈႁဵတ်းတေႉဢေႃႈ! ၶူးၵေႃႈႁူႉယူႇဢမ်ႇၸႂ်ႈၶႃႈႁႃႉ ၶႃႈပဵၼ်ၵူၼ်းၸိူင်ႉႁိုဝ်ၼႆ”
ၶူးလူင်ၼၼ်ႉၵေႃႈ မိူၼ်တေၶၢၼ်ႉလၢတ်ႈတေႃႇၶႃႈမႃးယဝ်ႉသေ
“ၵႂႃႇလႄႈ! လွင်ႈၼႆႉၵဝ်တေၸတ်းၵၢၼ်ၵႂႃႇၵူၺ်း ၶူးၸၢမ်ႁွမ်ၵေႃႈဢွၵ်ႇၵႂႃႇလႆႈယဝ်ႉ”
ႁႃးၶူးၸၢမ်ႁွမ်ၼၼ်ႉၵေႃႈ ဢွၵ်ႇႁွင်ႈမႃးၸွမ်းၵၼ်ႁေ တူၺ်းမၼ်းတႄႉ ဢမ်ႇပေႃးႁၢၼ်ႉၸႂ်ၵႃႈႁိုဝ်ၼၼ်ႉယဝ်ႉ။ ၶႃႈၵေႃႈ ဢမ်ႇၶႂ်ႈၶၢမ်ႇ လွင်ႈဢၼ်မၼ်းႁဵတ်းတေႃႇၶႃႈၼႆႉမိူၼ်ၵၼ် ပဵၼ်သင်လႄႈႁဝ်းတေလႆႈယဵၼ်ႉၵၼ်ႈတေႃႇ ဢၼ်ဢမ်ႇၸိုဝ်ႈဢမ်ႇၸႂ်ႈ ဢၼ်ႁဵတ်းႁၢႆႉႁဝ်းၼၼ်ႉလႃႇ၊ ဢမ်ႇဝႃႈလၢႆးလႂ်ႁဝ်းၵေႃႈလူဝ်ႇတေႃႇသူႈၶိုၼ်း ႁႂ်ႈမၼ်းထိုင်တီႈၼၼ်ႉယဝ်ႉ။ ယိုင်ႈႁဝ်းဢူၼ်ႈဢွၼ်ႇယွမ်းပၼ်ၶဝ် ၶဝ်ယိုင်ႈၶႅၼ်းႁဵတ်းႁၢႆႉႁဝ်းလႆႈငၢႆႈလႄႈ မိူဝ်ႈလႂ်ႁဝ်းၵႅၼ်ႇၶႅင် မၼ်းၵေႃႈတေဢမ်ႇႁတ်းမႃးယုင်ႈၵဝ်းႁဝ်းလႆႈၼၼ်ႉၼႃႇ။
“ဢမ်ႇၸႂ်ႈၶူးၸွင်ႇၸႂ်ႈႁိုဝ် ၶၢဝ်ႇလွင်ႈၼၼ်ႉ”
“မႂ်းလၢတ်ႈလွင်ႈသင်လႃႇ ယွင်ႇၵႂႃႇယဝ်ႉၼႄႇ”
“လီယဝ်ႉၶႃႈပေႃးဢမ်ႇၸႂ်ႈၵေႃႈ.. ၶႃႈလႄႈတင်းၶူးတေဢမ်ႇလႆႈမႃး ပႂ်ႉတွပ်ႇပႂ်ႉတႅၼ်းၵၼ်၊ သင်ႁူႉၵေႃႉမၼ်း ၶႃႈတေဢဝ်ၶိုၼ်းပဵၼ်သိပ်းပုၼ်ႈၼၼ်ႉယဝ်ႉ”
မိူဝ်ႈၶႃႈၶဝ်ႈၵႂႃႇၼႂ်းႁွင်ႈၼၼ်ႉ သမ်ႉပဵၼ်ၶိင်ႇပၢႆးၼပ်ႉ ၶိင်ႇၶူးပိူင်းၾႃႉယဝ်ႉ။ မိူဝ်ႈၶူးႁၼ်ၶႃႈၼၼ်ႉၵေႃႈ ဢမ်ႇလႆႈတၵ်းသဵင်သင်၊ ၵူၺ်းၵႃႈ ၵူၼ်းဢၼ်ယူႇၼႂ်းႁွင်ႈၼၼ်ႉတႄႉ ဢွၼ်ၵၼ်ယၵ်ႉတူၺ်းၸွမ်းၶႃႈ တႃပေႃးဢမ်ႇၽႅပ်ႉ၊ မိူၼ်မီးၶေႃႈထၢမ်ၶႂ်ႈထၢမ်တင်းၼမ်ၼၼ်ႉယဝ်ႉ။
မွင်းလူင်းလိုဝ်ႈၵူၺ်း သႂ်လႅင်းၵေႃႈ မႃးတီႈၼင်ႈၶႃႈႁေ
“ပဵၼ်ၸိူင်ႉႁိုဝ်လႃႇ ၶူးႁွင်ႉၵႂႃႇႁဵတ်းသင်”
“ဢမ်ႇလႆႈႁွင်ႉၵႂႃႇႁဵတ်းသင်တေႉတေႉ ပေႃးမႃးဝူၼ်ႉတူၺ်းယဝ်ႉ မိူၼ်တေႁွင်ႉၵႂႃႇဝႃႈ..ၼၼ်ႉယဝ်ႉ”
ပေႃးလၢတ်ႈႁႂ်ႈလီၵေႃႈ မိူၼ်တေပဵၼ်ၶႃႈၵေႃႉၵႂႃႇဝႃႈႁင်းၶူးၵူၺ်း။
“ယဝ်ႉပဵၼ်လွင်ႈတေႉယူႇႁႃႉ! လွင်ႈသူၼၼ်ႉ” ၶိူဝ်းႁွမ်ဢၼ်ၼင်ႈယူႇၽၢႆႇၼႃႈၸိုၼ်ႈသႂ်ၼၼ်ႉၵေႃႈ ထၢမ်လူင်းမႃးယူႇ။
“ၸႂ်ႈႁိုဝ်ဢမ်ႇၸႂ်ႈ ပိူၼ်ႈလၢတ်ႈၸိူင်ႉႁိုဝ်ၵေႃႈယုမ်ႇၸိူင်ႉၼၼ်ဢမ်ႇၸႂ်ႈႁိုဝ် သမ်ႉဝႃႈတေထဵင်ၶိုၼ်းၵေႃႈ သူၵေႃႈယုမ်ႇဢၼ်သူၶႂ်ႈယုမ်ႇၵူၺ်းလူး”
တႄႇၸဵမ်မိူဝ်ႈၶိုၼ်ႈႁူင်းႁဵၼ်းမႃး ဢမ်ႇဝႃႈၼႂ်းႁူင်းႁဵၼ်းၼၼ်ႉ တေမီးလွင်ႈတူင်ႉၼိုင်သင်ၵေႃႈယဝ်ႉ၊ ၶႃႈဢမ်ႇတွၼ်ႉၶဝ်ႈႁူမ်ႈၸွမ်းပိူၼ်ႈႁေပွၵ်ႈ လိူဝ်သေယူႇၸွမ်းပိူၼ်ႈၼႂ်းႁွင်ႈႁဵၼ်း။ သမ်ႉဝႃႈၶႃႈတေတင်ႈၸႂ်ႁဵၼ်းၵေႃႈယဝ်ႉ လွင်ႈၶဝ်ႈႁူမ်ႈပိူၼ်ႈၼၼ်ႉ သင်ဝႃႈမၼ်းဢမ်ႇၵဵဝ်ႇၶွင်ႈၸွမ်းမၢၵ်ႉလိၵ်ႈၼႆ ဢမ်ႇဝႃႈၸိူင်ႉႁိုဝ်ၶႃႈၵေႃႈ တိုၼ်းဢမ်ႇၶႂ်ႈၵႂႃႇ။
ၵူၺ်းၵႃႈ မိူဝ်ႈဢၼ်ၶႃႈယင်းတိုၵ်ႉၼွၼ်းငူပ်ႉၼႃႈတၢင်ႇၽိူၼ်ယူႇၼၼ်ႉ ၼူၼ်းမူဝ်ၵေႃႈ လႆႈမႃးတွႆႇၽိူၼ်ၶႃႈလွႆးလွႆးသေယဝ်ႉ။
“ဢေးယိင်း… လုၵ်ႉလႄႈႁဝ်းၵႂႃႇတူၺ်းပိူၼ်ႈလဵၼ်ႈမၢၵ်ႇၼင်”
“ၵႂႃႇလႄႈ..သူၵႂႃႇလႃႈ! ႁဝ်းဢမ်ႇၶႂ်ႈၵႂႃႇ!”
ဢမ်ႇၸႂ်ႈဝႃႈၶႃႈဢမ်ႇလႆႈၸႂ်တူၺ်း ၵူၺ်းၵႃႈ မိူဝ်ႈလႂ်ၶႃႈတူၺ်းပိူၼ်ႈလဵၼ်ႈမၢၵ်ႇၼင်တီႈႁူင်းႁဵၼ်းၼႆၼၼ်ႉ မၼ်းႁဵတ်းႁႂ်ႈၶႃႈငဝ်လႄႈ ၸႂ်ထိုင်ၽႂ်သေၵေႃႉၼိုင်ႈမႃးယဝ်ႉ။
တွၼ်ႈသိပ်းၸဵတ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းပႅတ်ႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
